Esịt Emi Mîbiomke

KE INI ọkọnyọn̄de utom usen kiet, Charles, emi anamde utom ke ufọkn̄wed ntaifiọk ke Kenya, ama ọduọk urụk ukopikọ esie oro ẹkamade-kama ẹsan̄a. Ke Kenya, ẹda emi nte ọsọn̄urua inyene.

Charles ọkọdọhọ ete: “N̄kodorike enyịn owo ekededi ndimen enye ndi.” Nte ededi, ke n̄kpọ nte usen ifan̄ ẹbede, idem ama akpa enye ke ini ọfis n̄kọk itieutom eke Mme Ntiense Jehovah ke Kenya ẹkekotde enye ke urụk ukopikọ. Eketie nte ikọ mbubru ke ini ẹkedọhọde Charles edi edibọ urụk ukopikọ esie! Enye ama edidiọn̄ọ nte ke asan̄autom uyọhọ ini eke Mme Ntiense Jehovah oro okodụkde n̄kpọisan̄ oro imọ ikodụkde okokụt urụk ukopikọ oro. Man ekeme ndifiọk andinyene, asan̄autom oro ama emen urụk ukopikọ oro edi ọfis n̄kọk itieutom, ndien mme anamutom unyịmesịt do ẹma ẹda nọmba emi okodude ke urụk ukopikọ oro ẹyom Charles ẹkụt ke akpatre.

Charles ọkọdọhọ ke leta oro enye ekewetde ọnọ ẹsọk ọfis n̄kọk itieutom ete: “Mmenen̄ede n̄wụt esịtekọm mban̄a mme ukeme oro ẹsịnde ndiyom mi kpa ye oro ọsọn̄de. Mmenen̄ede n̄kọm ikọt mbufo oro ẹkekụtde urụk ukopikọ oro, ẹyom mi ẹkụt, ẹnyụn̄ ẹkpọn̄ enye ẹnọ mi. Imemke ndikụt owo akpanikọ mfịn, edi edi n̄kpọ nsịnudọn̄ nte ke nnyịn imenyene ibat ibat owo oro ẹwọrọde ẹda nte ata Mme Ntiense Jehovah Abasi.”

Ẹdiọn̄ọ Mme Ntiense Jehovah ke kpukpru ebiet ke edinam akpanikọ mmọ. Mmọ ẹkpebe apostle Paul emi ọkọdọhọde ete: “Nnyịn imobụre ifiọk ite, imenyene esịt emi mîbiomke nnyịn ke baba n̄kpọ kiet, imonyụn̄ iyom ndidu uwem nte ọfọnde ke kpukpru usụn̄.” (Mme Hebrew 13:18; 1 Corinth 11:1) Mmọ ẹfiọk ke utọ edu oro ọnọ Jehovah Abasi ubọn̄, nte Jesus ọkọdọhọde ete: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.”—Matthew 5:16.