Ẹyedomo Mbuọtidem Christian
“Idịghe kpukpru owo ẹnyene mbuọtidem.”—2 THESSALONICA 3:2.
1. Didie ke mbụk owụt ete ke idịghe kpukpru owo ẹnyene ata mbuọtidem?
KE OFỤRI mbụk, irenowo, iban, ye nditọwọn̄ ẹmi ẹnyenede ata mbuọtidem ẹsidu. Nsan̄a ikọenyịn̄ oro “ata” odot koro ediwak miliọn mbon en̄wen ẹmewụt orụk mbuọtidem oro etiede nte abian̄a abian̄a mbuọtidem, mben̄eidem ndinịm n̄kpọ ke akpanikọ ye unana eti isọn̄ m̀mê ntak. Utọ mbuọtidem oro esiwak ndibuana mme nsunsu abasi m̀mê mme orụk utuakibuot oro mîdụhe ke n̄kemuyo ye Ata Ọkpọsọn̄, Jehovah, ye Ikọ esie oro ẹyararede. Apostle Paul ke ntem ekewet ete: “Idịghe kpukpru owo ẹnyene mbuọtidem.”—2 Thessalonica 3:2.
2. Ntak edide akpan n̄kpọ nte nnyịn idụn̄ọde mbuọtidem nnyịn?
2 Edi ikọ Paul owụt ete ke ini oro ndusụk owo ẹma ẹnyene ata mbuọtidem ndien, ke ndibuan, ndusụk owo mfịn ẹnyene. Ata ediwak ke otu mme andikot n̄wed emi ẹyom ndinyene nnyụn̄ n̄kọri utọ ata mbuọtidem oro—mbuọtidem ke n̄kemuyo ye nnennen ifiọk akpanikọ Abasi. (John 18:37; Mme Hebrew 11:6) Ndi oro edi ntre ye afo? Do oyom ete afo ọfiọk onyụn̄ eben̄e idem ọnọ akpanikọ oro nte ke ẹyedomo mbuọtidem fo. Ntak ẹkemede nditịn̄ oro?
3, 4. Ntak akpanade nnyịn ise Jesus kaban̄a mme udomo mbuọtidem?
3 Ana nnyịn inyịme ite ke Jesus Christ edi ata akpan owo ọnọ mbuọtidem nnyịn. Ke akpanikọ, Bible etịn̄ aban̄a enye nte Andinam mbuọtidem nnyịn ọfọn ama. Oro edi ke ntak se Jesus eketịn̄de onyụn̄ anamde, akpan akpan nte enye okosude prọfesi. Enye ama ọsọn̄ọ isọn̄ emi mme owo ẹkemede ndiwụk ata mbuọtidem. (Mme Hebrew 12:2; Ediyarade 1:1, 2) Edi, nnyịn ikot ite ke ẹma ‘ẹdomo Jesus ke kpukpru nde kpa nte nnyịn, edi inyeneke idiọkn̄kpọ.’ (Mme Hebrew 4:15) Ih, ẹma ẹdomo mbuọtidem Jesus. Ke edide ata isio ye edinam idem emem nnyịn m̀mê edisịn ndịk, oro ekpenyene ndidọn̄ nnyịn esịt.
4 Ebede ke ndiyọ ikpọ idomo idem tutu esịm n̄kpa ke eto, Jesus ama “ekpep nsụkibuot.” (Mme Hebrew 5:8) Enye ama ọsọn̄ọ ete ke mme owo ẹkeme ndida ata mbuọtidem ndu uwem kpa ye mme udomo ekededi oro ẹkemede ndisịm mmọ. Emi enen̄ede enyene se ọwọrọde ke ini ikerede iban̄a se Jesus eketịn̄de aban̄a mme anditiene enye: “Ẹti ikọ eke n̄ketịn̄de nnọ mbufo nte, Asan̄autom ikponke ikan eteufọk.” (John 15:20) Ke akpanikọ, kaban̄a mme anditiene enye ke eyo nnyịn, Jesus ama ebem iso etịn̄ ete: “Kpukpru mme idụt ẹyenyụn̄ ẹsua mbufo kaban̄a enyịn̄ Mi.”—Matthew 24:9.
