“Abasi Amama Owo Eke Ọnọde Ke Inemesịt”

JEHOVAH edi uwụtn̄kpọ ntatubọk. Ke akpanikọ, Bible ọdọhọ ete ke enye edi Andinọ “kpukpru eti edinọ ye kpukpru enọ eke ẹfọnde ẹma.” (James 1:17) Ke uwụtn̄kpọ, kere ban̄a mme n̄kpọ oro Abasi okobotde. Enye ama anam udia oro enemde, idịghe ibe ibe; mme flawa oro ẹyede uduot, idịghe n̄kịm n̄kịm; usoputịn oro eyede, idịghe ndebe ndebe. Ih, kpukpru ikpehe edibotn̄kpọ Jehovah ẹnọ uyarade ima ye ntatubọk esie. (Psalm 19:1, 2; 139:14) N̄ko-n̄ko, Jehovah edi Andinọ ke inemesịt. Enye okop idatesịt ndinam eti n̄kpọ ke ufọn mme asan̄autom esie.—Psalm 84:11; 149:4.

Ẹma ẹwụk nditọ Israel ẹte ẹwụt ntatubọk ebietde eke Abasi ke edinam mmọ ye kiet eken. “Kûsọn̄ esịt fo, kûnyụn̄ ufat ubọk fo ye eyen-usọ eke edide ubuene,” ntre ke Moses akasian mmọ. “Kûtre ndinọ enye, esịt fo okûnyụn̄ ọdiọk.” (Deuteronomy 15:7, 10) Sia edinọ enọ ekenyenede ndito esịt, nditọ Israel ẹkenyene ndikop idatesịt mban̄a mme edinam ntatubọk.

Ẹma ẹnọ mme Christian ukem item oro. Ke akpanikọ, Jesus ọkọdọhọ ete ke “ọfọn ndinọ akan ndibọ.” (Utom 20:35) Mbet Jesus ẹma ẹnịm eti uwụtn̄kpọ ke ndinọ ke inemesịt. Ke uwụtn̄kpọ, Bible obụk ete ke mbon oro ẹkekabarede ẹdi mme andinịm ke akpanikọ ke Jerusalem ẹma “ẹnyam inyene ye n̄kpọ mmọ, ẹdeme ẹnọ kpukpru owo, adan̄a nte owo ekededi ananade.”—Utom 2:44, 45.

Edi ke ukperedem unana ama esịm mme atat ubọk mbon Judea ẹmi. Bible itịn̄ke nnennen se ikakam idide ntak unana mmọ. Ndusụk nditọ ukpepn̄kpọ ẹdọhọ ke ekeme ndidi akan̄ oro ẹtịn̄de ẹban̄a ke Utom 11:28, 29 ekedi ntak. Ke idaha ekededi, mme Christian oro ẹkedide mbon Judea ẹkedu ke nnanenyịn, ndien Paul okoyom ndikụt nte ke ẹyese ẹban̄a unana mmọ. Didie ke enye edinam emi?

Etịbe Kaban̄a Mbon Unana

Paul ama okot mme esop tutu esịm ke Macedonia ndinọ un̄wam, ndien enye ama anam ndutịm man ẹtịp etịbe kaban̄a mme Christian oro ẹkedude ke unana ke Judea. Paul ekewet ọnọ mbon Corinth ete: “Nte n̄kọnọde mme ufọk Abasi ke Galatia uyo nte ẹnam, mbufo ẹnam kpa ntre. Ke akpa usen urua, mbufo owo kiet kiet [“ke ufọk esie,” NW] ẹsio n̄kpọ ke udori eke ẹkụtde, ẹkpọnọde ẹnịm n̄kan̄ kiet.”a—1 Corinth 16:1, 2.

Paul okoyom ẹnọ okụk emi usọp usọp ẹsọk nditọete ke Jerusalem, edi mbon Corinth ikọsọpke inam n̄kpọ iban̄a item Paul. Ntak-a? Ndi mmọ ikekereke iban̄a nnanenyịn nditọete mmọ ẹdide mbon Judea? Idịghe ntre, koro Paul ama ọfiọk ete ke mbon Corinth “[ẹkeda] iso ke kpukpru n̄kpọ, ke mbuọtidem, ye editịn̄ ikọ, ye ifiọk, ye kpukpru ufiopesịt.” (2 Corinth 8:7) Eyedi mmọ ẹkenen̄ede ẹsịn idem ẹse ẹban̄a mme akpan n̄kpọ efen oro Paul eketịn̄de ke akpa leta oro enye ekewetde ọnọ ẹsọk mmọ. Edi idahaemi idaha oro okodude ke Jerusalem okoyom usọp usọp edinam. Ntre Paul ama ewet aban̄a n̄kpọ emi ke udiana leta oro enye ọkọnọde ẹsọk mbon Corinth.

