Mme Mbụme Ẹtode Mme Andikot

Nte ‘edinịm idiọn̄ọ’ oro ẹtịn̄de ke 2 Thessalonica 3:14 edi edinam ofụri esop, m̀mê edi n̄kpọ oro mme Christian ẹnamde ọkpọkpọ ke ndifep mbon nsọn̄ibuot?

Se apostle Paul ekewetde ọnọ mbon Thessalonica owụt nte ke mbiowo esop ẹnyene akpan utom ke utọ ‘edinịm idiọn̄ọ’ oro. Nte ededi, ke oro ebede Christian kiet kiet ayanam n̄kpọ aban̄a oro, anamde ntre ye mme utịtmbuba eke spirit ke ekikere. Nnyịn ikeme nditịm mfiọk emi ebe ke ndikere mban̄a item Paul ke akpasarade idaha.

Paul akan̄wam nditọn̄ọ esop Thessalonica, an̄wamde iren ye iban ndikabade ndi mme andinịm ke akpanikọ. (Utom 17:1-4) Ekem enye ama etie ke Corinth ewet n̄wed nditoro nnyụn̄ nsịn udọn̄ nnọ mmọ. Paul ama ọnọ item oro ẹkeyomde n̄ko. Enye ama eteme mmọ ete ‘ẹtie sụn̄-sụn̄, ẹnyụn̄ ẹse mbubehe mmọ, ẹnyụn̄ ẹda ubọk ẹnam utom.’ Ndusụk owo ikanamke n̄kpọ ke usụn̄ oro, ntre Paul ama adian do ete: “Imonyụn̄ ikpe ye mbufo, nditọ-ete, ẹsua ẹnọ mmọ eke ẹsan̄ade etịme-etịme, ẹsọn̄ọ mbon iduọ-esịt idem, ẹkama mbon mmem-idem.” Nte an̄wan̄ade, “mmọ eke ẹsan̄ade etịme-etịme”a ẹma ẹdu ke otu mmọ, ẹmi ẹkeyomde item.—1 Thessalonica 1:2-10; 4:11; 5:14.

Ke ndusụk ọfiọn̄ ẹma ẹkebe, Paul ama ewet udiana n̄wed esie ọnọ ẹsọk mbon Thessalonica, ye ikọ efen efen ẹban̄ade edidu Jesus eke ini iso. Paul ama ọnọ n̄kaiso ndausụn̄ n̄ko kaban̄a nte ẹkpenamde n̄kpọ ye mbon oro ẹkesan̄ade etịme etịme, ẹmi ‘ẹkenọhọde ke mbubehe owo en̄wen.’ Mme edinam mmọ ikodụhe ke n̄kemuyo ye uwụtn̄kpọ Paul nte ifịk ifịk anamutom ye in̄wan̄în̄wan̄ item esie akaban̄ade owo ndinam utom man ese aban̄a idemesie. (2 Thessalonica 3:7-12) Paul ama ọnọ ndausụn̄ aban̄a se ẹkpenamde. Ẹkenam mme n̄kpọ ẹmi ke mbiowo ẹma ẹkenanam n̄kpọ ke ndinọ mbon oro ẹkesan̄ade etịme etịme item. Paul ekewet ete:

“Isọn̄ọ inọ mbufo uyo, ite ẹdian̄ade idem ye eyen-ete ekededi eke asan̄ade etịme-etịme, mînyụn̄ isan̄ake ke item eke ẹkebọde ke inua nnyịn. Ama edi mbufo, nditọ-ete, ẹkûduọ esịt ke edinam eti n̄kpọ. Edieke owo ekededi mîkopke uyo eke inọde ke n̄wed emi, ẹnịm owo oro idiọn̄ọ, ẹkûnyụn̄ ẹdụk ndụk ye enye, man bụt anam enye. Edi ẹkûbat enye nte usua, edi ẹtụnọ enye nte eyen-ete.”—2 Thessalonica 3:6, 13-15.

