Ẹyak Nnyịn Isua Se Idiọkde

JEHOVAH edi edisana Abasi. Ke eset enye ekedi “Edisana Abasi Israel,” ndien ke ntre enye ama oyom Israel ẹsana, ẹnana ndo. (Psalm 89:18) Enye ọkọdọhọ ikọt esie oro enye ekemekde ete: “Mbufo ẹdi edisana ndien: koro ami nsanade.” (Leviticus 11:45) Owo ekededi oro okoyomde ‘ndidọk obot Jehovah’ ekenyene ndidi owo emi “ubọk asanade, esịt mînyụn̄ ideheke.” (Psalm 24:3, 4) Oro ama esịne se ikande ikpîkpu edifep ndinam ndiọi edinam. Enye ọkọwọrọ “ndisua idiọk.”—Mme N̄ke 8:13.

Ke ima, Jehovah ama ọnọ ediwak ibet man idụt Israel ẹfiọk ẹnyụn̄ ẹfep ndinam ukwan̄n̄kpọ. (Rome 7:7, 12) Mme ibet ẹmi ẹma ẹsịne nnennen ndausụn̄ kaban̄a ido uwem. Ẹkebat efịbe, edinam idan̄ ukemuduot, ebuana idan̄ ye iman, ye edidan̄ ye unam nte ndedehe n̄kpọ oro ẹsabarede spirit. (Leviticus 18:23; 20:10-17) Ẹma ẹsobo mbon oro ẹkenyenede ubiomikpe mme utọ esuene esuene edinam oro ẹfep ke idụt Israel.

Ke ini esop mme Christian oro ẹyetde aran akakabarede edi “Israel Abasi,” ukem mme idaha ido uwem oro ke ẹkenọ mmọ. (Galatia 6:16) Akana mme Christian n̄ko “ẹsua se idiọkde.” (Rome 12:9) Mme ikọ oro Jehovah eketịn̄de ọnọ Israel abuana mmọ n̄ko: “Mbufo ẹdisana, koro Ami ndide edisana.” (1 Peter 1:15, 16) Owo ikenyeneke ndiyak mme utọ ndedehe edinam nte use, efịbe, idan̄ ukemuduot, edidan̄ ye unam, ye edidan̄ ye iman ẹsabade esop Christian. Ẹyesion̄o mbon oro ẹsịnde nditre ndisịn idem ke mme utọ n̄kpọ oro ẹfep ke Obio Ubọn̄ Abasi. (Rome 1:26, 27; 2:22; 1 Corinth 6:9, 10; Mme Hebrew 13:4) Ke “ukperedem ini” emi, ukem idaha oro ke “mme erọn̄ en̄wen” ẹnyene. (2 Timothy 3:1; John 10:16) Nte utịp, mme Christian oro ẹyetde aran ye mme erọn̄ en̄wen ẹnam ndisana owo oro ẹnyenede eti uwem, ẹmi ẹkemede ndikama enyịn̄ Abasi mmọ nte Mme Ntiense Jehovah.—Isaiah 43:10.

Ndinịm Esop Asana

Ke edide isio, ererimbot enyịme kpukpru orụk oburobụt ido. Okposụkedi mme ata Christian ẹdide isio, mmọ ikpenyeneke ndifre nte ke ediwak mbon oro ẹnamde n̄kpọ Jehovah idahaemi ẹkedu inikiet ko ke ererimbot. Odu ediwak owo ẹmi edide, mbemiso mmọ ẹkefiọkde edisana Abasi, ikekwe ntak editre ndisịn idem ke mme udọn̄ ye mme mfụmmfụm ekikere eke mmeme ikpọkidem mmọ, ẹyakde idem ẹnyịni ke “ọkpọsọn̄ etịme uwem.” (1 Peter 4:4) Apostle Paul, ke ama eketịn̄ aban̄a mme ndek ndek edinam eke mme usụhọde owo eke mme idụt, ama etịn̄ ete: “Ndusụk mbufo ẹketie ntem.” Edi, enye ama aka iso ọdọhọ ete: “Edi ẹma ẹyet mbufo, ẹma ẹnam mbufo ẹsana, ẹma ẹtebe mbufo ikpe ke enyịn̄ Ọbọn̄ Jesus Christ, ye ke Spirit Abasi nnyịn.”—1 Corinth 6:11.

