Ndidiọn̄ọ Nnennem Ido Ukpono Asan̄a Ye Mbiomo
“Ọfọn akan ye mmọemi ẹkopde ikọ Abasi, ẹnyụn̄ ẹkpemede ndinam.”—LUKE 11:28.
1. Ndondo oro mmọ ẹdiọn̄ọde nnennen ido ukpono, nso orụk owo ẹsibọp uwem mmọ ẹkanade enye?
NDIDỌDIỌN̄Ọ nnennen ido ukpono kpọt ikemke. Edieke nnyịn idide mme andima se inende ye se idide akpanikọ, ndondo oro nnyịn ikụtde enye, nnyịn iyebọp uwem nnyịn ikanade enye. Ido ukpono akpanikọ idịghe sụk ifiọk ibuot; enye edi usụn̄uwem.—Psalm 119:105; Isaiah 2:3; men Utom 9:2 domo.
2, 3. (a) Didie ke Jesus ọkọsọn̄ọ etịn̄ nte edide akpan n̄kpọ ndinam uduak Abasi? (b) Nso mbiomo odoro kpukpru mbon oro ẹdiọn̄ọde nnennen ido ukpono ke afara?
2 Jesus Christ ama ọsọn̄ọ etịn̄ nte edide akpan n̄kpọ ndinam se Abasi owụtde nte edide uduak Esie. Ke ndiberi se ẹdiọn̄ọde idahaemi nte Ukwọrọikọ oro ke Obot, Jesus ama anam ẹdiọn̄ọ nte, ke idịghe kpukpru mmọ oro ẹkotde enye Ọbọn̄ (ke ntem ẹdọhọde nte idide mme Christian) ẹdidụk Obio Ubọn̄; edi sụk mbon oro ẹnamde uduak Ete esie ẹdidụk. Enye ama ọdọhọ ete ke ẹyesịn mmọ en̄wen nte “mme anam ukwan̄n̄kpọ.” Ntak edide ukwan̄n̄kpọ? Koro nte Bible ọdọhọde, edikpu ndinam uduak Abasi edi idiọkn̄kpọ, ndien kpukpru idiọkn̄kpọ edi edibiat ibet. (Matthew 7:21-23; 1 John 3:4; men Rome 10:2, 3 domo.) Owo ekeme ndidiọn̄ọ nnennen ido ukpono, enye ekeme nditoro mbon oro ẹkpepde enye, enye onyụn̄ ekeme nditoro mbon oro ẹnamde enye, edi enye n̄ko enyene mbiomo ndida enye nsịn ke edinam ke uwem esiemmọ. (James 4:17) Edieke enye onyịmede ndibiom mbiomo oro, enye eyekụt ete ke uwem esie eyenyene uforo, ndien enye eyekop idatesịt oro n̄kpọ efen baba kiet mîkemeke ndida ndi.
3 Ke ibuotikọ oro ekebemde enyeemi iso, nnyịn ima ineme n̄kpọ itiokiet oro ẹdade ẹdiọn̄ọ ido ukpono akpanikọ. Ikụreke ke mmọ oro kiet kiet ndin̄wam nnyịn ndidiọn̄ọ nnennen ido ukpono edi n̄ko akama mme n̄kpọ-ata ye mme ifet ẹnọ nnyịn owo kiet kiet. Ke nso usụn̄?
Afo Anam N̄kpọ Didie Aban̄a Ikọ Abasi?
4. (a) Nte mbufa owo ẹtọn̄ọde ndibuana ye Mme Ntiense Jehovah, nso ke mmọ ẹsisọp ndikụt kaban̄a nte Mme Ntiense ẹdade Bible ẹnam n̄kpọ? (b) Didie ke edidia udia eke spirit nyụhọ otụk mme asan̄autom Jehovah?
4 Nte Mme Ntiense Jehovah ẹkpepde Bible ye mbufa owo oro ẹnyenede udọn̄, ediwak ke otu mbufa owo ẹmi ẹsisọp ẹkụt nte ke se ẹkpepde oto Bible. Ke ibọrọ mbụme mmọ, owo isidaha mmọ ibịne mme ikọ mbuọtidem ufọkabasi, item owo, m̀mê ekikere mme ọwọrọiso owo. Ikọ Abasi ke idemesie edi nsọn̄ọ. Ke ini mmọ ẹkade Ufọkmbono Obio Ubọn̄, mmọ ẹsikụt nte ke do n̄ko Bible edi akpan n̄wed ukpepn̄kpọ. Isidaha mbon esịt akpanikọ oro ẹyomde akpanikọ anyanini ndifiọk nte ke akpan n̄kpọ oro etịpde esịn ke idatesịt oro mmọ ẹkụtde ke otu Mme Ntiense Jehovah edi akpanikọ oro nte ke mmọ ẹsidia udia eke spirit otode Ikọ Abasi ẹyụhọ.—Isaiah 65:13, 14.
