Ndinam N̄kpọ Jehovah ye Edu N̄waidem
“Edieke owo ekededi oyomde nditiene Mi, yak enye otụk idemesie, onyụn̄ emen [eto ndutụhọ, “NW”] esie etiene Mi.”—MATTHEW 16:24.
1. Didie ke Jesus akanam mme mbet esie ẹdiọn̄ọ ẹban̄a n̄kpa esie oro akasan̄ade ekpere?
KE IKPEHE Obot Hermon oro snow esifụkde, Jesus Christ osịm ata akpan ini ke uwem esie. Se isụhọrede ikan isua kiet ọkọsụhọ ọnọ enye ndidu uwem. Enye ọdiọn̄ọ emi; mme mbet esie idiọn̄ọke. Ini edikem kemi ọnọ mmọ ndidiọn̄ọ. Edi akpanikọ, Jesus ama ebemiso etịn̄ aban̄a n̄kpa esie oro akasan̄ade ekpere, edi emi edi akpa ini oro enye etịn̄de aban̄a emi in̄wan̄în̄wan̄. (Matthew 9:15; 12:40) Mbụk Matthew okot ete: “Toto ke ini oro Jesus ọtọn̄ọ ndiwụt mbet Esie ete, Imọ inyene ndika ke Jerusalem n̄kokụt ediwak ukụt ke ubọk mbiowo ye ikpọ oku ye mme scribe; mmọ ẹyenyụn̄ ẹwot Imọ, ndien ke ọyọhọ usen ita Abasi eyenam Imọ iset.”—Matthew 16:21; Mark 8:31, 32.
2. Didie ke Peter akanam n̄kpọ aban̄a mme ikọ Jesus oro aban̄ade ukụt oro Enye edikụtde ke ini iso, ndien didie ke Jesus ọkọbọrọ?
2 Usen oro okosụhọde ọnọ Jesus mbemiso n̄kpa esie ikawakke aba. Peter, nte ededi, okop ọkpọsọn̄ iyatesịt ke se itiede nte idiọk ekikere oro. Enye ikemeke ndinyịme nte ke ẹyewot Messiah ata ediwowot. Ke ntre, Peter asua ọnọ Eteufọk esie uko uko. Ke edide se eti uduakesịt onụkde, enye ọsọsọp eben̄e ete: “Idiọkn̄kpọ aka nsannsan ye Afo, Ọbọn̄; utọ n̄kpọ emi idiwọrọke Fi.” Edi Jesus ọsọsọp esịn ukwan̄ mfọnido Peter, ata in̄wan̄în̄wan̄ nte emi owo akpanuakde ibuot idiọk urụkikọt. “Da ke edem Mi, Satan. Afo edi n̄kpọ iduọ ọnọ Mi; koro afo ukereke n̄kpọ Abasi, edi ekere n̄kpọ owo.”—Matthew 16:22, 23.
3. (a) Didie ke Peter ke unana edidiọn̄ọ akanam idemesie n̄kpọutom Satan? (b) Didie ke Peter ekedi n̄kpọ iduọ ọnọ usụn̄uwem n̄waidem?
3 Peter ke unana edidiọn̄ọ ama anam idemesie n̄kpọutom Satan. Usọp usọp ibọrọ oro Jesus ọnọde ama esịne ubiere ukem nte ke ini enye ọkọbọrọde Satan ke wilderness. Do Devil okodomo ndidomo Jesus idomo uwem ifụre, kpa itie edidem ye unana edibọ ufen. (Matthew 4:1-10) Idahaemi Peter esịn udọn̄ ọnọ enye ndikop mbọm mban̄a idemesie. Jesus ọfiọk ete ke emi idịghe uduak Ete esie. Ana uwem esie edi eke n̄waidem, idịghe eke unọ idem inemesịt. (Matthew 20:28) Peter akabade edi n̄kpọ iduọ ọnọ utọ usụn̄ edinam oro; eti edikere mban̄a esie akabade edi afia.a Jesus, nte ededi, okụt in̄wan̄în̄wan̄ nte ke edieke imọ inyenede ekikere uwem unana n̄waidem ekededi, imọ idinyeneke mfọn Abasi ke ndidi se odudu afia n̄kpa Satan omụmde.