Nso ikọ ndọn̄esịt ke oro edi ntem! Se ededi oro owo akanamde ke mbemiso ke uwem, enye esikpụhọde ke ini ubọn̄ ubọn̄ eti mbụk aban̄ade Christ otụkde esịt esie. Enye esinyene mbuọtidem onyụn̄ ayak idemesie ọnọ Jehovah Abasi. Ọtọn̄ọde ke ini oro ka iso enye odu edisana uwem, ẹyet enye asana ke enyịn Abasi. (Mme Hebrew 9:14) Ẹfen mme idiọkn̄kpọ oro enye akanamde ke ini edem, ndien enye ekeme ‘ndinyanade mbịne se inade enye ke iso.’a—Philippi 3:13, 14; Rome 4:7, 8.

Jehovah ama efen ọnọ David oro akakabarede esịt ke uwotowo ye efịbe, ndien Enye ama efen ọnọ Manasseh oro akakabarede esịt ke oburobụt efịbe ye ekese uduọkiyịp. (2 Samuel 12:9, 13; 2 Chronicles 33:2-6, 10-13) Nnyịn ke akpanikọ imekeme ndikop inemesịt nte ke enye eben̄e idem ndifen nnọ nnyịn n̄ko edieke nnyịn ikabarede esịt inyụn̄ ikade ibịne enye ke esịt akpanikọ ye nsụhọdeidem. Edi, kpa ye oro Jehovah ekefende ọnọ David ye Manasseh, irenowo iba ẹmi—ọkọrọ ye Israel—ẹkenyene ndiyọ mme utịp ndiọi edinam mmọ. (2 Samuel 12:11, 12; Jeremiah 15:3-5) Ke ukem usụn̄ oro, ke adan̄aemi Jehovah efende mme anamidiọk oro ẹkabarede esịt, ekeme ndidu mme utịp edinam mmọ oro mmọ mîkemeke ndibọhọ.

Mme Utịp Oro Owo Mîkemeke Ndibọhọ

Ke uwụtn̄kpọ, owo oro odude oburobụt obukpo uwem ndien enyene AIDS ekeme ndibọ akpanikọ ndien anam mme ukpụhọde ke uwem esie ekesịm idaha uyakidem ye baptism. Idahaemi enye edi Christian oro asanade ke n̄kan̄ eke spirit emi enyenede itie ebuana ye Abasi ye utịbe utịbe idotenyịn kaban̄a ini iso; edi enye osụk enyenyene AIDS. Ke akpatre udọn̄ọ emi ekeme ndiwot enye, emi edi n̄kpọ mfụhọ edi edi utịp akani usụn̄uwem esie oro enye mîkemeke ndibọhọ. Ye ndusụk Christian mme utịp akani akwa idiọk ido uwem mmọ ekeme ndika iso ndu ke mme usụn̄ efen. Ediwak isua ke mmọ ẹma ẹkena baptism, ndusụk ke ofụri ini uwem mmọ ke editịm n̄kpọ enyeemi, mmọ ẹkeme ndika iso n̄n̄wana ye mme udọn̄ ẹdude mmọ ke obụkidem ndifiak n̄kodu uwem ke oburobụt usụn̄. Ye un̄wam spirit Jehovah, ediwak owo ẹkụt unen ke ndin̄wana n̄kan. Edi mmọ ẹnyene ndin̄wana kpukpru ini.—Galatia 5:16, 17.

Utọ mbon oro inamke idiọkn̄kpọ adan̄a nte mmọ ẹkarade mme udọn̄ mmọ. Edi edieke mmọ ẹdide irenowo, ke ọniọn̄ mmọ ẹkeme ndibiere nditre ‘ndiyom’ ndinyene ifetutom ke esop ke adan̄aemi ẹsụk ẹnyenede ndin̄wana ye ọkpọsọn̄ udọn̄ obụkidem. (1 Timothy 3:1) Ntak-a? Koro mmọ ẹfiọkde mbuọtidem oro esop enyenede ke idem mbiowo. (Isaiah 32:1, 2; Mme Hebrew 13:17) Mmọ ẹfiọk ẹte ke ẹsika ẹbịne mbiowo kaban̄a ediwak mbubehe idemowo ẹnyụn̄ ẹnyene ndise mban̄a mme idaha oro ẹyomde ẹdu ke ukpeme. Idiwụtke ima, ọniọn̄, m̀mê eti ibuot owo emi an̄wanade kpukpru ini ye mme ndedehe udọn̄ obụkidem ndinyanade mbịne utọ ifetutom oro.—Mme N̄ke 14:16; John 15:12, 13; Rome 12:1.

