Ubọhọ-Ufụn Emi Abasi Ọnọde Amada Idatesịt Edi
“Idatesịt Jehovah [edi] odudu mbufo.”—NEHEMIAH 8:10.
1. Idatesịt edi nso, ntak emi mbon oro ẹyakde idem ẹnọ Abasi ẹkemede ndinyene enye?
JEHOVAH ọyọhọ esịt ikọt esie ye idatesịt. Idaha akwa inemesịt m̀mê idatesịt emi esisụn̄ọ oto se ẹnyenede m̀mê eti n̄kpọ oro ẹdoride enyịn ndinyene. Mme owo ẹmi ẹyakde idem ẹnọ Abasi ẹkeme ndinyene utọ ntụk oro koro idatesịt edi mbun̄wụm edisana spirit, m̀mê anamutom odudu esie. (Galatia 5:22, 23) Ntre idem edieke idomo nnanenyịn ẹsịmde nnyịn, nnyịn imekeme ndidara nte mme asan̄autom Jehovah, ẹmi spirit esie adade usụn̄.
2. Ntak emi mme Jew ẹkedarade ke akpan usọrọ oro ke eyo Ezra?
2 Ke akpan edinam kiet ke ọyọhọ isua ikie ition M.E.N., mme Jew ẹma ẹda ubọhọ-ufụn mmọ emi Abasi ọkọnọde mmọ ẹnam idara idara Usọrọ Mme Ataya ke Jerusalem. Ke Ezra ye mme Levite eken ẹma ẹkekot ẹnyụn̄ ẹnam Ibet Abasi an̄wan̄a mmọ, “kpukpru owo ẹka ndidia n̄kpọ, nnyụn̄ n̄n̄wọn̄, nnyụn̄ nnọ enọ ẹsọk owo, nnyụn̄ nnam akamba idara: koro mmọ ẹtịmde ẹfiọk ikọ ẹmi ẹsiakde ẹnọ mmọ.”—Nehemiah 8:5-12.
Idatesịt Jehovah Edi Odudu Nnyịn
3. Ke idak mme idaha ewe ke “idatesịt Jehovah” ekeme ndidi odudu nnyịn?
3 Ke ini usọrọ oro, mme Jew ẹma ẹkụt nte ikọ ẹmi ẹdide akpanikọ: “Idatesịt Jehovah [edi] odudu mbufo.” (Nehemiah 8:10) Idatesịt emi edi odudu nnyịn n̄ko edieke nnyịn isọn̄ọde ida inọ ubọhọ-ufụn emi Abasi ọnọde nte Mme Ntiense Jehovah oro ẹma ẹkeyak idem ẹnọ ẹnyụn̄ ẹna baptism. Ibat ibat ke otu nnyịn imokụt nte ẹdade edisana spirit ẹyet nnyịn aran ẹnyụn̄ ẹdade nnyịn ẹsịn ke ubon Abasi nte mme ada-udeme nnyene ye Christ ke heaven. (Rome 8:15-23) Ata ediwak nnyịn mfịn inyene idotenyịn edidu uwem ke paradise isọn̄. (Luke 23:43) Nnyịn ikpokop idatesịt didie ntem!
4. Ntak emi mme Christian ẹkemede ndiyọ ufen ye ukọbọ?
4 Okposụkedi nnyịn inyenede mme utịbe utịbe idotenyịn, imemke utom ndiyọ ufen ye ukọbọ. Nnyịn imekeme ndinam ntre, nte ededi, koro Abasi ọmọnọ nnyịn edisana spirit esie. Ye enye nnyịn imenyene idatesịt ye mbuọtidem nte ke baba n̄kpọ kiet ikemeke ndibọ nnyịn idotenyịn nnyịn m̀mê ima Abasi nduọk. Akande oro, nnyịn imekeme ndinịm ke akpanikọ nte ke Jehovah eyedi odudu nnyịn ama akam edi nnyịn imama enye ke ofụri esịt, ukpọn̄, odudu, ye ekikere nnyịn.—Luke 10:27.
5. M̀mọ̀n̄ ke nnyịn ikeme ndikụt mme ntak ndidara?
5 Ikọt Jehovah ẹnyene uwak edidiọn̄ ẹnyụn̄ ẹnyene ediwak ntak ndidara. Ẹsiak ndusụk ntak idara ke n̄wed oro Paul ekewetde ọnọ ẹsọk mbon Galatia. Ẹwụt mme ntak eken ke ebiet en̄wen ke N̄wed Abasi. Enye eyemenede spirit nnyịn ke ndidụn̄ọde mme utọ idara idara edidiọn̄ oro.
