Ibuot Itiaita
‘Ndin̄wana En̄wan ye Udịm Mme Idiọk Spirit’
1. Ntak emi edinam mme idiọk spirit enen̄erede ebehe nnyịn?
EDIWAK owo ẹda ekikere oro nte ke ndiọi spirit ẹdu ẹnam n̄kpọ nsahi. Edi emi idịghe n̄kpọ imam. Edide mme owo ẹnịm ke akpanikọ m̀mê inịmke, mme idiọk spirit ẹdu, ndien mmọ ẹdomo ndida mfịghe ntiene kpukpru owo. Owo isioho mme andituak ibuot nnọ Jehovah ifep. Ke akpanikọ, mmọ ẹdi akpan iso en̄wan. Apostle Paul ọtọt nnyịn aban̄a oro, ọdọhọde ete: “Koro nnyịn mîn̄wanake en̄wan nnyịn ye obụk ye iyịp, edi in̄wana ye mbọn̄ [oro enyịn mîkwe], ye mme enyene-odudu ye mme andikara ekịm ererimbot, ye udịm mme idiọk spirit eke ẹdude ke enyọn̄.” (Ephesus 6:12) Ke eyo nnyịn, mfịghe oro udịm mme idiọk spirit ẹdade ẹdi ọmọdọk ekesịm udomo oro akanam mîsịmke koro ẹma ẹsio Satan ke heaven ẹduọk ndien enye asan̄a ye ifụtesịt sia enye ọfiọkde ete ini imọ edi ibio.—Ediyarade 12:12.
2. Didie ke nnyịn ikeme ndin̄wana n̄kan mme spirit emi ẹkopde odudu ẹkan mme owo?
2 Nte ẹkeme ndikan ke en̄wan ẹn̄wanade ye udịmekọn̄ mme spirit emi ẹkopde odudu ẹkan mme owo mi? Ih, edi n̄kukụre ke ndiberi edem ọyọhọ ọyọhọ ke Jehovah. Ana nnyịn ikpan̄ utọn̄ inọ enye inyụn̄ inam Ikọ esie. Ke ndinam ntre, ẹkeme ndinyan̄a nnyịn nsio ke ekese unan obụkidem, eke ido uwem, ye eke ntụk emi mbon oro ẹdude ke idak odudu Satan ẹdade.—James 4:7.
Mme Andikara Ererimbot Emi Ẹdude ke Enyọn̄
3. Mmanie ke Satan ada ibak ibak ubiọn̄ọ etiene, ndien didie?
3 Jehovah etịn̄ in̄wan̄-in̄wan̄ ọnọ nnyịn aban̄a idaha ererimbot nte enye etiede ke heaven okụt ke idaha ekikere esie. Enye ama anam apostle John okụt n̄kukụt emi ẹkewụtde Satan nte “akamba ididuot dragon.” Enye ama eben̄e idem, edieke ekemede, ndita Obio Ubọn̄ Messiah Abasi ke ndondo oro enye akamanade ke heaven ke 1914. Ke okpude ndinam oro, Satan ama ada akpakịp ibak ibak ubiọn̄ọ etiene mme andida ke ibuot Obio Ubọn̄ oro ke isọn̄. (Ediyarade 12:3, 4, 13, 17) Didie ke Satan akan̄wana ekọn̄ emi? Ebe ke mme owo emi ẹdade ke ibuot esie.