Ye owo oro ekedide andisabade nditọwọn̄ mbemiso enye anade baptism, utịp efen ekeme ndidu. Ke ini enye ekpepde akpanikọ, enye akabade esịt onyụn̄ anam ukpụhọde, idaha ibak ibak idiọkido oro idụk idi esop. Ke oro ebede enye ekeme ndinam eti n̄kọri, akan ndiọi udọn̄ esie oro ofụri ofụri, ndien ekem enyene udọn̄ ‘ndiyom’ ifetutom ke esop. Nte ededi, nso edieke osụk oyomde enye odu uwem ke usụn̄ edinamde ẹfre ẹban̄a idiọk etop oro enye ekenyenede nte andisabade nditọwọn̄? Nte enye eyedi “owo emi owo mîkemeke ndidori enye ikọ; . . . enyene eti etop ke otu mmọ ẹmi ẹdude ke esien; . . . [eke] mînyeneke se idiọkde”? (1 Timothy 3:1-7, 10; Titus 1:7) Baba, enye ididịghe. Ntem, enye ididotke ndikama mme ifetutom ke esop.

Ke Ini Christian Oro Ayakde Idem Ọnọ Anamde Idiọkn̄kpọ

Jehovah ọfiọk ete ke nnyịn imenyene mmeme ye nte ke nnyịn imekeme ndinam idiọkn̄kpọ idem ke ima ikana baptism. Apostle John ekewet ọnọ mme Christian eke eyo esie ete: “Mmewet n̄kpọ ẹmi nnọ mbufo, man mbufo ẹkûnam idiọk-n̄kpọ. Ndien edieke owo anamde idiọk-n̄kpọ, nnyịn imenyene Ekpe-emem ke ufọt nnyịn ye Ete, kpa Jesus Christ, emi edide edinen. Enye onyụn̄ edi usio-isop mme idiọk-n̄kpọ nnyịn, inyụn̄ idịghe eke nnyịn ikpọn̄, edi eke ofụri ererimbot nde.” (1 John 2:1, 2) Ih, ọkọn̄ọde ke uwa Jesus, Jehovah eyefen mme Christian oro ẹma ẹkena baptism oro ẹduọde ẹdụk idiọkn̄kpọ—edieke mmọ ẹkabarede esịt ke akpanikọ ẹnyụn̄ ẹkpọn̄de idiọk usụn̄uwem mmọ.

Ẹma ẹkụt uwụtn̄kpọ aban̄ade emi ke esop Corinth ke akpa isua ikie. Apostle Paul ama okop aban̄a edinam use ye iman ke obufa esop oro, ndien enye ama ọnọ item ete ẹsio owo oro akanamde emi efep. Ekem, anamidiọk oro ama akabade esịt, ndien Paul ama ọdọhọ esop ẹfiak ẹda enye. (1 Corinth 5:1, 13; 2 Corinth 2:5-9) Ntem, ebede ke odudu ukọkudọn̄ọ eke ima mfọnido Jehovah ye akwa ufọn uwa ufak Jesus, ẹma ẹnam owo oro asana ke idiọkn̄kpọ esie. Ukem n̄kpọ oro ekeme nditịbe mfịn. N̄ko, nte ededi, idem edieke anam akwa idiọkn̄kpọ oro ama akana baptism akabarede esịt ndien Jehovah efende ọnọ enye, idiọkn̄kpọ oro ekeme ndinyene mme utịp oro ẹkade-ka iso.—Mme N̄ke 10:16, 17; Galatia 6:7.

Ke uwụtn̄kpọ, edieke eyenan̄wan oro ama akayak idem ọnọ anamde use, enye ekeme ndinen̄ede ntua n̄kpọfiọk ke edinam esie ndien ekem ye un̄wam oro esop ọnọde ẹnam enye afiak enyene nsọn̄idem eke spirit. Edi nso edieke enye oyomode oto oburobụt ido esie? Do se enye akanamde okpụhọde ofụri uwem esie ke usụn̄ oro enye mîkemeke ndinyan̄a. Erenowo oro ekesịnde efịbe ekeme ndikabade esịt ndien owo isioho enye ifep. Edi n̄wan esie oro mîsịnke efịbe enyene isọn̄ N̄wed Abasi ndisio enye ndọ, ndien n̄wan emi ekeme ndimek ndinam ntre. (Matthew 19:9) Edieke enye anamde, eren oro, okposụkedi Jehovah efende enye, enyene ndidu uwem ye akwa utịp idiọkn̄kpọ esie ke ofụri eyouwem esie.—1 John 1:9.