4. Ntak emi uwem edisịn idem ke inemesịt mîkedịghe eke Jesus ye eke mme anditiene enye?
4 Ke ntre, ama oyom ẹnen̄ede ekikere Peter. Mme ikọ oro enye eketịn̄de ọnọ Jesus ẹkewụt ekikere owo, idịghe eke Abasi. Edisịn idem ke uwem ifụre, mmemmem usụn̄ ndibọhọ ufen, ikedịghe eke Jesus; m̀mê utọ uwem oro ndikpedi eke mme anditiene enye, koro ekem Jesus ọdọhọ Peter ye mme mbet eken ete: “Edieke owo ekededi oyomde nditiene Mi, yak enye otụk idemesie, onyụn̄ emen [eto ndutụhọ, NW] esie, etiene Mi.”—Matthew 16:24.
5. (a) Nso idi n̄kpọ-ata oro edidu uwem nte Christian odoride? (b) Nso n̄kpọ ita oro ẹdide akpan n̄kpọ ke ana Christian otịm idem ọnọ?
5 Ndien ndien, Jesus afiak etịn̄ aban̄a akpan ibuotikọ emi: n̄kpọ-ata oro edidu uwem nte Christian odoride. Man ẹdi mme anditiene Jesus, ana mme Christian, ukem nte Adausụn̄ mmọ, ẹnam n̄kpọ Jehovah ye edu n̄waidem. (Matthew 10:37-39) Ntem, enye asiak akpan n̄kpọ ita oro anade Christian odu ke mben̄eidem ndinam: (1) otụk idemesie, (2) emen eto ndutụhọ esie, onyụn̄ (3) akaiso etiene Enye.
“Edieke Owo Ekededi Oyomde Nditiene Mi”
6. (a) Didie ke owo otụk idemesie? (b) Anie ke nnyịn ikpanam esịt enem akan idem nnyịn?
6 Owo nditụk idemesie ọwọrọ nso? Enye ọwọrọ nte ke owo enyene ndikan̄ idemesie ofụri ofụri, orụk n̄kpa oro owo owotde idem. Akpan ukabade oro ẹnọde ikọ Greek oro ẹkabarede “tụk” edi “ndidọhọ baba”; enye ọwọrọ “ndikan̄ ofụri ofụri.” Ke ntre, edieke afo onyịmede n̄kpọ-ata oro uwem Christian odoride, afo ke unyịmesịt ayayak mme mbumek, ifụre uwem, udọn̄, inemesịt, inem uwem, ẹtak fi. Ke nditịm ntịn̄, afo ayak ofụri uwem fo ye kpukpru n̄kpọ oro abuanade enye ọnọ Jehovah Abasi kpukpru ini. Nditụk idem ọwọrọ se ikponde ikan edisịn ndinọ idem ndusụk inemesịt ke ini ke ini. Utu ke oro, enye ọwọrọ nte ke owo ana asana unen edinyene idemesie ayak ọnọ Jehovah. (1 Corinth 6:19, 20) Owo oro ama okotụk idemesie idụhe uwem ndinem idemesie esịt, edi odu ọnọ ndinem Abasi esịt. (Rome 14:8; 15:3) Emi ọwọrọ nte ke kpukpru ini ke uwem esie, enye eyedọhọ mme ibụk ibụk udọn̄ esie baba onyụn̄ ọdọhọ Jehovah ih.