Eben̄e Ndiwụt Ntatubọk

Akpa, Paul ama asian mbon Corinth aban̄a mbon Macedonia, ẹmi okodotde ẹkpebe nte mmọ ẹkenamde n̄kpọ ẹban̄a utom unọ un̄wam. Paul ekewet ete: “Ke akwa ukụt eke odomode mmọ, n̄wak-n̄kan idatesịt mmọ ye ọkpọsọn̄ unana mmọ akanam akwa ntatubọk mmọ owụt idem uwak-uwak.” Mbon Macedonia ikoyomke ẹkpakpak mmimọ. Ke edide isio, Paul ọkọdọhọ ete ke mmọ “ẹsọn̄ọ ẹkpe ye nnyịn, ẹben̄e mfọn emi, ẹte, [ẹyak mmimọ] itiene inyene udeme.” Ntatubọk mbon Macedonia oro ekedide ke inemesịt etetịm edi n̄wọrọnda ke ini nnyịn ikerede nte ke mmọ ke idemmọ ẹkedu ke “ọkpọsọn̄ unana.”—2 Corinth 8:2-4.

Ke nditoro mbon Macedonia, ndi Paul okodomo ndidemede edu ndomoidem ke otu mbon Corinth? N̄wan̄ansa-o, koro enye ama ọfiọk ete ke emi ikedịghe nnennen usụn̄ ndidemede owo anam n̄kpọ. (Galatia 6:4) N̄ko-n̄ko, enye ama ọfiọk ete ke mbon Corinth ikoyomke ẹsesuene mmimọ mbemiso inamde nnennen n̄kpọ. Utu ke oro, enye ama enyene mbuọtidem nte ke mbon Corinth ẹma ẹnen̄ede ẹma nditọete mmọ ẹdide mbon Judea ẹnyụn̄ ẹyom nditịp n̄kpọ nsịn ke n̄kpọ un̄wam oro. Enye ọkọdọhọ mmọ ete: “Mbufo [ẹkebem] iso ẹtọn̄ọ isua oko, idịghe ndinanam ikpọn̄, edi ndidaduak n̄ko.” (2 Corinth 8:10) Ke akpanikọ, ke ndusụk ikpehe edinọ n̄kpọ un̄wam oro, mbon Corinth ke idemmọ ẹma ẹdot se ẹkpebede. “Mmọfiọk nte mbufo ẹnyịmede ndinam utom emi, mmonyụn̄ nda mbufo nnam mbụre nsian mbon Macedonia,” ntre ke Paul ọkọdọhọ mmọ, adiande ete: “Ifiopesịt mbufo ama edemede ediwak mmọ.” (2 Corinth 9:2, sịghisịghi ubọkn̄wed edi eke nnyịn.) Nte ededi, idahaemi, ama oyom mbon Corinth ẹnanam ifiopesịt ye edinyịme esịt mmọ ẹwụt.

Ntem, Paul ama ọdọhọ mmọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Do, uduak Paul ikedịghe ndinyenyịk mbon Corinth, koro ọsọsọn̄ owo ndidi andinọ ke inemesịt ke ini ẹkpakde-kpak enye. Nte an̄wan̄ade, Paul akada nte ke nnennen uduakesịt ama ododu, nte ke owo kiet kiet ama ebebiere ndinọ. Ke adianade do, Paul ọkọdọhọ mmọ ete: “Edieke edinyịme esịt odude, enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” (2 Corinth 8:12) Ih, ke ini edinyịme esịt odude—ke ini ima onụkde owo—Abasi ọyọbọ se enye ọnọde, inamke n̄kpọ ọkpọkọm ekpetie nte ekpri adan̄a didie.—Men Luke 21:1-4 domo.