4. Anie ọnọ ukara owo ukeme, ndien nnyịn isan̄a didie ifiọk oro?
4 Ekem ẹma ẹwụt John unam emi enyenede ibuot itiaba ye nnụk duop, kpa unam emi enyenede nsọn̄uyo “ndikara kpukpru esien ye [obio] ye usem ye idụt.” Unam oro ada aban̄a ofụri ndutịm ukaraidem eke ofụri ererimbot. Ẹma ẹsian John ẹte ke “dragon [Satan kpa Devil] ama onyụn̄ ayak ukeme esie, ye ebekpo esie, ye akwa nsọn̄uyo esie ọnọ enye.” (Ediyarade 13:1, 2, 7) Ih, edi Satan ọnọ ukara owo ukeme ye odudu ukara. Ntem, nte apostle Paul ekewetde, ata “mme andikara ererimbot” ẹdi “udịm mme idiọk spirit eke ẹdude ke enyọn̄,” emi ẹkarade mme ukara owo. Oyom kpukpru mbon oro ẹtuakde ibuot ẹnọ Jehovah ẹfiọk se oro ọwọrọde ọyọhọ ọyọhọ.—Luke 4:5, 6.
5. Nso ke ẹtan̄ mme akara ukaraidem idahaemi ẹbok ẹnọ?
5 Okposụkedi ediwak mme akara ukaraidem ẹdọhọde ke imama ido ukpono, idụt ndomokiet isụkke ibuot inọ itie ukara Jehovah m̀mê eke Edidem esie emi ẹmekde, kpa Jesus Christ. Kpukpru mmọ ẹsịn ukeme ọkpọsọn̄ ọkpọsọn̄ ndimụm odudu mmọ n̄kama. Mfịn, nte uwetn̄kpọ ke Ediyarade owụtde, “spirit mme demon” ke atan̄ mme andikara ererimbot obok ọnọ “ekọn̄ akwa usen Abasi, Andikara kpukpru n̄kpọ” ke Armageddon.—Ediyarade 16:13, 14, 16; 19:17-19.
6. Ntak oyomde ukpeme man owo efep edidi se ẹdade ẹsịn ke edinọ editịm n̄kpọ Satan emi ibetedem?
6 Kpukpru usen, mme en̄wan ukaraidem, eke n̄kaowo, eke ndutịm uforo, ye eke ido ukpono oro ẹnamde ekpụk ubonowo abahade ẹtụk uwem mme owo. Ke mme en̄wan emi, edi ọsọ n̄kpọ mme owo ndida nnọ idụt, ekpụk, usem, m̀mê otu n̄kaowo emi mmọ ẹtode—edide ke ikọ m̀mê ke edinam. Idem ke ini mme owo mîbuanake nnennen nnennen ke ndusụk en̄wan, mmọ ẹsiwak ndikụt nte mmimọ imade n̄kan̄ kiet ikan en̄wen. Edi inamke n̄kpọ m̀mê anie owo m̀mê ewe n̄ka ke mmọ ẹda ẹnọ, anie ke mmọ ẹnen̄erede ẹnọ ibetedem? Bible etịn̄ in̄wan̄-in̄wan̄ ete: “Ofụri ererimbot onyụn̄ esịne ke ubọk andidiọk.” (1 John 5:19) Didie, ndien, ke owo ekeme ndifep ndidi se ẹtienede ẹbian̄a ye ofụri ubonowo? N̄kukụre ke ndinọ Obio Ubọn̄ Abasi ọyọhọ ibetedem esie ye ke ndinen̄ede nda san̄asan̄a ke ebuana ye mme en̄wan ererimbot.—John 17:15, 16.
