Ẹsọn̄ọ Ẹda ke Ubọhọ-Ufụn Emi Abasi Ọnọde!
“Christ okosio nnyịn ke itie ufụn, ete idi nditọisọn̄; ẹsọn̄ọ ẹda ndien, ẹkûyak ẹtọn̄ọ ntak ẹkọmọ mbufo ke ọkpọnọ itie ufụn.”—GALATIA 5:1.
1, 2. Didie ke ẹketaba ubọhọ-ufụn emi Abasi ọnọde?
IKỌT Jehovah ẹbọhọ ufụn. Edi mmọ iyomke ndida ke idem n̄kpọn̄ Abasi, koro oro ọkpọwọrọ ndidụk ufụn nnọ Satan. Mmọ ẹma n̄kpet n̄kpet itie ebuana mmọ ye Jehovah ẹnyụn̄ ẹdat esịt ke ubọhọ-ufụn oro enye ọnọde mmọ.
2 Akpa ete ye eka nnyịn, Adam ye Eve, ẹma ẹtaba ubọhọ-ufụn emi Abasi ọkọnọde ke ndinam idiọkn̄kpọ nnyụn̄ ndụk ufụn nnọ idiọkn̄kpọ, n̄kpa, ye Devil. (Genesis 3:1-19; Rome 5:12) Kamse, Satan ama atan̄ kpukpru owo ọdọn̄ ke usụn̄ idiọkn̄kpọ oro adade osịm nsobo! Edi mbon oro ẹsọn̄ọde ẹda ke ubọhọ-ufụn emi Abasi ọnọde ẹsan̄a ke usụn̄ oro adade osịm uwem nsinsi.—Matthew 7:13, 14; 1 John 5:19.
Edibọhọ Ufụn
3. Nso idotenyịn ke Abasi okosio owụt ke Eden?
3 Jehovah ama aduak ete ke ẹyesio mbon oro ẹkponode enyịn̄ imọ ke itie ufụn Satan, idiọkn̄kpọ, ye n̄kpa. Ẹkenọ idotenyịn oro ke ini Abasi akasiande urụkikọt emi Satan akadade anam n̄kpọ ke Eden ete: “Nyenyụn̄ nsịn usua ke ufọt fo ye n̄wan, ye ke ufọt ubon [“mfri,” NW] fo ye ubon [“mfri,” NW] esie: enye eyenuak fi ibuot, afo eyenyụn̄ anuak enye nditịn̄ikpat.” (Genesis 3:14, 15) Jesus Christ, kpa Mfri otode esop Jehovah eke heaven, ama ọbọ ufen edinuak nditịn̄ikpat ke ini enye akakpade ke eto, edi Abasi ke ntre ama ọnọ uwa ufak ndisio ubonowo ẹmi ẹnịmde ke akpanikọ mfep ke ufụn idiọkn̄kpọ ye n̄kpa. (Matthew 20:28; John 3:16) Nte ini akade, Jesus eyenuak Satan ibuot, kpa akani Urụkikọt oro.—Ediyarade 12:9.
4. Nso ubọhọ-ufụn ke Abraham ekenyene, ndien nso ke Jehovah ọkọn̄wọn̄ọ ọnọ enye?
4 N̄kpọ nte isua 2,000 ke ẹma ẹken̄wọn̄ọ un̄wọn̄ọ oro ke Eden, Abraham ‘ufan Jehovah’ ama okop uyo Abasi onyụn̄ ọkpọn̄ obio Ur aka ebiet en̄wen. (James 2:23; Mme Hebrew 11:8) Enye ke ntre ama ọbọ ubọhọ-ufụn emi Abasi ọnọde inyụn̄ idụhe uwem aba nte ofụn ke ererimbot nsunsu ido ukpono, mbiara ukaraidem, ye ọdiọkitọn̄ unyamurua Satan. Abasi ama adian mme un̄wọn̄ọ ke prọfesi eke Eden oro, nte ke kpukpru ubon ye idụt ẹyediọn̄ idemmọ ke ntak Abraham ye Mfri esie. (Genesis 12:3; 22:17, 18) Abraham ikenyeneke ubiomikpe koro ‘enye ọkọbuọtde idem ye Jehovah, emi akabatde oro ọnọ enye ke edinen ido.’ (Genesis 15:6) Mfịn, ukem n̄kpet n̄kpet itie ebuana oro ye Jehovah omosio owo ke ubiomikpe n̄kpa ye ke itie ufụn ererimbot emi esịnede ke ubọk Satan.
