Ẹtan̄a Enyịn̄ Jehovah An̄wan̄wa
“Yak nnyịn iwa uwa ekọm inọ Abasi kpukpru ini . . . kpa mfri n̄kpọkinua eke ẹkponode enyịn̄ Esie.”—MME HEBREW 13:15.
1. Prọfet Hosea akakpak ekemmọ nditọ Israel ndinam nso?
HOSEA prọfet Jehovah ama enyene akpan etop ndinọ ekemmọ nditọ Israel. Ke ọyọhọ isua ikie itiaita mbemiso Eyo Nnyịn, enye ama ọnọ mme ọsọn̄ibuot mbon eyo esie item ete ẹkabade esịt. Enye ama akpak ete: “Mbufo ẹmen ikọ mbufo ẹfiak ẹtiene Jehovah: ẹdọhọ enye, ẹte, Men kpukpru idiọkn̄kpọ fep, nyụn̄ da eti: ndien nnyịn iyenọ fi uwa n̄kpọkinua nnyịn.” (Hosea 14:2) Ke ndikpak mme owo ẹnọ Jehovah ‘uwa n̄kpọkinua mmọ,’ prọfesi Hosea ekesịn udọn̄ ọnọ nditọ Israel ndikabade esịt nnyụn̄ nnọ Abasi mme uwa itoro esịt akpanikọ.
2. Nso orụk uwa ke apostle Paul ekesịn udọn̄ ọnọ mme Christian ndiwa?
2 Mme Ntiense Jehovah ẹsiwa ‘uwa n̄kpọkinua mmọ’ mfịn. Mmọ n̄ko ẹsinam item apostle Paul, emi eketịn̄de aban̄a mme ikọ oro ke prọfesi Hosea ke ini enye ekewetde ete: “Yak nnyịn iwa uwa ekọm inọ Abasi kpukpru ini ke enyịn̄ Jesus [Christ], kpa mfri n̄kpọkinua eke ẹkponode enyịn̄ Esie.” (Mme Hebrew 13:15) Ntem, mme asan̄autom Abasi ẹsitoro Jehovah ye idatesịt, nte ke utom edikwọrọ Obio Ubọn̄ mmọ.—Matthew 24:14.
3. Didie ke nnyịn ikeme ndiwa “uwa ekọm” nnọ Jehovah, ndien utom mmanie ke nnyịn ididụn̄ọde kemi?
3 Nditan̄a enyịn̄ Jehovah an̄wan̄wa edi ifet oro mme anana mfọnmma owo mîdotke ndinyene. Nnyịn ikop inemesịt didie ntem ndisian mmọ en̄wen mban̄a Abasi nnyịn, ke ntem iwade “uwa ekọm,” kpa “uwa n̄kpọkinua nnyịn” inọ Jehovah! Man nnyịn inyene nsịnudọn̄ ke ndikwọrọ eti mbụk Obio Ubọn̄ an̄wan̄wa mfịn, ẹyak nnyịn idụn̄ọde se Bible asiande nnyịn aban̄a mme prọfet Abasi ye mme asan̄autom Jehovah eken. Ebede ke usụn̄uwem mmọ, nnyịn imekeme ndikpep ekese n̄kpọ oro ẹdin̄wamde nnyịn ndidara utom ukwọrọikọ nnyịn.—Rome 15:4.
Udeme Mme Prọfet
4, 5. (a) Ke akpasarade usem Bible, nso ke mme ikọ oro ẹkabarede “prọfet” ẹnen̄ede ẹwọrọ? (b) Nso iwụt ke mme prọfet ẹma ẹnyene akpan udeme ke ndutịm Abasi?