Mme Abian̄a Abian̄a Usụn̄ Unam N̄kpọ Andidiọk
7. Didie ke mbufiọk Satan owụt idem ke nte enye adade nsunsu ido ukpono anam n̄kpọ?
7 Ke kpukpru iduọk ini ke mbụk, Satan amada ukọbọ ke ikọinua ye ke ikpọkidem ndiwọn̄ọde mme owo n̄kpọn̄ utuakibuot akpanikọ. Enye n̄ko amada ata usọ usọ usụn̄—kpa mme n̄kari n̄kari edinam ye abian̄a abian̄a usụn̄ unam n̄kpọ. Enye ada n̄kari omụm akamba ubak ubonowo esịn ke ekịm ebe ke nsunsu ido ukpono, anamde mmọ ẹkere ke mmimọ inam n̄kpọ Abasi. Sia ẹnanade nnennen ifiọk Abasi ye ima akpanikọ, mme edinam ido ukpono oro ẹsan̄ade ye ndedịbe odudu ẹnyụn̄ ẹdemerede ntụk owo ẹkeme ndidụri mmọ nda mîdịghe mmọ ẹkeme ndima mme utom odudu. (2 Thessalonica 2:9, 10) Edi ẹdụri nnyịn utọn̄ ẹte ke idem ke otu mme owo oro ẹkebuanade ke utuakibuot akpanikọ ini kiet ko, ndusụk “owo ẹyefiak edem . . . , ẹnyụn̄ ẹkpan̄ utọn̄ ẹnọ mme spirit abian̄a ye ukpep-n̄kpọ mme demon.” (1 Timothy 4:1) Didie ke oro ekeme nditịbe?
8. Didie ke Satan ekeme nditap nnyịn nsịn ke nsunsu ido ukpono idem edieke edide nnyịn ituak ibuot inọ Jehovah?
8 Devil ke abian̄a esida mme mmeme nnyịn anam n̄kpọ. Nte ndịk owo ke osụk ananam nnyịn? Ke edide ntre, nnyịn imekeme ndiyak idem nnọ mfịghe otode mme iman m̀mê mme mbọhọidụn̄ ndibuana ke mme edinam oro ẹnyenede ntọn̄ọ ẹto nsunsu ido ukpono. Nte nnyịn imesitan̄ idem? Ke edide ntre, nnyịn imekeme ndiyat esịt ke ini ẹnọde nnyịn item m̀mê ke ini mbon en̄wen mînyịmeke mme ekikere oro nnyịn inọde. (Mme N̄ke 15:10; 29:25; 1 Timothy 6:3, 4) Utu ke ndinam ekikere nnyịn ada ekekem ye uwụtn̄kpọ Christ, nnyịn imekeme ndikpan̄ utọn̄ nnọ mbon oro ‘ẹnamde utọn̄ edebe nnyịn’ ke ndidọhọ nte ke sụk edikot Bible ye edidu eti uwem ẹkem. (2 Timothy 4:3) Edide nnyịn imenen̄ede itiene otu ido ukpono efen m̀mê ikam isọn̄ọ imụm orụk ido ukpono idem nnyịn ikama idịghe akpan n̄kpọ inọ Satan, adan̄a nte nnyịn mîtuakke ibuot inọ Jehovah ke usụn̄ oro Abasi etemede ebe ke Ikọ esie ye esop esie.
9. Didie ke Satan ada idan̄ anam mme uduak esie n̄kari n̄kari?
9 Satan n̄ko amada n̄kari atap mme owo ndiyụhọ mme ndammana udọn̄ ke ndiọi usụn̄. Enye amanam emi ye udọn̄ ebuana idan̄. Ke ẹfụmide eti ido uwem Bible, ediwak owo ke ererimbot ẹse ebuana idan̄ ke ufọt mbon oro mîdọhọ ndọ nte nnennen usụn̄ ukop inemesịt m̀mê nte usụn̄ ndiwụt ke mmimọ idi ikpọ owo. Ndien nso kaban̄a mme ọdọ ndọ? Ediwak mmọ ẹsisịn efịbe. Ndien idem ke ini mme owo ẹnamde akpanikọ ke ndọ mmọ, ata ediwak owo ẹsiyom usiondọ m̀mê edidian̄ade ntie man mmọ ẹkeme ndidụn̄ ye owo efen. Uduak n̄kari n̄kari usụn̄ unam n̄kpọ Satan edi ndikara mme owo man ẹdu uwem inemesịt idahaemi, idịghe ndibian̄a mmọ ndifụmi utịp anyan ini oro emi edinyenede ke idemmọ ye mbon efen kpọt, edi akpan akpan mme utịp oro emi edinyenede ke itie ebuana mmọ ye Jehovah ye Eyen esie.—1 Corinth 6:9, 10; Galatia 6:7, 8.