Nso kaban̄a erenowo oro ke unana ima osiode n̄wan esie ndọ man ọkọdọ n̄wan efen? Ekeme ndidi ke akpatre enye ayakabade esịt ndien ẹfiak ẹda enye ẹsịn ke esop. Nte mme isua ẹbede enye ekeme ndinam n̄kọri onyụn̄ ‘ọkọri esịm ọyọhọ idaha.’ (Mme Hebrew 6:1, NW) Edi adan̄a ini nte akpa n̄wan esie mînyeneke ebe efen, eren oro ididotke ndinyene ifetutom ke esop. Enye idịghe “ebe n̄wan kiet” koro enye mîkenyeneke isọn̄ N̄wed Abasi ndisio akpa n̄wan esie ndọ.—1 Timothy 3:2, 12.

Nte emi idịghe okopodudu ntak emi Christian ọkpọkọride usua ọnọ se idiọkde?

Nso Kaban̄a Andisabade Nditọwọn̄?

Nso edieke Christian edide akwa owo oro ama akana baptism asabarede eyenọwọn̄ ke idan̄? Nte anamidiọk oro ọdiọk ke usụn̄ oro Jehovah mîdifenke enye tutu amama? Inen̄ekede iwọrọ ntre. Jesus ọkọdọhọ ete ke ‘idiọkn̄kpọ ẹnamde ẹdian edisana spirit’ ke owo mîdifenke. Ndien Paul ama ọdọhọ ete ke uwa idụhe inọ idiọkn̄kpọ oro owo anamde ke n̄koi-nnam ke ama ọkọfiọk akpanikọ. (Luke 12:10; Mme Hebrew 10:26, 27) Edi idụhe itie ke Bible emi ọdọhọde ete ke owo ikemeke ndifen nnọ akwa owo edide Christian emi asabarede eyenọwọn̄ ke idan̄—edide ke idan̄ iman m̀mê ke usụn̄ efen. Ke akpanikọ, ẹkeme ndiyet idiọkn̄kpọ esie ẹnam enye asana edieke enye akabarede esịt ke edinam akpanikọ onyụn̄ ọkpọn̄de ido esie. Nte ededi, enye ekeme ndisụk n̄kaiso n̄n̄wana ye idiọk udọn̄ obụkidem oro enye ọkọkọride. (Ephesus 1:7) Ndien ekeme ndidi mme utịp ẹyedu oro enye mîdikemeke ndibọhọ.

Ọkọn̄ọde ke ibet idụt oro enye odụn̄de, ekeme ndiyom andisabade emi aka n̄kpọkọbi mîdịghe enyene mme ukpan efen oro Ukara odoride. Esop idinamke enye ọbọhọ emi. Akan oro, eren oro owụt akwa mmeme oro ẹdinyenede ndikere mban̄a ọtọn̄ọde ke emi ka iso. Edieke etiede nte enye akabade esịt, ẹyesịn udọn̄ ẹnọ enye ndinam n̄kọri ke n̄kan̄ eke spirit, ndibuana ke utom an̄wautom, idem etienede abuana ke Ufọkn̄wed Utom Ukara Abasi ye mme ikpehe oro mîbuanake edinọ ukpep ke Esoputom. Nte ededi, emi iwọrọke ite ke enye oyodot ndinyene ifetutom ke esop. Nso idi mme isọn̄ N̄wed Abasi kaban̄a emi?

Ntak kiet edi, ana ebiowo “enyene mfara ke idem.” (Titus 1:8) Edi akpanikọ, nnyịn ndomokiet inyeneke mfara ke idem ke mfọnmma udomo. (Rome 7:21-25) Edi Christian oro ama akayak idem ọnọ edide akwa owo emi ọduọde odụk idiọkn̄kpọ eke edisabade eyenọwọn̄ ke idan̄ owụt mmeme obụkidem oro mîdịghe ndammana n̄kpọ. Ifiọk n̄kpọntịbe owụt ete ke utọ akwa owo oro ekeme n̄ko ndisabade nditọwọn̄ eken. Edi akpanikọ, idịghe kpukpru mme andisabade nditọwọn̄ ẹsifiak ẹnam idiọkn̄kpọ emi, edi ediwak ẹsinam. Ndien esop ikemeke ndikot owo esịt man ọfiọk owo emi edifiakde asabade ye owo emi mîdifiakke isabade nditọwọn̄. (Jeremiah 17:9) Ntem, item oro Paul ọkọnọde Timothy enyene akpan ebuana ke idaha oro aban̄ade ikpọ owo oro ẹkesabarede nditọwọn̄: “Kûsọp udori owo ubọk umen usịn ke itie; kûnyụn̄ unyene udeme ke idiọk-n̄kpọ owo en̄wen.” (1 Timothy 5:22) Kaban̄a ukpeme nditọwọn̄ nnyịn, erenowo oro ẹfiọkde ẹte ke ekedi andisabade nditọwọn̄ idotke ndinyene ifetutom ke esop. Akan oro, enye ikemeke ndidi asiakusụn̄ m̀mê ndinam utom ke san̄asan̄a ifetutom uyọhọ ini efen ekededi.—Men edumbet odude ke Exodus 21:28, 29 domo.

