Ndin̄wam Mme Owo Ẹsan̄a Ẹkpere Jehovah

“Owo baba kiet itieneke Ete, ibọhọke ebe ke Ami.”—JOHN 14:6.

1. Nso ewụhọ ke Jesus oro ekesetde ọkọnọ mme mbet esie, ndien nso itịbe nte Mme Ntiense Jehovah ẹnamde enye?

JESUS CHRIST okowụk mme mbet esie ete “ẹkenam kpukpru mme idụt ẹdi mbet . . . ẹnịm mmọ baptism ẹsịn ke enyịn̄ Ete ye Eyen ye Edisana Spirit.” (Matthew 28:19) Ke isua duop ẹmi ẹkebede, Mme Ntiense Jehovah ẹma ẹn̄wam se ibede miliọn owo ita ẹtiene Abasi, ndien nte ini akakade ẹnịm mmọ baptism ke uyarade uyakidem mmọ nnọ enye ndinam uduak esie. Adat nnyịn esịt didie ntem ndin̄wam mmọ ẹsan̄a ẹkpere Abasi!—James 4:8.

2. Okposụkedi ẹnịmde ediwak mbufa owo baptism, nso itịbe?

² Nte ededi, ke ndusụk idụt oro ẹnịmde ediwak mbufa mbet baptism, ukem n̄kọri oro idụhe ke ibat mme asuanetop Obio Ubọn̄. Edi akpanikọ, ana ẹkere ẹban̄a mbon oro ẹkpan̄ade, ibat mbon oro ẹkpan̄ade ke isua ke isua edide mbahade 1 eke ikie. Edi, ke isua ifan̄ ẹmi ẹkebede, ekese owo ẹma ẹduọn̄ọ kaban̄a ndusụk ntak. Ntak-a? Enye emi ye ibuotikọ oro etienede ẹyedụn̄ọde nte mme owo ẹsan̄ade ẹkpere Jehovah ye se ikemede ndidi mme ntak oro ndusụk owo ẹduọn̄ọde.

Uduak Ukwọrọikọ Nnyịn

3. (a) Didie ke utom oro ẹnọde mme mbet Jesus edi ke ukem ini ye eke angel oro ẹtịn̄de ẹban̄a ke Ediyarade 14:6? (b) Nso idi uforo uforo usụn̄ ndidemede mme owo udọn̄ ke etop Obio Ubọn̄, edi nso mfịna idu?

³ Ke “utịt ini” emi, mme mbet Jesus ẹnyene utom ndisuan ‘akwa ifiọk’ mban̄a “gospel Ubọn̄ Abasi.” (Daniel 12:4; Matthew 24:14) Utom mmọ edi ke ukem ini ye eke angel oro “enyenede nsinsi gospel ete ikwọrọ inọ mmọ ẹmi ẹdụn̄de ke isọn̄, ye kpukpru idụt ye esien ye usem ye obio.” (Ediyarade 14:6) Ke ererimbot emi esịnde idem akaha ke mme n̄kpọ isọn̄ mi, usụn̄ oro awakde ndinyene uforo n̄kan ke ndinam mme owo ẹnyene udọn̄ ke Obio Ubọn̄ Abasi nnyụn̄ n̄n̄wam mmọ ẹsan̄a ẹkpere Jehovah edi nditịn̄ nnọ mmọ mban̄a idotenyịn nsinsi uwem ke paradise isọn̄. Ke adan̄aemi emi an̄wan̄ade owo, mbon oro ẹbuanade ye ikọt Abasi n̄kukụre man ẹdụk Paradise isọn̄ọke iwụk ikpat ke mfafaha usụn̄ oro adade esịm uwem.—Matthew 7:13, 14.

4. Nte ekemde ye Jesus ye angel oro efede ke ufọt enyọn̄, nso idi uduak utom ukwọrọikọ nnyịn?

⁴ Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Angel oro efede ke ufọt enyọn̄ atan̄a “nsinsi gospel” onyụn̄ asian mbon oro ẹdụn̄de ke isọn̄ ete: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enye emi okobotde enyọn̄ ye isọn̄ ye inyan̄ ye idịm mmọn̄.” (Ediyarade 14:7) Ọwọrọ nte ke akpan uduak oro nnyịn ikwọrọde eti mbụk edi man in̄wam mme owo ẹsan̄a ẹkpere Jehovah ebe ke Christ Jesus.