4 Mme prọfet Jehovah ẹma ẹnyene ifet nditan̄a etop esie an̄wan̄wa. Ikọ Hebrew oro adade ọnọ “prọfet” (na·viʼʹ) inyeneke ntọn̄ọ oro ẹfiọkde, edi nte ẹdade enye ke Bible owụt ke mme ata prọfet ẹkedi mme etịn̄ikọ ke ibuot Jehovah, ikọt Abasi oro ẹnyenede mme etop eke odudu spirit ndinọ. Ikọ Greek oro ẹkabarede “prọfet” (pro·pheʹtes) ke ataata usụn̄ ọwọrọ “etịn̄ikọ uko uko,” nditịn̄ ikọ “ke iso” owo. Prọfet edi owo emi atan̄ade etop oro otode Abasi. Ediwak ini, edi idịghe kpukpru ini, mme ata prọfet Abasi ẹma ẹsibem iso ẹtịn̄ mme n̄kpọntịbe ini iso.
5 Kaban̄a akpan udeme oro mme prọfet ẹkenyenede ke ndutịm Abasi, Cyclopædia eke M’Clintock ye Strong ọdọhọ ete: “Ndusụk ini ẹma ẹsibụp ẹyom item mmọ . . . Edi ke ata ekese idaha mmọ ke idemmọ ẹma ẹsikop nte onụkde mmọ ke esịtidem nditịn̄ ikọ nnọ mme owo ye unana owo ndibụp mmọ nyom item, ndien ndịk ikanamke mmọ nditịn̄ ikọ uko uko ye iwụk ke mme ebiet emi edidu mmọ, ndusụk, akadade ifụtesịt ye oyomonsia edi.” (Eboho VIII, page 640) Kere ban̄a ndusụk uwụtn̄kpọ ẹban̄ade se ikonụkde mme prọfet oro ndinyene utọ uko uko idaha oro.
Mme Ntụk ye Uduak
6, 7. Nso ke Jehovah ọkọnọ Ezekiel prọfet esie adia, ndien nso utịp ke emi ekenyene?
6 Mbemiso nsobo Jerusalem ke 607 M.E.N., Jehovah ama etịn̄ ikọ ọnọ mme Jew oro ẹkedude ke ntan̄mfep ke Babylon ebe ke Ezekiel prọfet esie. Jehovah ọkọdọhọ enye ete: “Eyen owo, dia se afo okụtde; dia ikpan̄wed emi, ndien ka ketịn̄ nọ ufọk Israel.” Ezekiel ama anam ntre. Enye ọkọdọhọ ete: “Ndien ntat inua mi, ndien enye anam mi ndia ikpan̄wed oro. Ndien enye ọdọhọ mi, ete, Eyen owo, nam idịbi fo adia ikpan̄wed emi ami nnọde fi, nyụn̄ sịn enye ke nsia fo yọhọ. Ndien ami ndia, ndien n̄wed akabade enịn̄e mi ke inua nte aran ọkwọk.”—Ezekiel 3:1-3.
7 Idem nnyịn esikot mme n̄kpọ oro ẹnọde owo nsọn̄idem osio ke udia oro nnyịn idiade, ndien mme n̄kpọ ẹmi ke ndusụk usụn̄ ẹsikabade ẹdi ubak idem nnyịn. Ukem ntre, “ikpan̄wed” oro Ezekiel akadiade—etop Jehovah emi prọfet oro ekenyenede nditan̄a—ekenyene ndikabade ndi ubak idem esie, otụkde mme ntụk esie. Ikọ Abasi ẹma ẹtịm ẹdemede mme ntụk esịtidem Ezekiel tutu editan̄a mmọ an̄wan̄wa ekedi n̄kpọ inemesịt ọnọ enye. Edieke afo edide Ntiense Jehovah, nte afo emesikop inemesịt nditan̄a etop Abasi an̄wan̄wa?
8, 9. Nso ikonụk Amos nditịn̄ prọfesi?
8 Kere, n̄ko, ban̄a prọfet Amos. Ke odude uwem ke ọyọhọ isua ikie usụkkiet M.E.N., enye okodu ke otu mme akpa prọfet Hebrew oro ekewetde n̄wed Bible oro ẹkekotde ẹdian enyịn̄ esie. Ukem nte Ezekiel, Amos ekedi ata anditan̄a ikọ Jehovah. Kamse, ikọ oro, “Jehovah ọdọhọ” odu utịm ike 11 ke ofụri n̄wed oro ekerede enyịn̄ esie! (Amos 1:3, 6, 9, 11, 13; 2:1, 4, 6; 3:12; 5:4; 7:17) Amos ama okụt ke oyom imọ itan̄a ikọ Abasi an̄wan̄wa.