5. Didie ke N̄wed Abasi owụt nte ke nnyịn iyosobo udomo?
5 Ke ntọn̄ọ ntọn̄ọ isua ikie emi, ikpe ama ọtọn̄ọ ke ufọk Abasi. N̄wed Abasi ama ebem iso etịn̄ ete: “Ekem ini nte ikpe editọn̄ọde ke ufọk Abasi; ndien edieke ikpe ọtọn̄ọde ye nnyịn, nso ididi utịt mmọ ẹmi mîsụkke ibuot inọ gospel Abasi? Ndien edieke ọsọn̄de etieti ndinen owo ndibọhọ, n̄kpọ editie didie ye mmọ ẹmi mîbakke Abasi ye moburobụt owo?”—1 Peter 4:17, 18.
Ẹdomo Mbuọtidem—Ntak-a?
6. Ntak emi mbuọtidem oro ẹma ẹkedomo edide ọsọn̄urua n̄kpọ?
6 Ke usụn̄ifiọk kiet, owo ifiọkke ekọmurua mbuọtidem oro owo mîdomoke, owo inyụn̄ ifiọkke uduot esie. Afo emekeme ndimen enye ndomo ye babru ubọ okụk ban̄k oro owo mîdaha ikọbọ okụk kan̄a. Eyedi afo ama ọbọ babru ubọ okụk ban̄k ke utom oro akanamde, ke mme n̄kpọurua oro akadade ọkọnọ, m̀mê idem nte enọ. Babru ubọ okụk ban̄k oro ekeme nditie nte ọfọn, edi ndi ọfọn? Ndi enye enen̄ede ekem ye ibatokụk oro ẹwetde? Ukem ntre, ana mbuọtidem nnyịn akan sụk editie enyọn̄ enyọn̄ m̀mê ikpîkpu editetịn̄. Ana ẹdomo enye edieke anade nnyịn iwụt ke enye enyene ufọn onyụn̄ edi ata uduot. Ke ini ẹdomode mbuọtidem nnyịn, nnyịn imekeme ndikụt nte ke enye okop odudu onyụn̄ enyene ufọn. Udomo ekeme n̄ko ndiyarade mme ikpehe ekededi oro mbuọtidem nnyịn oyomde edinam asana m̀mê edinam okop odudu.
7, 8. Mme udomo mbuọtidem nnyịn ẹsito m̀mọ̀n̄?
7 Abasi esiyak ukọbọ ye mme udomo mbuọtidem eken ẹsịm nnyịn. Nnyịn ikot ite: “Ke ini idomo iduọ esịmde owo, enye okûdọhọ ete, ke edi Abasi odomo imọ: koro idomo iduọ ikemeke ndisịm Abasi, Enye ke Idem Esie inyụn̄ idomoke owo man enye ọduọ.” (James 1:13) Anie m̀mê nso idi ntak mme orụk idomo oro? Edi Satan, ererimbot, ye anana-mfọnmma ikpọkidem nnyịn.
8 Nnyịn imekeme ndinyịme nte ke Satan enyene ọkpọsọn̄ odudu ke ererimbot, ke ekikere ye ke mme usụn̄ esie. (1 John 5:19) Onyụn̄ ekeme ndidi nnyịn imọfiọk ite ke enye esisịn nsọk ọnọ edikọbọ mme Christian. (Ediyarade 12:17) Edi ndi nnyịn imenịm kpasụk ntre ke akpanikọ nte ke Satan odomo nditụn nnyịn usụn̄ ebe ke ndidemede udọn̄ anana-mfọnmma ikpọkidem nnyịn, ofụn̄de nnyịn mme n̄kpọ etabi ererimbot ke iso, odoride enyịn ke nnyịn iyada n̄kpọ mbukpek oro, isọn̄ ibuot ye Abasi, inyụn̄ idi se Jehovah mînyịmeke? Nte ededi, mme usụn̄ edinam Satan ikpenyeneke ndikpa nnyịn idem, koro enye ama ada mme ukem usụn̄ oro ke ndin̄wana ndidomo Jesus.—Matthew 4:1-11.