Da Ubọhọ-Ufụn Emi Abasi Ọnọde ke Ọsọn̄urua N̄kpọ
6. Ntak emi Paul akakpakde mme Christian ke Galatia ndisọn̄ọ nda?
6 Nte mme Christian, nnyịn imenyene idara idara edidiọn̄ edide edinyene eti idaha ye Abasi. Sia Christ akanamde mme anditiene enye ẹbọhọ Ibet Moses, ẹma ẹkpak mbon Galatia ẹte ẹsọn̄ọ ẹda ẹkûyak ẹtọn̄ọ ntak ẹkọmọ mmọ ke “ọkpọnọ itie ufụn.” Nso kaban̄a nnyịn? Edieke idomode ndiwụt ke idi ndinen ke ndinịm Ibet, ẹyebahade nnyịn ẹkpọn̄ Christ. Nte ededi, sia spirit Abasi ọnọde un̄wam, nnyịn imebet idotenyịn edinen ido oro osụn̄ọde oto mbuọtidem oro anamde utom ebe ke ima, idịghe ata edina mbobi m̀mê mme utom Ibet eken.—Galatia 5:1-6.
7. Didie ke nnyịn ikpese edisana utom oro inamde inọ Jehovah?
7 Edi edidiọn̄ ndida ubọhọ-ufụn nnyịn emi Abasi ọnọde ‘nnam n̄kpọ nnọ Jehovah ke idatesịt.’ (Psalm 100:2) Ke akpanikọ, edi mfọnn̄kan ifet ndinam edisana utom nnọ “Jehovah Abasi, Ata Ọkpọsọn̄,” kpa “nsinsi Edidem”! (Ediyarade 15:3, NW) Edieke edide akanam ntụk unana edinyene ukpono nnọ idem otụk fi, ekeme ndidi n̄kpọ un̄wam ndifiọk nte ke Abasi omodụri fi adian idem ebe ke Jesus Christ omonyụn̄ ayak fi enyene ebuana ke ‘edisana utom eti mbụk Abasi.’ (Rome 15:16; John 6:44; 14:6) Nso ntak ndidara nnyụn̄ n̄n̄wụt esịtekọm nnọ Abasi ke emi edi ntem!
8. Kaban̄a Akwa Babylon, nso ntak idara ke ikọt Abasi ẹnyene?
8 Ntak efen ndidat esịt edi ubọhọ-ufụn nnyịn emi Abasi ọnọde ke ndisio nnyịn ke Akwa Babylon, kpa ukara ererimbot eke nsunsu ido ukpono. (Ediyarade 18:2, 4, 5) Okposụkedi akpara ido ukpono emi ke ndamban̄a usụn̄ “etiede ke enyọn̄ ediwak mmọn̄,” emi edide “mbio obio, ye otuowo, ye mme idụt ye usem,” enye itiehe, mîdịghe itụkke inyụn̄ ikarake mme asan̄autom Jehovah ke n̄kan̄ ido ukpono. (Ediyarade 17:1, 15) Nnyịn imadat esịt ke utịbe utịbe un̄wana Abasi, ke adan̄aemi mme andinọ Akwa Babylon ibetedem ẹdude ke ekịm eke spirit. (1 Peter 2:9) Ih, ekeme ndidi ọkpọsọn̄ n̄kpọ ndidiọn̄ọ ndusụk “nditụn̄ọ n̄kpọ Abasi.” (1 Corinth 2:10) Edi akam ẹbọn̄de ẹyom eti ibuot ye un̄wam otode edisana spirit an̄wam nnyịn ndifiọk akpanikọ N̄wed Abasi oro anamde mme andinyene enye ẹbọhọ ke n̄kan̄ eke spirit.—John 8:31, 32; James 1:5-8.