7. Nso idi eto ndutụhọ Christian, ndien didie ke enye obiom emi?
7 Ndimen eto ndutụhọ fo, ke ntre, enyene akpan n̄kpọ oro enye ọwọrọde. Ndimen eto edi ufen ye idiọn̄ọ n̄kpa. Christian odu ke mben̄eidem ndibọ ufen edieke ẹyomde, mîdịghe okụt bụt m̀mê ndutụhọ m̀mê idem n̄kpa ke ntak edide anditiene Jesus Christ. Jesus ọkọdọhọ ete: “Owo eke mîmenke eto ndutụhọ esie inyụn̄ itiene mi idotke ye ami.” (Matthew 10:38, NW) Idịghe kpukpru owo oro ẹbọde ufen edi mme andimen eto ndutụhọ. Mme idiọkowo ẹkụt ediwak “ubiak” edi mmọ imenke eto ndutụhọ. (Psalm 32:10) Nte ededi, uwem Christian edi uwem edimen eto ndutụhọ utom n̄waidem ẹnamde ẹnọ Jehovah.
8. Nso uwem uwụtn̄kpọ ke Jesus okonịm ọnọ mme anditiene enye?
8 Akpatre n̄kpọ oro Jesus eketịn̄de edi nte nnyịn ikaiso nditiene enye. Jesus iyomke ite nnyịn inyịme inyụn̄ inịm se enye ekekpepde ke akpanikọ ikpọn̄îkpọn̄ edi n̄ko nte, ke ofụri uwem nnyịn, yak nnyịn ikaiso itiene uwụtn̄kpọ oro enye okonimde. Nso ndien idi ndusụk n̄wọrọnda n̄kpọ oro ẹkụtde ke usụn̄ nte enye okodude uwem? Ke ini enye ọkọnọde mme anditiene enye akpatre utom, enye ọkọdọhọ ete: “Ẹka ẹkenam . . . mbet . . . ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Jesus ama ọkwọrọ onyụn̄ ekpep eti mbụk Obio Ubọn̄. Ntre ke mme n̄kpetn̄kpet mbet esie ẹkenam, ke akpanikọ, ofụri akpa esop Christian. Ifịk ifịk utom emi ọkọrọ ye mmọ nditre ndidi ubak eke ererimbot ama ada usua ye ubiọn̄ọ otode ererimbot ọsọk mmọ, emi okosụn̄ọde ke eto ndutụhọ nditotịm ndobi n̄kan mmọ ndimen.—John 15:19, 20; Utom 8:4.
9. Didie ke Jesus akanam n̄kpọ ye mbon en̄wen?
9 N̄wọrọnda uwụtn̄kpọ efen oro ẹkekụtde ke uwem Jesus ekedi usụn̄ nte enye akanamde n̄kpọ ye mmọ en̄wen. Enye ama ọfọn ido onyụn̄ ‘enyene ifụre ifụre ido onyụn̄ osụhọde idem ke esịt.’ Ntem, mme andikpan̄ utọn̄ nnọ enye ẹma ẹkop obufa nsọn̄idem ke spirit ẹnyụn̄ ẹbọ nsịnudọn̄ eto edidu esie. (Matthew 11:29) Enye ikenyịkke-nyịk mmọ nditiene enye m̀mê ndinịm ediwak ibet ke nte mmọ ẹkpenamde ntre; enye ikonyụn̄ idaha edu edibiom mmọ ikpe man enyịk mmọ ndidi mme mbet esie. Kpa ye uwem n̄waidem mmọ, mmọ ẹma ẹnyene ata idara. Nso n̄wọrọnda ukpụhọde ke emi edi ntem ye mbon oro ẹnyenede ebeubọk edu ererimbot emi onịmde mme “ukperedem ini” emi idiọn̄ọ!—2 Timothy 3:1-4.
Kọri Nyụn̄ Mụm Edu N̄waidem Oro Jesus Ekenyenede Kama
10. (a) Nte ekemde ye N̄wed Mbon Philippi 2:5-8, didie ke Christ okotụk idemesie? (b) Edieke nnyịn idide mme anditiene Christ, nso ekikere ke ana nnyịn inyene?