9 Nte prọfet Abasi, Amos ama anam n̄kpọ aban̄a ntọt oro Abasi ọnọde ebe ke ndinam n̄kpọ ye unana ubiatini. Ebede ke Amos, Abasi ama ọdọhọ ete: “Lion okụni, anie mîdidịgheke? Ọbọn̄ Jehovah ọdọhọ, anie mîditịn̄ke prọfesi?” (Amos 3:8) Ẹma ẹdemede prọfet oro nte n̄kpọ mîkemeke ndibiọn̄ọ nditan̄a etop Jehovah.
10. Didie ke mme asan̄autom Jehovah eyomfịn ẹsinam n̄kpọ ke ini ẹbiọn̄ọde utom ukwọrọikọ mmọ?
10 Ke usụn̄ ebietde lion Jehovah ofiori mme etop ubiereikpe odori idiọk editịm n̄kpọ ererimbot oro odude kemi ke idem. Ukem nte Amos, onụk mme asan̄autom Jehovah eyomfịn nditan̄a ikọ Abasi an̄wan̄wa. Idem ke ini mme andibiọn̄ọ ẹdịghede, mmọ ẹtiene uwụtn̄kpọ apostle Peter ye John, ẹmi ẹketan̄ade uko uko ẹte: “Nnyịn [ikemeke] nditre nditịn̄ se ikokụtde inyụn̄ ikopde.” Mme apostle oro ẹma ẹsọn̄ọ n̄ko ẹte: “Nnyịn inyene ndikop uyo Abasi n̄kan uyo owo.” (Utom 4:20; 5:29) Nso, ndien, kaban̄a nnyịn? Edi eti n̄kpọ ndidụn̄ọde mme ekikere nnyịn kaban̄a editan̄a enyịn̄ Jehovah an̄wan̄wa.
“Oto ke Uyọhọ Esịt”
11. Nso ikponụk nnyịn ndisịn ifịk ke nditan̄a enyịn̄ Jehovah an̄wan̄wa?
11 Eyịghe ndomokiet ikemeke ndidu nte ke mme prọfet Jehovah ẹma ẹkop inemesịt ke mme ifet oro mmọ ẹkenyenede. Ukem esịtekọm oro ẹnyenede ẹnọ Jehovah do ekpenyene ndinụk nnyịn nditan̄a enyịn̄ esie an̄wan̄wa. Psalm 145:1, 2 ọdọhọ ete: “Nyekpono fi, O Abasi mi, edidem; nnyụn̄ n̄kọm enyịn̄ fo ke nsinsi. Nyekọm fi ke kpukpru usen; nnyụn̄ ntoro enyịn̄ fo ke nsinsi nsinsi.” Ndi mme ikọ oro ẹwụt edu fo? Ukpepn̄kpọ Bible ofụri ini esin̄wam nnyịn ndinam esịtekọm nnyịn otụn̄ọ ke se Jehovah akanamde, osụk anamde, edinyụn̄ anamde ọnọ nnyịn. Ndien ke ini nnyịn ikpepde Bible ọtọkiet nte ubon, nte nnyịn isikwe ite ke Ikọ Abasi enyene odudu, anamde nnyịn iyom nditịn̄ mban̄a enye ye mme uduak esie? (Mme Hebrew 4:12) Man ikụt unen ke editan̄a enyịn̄ Jehovah an̄wan̄wa, oyom nnyịn n̄ko ida mme n̄wed Christian oro Jehovah Abasi ọnọde ebe ke “asan̄autom emi anamde akpanikọ, onyụn̄ enyenede ọniọn̄” emi ẹyetde aran inam n̄kpọ ọyọhọ ọyọhọ.—Matthew 24:45-47.