Udeme Nnyịn ke Utom Jehovah

5. Ewe ikọ Paul ye eke Jesus ẹwụt ke nnyịn inam utom Jehovah, idịghe eke nnyịn?

⁵ Ke ewetde ọnọ ẹsọk mme ekemmọ Christian oro ẹyetde aran, apostle Paul etịn̄ aban̄a ‘utom edinam mme owo ẹtie ke emem’ onyụn̄ ọdọhọ ete ke Abasi anam mme owo ẹtie ke emem ye enye ke isọn̄ uwa ufak Jesus Christ. Paul ọdọhọ ete ke etie “nte n̄kpọ eke Abasi adade nnyịn ekpe ye [mme owo]” ye nte ke “imekpe mbufo ubọk ke ibuot Christ, ẹkabade ẹtie ke emem ye Abasi.” Nso inem inem ekikere! Edide nnyịn idi “mme isụn̄utom” oro ẹyetde aran “ẹmi idide ke enyịn̄ Christ,” m̀mê idi mme udiana isụn̄utom ẹmi inyenede idotenyịn eke isọn̄, nnyịn ikpedehede ifre ite ke emi edi utom Jehovah, idịghe eke nnyịn. (2 Corinth 5:18-20) Abasi enen̄ede odụri mme owo ada onyụn̄ ekpep mbon oro ẹdide ẹbịne Christ. Jesus ọkọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi: ndien nyanam enye eset ke akpatre usen. Ẹma ẹwet ke mme prophet ẹte, Abasi eyekpep mmọ kpukpru n̄kpọ; kpukpru owo eke ẹkopde uyo Ete ẹnyụn̄ ẹbọde ukpep-n̄kpọ ẹtiene Mi.”—John 6:44, 45.

6. Didie ke Jehovah enyen̄e mme idụt nte ntọn̄ọ, ndien ke ukem ini oro, mmanie ẹnyene ifụre ke “ufọk” utuakibuot esie?

⁶ Ke ukperedem ini emi, didie ke Jehovah odụri mme owo ada onyụn̄ ebererede “usụn̄ mbuọtidem” ọnọ mmọ? (Utom 14:27; 2 Timothy 3:1) Akpan usụn̄ kiet edi ndinam Mme Ntiense esie ẹtan̄a etop edinyan̄a esie ye eke ubiomikpe oro edisịmde idiọk editịm n̄kpọ emi odude ke emi. (Isaiah 43:12; 61:1, 2) Ntọt ofụri ererimbot emi ke enyen̄e mme idụt—idiọn̄ọ ubiereikpe nsobo oro edidide ke mîbịghike. Ke ukem ini oro, ke ẹdụri mme owo ẹmi ẹdide “ọsọn̄urua” ke enyịn Abasi ẹsion̄o ke editịm n̄kpọ emi, ndien mmọ ke ẹnyene ifụre ke “ufọk” utuakibuot akpanikọ esie. Jehovah ke ntem ke osu mme ntịn̄nnịm ikọ esie oro Haggai ekewetde: “Nyonyụn̄ nnyen̄e kpukpru mme idụt, ndien [ndiye n̄kpọ mme idụt, NW] ẹyedi: ndien nyesịn ubọn̄ ke ufọk emi nyọhọ.”—Haggai 2:6, 7, ikọ idakisọn̄ NW; Ediyarade 7:9, 15.