Mme Andinọ ke Inemesịt Mfịn

N̄kpọ un̄wam oro ẹkenọde ẹsọk mme Christian oro ẹkedide mbon Judea ọnọ n̄wọrọnda uwụtn̄kpọ kaban̄a eyo nnyịn. Mme Ntiense Jehovah ẹnam ubịnikọt ukwọrọikọ ke ofụri ererimbot, ẹdade udia oro ọnọde nsọn̄idem ẹsọk ediwak miliọn owo ẹmi ẹkpade biọn̄ ke n̄kan̄ eke spirit. (Isaiah 65:13, 14) Mmọ ẹnam emi ke ndinịm ewụhọ Jesus oro: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism . . . ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.

Ndinam ewụhọ emi imemke utom. Enye esịne ndidiọn̄ ufọkidụn̄ mme isụn̄utom ye se iwakde ikan n̄kọk itieutom ikie ke ofụri ererimbot. Enye n̄ko abuana edibọp mme Ufọkmbono Obio Ubọn̄ ye mme Ufọk Mbono man mme andituak ibuot nnọ Jehovah ẹnyene mme itie oro ẹdotde ndisop idem nnyụn̄ nsịn udọn̄ nnọ kiet eken. (Mme Hebrew 10:24, 25) Ndusụk ini, Mme Ntiense Jehovah ẹsinọ mme n̄kpọ un̄wam n̄ko ẹka mme ikpehe oro oto-obot afanikọn̄ abiatde.

Kere, n̄ko, ban̄a ata akamba ubiatokụk ke ndimịn̄ mme n̄wed. Ke urua kiet kiet, ke ẹbaharede ukem ukem, ẹmịn̄ se ibede idem Enyọn̄-Ukpeme 22,000,000 m̀mê n̄kpọ nte idem Awake! 20,000,000. Ke adianade ye edinọ udia eke spirit eke ofụri ini emi, ẹsion̄o ediwak miliọn ikpọ n̄wed, ndiye uduot n̄kpri n̄wed, mme ọkpọ umụmikọ, ye mme kaset vidio ke isua ke isua.

Didie ke ẹnọ ofụri utom ẹmi ibetedem? Ebe ke mme etịbe unyịmesịt. Owo inọhọ mme etịbe ẹmi man ẹnam mme owo ẹfiọk m̀mê ke ntak ibụk ibụk udọn̄, edi man ẹnam utuakibuot akpanikọ aka iso. Ntem, utọ edinọ oro esida inemesịt ọsọk andinọ, ọkọrọ ye edidiọn̄ Abasi. (Malachi 3:10; Matthew 6:1-4) Idem nditọwọn̄ ke otu Mme Ntiense Jehovah ẹwụt ke mmimọ idi mme atatubọk andinọ ke inemesịt. Ke uwụtn̄kpọ, ke ama okokop aban̄a nte oyobio akabiatde n̄kpọ ke ikpehe kiet ke United States, Allison edide isua inan̄ ke emana ama etịp $2. “Emi edi ofụri okụk oro nnyenede ke ekebe okụk mi,” ntem ke enye ekewet. “Mmọfiọk nte ke nditọwọn̄ ẹma ẹtaba kpukpru n̄kpọ mbre ye n̄wed ye nditọ ọkpọ mmọ. Ekeme ndidi mbufo ẹyekeme ndida okụk emi ndep n̄wed kiet nnọ ekpri eyenan̄wan edide ubọkn̄ka mi.” Maclean, edide isua itiaita, ekewet ete ke imọ ima ikop inemesịt nte ke baba kiet ke otu nditọete imọ ikakpaha ke oyobio oro. Enye ama adian ete: “Ami n̄kenyene $17 ke ndinyam mme ufak wheel moto ye ete mi. N̄koyom ndida okụk mi ndep n̄kpọ, edi ekem n̄kere mban̄a nditọete ẹmi.”—Se n̄ko ekebe odude ke enyọn̄ emi.

Ke akpanikọ, Jehovah esikop idatesịt ndikụt n̄kpri ye ikpọ owo ẹnịmde udọn̄ n̄kpọ Obio Ubọn̄ esie akpa ebe ke ‘ndikpono enye ke inyene mmọ.’ (Mme N̄ke 3:9, 10) Edi akpanikọ, baba owo kiet ikemeke ndinen̄ede mfori Jehovah, koro enye enyene kpukpru n̄kpọ. (1 Chronicles 29:14-17) Edi ndinọ utom emi ibetedem edi ifetutom oro ọnọde andituak ibuot ifet ndiwụt ima oro enye enyenede ọnọ Jehovah. Nnyịn imowụt esịtekọm iban̄a kpukpru owo ẹmi esịt onụkde mmọ ndinam n̄kpọ ke utọ usụn̄ oro.

