“Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.”—2 TIMOTHY 3:16, 17.

NSO okopodudu ikọ ke apostle Paul eketịn̄ ntem aban̄a nte Bible enen̄erede enyene ufọn! Edi akpanikọ ke enye ekenen̄ede etịn̄ aban̄a ikpehe Bible oro okodude ke eyo esie—oro edi, ikpehe Bible oro ndusụk owo ẹsikotde Akani Testament. Edi ikọ esie emi aban̄a kpukpru n̄wed 66 oro ẹdude ke Bible, esịnede mbon oro mme anam-akpanikọ mbet Jesus ẹkewetde ke eyo mmọ.

Ndi emenen̄ede okpono Bible nte Paul okokponode? Ndi emenịm ke Abasi ekenen̄ede ọnọ odudu spirit ẹda ẹwet Bible? Mme Christian eyo mme apostle ẹma ẹkpono ẹnyụn̄ ẹnịm ke ẹkeda odudu spirit ẹwet Bible. Se mme Christian ẹsụk ẹnịmde edi oro. Ke uwụtn̄kpọ, John Wycliffe, ọkwọrọ ederi eyen England oro okodude uwem ke n̄kpọ nte isua 700 emi ẹkebede, akada Bible nte “mfọnmma ibet emi edide akpanikọ.” The New Bible Dictionary etịn̄ aban̄a ikọ Paul emi odude ke ntọn̄ọ ibuotikọ emi, ete ke ntak emi Abasi ọkọnọde odudu spirit ẹda “ẹwet Bible anam ẹnịm ke kpukpru se Bible etịn̄de ẹdi akpanikọ.”

NSO ke ikọ apostle Paul ekenen̄ede ọwọrọ ke ini enye ọkọdọhọde ke “Abasi ọkọnọ odudu ẹda ẹwet” Bible? (2 Timothy 3:16) Paul akada usem Greek ewet n̄kpọ emi, ndien enye akada ikọ emi ọwọrọde ke ata ata usụn̄ “Abasi ọkọduọk ibifịk.” Ikọ Paul oro ọwọrọ ke Abasi akada edisana spirit esie ọnọ mme andiwet Bible ndausụn̄ man mmọ ẹwet se Enye okoyomde kpọt.