9. Edieke anade nnyịn inyene edidiọn̄ ke n̄kaiso ubọhọ-ufụn nsunsu ukpepn̄kpọ ido ukpono, nso ke ana nnyịn inam?
9 Nnyịn imenyene edidiọn̄ ke n̄kaiso ubọhọ oro ibọhọde nsunsu ukpepn̄kpọ ido ukpono, edi man ikaiso inyene ifụre oro, ana nnyịn isịn edinam nsọn̄ibuot. Mbon Galatia ẹma ẹfehe mbuba Christian mfọn mfọn, edi ndusụk owo ẹma ẹkpan mmọ ndisụk ibuot nnọ akpanikọ. Utọ idiọk etabi oro ikotoho Abasi ndien ẹkenyene ndibiọn̄ọ enye. Kpasụk nte ekpri leaven anamde ofụri eboho uyo ofụt, mme nsunsu andikpep m̀mê ediyak idem nnọ edinam nsọn̄ibuot ekeme ndibiat ofụri esop. Paul okoyom ete mbon oro ẹkwọrọde una mbobi, oro ẹyomde ndibiat mbuọtidem mbon Galatia ẹkûna mbobi kpọt edi yak ẹsịbe ndido use mmọ ẹfep. Ọkpọsọn̄ ikọ ke akpanikọ! Edi ana nnyịn isọn̄ọ ida kpa ntre ke ndisịn edinam nsọn̄ibuot edieke anade nnyịn imụm ubọhọ-ufụn nnyịn emi Abasi osiode nnyịn ke nsunsu ukpepn̄kpọ ido ukpono ikama.—Galatia 5:7-12.
Ẹnam Utom Ẹnọ Kiet Eken ke Ima
10. Nso idi mbiomo nnyịn nte mme andibuana ke otu nditọete Christian?
10 Ubọhọ-ufụn emi Abasi ọnọde amada nnyịn edisịn ke ima ima itie ebuana nditọete, edi ana nnyịn inam udeme nnyịn ke ndiwụt ima. Mbon Galatia ikenyeneke ndida ubọhọ-ufụn mmọ ‘nnyom ufan̄ nnọ obụkidem’ m̀mê ntak ndinyene ibụk ibụk uwem unana ima. Mmọ ẹkenyene ndinam utom nnọ kiet eken ye ima nte uduakesịt mmọ. (Leviticus 19:18; John 13:35) Ana nnyịn n̄ko ifep utịn̄ ikọedem ye usua ẹmi ẹkemede ndisụn̄ọ ke nnyịn ndikụt nsobo ke ubọk kiet eken. Nte ededi, emi iditịbeke edieke nnyịn inyenede ima nditọete.—Galatia 5:13-15.
11. Didie ke nnyịn ikeme ndidi edidiọn̄ nnọ mbon en̄wen, ndien didie ke mmọ ẹkeme ndidiọn̄ nnyịn?
11 Ke ndida ubọhọ-ufụn nnyịn emi Abasi ọnọde nnam n̄kpọ ke n̄kemuyo ye ndausụn̄ oro spirit Abasi ọnọde, nnyịn iyenyene ima inyụn̄ idi edidiọn̄ inọ mbon en̄wen. Ekpenyene ndidi edu nnyịn ndiyak edisana spirit akara onyụn̄ ada nnyịn usụn̄. Adan̄aoro nnyịn nte mîwụtke ima idinyeneke ntụhọ ndiyụhọ idiọk udọn̄ obụkidem nnyịn oro adade “udọn̄ esie an̄wana ye spirit.” Edieke spirit Abasi adade nnyịn usụn̄, nnyịn iyenam se ifọnde edi idịghe koro mme ibet ẹyomde nsụkibuot ẹnyụn̄ ẹnịmde ufen ẹnọ mme anamidiọk. Ke uwụtn̄kpọ, ima—idịghe sụk ibet—eyekpan nnyịn ndidọk mbon en̄wen. (Leviticus 19:16) Ima eyenụk nnyịn nditịn̄ ikọ nnyụn̄ nnam n̄kpọ ke mfọnido. Sia nnyịn iwụtde mbun̄wụm spirit oro edide ima, mbon en̄wen ẹyediọn̄ nnyịn, mîdịghe ẹtịn̄ eti ikọ ẹdian nnyịn. (Mme N̄ke 10:6) Akande oro, edinyene ebuana ye nnyịn edidi edidiọn̄ ọnọ mmọ.—Galatia 5:16-18.