12. Didie ke mme mbonoesop Christian ye editie n̄kere ẹkeme ndin̄wam nnyịn ndinam an̄wan̄wa editan̄a?
12 Edieke anade itoro Jehovah ke ntak esịtekọm, oyom nnyịn idụk mme mbonoesop Christian kpukpru ini. Kpukpru ikọt Jehovah ẹkpenyene ndinam item apostle Paul emi: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọkiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Nte afo emesidụk mme mbonoesop Christian kpukpru ini? Nte afo emesiwak nditịn̄ mban̄a mme akpanikọ N̄wed Abasi, nti ifiọkutom, ye mme aduai-owo idem mbụk aban̄ade editat utom ukara Abasi oro afo esikopde ke mme mbonoesop ikọt Abasi? Edieke afo esimen̄ede nditịn̄ se ọfiọkde aban̄a Jehovah ye mme uduak esie, yak ini odu ọnọ editie n̄kere Ikọ esie man mme ekikere esie ẹsụhọde ẹdụk fi esịt ntotụn̄ọ ntotụn̄ọ. (Psalm 77:12; 143:5) Ih, mme mbonoesop Christian ye editie n̄kere Ikọ Abasi kpukpru ini ẹkpenyene ndin̄wam fi ndiwụt esịtekọm mban̄a utịbe utịbe ifet editan̄a enyịn̄ Jehovah an̄wan̄wa.
13. Didie ke nnyịn ‘ision̄o se ifọnde’ ito esịt nnyịn?
13 Ye esịt ọyọhọde ye ekọm ẹnyenede ẹnọ Jehovah, nnyịn ision̄o nti n̄kpọ idi. Jesus ọkọdọhọ ete: “Eti owo osion̄o se ifọnde ke nti n̄kpọ eke enye okobonde ke esịt esie; idiọkowo onyụn̄ osion̄o se idiọkde ke mme idiọkn̄kpọ eke enye okobonde ke esịt esie; koro oto ke uyọhọ esịt ndien inua etịn̄.” (Luke 6:45) Ewe usụn̄ oro ọfọnde akan odu ‘ndision̄o se ifọnde’ akan nditan̄a enyịn̄ Jehovah an̄wan̄wa nnyụn̄ ntịn̄ mban̄a mme uduak esie nnọ mme mbọhọidụn̄ nnyịn, iman nnyịn—ke akpanikọ, nnọ kpukpru owo oro nnyịn isobode?
Mme Utịp An̄wan̄wa Editan̄a
14. (a) Nso ke anditan̄a ye andikop etop Obio Ubọn̄ ẹkeme ndinyene? (b) Nso ke ẹnam ebe ke utom edikwọrọ Obio Ubọn̄?
14 Mme prọfet Abasi ẹma ẹsikop idatesịt ke utom mmọ, ndien se mmọ ẹketịn̄de ẹma ẹda ufọn ẹsọk mme andikop oro ẹkenyịmede. Kpasụk ntre, an̄wan̄wa editan̄a etop Obio Ubọn̄ esida akwa idatesịt ọsọk mme anditan̄a enye. (Utom 20:35) Ndien emi esida ufọn ọsọk mme andikop oro ẹwụtde esịtekọm didie ntem! Ndinyịme eti mbụk esin̄wam mme owo ndikan mfụhọ m̀mê ndiyọ enye. Mbon oro owo mmọ akpade ẹsikop idatesịt ke idotenyịn ediset ke n̄kpa. Mbon oro ẹnyenede mbumehe ẹsiwọrọ ke ufụn nicotine, heroin, ye mme ibọk eken oro ẹnọde owo mbumehe. Anam ediwak owo ẹnyene n̄kokon̄ idaha ke n̄kan̄ ido uwem, ndien kpukpru owo oro ẹnyịmede akpanikọ Bible ẹsinyene ubọhọ ke n̄kan̄ eke spirit. (John 5:28, 29; 8:32) Editan̄a Obio Ubọn̄ nte n̄kukụre idotenyịn ubonowo anam n̄kpọ nditọt mme idiọkowo n̄ko, ke adan̄aemi enyenede idara idara utịp ke idem mbon nti esịt. Ntem ke ẹbahade mme owo ẹnọ “nsinsi edisịbe mfep” m̀mê “nsinsi uwem” ke ini ebierede ikpe Abasi ẹnọ idiọk ererimbot emi. (Matthew 24:14, NW; 25:31-46; Ezekiel 33:1-9; 1 Timothy 2:3, 4) Utom ukwọrọikọ nnyịn edi edinam unyan̄a uwem oro mînyeneke mbiet, n̄kponn̄kan ye ntara-n̄kan an̄wan̄wa editan̄a oro akanam ẹnamde ke isọn̄!