7. Didie ke Jehovah ebererede esịt mme owo onyụn̄ anam mme owo ẹsan̄a ẹkpere enye ye Eyen esie?

⁷ Jehovah esiberede esịt mme abak-Abasi ẹmi—“kpa n̄kpọ oro mme idụt ẹmade ẹkan”—man mmọ ẹkeme “ndikpan̄ utọn̄ nnọ mme n̄kpọ” oro Mme Ntiense esie ẹtịn̄de. (Haggai 2:7, Jewish Publication Society; Utom 16:14) Kpa nte ekedide ke akpa isua ikie, ndusụk ini Jehovah esida mme angel esie anam Mme Ntiense esie ẹka ẹbịne mbon oro ẹnyenede esịt akpanikọ ẹmi ẹsemede ẹkot enye ẹyom un̄wam. (Utom 8:26-31) Nte mme owo ẹkpepde ẹban̄a mme utịbe utịbe ndutịm oro Abasi anamde ọnọ mmọ ebe ke Eyen esie, Jesus Christ, ima Jehovah esidụri mmọ ada. (1 John 4:9, 10) Ih, Abasi ada “ima-mfọnido,” m̀mê “ima akpanikọ” Esie, odụri mme owo ọnọ idemesie ye Eyen esie.—Jeremiah 31:3, ikọ idakisọn̄ NW.

Mmanie ke Jehovah Odụri Ada?

8. Nso orụk owo ke Jehovah odụri ada?

⁸ Jehovah odụri mbon oro ẹyomde enye ọnọ idemesie ye Eyen esie. (Utom 17:27) Mmọ ẹmi ẹsịne mme owo ẹmi “ẹsemede ẹnyụn̄ ẹtuade ẹban̄a kpukpru mbubiam ido ẹmi mmọ ẹnamde” ke Christendom ndien, ke nditịm ntịn̄, ke ofụri ererimbot. (Ezekiel 9:4) Mmọ “ẹnyene udọn̄ ke n̄kpọ eke spirit.” (Matthew 5:3, NW) Ke akpanikọ, mmọ ẹdi “sụn̄-sụn̄ mbio [“mbon nsụhọdeidem,” ikọ idakisọn̄ NW] isọn̄,” ẹmi ẹdidụn̄de ke paradise isọn̄ ke nsinsi.—Zephaniah 2:3.

9. Didie ke Jehovah ekeme ndikụt edieke mme owo ‘nte enende ẹnyịmede nsinsi uwem,’ ndien didie ke enye odụri mmọ ẹmi ada?

⁹ Jehovah ekeme ndikot esịt owo. Edidem David ọkọdọhọ Solomon eyen esie ete: “Jehovah odụn̄ọde kpukpru esịt owo, onyụn̄ etịm ọfiọk kpukpru se ekikere obotde: afo ama oyom enye, oyokụt enye.” (1 Chronicles 28:9) Ọkọn̄ọde ke idaha esịt ye edu, m̀mê ofụri idaha ekikere owo, Jehovah ekeme ndikụt m̀mê enye ayanam n̄kpọ aban̄a mme ndutịm Abasi kaban̄a edifen mme idiọkn̄kpọ ye idotenyịn nsinsi uwem ke obufa edinen editịm n̄kpọ Abasi. (2 Peter 3:13) Ebede ke Ikọ esie, emi Mme Ntiense esie ẹkwọrọde ẹnyụn̄ ẹkpepde, Jehovah odụri ‘kpukpru mmọ ẹmi nte enende ẹnyịmede nsinsi uwem’ ọnọ idemesie ye Eyen esie, ndien mmọ ẹmi “ẹkabade ẹdi mme andinịm ke akpanikọ.” (NW)—Utom 13:48.

10. Nso iwụt ke akan̄a ibuanake ke Jehovah ndidụri ndusụk owo nda ndien idụrike mbon eken?

¹⁰ Nte Jehovah ndidụri ndusụk owo nda ndien idụrike ndusụk ekpetie nte akan̄a? Itiehe ke usụn̄ ndomokiet! Abasi ndidụri mme owo ọkọn̄ọ ke ọkpọsọn̄ udọn̄ mmọ. Enye okpono ifụre uduak mmọ. Jehovah ọnọ mme andidụn̄ isọn̄ mfịn ukem edimek oro enye ọkọnọde nditọ Israel ke se ibede isua 3,000 ẹmi ẹkebede, ke ini Moses ọkọdọhọde ete: “Mmada uwem, ye nti n̄kpọ, ye n̄kpa, ye idiọk nnịm fi ke iso mfịn emi. . . . Mmowụk enyọn̄ ye isọn̄, nte ẹdi ntiense ẹban̄a mbufo mfịn emi; mmada uwem ye n̄kpa, edidiọn̄ ye isụn̄i, nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre ye enye: koro enye edide uwem fo, ye uniọn̄ mme usen fo.”—Deuteronomy 30:15-20.

