Wụt Esịtekọm ke Edisana Utom Fo
MAN isịm eti utịtmbuba ekededi, ana nnyịn iben̄e idem ndiyak n̄kpọ atak. Ndikabade ndi dọkta ada ediwak isua ukpep ye ubiere, ọkọrọ ye okụk. Owo mbre mbuba oro okụtde unen abiat n̄wakn̄kan ini uyen esie ke ndinam n̄kpọ ke adiana ke adiana mban̄a ata n̄kpọsọn̄ edinam ke ndiyom mfọnn̄kan utịp ye unana edikpa mba. Ata ebre ndido ke ukem usụn̄ oro ekeme ndifiak nse mme isua oro akayakde idem esịn ke ukpep.
Nte ededi, utịtmbuba kiet odu oro adade ufọn edi barasuene akan ekọmurua ekededi oro ẹnyenede ndikpe. Nso idi oro? Enye edi ifet edidi asan̄autom Ata Andikon̄ N̄kan, Jehovah Abasi. Se ededi uwa oro inamde ke n̄kan̄ ini, okụk, m̀mê odudu, ifet edinam edisana utom nnọ Andibot nnyịn ada mme utịp oro ananade mbiet edi. Mme ikọ apostle Paul emi ẹdi akpanikọ: “Uten̄e Abasi ọwọrọ udori ke kpukpru usụn̄, koro un̄wọn̄ọ uwem emi odude ke emi ye eke uwem emi edidide asan̄ade ye enye.” (1 Timothy 4:8) Ẹyak ise nte oro edide akpanikọ.
Ke Ini Ikekpepde Akpa Iban̄a Abasi
Ẹkeme ndidi ata ediwak mbon oro ẹnyịmede eti mbụk ẹnyụn̄ ẹtọn̄ọde ndikpep Bible ifiọkke udomo ukpụhọde emi oro edinamde ke uwem mmọ. Akpa, obufa eyen ukpepn̄kpọ Bible ekeme nditaba ndusụk ufan oro mîkemeke ndifiọk ntak emi enye mîdianake aba ye mmọ ke ndibịne mme n̄kpọ oro enye ọdiọn̄ọde idahaemi ke inọhọ Abasi ukpono. (1 Peter 4:4) Ndusụk owo ẹkeme ndisobo ubiọn̄ọ otode ubon onyụn̄ ekeme ndibiak mmọ ndikụt nte mbon oro mmọ ẹmade ẹtrede ndima, idem ẹsuade, Jehovah. (Matthew 10:36) Oro ekeme ndidi ekọmurua oro ọsọn̄de ndikpe.
Ke itieutom m̀mê ke ufọkn̄wed, ekọmurua eyedu n̄ko ndikpe. Obufa eyen ukpepn̄kpọ Bible oro nte ini akade eyetre ndibuana ke mme usọrọ eke ererimbot ye mme edinam eken. Enye idikpọn̄ke utọn̄ aba inọ mme ndek ndek ndutịn̄ eke mme nsan̄autom m̀mê mme nsan̄a ufọkn̄wed esie, idinyụn̄ idụkke ndụk idiọk mbubru ye mmọ. Utu ke oro, enye eyedomo ndinam item oro ẹkụtde ke N̄wed Mbon Ephesus 5:3, 4: “Edi ama edi use, ye kpukpru mbubiam ido, m̀mê edisịn esịt ke n̄kpọ owo, ẹkûyak ẹtịn̄ ẹban̄a n̄kpọ oro ke otu mbufo, nte odotde ikọt Abasi. Ẹkûnyụn̄ ẹyak ẹtịn̄ ndek ndek ikọ, m̀mê ndisịme ikọ, m̀mê ikọ idiọk mbubru, emi mîdotke mbufo: edi ẹkam ẹnọ Abasi ekọm.”