[Mme Ikọ idakisọn̄]

[Ekebe ke page 26, 27]

Mme Usụn̄ Ẹmi Ndusụk Owo Ẹmekde Ndinọ Mme Etịbe Ẹnọde Kaban̄a Utom Ofụri Ererimbot

Ediwak owo ẹsinịm, mîdịghe ẹnam ndutịm ẹban̄a, ibatokụk oro mmọ ẹdisịnde ke mme ekebe etịbe oro ẹdiande idiọn̄ọ: “Contributions to Society.” Ke ọfiọn̄ kiet kiet mme esop ẹsinọ okụk emi aka edide ibuot itieutom ofụri ererimbot ke Brooklyn, New York, m̀mê ọfis n̄kọk itieutom n̄kann̄kụk.

Ẹkeme ndinọ okụk imaesịt nnennen ẹsọk Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, m̀mê ọfis N̄ka oro esede aban̄a idụt mbufo. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken ke etịbe. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄în̄wan̄ nte ke emi edi enọ.

Ndutịm Ẹnamde Ẹnọ Se Ẹnịmde Ke Ubiọn̄

Ẹkeme ndinọ okụk ẹsọk Watch Tower Society ke ndutịm oro ẹnamde san̄asan̄a emi edide, edieke andinọ enyenede ọkpọkpọ n̄kpọ ndida enye nnam, ẹnọ ẹfiak ẹsọk enye. Kaban̄a ntọt efen efen, mbọk nyene nneme ye Treasurer’s Office ke adres ẹwụtde ke enyọn̄ emi.

Enọ Emi Ẹdiomide-Diomi

Ke adianade ye edinọ okụk nte ata enọ ye mme etịbe okụk oro ẹsịnde ke ubiọn̄, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ ẹmi ẹsịne:

Insurance: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom.

Ibatokụk Ban̄k: Ẹkeme ndinam ibatokụk ban̄k, n̄wed okụk oro ẹsịnde ke ban̄k ẹyom udori, m̀mê okụk ukpọn̄ utom owo ẹdu ke enyịn̄ mîdịghe ẹnam ẹkpe ke ini ẹkpade ẹnọ Watch Tower Society, nte ekemde ye ndutịm ban̄k n̄kann̄kụk.

Inyene ye Mbubehe: Ẹkeme ndinọ Watch Tower Society inyene ye mbubehe edide ke ndinọ nte ata enọ m̀mê ke idak ndutịm anamde ẹka iso ẹkpe udori ẹnọ andinọ.

Isọn̄ ye Inyene: Ẹkeme ndinọ Watch Tower Society isọn̄ ye inyene oro ẹkemede ndinyam edide ke edinọ nte ata enọ m̀mê ke ndimụm n̄kpọ akpa ke isọn̄ ye inyene n̄kama nnọ andinọ, emi ekemede ndisụk n̄ka iso ndụn̄ do ke eyouwem esie. Owo oro ekpenyene nditọt N̄ka mbemiso ayakde isọn̄ ye inyene ekededi ọnọ N̄ka.

Unen N̄kpọ Akpa ye Mme Ebuọt: Ẹkeme ndiyak inyene m̀mê okụk nnọ Watch Tower Society ke ndinọ enye unen ndidia n̄kpọ akpa oro ibet enyịmede, mîdịghe ẹkeme ndiwet enyịn̄ N̄ka nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinam ẹsụhọde urua tax.

Nte ikọ oro “enọ emi ẹdiomide-diomi” owụtde, mme utọ enọ ẹmi nte ido edide ẹyom andinọ anam ndutịm. Man ẹn̄wam mme owo oro ẹnyenede udọn̄ ndinam N̄ka ọbọ ufọn ebe ke ndusụk orụk enọ ẹmi ẹdiomide-diomi, N̄ka etịm ediye uduot ekpri n̄wed ke Ikọmbakara ẹkotde Planned Giving to Benefit Kingdom Service Worldwide. Ẹkewet ediye uduot ekpri n̄wed emi ke ntak ediwak mbụme oro ẹbụpde N̄ka kaban̄a mme enọ, unen n̄kpọ akpa, ye ebuọt. Enye n̄ko esịne mme ntọt efen efen kaban̄a ufọk, okụk, ye ndutịm tax. Ndien ẹtịm enye man an̄wam mme owo ke United States ẹmi ẹdiomide ndinọ N̄ka san̄asan̄a enọ idahaemi m̀mê ndikpọn̄ n̄kpọ akpa nnọ ke ini ẹkpade man ẹmek usụn̄ oro ọfọnde onyụn̄ okụtde unen akan ndinam ntre ke ẹkerede ẹban̄a mme idaha ubon ye ọkpọkpọ idaha mmọ.