5. (a) Nso n̄kpọ-ata odu ọnọ mbon oro ẹdade ẹse Mme Ntiense Jehovah? (b) Didie ke mmọ ẹkeme ndibuana ke idatesịt eke Mme Ntiense?
5 Edieke edide afo ọmọfiọk emi, didie ke afo anam n̄kpọ aban̄a emi? Edieke emi an̄wan̄ade fi, afo ukemeke nte enende ndidi andida nse kpọt, m̀mê afo ndikpoyom ndidi. Bible owụt ete ke mbon oro ẹdide “mme andikokop ikpọn̄îkpọn̄” edi mîdịghe “mme anam ikọ” ‘ẹbabian̄a idem.’ (James 1:22) Mmọ ẹbian̄a idemmọ koro mmọ ẹkpude ndifiọk nte ke inamke n̄kpọ m̀mê nso ke mmọ ẹkeme nditịn̄, mmọ ndikpu ndikop uyo Abasi owụt ete ke mmọ inen̄ekede ima enye. Edidọhọ ke imenyene mbuọtidem oro mîsan̄ake ye utom edi n̄kpakpa mbuọtidem. (James 2:18-26; 1 John 5:3) Ke okpụhọrede ye oro, owo emi ima Jehovah onụkde enye ndidi “andinanam” “ẹyekụt edidiọn̄ ke edinam esie.” Ih, nte Jesus Christ akanamde an̄wan̄a, “ọfọn akan ye mmọemi ẹkopde ikọ Abasi, ẹnyụn̄ ẹkpemede ndinam.”—James 1:25; Luke 11:28; John 13:17.
6. Edieke nnyịn ke akpanikọ iwụtde esịtekọm inọ Ikọ Abasi, nso mme ifet ke nnyịn ke idem nnyịn ididomo ndida nnam n̄kpọ?
6 Idatesịt oro eyetụn̄ọ nte afo ọkọride ke ifiọk uduak Abasi onyụn̄ adade mme n̄kpọ efen efen oro afo ekpepde esịn ke edinam. Afo edisịn ukeme adan̄a didie ndikpep Ikọ Abasi? Ediwak tọsịn owo ke mme itie duop oro mîkọfiọkke n̄wed ẹma ẹsịn ọkpọsọn̄ ukeme ndikpep nte ẹkotde n̄wed, ẹnamde emi akpan akpan man mmọ ẹkpekeme ndikot N̄wed Abasi nnyụn̄ nda n̄kpep mmọ en̄wen. Mmọ eken ẹsibak ẹdemede kpukpru usenubọk man mmọ ẹkpekeme ndida ndusụk ini ke usen kiet kiet n̄kot Bible ye mme n̄wed ukpep Bible, utọ nte Enyọn̄-Ukpeme. Nte afo ke idemfo okotde Bible kpukpru ini mîdịghe esede mme itien̄wed Abasi oro ẹsiakde ẹsịn ke n̄wed ukpepn̄kpọ efen, wụk ntịn̄enyịn ke mme ibet ye ewụhọ Jehovah, nyụn̄ domo ndifiọk ediwak edumbet oro ẹdude ndinọ nnyịn ndausụn̄. Tie kere se ikpehe kiet kiet ayarade aban̄a Abasi, uduak esie, ye mme edinam esie ye ubonowo. Nọ ini man emi okpụhọde esịt fo. Kere m̀mê mme usụn̄ ẹdu emi afo ekemede ndida mme item Bible nsịn ke edinam ata ọyọhọ ọyọhọ ke uwem fo.—Psalm 1:1, 2; 19:7-11; 1 Thessalonica 4:1.
Nte Utuakibuot Fo Nnọ Jehovah Edi eke Ofụri Esịt?
7. (a) Didie ke ukpepn̄kpọ Abasi-Ita-ke-Kiet otụk ukeme oro mme owo ẹsịnde ndituak ibuot nnọ Abasi? (b) Nso ikeme nditịbe ke ini owo ekpepde akpanikọ aban̄ade Jehovah?