Mme utọ ukpụhọde oro ẹkeme ndinam eyen ukpepn̄kpọ Bible edi esen esen owo. Oro ekeme ndidi ọkpọsọn̄ n̄kpọ, akpan akpan ye uyen oro osụk odude ke ufọkn̄wed. Ke ẹnyenede ediwak usọrọ usen nduọkodudu ndin̄wana mbiọn̄ọ, ọkọrọ ye mme ukpepn̄kpọ oro ẹbiọn̄ọde-biọn̄ọ Abasi, utọ nte edito ke unam mforo owo, ye mfịghe ofụri ini nditiene nnam se ediwak owo ẹnamde, ana n̄kparawa Christian ẹdu ke en̄wan kpukpru ini kaban̄a mbuọtidem. Nditiene mme usụn̄ Abasi eyenam mmọ ẹkpụhọde ndien ekeme ndisụn̄ọ ke nsahi otode uke otu ukpepn̄kpọ ye mme andikpep. Emi esisọn̄ ndiyọ akpan akpan ke mme isua uyen oro idem etiede urua urua, edi unyịme Abasi odot ye ekọmurua oro.
Nte Mmọ Ẹnen̄ede Ẹdi N̄waidem?
Mme n̄kpọ eken oro ke akpa ẹketiede nte ẹdi n̄waidem ẹsikabade ẹdi mme edidiọn̄. Ndusụk owo ẹnyene nditre edu uda un̄wọn̄. (2 Corinth 7:1) Emi ekeme ndidi en̄wan, edi nso edidiọn̄ ke edi ntem ke ini ẹkande idiọk edinam emi ubọk ke akpatre! Ẹkeme nditịn̄ ukem oro mban̄a edikan mbumehe uda n̄kpọsọn̄ ibọk eken m̀mê n̄kpọsọn̄ mmịn. Uwem ọfọn didie ntem akan ke ẹsiode mme utọ akama-nsobo edu emi ẹfep! Mmọ eken ẹnyene ndinam itie ndọ mmọ enen. Mbon oro ẹdụn̄de ọtọkiet ke ini mîdọhọ ndọ ana ẹdụk ndọ mîdịghe ẹtre ndidụn̄ ọtọkiet. (Mme Hebrew 13:4) Ana mbon oro ẹdụn̄de ye ediwak iban ẹdụn̄ ye n̄wan uyen mmọ kpọt. (Mme N̄ke 5:18) Mme utọ ukpụhọde oro ẹbuana n̄waidem, edi mmọ ẹsida emem edi ke ubon.
Kere Ban̄a Mme Utịp
Ke akpanikọ, owo ekededi oro anamde ibet Abasi enen̄ede enyene mme ufọn. Ke akpa ini ke uwem esie, eyen ukpepn̄kpọ Bible ọtọn̄ọ ndikot Andibot enye ke enyịn̄ Esie, Jehovah. (Psalm 83:18) Eyen ukpepn̄kpọ edi edima Jehovah nte enye ekpepde aban̄a mme utịben̄kpọ oro Enye anamde ye oro edinyụn̄ anamde ọnọ ubonowo. Ke mme idụt emi edikop ndịk mban̄a mme akpan̄kpa edide ọsọ n̄kpọ, enye etre ndikop ndịk emi otode nsunsu ekikere, ọfiọkde ete ke mme akpan̄kpa ẹdede, ẹbetde ediset ke n̄kpa. (Ecclesiastes 9:5, 10) Ndien nso ubọhọ ke edi ntem ndifiọk nte ke Jehovah itụhọkede mme owo ke nsinsi ke hell! Ih, akpanikọ enen̄ede anam enye ọbọhọ ufịn.—John 8:32.
Nte eyen ukpepn̄kpọ ọdiọn̄de-diọn̄ anam uwem esie ekekem ye mme idaha Jehovah, enye eyenyene edisana ubieresịt ye ukpono idemowo. Ndikpep ndidu uwem nte Christian akpanikọ an̄wam enye ndise enyịn ke ubon esie n̄kan, emi adade akwa uyụhọ ye idatesịt edi. Ndien edidụk mme mbonoesop ke Ufọkmbono Obio Ubọn̄ odu. Nso inem inem ifiọkutom ke emi edi ntem! Mi ke ẹkụt mbon oro ẹnen̄erede ẹnyene ufiop ufiop ima oro Bible ọdọhọde ke ẹkpenyene ndida ndiọn̄ọ ikọt Abasi. (Psalm 133:1; John 13:35) Ikọ mmọ edi edisana ye se ibọpde-bọp nte mmọ ẹtịn̄de “n̄kpọsọn̄ utom Abasi.” (Utom 2:11) Ih, ndinyene ebuana ye “nditọete” edi ntak inemesịt. (1 Peter 2:17) Utọ eti ebuana ọtọkiet oro an̄wam eyen ukpepn̄kpọ Bible ‘ndimen obufa owo nsịne, emi ẹbotde ebiet Abasi ke edinen ido ye edisana ido akpanikọ.’—Ephesus 4:24.
