Ẹsọn̄ọ Ẹda ke Ubọhọ Ufụn Christian!
Mme Akpan N̄kpọ Ẹtode N̄wed Mbon Galatia
JEHOVAH edi Abasi ubọhọ ufụn. (2 Corinth 3:17) Eyen esie, Jesus Christ, ọkọdọhọ ete: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.” (John 8:32) Ndien ke ndikpebe Christ, apostle Paul ama ọkwọrọ eti mbụk oro anamde owo ọbọhọ ufụn.—Rome 6:18; 8:21.
Ke nditan̄a etop oro ọnọde ubọhọ ufụn mi, Paul ama ọtọn̄ọ mme esop ke Galatia (mbahade obio ukara Rome ke Asia Minor) ke akpa isan̄ isụn̄utom esie (47-48 C.E.). Mbon Galatia ẹma ẹfiọk ubiere otu ukara nte ke una mbobi idịghe se ẹyomde ẹto mme Christian. (Utom 15:22-29) Edi mbon Ido Ukpono Jew ẹkeyom ndisịn mmọ ke ufụn ke ndisọn̄ọ nyịre ẹte mmọ ẹna mbobi. Ntre Paul ama ọsọn̄ọ etịn̄ aban̄a ubọhọ ufụn Christian ke n̄wed oro enye ekewetde ọnọ ẹsọk mbon Galatia ke Corinth m̀mê Syria eke Antioch ke n̄kpọ nte 50-52 C.E. Ke uwụtn̄kpọ, enye ọkọdọhọ ete: “Christ okosio nnyịn ke itie ufụn, ete idi nditọisọn̄; ẹsọn̄ọ ẹda ndien, ẹkûyak ẹtọn̄ọ ntak ẹkọmọ mbufo ke ọkpọnọ itie ufọn.”—Galatia 5:1:
Paul Ada Ọnọ Itie Apostle Esie
Paul ekebemiso owụt ke itie apostle imọ okoto ‘Jesus Christ ye Abasi.’ (1:1–2:14) Ke ntak ediyarade, Paul (ye Barnabas ye Titus) ẹma ẹka Jerusalem kaban̄a mbụme una mbobi. Do James, Cephas (Peter), ye John ẹma ẹfiọk ẹte ke ẹma ẹnọ enye odudu ndidi apostle mme idụt. Ndien ke ini Peter ke ukperedem akadianarede idem ọkpọn̄ mme andinịm ke akpanikọ ẹdide Gentile ke Antioch ke ntak emi enye ekefehede mme Christian ẹdide mme Jew ẹmi ẹtode Jerusalem edi enyịn, Paul ama asua ọnọ enye.
Didie ke Ẹbat ke Edinen?
Apostle oro n̄ko ama owụt okopodudu akpan n̄kpọ ete ke ebe ke mbuọtidem ke Jesus Christ kpọt ke ẹkeme ndibat owo ekededi ke edinen. (2:15–3:29) Mbon Galatia ẹma ẹbọ spirit Abasi, idịghe ke ntak mme utom ibet, edi ke ntak edinyịme eti mbụk ye mbuọtidem. Ata nditọ Abraham ẹnyene mbuọtidem, edi mme owo oro ẹdomode ndinịm idemmọ ke edinen ke “utom ibet ẹdu ke idak isụn̄i.” Ntak-a? Koro mmọ mîkemeke ndinịm Ibet ọfọn ama. Ke akpanikọ, Ibet ama anam ndudue ẹwụt idem okonyụn̄ edi ‘andikpeme emi adade owo ọsọk Christ.’
Ẹsọn̄ọ Eda!
Ke n̄kpa esie, Christ ‘ama afak mmọemi ẹdude ke idak ibet.’ Edi ana mme anditiene enye ẹsọn̄ọ ẹda ke ubọhọ ufụn Christian. (4:1–6:18) Ntre okoyom mbon Galatia ẹbiọn̄ọ owo ekededi oro odomode nditap mmọ ndinyịme ọkpọnọ ufụn. Akande oro, ikanaha mmọ ẹkama ubọhọ ufụn mmọ ke idiọk usụn̄ edi akana ẹsọn “ubọkutom obụkidem” ẹnyụn̄ ẹsion̄o mbun̄wụm spirit Abasi. Mbon oro ẹkeyomde ndida mmọ nsịn ke ufụn Ibet ẹkeyom ‘ndiwụt idem ke ikpọkidem,’ ndibọhọ ukọbọ, nnyụn̄ nnyene se ẹdade ẹbụre mbụre. Nte ededi, Paul ama owụt ete ke edina mbobi m̀mê editre ndina mbobi idịghe n̄kpọ. Utu ke oro, “edimana obufa (“obufa edibotn̄kpọ,” NW) edi n̄kpọ.” Enye ama ọbọn̄ akam ete emem ye mbọm ẹdoro Israel eke spirit, kpa mme andidu ke obufa edibotn̄kpọ.
N̄wed oro Paul ekewetde ọnọ ẹsọk mbon Galatia ama an̄wam mmọ ndibiọn̄ọ mbọn oro ẹkeyomde ndisịn mmọ ke ufụn eke spirit. Enye akpakam an̄wam nnyịn n̄ko ndision̄o mbun̄wụm spirit nnyụn̄ nsọn̄ọ nda ke ubọhọ ufụn Christian.
[Ekebe/Ndise ke page 23]
Idiọn̄ọ: Paul ekewet ete, “Baba owo kiet okûtịmede mi, koro mbiomde idiọn̄ọ Jesus ke idem nsan̄a.” (Galatia 6:17) Ke otu mme okpono ndem eset, ẹma ẹsinịm ifụn idiọn̄ọ ndiwụt mme andinyene mmọ. Ẹma ẹsifọp m̀mê ẹkap nsio nsio idiọn̄ọ ke ikpọkidem mmọ. Nte eyịghe mîdụhe, edimia Paul ke idiọk usụn̄ ke ntak utom Christian esie ama onịm enye ndusụk nde unan, ọsọn̄ọde edidọhọ oro enye ọdọhọde nte idide anam-akpanikọ ofụn enyenede Christ, kpa enyeemi ẹkọbọde ke ntak esie. (2 Corinth 11:23-27) Ekeme ndidi mmọemi ẹdi “idiọn̄ọ” oro Paul eketịn̄de aban̄a, mîdịghe ekeme ndidi enye ekekere abana uwem oro enye okodude nte Christian, osion̄ode mbun̄wụm spirit Abasi onyụn̄ anamde utom
[Ndise]
Ẹma ẹsinyịk ifụn mbon Rome ndinam n̄kpọ mme eteufọk mmọ, edi Paul akanam n̄kpọ Jesus Christ ke unyịmesịt ye idatesịt