Nte Afo Emeti?
Nte afo ama adara ndikot mme nsiondi Enyọn̄-Ukpeme eke ndondo emi? Ke edide ntre, edidi n̄kpọ udọn̄ ọnọ fi nditi se itienede emi:
◻ Ntak emi nnyịn ikemede ndinyene mbuọtidem ke mbon oro Jehovah emekde man ẹnọ ikọt esie ndausụn̄?
Jehovah esimek mme owo oro ẹnyenede mme akpan edu oro ẹyomde ọnọ mbiomo man ẹnọ ikọt esie ndausụn̄ ke usụn̄ oro enye oyomde mmọ ẹsan̄a ke akpan ini.—8/15, page 14.
◻ Nso ke nnyịn ikeme ndikpep nto ifiọk n̄kpọntịbe Jonah?
Jonah ama ekere aban̄a idemesie akaha onyụn̄ ekere esisịt aban̄a mbon efen. Nnyịn imekeme ndikpep n̄kpọ nto Jonah ke ndiyak ntụk mbon efen ẹbem ọkpọkpọ ntụk nnyịn iso.—8/15, page 19.
◻ Ke nso usụn̄ ke ẹkeme ndidọhọ ke “enyịn̄ Jehovah edi ọkpọsọn̄ tower”? (Mme N̄ke 18:10)
Enyịn̄ Abasi ndidi ebiet udịbe ọwọrọ ndiberi edem ke Jehovah ke idemesie. (Psalm 20:1; 122:4) Enye ọwọrọ ndinọ itie edikara esie ibetedem, ndinịm mme ibet ye mme edumbet esie, ndinyene mbuọtidem ke mme un̄wọn̄ọ esie, nnyụn̄ nnọ enye san̄asan̄a utuakibuot. (Isaiah 50:10; Mme Hebrew 11:6)—9/1, page 10.
◻ Didie ke usụn̄ unọ ikọ ntiense Paul ke iso mbọn̄ ọnọ nnyịn uwụtn̄kpọ?
Ke nditịn̄ ikọ nnọ Edidem Agrippa, Paul ama ada mbufiọk anam n̄kpọ, eyịrede ke akpan n̄kpọ oro ekedide ọsọ ọnọ enye ye Agrippa. Kpasụk ntre, nnyịn ikpenyene ndidori nsọn̄uyo ke ikpehe eti mbụk oro edide in̄wan̄în̄wan̄, isọn̄ọde itịn̄ iban̄a idotenyịn oro kpukpru nnyịn inyenede. (1 Corinth 9:22)—9/1, page 31.
◻ Mmanie ẹbọ ufọn ẹto ime Jehovah?
Ke ntak ime Jehovah, mfịn ediwak miliọn owo ẹnyene ifet ndidi se ẹnyan̄ade ke “usen Ọbọn̄.” (2 Peter 3:9-15) Ime esie n̄ko ayak nnyịn kiet kiet ‘isan̄a ke ndịk ye nnyek-idem inam edinyan̄a nnyịn ọwọrọ usụn̄.’ (Philippi 2:12)—9/15, page 20.
◻ Edikabade Bible eke Septuagint ekedi akpan n̄kpọ adan̄a didie?
Ẹma ẹkama edikabade emi ntatara ntatara ke ndisuan ifiọk aban̄ade Jehovah Abasi ye Obio Ubọn̄ esie emi Jesus Christ edide Edidem. Ebede ke Septuagint, ẹma ẹsịn akpan itiat idakisọn̄ ẹnọ mme Jew oro ẹkesemde usem Greek ye mme Gentile ke akpa isua ikie ndinyịme eti mbụk Obio Ubọn̄.—9/15, page 30.
◻ Nso ke n̄ke idiọk udọ ekpep nnyịn aban̄a Abasi?
Akpa, nte ke Jehovah edi “Abasi mbọm, ye mfọn, ye anyan ime, awak ima ye akpanikọ.” (Exodus 34:6) Udiana, nte ke enye “ama ndidahado” ke ini edikabade esịt ọnọde enye isọn̄ ndiwụt mbọm. (Psalm 86:5)—10/1, page 12, 13.
◻ Ini ewe ke ẹdikụt mme emem emem idaha oro ẹn̄wọn̄ọde ke Isaiah 65:21-25?