9. Didie ke nnyịn ikeme ndibọ ufọn nto mme uwụtn̄kpọ mbuọtidem?
9 Ebede ke Ikọ esie ye esop Christian, Jehovah ọnọ nnyịn nti uwụtn̄kpọ mbuọtidem oro nnyịn ikemede ndikpebe. Paul eketeme ete: “Nditọete, kpukpru mbufo ẹdi mme andikpebe mi, ẹnyụn̄ ẹtịn̄ enyịn ẹse mmọ ẹmi ẹsan̄ade ke ido eke n̄wụtde mbufo.” (Philippi 3:17) Nte kiet ke otu mme asan̄autom Abasi oro ẹyetde aran ke akpa isua ikie, Paul ama ada iso ke ndinam mme utom mbuọtidem kpa ye ikpọ idomo oro enye okosobode. Ke utịt utịt ọyọhọ isua ikie 20, nnyịn inanake ukem uwụtn̄kpọ mbuọtidem oro. Mme ikọ eke Mme Hebrew 13:7 ẹnyene n̄kpọ ndinam ukem nte ekedide ke ini Paul ekewetde mmọ ete: “Ẹti mmọ ẹmi ẹkedade mbuot usụn̄, ẹmi ẹketịn̄de ikọ Abasi ẹnọ mbufo. Ẹtịm ẹse se uwem mmọ ọwọrọde ke akpatre, ẹnyụn̄ ẹkpebe mbuọtidem mmọ.”
10. Mme akpan uwụtn̄kpọ mbuọtidem ewe ke nnyịn inyene ke mme ini ndondo emi?
10 Item oro enyene akpan odudu ke ini nnyịn ikerede iban̄a se uwem nsụhọ oro ẹyetde aran ọwọrọde. Nnyịn imekeme ndikere mban̄a uwụtn̄kpọ mmọ inyụn̄ ikpebe mbuọtidem mmọ. Ẹmeda mme udomo ẹnam ata mbuọtidem mmọ asana. Itie nditọete Christian ofụri ererimbot ọmọkọri oto ke ekpri ntọn̄ọ ko ke edem ke iduọk isua 1870. Nte mbun̄wụm mbuọtidem ye ime mbon oro ẹyetde aran toto ke ini oro ka iso, se ibede Mme Ntiense Jehovah miliọn ition ye ubak idahaemi ke ẹkwọrọ ẹnyụn̄ ẹkpep mme owo ẹban̄a Obio Ubọn̄ Abasi. Esop ofụri ererimbot idahaemi eke mme ifịk ifịk andituak ibuot edi uyarade ọnọ mbuọtidem oro ẹma ẹkedomo.—Titus 2:14.
Ẹma Ẹdomo Mbuọtidem Ẹse Kaban̄a 1914
11. Didie ke 1914 ekedi n̄wọrọnda ọnọ C. T. Russell ye mme nsan̄a esie?
11 Ediwak isua mbemiso akpa ekọn̄ ererimbot asiaha, nsụhọ ẹma ẹtan̄a ẹte ke 1914 edidi n̄wọrọnda usenọfiọn̄ ke prọfesi Bible. Nte ededi, ndusụk idotenyịn mmọ ikekemke ini, ndien ekikere mmọ kaban̄a se iditịbede ikenen̄ekede inen. Ke uwụtn̄kpọ, C. T. Russell, akpa etieibuot Watch Tower Society, ye mme nsan̄a esie ẹma ẹkeme ndikụt nte ke ama oyom ekese utom ukwọrọikọ. Mmọ ẹkekot ẹte: “Ẹyekwọrọ gospel obio ubọn̄ emi ke ofụri ererimbot nte ntiense ẹnọ kpukpru mme idụt; ndien adan̄aoro ke utịt edidi.” (Matthew 24:14, King James Version) Nte ededi, didie ke ukeuke ekpri otu mmọ ẹkpekekeme ndinam oro?