10. Ke nso usụn̄ ke Satan odomo ndida oburobụt ido ye afai mbiat edu nnyịn?
10 Ndammana udọn̄ efen edi unọ idem nduọkodudu. Ke ini edide eti, enye ekeme ndinọ ikpọkidem, ekikere, ye ntụk nduọkodudu. Edi didie ke nnyịn isinam n̄kpọ ke ini Satan adade mme ini nduọkodudu n̄kari n̄kari odomo ndiwọn̄ọde ekikere nnyịn n̄kpọn̄ eke Abasi? Ke uwụtn̄kpọ, nnyịn imọfiọk ite ke Jehovah asua oburobụt ido idan̄ ye afai. Ke ini mme ndise senima, mme edinam ekebe ndise, m̀mê mme edinam ufọkmbre ẹwụtde mme n̄kpọ oro, nte nnyịn imesitie inyụn̄ ika iso ise mmọ? Ti n̄ko ete ke Satan oyokụt ete ke mme utọ n̄kpọ oro ẹtetịm ẹdiọk nte ini edisịn enye ke editụn̄ọ ukpe asan̄ade ekpere, koro “ndiọi owo ye mbon abian̄a ẹyedọdiọn̄ ẹdiọk ẹka iso, ẹbian̄a owo, owo ẹyenyụn̄ abian̄a mmọ.” (2 Timothy 3:13; Ediyarade 20:1-3) Ntre oyom nnyịn kpukpru ini ikpeme ibiọn̄ọ mme n̄kari Satan.—Genesis 6:13; Psalm 11:5; Rome 1:24-32.
11. Mme usụn̄ ewe ke owo emi akam ọfiọkde akpanikọ aban̄ade ubụpekpo ekeme ndiduọ ndụk afia edieke enye mîdụhe ke edidemede?
11 Nnyịn imọfiọk n̄ko ite ke mbon oro ẹsịnde idem ke orụk ubụpekpo ekededi—ubreidiọn̄, ifọt, m̀mê ndidomo ndinyene nneme ye mme akpan̄kpa—edi se Jehovah esede ke mbubiam. (Deuteronomy 18:10-12) Ke itide oro, nnyịn idikereke iban̄a edika n̄kobụp idem, ndien nnyịn ke akpanikọ ididaha mmọ isịn ke ufọk nnyịn man ẹnam mme edinam demon mmọ. Edi nte nnyịn iyakpan̄ utọn̄ inọ mmọ edieke mmọ ẹwụtde idem ke ekebe ndise nnyịn m̀mê ke Intanet? Okposụkedi nnyịn mîdibọhọ usọbọ ito abiaifọt tutu amama, nte nnyịn ikpọbọp n̄kpọ ke itọn̄ubọk nsekeyen nnyịn, ye ekikere nte ke enye ke usụn̄ ekededi ekeme ndikpeme eyen oro nsio ke unọmọ? Ndifiọk nte ke Bible obiom editọ owo ibọk ikpe, nte nnyịn ikpayak abiaibọk akara ekikere nnyịn?—Galatia 5:19-21.
12. (a) Didie ke ẹda ikwọ ẹnam nnyịn ikere iban̄a mme ekikere oro nnyịn idiọn̄ọde ke ẹdiọk? (b) Didie ke ọfọn̄, ido ukama idet, m̀mê ido utịn̄ikọ owo ekeme ndiwụt ke enye ama mbon oro Jehovah mînyịmeke usụn̄ uwem mmọ? (c) Nso ke ẹyom ẹto nnyịn edieke anade nnyịn ifep ediduọ ndụk mme abian̄a abian̄a usụn̄ unam n̄kpọ Satan?