Usio-Ukot Ediyak Idem Nnọ
Nte owo ọkọride ke ifiọk, ekem ima oro enye enyenede ọnọ Jehovah onụk enye ndiyak uwem esie nnọ enye nnyụn̄ nyarade uyakidem emi ke mmọn̄ baptism. (Matthew 28:19, 20) Item Jesus edi nte yak mbet esie ẹbat se iditakde mbemiso ẹnamde usio-ukot emi. (Luke 14:28) Ti ete, Christian oro ayakde idem ọnọ onịm uduak Jehovah akpa onyụn̄ ọn̄wọn̄ọde ọkpọn̄ mme n̄kpọ obụkidem. Enye anam utom ọkpọsọn̄ nditre “ubọkutom obụkidem” onyụn̄ ọkọri “mbun̄wụm Spirit.” (Galatia 5:19-24) Item oro ẹkụtde ke N̄wed Mbon Rome 12:2 enyene n̄kpọ ndinam ọyọho ọyọhọ idahaemi ke uwem esie: “[Ẹkûnyụn̄] ẹbiet eyo emi, edi ẹyak mbufo ẹkpụhọde, oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” Ntem, Christian oro ama akayak idem ọnọ odu uwem esie ye obufa uduak.
Edi, kere ban̄a se enye ọbọde. N̄kpọ kiet edi, enye idahaemi odu ke ọkpọkpọ itie ebuana ye Andibot ekondo. Ẹda enye ke edinen ye ekikere edidi ufan Abasi! (James 2:23) Enye etịn̄ aban̄a Abasi nte “Ete nnyịn emi odude ke heaven,” ke usụn̄ emi enen̄erede enyene se ọwọrọde akan. (Matthew 6:9) Edidiọn̄ efen emi obufa andiyak idem nnọ enyenede edi ndifiọk nte ke uwem enen̄erede enyene uduak ye nte ke enye odu uwem esie ke n̄kemuyo ye uduak oro. (Ecclesiastes 12:13) Ke etienede ndausụn̄ Jesus, enye ekeme ndiwụt Devil nte osu nsu ke ndikaiso nnam akpanikọ. Nso idatesịt ke oro ada ọsọk Jehovah ntem!—Mme N̄ke 27:11.
Nte ededi, nte Christian emede ime ke usụn̄ edinam akpanikọ, mme n̄waidem efen ẹdu ndinam. Esida ini ndikpep Ikọ Abasi ke idemowo ye ke esop ke usụn̄ enyenede ufọn. (Psalm 1:1-3; Mme Hebrew 10:25) Ẹnyene ndidep ini nsio ke mme edinam en̄wen nnọ utom ukwọrọikọ. (Ephesus 5:16) Oyom ini ye ukeme n̄ko man ẹdụk mme mbonoesop Mme Ntiense Jehovah ẹnyụn̄ ẹnam isan̄ ẹka ikpọ ye n̄kpri mbono mmọ. Ekeme ndiyom uwaidem man ẹtiene ẹbuana ke nditịp okụk ẹda ẹse ẹban̄a Ufọkmbono Obio Ubọn̄ ye utom ukwọrọikọ ofụri ererimbot. Nte ededi, nte ediwak miliọn mme Christian ẹkemede nditie ntiense mban̄a, editiene mbuana ke mme utọ n̄kpọ oro ke ofụri esịt esida inemesịt edi. Jesus ọkọdọhọ ete: “Inemesịt odu ke ndinọnọ akan ke ndibọbọ.”—Utom 20:35, NW.