12. Didie ke kiet ke otu mme nsan̄a Russell akanam n̄kpọ aban̄a akpanikọ Bible?
12 Kere ban̄a nte emi okotụkde A. H. Macmillan, nsan̄a Russell. Amanade ke Canada, Macmillan ikọyọhọke kan̄a isua 20 ke ini enye ọkọbọde n̄wed Russell oro The Plan of the Ages (1886). (N̄wed emi, ẹkekotde n̄ko The Divine Plan of the Ages, ama akabade edi Eboho 1 ke otu Studies in the Scriptures oro ẹkesuande ntatara ntatara. Eboho 2, The Time Is at Hand [1889], ama anyan ubọk owụt 1914 nte utịt “ini mme Gentile.” [Luke 21:24, KJ]) Ke okoneyo oro Macmillan ọkọtọn̄ọde ndikot, enye ama ekere ete: “Nte ededi, oro etie nte akpanikọ!” Ke ndaeyo eke 1900, enye ama osobo ye Russell ke mbono Nditọ Ukpepn̄kpọ Bible, nte ẹkekotde Mme Ntiense Jehovah ini oro. Ikebịghike Macmillan ama ana baptism onyụn̄ ọtọn̄ọ ndinam utom ye Brọda Russell ke ibuot itieutom N̄ka ke New York.
13. Nso mfịna ke Macmillan ye mbon eken ẹkekụt kaban̄a edisu Matthew 24:14?
13 Ọkọn̄ọde ke edikot oro mmọ ẹkekotde Bible, mme Christian oro ẹyetde aran ẹma ẹnyan ubọk ẹwụt 1914 nte ini ukpụhọde ke uduak Abasi. Edi Macmillan ye mbon eken ẹma ẹyịk nte ẹdikemede ndikwọrọ ikọ nnọ mme idụt oro ẹkebemde iso ẹtịn̄ ke Matthew 24:14 ke ibio ini oro okosụhọde. Ke ukperedem enye ama ọdọhọ ete: “Mmeti nnemede oro ye Brọda Russell ndien ndien, ndien enye ọyọdọhọ ete, ‘Nte ededi, eyenete, mi ke New York mme Jew ẹwak ẹkan nte edide ke Jerusalem. Mbon Ireland ẹwak mi ẹkan nte edide ke Dublin. Mbon Italy ẹnyụn̄ ẹwak mi ẹkan nte edide ke Rome. Ke emi edieke nnyịn isobode mmọ mi, oro edidi ndida etop oro nsịm mme idụt.’ Edi iketiehe nte oro ama oyụhọ ekikere nnyịn. Ntre ekem ima ikere iban̄a ‘Photo-Drama.’”
14. Mbemiso 1914, nso n̄wọrọnda utom ke ẹkenam?
14 Nso ndyọ ndyọ obufa nsiondi ke “Photo-Drama of Creation” ekedi ntem! Enye akabuan mme ndise ẹmi ẹnamde-nam n̄kpọ ẹwụt ye enyene-uduot ndise slide akrasi, ẹnamde asan̄a kiet ye mme utịn̄ikọ Bible ye ikwọ ke usanikwọ. Ke 1913, Enyọn̄-Ukpeme (Ikọmbakara) ama etịn̄ aban̄a mbono ke Arkansas, U.S.A. ete: “Ẹma ẹnyịme ye esịt kiet ẹte ke ini ama ekem ndida mme ndise ẹmi ẹnamde-nam n̄kpọ ẹwụt n̄kpep mme akpanikọ Bible. . . . [Russell] ama anam an̄wan̄a nte ke imọ ke ikanam n̄kpọ iban̄a ndutịm emi ke isua ita ndien nte ke emi ke imenyene se ikperede ndiye ndise ikie, ẹmi nte eyịghe mîdụhe ẹdidemede udọn̄ akwa udịm owo onyụn̄ atan̄a Gospel, onyụn̄ an̄wam mbon an̄wa ẹfiak ẹdinyene mbuọtidem ke Abasi.”
15. Mme orụk utịp ewe ke “Photo-Drama” ekenyene?
15 “Photo-Drama” ama anam kpa oro ke ẹma ẹkewụt enye ke akpa ini ke January 1914. Se itienede emi ẹdi mme ntọt ẹtode Enyọn̄-Ukpeme (Ikọmbakara) eke 1914:
April 1: “Asan̄autom kiet, ke ama ekese ikpehe iba, ama ọdọhọ ete, ‘Nse sụk mbahade iba eke PHOTO-DRAMA OF CREATION, edi kan̄a ke emi mmekpep ekese n̄kpọ ke Bible nto enye n̄kan ukpepn̄kpọ eke isua ita ke ufọkn̄wed ukpep mme ukpepn̄kpọ ido ukpono.’ Ke owo Jew kiet ama ekese enye ama ọdọhọ ete, ‘Nnyọn̄ nte ata owo Jew n̄kan nte n̄kedide.’ Ediwak mme oku Catholic ye mme nun ẹma ẹka ẹkese DRAMA oro ẹnyụn̄ ẹwụt akwa esịtekọm. . . . Otu duopeba kpọt eke DRAMA oro ke ẹnam ẹma kan̄a . . . Edi nnyịn imesesịm inyụn̄ iwụt ikpọ obio edịp ye duopekiet . . . Se iwakde ibe owo tọsịn edịp ye efụt ke ẹse, ẹkop, ẹma, ẹkere ẹnyụn̄ ẹdi se ẹdiọn̄de ke usen kiet kiet.”