Isio Isio Mbun̄wụm
12. Nso idi ndusụk edidiọn̄ ẹmi ẹnyenede ebuana ye edifep “ubọkutom obụkidem”?
12 Uwak edidiọn̄ ẹmi ẹnyenede ebuana ye ubọhọ-ufụn nnyịn emi Abasi ọnọde ẹsito edifep “ubọkutom obụkidem.” Nte ikọt Abasi, nnyịn, ke ofụri ofụri, imesifep ekese editịmede esịt koro nnyịn mînamke use, mbubiam ido, ye obukpo ido. Ke nditre ukpono ndem, nnyịn imenyene idatesịt oro otode edinem Jehovah esịt ke afan̄ oro. (1 John 5:21) Sia nnyịn mînamke edinam ubụpekpo, mme demon ikarake nnyịn. Usua, utọk, ufụp, iyatesịt, ndomoidem, ubahade, edisiak isio n̄ka, ye udu ibiatke itie nditọete Christian nnyịn. Ndien ediyụhọ mmịn ye otịme otịme ido ibiatke idatesịt nnyịn ifep. Paul ama odụri owo utọn̄ ete ke mbon oro ẹnamde mme ubọkutom obụkidem oro ididaha Obio Ubọn̄ Abasi inyene. Nte ededi, sia nnyịn inamde mme ikọ esie, nnyịn imekeme ndisọn̄ọ nyịre ke idara idara idotenyịn Obio Ubọn̄.—Galatia 5:19-21.
13. Edisana spirit Jehovah osion̄o nso mbun̄wụm edi?
13 Ubọhọ-ufụn emi Abasi ọnọde esida idatesịt ọsọk nnyịn koro mme Christian ẹsiwụt mbun̄wụm spirit Jehovah. Ebede ke ikọ ẹmi Paul ekewetde ọnọ ẹsọk mbon Galatia, edi mmemmem n̄kpọ ndikụt nte ke mme utom anamidiọk obụkidem ẹbiet n̄kûkịm ke okpụhọrede ye eti mbun̄wụm spirit ẹmi edide ima, idatesịt, emem, anyanime, mfọnido, eti ido, edinam akpanikọ, ifụre ifụre ido, ye mfara ke idem ẹmi ẹtọde ke esịt oro eten̄ede Abasi. Sia ibierede ndidu uwem oro edide isio ye mme udọn̄ anamidiọk obụkidem, nnyịn imoyom ndiyak spirit Abasi ada nnyịn usụn̄ ndinyụn̄ ndu uwem nte ekemde ye enye. Spirit oro esinam nnyịn isụhọde idem inyụn̄ itie emem emem, idịghe ‘nditan̄ idem, idemerede ndomoidem ye kiet eken, inyụn̄ ifụbede ufụp ye kiet eken.’ Eyịghe idụhe edide n̄kpọ idara ndibuana ye mbon oro ẹnyenede mbun̄wụm spirit oro!—Galatia 5:22-26.
Mme Ntak Efen Ndidat Esịt
14. N̄kpọekọn̄ ewe ke nnyịn iyom ke en̄wan oro in̄wanade ye udịm mme idiọk spirit?
14 Se inyenede ebuana ye ubọhọ-ufụn nnyịn eke spirit emi Abasi ọnọde edi edidiọn̄ ke ukpeme oro ẹkpemede nnyịn ẹsio Satan ye mme demon ke ubọk. Man ikụt unen ke en̄wan oro in̄wanade ye udịm mme idiọk spirit, ana nnyịn isịne “ofụri n̄kpọekọn̄ Abasi.” Nnyịn imoyom mbọbọ isịn nte akpanikọ ye edinen ido nte ukwak ikpanesịt. Ana ida mben̄eidem ndikwọrọ eti mbụk isịne nte ikpaukot. Se ẹyomde, n̄ko, edi mbuọtidem nte otuekọn̄, emi ẹdidade ẹnịme kpukpru enyịmikan̄ andidiọk. Ana nnyịn iyara edinyan̄a nte ndụn ke ibuot inyụn̄ ikama “ofụt spirit,” kpa Ikọ Abasi. Ẹyak nnyịn n̄ko ‘ibọn̄ akam ke spirit kpukpru ini.’ (Ephesus 6:11-18) Edieke nnyịn isịnede n̄kpọekọn̄ eke spirit inyụn̄ isịnde edinam mme demon, nnyịn imekeme ndinana ndịk inyụn̄ ikop idatesịt.—Men Utom Mme Apostle 19:18-20 domo.