15. Nso ke ẹkeme ndinam ndin̄wam mbon oro ẹdidide mbon oro ẹdotde ke efakutom unọ ikọ ntiense nnyịn?
15 Nte Mme Ntiense Jehovah eyomfịn, nnyịn isan̄a utom inọ Ete nnyịn eke heaven ke idatesịt ye n̄kopitem. (Rome 12:11) Ke ntre, nnyịn imokop inemesịt ndisio ini nnịm kpukpru ini nnọ edibuana ke utom edikwọrọ eti mbụk an̄wan̄wa ye ke ufọk ke ufọk. (Utom 5:42; 20:20) Ibatutom ofụri ererimbot ẹwụt ẹte ke ndusụk mbon oro ẹdotde ke ẹsụk ẹdodu ke mme efakutom nnyịn. Nte mme idaha ke ererimbot ẹkpụhọrede, emi otụk mme owo ke nsio nsio usụn̄. Ediwak owo ke unana idotenyịn ẹmekabade ẹdi mbon oro ẹyomde ubọhọ, mme odudụn̄ ke esenidụt. Eyedi ndusụk mmọemi ẹdu ke efakutom unọ ikọ ntiense nnyịn. Ke edide ntre, ẹyak nnyịn inam se ikekeme ndin̄wam mmọ ke n̄kan̄ eke spirit nte nnyịn ikọbọde ke “edisana utom eti mbụk.” (Rome 15:16, NW) Ndusụk Christian ẹmekpep usem efen man ẹtan̄a eti mbụk Obio Ubọn̄ ẹnọ mme utọ owo oro.
16. Nso ikeme ndin̄wam nnyịn ndisịn ifịk ke nditan̄a enyịn̄ Jehovah?
16 Ediwak prọfet Abasi ẹma ẹnyene ata n̄kpọsọn̄ utom ndinam. Ikedịghe mmemmem n̄kpọ inọ mmọ nditan̄a mme etop Abasi nnọ mme owo oro mîkamaha ndikop. Kpasụk ntre, idịghe kpukpru owo oro ẹma ẹkeyak idem ẹnọ Jehovah ke emem utom ọnọ nditan̄a enyịn̄ Esie an̄wan̄wa, akpan akpan ke ikpọ efakutom oro owo mîsinọhọ n̄kpan̄utọn̄. Nte ededi, ebede ke ndinyene mbuọtidem oro osụn̄ọde oto edikpep Ikọ Abasi ọkọrọ ye akam, adianade ye ukeme oro Jehovah ọnọde, nnyịn imekeme ndisịn ifịk ke nditan̄a etop Obio Ubọn̄. (Philippi 4:13; Ediyarade 14:6) Ke afan̄ emi, nso efen ke nnyịn ikeme ndikpep nto mme prọfet Jehovah ye mme asan̄autom esie eken eke eset?