June 15: “Mme ndise ẹmi ẹnam ntịm nnyene ifịk ndisuan Akpanikọ, ẹmenyụn̄ ẹnam ima oro mmade Ete eke Heaven ye edima Akpaneka nnyịn Jesus ọkọri. Mmesibọn̄ akam kpukpru usen mben̄e uwak edidiọn̄ Abasi nnọ PHOTO-DRAMA OF CREATION ye kpukpru mbon oro ẹbuanade ke ndiwụt enye . . . Ami ndi asan̄autom mbufo ke Enye, F. W. KNOCHE.—Iowa.”
July 15: “Nnyịn imokop inemesịt ndifiọk utịbe utịbe eti utịp oro ndise ẹmi ẹnyenede ke obio emi, ndien nnyịn imetịm inịm ite ke ẹda n̄ko ikọ ntiense emi ẹnọde ererimbot mi ẹtan̄ ediwak owo ẹbok ẹmi ẹnọde uyarade ke mmimọ idi n̄kpọuto ẹmi Ọbọn̄ ke idemesie emekde. Nnyịn imọfiọk ediwak ifịk ifịk nditọ ukpepn̄kpọ Bible ẹmi ẹbuanade idahaemi ye Otu mi nte utịp utom Photo-Drama. . . . Eyenete mbufo an̄wan ke Ọbọn̄, EMMA L. BRICKER.”
November 15: “Nnyịn imetịm inịm ite ke mbufo ẹyedat esịt ndikop mban̄a ata eti ikọ ntiense ẹdade PHOTO-DRAMA OF CREATION ẹnọ ke The London Opera House, Kingsway. Ubọk ndausụn̄ Ọbọn̄ owụt idem utịbe utịbe ke kpukpru n̄kpọ oro ẹnamde ndiwụt ndise emi tutu nditọete ẹdat esịt akamba akamba . . . Mme owo ke kpukpru idaha ye kpukpru orụk ẹkenam mme otuowo nnyịn; nnyịn ima ikụt ediwak mme ọkwọrọ ederi ẹmi ẹkedụkde. Ọkwọrọ ederi kiet . . . ama eben̄e tiket man imọ ye n̄wan imọ ikpafiak idise. Etubom Ufọkabasi England ama edise DRAMA emi ediwak ini, ndien . . . amada ediwak ufan esie edi ẹdise. Bishop iba ẹmedụk n̄ko, ye ediwak owo ẹmi ẹnyenede udorienyịn̄.”
December 1: “Ami ye n̄wan mi imenen̄ede ikọm Ete nnyịn eke Heaven iban̄a akwa ye ọsọn̄urua edidiọn̄ emi edide ebịne nnyịn ebe ke n̄kpọutom fo. Enye ekedi ediye PHOTO-DRAMA fo emi ekedide ntak emi nnyịn ikokụtde inyụn̄ inyịmede Akpanikọ . . . Nnyịn imenyene eboho itiokiet eke STUDIES IN THE SCRIPTURES fo. Mmọ ẹdi akwa n̄kpọ un̄wam.”