15. Nso idara idara edidiọn̄ edi eke nnyịn ke ntak idude uwem ke n̄kemuyo ye Ikọ Abasi?
15 Idatesịt edi eke nnyịn koro eduuwem nnyịn odude ke n̄kemuyo ye Ikọ Abasi, ndien nnyịn imọbọhọ ubiomikpe oro afịnade ediwak anamidiọk. Nnyịn ‘iyen̄wana kpukpru ini ndinyene esịt eke mînyeneke se eduede Abasi ye owo.’ (Utom 24:16) Ntre, inaha nnyịn ikop ndịk iban̄a usiene Abasi oro edisịmde mme andikokoi nnam idiọkn̄kpọ ẹmi mîkabakede esịt. (Matthew 12:22-32; Mme Hebrew 10:26-31) Ke ndinam item oro odude ke Mme N̄ke 3:21-26, nnyịn imedi idikụt edisu oro mme ikọ ẹmi ẹsude: “Kpeme ekikere ye ọniọn̄. Ndien mmọ ẹyekabade ẹdi uwem ukpọn̄ fo, ye mbana itọn̄ fo. Ndien afo eyesan̄a ke usụn̄ fo ke ifụre, ndien ukot fo idituahake. Ke adan̄aemi afo anade ke isọn̄ udufeheke ndịk: ndien ke ini afo osụhọrede ana, idap eyenịn̄e fi. Kûfehe baba ndịk eke abuatde-buat, kûnyụn̄ ufehe oyobio mme idiọkowo, ke ini enye edidide. Koro Jehovah eyedi ibetedem fo, eyenyụn̄ ekpeme ukot fo mbak ẹdimụm.”
16. Didie ke akam edi n̄kpọ idara, ndien nso udeme ke spirit Jehovah enyene ke afan̄ emi?
16 Ntak efen ndidat esịt edi ifụre oro Abasi ọnọde nnyịn ndisan̄a n̄kpere Jehovah ke akam ye mbuọtidem nte ke enye eyebọrọ nnyịn. Ih, ẹsibọrọ akam nnyịn sia nnyịn inyenede ukpono ukpono “uten̄e Jehovah.” (Mme N̄ke 1:7) Akande oro, ẹn̄wam nnyịn ndisọn̄ọ ndu ke ima Abasi ebe ke ndibọn̄ “akam ke edisana spirit.” (Jude 20, 21) Nnyịn inam emi ke ndiwụt idaha esịt oro Jehovah onyịmede ye ke ndibọn̄ akam ke idak odudu spirit mban̄a mme n̄kpọ ẹmi ẹdude ke n̄kemuyo ye uduak ye Ikọ esie, emi owụtde nnyịn nte ikpọbọn̄de akam ye se ikpeben̄ede ke akam. (1 John 5:13-15) Edieke ẹkọbọde nnyịn idiọk idiọk ndien nnyịn ifiọkke se ikpọbọn̄de akam iben̄e, “spirit ke idemesie anam n̄kpeubọk ọnọ nnyịn ye mmụm eke owo mîkemeke nditịn̄.” Abasi esibọrọ mme utọ akam oro. (Rome 8:26, 27) Ẹyak nnyịn ibọn̄ akam iyom edisana spirit inyụn̄ iyak enye osion̄o mme mbun̄wụm esie ke idem nnyịn, oro inen̄erede iyom man ikan idomo ekededi. (Luke 11:13) Nnyịn n̄ko iyenam idatesịt nnyịn ọkọri edieke nnyịn ke akam ye ifịk ikpepde Ikọ odudu spirit Abasi ye mme n̄wed Christian ẹmi ẹtịmde ke idak ndausụn̄ spirit.