10 Jesus ama onịm uwụtn̄kpọ ke nditụk idemesie. Enye ama emen eto ndutụhọ esie onyụn̄ akaiso obiom enye ke ndinam uduak Ete esie. Paul ekewet ọnọ mme Christian ke Philippi ete: “Yak mbufo ẹnyene orụk esịt emi okodude ke Christ Jesus. Okposụkedi nte Enye ekedide mbiet Abasi, Enye ikabatke ndida n̄kan̄ka ye Abasi ke n̄kpọ eke okpomụmde akama: edi Enye akan̄wan̄a Idemesie, ada mbiet ofụn, owụt idem nte owo; ndien sia Enye ọwọrọde edi ke ido owo, Enye osụhọde idem, akabade osụk ibuot tutu osụn̄ọ ke n̄kpa, kpa n̄kpa [eto ndutụhọ, NW].” (Philippi 2:5-8) Anie ekpekeme nditụk idemesie ọyọhọ ọyọhọ n̄kan oro? Edieke afo edide eke Christ Jesus onyụn̄ edide kiet ke otu mme anditiene enye, ana afo enyene ukem ekikere emi.
11. Ndidu uwem n̄waidem ọwọrọ ndidu uwem nnọ uduak anie?
11 Apostle efen, Peter, asian nnyịn ete ke sia Jesus ama ọkọbọ ufen onyụn̄ akpa ke ntak nnyịn, mme Christian ẹnyene ndidu ke mben̄eidem, nte mbonekọn̄ oro ẹtịmde idem mfọn mfọn, ye ukem edu oro Christ ekenyenede. Enye ewet ete: “Sia Christ okokụtde ukụt ke obụkidem, mbufo nde ẹda ekikere emi ẹsịne nte n̄kpọekọn̄ ẹsọn̄ọ idem mbufo esịt; koro enyeemi okokụtde ukụt ke obụkidem ama adianade ke idiọkn̄kpọ ama; man mbufo ẹkûda aba ini eke osụhọde ọnọ mbufo ke obụkidem ẹsan̄a ẹdu uwem ke mme idiọkitọn̄ esịt owo, edi ẹsan̄a nte uduak Abasi edide.” (1 Peter 3:18; 4:1, 2) Usụn̄uwem n̄waidem Jesus ama owụt in̄wan̄în̄wan̄ nte enye ekekerede aban̄a uduak Abasi. Enye ama enyene iwụk ke utuakibuot esie, kpukpru ini onịmde uduak Ete esie okon̄ akan eke esie, idem adade okosịm esuene esuene n̄kpa.—Matthew 6:10; Luke 22:42.
12. Nte uwem n̄waidem ekedi se mînyeneke inem ọnọ Jesus? Nam an̄wan̄a.
12 Okposụkedi uwem n̄waidem Jesus ekedide eke ọkpọsọn̄ utom ye afan̄usụn̄ oro odoride ata ọnọ enye nditiene, enye ikekwe emi nte usụn̄ oro mînyeneke inem. Utu ke oro, Jesus ama okop inemesịt ke ndisụhọde idem nnam uduak Abasi. Ndinam utom Ete esie eketie nte udia ọnọ enye. Enye ama enyene ata uyụhọ oto oro, ukem nte owo okpokopde ke ini adiade eti udia. (Matthew 4:4; John 4:34) Ntem, edieke afo oyomde ndikop ata uyụhọ ke uwem fo, idụhe n̄kpọ efen oro afo ekemede ndinam ọfọn akan editiene uwụtn̄kpọ Jesus ebe ke ndikọri edu esie.
13. Didie ke ima edi odudu oro anamde ẹnyene edu n̄waidem?
13 Nso inen̄ede idi odudu oro onụkde owo emi odude ke edem edu n̄waidem? Ke ikọ kiet, ima. Jesus ọkọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo. Emi edi akamba ye ebeiso item. Udiana onyụn̄ ebiet enye, ete, Ma mbọhọidụn̄ fo nte idemfo.” (Matthew 22:37-39) Christian ikemeke ndiyom ufọn idemesie ndien, ke ukem ini oro, anam mme ikọ oro. Ke akpa ana ima oro enye enyenede ọnọ Jehovah ndien ekem ima oro enye enyenede ọnọ mbọhọidụn̄ akara inemesịt ye udọn̄ esie. Oro edi nte Jesus okodude uwem esie, ndien oro edi se enye odoride enyịn ndikụt mme anditiene enye ẹnamde.
