Ẹmenede Ndisana Ubọk Ke Enyọn̄ Ẹbọn̄ Akam
“Nyom irenowo . . . ẹbọn̄ akam ke kpukpru ebiet, ẹmenede ndisana ubọk ke enyọn̄, ẹkûnyene iyatesịt ye eneni.”—1 TIMOTHY 2:8.
1, 2. (a) Didie ke 1 Timothy 2:8 enyene n̄kpọ ndinam ye akam oro abuanade ikọt Jehovah? (b) Nso ke nnyịn idineme iban̄a idahaemi?
JEHOVAH oyom ikọt esie ẹnam akpanikọ ẹnọ enye ẹnyụn̄ ẹnam ẹnọ kiet eken. Apostle Paul akabuan edinam akpanikọ ye akam ke ini enye ekewetde ete: “Nyom irenowo . . . ẹbọn̄ akam ke kpukpru ebiet, ẹmenede ndisana ubọk ke enyọn̄, ẹkûnyene iyatesịt ye eneni.” (1 Timothy 2:8) Etie nte Paul eketịn̄ aban̄a akam oro ẹbọn̄de an̄wan̄wa “ke kpukpru ebiet” oro mme Christian ẹkesopde idem ọtọkiet. Mmanie ẹkenyene ndibọn̄ akam ke ibuot ikọt Abasi ke mme mbono esop? Sụk ndisana, ndinen, irenowo oro ẹkenyenede mbak ẹmi ẹtịn̄de enyịn ẹnam kpukpru utom Abasi oro ẹwụtde ke N̄wed Abasi. (Ecclesiastes 12:13, 14) Mmọ ẹkenyene ndisana ke n̄kan̄ eke spirit ye ke ido uwem ẹnyụn̄ ẹyak idem ẹnọ Jehovah Abasi ke usụn̄ oro eyịghe mîdụhe.
2 Mbiowo esop akpan akpan ẹkpenyene ‘ndimenede ndisana ubọk ke enyọn̄ mbọn̄ akam.’ Mme akam esịt akpanikọ mmọ ebe ke Jesus Christ ẹwụt edinam akpanikọ nnọ Abasi ẹnyụn̄ ẹn̄wam mmọ ndifep mme eneni ye utọk. Ke nditịm ntịn̄, erenowo ekededi oro enyenede ifet ndida ke ibuot esop Christian mbọn̄ akam an̄wan̄wa ikpenyeneke ndisiyat esịt, ndinyene udu, ikponyụn̄ itreke ndinam akpanikọ nnọ Jehovah ye esop esie. (James 1:19, 20) Mme n̄kaiso ndausụn̄ ewe ẹdu ke Bible ẹnọ mbon oro ẹnyenede ifet ndida ke ibuot mbon efen mbọn̄ akam an̄wan̄wa? Ndien nso idi ndusụk edumbet N̄wed Abasi oro nnyịn ikpenyenede ndida nsịn ke edinam ke ini ibọn̄de ọkpọkpọ akam ye mme akam ubon?
Bem Iso Kere Ban̄a Akam
3, 4. (a) Ntak emi ọfọnde ndibem iso n̄kere mban̄a akam oro ẹdibọn̄de an̄wan̄wa? (b) Nso ke N̄wed Abasi etịn̄ aban̄a nte mme akam ẹkpeniọn̄de?
3 Edieke ẹdọhọde nnyịn ibọn̄ akam an̄wan̄wa, eyedi nnyịn iyekeme ndibem iso n̄kere mban̄a akam nnyịn ke ndusụk udomo. Ndinam emi ekeme ndin̄wam nnyịn nditịn̄ mme akpan n̄kpọ oro ẹdotde ye unana edibọn̄ anyan akam oro owo mîtịn̄ke akpan n̄kpọ. Edi akpanikọ, imekeme ndibọn̄ mme ọkpọkpọ akam nnyịn uyo ọwọrọ. Mmọ ẹkeme ndiniọn̄ nte ikpamama. Jesus ama abiat ofụri okoneyo ọbọn̄ akam mbemiso ekemekde apostle esie 12. Nte ededi, ke ini enye ọkọtọn̄ọde Editi n̄kpa esie, nte an̄wan̄ade akam oro enye ọkọbọn̄de ke uyo ye wine ẹkedi mbio mbio. (Mark 14:22-24; Luke 6:12-16) Ndien nnyịn imọfiọk ite ke Abasi ama enyịme idem mbio mbio akam Jesus ọyọhọ ọyọhọ.