Ntre n̄kaiso edinam ẹma ẹsịne edidian̄ade nsan̄a ye mmọ eke ẹkesan̄ade etịme etịme, ẹnịmde mmọ idiọn̄ọ, ẹtrede ndidụk ndụk ye mmọ, edi ẹtụnọde mmọ nte nditọete. Nso idinam mme andibuana ke esop ẹnam n̄kpọ ke usụn̄ oro? Nte un̄wam ndinam emi an̄wan̄a, ẹyak nnyịn iwụt idaha ita ẹmi Paul mîketịn̄ke iban̄a mi.

1. Nnyịn imọfiọk ite ke mme Christian ẹdi mme anana-mfọnmma ẹnyụn̄ ẹnyene mme mmeme. Edi, ima edi idiọn̄ọ ata Ido Ukpono Christ, oyomde nnyịn iwụt mbufiọk inyụn̄ ifen ndudue mbon en̄wen. Ke uwụtn̄kpọ, Christian ekeme ndiwụt ọkpọsọn̄ iyatesịt oro mîwakke nditịbe, nte oro akadade itie ke ufọt Barnabas ye Paul. (Utom 15:36-40) Mîdịghe, ke ntak edikpa mba owo ekeme nditịn̄ mme uyat uyat ikọ. Ke mme utọ idaha oro, ebede ke ndiwụt ima nnyụn̄ nda item Bible nsịn ke edinam, nnyịn imekeme ndifụk ndudue oro, ikade iso ndidu, mbuana, nnyụn̄ nnam utom ye ekemmọ Christian. (Matthew 5:23-25; 6:14; 7:1-5; 1 Peter 4:8) Nte an̄wan̄ade, idịghe mme utọ ndudue ẹmi ke Paul eketịn̄ aban̄a ke 2 Thessalonica.

2. Paul iketịn̄ke iban̄a idaha emi Christian ke idemesie emekde nditre nsan̄a ye owo en̄wen emi mme usụn̄ m̀mê mme edu esie mîfọnke—ke uwụtn̄kpọ, owo emi etiede nte ke owụk ntịn̄enyịn akaha ke unọ idem inemesịt m̀mê ke mme n̄kpọ obụkidem. Mîdịghe ete m̀mê eka ekeme ndidọhọ eyen esie okûdụk ndụk ye nditọwọn̄ ẹmi ẹsọn̄de ibuot ye ete ye eka, ẹbrede mbre ibak ibak m̀mê ke enyene-ndịk usụn̄, m̀mê oro mîdaha Ido Ukpono Christ ke akpan n̄kpọ. Utọ oro ẹkam ẹdi mme ọkpọkpọ ubiere ẹmi ẹdude ke n̄kemuyo ye se nnyịn ikotde ke Mme N̄ke 13:20: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.”—Men 1 Corinth 15:33 domo.

3. Ke ata isio isio udomo oro okponde akan, Paul ama ewet ọnọ mbon Corinth aban̄a owo emi akanamde akwa idiọkn̄kpọ emi mîkonyụn̄ ikabakede esịt. Ẹkenyene ndisio utọ anamidiọk oro mfep ke esop. Ẹkenyene ndiyak “oburobụt” owo oro nnọ Satan, yak idọhọ ntre. Ke oro ebede, mme anam-akpanikọ Christian ikenyeneke ndidụk ndụk ye utọ ndiọi owo oro; apostle John ama akpak mme Christian ete ẹkûkam ẹkọm mmọ. (1 Corinth 5:1-13; 2 John 9-11) Nte ededi, emi n̄ko idotke ye item eke 2 Thessalonica 3:14.