11. Didie ke nditọ Israel ẹkenyene ndimek uwem?

¹¹ Tịm fiọk ete ke nditọ Israel ẹkenyene ndimek uwem ‘ebe ke ndima Jehovah, nnyụn̄ n̄kop uyo esie, nnyụn̄ nyịre ye enye.’ Ke ini ẹketịn̄de mme ikọ oro, mbon Israel ikadaha Isọn̄ Un̄wọn̄ọ inyene kan̄a. Mmọ ẹma ẹnyene iwụk ke Unaisọn̄ Moab, ẹben̄ede idem ndibe Akpa Jordan ndụk Canaan. Ke adan̄aemi ekedide ndammana n̄kpọ mmọ ndikere mban̄a “isọn̄ emi ọfọnde, onyụn̄ an̄wan̄ade, . . . emi ọfiọrọde mmọn̄-eba ye aran-ọkwọk” oro mmọ ẹkeyomde ndibọ ke mîbịghike, idotenyịn mmọ ndisu ọkọkọn̄ọ ke mmọ ndima Jehovah, mmọ ndikop uyo esie, ye mmọ ndiyịre ye enye. (Exodus 3:8) Moses ama anam emi an̄wan̄a, ọdọhọde ete: “[Edieke afo edikpan̄de utọn̄ ọnọ ewụhọ Jehovah Abasi fo emi, NW] ami n̄wụkde fi mfịn emi, nte ama Jehovah Abasi fo, onyụn̄ asan̄a ke usụn̄ esie, onyụn̄ enịm mbet esie, ye mme ewụhọ esie, ye mme item esie, [do afo oyodu, NW] uwem onyụn̄ ọtọt: man Jehovah Abasi fo onyụn̄ ọdiọn̄ fi ke isọn̄ emi afo akade do ndida enye nnyene.”—Deuteronomy 30:16.

12. Nso ke uwụtn̄kpọ nditọ Israel ekpekpep nnyịn aban̄a utom ukwọrọikọ ye ukpepn̄kpọ nnyịn?

¹² Ndi kpukpru emi ikpekpepke nnyịn n̄kpọ iban̄a utom ukwọrọikọ ye edinọ ukpep nnyịn ke utịt ini emi? Nnyịn imesikere iban̄a Paradise isọn̄ oro edide inyụn̄ ineme iban̄a enye ke utom ukwọrọikọ nnyịn. Edi nnyịn m̀mê mme mbet oro nnyịn inamde idikwe un̄wọn̄ọ oro osude edieke edide mme ibụk ibụk ntak ẹnam nnyịn m̀mê mmọ ẹnam n̄kpọ Abasi. Ukem nte nditọ Israel, ana nnyịn ye mbon oro nnyịn ikpepde n̄kpọ ikpep ‘ndima Jehovah, ndikop uyo esie, ndinyụn̄ nyịre ye enye.’ Edieke nnyịn itide emi ke ini nnyịn inamde utom ukwọrọikọ nnyịn, nnyịn idinen̄ede idiana kiet ye Abasi ke ndidụri mme owo nnọ enye.

Mme Anamutom Abasi

13, 14. (a) Nte ekemde ye 1 Corinth 3:5-9, didie ke nnyịn idi mme anamutom Abasi? (b) Anie ekpenyene ukpono ke n̄kọri ekededi, ndien ntak-a?