4 Yak idọhọ ke nnyịn inyene ifet ndida ke ibuot ubon mbọn̄ akam mbemiso ẹdiade udia. Utọ akam oro ẹkeme ndidi ata ibio ibio—edi se ededi oro ẹtịn̄de ekpenyene ndisịne ikọ ekọm kaban̄a udia oro. Edieke nnyịn ibọn̄de akam an̄wan̄wa mbemiso m̀mê ke mbono esop Christian asuanade, iyomke nnyịn ibọn̄ anyan akam oro ẹdọn̄ọde ediwak n̄kpọ. Jesus ama asua ọnọ mme scribe oro ‘ẹkebọn̄de nnyan akam ke mbubịk.’ (Luke 20:46, 47) Owo emi abakde Abasi idiyomke ndinam oro. Nte ededi, ndibọn̄ an̄wan̄wa akam oro ọniọn̄de esisịt ekeme ndidot ndusụk ini. Ke uwụtn̄kpọ, ebiowo oro ẹmekde ndibọn̄ akpatre akam ke mbono ekpenyene ndibem iso n̄kere mban̄a enye ndien ekeme ndimek ndisiak ediwak n̄kpọ. Kpa ye oro, idem utọ akam oro ikpenyeneke ndiniọn̄ n̄kaha.
San̄a Kpere Abasi ye Ukpono
5. (a) Nso ke nnyịn ikpenyene ke ekikere ke ini ibọn̄de akam an̄wan̄wa? (b) Ntak emi ikpọbọn̄de akam ke usụn̄ oro owụtde uku ye ukpono?
5 Ke ini ibọn̄de akam an̄wan̄wa nnyịn ikpenyene nditi nte ke nnyịn itịn̄ke ikọ inọ mme owo. Utu ke oro, nnyịn idi mme anamidiọk edibotn̄kpọ oro iben̄ede n̄kpọ ito Jehovah Ọbọn̄ Andikara. (Psalm 8:3-5, 9; 73:28) Ke ntre nnyịn ikpenyene ndiwụt ukpono ukpono mbak nnọ enye ebe ke se nnyịn itịn̄de ye nte nnyịn itịn̄de enye. (Mme N̄ke 1:7) David andiwet psalm ọkọkwọ ete: “Ama edi ami, nyodụk ke ufọk fo ke uwak ima fo; nyada uten̄e fo ntuak ibuot nse edisana temple fo.” (Psalm 5:7) Edieke nnyịn inyenede edu oro, didie ke nnyịn iditịn̄ ikọ ke ini ẹdọhọde nnyịn ibọn̄ akam an̄wan̄wa ke mbono esop eke Mme Ntiense Jehovah? Nte ededi, edieke nnyịn ikpetịn̄de ikọ ye owo emi edide edidem, nnyịn ikpanam ntre ke ukpono ye uku. Ndi mme akam nnyịn ikpakam inen̄ekede itie uku uku ye ukpono ukpono ikan, sia nnyịn ibọn̄de akam inọ Jehovah, kpa “nsinsi Edidem”? (Ediyarade 15:3, NW) Ntre ke ini ibọn̄de akam nnyịn iyefep mme utọ ikọ nte, “Jehovah, emesiere,” “Nnyịn imọnọ fi ima nnyịn,” m̀mê, “Tie sụn̄.” N̄wed Abasi owụt ete ke ikpọn̄îkpọn̄ edibon Eyen Abasi, Jesus Christ, akananam itịn̄ke ikọ ye Ete esie eke heaven ke utọ usụn̄ oro.