Ẹdiọn̄ ye Un̄wam Oro Odude Idahaemi
17. Didie ke mme ifiọk n̄kpọntịbe Moses ye ikọ David ẹwụt ẹte ke Jehovah odu ye ikọt Esie?
17 Ke ndida ubọhọ-ufụn nnyịn emi Abasi ọnọde nnam n̄kpọ ke eti usụn̄, nnyịn imokop idatesịt ndifiọk nte ke Jehovah odu ye nnyịn. Ke ini n̄kpọsọn̄ idaha ẹkenamde Moses ọwọrọ ọkpọn̄ Egypt, ke mbuọtidem “enye [ama ọsọn̄ọ] ada nte n̄kpọ eke okụtde Enyeemi enyịn owo mîkwe.” (Mme Hebrew 11:27) Moses ikasan̄ake ikpọn̄; enye ama ọfiọk ete ke Jehovah ama odu ye imọ. Ukem ntre, nditọiren Korah ẹma ẹkwọ ẹte: “Abasi edi ebiet ubọhọ nnyịn ye odudu nnyịn, Enye edi andinyan̄a eke ekperede nnyịn etieti ke nnanenyịn. Mmọdo nnyịn mîdidịgheke, isọn̄ okpokpụhọde, ikpọ obot ẹkpenyụn̄ ẹsehede ẹsịne ke esịt inyan̄. Yak mmọn̄ esie oyomo onyụn̄ ofụt; yak ikpọ obot ẹnyụn̄ ẹnyek ke odụt esie.” (Psalm 46:1-3) Edieke afo enyenede utọ mbuọtidem oro ke Abasi, enye idikpọn̄ke fi tutu amama. David ọkọdọhọ ete: “Koro ete mi ye eka mi ẹkekpọn̄de mi, ndien Jehovah emen mi akama.” (Psalm 27:10) Nso n̄kpọ idara ke edi ntem ndifiọk nte ke Abasi enen̄ede ekere aban̄a mme asan̄autom esie!—1 Peter 5:6, 7.
18. Ntak emi mbon oro ẹnyenede idatesịt Jehovah ẹnyenede ubọhọ-ufụn emi Abasi ọnọde ke ọkpọsọn̄ editịmede esịt?
18 Sia inyenede idatesịt Jehovah, nnyịn imenyene ubọhọ-ufụn emi Abasi ọnọde ke ọkpọsọn̄ editịmede esịt. Paul ọkọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Emem Abasi edi sụn̄sụn̄ idaha oro ananade mbiet idem ke ata n̄kpọsọn̄ idaha. Ye enye esịt nnyịn ẹna sụn̄-n̄—kpa se ifọnde ye nnyịn ke n̄kan̄ eke spirit, ntụk, ye ikpọkidem. (Mme N̄ke 14:30) Enye n̄ko an̄wam nnyịn ndinyene n̄kemn̄kem idaha ke n̄kan̄ ekikere, sia ifiọkde ite ke n̄kpọ baba kiet oro Abasi ayakde otịbe ikemeke ndinọ nnyịn nsinsi unan. (Matthew 10:28) Emem emi osụn̄ọde oto n̄kpet n̄kpet itie ebuana ye Abasi ebe ke Christ mi edi eke nnyịn koro nnyịn iyakde idem inọ Jehovah inyụn̄ isụkde idem inọ ndausụn̄ spirit esie, emi osion̄ode mme utọ nti mbun̄wụm nte idatesịt ye emem edi.
19. Ndinam esịt nnyịn ẹwụhọ ke nso edin̄wam nnyịn ndikop idatesịt?
19 Ndinam esịt nnyịn ẹwụhọ ke ubọhọ-ufụn nnyịn emi Abasi ọnọde ye ke idotenyịn Obio Ubọn̄ eyen̄wam nnyịn ndinyene idatesịt. Ke uwụtn̄kpọ, ndusụk ini ẹkeme ndinam esisịt n̄kpọ mban̄a unana nsọn̄idem, edi nnyịn imekeme ndibọn̄ akam mben̄e eti ibuot ye isọn̄esịt ndiyọ enye imonyụn̄ ikeme ndinyene ndọn̄esịt ke ndikere mban̄a nsọn̄idem eke n̄kan̄ spirit oro nnyịn inyenede idahaemi ye ukọkudọn̄ọ obụkidem oro edidade itie ke idak ukara Obio Ubọn̄. (Psalm 41:1-3; Isaiah 33:24) Okposụkedi ekemede ndiyom iyọ unana mfịn, mme n̄kpọ oro uwem oyomde idinanake ke Paradise isọn̄ oro enen̄ede ekpere mi. (Psalm 72:14, 16; Isaiah 65:21-23) Ih, Ete nnyịn eke heaven eyesọn̄ọ nnyịn idem idahaemi ndien ke akpatre anam idatesịt nnyịn ọyọhọ.—Psalm 145:14-21.