Se idide isio ye idaha ita oro ẹnemede ke enyọn̄ emi edi enye oro abuanade “mmọ eke ẹsan̄ade etịme-etịme” nte ẹnemede ke 2 Thessalonica. Paul ekewet ete ke mmọ ẹmi ẹkesụk ẹdi ‘nditọ-ete,’ ẹmi ẹkenyenede ndinọ item nnyụn̄ nda mmọ nte nditọete. Ntem, mfịna oro nditọete ẹmi “ẹsan̄ade etịme-etịme” ẹkenyenede ikedịghe ikpîkpu ọkpọkpọ n̄kpọ ke ufọt mme Christian ikonyụn̄ idịghe n̄kpọ oro okokponde ekem mbiowo esop ndinam n̄kpọ man ẹsio owo ẹfep, nte Paul akanamde ye oburobụt idaha oro okodude ke Corinth. Mmọ “eke ẹsan̄ade etịme-etịme” ikanamke akwa idiọkn̄kpọ, nte eren oro ẹkesiode ẹfep ke Corinth.

Mmọ “eke ẹsan̄ade etịme-etịme” ke Thessalonica ẹkenyene ubiomikpe edinen̄ede n̄wọrọ n̄kpọn̄ mme usụn̄ Ido Ukpono Christ. Mmọ ikanamke utom, edide mmọ ẹkekere ke edifiak ndi Christ ama ekpere m̀mê koro mmọ ẹkedide ifu. Ke adianade do, mmọ ẹma ẹsịn akamba ndutịme ebe ke ‘ndinọhọ ke mbubehe owo en̄wen.’ Eyedi mbiowo esop ẹma ẹnọ mmọ item ndien ndien, ke n̄kemuyo ye item Paul ke akpa leta esie ye mme item eken ẹtode Abasi. (Mme N̄ke 6:6-11; 10:4, 5; 12:11, 24; 24:30-34) Edi mmọ ẹma ẹsọn̄ọ ẹyịre ke usụn̄ uwem oro akadade esuene ọsọk esop oro okonyụn̄ ekemede nditara nsịm mme Christian en̄wen. Ntre Paul, ebiowo Christian, ye unana edisiak mme owo enyịn̄, ama odụri ntịn̄enyịn an̄wan̄wa owụt etịme etịme edinam mmọ, ayararede ukwan̄ usụn̄ uwem mmọ.

Enye ama anam esop ọdiọn̄ọ n̄ko nte ke ama odot mmọ nte Christian kiet kiet ‘ndinịm’ mmọ eke ẹsan̄ade etịme etịme “idiọn̄ọ.” Emi ọkọwọrọ ke owo kiet kiet ekenyene ndise mbon oro mme edinam mmọ ẹsan̄ade ẹkekem ye usụn̄ uwem oro ẹkenamde esop ọdiọn̄ọ aban̄a an̄wan̄wa. Paul eketeme mmọ ete “ẹdianade idem ye eyen-ete ekededi eke asan̄ade etịme-etịme.” Oro ke akpanikọ ikọwọrọke ite ẹfep utọ owo oro ofụri ofụri, koro mmọ ẹkenyene “[ndika iso nnọ enye item, NW] nte eyen-ete.” Mmọ ẹyeka iso ndinyene mme ebuana Christian ke mme mbono esop ndien iso-ọfọn ke utom ukwọrọikọ. Mmọ ẹma ẹkeme ndidori enyịn nte ke eyenete mmọ ayanam n̄kpọ aban̄a item onyụn̄ ọkpọn̄ mme usụn̄ esie oro ẹfịnade owo.