6. Nso ke nnyịn ikpenyene ke ekikere ke ini nnyịn ‘isan̄ade ikpere ebekpo mfọn’?
6 Paul ọkọdọhọ ete: “Ẹyak nnyịn isan̄a ikpere ebekpo mfọn ye uko.” (Mme Hebrew 4:16) Nnyịn imekeme ndisan̄a n̄kpere Jehovah ye “uko” kpa ye idaha idiọkn̄kpọ nnyịn ke ntak mbuọtidem nnyịn ke uwa ufak Jesus Christ. (Utom 10:42, 43; 20:20, 21) Edi, utọ “uko” oro iwọrọke ite ke nnyịn ibre mbre ye Abasi; nnyịn ikponyụn̄ inyeneke nditịn̄ mme n̄kpọ oro mîwụtke ukpono ye enye. Edieke anade mme akam oro ibọn̄de an̄wan̄wa ẹnem Jehovah esịt, ana ibọn̄ mmọ ye nnennen ukpono ye uku, ndien ikpodotke ndida mmọ nnọ ntọt, nnọ mme owo item, m̀mê nnọ otuowo utịn̄ikọ.
Bọn̄ Akam ye Edu Nsụhọdeidem
7. Didie ke Solomon okowụt nsụhọdeidem ke ini enye ọkọbọn̄de akam ke ini ediyak temple Jehovah nnọ?
7 Edide nnyịn ibọn̄ akam an̄wan̄wa m̀mê ọkpọkpọ, akpan edumbet N̄wed Abasi ndinyene ke ekikere edi nte ke nnyịn ikpenyene ndiwụt edu nsụhọdeidem ke mme akam nnyịn. (2 Chronicles 7:13, 14) Edidem Solomon ama owụt nsụhọdeidem ke an̄wan̄wa akam esie ke ini ediyak temple Jehovah ke Jerusalem nnọ. Solomon ndikosụk n̄kụre kiet ke otu n̄kponn̄kan ufọk oro akanam ẹbọpde ke isọn̄ ekedi oro. Kpa ye oro, enye ama ọbọn̄ akam ke nsụhọdeidem ete: “Nte Abasi oyodụn̄ ke isọn̄ ndien ke akpanikọ? Sese, enyọn̄ ye ata enyọn̄ ikemke fi, kpan̄ ọfiọk ufọk emi n̄kọbọpde.”—1 Ndidem 8:27.
8. Nso idi ndusụk usụn̄ oro ẹwụtde nsụhọdeidem ke akam oro ẹbọn̄de an̄wan̄wa?
8 Ukem nte Solomon, nnyịn ikpenyene ndisụhọde idem ke ini ibọn̄de akam an̄wan̄wa ke ibuot mmọ efen. Okposụkedi nnyịn ikpenyenede ndifep nditịn̄ ikọ mbubịk mbubịk, nnyịn imekeme ndiwụt nsụhọdeidem ke uyo ikọ nnyịn. Mme akam nsụhọdeidem itiehe n̄wụtidem n̄wụtidem m̀mê enyọn̄ enyọn̄. Mmọ idụrike ntịn̄enyịn iwụt owo emi ọbọn̄de akam, edi Enye Emi ẹbọn̄de ẹnọ. (Matthew 6:5) Nnyịn iwụt nsụhọdeidem n̄ko ebe ke se nnyịn itịn̄de ke akam. Edieke nnyịn ibọn̄de akam ke nsụhọdeidem, nnyịn iditịn̄ke ikọ nte n̄kpọ eke iyomde Abasi anam ndusụk n̄kpọ nte nnyịn iyomde. Utu ke oro, nnyịn idiben̄e Jehovah anam n̄kpọ ke usụn̄ oro ekemde ye edisana uduak esie. Andiwet psalm ama owụt nnennen edu ke ini enye ekeben̄ede ete: “Mbọk, O Jehovah, mbọk, nyan̄a: mbọk, O Jehovah, mbọk, nam nnyịn ikụt unen.”—Psalm 118:25; Luke 18:9-14.