Ndamban̄a Uwụtn̄kpọ Oro Omụmde Udọn̄
5. Ẹkemen emana Isaac ẹkeyịri ye ewe mme idaha?
5 Man Abraham ekpenyene mfri, Sarah, n̄wan esie oro ekedide ada, ama emen ofụnan̄wan esie, Hagar, ọnọ enye, nte andiman eyen. Ebede ke enye, Abraham ama obon Ishmael, edi Abasi ikemeke enye nte Mfri oro ẹken̄wọn̄ọde. Utu ke oro, ke ini Abraham ekedide isua 100 ke emana Sarah okonyụn̄ edide isua 90, Jehovah ama anam mmọ ẹkeme ndinyene eyeneren oro ẹkekerede Isaac. Ke ini Ishmael akasakde Isaac nsahi, ẹma ẹbịn Hagar ye eyeneren esie ẹfep, ẹkpọn̄de eyeneren Abraham oro Sarah, amana-isọn̄ an̄wan akamande, nte mfri Abraham oro mfan̄a mîdụhe. Ukem nte Abraham, Isaac n̄ko ama owụt mbuọtidem onyụn̄ adara ubọhọ-ufụn emi Abasi ọkọnọde.—Genesis 16:1-16; 21:1-21; 25:5-11.
6, 7. Nso ke nsunsu mme andikpep ẹkenam ndusụk mbon Galatia ẹmi ẹkedide Christian ẹnịm ke akpanikọ, edi nso ke Paul akanam an̄wan̄a?
6 Mme n̄kpọntịbe ẹmi ẹkeda ẹban̄a se idide ata akpan n̄kpọ inọ mme ama ubọhọ-ufụn emi Abasi ọnọde. Ẹma ẹwụt emi ke n̄wed emi apostle Paul ekewetde ọnọ ẹsọk mme esop ke Galatia ke n̄kpọ nte 50 osịm 52 E.N. Etisịm ini oro otu ukara ama ebiere ete ke edina mbobi idịghe se ẹyomde ẹto mme Christian. Edi nsunsu mme andikpep ẹma ẹkpak ndusụk mbon Galatia ẹte ke oro ekedi akpan ikpehe ke Ido Ukpono Christ.
7 Paul ama asian mbon Galatia ete: Ẹbat owo ke edinen ebe ke enye ndibuọt idem ke Christ, idịghe ke ntak utom Ibet Moses. (Ga 1:1–3:14) Ibet oro ikabiatke un̄wọn̄ọ oro ẹkeyịride ye ediomi Abraham ifep edi ama anam ndudue owụt idem onyụn̄ anam n̄kpọ nte andikpeme oro adade owo ọsọk Christ. (Ga 3:15-25) Ebede ke n̄kpa esie, Jesus ama osion̄o mbon oro ẹdude ke idak Ibet efep, anamde mmọ ẹkabade ẹdi nditọ Abasi. Ntre, edifiak mbịne ndutịm edinịm usen, ọfiọn̄, ini, ye isua ọkpọwọrọ ndifiak n̄kodụk ufụn. (Ga 4:1-20) Paul ndien ekewet ete:
8, 9. (a) Ke ikọ idemfo, nam se Paul eketịn̄de ke N̄wed Mbon Galatia 4:21-26 an̄wan̄a ibio ibio. (b) Ke ndamban̄a uwụtn̄kpọ emi, mmanie mîdịghe nso ke Abraham ye Sarah ẹkeda ẹban̄a, ndien anie edi Mfri oro ẹken̄wọn̄ọde?
