“Ẹdomo Mmọ Ẹfiọk m̀mê Mmọ Ẹdot”—Didie?
1 Ye n̄kọri emi akade-ka iso ke esop Jehovah, n̄kaiso udọn̄ odu ndinyene nditọete iren ẹmi ẹdotde ndinam utom nte mme asan̄autom unamutom. Ata ediwak nditọete ẹmi owo mîmekke kan̄a, esịnede mme uyen oro mîsịmke kan̄a isua edịp, ẹnyene udọn̄ ndinam utom ke esop. Ke ini ẹnọde mmọ utom efen efen, mmọ ẹsikere ke imenyene ufọn ẹnyụn̄ ẹkop uyụhọ. N̄kaiso n̄kọri mmọ ọkọn̄ọ ke ‘edidomo mmọ mfiọk m̀mê mmọ ẹdot.’ (1 Tim. 3:10) Didie ke ẹnam emi?
2 Udeme Mbiowo: Nte ubak edida mme n̄kpọ N̄wed Abasi oro ẹnamde owo ẹdot nte mme asan̄autom unamutom emi ẹkụtde ke 1 Timothy 3:8-13 ndomo eyenete, mbiowo ẹyedomo eyenete ẹfiọk m̀mê enye odot ndibiom mbiomo. Mmọ ẹkeme ndidọhọ enye anam mme utom oro ẹnọde un̄wam oro ẹnyenede ebuana ye edinọ mme magazine ye n̄wed, edise mban̄a ukwak utịn̄ikọ, edikama Ufọkmbono Obio Ubọn̄, ye ntre ntre eken. Mbiowo ẹyese nte enye anamde n̄kpọ onyụn̄ esede aban̄a mme utom esie. Mmọ ẹyese mme edu edidi se ẹberide edem, edinam n̄kpọ ke ini, nsịnifịk, nsụhọdeidem, edu unyịmesịt, ye ukeme edinam utom ọtọkiet ye mbon en̄wen. (Phil. 2:20) Ndi enye enịm eti uwụtn̄kpọ ke ọfọn̄ ye ukamaidem? Ndi enye enyene edu edibiom mbiomo? Mmọ ẹyom ndikụt ‘eti edu esie owụtde ubọkutom esie ke sụn̄-sụn̄ ido eti ibuot.’ (Jas. 3:13) Ndi enye enen̄ede anyanade ebịne ndinọ un̄wam ke esop? Ndi enye ke anam ewụhọ Jesus nte “ẹkenam kpukpru mme idụt ẹdi mbet” ebe ke ndibuana ifịk ifịk ke utom ukwọrọikọ?—Matt. 28:19; se Enyọn̄-Ukpeme eke September 1, 1990, page 18-28.
3 Ke adan̄aemi Bible mînịmke usụhọde isua emana inọ edimek owo nte asan̄autom unamutom, enye etịn̄ aban̄a utọ nditọete oro nte “[irenowo, NW] ẹmi ẹtịmde ẹnam utom.” Nnyịn ikpodorike enyịn mmọ ndidu ke mme ntọn̄ọ ntọn̄ọ m̀mê ufọt ufọt ini uyen oro mîsịmke kan̄a isua edịp, akpan akpan sia ẹtịn̄de nte ke mmọ ẹkeme ndinyene iban ye nditọ. (1 Tim. 3:12, 13) Utọ irenowo oro ikpenyeneke ndiyak idem nnọ “idiọk itọn̄ ini uyen,” edi ẹkpenyene ndikama idem ukpono ukpono, ẹnyenede eti idaha ye edisana ubieresịt ke iso Abasi ye mme owo.—2 Tim. 2:22.
4 Ke adan̄aemi mme ndammana ukeme ẹnyenede ufọn, akpan n̄kpọ edi edu ye idaha ekikere owo. Nte eyenete enyene udọn̄ nditoro Abasi nnyụn̄ nnam utom nnọ nditọete esie? Edieke edide ntre, Jehovah ọyọdiọn̄ mme ukeme esie ndinam n̄kọri ke esop.