Nte Ẹkenamde N̄kpọ Ẹban̄a Mme Udomo Ini Oro
16. Ntak emi 1914 akadade udomo mbuọtidem edi?
16 Nso, ndien, ke ini mme Christian oro ẹnyenede esịt akpanikọ ntre ẹkekụtde ẹte ke idotenyịn mmimọ ndidiana ye Ọbọn̄ ke 1914 ikosụho? Mbon oro ẹyetde aran do ẹma ẹsobo anana-mbiet ini udomo. Enyọn̄-Ukpeme (Ikọmbakara) eke November 1, 1914, ọkọdọhọ ete: “Ẹyak nnyịn iti ite ke idu ke ini udomo.” Kaban̄a emi, Jehovah’s Witnesses—Proclaimers of God’s Kingdom (1993) ọdọhọ ete: “Mme isua ọtọn̄ọde ke 1914 esịm 1918 ke akpanikọ ẹkedi ‘ini udomo’ ọnọ Nditọ Ukpepn̄kpọ Bible.” Nte mmọ ẹma ẹnyịme ẹnam mbuọtidem mmọ asana ẹnyụn̄ ẹnen̄ede ekikere mmọ man mmọ ẹkpekeme ndinam akwa utom oro okodude ke iso?
17. Didie ke mme anam-akpanikọ mbon oro ẹyetde aran ẹkenam n̄kpọ ẹban̄a edidu ke isọn̄ mbe 1914?
17 Enyọn̄-Ukpeme (Ikọmbakara) eke September 1, 1916, ọkọdọhọ ete: “Nnyịn ikekere ite ke utom Idọk eke editan̄ Ufọkabasi [mbon oro ẹyetde aran] mbok oyokụre mbemiso utịt Ini Mme Gentile; edi owo iketịn̄ke oro nnennen ke Bible. . . . Ndi nnyịn imatua n̄kpọfiọk nte ke utom Idọk ke osụk akaka iso? . . . Edu nnyịn idahaemi, ndima nditọete, ekpedi eke akwa esịtekọm inyenede inọ Abasi, eke esịtekọm oro ọkọride-kọri kaban̄a ediye Akpanikọ emi Enye ọnọde nnyịn ifet ndikụt nnyụn̄ mfiọk, ye ifịk oro ọkọride-kọri ke ndin̄wam ndimen Akpanikọ oro n̄wụt mbon en̄wen.” Ẹma ẹsịn mbuọtidem mmọ ke udomo, edi mmọ ẹma ẹsobo udomo oro ẹnyụn̄ ẹkan enye uforo uforo. Edi nnyịn mme Christian ikpenyene ndifiọk nte ke mme udomo mbuọtidem ẹkeme ndiwak ẹnyụn̄ ẹdi nsio nsio.
18, 19. Mme udomo mbuọtidem ewe efen ẹketiene ikọt Abasi ke mîbịghike nte Brọda Russell akakpa?
18 Ke uwụtn̄kpọ, orụk udomo efen ama esịm nsụhọ esisịt ini ke Brọda Charles T. Russell ama akakpa. Oro ekedi udomo ima nsọn̄ọnda ye mbuọtidem mmọ. Anie ekedi “asan̄autom emi anamde akpanikọ” eke Matthew 24:45? Ndusụk owo ẹkekere ẹte ke ekedi Brọda Russell ke idemesie, mmọ ẹma ẹnyụn̄ ẹsịn ndidiana ye mbufa ndutịm esop. Edieke enye ekedide asan̄autom oro, nso ke nditọete ẹkenyene ndinam ke oro enye ama akakpa do? Nte mmọ ẹkpenyene nditiene obufa owo oro ẹmekde, mîdịghe ndi ini ekedi emi ndifiọk nte ke Jehovah ikadaha owo kiet kpọt, edi ke akada ofụri otu mme Christian nte n̄kpọutom, m̀mê otu asan̄autom?
19 Udomo efen efen ama esịm mme ata Christian ke 1918 ke ini mme ukara ererimbot, ke ẹdide se mme ọkwọrọ ederi Christendom ẹnụkde, ‘ẹkebotde ibak ke ibet’ ndibiọn̄ọ esop Jehovah. (Psalm 94:20, KJ) Ẹma ẹda afai afai ukọbọ ẹtiene Nditọ Ukpepn̄kpọ Bible ke Edem Edere America ye ke Europe. Ubiọn̄ọ oro mme ọkwọrọ ederi ẹkenọde odudu ama esịm etịn̄e ke May 7, 1918, ke ini akwa ukara United States ọkọnọde odudu ete ẹmụm J. F. Rutherford ye ndusụk n̄kpet n̄kpet nsan̄a esie, esịnede A. H. Macmillan. Ẹma ẹdori mmọ ikọ ke nsu ẹte ke ẹsọn̄ ibuot ye ukara, ukara ama onyụn̄ esịn n̄kpeubọk mmọ nte ke mmimọ iduehe.
