Da N̄wọrọnda Ifet Emi Nam N̄kpọ!

PETER ama etịm aka anyan ke mme ukpepn̄kpọ ibọkusọbọ esie ke ini etop edinyan̄a eke Bible okomụmde enye udọn̄. Ke ini enye okokụrede ukpep okonyụn̄ ọtọn̄ọde ndinam utom nte dọkta ke ufọkibọk kiet, ikpọ owo esie ẹma ẹsịn udọn̄ ẹnọ enye kpukpru ini ndika n̄kọbọ ukpep nte asiak owo esịp. Emi ekedi ifet oro ediwak mbufa dọkta ẹkpedade ẹnam n̄kpọ ye unana mmen̄e.

Edi, Petera ama ebiere ndisịn ifet emi. Ntak-a? Ndi enye n̄kukụre ikenyeneke udọn̄ ye odudu oro ẹkeyomde? Baba, koro Peter ama etịm ekere aban̄a enọ oro. Ke ama akakabade edi Ntiense Jehovah oro ayakde idem ọnọ onyụn̄ anade baptism, enye ama enyene udọn̄ ndibiat ekese ini nte ekekeme ke nsio nsio ikpehe utom ukwọrọikọ Christian. Enye ama ekere ete ke imọ ima idodot nte asiak owo esịp, ke ubọkọkọ imọ ayadia ini ye odudu imọ efen efen. Ndi enye ekedi ndisịme ndisịn san̄asan̄a idotenyịn emi, mîdịghe nte enye ama enyene eti ibuot?

Ye ndusụk owo, ubiere Peter ekeme nditie nte edi ndisịme. Nte ededi, enye ama ekere aban̄a mme utọ itien̄wed Bible nte Ephesus 5:15, 16. Do apostle Paul ama akpak ekemmọ mme Christian ete: “Ẹkûsan̄a nte ndisịme, edi ẹsan̄a nte mbon eti ibuot. Ẹdedep ifet, koro mme usen ẹdiọkde.”

Mbọk tịm fiọk ikọ oro “ifet.” Ẹkabade enye ẹto ikọ Greek oro ẹsidade ke Bible ediwak ini nditịn̄ mban̄a ini m̀mê ikpehe ini oro ndusụk akpan n̄kpọ ẹnịmde idiọn̄ọ m̀mê oro odotde ye akpan edinam. Mi Paul ọkọsọn̄ọ etịn̄ ete ke mme Christian ẹkpenyene ndinam ini odu ọnọ mme akpan n̄kpọ. Ke akpanikọ, oyom mmọ ‘ẹdomo ẹfiọk se ifọnde ikan.’ (Philippi 1:10) Edi ndikam nnịm ebeiso n̄kpọ akpa.

Ntre, ndien, nso idi uduak Abasi kaban̄a eyo nnyịn? Nso idi uduak Abasi kaban̄a mbon oro ẹmade enye? Mme prọfesi Bible ẹwụt eyo nnyịn in̄wan̄în̄wan̄ nte “utịt ini,” m̀mê “ukperedem ini.” (Daniel 12:4; 2 Timothy 3:1) Christ Jesus ikayakke eyịghe ndomokiet odu kaban̄a se ikpedide akpan n̄kpọ ikan ke eyo nnyịn. Enye ama etịn̄ akpan akpan ete ke mbemiso utịt idiọk editịm n̄kpọ emi, ‘ẹyekwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.’ Adan̄aoro ndien ke utịt edidi.—Matthew 24:3, 14.

Ke ntre, oyom nnyịn ida kpukpru ifet ndikwọrọ eti mbụk Obio Ubọn̄ nnyụn̄ nnam mme mbet. (Matthew 28:19, 20) Sia owo mîditọn̄ọke aba ntak inam mme edinam ẹmi, emi edi akpatre ifet ndinọ ofụri se nnyịn inyenede ke utom unyan̄a uwem emi. “Ini mfọn-ido mi.” Ke akpanikọ, “usen edinyan̄a mi.”—2 Corinth 6:2.

Ndinam Ubiere Owụtde Eti Ibuot

Peter—akparawa oro ẹkesiakde ke ntọn̄ọ ntọn̄ọ—ke ntịn̄enyịn ama ekere aban̄a ubiere esie onyụn̄ odomo mme edimek esie ese. Enye ama ọfiọk ete ke ikpakwan̄ake imọ ndibọ ukpep ye ekikere edikabade ndi asiak owo esịp. Edi nso ikedi ata akpan n̄kpọ inọ enye? Ekedi edinam esie ke utom ukwọrọikọ Christian, ke ekerede aban̄a nte utom emi edide usọp usọp. Ke ukem ini oro, enye ama enyene mme mbiomo ndibiom. Enye ama ọdọ ndọ okonyụn̄ enyene ndinọ n̄wan esie ibetedem, oro abuanade ke utom ukwọrọikọ uyọhọ ini. (1 Timothy 5:8) Peter ekenyene n̄ko ndikpe isọn oro ekenyenede ebuana ye ukpepn̄wed esie. Nso, ndien, ke enye ekebiere ndinam?