8 “Ẹsian mi, mbufo ẹmi ẹyomde ndidu ke idak ibet, nte mbufo ikopke ibet? Koro ẹwet ẹte Abraham ekenyene nditọiren iba, kiet [Ishmael] oto ofụn an̄wan [Hagar], kiet [Isaac] oto amana-isọn̄ [Sarah]. Eyen emi otode ofụn an̄wan akamana nte ido obụkidem edide, edi enyeemi otode amana-isọn̄ akamana oto un̄wọn̄ọ Abasi. N̄ke odụk ke esịt orụk n̄kpọ emi esịne. Iban iba ẹmi ẹdi ediomi iba; kiet [Ibet ediomi] oto ke Obot Sinai [ke ebiet emi Abasi ọkọtọn̄ọde ediomi oro ye nditọ Israel], aman nditọ esịn ke ufụn, emi edide Hagar. [Ediomi enye eken ekedi enyeoro ẹkenamde ye Abraham ẹban̄a Mfri esie.] Koro Hagar oro edi Sinai, obot emi odude ke Arabia, Enye asan̄a ekekem ye Jerusalem emi odude kemi; koro Jerusalem ye nditọ esie [mme andito ubon Abraham, Isaac, ye Jacob] ẹtie ke ufụn. Edi Jerusalem emi odude ke enyọn̄ edi amana-isọn̄, onyụn̄ edi enye edi eka nnyịn.”—Galatia 4:21-26.
9 Ke ndamban̄a n̄kpọntịbe emi, Abraham akada aban̄a Jehovah. ‘Amana-isọn̄ an̄wan,’ kpa Sarah, akada aban̄a “n̄wan” Abasi, m̀mê edisana esop eke enyọn̄. Enye okosio Christ edi, kpa Mfri ndamban̄a n̄wan oro ye eke Akamba Abraham. (Galatia 3:16) Man owụt mme owo usụn̄ ndibọhọ ndedehe utuakibuot, idiọkn̄kpọ, ye Satan, Jesus ama ekpep mme owo akpanikọ onyụn̄ ayarade nsunsu ido ukpono, edi Jerusalem ye nditọ esie ẹsụk ẹdu ke ufụn ido ukpono koro mmọ ẹkesịnde enye. (Matthew 23:37, 38) Mme anditiene Jesus ẹkedide mme Jew ẹma ẹbọhọ Ibet, emi okowụtde ufụn oro mmọ ẹkedụkde ẹnọ unana mfọnmma, idiọkn̄kpọ, ye n̄kpa. Mbon oro ẹbọhọde ke akpanikọ ẹdi kpukpru owo ẹmi ẹnyịmede Jesus nte Enyeemi “n̄wan” Abasi okosiode edi man edi Edidem Messiah ye Andinọ ubọhọ oro ‘ọkwọrọde uwọrọ-ufụn ọnọ mbuotekọn̄’!—Isaiah 61:1, 2; Luke 4:18, 19.
Fep Idem ke Ọkpọnọ Itie Ufụn
10, 11. Ke nso ọkpọnọ itie ufụn ke Christ okosio mme anditiene enye, ndien nso mbiet n̄kpọ ke ẹkeme ndinyene mfịn?
10 Kaban̄a mbon oro ẹnamde mfri Abraham ọkọrọ ye Christ, kpa Akamba Isaac, Paul ọdọhọ ete: “Jerusalem emi odude ke enyọn̄ edi amana-isọn̄, onyụn̄ edi enye edi eka nnyịn; . . . Nditọete, mbufo ẹdi nditọ un̄wọn̄ọ nte Isaac ekedide. Edi kpa nte eyen emi amanade ke ido obụkidem [Ishmael] ọkọkọbọde eyen emi amanade ke ido spirit [Isaac] ke eyo oko, kpasụk ntre ke edi kemi. . . . Nnyịn idịghe nditọ ofụn-an̄wan, edi idi nditọ amana-isọn̄. Christ okosio nnyịn ke itie ufụn [eke Ibet], ete idi nditọ isọn̄; ẹsọn̄ọ ẹda ndien, ẹkûyak ẹtọn̄ọ ntak ẹkọmọ mbufo ke ọkpọnọ itie ufụn.”—Galatia 4:26–5:1.
11 Mme anditiene Jesus ekededi ẹkpesọn̄ọ ẹdu ke ọkpọnọ itie ufụn edieke mmọ ẹkpesụkde ibuot ẹnọ Ibet. Nsunsu ido ukpono edi ọkpọnọ itie ufụn eke eyomfịn, ndien Christendom ada aban̄a Jerusalem eset ye nditọ esie. Edi mbon oro ẹyetde aran ẹdi nditọ Jerusalem emi odude ke enyọn̄, kpa amana-isọn̄ esop Abasi eke heaven. Mmọ ye ekemmọ mme andinịm ke akpanikọ ẹmi ẹnyenede idotenyịn eke isọn̄ idịghe ubak ererimbot emi inyụn̄ idụkke ufụn inọ Satan. (John 14:30; 15:19; 17:14, 16) Sia akpanikọ ye uwa Jesus osiode nnyịn ke ufụn, ẹyak nnyịn isọn̄ọ ida ke ubọhọ-ufụn nnyịn emi Abasi ọnọde.