¹³ Paul akanam edidiana kiet ye Abasi an̄wan̄a ebe ke nditịn̄ mban̄a editọ in̄wan̄. Enye ekewet ete: “Apollos edi nso? Paul onyụn̄ edi nso? Mmọ ẹdi mme isụn̄utom, emi okotode mmọ mbufo ẹnịm ke akpanikọ, nte Ọbọn̄ ọnọde mmọ kiet kiet. Ami n̄kọtọ, Apollos ọkọbọk ke mmọn̄; edi n̄kọri oto Abasi. Ntre ndien idịghe anditọ edi n̄kpọ, inyụn̄ idịghe andibọk ke mmọn̄, edi Abasi emi ọnọde n̄kọri. Ntem ke anditọ ye andibọk ke mmọn̄ ẹdi ukem-ukem: mmọ kiet kiet ẹyenyụn̄ ẹbọ utịp mmọ, nte ekemde ye utom mmọ. Koro nnyịn isan̄a ikpat kiet idi mme anam-utom Abasi; mbufo ẹdi in̄wan̄ eke Abasi ọkọtọde.”—1 Corinth 3:5-9.

¹⁴ Nte mme anamutom Abasi, ana nnyịn ke edinam akpanikọ itọ “ikọ Obio Ubọn̄” ke esịt mme owo, ekem ida mmọn̄ ibọk udọn̄ ekededi oro ẹwụtde ebe ke mme mfiakn̄ka ye ukpepn̄kpọ Bible oro ẹtịmde idem nte ọfọnde. Edieke isọn̄, kpa esịt, ọfọnde, Jehovah ayanam udeme esie ebe ke ndinam n̄kpasịp akpanikọ Bible ọkọri akabade eto oro on̄wụmde mfri. (Matthew 13:19, 23) Enye oyodụri owo oro ọnọ idemesie ye Eyen esie. Do, ke akpatre, n̄kọri ekededi oro odude ke ibat mme anditan̄a Obio Ubọn̄ oto utom oro Jehovah anamde ke esịt mme owo, anamde n̄kpasịp akpanikọ ọkọri onyụn̄ odụride mme utọ owo oro ọnọ idemesie ye Eyen esie.

Utom Edibọp Oro Edisọn̄ọde Ada

15. Nso uwụtn̄kpọ ke Paul akada ndiwụt nte nnyịn in̄wamde mbon en̄wen ẹkọri mbuọtidem?

¹⁵ Ke adan̄aemi idarade iban̄a n̄kọri, nnyịn imenen̄ede iyom ndikụt mme owo ẹkade iso ẹma Jehovah, ẹkopde uyo esie, ẹnyụn̄ ẹyịrede ye enye. Nnyịn imesifụhọ ke ini ikụtde nte ndusụk owo ẹbịtde ẹnyụn̄ ẹduọn̄ọde. Nte nnyịn imekeme ndinam n̄kpọ ekededi man ikpan emi? Ke uwụtn̄kpọ efen, Paul owụt nte nnyịn ikemede ndin̄wam mbon en̄wen ẹkọri mbuọtidem. Enye ekewet ete: “Baba owo kiet ikemeke ndinịm itiat-ukot-ufọk efen mbe se ẹma ẹkenịm, emi edide Jesus Christ. Edi edieke owo adade gold, m̀mê silver, m̀mê ọsọn̄-urua itiat, m̀mê obukpọk, m̀mê nnyanyan̄a, m̀mê mbio, ọbọp odori ke enyọn̄ itiat-ukot-ufọk oro; utom kpukpru owo kiet kiet ayayarade; koro usen oro oyowụt enye, koro usen oro edisierede ke ikan̄; ikan̄ oyonyụn̄ odomo se kpukpru owo ẹkenamde owụt orụk utom eke edide.”—1 Corinth 3:11-13.

16. (a) Didie ke uwụtn̄kpọ iba oro Paul akadade ẹkpụhọde ke uduak mmọ? (b) Didie ke utom edibọp nnyịn ekeme ndikabade ndi se mînọhọ uyụhọ ye se mîbọhọke ikan̄?