Peter ama ebiere ndibọ ukpep ke edida uyama ikan̄ ndụn̄ọde mfiọk udọn̄ọ nnyụn̄ ndụn̄ọde ntụk idemowo. Emi ekedi utom oro okoyomde utom usen kpọt. Enye n̄ko ọkọbọ ukpep esie ke mme ini utom eke ofụri ini. Ih, ndusụk owo ẹkeme ndikere ke emi edi idaha oro mîtịmke inyene uku, edi emi ọmọnọ enye ini oro okponde akan ndisịn ke mme mbubehe eke spirit.

Ekikere efen ekedi ntak ubiere Peter. Ke adan̄aemi mîbiereke ikpe inọ mbon efen ẹmi ẹkemede ndidi ẹkebiere n̄kpọ isio isio, enye ama ọfiọk ete ke ndisịn idem n̄kaha ke mme n̄kpọ ererimbot osio Christian anyan ọnọ n̄kpọndịk. Emi ekeme ndinam enye ofụmi mme mbiomo eke spirit. Uwụtn̄kpọ efen oro aban̄ade utom anam emi an̄wan̄a.

Ọkwọrọikọ Obio Ubọn̄ ofụri ini kiet ekedi ewet ndise oro ama ọkọbọ ukpep. Enye ama ekeme ndin̄wam idemesie ke n̄kan̄ eke okụk ebe ke ndinyam mme n̄kpọ oro enye ewetde. Ke adan̄aemi ekesịnde ekese ini esie ke akakan utom ukwọrọikọ Christian, enye ke ntem ama ekeme ndin̄wam idemesie ifụre ifụre. Nte ededi, udọn̄ ndibọ ukpep efen efen ke ubọkọkọ uwet ndise esie ama ọtọn̄ọ ndikọri. Enye ama etetịm esịn idem ke uwet ndise ye ke ererimbot uwet ndise, ọkpọn̄ utom ukwọrọikọ uyọhọ ini, ndien ke akpatre ikanamke utom ndomokiet aba adan̄a nte utom ukwọrọikọ Obio Ubọn̄ akabuanade. Nte ini akade, enye ama esịn idem ke ido oro mîkemke ye N̄wed Abasi, osụn̄ọde ke enye nditre ndidi ubak esop Christian.—1 Corinth 5:11-13.

Ini Nnyịn Edi San̄asan̄a

Nte mbon oro ẹnamde n̄kpọ Jehovah idahaemi, ke akpanikọ nnyịn iyom ndinam akpanikọ nnọ enye. Nnyịn imọfiọk ite ke nnyịn idu uwem ke ata n̄wọrọnda ini ke mbụk owo. Man ika iso inam n̄kpọ Abasi inyụn̄ iyọ mme idaha eyomfịn uforo uforo, ekeme ndiyom nnyịn inam nsio nsio ukpụhọde. Nnyịn imekeme ndimen emi ndomo ye ini idọk ọtọin̄wan̄. Oro edi ini akpan edinam, emi ẹdoride enyịn mme anam utom in̄wan̄ ndisịn̄ede idemmọ n̄kan nte esidide nnyụn̄ nnam utom ebịghi akan ke usen. Ntak-a? Koro ana ẹkụre idọk ke ikpehe ini oro enyenede-nyene adan̄a.

Ini osụhọde ọnọ idiọk editịm n̄kpọ emi odude kemi edi ata ibio kpọt. Idahaemi nte akanam mîdịghe, oyom ata Christian esịn̄ede idemesie nditiene uwụtn̄kpọ Jesus nnyụn̄ nsan̄a ke nde-ikpat esie. Usụn̄uwem esie ke isọn̄ ama owụt in̄wan̄în̄wan̄ se ikedide n̄kponn̄kan n̄kpọ inọ enye. Enye ọkọdọhọ ete: “Nnyịn inyene ndinam utom Andidọn̄ Mi ke ini edide uwemeyo: n̄kụt-eyo ke edi, eke baba owo kiet mîkemeke ndinam utom ke esịt.” (John 9:4) Ndidọhọ ke n̄kụteyo ke ekedi, Jesus eketịn̄ aban̄a ini ikpe, edikọn̄ ke eto, ye n̄kpa esie, ke ini utom ukwọrọikọ esie eke isọn̄ editrede ndien enye mîdikemeke ndibuana ke utom Ete esie eke heaven.

