“Ẹti Mmọ Eke Ẹdade Usụn̄ ke Otu Mbufo”

ẸDA ibuotikọ emi ẹto ikọ apostle Paul emi odude ke Mme Hebrew 13:7. Ọtọn̄ọde ke Pentecost isua 33 eyo mme apostle, mme apostle Jesus Christ ẹkese ẹban̄a esop mme Christian. Ẹkesiak esop emi obufa, ndien mmọ ẹkesinọ ndausụn̄. (Utom 6:2-4) Ke n̄kpọ nte isua 49 eyo oro, ẹma ẹmek mbiowo en̄wen ẹsịn ke otu emi ẹsede ẹban̄a utom esop mme Christian. Bible ọdọhọ ke “mme apostle ye mbiowo ke Jerusalem” ẹkesịne ke otu emi ke ini ẹkebierede ikọ edina mbobi. (Utom 15:1, 2) Mmọ ẹkesise ẹban̄a se ededi oro afịnade mme Christian ke kpukpru ebiet. Mmọ ẹma ẹsiwet leta ẹnọ ẹsọk mme esop ẹnyụn̄ ẹtịn̄ se anade ẹnam. Emi ama esisọn̄ọ mme esop idem onyụn̄ anam mmọ ẹdiana kiet ẹnyụn̄ ẹnyene ekikere kiet ke n̄kpọ. Mme esop ẹma ẹsikop item ẹnyụn̄ ẹtiene ndausụn̄ oro otu emi ẹkenọde. Emi ama anam Jehovah ọdiọn̄ mmọ onyụn̄ anam mmọ ẹwak.—Utom 8:1, 14, 15; 15:22-31; 16:4, 5; Heb. 13:17.

² Mfiakedem ama ọtọn̄ọ ke mme apostle ẹma ẹkekpan̄a. (2 Thess. 2:3-12) Nte Jesus eketịn̄de ke uwụtn̄kpọ oro enye ọkọnọde aban̄a wheat ye mbiet, asua ama editọ mbiet (oro edi, mme Christian abian̄a) ọdọn̄ ke otu wheat (oro edi, mme Christian oro ẹyetde aran). Ẹma ẹyak mmọ mbiba ẹkọri ọtọkiet tutu ini ukpen̄e, oro edi, “akpatre ini editịm n̄kpọ emi.” (Matt. 13:24-30, 36-43) Okposụkedi emi Jesus mîkenyeneke otu ndomokiet mi ke isọn̄ ini oro ndida nnọ mme Christian ndausụn̄, enye okosụk ododu ye Christian kiet kiet oro ẹyetde aran. (Matt. 28:20) Edi enye ama ọdọhọ ke n̄kpọ oyokpụhọde ke ini ukpen̄e.

³ “Anie ndien edi ofụn emi anamde akpanikọ onyụn̄ enyenede ọniọn̄?” Jesus akada mbụme emi ọtọn̄ọ uwụtn̄kpọ emi enye ọkọnọde ke ini enye eketịn̄de se iditịbede ke “akpatre ini editịm n̄kpọ emi.” (Matt. 24:3, 42-47) Jesus ọkọdọhọ ke ofụn emi eyesịn idem ọnọ ikọt Abasi udia “ke nnennen ini.” Udia emi idịghe ata udia, edi edi Ikọ Abasi. N̄kọ emeti ke Jesus ikadaha owo kiet inọ mme Christian ndausụn̄ ke eyo mme apostle, edi akada ekpri otu, oro edi, mme apostle ye mbiowo ifan̄. Kpasụk ntre, ofụn emi anamde akpanikọ, emi Jesus adade ọnọ nnyịn ndausụn̄ mfịn, idịghe owo kiet.

ANIE EDI “OFỤN EMI ANAMDE AKPANIKỌ ONYỤN̄ ENYENEDE ỌNIỌN̄”?