Nsan̄a ke An̄wautom
17. Nso idi ndusụk uwụtn̄kpọ N̄wed Abasi ẹban̄ade ufọn ẹnyenede ẹto nsan̄a ke utom Abasi?
17 Ke ndise mban̄a utom esie, Moses, prọfet Abasi ke akpa ama enyene un̄wam oto akpaneka esie, Aaron. Jehovah ama ọdọhọ Moses ete: “[Aaron] eyenyụn̄ ọdọhọ ye mbio oro ọnọ fi: ke ntre ke enye editie nte inua fo.” (Exodus 4:16) Kere, n̄ko, ban̄a eyo prọfet Elijah ye Elisha, emi “nditọ mme prọfet” ẹkekụtde unen. Etie nte mmọemi ẹkedi otu mme asan̄autom Abasi ẹmi ẹkesinamde utom ọtọkiet, nte eyịghe mîdụhe ẹnyenede inem inem nsan̄a ye kiet eken. (2 Ndidem 2:3-5; 4:38; men 1 Samuel 10:5, 10 domo.) Nte ededi, Moses ye Aaron ye “nditọ mme prọfet” ikabuanake ke nditan̄a eti mbụk Obio Ubọn̄. Edi, ebuana mmọ ama ada ufọn ọsọk kpukpru mmọ. Ediwak isua ikie ke ukperedem Jesus Christ ama osio mbet 70 ọdọn̄ ẹsan̄a “iba iba” ẹkenam utom ukwọrọikọ, ndien nte eyịghe mîdụhe mmọ ẹma ẹbọ ufọn ẹto nsan̄a oro emi ọkọnọde.—Luke 10:1-16; men Utom Mme Apostle 17:10, 11; 20:20 domo.
18. Didie ke nsan̄a ke utom ukwọrọikọ enyene eti uduak mfịn?
18 Ke isua 1953, Mme Ntiense Jehovah ẹma ẹtọn̄ọ ndutịm emi mme anditan̄a Obio Ubọn̄ ẹkenamde utom ọtọkiet ke an̄wautom. Nte ededi, owo ikanamke emi n̄kukụre man ẹnyene nsan̄a. Ẹkekama ndutịm unọ ukpep emi ndinam mme asan̄autom Abasi ẹdi mme andikpep ye mme ọkwọrọ eti mbụk oro ẹtịmde ẹkụt unen. Ye uduak emi ke ekikere, mme asuanetop Obio Ubọn̄ oro ẹtịmde ẹnyene ifiọk ẹma ẹdiana ye mbufa owo ke utom ukwọrọikọ. Ndutịm unọ ukpep eke ufọk ke ufọk emi omotịm enyene ufọn onyụn̄ an̄wam ikọt Jehovah ndinam n̄kọri ke editan̄a enyịn̄ esie an̄wan̄wa. (1 Timothy 4:16) Mfịn, edinyene ukpeme edi ntak efen oro anamde edi se ifọnde mme Christian ndisan̄a “iba iba” ke ẹbuanade ke utom ukwọrọikọ, akpan akpan ke ndusụk ikpehe.
19. Nso ke ẹkpenyene ke ekikere kaban̄a mme ọkpọkpọ utịtmbuba ke utom ukwọrọikọ?
19 Edide anam utom ye ekemmọ andinịm ke akpanikọ ke utom ukwọrọikọ m̀mê asan̄a ikpọn̄ awaha ke enyịnusụn̄, sịn ukeme ndisịm ọkpọkpọ utịtmbuba m̀mê uduak. Emi ekpenyene ndidi ata idem n̄kpọ, se ekemede ndisịm. Nte afo omoyom un̄wam ke ndikpụhọ ntọn̄ọikọ fo nnam ekekem man edemede udọn̄ mme owo ke efakutom mbufo? Ke edide ntre, eyedi afo emekeme ndisan̄a ye asiakusụn̄, anditan̄a Obio Ubọn̄ uyọhọ ini, m̀mê asuanetop emi ekemede nditịm n̄kụt unen ke ndikama nti ntọn̄ọikọ. Nsan̄a fo ekeme ndin̄wam fi ke nditịm nnyụn̄ n̄kama mme ntọn̄ọikọ oro ẹwụtde ke Utom Obio Ubọn̄ Nnyịn m̀mê n̄wed Reasoning From the Scriptures. Ke mme idaha oro mbufo ẹsan̄ade kiet ẹnọ ikọ ntiense ke ufọk ke ufọk, tịm nọ n̄kpan̄utọn̄ ke nneme nsan̄a fo. Ekem domo ukem nneme oro se ke idemfo tutu afo akabade emehe ke ikpehe utom ukwọrọikọ fo enyeemi.