Da Ubọhọ-Ufụn Fo Emi Abasi Ọnọde ke Ọsọn̄urua N̄kpọ
20. Nte ekemde ye Psalm 100:1-5, didie ke nnyịn ikpakama idem ke iso Jehovah?
20 Nte ikọt Jehovah, ke akpanikọ nnyịn ikpenyene ndida ubọhọ-ufụn emi Abasi ọnọde emi adade idatesịt ye ata ediwak edidiọn̄ ọsọk nnyịn ke ọsọn̄urua n̄kpọ. Eyịghe idụhe Psalm 100:1-5 akpakde nnyịn ete “ẹda ikwọ ẹdi” ke iso Abasi. Jehovah enyene nnyịn onyụn̄ ese nnyịn enyịn nte ima ima Ekpemerọn̄. Ih, nnyịn idi “ikọt esie, ye ufene ẹmi enye ọbọkde.” Itie Andibot ye ikpọ edu esie ẹdemede nnyịn ndida itoro ye ekọm ndụk okụre utuakibuot esie. Onụk nnyịn ‘nditoro enyịn̄ esie,’ nditịn̄ se ifọnde mban̄a Jehovah Abasi. Akande oro, nnyịn kpukpru ini imekeme ndiberi edem ke ima-mfọnido esie, m̀mê mbọm oro enye enyenede aban̄a nnyịn. “Ke ofụri emana” Jehovah edi anam-akpanikọ, isehekede ke ndinyene ima nnọ mbon oro ẹnamde uduak esie.
21. Nso nsịnudọn̄ ke ẹkenọ ke akpa nsiondi magazine emi, ndien nso ke nnyịn ikpanam iban̄a ubọhọ-ufụn emi Abasi ọnọde?
21 Nte mme anana mfọnmma owo, nnyịn kemi ikemeke ndibọhọ kpukpru idomo. Ye un̄wam Abasi, nte ededi, nnyịn imekeme ndidi Mme Ntiense Jehovah ẹmi inyenede uko ye idatesịt. Se inen̄erede idi akpan n̄kpọ ke afan̄ emi edi ikọ ẹmi ẹkụtde ke akpa nsiondi n̄wedmbụk emi (July 1879): “Nyene uko . . . eyenete mi eren m̀mê n̄wan, emi oyomde ndifehe ye mmemidem ke mfafaha usụn̄ oro. Kûkere uban̄a ọkpọsọn̄ edinam oro; ẹnam enye asana ofụri ofụri onyụn̄ eye ebe ke ukot Eteufọk oro ẹdiọn̄de. Da nte ke kpukpru n̄kûkịm ẹdi frawa; kpukpru ọsọbọ-iso itiat ẹdi itiat ubat-uniọn̄, oro anamde fi ọsọp asan̄a ebịne utịtmbuba. . . . Wụk enyịn fo ke utịp oro.” Ediwak miliọn owo ẹmi ẹnamde n̄kpọ Jehovah idahaemi ẹwụk enyịn mmọ ke utịp oro ẹnyụn̄ ẹnyene ediwak ntak ndinyene uko ye idatesịt. Ye mmọ, ẹsọn̄ọ ẹda ẹnọ ubọhọ-ufụn emi Abasi ọnọde. Ẹkûtaba uduak esie, ndien idatesịt Jehovah akpakam edi odudu mbufo kpukpru ini.
Didie ke Afo Ọkpọbọrọ?
◻ Didie ke “idatesịt Jehovah” ekeme ndidi odudu nnyịn?
◻ Nditịn̄ ke n̄kan̄ ido ukpono, mme edidiọn̄ ewe ke ubọhọ-ufụn emi Abasi ọnọde ada ọsọk ikọt Jehovah?
◻ Ntak ẹnamde utom ẹnọ kiet eken ke ima?
◻ Nso idi ndusụk edidiọn̄ ẹmi ẹnyenede ebuana ye ubọhọ-ufụn emi Abasi ọnọde?
◻ Didie ke ikọt Abasi ẹkeme ndikaiso n̄kop idatesịt?
[Ndise ke page 23]
“Da nte ke kpukpru n̄kûkịm ẹdi frawa; kpukpru ọsọbọ-iso itiat ẹdi itiat ubat-uniọn̄, oro anamde fi ọsọp asan̄a ebịne utịtmbuba”