Ndida Nnọ Ubọhọ-Ufụn Emi Abasi Ọnọde
12. Nso usụn̄ unam n̄kpọ ke mme andinịm ke akpanikọ ẹtiene, ndien nso ke ẹdineme idahaemi?
12 Ediwak miliọn owo ẹnyene ata ubọhọ-ufụn idahaemi nte Mme Ntiense Jehovah. Ke ẹnịm mme ukpepn̄kpọ Bible ye ediwak miliọn owo eken, ẹmi ‘ẹkenịmde ediwak ẹnọ nsinsi uwem.’ Ke ẹkabarede ẹdi mme andinịm ke akpanikọ, mmọ ẹyeda ẹnọ ubọhọ-ufụn emi Abasi ọnọde ebe ke ndina baptism. (Utom 13:48; 18:8) Edi mme usio-ukot ewe ẹbem baptism Christian iso?
13. Nso ebuana idu ke ufọt ifiọk ye baptism?
13 Mbemiso anade baptism, ana owo enyene onyụn̄ ada nnennen ifiọk N̄wed Abasi anam n̄kpọ. (Ephesus 4:13) Ntre, Jesus ama asian mme anditiene enye ete: “Ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.
14. Ndina baptism ke enyịn̄ Ete, Eyen, ye edisana spirit oyom nso ifiọk?
14 Ndina baptism ke enyịn̄ Ete ọwọrọ ndidiọn̄ọ itieutom ye odudu Jehovah nte Abasi, Andibot, ye Andikara Ekondo. (Genesis 17:1; 2 Ndidem 19:15; Ediyarade 4:10b) Baptism ke enyịn̄ Eyen oyom ẹdiọn̄ọ itieutom ye odudu Christ nte edibotn̄kpọ eke spirit oro ẹmenerede ke enyọn̄, Edidem Messiah, ye enyeemi ebede ke enye Abasi ọnọ ‘n̄kem n̄kem ufak.’ (1 Timothy 2:5, 6; Daniel 7:13, 14; Philippi 2:9-11) Owo oro anade baptism ke enyịn̄ edisana spirit ọdiọn̄ọ ete ke enye edi anamutom odudu Abasi oro Jehovah akadade ke ndibot n̄kpọ nnyụn̄ nnọ mme andiwet Bible odudu, adianade ye mme usụn̄ eken. (Genesis 1:2; 2 Peter 1:21) Nte ededi, ekese n̄kpọ ẹdu ndikpep mban̄a Abasi, Christ, ye edisana spirit.
15. Ntak anade owo enyene mbuọtidem mbemiso anade baptism?
15 Mbemiso anade baptism, ana owo enyene mbuọtidem oro ọkọn̄ọde ke nnennen ifiọk. “Ke mbuọtidem mîdụhe, owo ikemeke ndinem [Jehovah] esịt.” (Mme Hebrew 11:6) Owo oro ọkọn̄de mbuọtidem ke Abasi, Christ, ye ke uduak Abasi eyeyom ndidi kiet ke otu Mme Ntiense Jehovah, odude uwem ke n̄kemuyo ye Ikọ Abasi onyụn̄ enyenede eti ebuana ke ndikwọrọ eti mbụk. Enye eyetịn̄ n̄kpọ aban̄a ubom ubọn̄ Jehovah.—Psalm 145:10-13; Matthew 24:14.