Ke nso usụn̄ifiọk ke mmọ ẹkenyene ‘ndidianade idem’ n̄kpọn̄ enye? Nte an̄wan̄ade, emi ekedi ke mme edinam n̄kaowo. (Men Galatia 2:12 domo.) Mmọ nditre ndinyene mbubehe n̄kaowo ye unọ idem nduọkodudu ye enye ama ekeme ndiwụt enye nte ke mbon oro ẹdade edumbet ẹdu uwem imaha mme usụn̄ esie. Idem edieke enye mîkokopke bụt inyụn̄ inam ukpụhọde, ke nsụhọde n̄kaha enen̄ede etie nte ke mbon en̄wen ikekpebeke mme usụn̄ esie inyụn̄ ikabade itie nte enye. Ke ukem ini oro, mme Christian ẹmi kiet kiet ẹkpenyene ndiwụk ntịn̄enyịn ke mme n̄kpọ oro ẹbọpde-bọp. Paul eketeme mmọ ete: “Ama edi mbufo, nditọ-ete, ẹkûduọ esịt ke edinam eti n̄kpọ.”—2 Thessalonica 3:13.

Nte an̄wan̄ade, item apostle emi idịghe isọn̄ kaban̄a edise nditọete nnyịn ke usụhọde m̀mê ndibiere ikpe nnọ mmọ ke ini ẹnamde n̄kpri ndudue. Utu ke oro, uduak esie edi ndin̄wam owo emi enyenede uwem oro enen̄erede atuaha ye Ido Ukpono Christ.

Paul ikọnọhọ ntatara ibet nte n̄kpọ eke okodomode nditọn̄ọ awak-n̄kukọhọ ndutịm. Edi ana in̄wan̄în̄wan̄ nte ke mbiowo ẹkpenyene ndibem iso nnọ owo eke akasan̄ade etịme etịme item nnyụn̄ ndomo ndin̄wam enye. Edieke mmọ mîkwe unen ndien owo oro ọsọn̄ọde eyịre ke usụn̄ oro afịnade mme owo onyụn̄ ekemede nditara nsuana, mmọ ẹkeme ndibiere ke ẹkpenyene ndinam esop odu ke ukpeme. Mmọ ẹkeme ndidiomi utịn̄ikọ kaban̄a ntak emi odotde ẹfep ndisan̄a etịme etịme ntre. Mmọ idisiakke mme owo enyịn̄, edi utịn̄ikọ ntọt mmọ ayan̄wam ndikpeme esop koro mbon oro ẹnamde n̄kpọ ẹban̄a ẹyetịm ẹkpeme mbak ẹdibuana mme edinam n̄kaowo ye owo ekededi emi nte an̄wan̄ade asan̄ade etịme etịme ntre.

Idotenyịn edi-o, nte ini akade owo eke asan̄ade etịme etịme oyokop bụt aban̄a mme usụn̄ esie ndien oyonụk enye ndikpụhọde. Nte mbiowo ye mbon en̄wen ke esop ẹkụtde ukpụhọde, mmọ owo kiet kiet ẹkeme ndibiere nditre ukpan oro mmọ ẹkenịmde ke ndinyene edinam n̄kaowo ye enye.

Do, ke nditịn̄ ibio ibio: Mbiowo esop ẹda iso ke ndinọ un̄wam nnyụn̄ nnọ item edieke owo asan̄ade etịme etịme. Edieke enye mîkwe ndudue ke usụn̄ uwem esie edi akade iso ndidi idiọk odudu, mbiowo ẹkeme nditọt esop ebe ke utịn̄ikọ oro anamde ekikere Bible an̄wan̄a—edide ediwọrọ an̄wa ye owo oro mînịmke ke akpanikọ, m̀mê se ededi oro usụn̄ uwem oro mîdotke edide. (1 Corinth 7:39; 2 Corinth 6:14) Mme Christian ke esop oro ẹtọtde ẹkeme nte owo kiet kiet ndibiere nditre ebuana n̄kaowo ekededi ye mme owo oro nte an̄wan̄ade ẹbịnede etịme etịme usụn̄ uwem ẹdi ẹsụk ẹdide nditọete.

[Ikọ idakisọn̄]

[Mme ndise ke page 31]

Mbiowo Christian ẹnọ mbon oro ẹsan̄ade etịme etịme item ndien kpa ye oro ẹda mmọ nte mme ekemmọ andinịm ke akpanikọ