⁴ Anie ke Jesus ekemek ete ọbọk mme anditiene imọ? Enen ndidọhọ ke enye ekemek mme Christian oro ẹyetde aran ke isọn̄. Bible okot mmọ “mme oku emi ẹdide ndidem,” mmọ n̄ko ke ẹdọhọ ‘ẹtan̄a nti ido Enye emi okokotde mmọ osio ke ekịm esịn ke utịbe un̄wana esie.’ (1 Pet. 2:9; Mal. 2:7; Edi. 12:17) Ndi kpukpru mbon oro ẹyetde aran ke isọn̄ ẹdi ofụn emi anamde akpanikọ? Ihih. Ke ini Jesus akadade iyak ye uyo ifan̄ ọbọk irenowo 5,000 ye iban ye nditọwọn̄, enye ọkọnọ mbet esie udia oro ete ẹdeme ẹnọ mme owo. (Matt. 14:19) Enye akada owo ifan̄ kpọt ọnọ ediwak owo udia. Kpasụk ntre, enye ada owo ifan̄ kpọt ekpep nnyịn Ikọ Abasi.

⁵ Ntem, “akama-ukpọhọde [m̀mê ofụn] emi anamde akpanikọ, onyụn̄ enyenede ọniọn̄” edi ekpri otu nditọete irenowo emi ẹyetde aran, emi ẹkpepde nnyịn Ikọ Abasi ke ini emi Christ adade ubọn̄ mi ke heaven. (Luke 12:42) Ke mme akpatre usen emi, kpukpru mmọ ẹnam utom ọtọkiet ke ibuot itieutom nnyịn. Ke nditịn̄ ibio ibio, Otu Emi Ẹsede Ẹban̄a Utom Mme Ntiense Jehovah ẹdi “ofụn emi anamde akpanikọ onyụn̄ enyenede ọniọn̄.”

⁶ Christ anam otu emi ẹwet n̄kpọ ẹban̄a nte mme prọfesi Bible ẹsude, onyụn̄ ada mmọ eteme nnyịn nte ikpadade Bible idu uwem ke usen ke usen. Kpukpru emi ẹtie nte udia ọnọ nnyịn. Ẹsideme udia emi ke kpukpru esop Mme Ntiense Jehovah ke ofụri ererimbot. (Isa. 43:10; Gal. 6:16) Ke eyo Bible, eti ofụn, m̀mê akama-ukpọhọde, ekesise aban̄a ufọk. Kpasụk ntre, Jesus ọnọ ofụn emi anamde akpanikọ onyụn̄ enyenede ọniọn̄ utom edise mban̄a mbonufọk Abasi. Ofụn emi ese aban̄a inyene esop Abasi, utom ukwọrọikọ, n̄kpri ye ikpọ mbono, ye mme n̄wed oro ẹsion̄ode. Ofụn emi esinyụn̄ anam ẹmek mbon oro ẹsede ẹban̄a nsio nsio n̄kpọ ke esop Abasi. Omokụt do ke ofụn emi ese aban̄a “mbonufọk” Abasi.—Matt. 24:45.

⁷ Mmanie ndien ẹdi “mbonufọk” Abasi emi? Edi kpukpru mbon emi ẹdiade udia oro ofụn emi anamde akpanikọ onyụn̄ enyenede ọniọn̄ ọnọde. Ke ntọn̄ọ ntọn̄ọ, mbon oro ẹyetde aran kpọt ẹkedi mbonufọk Abasi. Nte ini akakade, akwa otuowo emi ẹdide “mme erọn̄ en̄wen” ẹma ẹdidiana ye mmọ. (John 10:16) Otu mbiba emi ẹdia udia oro ofụn emi anamde akpanikọ ọnọde.

⁸ Ke ini akwa ukụt, Jesus eyedi edibiere ikpe ọnọ idiọk ererimbot emi onyụn̄ osobo enye efep. Ini oro ndien ke Jesus edimek ofụn emi anamde akpanikọ mi ete “ese aban̄a kpukpru inyene” imọ. (Matt. 24:46, 47) Ofụn emi anamde akpanikọ edibọ utịp esie ke heaven. Ofụn emi ye kpukpru mbon oro ẹyetde aran ẹditiene Christ ikara ke heaven. Ibat kpukpru mmọ ẹdi 144,000. Okposụkedi emi ofụn emi anamde akpanikọ onyụn̄ enyenede ọniọn̄ mîdidụhe aba ke isọn̄ ke ini Jesus editọn̄ọde ndikara isọn̄ emi, Jesus eyemek mme owo mi ke isọn̄ ndidi “mbọn̄.” Mmọ ke Jehovah ye Jesus ẹdida ẹnọ nnyịn ndausụn̄ ini oro.—Ps. 45:16.

