“Emem Abasi, emi ayan̄ade ifiọk owo”

KE OFỤRI mbụk, mme anam-akpanikọ asan̄autom Abasi ẹmesobo mme ini ọkpọsọn̄ ubiak eke ntụk. Emi enen̄ede edi ntre didie ntem mfịn, sia nnyịn idude ke “ndiọkeyo”! (2 Timothy 3:⁠1) Apostle Paul ama ọnọ mme Christian item ete ẹtop mme editịmede esịt mmọ ẹdori Jehovah ebe ke akam. Ye nso utịp? “Emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.”​—⁠Philippi 4:⁠7.

Nso ke “emem Abasi” emi edi? Enye edi ifụre emi otode edinyene n̄kpet n̄kpet itie ebuana ye Andibot. Utọ itie ebuana oro ọnọ nnyịn nsọn̄ọ nte ke, inamke n̄kpọ m̀mê nso idi ukụt nnyịn, Jehovah “idikpọn̄ke ikọt esie; enye idisịnke mbon oro ẹnyenede enye.”​—⁠Psalm 94:14, Today’s English Version.

Emi iwọrọke ite ke nnyịn imọbọhọ afanikọn̄. Andiwet psalm ekewet ete: “Ediwak ukụt ẹsịm eti owo.” (Psalm 34:19) Edi emem Abasi ekeme ndida ifụre ndi. Didie?

Emem Abasi ‘ayan̄a ifiọk owo,’ ntre ke Paul ekewet​—⁠mîdịghe nte ẹsịnde ke Concordant Version, enye “akan kpukpru idaha ekikere.” Editịmede esịt ekeme ndinam nnyịn inyene nsio nsio ntụk oro ẹkamade mfụhọ. (Ecclesiastes 7:⁠7) Edi, emem Abasi ekeme ndisọn̄ọ nnyịn idem, akpan akpan ke ini nnyịn iyomde “akwa ubom odudu.”​—⁠2 Corinth 4:7; 2 Timothy 1:⁠7.

Akan oro, emem Abasi edi ukpeme. Enye ekeme ‘ndikpeme mbufo esịt ye ekikere,’ nte Paul ekewetde ọnọ ẹsọk mbon Philippi. Ikọ Greek oro ẹkabarede ‘kpeme’ edi usem ekọn̄ emi anade edi ọnọ ekikere aban̄a owo ukpeme emi odude ke itie ukpeme uwemeyo ye okoneyo. Ke ukem usụn̄ oro, emem Abasi ekeme ndinam n̄kpọ nte ukpeme ofụri usen ọnọ esịt ye ekikere nnyịn.​—⁠1 Corinth 10:13; men N̄wed Mbon Ephesus 4:⁠26 domo.

Ke ikerede iban̄a mme n̄kpọ-ata oro ẹkamade mfịghe ẹmi nnyịn isobode mfịn, nte emem Abasi idịghe n̄kpọ oro nnyịn ikemede ndiwụt esịtekọm mban̄a?​—⁠Psalm 18:2; men Exodus 40:⁠38 domo.