Bọn̄ Akam To Esịt
9. Ewe eti item oro Jesus ọkọnọde ke ẹkụt ke Matthew 6:7, ndien didie ke ẹkeme ndida enye nsịn ke edinam?
9 Edieke anade mme akam oro ibọn̄de an̄wan̄wa m̀mê ọkpọkpọ ẹnem Jehovah esịt, ana mmọ ẹto esịt. Ntem, nnyịn n̄kukụre iditịn̄ke mme ikọ akam ifiak itịn̄ ediwak ini ye unana edikere mban̄a se nnyịn itịn̄de. Ke Ukwọrọikọ esie oro ke Obot, Jesus ọkọnọ item ete: “Ke ini ẹbọn̄de akam, ẹkûyịre nditetịn̄ ikpîkpu ikọ, nte mme Gentile ẹnamde: koro etie mmọ [ke ndudue] nte edikop akam oto ke uwak ikọ eke ẹtịn̄de.” Ke nditịn̄ ke usụn̄ efen, Jesus ọkọdọhọ ete: “Ẹkûtịn̄ ikpîkpu ikọ; ẹkûtịn̄ ẹfiak ẹtịn̄ ikpîkpu ikọ.”—Matthew 6:7; ikọ idakisọn̄ NW.
10. Ntak emi okpodotde ndibọn̄ akam mban̄a ukem n̄kpọ awak akan ini kiet?
10 Nte ededi, ekeme ndiyom nnyịn ibọn̄ akam iban̄a ukem n̄kpọ ndien ndien. Oro ikpakwan̄ake koro Jesus eketeme ete: “Ẹben̄e, ndien ẹyenọ mbufo; ẹyom, ndien mbufo ẹyekụt; ẹtuak, ndien ẹyesio usụn̄ ẹnọ mbufo.” (Matthew 7:7) Iso-ọfọn ẹyom obufa Ufọkmbono Obio Ubọn̄ ke ntak emi Jehovah oforide utom ukwọrọikọ n̄kann̄kụk. (Isaiah 60:22) Odot ndika iso ntịn̄ se ẹyomde emi ke ini ẹbọn̄de ọkpọkpọ akam m̀mê ke ini ẹbọn̄de akam an̄wan̄wa ke mme mbono esop ikọt Jehovah. Ndinam ntre ikpọwọrọke ke nnyịn ‘itịn̄ ikpîkpu ikọ.’
Ti Ekọm ye Itoro
11. Didie ke Philippi 4:6, 7 enyene n̄kpọ ndinam ke ọkpọkpọ ye an̄wan̄wa akam?
11 Ediwak owo ẹsibọn̄ akam n̄kukụre man ẹben̄e n̄kpọ, edi ima oro inyenede inọ Jehovah Abasi ekpenyene ndinụk nnyịn ndinọ enye ekọm ye itoro ke ọkpọkpọ ye an̄wan̄wa akam. Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Ih, ke adianade ye n̄kpe-ubọk ye eben̄e, nnyịn ikpenyene ndikọm Jehovah kaban̄a mme edidiọn̄ nnyịn ke n̄kan̄ eke spirit ye eke obụk. (Mme N̄ke 10:22) Andiwet psalm ọkọkwọ ete: “Wa ekọm nọ Abasi; nyụn̄ sio mme akan̄a fo nọ Ata Edikon̄.” (Psalm 50:14) Ndien inem inem ikwọ akam David ama esịne mme edemede-udọn̄ ikọ ẹmi: “Nyotoro enyịn̄ Abasi ke ikwọ, nnyụn̄ n̄kpono enye ke ekọm.” (Psalm 69:30) Nte nnyịn ikpanamke ukem oro ke akam oro ibọn̄de ọkpọkpọ ye an̄wan̄wa?