14. (a) Ewe mbiomo ke ẹnam an̄wan̄a ke Mme Hebrew 13:15, 16? (b) Nso inụk nnyịn ndikwọrọ eti mbụk ye ifịk?
14 Ibet ima emi ama an̄wan̄a apostle Paul. Enye ekewet ete: “Yak nnyịn iwa uwa ekọm inọ Abasi kpukpru ini ke enyịn̄ Jesus, kpa mfri n̄kpọkinua eke ẹkponode enyịn̄ Esie. Ẹkûfre ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” (Mme Hebrew 13:15, 16) Mme Christian iwaha mme uwa unam m̀mê mme n̄kpọ ntre inọ Jehovah; ke ntre, mmọ iyomke mme oku ẹdide owo ke temple oro ẹkụtde ke enyịn ndida usụn̄ ke utuakibuot mmọ. Iwa uwa ekọm nnyịn ebe ke Christ Jesus. Ndien ebe ke uwa ekọm emi akpan akpan, kpa editan̄a enyịn̄ esie an̄wan̄wa, ke nnyịn iwụt ima oro inyenede inọ Abasi. Edu unana ibụk nnyịn akpan akpan oro ọkọn̄ọde ke ima edemede nnyịn ndikwọrọ eti mbụk ye ifịk, idomode ndisịn ifịk kpukpru ini ndiwa mfri n̄kpọkinua nnyịn nnọ Abasi. Ke usụn̄ emi nnyịn iwụt ima mbọhọidụn̄ n̄ko.
N̄waidem Ada Uwak Edidiọn̄ Edi
15. Mme mbụme ndụn̄ọde ewe ẹban̄ade uwem n̄waidem ke nnyịn ikeme ndibụp idem nnyịn?
15 Tuak da esisịt nyụn̄ kere mme mbụme ẹtienede mi: Ndi usụn̄uwem mi idahaemi owụt usụn̄ edinam n̄waidem? Ndi mme utịtmbuba mi ẹwụt utọ uwem oro? Ndi mbonubon mi ke ẹbọ ufọn eke spirit ẹto uwụtn̄kpọ mi? (Men 1 Timothy 5:8 domo.) Nso kaban̄a nditọakpa ye mme ebeakpa? Nte mmọ n̄ko ẹbọ ufọn ẹto edu n̄waidem mi? (James 1:27) Nte mmekeme ndinam ini oro nsịnde ke an̄wan̄wa uwa ekọm awak? Nte mmekeme ndinyanade nsịm ifetutom utom usiakusụn̄, Bethel, m̀mê isụn̄utom, mîdịghe nte mmekeme ndiwọrọ n̄kanam utom ke ebiet emi udọn̄ kaban̄a mme ọkwọrọ Obio Ubọn̄ okponde akan?
16. Didie ke ikike ekeme ndin̄wam nnyịn ndidu uwem n̄waidem?
16 Ndusụk ini esikam oyom ekpri ikike man isịm ọyọhọ ukeme oro iyomde ke ndinam n̄kpọ Jehovah ye edu n̄waidem. Ke uwụtn̄kpọ, Janet, asiakusụn̄ ofụri ini ke Ecuador, akanam utom idịbi udia uyọhọ-ini. Ikebịghike, ndutịm esie ama anam edi ọkpọsọn̄ n̄kpọ enye ndisịm ibat hour oro ẹyomde ẹto asiakusụn̄ ofụri ini ye edu idatesịt. N̄wan emi ama ebiere ndinam mfịna emi an̄wan̄a eteutom esie onyụn̄ eben̄e ete ẹsụhọde ibat hour utom esie. Sia enye mîkenyịmeke ndisịbe ini utom esie, n̄wan emi ama asan̄a ye Maria, emi okoyomde utom ubak ini man enye ekeme ndisiak usụn̄. Mmọ kiet kiet ẹma ẹnyịme ndinam utom ke ubak usen, ẹbuanade utom ofụri usen kiet ẹnam. Eteutom ama onyịme ye ekikere emi. Idahaemi nditọete iban iba ẹmi ẹdi mme asiakusụn̄ ofụri ini. Ke okụtde utịbe utịbe utịp oro mmọ ẹkenyenede, Kaffa, emi n̄ko ama akakpa mba ke ndinam utom ofụri ini nnọ ukem usiakifia oro onyụn̄ odomode ndisịm ini usiakusụn̄ esie, ama ada Magali aka onyụn̄ ekesịn ukem eben̄e oro. Ẹma ẹnyịme emi n̄ko. Ntem, nditọete iban inan̄ ẹkeme ndisiak usụn̄, utu ke iba ẹmi ẹkedude ke idaha ndikpọn̄ utom uyọhọ-ini. Ikike ye edinam usio-ukot ama enyene nti utịp.