12 Bible ọdọhọ ke ikpanaha ẹtịn̄ ẹban̄a use ye kpukpru mbubiam ido (ye oburobụt uduak) ke otu nnyịn. (Ephesus 5:3-5) Edi nso edieke mme utọ ibuotikọ oro ẹsan̄ade ye ikwọ emi enemde, n̄kukwak oro omụmde owo udọn̄, m̀mê uyịre uyịre n̄kukwak? Nte nnyịn ikpọtọn̄ọ ndibre mme ikọ ikwọ oro ẹtorode idan̄ unana ndọ, edida n̄kpọsọn̄ ibọk nyom inemesịt, ye ndiọi edinam eken? Mîdịghe ke adan̄aemi nnyịn idiọn̄ọde ite ke nnyịn ikpenyeneke ndikpebe usụn̄ uwem mme owo oro ẹsịnde idem ke mme utọ n̄kpọ oro, nte nnyịn imesidomo ndikama idem nte mmọ ebe ke ndikpebe usụn̄ usịnen̄kpọ mmọ, usụn̄ ukama idet mmọ, m̀mê usụn̄ utịn̄ikọ mmọ? Mme usụn̄ oro Satan adade atap mme owo ndinam n̄kpọ ekekem ye mbiara usụn̄ ukere n̄kpọ esie ẹdi etabi etabi didie ntem! (2 Corinth 4:3, 4) Man ifep ndiduọ ndụk afia abian̄a abian̄a usụn̄ unam n̄kpọ esie, ana nnyịn ifep nditiene ererimbot. Oyom nnyịn iti mbon emi “mme andikara ekịm ererimbot emi” ẹdide inyụn̄ in̄wana ifịk ifịk ibiọn̄ọ odudu mmọ.—1 Peter 5:8.
Ẹtịm Idem Ndidi Mme Andikan
13. Didie ke owo nnyịn ekededi ekeme ndikan ererimbot oro Satan akarade kpa ye unana mfọnmma nnyịn?
13 Mbemiso enye akakpade, Jesus ama asian mme apostle esie ete: “Ẹsọn̄ esịt; Ami n̄kakan ererimbot.” (John 16:33) Mmọ n̄ko ẹkeme ndidi mme andikan. Ke n̄kpọ nte isua 60 ke ukperedem, apostle John ekewet ete: “Anie owo edi andikan ererimbot, ke mîbọhọke enye emi enịmde ke akpanikọ ete, Jesus edi Eyen Abasi?” (1 John 5:5) Iwụt utọ mbuọtidem oro ebe ke nnyịn ndinịm mme ewụhọ Jesus nnyụn̄ n̄kọn̄ mbuọtidem ke Ikọ Abasi, idem kpa nte Jesus ọkọkọn̄de. Nso efen ke oyom? Oyom nnyịn idu ikpere esop oro enye edide Ibuot. Ke ini nnyịn inamde ndudue, ana nnyịn ikabade esịt ke ofụri esịt inyụn̄ iyom edifen otode Abasi ke isọn̄ uwa Jesus. Ke usụn̄ emi, kpa ye mme unana mfọnmma ye mme ndudue nnyịn, nnyịn n̄ko imekeme ndidi mme andikan.—Psalm 130:3, 4.
14. Kot Ephesus 6:13-17, nyụn̄ da mme mbụme ye mme itie N̄wed Abasi oro ẹnọde ke ikpehe ekikere emi nte isọn̄ ndineme mban̄a mme ufọn ẹtode n̄kpọekọn̄ spirit emi kiet kiet.
14 Man ikụt unen, oyom nnyịn isịne “ofụri n̄kpọekọn̄ Abasi,” ifụmike baba ubak esie kiet. Mbọk kụbọde Bible fo ka Ephesus 6:13-17, nyụn̄ kot nte enye etịn̄de aban̄a n̄kpọekọn̄ oro. Ndien, ke ndibọrọ mme mbụme oro ẹdude mi ke idak, kere ban̄a nte afo ekemede ndibọ ufọn nto ukpeme oro n̄kpọekọn̄ kiet kiet ọnọde.