12. Didie ke Psalm 100:4, 5 osu mfịn, ndien nnyịn ikeme ndikọm nnyụn̄ ntoro Abasi mban̄a nso?
12 Kaban̄a Abasi, andiwet psalm ọkọkwọ ete: “Mbufo ẹda ekọm ẹdụk ke inua-otop esie, ẹda itoro ẹdụk ke okụre esie: ẹkọm enye, ẹtoro enyịn̄ esie. Koro Jehovah ọmọfọn; ima esie ebịghi ke nsinsi; akpanikọ esie onyụn̄ ebịghi ke ofụri emana.” (Psalm 100:4, 5) Mfịn, mme owo ẹtode kpukpru idụt ke ẹdụk okụre edisana ebiet Jehovah, ndien nnyịn imekeme ndinọ enye ekọm ye itoro mban̄a emi. Ndi afo emesinọ Abasi ekọm aban̄a Ufọkmbono Obio Ubọn̄ n̄kann̄kụk onyụn̄ owụt esịtekọm ebe ke ndisop idem do kpukpru ini ye mbon oro ẹmade enye? Ke adan̄aemi odude do, ndi afo emesimenede uyo fo ke ofụri esịt ndikwọ mme ikwọ itoro ye ekọm nnọ ima ima Ete nnyịn eke heaven?
Kûdede Ukop Bụt Ndibọn̄ Akam
13. Ewe uwụtn̄kpọ N̄wed Abasi owụt ete ke nnyịn ikpenyene ndikpe Jehovah ubọk idem edieke etiede nte nnyịn idotke ke ntak ubiomikpe?
13 Idem edieke etiede nte nnyịn idotke ke ntak ubiomikpe, nnyịn ikpenyene ndiwọn̄ọde mbịne Abasi ye ọkpọsọn̄ n̄kpeubọk. Ke ini mme Jew ẹkenamde idiọkn̄kpọ ebe ke ndidọ iban isenidụt, Ezra ama ọtọn̄ọ edọn̄, emenede ndisana ubọk esie ke enyọn̄ ọnọ Abasi, onyụn̄ ọbọn̄ akam ke nsụhọdeidem ete: “O Abasi mi, bụt anam mi ke iso eti-eti ndimenede iso mi nse fi, O Abasi mi: koro mme ukwan̄-n̄kpọ nnyịn ẹkon̄de ẹkan ibuot nnyịn, isop nnyịn onyụn̄ okpon tutu esịm ke ikpa-enyọn̄. Nnyịn imakama akamba isop toto ke eyo mme ete nnyịn, tutu esịm mfịn emi . . . Ndien emi kpukpru n̄kpọ ẹmi ẹma ẹnam nnyịn, ẹban̄a mme idiọk ido nnyịn, ye akwa isop nnyịn: koro afo, O Abasi nnyịn, ama osụk ubọk akan mme ukwan̄-n̄kpọ nnyịn, ama onyụn̄ ọnọ nnyịn orụk ubọhọ emi; nte nnyịn iditọn̄ọ ntak ibiat mbet fo, inyụn̄ ikoro ukot ye mbio mbubiam ẹmi? Nte afo uduyatke esịt ye nnyịn, tutu osobo nnyịn ama, tutu baba owo kiet eke ọbọhọde isụhọke? O Jehovah Abasi Israel, afo emenen: koro nnyịn ẹmi ibọhọde imosụhọ, nte edide mfịn emi: sese, nnyịn imodu ke iso fo ke isop nnyịn: koro n̄kpọ emi mîyakke baba owo kiet ekeme ndida fi ke iso.”—Ezra 9:1-15; Deuteronomy 7:3, 4.
14. Nte ẹkewụtde ke eyo Ezra, nso ke oyom man Abasi adahado ọnọ owo?
14 Man Abasi adahado ọnọ nnyịn, ediyarade ndudue nnọ enye enyene ndisan̄a ye edikabade esịt ye “mfri eke odotde edikabade esịt.” (Luke 3:8; Job 42:1-6; Isaiah 66:2) Ke eyo Ezra, edu edikabade esịt akasan̄a ye ukeme edinen̄ede se ikwan̄ade ebe ke ndibịn iban isenidụt mfep. (Ezra 10:44; men 2 Corinth 7:8-13 domo.) Edieke nnyịn iyomde Abasi adahado ọnọ nnyịn ke akwa idiọkn̄kpọ, ẹyak nnyịn iyarade ndudue ke akam nsụhọdeidem inyụn̄ ision̄o mfri eke odotde edikabade esịt. Edu edikabade esịt ye udọn̄ ndinen̄ede se ikwan̄ade ẹyenụk nnyịn ndiyom un̄wam eke spirit nto mbiowo Christian.—James 5:13-15.
