Eti Item

ANA mbiowo Christian ẹkeme “ndida eti ukpepn̄kpọ . . . nteme mme owo.” (Titus 1:9) Ke ndusụk idaha, ẹnyene ndinam emi kpa ye ata n̄kpọsọn̄ idaha. Edi akpan n̄kpọ ndinọ item ke n̄kemuyo ye mme ndausụn̄ N̄wed Abasi. Ntem, ana mbiowo ẹnam item emi: “Sịn idem ke . . . ndinọ item.” (1 Tim. 4:13, NW) Okposụkedi nneme nnyịn mi enyenede mbiowo akpan akpan m̀mê mbon oro ẹnamde n̄kpọ ẹbịne ifetutom emi, mme ini ẹsidu oro anade mme ete ye eka ẹnọ nditọ mmọ item m̀mê oro oyomde mbon oro ẹnịmde ukpepn̄kpọ Bible ẹnọ nditọ ukpepn̄kpọ Bible mmọ item. Ke mme utọ idaha oro, ẹdida ukem ndausụn̄ emi inam n̄kpọ.

Mme Idaha Oro Oyomde Ọnọ Item. Man ebiere ini oro oyomde ọnọ item, ọyọfọn ndidụn̄ọde mme idaha oro ẹwetde ke Bible emi ẹkenọde owo item. Apostle Peter ama eteme mbiowo ete ẹtịn̄ enyịn ke mbiomo mmọ nte mme andikpeme udịmerọn̄ Abasi. (1 Pet. 5:1, 2) Paul ama eteme Titus ete ọnọ n̄kparawa iren item ete “ẹnyene eti ibuot.” (Titus 2:6) Paul ama eteme ekemmọ mme Christian ete “ẹnyene ikọ-inua kiet” ẹnyụn̄ ẹdian̄ade ẹkpọn̄ mbon oro ẹtọde ubahade ke otu nditọete. (1 Cor. 1:10; Rome 16:17; Phil. 4:2) Okposụkedi Paul okotorode mme andibuana ke esop Thessalonica ke nti n̄kpọ oro mmọ ẹkenamde, enye ama ẹsịn udọn̄ ọnọ mmọ ndinen̄ede nda item oro mmọ ẹkebọde nsịn ke edinam. (1 Thess. 4:1, 10) Peter ama ekpe mme ekemmọ Christian ubọk ete “ẹdian̄ade ẹkpọn̄ idiọk udọn̄ obụkidem.” (1 Pet. 2:11) Jude ama eteme nditọete esie ete “ẹsọn̄ọ ẹn̄wana kaban̄a ikọ mbuọtidem,” ke ntak odudu oro mbon oro mîten̄eke Abasi emi ẹsịnde idem ke obukpo uwem ẹnyenede. (Jude 3, 4) Ẹma ẹsịn udọn̄ ẹnọ kpukpru Christian ẹte ẹnọ kiet eken item mbak idiọkn̄kpọ edida odudu abian̄a esie ọsọn̄ owo ekededi esịt. (Heb. 3:13) Peter ama eteme mme Jew oro mîkọbuọtke idem kan̄a ke Christ ete: “Ẹnyan̄a idem mbufo ẹsio ke n̄kwan̄a emana emi.”—Utom 2:40.

Mme edu ewe ke ẹyom man ekeme ndinọ n̄kpọsọn̄ item ke mme utọ idaha oro? Didie ke owo oro ọnọde item ekeme ndinam item esie edi se ẹkpenamde n̄kpọ usọp usọp ẹban̄a ye unana nditie ufịk ufịk m̀mê nsọn̄ido nsọn̄ido?

“Ke Ntak Ima.” Edieke item nnyịn mîdịghe “ke ntak ima,” enye ekeme nditie ọkpọsọn̄ ọkpọsọn̄. (Philem. 9) Edi akpanikọ, ke ini oyomde ẹsọsọp ẹnam n̄kpọ, nte etịn̄ikọ ọnọde utịn̄ikọ ekpenyene ndiwụt ke oyom ẹnam n̄kpọ usọp usọp. Mmemmem uyoikọ ekeme nditie nte eben̄e. Kpa ye oro, ẹkpenyene ndinam eben̄e oro ke ofụri esịt ye ọkpọsọn̄ ntụk. Ima ima eben̄e eyenen̄ede onụk otuowo ndinam n̄kpọ. Ke ini eketịn̄de ikọ ke ibuot esie ye mme nsan̄a esie, Paul ama ọdọhọ mbon Thessalonica ete: “Mbufo ẹmenyụn̄ ẹfiọk ẹte, nnyịn ikanam n̄kpọ ye mbufo, kpa nte ete anamde n̄kpọ ye nditọ esie mmọ; ikọnọ mbufo item.” (1 Thess. 2:11) Mme esenyịn Christian oro ẹkenam n̄kpọ ye nditọete emi ke ima. Yak mme ikọ fo ẹto ata edikere mban̄a oro afo ekerede aban̄a mme andikpan̄ utọn̄ nnọ fi.