16. Editua n̄kpọfiọk edi nso, ndien didie ke enye enyene ebuana ye baptism Christian?
16 Editua n̄kpọfiọk edi akpan n̄kpọ efen oro ẹyomde kaban̄a baptism. Editua n̄kpọfiọk ọwọrọ “owo ndikpụhọde ekikere esie kaban̄a edinam ini edem (m̀mê se ẹkeduakde ndinam), m̀mê eduuwem, ke ntak utua n̄kpọfiọk m̀mê unana uyụhọ,” m̀mê “ndiseme mban̄a, ndifụhọ, m̀mê ndikop mbọm mban̄a se owo akanamde m̀mê se eketrede ndinam.” Mme Jew akpa isua ikie ẹkenyene ndikabade esịt n̄kpọn̄ idiọkn̄kpọ oro mmọ ẹkenamde ẹdian Jesus Christ. (Utom 3:11-26) Ndusụk mme andinịm ke akpanikọ ke Corinth ẹma ẹkabade esịt ẹkpọn̄ use, edikpono ndem, edisịn efịbe, idan̄ ukemuduot, ediyịp inọ, idiọkitọn̄, edikpa mmịn, isụn̄i, ye edikan owo ubọk. Nte utịp, ẹma “ẹyet” mmọ ke iyịp Jesus, ẹma ‘ẹnam mmọ ẹsana’ nte mbon oro ẹnịmde isio isio ẹnọ utom Jehovah, ndien ẹma ‘ẹtebe mmọ ikpe’ ke enyịn̄ Jesus Christ ye ke spirit Abasi. (1 Corinth 6:9-11) Ntre edikabade esịt edi usio-ukot mbịne edinyene eti esịt ye ubọhọ-ufụn emi Abasi ọnọde ndinam owo ọbọhọ ikan̄ ikan̄ ubiomikpe idiọkn̄kpọ.—1 Peter 3:21.
17. Edikabade esịt ọwọrọ nso, ndien nso ke enye oyom oto owo oro odiomide ndina baptism?
17 Ana edikabade esịt n̄ko ada itie mbemiso owo ekemede ndina baptism nte kiet ke otu Mme Ntiense Jehovah. Edikabade esịt owo oro atuade n̄kpọfiọk ada itie ke owo ama ekesịn idiọk edinam onyụn̄ ebiere ndinam se inende. Ikọedinam usem Hebrew ye Greek oro enyenede ebuana ye edikabade esịt ọwọrọ “fiak edem, wọn̄ọde iso, m̀mê fiak di.” Ke ini ẹdade ke eti usụn̄ifiọk eke spirit, emi esida aban̄a ndikpọn̄ idiọk usụn̄ mbịne Abasi. (1 Ndidem 8:33, 34) Edikabade esịt esiyom “utom eke odotde edikabade esịt,” oyom ete nnyịn inam se Abasi owụkde, ikpọn̄ nsunsu ido ukpono, inyụn̄ iyak esịt nnyịn ye unana ediyok inọ Jehovah man inam n̄kpọ esie ikpọn̄îkpọn̄. (Utom 26:20; Deuteronomy 30:2, 8, 10; 1 Samuel 7:3) Emi oyom “obufa esịt ye obufa spirit,” kaban̄a ukpụhọde ekikere, edu, ye uduak ke uwem. (Ezekiel 18:31) Eti edu oro edisụn̄ọde oto oro eyemen mme edu Abasi okpụhọ ye eke unana uten̄e Abasi. (Colossae 3:5-14) Ih, ata editua n̄kpọfiọk esinen̄ede anam owo “[a]fiak edem.”—Utom 3:19.
18. Ntak ẹnamde uyakidem nnọ Abasi ke akam, ndien nso ke usio-ukot emi ada aban̄a?
18 Ana ediyak idem nnọ Abasi ke akam ebem baptism iso. (Men Luke 3:21, 22 domo.) Ediyak idem nnọ ọwọrọ edisio nnịm nnọ edisana uduak. Usio-ukot emi edi ata akpan n̄kpọ ntre nnyịn ikpenyene nditịn̄ ubiere nnyịn ke akam nnọ Abasi nte ke imọn̄ inọ enye san̄asan̄a utuakibuot inyụn̄ inam n̄kpọ esie ke nsinsi. (Deuteronomy 5:8, 9; 1 Chronicles 29:10-13) Nte ededi, nnyịn iyakke idem inọ utom edi iyak inọ Abasi ke idemesie. Ẹma ẹnam akpan n̄kpọ oro an̄wan̄a ke itie ubụkokpo akpa etieibuot Watch Tower Society, Charles Taze Russell. Ke itie edinam oro ke 1916, ewetn̄wed ye akama-okụk N̄ka oro, W. E. Van Amburgh, ama ọdọhọ ete: “Akwa utom ofụri ererimbot emi idịghe utom owo kiet. Enye enen̄ede okpon akan oro. Enye edi utom Abasi ndien enye ikpụhọkede. Abasi ama ada ediwak asan̄autom anam n̄kpọ ke ini edem ndien Enye ye unana mfan̄a eyeda ediwak anam n̄kpọ ke ini iso. Uyakidem nnyịn inyeneke owo, m̀mê ndinyene utom oro owo anamde, edi edi ndinam uduak Abasi, nte Enye ediyararede emi ọnọ nnyịn ebe ke Ikọ ye akpan ndausụn̄ Esie. Abasi osụk edi andinọ ndausụn̄.” Edi nso efen ke ana ẹnam ẹban̄a uyakidem nnọ Abasi?