¹⁶ Ke uwụtn̄kpọ Paul aban̄ade in̄wan̄, n̄kọri ọkọn̄ọ ke editọ n̄kpọ ke ofụri esịt, edibọk kpukpru ini ke mmọn̄, ye edidiọn̄ Abasi. Uwụtn̄kpọ esie enye eken owụt mbiomo asan̄autom Christian kaban̄a se utom edibọp esie akabarede edi. Ndi enye ama ada nti n̄kpọutom ọbọp odori ke eti itiat idakisọn̄? Paul ọtọt ete: “Ọfọn kpukpru owo ẹkpeme se mmọ ẹbọpde.” (1 Corinth 3:10) Ke ima ikedemerede udọn̄ owo ebe ke ndisian enye mban̄a idotenyịn uwem nsinsi ke Paradise, ndi ukpepn̄kpọ nnyịn esiwụhọ ke mme akpan ifiọk N̄wed Abasi kpọt ndien ekem idori nsọn̄uyo akpan akpan ke se anade owo oro anam man enyene nsinsi uwem? Ndi ekeme ndidi ukpepn̄kpọ nnyịn esisịne emi kpọt: ‘Edieke afo oyomde ndidu uwem nsinsi ke Paradise, ana afo ekpep n̄kpọ, aka mme mbono esop, onyụn̄ abuana ke utom ukwọrọikọ’? Ke edide ntre, nnyịn ibọpke mbuọtidem owo oro idori ke eti itiat idakisọn̄, ndien ekeme ndidi se nnyịn ibọpde idisọn̄ọke ida ke mme ikan̄ idomo m̀mê ndidu mbịghi. Ndidomo ndinam mme owo ẹsan̄a ẹkpere Jehovah ebe ke sụk idotenyịn uwem ke Paradise nte ukpụhọ ke isua ifan̄ oro ẹbiatde ke ndinam n̄kpọ esie etie nte ndida “obukpọk, m̀mê nyanyan̄a, m̀mê mbio” mbọp.

Ndinam Ẹnyene Ima Ẹnọ Abasi ye Christ

17, 18. (a) Nso idi ata akpan n̄kpọ edieke anade mbuọtidem owo ebịghi? (b) Didie ke nnyịn ikeme ndin̄wam owo anam Christ odụn̄ ke esịt esie?

¹⁷ Man mbuọtidem ebịghi, ana enye ọkọn̄ọ ke ọkpọkpọ itie ebuana ye Jehovah Abasi ebe ke Jesus Christ. Nte mme anana-mfọnmma owo, nnyịn ikeme ndinyene utọ emem emem itie ebuana oro ye Abasi ebe ke Eyen esie kpọt. (Rome 5:10) Ti ete ke Jesus ọkọdọhọ ete: “Owo baba kiet itieneke Ete, ibọhọke ebe ke Ami.” Man in̄wam mbon en̄wen ẹnam mbuọtidem ọkọri, “baba owo kiet ikemeke ndinịm itiat-ukot-ufọk efen mbe se ẹma ẹkenịm, emi edide Jesus Christ.” Nso ke emi abuana?—John 14:6; 1 Corinth 3:11.

¹⁸ Ndibọp ndori ke Christ nte itiat idakisọn̄ ọwọrọ ndikpep n̄kpọ ke usụn̄ oro anamde eyen ukpepn̄kpọ Bible ọkọri ntotụn̄ọ ima ọnọ Jesus ebe ke ọyọhọ ifiọk aban̄ade udeme Esie nte Andinyan̄a, Ibuot esop, ima ima Akwa Oku, ye Edidem oro akarade. (Daniel 7:13, 14; Matthew 20:28; Colossae 1:18-20; Mme Hebrew 4:14-16) Ọwọrọ ndinam Jesus edi ata owo ọnọ mmọ tutu enye ekpere ndidụn̄ ke esịt mmọ. Akam oro nnyịn ibọn̄de iban̄a mmọ ekpebiet n̄kpeubọk oro Paul akanamde aban̄a mme Christian ke Ephesus. Enye ekewet ete: ‘Ntọn̄ọ edọn̄ nnọ Ete, nte Enye akpakam anam Christ odụn̄ ke esịt mbufo oto ke mbuọtidem; mbufo ẹkpekam ẹnyụn̄ ẹmụm n̄kam ẹnyụn̄ ẹsọn̄ọ ẹwụhọ ke ima.’—Ephesus 3:14-17.