Ke ẹma ẹkekot ediye uduot ekpri n̄wed emi ẹnyụn̄ ẹnyene nneme ye Itieutom Esede Aban̄a Enọ Emi Ẹdiomide-Diomi, ediwak owo ẹma ẹkeme ndin̄wam N̄ka ndien ke ukem ini oro ẹbọ n̄kponn̄kan ufọn ukpe tax ẹto edinam ntre. Ẹkpenyene ndinam Itieutom Esede Aban̄a Enọ Emi Ẹdiomide-Diomi ọfiọk aban̄a onyụn̄ ọbọ n̄wetnnịm n̄kpọ oro odotde ke ekededi ke otu ndutịm ẹmi. Mbon oro ẹnyenede udọn̄ ke ediye uduot ekpri n̄wed emi m̀mê ke ekededi ke otu ndutịm enọ ẹmi ẹkpenyene ndinyene nneme ye Itieutom Esede Aban̄a Enọ Emi Ẹdiomide-Diomi, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi m̀mê ke ọfis N̄ka emi anamde utom ke idụt mbufo.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000

[Ekebe ke page 28]

Nditọwọn̄ Ẹdi Mme Andinọ Ke Inemesịt N̄ko!

Nyom ndinọ mbufo emi man ẹnam ediwak n̄wed ẹnọ nnyịn. N̄kọbọk okụk emi nnịm oto ke ndin̄wam ete mi. Ẹsọsọn̄ọ etieti ke kpukpru ọkpọsọn̄ utom ẹmi mbufo ẹnamde.​—⁠Pamela, isua itiaba.

Ami mmọnọ $6.85 ẹsọk mbufo man an̄wam ẹbọp mme Ufọkmbono Obio Ubọn̄ efen efen. N̄kenyene enye ke ndaeyo emi ke ini n̄kanyamde mmịn sokoro ntantan ke efak.​—⁠Selena, isua itiokiet.

Ami n̄kọbọk uman unen emi n̄kenyenede ekikọ ye uman unen efen nto enye. Mma nyak akpatre oro nnọ Jehovah. Ke akpatre enye ama aman uman unen ita, ẹmi n̄kanyamde. Mmọnọ okụk oro ẹdi man ẹda ẹnam utom Jehovah.​—⁠Thierry, isua itiaita.

Kpukpru okụk nnyenede edi emi! Mbọk ẹda enye ẹnam n̄kpọ ke ọniọn̄. Ama ọsọn̄ ndibọk enye nnịm. Dollar 21 esịne mi.​—⁠Sarah, isua duop.

Ami n̄kemen akpa ke se ẹkenọde ẹnam ke ufọkn̄wed, ntre n̄kenyene ndika udomo eke n̄kann̄kụk. Mma n̄kemen akpa do n̄ko ndien mmen ọyọhọ iba ke akpatre udomo eke mbahade obio ukara. Ẹma ẹnọ mi okụk ke kpukpru ẹmi. Nyom ndinọ N̄ka ndusụk ke otu okụk oro. N̄kere ke n̄kekeme ndibọ mme utịp ẹmi ke ntak ukpep oro mbọde nto Ufọkn̄wed Utom Ukara Abasi. Mma nnyene uko nditịn̄ ikọ ke iso mme andinọ ibọrọ.​—⁠Amber, ọyọhọ ubet ukpepn̄kpọ itiokiet.

N̄kpama ndinọ mbufo emi man ẹnọ Jehovah. Ẹbụp enye se ẹkpedade enye ẹnam. Enye ọfiọk kpukpru n̄kpọ.​—⁠Karen, isua itiokiet.

[Mme ndise ke page 25]

Ẹda mme etịbe imaesịt ẹnọ utom Mme Ntiense Jehovah ibetedem