19. (a) Didie ke mme owo ẹsinọ an̄wan̄wa uyarade uyakidem mmọ nnọ Jehovah? (b) Baptism mmọn̄ edi idiọn̄ọ nso?
19 Ẹsinọ an̄wan̄wa uyarade uyakidem nnọ Jehovah ke ini owo anade baptism. Baptism edi idiọn̄ọ nte ke owo oro obụhọde ke mmọn̄ mi amanam ọyọhọ ọyọhọ uyakidem ọnọ Jehovah Abasi ebe ke Jesus Christ. (Men Matthew 16:24 domo.) Ke ini ẹbụkde owo baptism ke mmọn̄ ndien ekem ẹdịbede ẹsio ke mmọn̄, enye akpa ke ndamban̄a usụn̄ aban̄a akani usụn̄ uwem esie, ẹnyụn̄ ẹnam enye ẹset odụk obufa usụn̄ uwem, ndinam uduak Abasi ofụri ofụri idahaemi. (Men N̄wed Mbon Rome 6:4-6 domo.) Ke ini Jesus akanade baptism, enye ama ayak idemesie ọnọ Ete esie eke heaven ofụri ofụri. (Matthew 3:13-17) Ndien N̄wed Abasi owụt ndien ndien ete ke mme andinịm ke akpanikọ oro ẹdotde ẹkpenyene ndina baptism. (Utom 8:13; 16:27-34; 18:8) Man owo akabarede edi kiet ke otu Mme Ntiense Jehovah mfịn, ke ntre, ana owo oro edi andinịm ke akpanikọ emi enen̄erede enyene mbuọtidem onyụn̄ anade baptism.—Men Utom 8:26-39 domo.
Ẹsọn̄ọ Ẹda!
20. Nso idi ndusụk uwụtn̄kpọ Bible ndiwụt nte ke ẹyediọn̄ nnyịn ke ntak isọn̄ọde ida inọ ubọhọ-ufụn emi Abasi ọnọde nte Mme Ntiense Jehovah oro ẹma ẹkena baptism?
20 Edieke edide afo ama ọsọn̄ọ ada ọnọ ubọhọ-ufụn emi Abasi ọnọde ke ndikabade ndi Ntiense Jehovah oro anade baptism, enye eyediọn̄ fi nte ọkọdiọn̄de mme asan̄autom esie eke eset. Ke uwụtn̄kpọ, Jehovah ama ọdiọn̄ Abraham ye Sarah ẹmi ẹma ẹkesọn̄ ye eyen oro abakde Abasi, kpa Isaac. Oto mbuọtidem prọfet Moses ama emek ndibiom ukụt ye ikọt Abasi “akan ndidia inemesịt idiọkn̄kpọ ke ekpri ini: enye onyụn̄ abat esuene [edidi mbiet] Christ [m̀mê Enyeemi Abasi Eyetde Aran] nte inyene eke okponde akan n̄kpọuto Egypt.” (Mme Hebrew 11:24-26) Moses ama enyene ifet edidi se Jehovah adade anam utom ke ndida nditọ Israel usụn̄ n̄n̄wọrọ ke ufụn nditọ Egypt. Akande oro, sia enye akanamde n̄kpọ Abasi ke edinam akpanikọ, ẹyenam enye eset ke n̄kpa eyenyụn̄ anam utom nte kiet ke otu “mbọn̄ ke ofụri ererimbot” ke idak Akamba Moses, Jesus Christ.—Psalm 45:16; Deuteronomy 18:17-19.