NTAK EMI ANADE ‘ITI MBON EMI ẸDADE NNYỊN USỤN̄’?

⁹ Enyene ediwak n̄kpọ emi akpanamde ‘iti mbon emi ẹdade nnyịn usụn̄’ inyụn̄ inịm ke mmọ idibian̄ake nnyịn. Ndinam emi edi ke ufọn nnyịn. Ntak idọhọde ntre? Apostle Paul ọkọdọhọ ete: “Mmọ [ẹkpeme] mbufo nte mmọ emi ẹdinamde ibat; man mmọ ẹkpenam emi ke idatesịt, ẹkûnam ye nsiama, koro emi mîdifọnke ye mbufo.” (Heb. 13:17) Ntre, ọfọn ikop item inyụn̄ isụk ibuot inọ mme andida nnyịn usụn̄, inam se ededi oro mmọ ẹdọhọde, sia mmọ ẹkpemede nnyịn mbak n̄kpọ edinam nnyịn.

¹⁰ Paul ọkọdọhọ ke 1 Corinth 16:14 ete: “Ẹnam kpukpru n̄kpọ ke ima.” Se ededi oro mme andida nnyịn usụn̄ ẹdọhọde nnyịn inam edi ke ntak ima. Kop se 1 Corinth 13:4-8 etịn̄de aban̄a ima mi: “Ima enyenyene anyanime onyụn̄ ọfọn ido. Ima ifịbeke ufụp, inamke inua, ikohokede idem, inamke ido eke mîdotke, iyomke ufọn idemesie, isọpke iyatesịt. Ibatke idiọk ibon. Idarake ukwan̄ido, edi adara se idide akpanikọ. Enye ememe kpukpru n̄kpọ, enenịm kpukpru n̄kpọ ke akpanikọ, ododori enyịn ke kpukpru n̄kpọ, ọyọyọ kpukpru n̄kpọ. Ima idibehe ifep tutu amama.” Ke ima ikọfiọk ke utọ ima emi esinam mme andida nnyịn usụn̄ ẹdọhọ nnyịn inam n̄kpọ, ndi nnyịn ikpọsọpke-sọp inam se ededi oro mmọ ẹdọhọde sia ifiọkde ke emi akam edi ke ufọn nnyịn? Kpukpru emi ẹwụt n̄ko nte Jehovah amade nnyịn.

¹¹ Kpa nte ekedide ke eyo mme apostle, mbon emi Jehovah adade ọnọ ikọt esie ndausụn̄ mfịn ifọnke ima. Jehovah okonyụn̄ ada mbon emi mîfọnke ima anam uduak esie ke eset. Noah ama ọkọn̄ ubom onyụn̄ ọkwọrọ ke Abasi ọmọn̄ osobo idiọk ererimbot eyo oro. (Gen. 6:13, 14, 22; 2 Pet. 2:5) Moses ke Jehovah ekemek ete ada ikọt imọ ọwọrọ ke Egypt. (Ex. 3:10) Kpa mbon emi mîfọnke ima ke Abasi akada ewet Bible. (2 Tim. 3:16; 2 Pet. 1:21) Mfịn n̄ko, Jehovah emek mbon emi mîfọnke ima ete ẹwụt nnyịn nte ikpọkwọrọde ikọ inyụn̄ inam mme owo ẹdi mbet Christ. Ndifiọk ke Jehovah ada mbon emi mîfọnke ima ọnọ nnyịn ndausụn̄ ikpanamke nnyịn ikere ke owo ada esop Abasi usụn̄. Edi akpakam ananam nnyịn inen̄ede ikụt ke mîkpedịghe Jehovah ada esop esie usụn̄, ke esop Abasi ikpekemeke ndinam ofụri se ẹnamde emi. Se ofụn emi anamde akpanikọ onyụn̄ enyenede ọniọn̄ anamde ke ediwak isua idahaemi—kpa ye afanikọn̄ ererimbot emi—owụt ke spirit Abasi ada ofụn emi usụn̄. Jehovah enen̄ede ọdiọn̄ ikpehe esop esie emi odude ke isọn̄ mfịn. Ntem, ẹyak inen̄ede inịm ke Abasi ada esop emi usụn̄ inyụn̄ inam se ededi oro ẹdọhọde nnyịn inam.