20, 21. Nso ikeme ndinam nsan̄a ke utom an̄wautom enen̄ede enyene ufọn?
20 Nso edieke afo oyomde un̄wam ndinam mme mfiakn̄ka oro ẹkụtde unen ye uduak editọn̄ọ ukpepn̄kpọ Bible? Ndusụk ebede ke ada Ukpepn̄kpọ N̄wedesop mbufo, ẹkeme ndinam ndutịm nnọ fi ndinam utom ke an̄wautom ye asuanetop Obio Ubọn̄ emi otịmde okụt unen ke nditọn̄ọ mme ukpepn̄kpọ Bible. Kûdi nsan̄a oro mîsioroke uyo ke ini ẹnamde mme mfiakn̄ka ọtọkiet. Utu ke oro, ke nsan̄a fo ama akanam owụt nte enye esisede aban̄a mme n̄kpọ ke ufọk kiet, afo emekeme ndikụt nte enyenede ufọn ndinyene ukem nneme oro ke ini ẹnamde mfiakn̄ka efen. Nsan̄a fo eyedu do ndin̄wam nnyụn̄ nnọ item ke oro ebede.—Men Galatia 6:6 domo.
21 Utọ ima ima un̄wam otode nsan̄a utom an̄wautom do ekeme ndin̄wam fi ndisịm mme uduak fo ke utom ukwọrọikọ. Un̄wam emi ye ntotụn̄ọ esịtekọm oro enyenede aban̄a ima-mfọnido Jehovah ke ndiyak fi anam akpan utom emi eyen̄wam fi nditịm n̄kụt unen ke utom ukwọrọikọ Obio Ubọn̄ fo. Ndien afo akpakam ada ifet oro enyenede nditoro Jehovah ke akpan n̄kpọ ke nditịn̄ nte ọfọnde mban̄a enye kpukpru ini ye ke nditan̄a enyịn̄ esie an̄wan̄wa kpukpru ini.—Psalm 145:1, 2, 9-13.
22. Mme mbụme ewe ke ukpepn̄kpọ nnyịn oro etienede edin̄wam nnyịn ndibọrọ?
22 Nte Mme Ntiense Jehovah, nnyịn imesika ibịne mme owo ndien ndien ke utom nnyịn eke ufọk ke ufọk. Ediwak owo ẹsikpan̄ utọn̄ ke eti mbụk ye ntotụn̄ọ esịtekọm. Nte ededi, ndusụk owo ẹkeme ndimen̄e ndikpan̄ utọn̄ nnọ etop Obio Ubọn̄. Nso ke nnyịn ikpanam ke mme utọ idaha ntre? Didie ke nnyịn ikeme ndisịn ifịk ke utom oro Jehovah ọnọde ikọt esie ndinam? Ewe uwụtn̄kpọ N̄wed Abasi ẹkeme ndin̄wam m̀mê ndida nnyịn usụn̄? Ẹyebọrọ mme mbụme ẹmi ke ibuotikọ oro etienede.
Nte Afo Ama Omụm Mme Akpan N̄kpọ Ẹmi?
◻ Nso ke Hosea ye apostle Paul ẹketịn̄ ẹban̄a mme uwa ẹwade ẹnọ Abasi?
◻ Nso ikonụk Ezekiel ye Amos nditịn̄ prọfesi?
◻ Didie ke nnyịn ikpese utom ukwọrọikọ Obio Ubọn̄ nnyịn?
◻ Mme ufọn ewe ke ẹkeme ndinyene nto nsan̄a ke utom an̄wautom?
[Mme ndise ke page 13]
Nsan̄a oro enyenede ufọn ekeme ndin̄wam nnyịn ndinam n̄kọri ke utom ukwọrọikọ