19. Nso ikpedi utịp edinam nditọ ukpepn̄kpọ Bible nnyịn ẹkọri ima ke esịt ẹnọ Christ, edi nso ke ana ẹkpep?

¹⁹ Edieke nnyịn ibọpde ke utọ usụn̄ oro anamde ima ẹnyenede ẹnọ Christ ọkọri ke esịt nditọ ukpepn̄kpọ nnyịn, emi nte owụtde ifiọk ayada esịm edikọri ima nnọ Jehovah Abasi. Ima, ntụk, ye mbọm Jesus ẹdi ediwụt mme edu Jehovah ke mfọnmma usụn̄. (Matthew 11:28-30; Mark 6:30-34; John 15:13, 14; Colossae 1:15; Mme Hebrew 1:3) Ntre nte mme owo ẹdide ẹdifiọk ẹnyụn̄ ẹma Jesus, mmọ ẹyedi ẹdifiọk ẹnyụn̄ ẹma Jehovah.a (1 John 4:14, 16, 19) Oyom nnyịn ikpep nditọ ukpepn̄kpọ Bible nte ke Jehovah edi ntak kpukpru se Christ anamde ọnọ ubonowo ndien ke ntre ke nnyịn inyene ndikọm, nditoro, ndinyụn̄ ntuak ibuot nnọ Enye nte ‘Abasi edinyan̄a nnyịn.’—Psalm 68:19, 20; Isaiah 12:2-5; John 3:16; 5:19.

20. (a) Didie ke nnyịn ikeme ndin̄wam mme owo ẹsan̄a ẹkpere Abasi ye Eyen esie? (b) Nso ke ẹdineme ke ibuotikọ oro etienede?

²⁰ Nte mme anamutom Abasi, ẹyak nnyịn in̄wam mme owo ẹsan̄a ẹkpere enye ye Eyen esie, in̄wamde mmọ ẹkọri ima ye mbuọtidem ke esịt mmọ. Jehovah ke ntem ayakabade edi ata owo ọnọ mmọ. (John 7:28) Ebede ke Christ, mmọ ẹyekeme ndinyene n̄kpet n̄kpet itie ebuana ye Abasi, ndien mmọ ẹyema enye ẹnyụn̄ ẹyịre ye enye. Mmọ idinịmke ini nditre ima ima utom mmọ, ẹnyenede mbuọtidem nte ke mme utịbe utịbe un̄wọn̄ọ Jehovah ẹyesu ke ekemini esie. (Eseme 3:24-26; Mme Hebrew 11:6) Nte ededi, ke adan̄aemi in̄wamde mbon en̄wen ẹkọri mbuọtidem, idotenyịn, ye ima, ana nnyịn ibọp mbuọtidem nnyịn man enye ebiet okopidem nsụn̄ikan̄ emi ekemede ndiyọ n̄kpọsọn̄ oyobio. Ẹyeneme emi ke ibuotikọ oro etienede.

[Mme Ikọ idakisọn̄]

Ke Ndidụn̄ọde

◻ Didie ke nnyịn isiwak ndidemede mme owo udọn̄ ke etop Obio Ubọn̄, edi nso n̄kpọndịk idu?

◻ Nso orụk owo ke Jehovah odụri ọnọ idemesie ye Eyen esie?

◻ Israel ndidụk Isọn̄ Un̄wọn̄ọ ọkọkọn̄ọ ke nso, ndien nso ke nnyịn ikeme ndikpep nto emi?

◻ Nso udeme ke nnyịn inyene ke ndin̄wam mme owo ẹsan̄a ẹkpere Jehovah ye Eyen esie?

[Ndise ke page 10]

Okposụkedi nnyịn inọde mme owo idotenyịn nsinsi uwem ke Paradise, akpan uduak nnyịn edi ndidụri mmọ nnọ Jehovah

[Mme ndise ke page 13]

Mme mfiakn̄ka nnyịn ẹkeme ndinen̄ede nnyene uforo edieke nnyịn itịmde idem nte ọfọnde