21. Mme uwụtn̄kpọ nsịnudọn̄ ewe ke ẹnọ ẹban̄a iban uten̄e Abasi eke ini eset?
21 Mme Christian ẹmi ẹyakde idem ẹnọ mfịn ẹkeme n̄ko ndibọ nsịnudọn̄ ke ndikere mban̄a iban ẹmi ẹkenen̄erede ẹnyene ubọhọ ẹnyụn̄ ẹkopde idatesịt. Ruth eyen Moab ekesịne ke otu mmọemi, oro ekenyenede ubiakesịt nte ebeakpa ye idatesịt ke ubọhọ-ufụn emi Abasi okosiode enye ke nsunsu ido ukpono. Ke ọkpọn̄de ikọt esie ye mme abasi esie, enye ama ọsọn̄ọ eyịre ye Naomi, kpa eka ebe esie oro ekedide ebeakpa. Ruth ọkọdọhọ ete: “Nyeka ke ebiet eke afo akade; nyenyụn̄ ndụn̄ ke ebiet eke afo odụn̄de: orụk fo ẹyedi orụk mi, Abasi fo eyenyụn̄ edi Abasi mi.” (Ruth 1:16) Nte n̄wan Boaz, Ruth ama akabade edi eka Obed, eteete David. (Ruth 4:13-17) Kamse, Jehovah ama ọnọ osụhọdeidem eyenan̄wan emi mîkedịghe eyen Israel mi “ofụri n̄kpọ eyenutom” ke ndiyak enye akabade edi ekaeka Jesus kpa Messiah! (Ruth 2:12) Nso idara ke Ruth edinyene ntem ke ini ẹdinamde enye eset edidiọn̄ọ nte ke enye ama enyene utọ ifet ntre! Mbiet idara oro nte eyịghe mîdụhe eyeyọhọ esịt Rahab, kpa akani akpara oro ẹdinamde eset, emi ẹkenamde ọbọhọ oburobụt ido ye nsunsu utuakibuot, ọkọrọ ye Bath-sheba oro akanamde idiọkido onyụn̄ akabarede esịt, koro mmọ n̄ko ẹyefiọk ẹte ke Jehovah ama ayak mmọ ẹkabarede ẹdi mme ekaeka Jesus Christ.—Matthew 1:1-6, 16.
22. Nso ke ẹdineme ke ibuotikọ efen?
22 Ndikere mban̄a mbon oro ẹkebọde ubọhọ-ufụn emi Abasi ọnọde ekeme ndisụk n̄kakaiso. Ke uwụtn̄kpọ, ibat mmọ esịne iren ye iban mbuọtidem ẹmi ẹsiakde ke Mme Hebrew ibuot 11. Mmọ ẹma ẹkụt ukụt ye ndutụhọ, “edi ererimbot i[ko]dotke mmọ.” Mbon oro ẹdiande ke ibat mmọ ẹdi mme anam-akpanikọ mme anditiene Christ eke akpa isua ikie ye mbon mbuọtidem eken ọtọn̄ọde ke ini oro, esịnede ediwak miliọn owo ẹmi ẹnamde n̄kpọ Jehovah idahaemi nte Mme Ntiense esie. Nte nnyịn idikụtde, edieke edide afo ama ọsọn̄ọ ada ye mmọ ke ubọhọ-ufụn emi Abasi ọnọde, afo emenyene ediwak ntak ndidara.
Didie ke Afo Ọkpọbọrọ?
◻ Nso idotenyịn ke Abasi okosio owụt ke ini ẹketabade ubọhọ-ufụn emi Abasi ọnọde?
◻ Nso “ọkpọnọ itie ufụn” ke Christ okosio mme anditiene enye?
◻ Mme usio-ukot ewe ẹbem baptism iso nte kiet ke otu Mme Ntiense Jehovah?
◻ Mme uwụtn̄kpọ N̄wed Abasi ewe iwụt ite ke ẹyediọn̄ nnyịn ke ndisọn̄ọ nda ke ubọhọ-ufụn emi Abasi ọnọde?
[Ndise ke page 16]
Nte afo ọmọfiọk mme usio-ukot ẹmi ẹsibemde baptism iso nte kiet ke otu Mme Ntiense Jehovah?