Edi akpanikọ, ke ini utom ukwọrọikọ esie eke isua ita ye ubak, Jesus ama abiat ndusụk ini esie ndinam mme utịben̄kpọ nnyụn̄ n̄kọk mbon udọn̄ọ. Edi, enye akada ekese ini esie ndikwọrọ etop Obio Ubọn̄ nnyụn̄ “n̄kwọrọ uwọrọ-ufụn nnọ mbuot-ekọn̄” nsunsu ido ukpono. (Luke 4:18; Matthew 4:17) Jesus ama esịn ukeme ofụri esịt ke utom ukwọrọikọ esie onyụn̄ ada ini n̄ko ndinọ mme mbet esie ukpep man mmọ ẹkeme ndibọp ndori ke itiat idakisọn̄ oro enye ekesịnde ẹnyụn̄ ẹka iso uforo uforo ke utom ukwọrọikọ. Jesus ama ada kpukpru ifet ndimenede mme udọn̄ n̄kpọ Obio Ubọn̄ ke enyọn̄ okonyụn̄ oyom mme mbet esie ẹnam ukem n̄kpọ oro.—Matthew 5:14-16; John 8:12.

Ukem nte Jesus, oyom nnyịn oro idide mme anditiene enye ke eyomfịn ikụt idaha ubonowo nte Jehovah Abasi okụtde. Ini editịm n̄kpọ emi ke okụre, ndien Abasi ke mbọm oyom kpukpru owo ẹnyene ifet ndibọ edinyan̄a. (2 Peter 3:9) Ke ntre, nte ikpowụtke eti ibuot ndinịm kpukpru mbubehe eken ke udiana itie nnọ edinam uduak Jehovah? (Matthew 6:25-33) Akpan akpan ke utọ san̄asan̄a ini nte enyeemi, n̄kpọ oro nte ido edide ẹkpedade nte akpan n̄kpọ ekeme ndikabade ndi usụhọde n̄kpọ ke uwem nnyịn nte mme Christian.

Nte owo nnyịn ekededi tutu amama ayatua n̄kpọfiọk ke ndinịm uduak Abasi akpa ke uwem nnyịn? Ke akpanikọ baba, koro usụn̄ n̄waidem Christian ọnọde utịbe utịbe utịp. Ke uwụtn̄kpọ, Jesus akasian mme mbet esie ete: “Ke akpanikọ ke ndọhọ mbufo, baba owo kiet idụhe, eke ọkọkpọn̄de ufọk, m̀mê nditọ-eka iren, m̀mê nditọ-eka iban, m̀mê eka, m̀mê ete, m̀mê nditọ, m̀mê isọn̄, ke ntak Mi ye ntak gospel, emi mîdibọhọ n̄kpọ utịm ikikie ke emi ke ini emi, mme ufọk, ye nditọ-eka iren, ye nditọ-eka iban, ye mme eka, ye nditọ, ye isọn̄, ikọrọ ye ukụt: ye nsinsi uwem ke eyo emi edidide.”—Mark 10:29, 30.

Baba owo kiet ikemeke ndidori ekọmurua ke mme utịp oro mbon oro ẹdade ini mmọ ẹnam n̄kpọ ke nditoro Jehovah nnyụn̄ ntan̄a etop Obio Ubọn̄ ẹnyenede. Mmọ ẹnyene ata ediwak edidiọn̄! Mmọemi ẹsịne mme ufan akpanikọ, uyụhọ otode edinam uduak Abasi, unyịme Abasi, ye idotenyịn anana-utịt uwem. (Ediyarade 21:3, 4) Ndien nso edidiọn̄ ke edi ntem ndin̄wam mme owo ke n̄kan̄ eke spirit nnyụn̄ nda ukpono nsọk edisana enyịn̄ Jehovah nte Mme Ntiense esie! Ye unana eyịghe, ‘ndidedep ifet’ edi usụn̄uwem oro owụtde eti ibuot onyụn̄ akamade utịp. Idahaemi nte akanam mîdịghe edi ini ndibuana ke nditan̄a eti mbụk Obio Ubọn̄ Abasi. Nte afo ayada n̄wọrọnda ifet emi anam n̄kpọ onyụn̄ omụm enye akama?

[Ikọ idakisọn̄]