Nte mme andituak ibuot nnọ Jehovah oro ẹdianade kiet ke paradise eke spirit mfịn, mbon oro ẹyetde aran ye “mme erọn̄ en̄wen” ẹnyene emem oro Abasi ọnọde idahaemi. (John 10:16) Ndien utọ emem oro ayatara esịm ata ata Paradise, ke ini ‘ẹdinamde uduak Abasi ke ofụri isọn̄, kpasụk nte ẹnamde ke heaven.’ Ke ini oro mme ikọ prọfet Isaiah ẹyesu ọyọhọ ọyọhọ. (Matthew 6:10)—10/15, page 24.
◻ Ntak emi mme Christian ẹsinịmde mme usọrọ edifiak nti usen ndọ edi mînịmke eke edifiak nti mme usen emana?
Bible idọhọke ke ndọ ọdiọk. Ke ofụri ofụri enye edi mbubehe idemowo edieke mme Christian ẹmekde ndisio ini nnịm ndifiak nti ndọ mmọ, ndikere mban̄a idatesịt edinam oro ye ubiere mmọ ndinam n̄kpọ kaban̄a edikụt unen nte ebe ye n̄wan. Nte ededi, Bible ewet mme usọrọ usen emana mme okpono ndem kpọt, ndien ẹkebuan mmọ ẹmi ye mme ibak ibak edinam.—10/15, page 30, 31.
◻ Ke uwụtn̄kpọ Paul oro ẹwetde ke 1 Corinth 3:12, 13, nso ke “ikan̄” ada aban̄a, ndien nso ke kpukpru Christian ẹkpenyene ndidiọn̄ọ?
Odu ikan̄ emi kpukpru nnyịn isobode ke uwem—mme udomo mbuọtidem nnyịn. (John 15:20; James 1:2, 3) Ẹyedomo kpukpru owo oro nnyịn ikpepde akpanikọ. Edieke nnyịn ikpepde n̄kpọ idiọk idiọk, ndiọi utịp ẹkeme ndidu, nte Paul okodụride owo utọn̄. (1 Corinth 3:15)—11/1, page 11.
◻ Didie ke Noah ‘akasan̄a ye ata Abasi’? (Genesis 6:9)
Noah akasan̄a ye Abasi koro enye akanamde se Abasi ọkọdọhọde enye anam. Sia enye akayakde ofụri uwem esie esịn ke ndinam uduak Abasi, Noah ama adara ufiop ufiop, ntotụn̄ọ itie ebuana ye Abasi.—11/15, page 10.
◻ Nditre ndifiọk nnennen ini emi Abasi edisiode usiene ọnọ ndiọi owo ọnọ nnyịn ifet ndinam nso?
Emi ọnọ nnyịn ifet ndisọn̄ọ nte ke nnyịn imenen̄ede ima Jehovah inyụn̄ iyom ndisan̄a ke usụn̄ esie ke nsinsi. Enye owụt n̄ko ete ke nnyịn imanam akpanikọ inọ Abasi inyụn̄ ibuọt idem ke mme usụn̄ esie ndise mban̄a mme n̄kpọ. Akan oro, emi an̄wam ndinam nnyịn idu ke ukpeme inyụn̄ itaba idap ke n̄kan̄ eke spirit. (Matthew 24:42-44)—11/15, page 18.
◻ Nso ke ndibuọt idem ‘ke enyịn̄ Eyen Abasi’ ọwọrọ? (1 John 5:13)
Emi ọwọrọ ndinịm kpukpru ewụhọ Christ, esịnede ewụhọ esie ‘ndima kiet eken.’ (John 15:14, 17) Ima oyom ndinam eti nnọ mbon en̄wen. Enye akpan kpukpru asari eke orụk, eke ido ukpono, ye eke n̄kaowo.—12/1, page 7.
◻ Ntak emi ‘ẹsuade’ Mme Ntiense Jehovah? (Matthew 10:22)
Ẹsua Mme Ntiense Jehovah nte mînenke ke mme ukem ntak oro ẹkekọbọde mme akpa Christian. Akpa, Mme Ntiense Jehovah ẹda mme edinịm ke akpanikọ eke ido ukpono mmọ ẹnam n̄kpọ ke mme usụn̄ oro anamde ndusụk owo ẹkûma mmọ. Udiana, mmọ ẹsobo nsunsu edori ikọ—mme in̄wan̄în̄wan̄ nsu ye ediyụt mme edinịm ke akpanikọ mmọ.—12/1, page 14.