Bọ Ndọn̄esịt To Akam
15. Didie ke ifiọk n̄kpọntịbe Hannah owụt ete ke nnyịn imekeme ndinyene ndọn̄esịt nto akam?
15 Ke ini ikopde idiọkesịt oto ndusụk ntak, nnyịn imekeme ndinyene ndọn̄esịt nto akam. (Psalm 51:17; Mme N̄ke 15:13) Anam-akpanikọ Hannah ama anam ntre. Enye okodu uwem ke ini oro ekedide ọsọ n̄kpọ ndinyene ikpọ ubon ke Israel, edi enye ikamanke eyen. Ebe esie, Elkanah, ama enyene nditọiren ye nditọiban oto n̄wan esie enye eken, Peninnah, emi akasakde Hannah nte edide ada. Hannah ama ọbọn̄ akam ifịk ifịk onyụn̄ ọn̄wọn̄ọ ete ke edieke ẹnọde imọ eyeneren, ‘imọ iyada enye inọ Jehovah kpukpru usen uwem esie.’ Ke enyenede ndọn̄esịt oto akam esie ye mme ikọ Akwa Oku Eli, Hannah ‘ikofụhọke aba.’ Enye ama aman eyeneren emi enye okokotde Samuel. Ekem, enye ama ayak enye ọnọ ke utom edisana ebiet Jehovah. (1 Samuel 1:9-28) Ke ndiwụt esịtekọm mban̄a mfọnido oro Abasi okowụtde enye, enye ama ọbọn̄ akam ekọm—kiet oro okotorode Jehovah nte enye emi mînyeneke mbiet. (1 Samuel 2:1-10) Ukem nte Hannah, nnyịn imekeme ndinyene ndọn̄esịt nto akam, inyenede mbuọtidem nte ke Abasi esibọrọ kpukpru eben̄e oro ẹkemde ye uduak esie. Ke ini nnyịn in̄wan̄ade esịt nnyịn inọ enye, ẹyak nnyịn ‘ikûfụhọ aba,’ koro enye oyobiomode nnyịn mbiomo mîdịghe ayan̄wam nnyịn ndibiom enye.—Psalm 55:22.
16. Nte ẹwụtde ke idaha oro akabuanade Jacob, ntak emi nnyịn ikpọbọn̄de akam ke ini nnyịn ikopde ndịk m̀mê editịmede esịt?
16 Edieke idaha anamde ikop ndịk, idiọkesịt, m̀mê editịmede esịt, ẹyak nnyịn ikûtre ndiwọn̄ọde mbịne Abasi ke akam kaban̄a ndọn̄esịt. (Psalm 55:1-4) Jacob ama okop ndịk ke ini okoyomde ndika n̄kosobo ye Esau, akpaneka esie oro akasuade enye. Edi, Jacob ama ọbọn̄ akam ete: “Abasi ete mi Abraham, ye Abasi ete mi Isaac, Jehovah emi ọdọhọde mi ete, Fiak ka ke isọn̄ fo ye obio emana fo, ndien ami nyọfọn ye afo; n̄kpekpri n̄kan kpukpru ufọn, ye kpukpru akpanikọ emi afo akanamde ye owo fo; n̄kọm n̄kebe Jordan emi ye esan̄ mi ikpọn̄; ndien ke emi mma n̄kabade ndi udịm iba. Mbọk, nyan̄a mi sio ke ubọk eyen-eka mi, ke ubọk Esau: koro mfefehe enye, mbak edidi ediwot mi, ye eka adian ye nditọ. Afo okonyụn̄ ọdọhọ ete, Ami [nyọfọn mfọn] ye afo, nyonyụn̄ nnam ubon fo etie nte ntan inyan̄ emi mîkemeke ndibat ke uwak.” (Genesis 32:9-12) Esau ikobụmekede in̄wana ye Jacob ye ikọt esie. Ntem Jehovah ama ‘ọfọn mfọn’ ye Jacob ke idaha oro.