“Ẹda akpanikọ ẹbọbọ ke isịn”
Okposụkedi nnyịn ikemede ndifiọk akpanikọ, didie ke ukpepn̄kpọ ofụri ini, editie n̄kere akpanikọ Bible, ye edidụk mbono esop ẹkpeme nnyịn? (1 Corinth 10:12, 13; 2 Corinth 13:5; Philippi 4:8, 9)
“Edinen ido nte ukwak ikpanesịt”
Idaha edinen ido anie ke emi edi? (Ediyarade 15:3)
Nam an̄wan̄a nte edikpu nditiene ndinen usụn̄ Jehovah osiode owo anyan ọnọ unan ke n̄kan̄ eke spirit. (Deuteronomy 7:3, 4; 1 Samuel 15:22, 23)
“Ẹda mben̄e-idem ndikwọrọ gospel emem ẹsịne nte ikpa-ukot”
Didie ke edi n̄kpọ ukpeme ọnọ nnyịn ndisan̄a ke ikpat nnyịn kpukpru ini n̄ketịn̄ ikọ nnọ mme owo mban̄a mme ndutịm Abasi kaban̄a emem? (Psalm 73:2, 3; Rome 10:15; 1 Timothy 5:13)
“Mbuọtidem nte otuekọn̄”
Edieke nnyịn inyenede mbuọtidem oro ọsọn̄ọde ada, didie ke nnyịn idinam n̄kpọ kpa ye mme ukeme oro ẹsịnde ndinam nnyịn inyene eyịghe m̀mê ikop ndịk? (2 Ndidem 6:15-17; 2 Timothy 1:12)
“Edinyan̄a nte ndụn ke ibuot”
Didie ke idotenyịn edinyan̄a an̄wam owo ndifep ediduọ ndụk afia ebeubọk edikere mban̄a inyene obụkidem? (1 Timothy 6:7-10, 19)
“Ofụt spirit”
Nso ke nnyịn ikpeberi edem kpukpru ini ke ini in̄wanade ibiọn̄ọ en̄wan oro ẹdade ẹbịne nsọn̄idem eke spirit nnyịn m̀mê eke mbon efen? (Psalm 119:98; Mme N̄ke 3:5, 6; Matthew 4:3, 4)
Nso efen idi akpan n̄kpọ ke ndikụt unen ke ekọn̄ eke spirit? Adan̄a didie ke ẹkpeda enye ẹnam n̄kpọ? Ke ufọn mmanie? (Ephesus 6:18, 19)
15. Didie ke nnyịn ikeme nditọn̄ọ en̄wan ke ekọn̄ eke spirit emi?
15 Nte mbonekọn̄ Christ, nnyịn idi ubak akwa udịmekọn̄ oro ẹn̄wanade ekọn̄ eke spirit. Edieke nnyịn idude ke edidemede inyụn̄ idade ọyọhọ n̄kpọekọn̄ Abasi inam n̄kpọ ke eti usụn̄, nnyịn ididịghe mbon oro ẹnọmọde ke ekọn̄ emi. Utu ke oro, nnyịn ididi mbon un̄wam oro ẹsọn̄ọde ekemmọ mme asan̄autom Abasi idem. Nnyịn iyodu ke mben̄eidem ye ifiopesịt nditọn̄ọ en̄wan oro, isuande eti mbụk Obio Ubọn̄ Messiah Abasi, kpa ukara eke heaven oro Satan enen̄erede ọbiọn̄ọ afai afai.
Nneme Ndụn̄ọde
• Ntak emi mme andituak ibuot nnọ Jehovah ẹnen̄erede ẹda san̄asan̄a ke ebuana ye mme en̄wan ererimbot?
• Nso idi ndusụk abian̄a abian̄a usụn̄ unam n̄kpọ oro Satan akamade man anam mme Christian ẹduọ ke n̄kan̄ eke spirit?
• Didie ke n̄kpọekọn̄ eke spirit oro Abasi ọnọde ekpeme nnyịn ke ekọn̄ eke spirit nnyịn?
[Mme ndise ke page 76]
Ke ẹtan̄ mme idụt ẹbok ẹnọ Armageddon