20, 21. Nte ẹkebemde iso ẹtịn̄ ke Malachi 3:1-3, nso utom ke ẹkenam ke otu mbon oro ẹyetde aran?
20 Okposụkedi owo mîkọfiọkke ntre ke ini oro, utom edinam asana ama ọtọn̄ọ, nte ẹbụkde ke Malachi 3:1-3: “Anie owo ekeme ndida ke ini enye ayararede idem esie? Koro [isụn̄utom ediomi] ebietde ikan̄ usọ-gold, onyụn̄ ebiet [suọp] mme ọdiọn̄-ọfọn̄: enye onyụn̄ etie etem silver onyụn̄ anam asana: onyụn̄ anam nditọ Levi ẹsana, onyụn̄ ọdiọn̄ mmọ nte gold ye silver, man mmọ ẹwa uwa ẹnọ Jehovah nte enende.”
21 Nte Ekọn̄ Ererimbot I akasan̄ade ekpere utịt, ndusụk Nditọ Ukpepn̄kpọ Bible ẹma ẹsobo udomo mbuọtidem efen—m̀mê mmọ ẹyesọn̄ọ ẹmụm in̄wan̄în̄wan̄ edida san̄asan̄a ke mme mbubehe ekọn̄ ererimbot ẹkama. (John 17:16; 18:36) Ndusụk ikomụmke ikama. Ntre ke 1918, Jehovah ama ọdọn̄ “angel ediomi,” kpa Christ Jesus, utom ke ndutịm temple eke spirit Esie ete anam ekpri otu mme andituak ibuot nnọ Enye ẹsana ẹbọhọ nduduọhọ ererimbot. Mbon oro ẹkewụtde ata mbuọtidem ẹma ẹkpep n̄kpọ ẹto ifiọk n̄kpọntịbe oro ẹnyụn̄ ẹka iso iso, ẹkade iso ndikwọrọ ikọ ifịk ifịk.
22. Kaban̄a mme udomo mbuọtidem, nso isụhọ ndikere mban̄a?
22 Se nnyịn inemede idịghe sụk ikpîkpu udọn̄ ẹnyenede ke mbụk. Enye enyene ebuana nnennen nnennen ye idaha eke spirit esop Jehovah ofụri ererimbot idahaemi. Edi ẹyak nnyịn ke ibuotikọ oro etienede idụn̄ọde ndusụk udomo mbuọtidem oro ikọt Abasi ẹsobode mfịn inyụn̄ ise nte nnyịn ikemede ndikan mmọ uforo uforo.
Nte Afo Emeti?
◻ Ntak emi ikọt Jehovah ẹkpedoride enyịn nte ke ẹyedomo mbuọtidem mmimọ?
◻ Mme orụk ukeme ewe ke ẹkesịn ndisuan etop Abasi mbemiso 1914?
◻ Nso ikedi “Photo-Drama,” ndien nso mme utịp ke enye akada edi?
◻ Didie ke mme n̄kpọntịbe iduọk ini 1914-1918 ẹkesịn mbon oro ẹyetde aran ke udomo?
[Ndise ke page 12]
Ke ekperede utịt isua ikie oro, mme owo ke ediwak idụt ke ẹkekpep Bible ye un̄wam udịm udịm “Millennial Dawn,” ke ukperedem ẹkekotde “Studies in the Scriptures”
[Ndise ke page 13]
Leta otode C. T. Russell asan̄ade ye ntọn̄ọikọ ndimụm nsịn ke usanikwọ emi enye ọkọdọhọde ete: “Ẹwụt ‘Photo-Drama of Creation’ ke ubọk IBSA—International Bible Students Association. Uduak esie edi an̄wan̄wa ukpep ke mme afan̄ ido ukpono ye ifiọk ntaifiọk, ye ke ndida nnọ Bible”
[Ndise ke page 15]
Demetrius Papageorge ama anam isan̄ owụtde “Photo-Drama of Creation.” Ekem, ẹma ẹsịn enye ke ufọk-n̄kpọkọbi ke ntak edida san̄asan̄a Christian esie