17. Nte ekemde ye Psalm 119:52, didie ke akam ekeme ndinọ nnyịn ndọn̄esịt ke ini ẹdomode nnyịn idiọk idiọk?
17 Ke ini nnyịn inamde n̄kpeubọk, nditi mme n̄kpọ oro ẹtịn̄de ke Ikọ Abasi ekeme ndidọn̄ nnyịn esịt. Ke psalm oro ọniọn̄de akan—inem inem akam oro ẹkemiade n̄kukwak ẹdọn̄—ekeme ndidi Edidem Hezekiah ọkọkwọ ete: “Mmeti mme ikpe fo eke eset, O Jehovah; nnyụn̄ n̄kop ndọn̄esịt.” (Psalm 119:52) Ke ibọn̄de akam ke nsụhọdeidem ke ini ẹdomode nnyịn idiọk idiọk, nnyịn imekeme nditi edumbet m̀mê ibet kiet ke Bible oro ekemede ndin̄wam nnyịn nditiene usụn̄ edinam oro adade esịm nsọn̄ọ oro ọnọde ndọn̄esịt nte ke nnyịn ke inem Ete nnyịn eke heaven esịt.
Mme Anam-Akpanikọ Ẹkọbọ ke Akam
18. Ntak emi ẹkemede ndidọhọ ke ‘kpukpru mbon ima ẹyebọn̄ akam ẹnọ Abasi’?
18 Kpukpru mbon oro ẹnamde akpanikọ ẹnọ Jehovah Abasi ‘ẹyekọbọ ke edibọn̄ akam.’ (Rome 12:12) Ke ọyọhọ Psalm 32, emi ekemede ndidi David ekewet ke ama akanam idiọkn̄kpọ ye Bath-sheba, enye ama etịn̄ aban̄a ọkpọsọn̄ ubiak esie ke ndiketre ndiyom edifen ye ifụre oro edikabade esịt ye ediyarade idiọkn̄kpọ nnọ Abasi akadade ọsọk enye. Ekem David ama ọkwọ ete: “Emi [koro edidahado Jehovah odude ọnọ mme ata andikabade esịt] eyesịn kpukpru mbon-ima fo ẹkpe fi ubọk ke ini eke ẹdikụtde fi.”—Psalm 32:6.
19. Ntak emi nnyịn ikpemenerede ndisana ubọk ke enyọn̄ ibọn̄ akam?
19 Edieke nnyịn imade itie ebuana nnyịn ye Jehovah Abasi, nnyịn iyọbọn̄ akam iyom mbọm esie ke isọn̄ uwa ufak Jesus. Ke mbuọtidem, nnyịn imekeme ndisan̄a n̄kpere ebekpo mfọn ye uko man ibọ mbọm ye un̄wam ke edikem ini. (Mme Hebrew 4:16) Edi ediwak ntak ẹdu ndibọn̄ akam! Ke ntre ẹyak nnyịn ‘ikûdop akam’—ediwak ini ye mme ikọ ẹwụtde itoro ye ekọm ikọmde Abasi ke ofụri esịt. (1 Thessalonica 5:17) Ke uwemeyo ye okoneyo, ẹyak nnyịn imenede ndisana ubọk ke enyọn̄ ibọn̄ akam.
Didie ke Afo Ọkpọbọrọ?
◻ Nso ufọn odu ke ndibem iso n̄kere mban̄a akam oro edibọn̄de an̄wan̄wa?
◻ Ntak emi nnyịn ikpọbọn̄de akam ke usụn̄ oro owụtde ukpono ye uku?
◻ Nso edu ke nnyịn ikpowụt ke ini ibọn̄de akam?
◻ Ke ini ibọn̄de akam, ntak emi nnyịn ikpetide ekọm ye itoro?
◻ Didie ke Bible owụt ete ke nnyịn imekeme ndinyene ndọn̄esịt nto akam?
[Ndise ke page 17]
Edidem Solomon ama owụt nsụhọdeidem ke an̄wan̄wa akam esie ke ini ediyak temple Jehovah nnọ
[Mme ndise ke page 18]
Ukem nte Hannah, afo emekeme ndinyene ndọn̄esịt nto akam