17-21. Didie ke ebe ye n̄wan ẹkefiak ẹdụn̄ọde uduak mmọ ke uwem, ndien ye nso utịp?
17 N̄ko-n̄ko, kere ban̄a usụn̄ n̄waidem oro Evonne eketienede ke ufan̄ isua duop ẹmi ẹkebede. N̄wan emi ekewet se itienede emi ọnọ ẹsọk Watch Tower Society ke May 1991:
18 “Ke October 1982, ami ye ubon mi ima ika ndise Bethel ke Brooklyn. Ndikụt enye ama anam mi nyom ndinọ idem unyịme unyịme ndinam utom do. Mma n̄kot n̄wed eben̄e utom, ndien mbụme kiet oro odotde ama odu, ‘Nso idi mbahade hour utom an̄wautom fo ke ọfiọn̄ itiokiet ẹmi ẹkebede? Edieke mbahade hour ekpride akan duop, nam ntak an̄wan̄a.’ N̄kenyeneke eti ntak ndomokiet ke ekikere, ntre mma nnịm utịtmbuba nnyụn̄ nsịm enye ke ọfiọn̄ ition.
19 “Idem okposụkedi n̄kenyenede ibat ibat ntak oro anamde mmensiakke usụn̄ ke ekikere, ke ini n̄kokotde 1983 Yearbook of Jehovah’s Witnesses, mma n̄kụt nte ke mbon efen ẹma ẹkan mme ubiọn̄ọ oro ẹkekponde ẹkan okịm man ẹsiak usụn̄. Ntre, ke April 1, 1983, mma n̄kpọn̄ utom idịbi udia uyọhọ-ini oro ọkọnọde ediwak okụk nnyụn̄ n̄kabade ndi asiakusụn̄ unọ un̄wam, ekem mma ndụk udịm mme asiakusụn̄ ofụri ini ke September 1, 1983.
20 “Ekedi n̄kpọ inemesịt ọnọ mi ndidọ ediye asan̄autom unamutom ke April 1985. Isua ita ke ukperedem, utịn̄ikọ oro ẹkenọde ke mbono district ẹban̄a usiakusụn̄ ama onụk ebe mi ndidọn̄ odu ye ami onyụn̄ obụp ete, ‘Ndi afo omokụt ntak ndomokiet oro akpanamde ami n̄kûtọn̄ọ usiakusụn̄ ke September 1?’ Enye ama adiana ye ami ke utom emi ke isua iba oro ẹketienede.
21 “Ebe mi n̄ko ama ọnọ idem unyịme unyịme ndinam utom ubọpufọk ke Bethel ke Brooklyn ke urua iba ekem esịn n̄wed oyom ndibuana ke Ndutịm Ubọpufọk Ofụri Ererimbot. Ntre ke May 1989 nnyịn ima ika Nigeria ke ọfiọn̄ kiet ndikan̄wam ke edibọp n̄kọk itieutom. N̄kpọn̄ nnyịn iyenam isan̄ ika Germany, ke ebiet emi idibọde n̄wed unen udụk obio ndibe ndụk Poland. Nnyịn imokop inemesịt nditiene mbuana ke utọ onịm-mbụk utom ubọpufọk emi ndinyụn̄ ndi ubak orụk obufa utom uyọhọ-ini emi.”