Sịn mbufiọk. Kûtie nsọn̄ido nsọn̄ido ye mbon oro afo odomode ndisịn udọn̄ nnọ. Ke ukem ini oro, kûfehe ndisian otuowo fo “ofụri uduak Abasi.” (Utom 20:27) Mbon oro ẹnyenede esịtekọm idiyatke esịt m̀mê ndisua fi koro adade mfọnido esịn udọn̄ ọnọ mmọ ndinam se inende.—Ps. 141:5.

Ediwak ini, esifọn ẹda mme ikọ itoro ofụri esịt kaban̄a akpan n̄kpọ, ẹtọn̄ọ ndinọ item. Kere ban̄a nti n̄kpọ oro nditọete fo ẹnamde—mme n̄kpọ oro anade edi ẹnen̄ede ẹnem Jehovah esịt: mbuọtidem oro mmọ ẹwụtde ke utom mmọ, ima oro onụkde mmọ ndisịn̄ede idemmọ nnam n̄kpọ, ye ime mmọ ke mme ini idomo. (1 Thess. 1:2-8; 2 Thess. 1:3-5) Emi ayan̄wam nditọete fo ndidiọn̄ọ nte ke amabat mmimọ ke n̄kpọ omonyụn̄ ọdiọn̄ọ aban̄a idaha mmimọ, ndien oro ayanam mmọ ẹnyene nnennen idaha ekikere ẹban̄a nsịnudọn̄ oro editienede.

“Ye Anyanime.” Ekpenyene ndinọ item “ye anyanime.” (2 Tim. 4:2, NW) Nso ke emi abuana? Anyanime esịne edime ime nnyụn̄ nyọ ndiọi idaha m̀mê mme n̄kpọ iyatesịt. Owo oro enyenede anyanime odori enyịn nte ke mme andikpan̄ utọn̄ nnọ imọ ẹyeda se imọ itịn̄de ẹsịn ke edinam. Ndida edu emi nnọ item idiyakke mme andikpan̄ utọn̄ nnọ fi ẹkere ke afo enyene idiọk ekikere aban̄a mmimọ. Afo ndinyene mbuọtidem nte ke nditọete fo ẹyom ndinam n̄kpọ Jehovah ke ofụri ukeme mmọ eyedemede mmọ udọn̄ ndinam se inende.—Heb. 6:9.

‘Ebe ke Eti Ukpepn̄kpọ.’ Didie ke ebiowo ekeme “ndida eti ukpep-n̄kpọ . . . nteme mme owo”? Ebe ke “ndisọn̄ọ mmụm ikọ akpanikọ eke ẹkekpepde enye” n̄kama. (Titus 1:9) Utu ke ndinọ ekikere idemfo, yak Ikọ Abasi edi ebiet emi nsịnudọn̄ fo otode. Yak Bible akara ekikere fo kaban̄a se ẹyomde ẹtịn̄. Bat mme ufọn edida se Bible etịn̄de nsịn ke edinam ke n̄kpọ oro afo enemede. Tịm kere ban̄a mme utịp—eke idahaemi ye eke ini iso—eke editre ndidu uwem ekekem ye Ikọ Abasi, nyụn̄ da emi nam otuowo fo ẹkụt ntak oro oyomde ẹnam n̄kpọ nte odotde.

Kụt ete ke amanam etịm an̄wan̄a otuowo fo se mmọ ẹkpenamde ye nte mmọ ẹkpenamde. Nam an̄wan̄a nte ke ekikere oro ọnọde enen̄ede ọkọn̄ọ ke N̄wed Abasi. Edieke N̄wed Abasi ọnọde owo ndusụk ifụre ndinam ubiere ekededi, nam an̄wan̄a udomo ifụre oro enye ọnọde. Ndien, ke utịt utịn̄ikọ fo, nọ akpatre nsịnudọn̄ oro edisọn̄ọde ubiere mme andikpan̄ utọn̄ nnọ fi ndinam n̄kpọ.

Ye “Ọkpọsọn̄ Uko.” Man ẹnọ mbon efen item uforo uforo, ana owo enyene “ọkpọsọn̄ uko ke mbuọtidem.” (1 Tim. 3:13) Nso inọ owo uko? Owo enyene uko edieke “uwụt-n̄kpọ eti utom” esie ekemde ye se enye esịnde udọn̄ ọnọ nditọete esie ndinam. (Titus 2:6, 7; 1 Pet. 5:3) Ke edide ntre, mbon oro ẹsịnde udọn̄ ẹnọ ndinam n̄kpọ ẹyefiọk ẹte ke owo oro esịnde udọn̄ ọnọ mmimọ idorike enyịn mmimọ ndinam se enye ke idemesie mînamke. Mmọ ẹyekụt ẹte ke mmimọ imekeme ndikpebe mbuọtidem esie idem nte enye odomode ndikpebe Christ.—1 Cor. 11:1; Phil. 3:17.

Item oro ọkọn̄ọde ke Ikọ Abasi, oro ẹnyụn̄ ẹnọde ke edu ima ekeme ndinyene akamba ufọn. Mbon oro ẹnyenede mbiomo ndinọ utọ item emi ẹkpenyene nditịn̄ enyịn nnam enye nte ọfọnde.—Rome 12:8.