NTE IKPOWỤTDE KE IMENỊM KE ABASI ADA ESOP USỤN̄

¹² Didie ke mbon oro ẹnọde utom ẹnam ke esop ẹkpewụt ke imenịm ke Abasi ada esop esie usụn̄? Edi mmọ ndinyịme ndinam se ẹnọde mmọ nnyụn̄ nnam enye ke ofụri esịt. (Utom 20:28) Nnyịn imesisịn ifịk isan̄a ke ufọk ke ufọk ikwọrọ eti mbụk Obio Ubọn̄ Abasi, ifiak ikese mbon oro ikọkwọrọde ikọ inọ, inyụn̄ ikpep mmọ Bible. (Matt. 24:14; 28:19, 20) Imesitịm idem mbemiso idụkde mme mbono esop ye n̄kpri ye ikpọ mbono man kpukpru se ofụn emi anamde akpanikọ ekpepde etịm an̄wan̄a nnyịn. Ndisop idem ntem ye nditọete nnyịn esinen̄ede ọsọn̄ọ nnyịn idem, onyụn̄ ọsọn̄ọ mmọ n̄ko.—Heb. 10:24, 25.

¹³ Usụn̄ en̄wen emi iwụtde ke imenịm ke Abasi ada esop esie usụn̄ edi nditịp se inyenede nda n̄n̄wam esop Abasi. (N̄ke 3:9, 10) Ke ini n̄kpọ ọsọn̄de ye nditọete nnyịn, nnyịn imesisọp in̄wam mmọ. (Gal. 6:10; 1 Tim. 6:18) Isinam emi sia imade nditọete nnyịn. Ini ekededi oro n̄kpọ etịbede, nnyịn isibiatke ini ndinam se ikekeme ndiwụt Jehovah ke imama ofụri se enye ye esop esie ẹnamde ẹnọ nnyịn.—John 13:35.

¹⁴ Usụn̄ en̄wen oro iwụtde ke imenịm ke Abasi ada esop esie usụn̄ edi ndinyịme nnyụn̄ nnam se ẹbierede ke esop. Emi esịne ndisụhọde idem ntiene ndausụn̄ mbon emi esop Abasi ẹmekde ẹte ẹda nnyịn usụn̄, utọ nte mme esenyịn circuit ye mbiowo ke esop. Ana ikop uyo nditọete emi inyụn̄ isụk ibuot inọ mmọ sia mmọ ẹsịne ke otu mbon emi ‘ẹdade nnyịn usụn̄.’ (Heb. 13:7, 17) Idem ekpededi nnyịn inen̄ekede ifiọk ntak emi ẹdọhọde inam ndusụk n̄kpọ, imọfiọk ke edifọn ye nnyịn edieke inyịmede ndinam se ẹdọhọde. Emi esinam Jehovah ọdiọn̄ nnyịn sia ikopde uyo esie inyụn̄ isụkde ibuot inọ esop esie. Kpukpru emi ẹwụt ke imosụk ibuot inọ Jesus Christ emi edide Eteufọk nnyịn.

¹⁵ Imenyene ediwak ntak ndibuọt idem ye ofụn emi anamde akpanikọ onyụn̄ enyenede ọniọn̄. Satan, emi edide abasi ererimbot emi, ke anam ofụri se enye ekekeme man abiat enyịn̄ Jehovah ye enyịn̄ esop esie. (2 Cor. 4:4) Kûyak Satan ada n̄kari esie atap fi! (2 Cor. 2:11) Enye ọfiọk ke ibịghike ẹmọn̄ ẹkọbi imọ ke editụn̄ọ ukpe, ntre enye ke anam ofụri se enye ekekeme nditụn ata ediwak ikọt Jehovah usụn̄. (Edi. 12:12) Nte Satan osụk an̄wanade ekọn̄ ye ikọt Abasi, ẹyak kpukpru nnyịn itetịm isan̄a ikpere Jehovah. Ẹyak ibuọt idem ye Jehovah inyụn̄ ibuọt ye mbon emi enye adade ọnọ ikọt esie ndausụn̄ mfịn. Ndinam emi ayanam itetịm idiana kiet.