22. (a) Didie ke nnyịn, nte Peter, ikeme ndikabade ndi n̄kpọ iduọ ye unana edidiọn̄ọ? (b) Ke nso ke ndinam n̄kpọ Jehovah ye edu n̄waidem mîkọn̄ọke?
22 Edieke afo ke idemfo mûkemeke ndisiak usụn̄, nte afo emekeme ndisịn udọn̄ nnọ mbon oro ẹdude ke utom uyọhọ-ini ndisọn̄ọ mmụm ifetutom mmọ n̄kama ndien ndusụk akam an̄wamde mmọ ndinam ntre? Mîdịghe nte afo eyetie nte ndusụk mbonubon m̀mê mme ufan oro ẹnyenede eti udọn̄, ẹmi nte Peter, ẹkemede ndidọhọ asan̄autom uyọhọ-ini ete ọduọk odudu onyụn̄ okop inem uwem, anam n̄kpọ ye idemesie ke mfọnido, ye unana edidiọn̄ọ nte oro ekemede ndidi n̄kpọ iduọ? Edi akpanikọ, edieke nsọn̄idem asiakusụn̄ odude ke ata itiendịk mîdịghe edieke enye ofụmide mme mbiomo Christian esie, ekeme ndiyom enye ọkpọn̄ utom uyọhọ-ini kan̄a ke esisịt ini. Ndinam n̄kpọ Jehovah ye edu n̄waidem ikọn̄ọke ke enyịn̄, utọ nte asiakusụn̄, owo ufọk Bethel, m̀mê n̄kpọ ntre. Utu ke oro, enye ọkọn̄ọ ke se nnyịn idide nte mme owo—nte nnyịn ikerede n̄kpọ, se nnyịn inamde, nte nnyịn inamde n̄kpọ ye mbon en̄wen, nte nnyịn idude uwem nnyịn.
23. (a) Didie ke nnyịn ikeme ndikaiso nnyene idara edidi ekemmọ anamutom ye Abasi? (b) Nso nsọn̄ọ ke nnyịn inyene ke Mme Hebrew 6:10-12?
23 Edieke nnyịn ke akpanikọ inyenede edu n̄waidem, nnyịn iyekop idatesịt ndidi ekemmọ mme anamutom ye Abasi. (1 Corinth 3:9) Nnyịn iyenyene uyụhọ ndifiọk nte ke nnyịn ke inam esịt adat Jehovah. (Mme N̄ke 27:11) Ndien nnyịn imenyene nsọn̄ọ nte ke Jehovah idifreke nnyịn tutu amama m̀mê ndikpọn̄ nnyịn adan̄a nte nnyịn isọn̄ọde ida inam akpanikọ inọ enye.—Mme Hebrew 6:10-12.
[Mme Ikọ idakisọn̄]
a Ke usem Greek, “n̄kpọ iduọ” (σκάνδαλον, skanʹda·lon) ke akpasarade ekedi “enyịn̄ ẹnọde ikpehe oro ẹsiyịride udia ke afia, ntre, ke ntre edide afia m̀mê ekpọ ke idemesie.”—Vine’s Expository Dictionary of Old and New Testament Words.
Nso Idi Ekikere Fo?
◻ Didie ke Peter ke unana edidiọn̄ọ akakabade edi n̄kpọ iduọ ọnọ usụn̄ uwem n̄waidem?
◻ Nditụk idem ọwọrọ nso?
◻ Didie ke Christian obiom eto ndutụhọ esie?
◻ Didie ke nnyịn ikọri inyụn̄ isọn̄ọ imụm edu n̄waidem ikama?
◻ Nso idi odudu oro anamde ẹnyene edu n̄waidem?
[Ndise ke page 10]
Nte afo omonyịme nditụk idemfo, mmen eto ndutụhọ fo, nnyụn̄ n̄kaiso nditiene Jesus?