Ndusụk owo ẹkeme ndibụp, ‘Ndi ndusụk owo ikanamke mme orụk idiọkn̄kpọ efen inyụn̄ ikabade esịt in̄wan̄în̄wan̄, ekem ẹfiak ẹnam idiọkn̄kpọ mmọ nte ini akade?’ Ih, oro esitịbe, edi odu mme n̄kpọ efen oro anade ẹkere ẹban̄a. Edieke, ke uwụtn̄kpọ, owo odomode ndinam oburobụt ido ye akwa owo efen, akwa owo oro ekpenyene ndin̄wana mbiọn̄ọ edinam esie oro. Edi ata mmemmem n̄kpọ ndibian̄a, nditịmede, m̀mê ndidịghe nditọwọn̄. Bible etịn̄ nte nditọwọn̄ ẹnanade eti ibuot. (Mme N̄ke 22:15; 1 Corinth 13:11) Jesus akada nditọwọn̄ nte uwụtn̄kpọ nsụhọdeidem oro mînyeneke ifiọk. (Matthew 18:4; Luke 18:16, 17) Unana ifiọk eyenọwọn̄ esịne unana ifiọk n̄kpọntịbe ekededi. Ata ediwak nditọwọn̄ ẹtie in̄wan̄în̄wan̄, ẹnyene udọn̄ ndinem owo esịt, ndien ke ntre ẹdu ke itiendịk edidi se akwa owo emi mmọ ẹfiọkde ẹnyụn̄ ẹbuọtde idem adade n̄kari asabade. Ke ntre, esop enyene mbiomo ke iso Jehovah ndikpeme nditọwọn̄ esie.

Nditọwọn̄ oro ẹnọde eti ukpep ẹfiọk ndikpono mme ete ye eka mmọ, mbiowo, ye ikpọ owo eken. (Ephesus 6:1, 2; 1 Timothy 5:1, 2; Mme Hebrew 13:7) Ekpedi obukpo edinam emi omụmde owo mbọribọ edieke kiet ke otu ikpọ owo emi ẹkponode akpadade in̄wan̄în̄wan̄ mbuọtidem eyenọwọn̄ oro anam n̄kpọ ke idiọk usụn̄ man asabade m̀mê enyịk enye ndinyịme ndinam idan̄. Mbon oro ẹkesabarede ke idan̄ ke usụn̄ emi ẹsin̄wana ke ediwak isua ndikan unan eke ntụk oro osụn̄ọde oto emi. Ntem, odot esop ọnọ andisabade nditọwọn̄ oro ọkpọsọn̄ ntụnọ ye mme ukpan. Idịghe idaha esie nte akwa owo oro ẹkponode ke ẹkpenyene ndikere mban̄a edi, utu ke oro, anana ndo edisana idaha eke esop.—1 Corinth 5:6; 2 Peter 3:14.

Edieke andisabade nditọwọn̄ akabarede esịt ke akpanikọ, enye oyokụt ọniọn̄ oro odude ke ndida mme edumbet Bible nsịn ke edinam. Edieke enye enen̄erede ekpep ndisua se idiọkde, enye ayasua se enye akanamde onyụn̄ an̄wana ndifep ndifiak nnam idiọkn̄kpọ esie. (Mme N̄ke 8:13; Rome 12:9) Ke adianade do, enye ke akpanikọ ọyọkọm Jehovah kaban̄a akwa ima Esie, emi otode ke ntak emi anamidiọk oro akabarede esịt, utọ nte enye, osụk ekeme ndituak ibuot nnọ edisana Abasi nnyịn ye idotenyịn ndisịne ke otu “mbon edinen ido” oro ẹdidụn̄de ke isọn̄ ke nsinsi.—Mme N̄ke 2:21.

[Ikọ idakisọn̄]

[Se Ẹwetde ke Ikpọ Abisi ke page 28]

Ke adan̄aemi Jehovah esifende mme anamidiọk ẹmi ẹkabarede esịt, mme utịp edinam mmọ oro mmọ mîkemeke ndibọhọ ekeme ndidu