Mme utịp oro ẹnyenede ke ndinọ utom Jehovah ibetedem ẹnen̄erede ẹwak ẹkan se itakde. Nte nnyịn ikọride isịm ọyọhọ idaha, utom nnyịn akabade on̄wụm mfri onyụn̄ akama idatesịt akan. Ke akpanikọ, idụhe n̄kpọ oro ekemede ndida akpakịp uyụhọ ndi nte edikpep owo en̄wen akpanikọ Bible nnyụn̄ n̄kụt owo oro akade iso ke utuakibuot Jehovah. Ndien edieke obufa andituak ibuot emi edide andibuana ke ubon, ndusụk eyenọwọn̄ emi ama ọkọbọ ukpep ke “ntụnọ ye ke item Ọbọn̄,” oro esida san̄asan̄a idatesịt edi. (Ephesus 6:4) Nnyịn imokụt uwak edidiọn̄ Abasi ke ukeme oro nnyịn isịnde ndidi “mme anamutom” esie.—1 Corinth 3:9.
Mme Utịp Eken Ẹtode Utom Edinam Akpanikọ
Edi akapnikọ, nnyịn iyenyene mme mfịna adan̄a nte editịm n̄kpọ emi odude. Eyedi mme mfịna oro ẹyenen̄ede ẹsọn̄ ubọk nte ini Devil omụhọde akan. Nnyịn imekeme ndisobo ukọbọ m̀mê iyọ idomo. Edi ifiọk oro nte ke Jehovah odu ye nnyịn ọdọn̄ nnyịn esịt onyụn̄ ọnọ nnyịn ukeme ndiyọ. (1 Corinth 10:13; 2 Timothy 3:12) Ẹmenam n̄kpọ ye ndusụk ekemmọ mme Christian ke ibak ibak usụn̄ ke ediwak isua, edi mmọ ẹsịn ifịk ke ntak ima oro mmọ ẹnyenede ẹnọ Abasi. Etie mbon oro ẹkụtde unen ke ndiyọ nsio nsio orụk idomo nte eketiede mme apostle ke ini ẹkemiade mmọ ndien ekem ẹsana ẹyak. Utom Mme Apostle 5:41 obụk ete: “Ntre ke mmọ oro ẹwọrọ ẹkpọn̄ esop, ẹdara koro ẹbatde ete mmọ ẹmedot ndibọ esuene kaban̄a enyịn̄ Jesus.”
Utịp ime okpon akan se ikam itakde idahaemi. Edi ti ete, uten̄e Abasi ‘asan̄a ye un̄wọn̄ọ’ idịghe n̄kukụre “uwem emi odude ke emi” edi n̄ko “eke uwem emi edidide.” (1 Timothy 4:8) Didie ke idotenyịn owo emi emede ime eye ntem! Edieke afo anamde akpanikọ, afo eyebọhọ akwa ukụt oro onịmde utịt editịm n̄kpọ emi idiọn̄ọ. Mîdịghe edieke akpade mbemiso onịm-mbụk n̄kpọntịbe oro, ẹyenam fi eset edidụk obufa ererimbot oro editienede. (Daniel 12:1; John 11:23-25) Kere ban̄a idatesịt emi afo edinyenede adan̄aoro ke ini afo edikemede ndidọhọ: “Ami mmokụt unen, ke un̄wam Jehovah!” Edidi n̄kpọ nduaidem didie ntem ndinyene udeme ke isọn̄ oro, emi ‘ifiọk Jehovah ediyọhọde, kpa nte mmọn̄ ofụkde inyan̄.’—Isaiah 11:9.
Ih, edinam n̄kpọ nnọ Abasi enyene se akpade. Edi ke ẹmende ẹdomo ye mme utịp, se akpade edi esisịt. (Philippi 3:7, 8) Ke ikerede iban̄a kpukpru se Abasi anamde ọnọ mme asan̄autom esie idahaemi edinyụn̄ anamde ke ini iso, nnyịn imetiene itịn̄ mme ikọ andiwet psalm emi: “Ndinam didie nnọ Jehovah usiene kpukpru mfọnido emi enye ọfọnde ye ami?”—Psalm 116:12.