7 Ye ediwak miliọn owo, edi se inọde ifụre ndifiọk nte ke Abasi akpanikọ idịghe Abasi-Ita-ke-Kiet. Edinam an̄wan̄a oro nte ke “emi edi ndịben̄kpọ” akanam idaha uyụhọ isọk mmọ. Didie ke mmọ ẹkpekeme ndisịk n̄kpere Abasi emi owo mîkemeke ndifiọk? Nte utịp ukpepn̄kpọ oro, mmọ ẹnyene ntụhọ edifụmi Ete (emi akananam mmọ mîkopke enyịn̄ esie ke ufọkabasi) ẹnyụn̄ ẹtuak ibuot ẹnọ Jesus nte Abasi mîdịghe ẹwọn̄ọde utuakibuot mmọ ẹnọ Mary (emi ẹkekpepde mmọ nte ke edi “Eka Abasi”). Edi esịt mmọ ama ọyọhọ ye idara ke ini kiet ke otu Mme Ntiense Jehovah okokụbọrede Bible onyụn̄ owụt mmọ ọkpọkpọ enyịn̄ Abasi, Jehovah. (Psalm 83:18) N̄wan kiet otode Venezuela ama enen̄ede okop idatesịt ke ini ẹkewụtde enye enyịn̄ Abasi tutu enye enen̄ede ọfrọ ọkọn̄ọ n̄kaiferi Ntiense oro akabuanade ọsọn̄urua akpanikọ oro ye enye ke itọn̄, onyụn̄ onyịme ẹnịm ukpepn̄kpọ Bible ye enye. Ke ini utọ mbon oro ẹkpepde nte ke Jesus ama etịn̄ aban̄a Ete esie nte “Abasi Mi ye Abasi mbufo” ye nte ke Jesus okokot Ete esie “ata Abasi kierakiet,” mmọ ẹfiọk nte ke se Bible ekpepde aban̄a Abasi idịghe se iyan̄ade owo ifiọk. (John 17:3; 20:17) Nte mmọ ẹdide ẹdidiọn̄ọ mme edu Jehovah, mmọ ẹsisịk ẹkpere enye, ẹtọn̄ọ ndibọn̄ akam nnọ enye, ẹnyụn̄ ẹyom ndinem enye esịt. Nso idi utịp?
8. (a) Ke ntak ima emi mmọ ẹmade Jehovah ye udọn̄ mmọ ndinem enye esịt, nso ke ediwak miliọn owo ẹnam? (b) Ntak emi baptism Christian edide ata akpan n̄kpọ?
8 Ke ufan̄ isua duop ẹmi ẹkebede, owo 2,528,524 ke ikpọ ikpehe isọn̄ itiọkiet ye ke ediwak isuo ẹma ẹyak uwem mmọ ẹnọ Jehovah ẹnyụn̄ ẹyarade uyakidem emi ebe ke mmọn̄ baptism. Nte afo ekedi kiet ke otu mmọ, mîdịghe nte afo kemi ke eben̄e idem ndina baptism? Baptism edi akpan usio-ukot ke uwem kpukpru ata Christian. Jesus ama ọdọn̄ mme anditiene enye ete ẹnam mme owo ẹdi mbet ke kpukpru idụt ẹnyụn̄ ẹnịm mmọ baptism. (Matthew 28:19, 20) Odot ẹtịm ẹfiọk n̄ko nte ke ekedi ke ndondo oro Jesus anade baptism ama ke Jehovah ke idemesie eketie ke heaven etịn̄ ikọ, ọdọhọde ete: “Afo edi edima eyen Mi; mmenem esịt etieti ye Afo.”—Luke 3:21, 22.
9. Man imụm itie ebuana emi Jehovah onyịmede ikama, nso ke ẹyom ke n̄kan̄ nnyịn?
9 Ndinyene itie ebuana oro Jehovah onyịmede edi n̄kpọ oro ẹkpemade. Edieke edide afo ama odụk utọ itie ebuana oro ebe ke uyakidem nnọ ye baptism, fep n̄kpọ ekededi oro edikemede ndibiat enye. Kûyak mme editịmede esịt eke uwem ye ekikere n̄kpọ obụkidem ẹsịk enye enịm ke udiana itie. (1 Timothy 6:8-12) Tịm du uwem ke n̄kemuyo ye item Mme N̄ke 3:6: “Diọn̄ọ [Jehovah] ke kpukpru usụn̄ fo, ndien enye eyenen̄ede usụn̄ fo onịm.”
Ima Christ Enen̄ede Otụk Fi Adan̄a Didie?
10. Ntak emi nnyịn ndituak ibuot nnọ Jehovah mînamke nnyịn ifụmi Jesus?
10 Ediwụt nnennen esịtekọm nnọ Jehovah nte ata Abasi kierakiet, nte ededi, inamke owo ofụmi Jesus Christ. Ke okpụhọrede ye oro, Ediyarade 19:10 ọdọhọ ete: “Ikọ ntiense Jesus edi spirit prọfesi.” Ọtọn̄ọde ke Genesis tutu osịm Ediyarade, mme prọfesi eke odudu spirit ẹnọ ọyọhọ ntọt ẹban̄a udeme Jesus Christ ke uduak Jehovah. Nte owo akabarede emehe ye mme ọyọhọ ntọt oro, akama-nduaidem ndise oro mînyeneke ukwan̄ ye abian̄a abian̄a ekikere oro osụn̄ọde oto mme nsunsu ukpepn̄kpọ Christendom ọwọrọ owụt idem.
11. Didie ke ndifiọk se Bible enen̄erede ekpep aban̄a Eyen Abasi okotụk n̄wan kiet ke Poland?
11 Ndifiọk akpanikọ aban̄ade Eyen Abasi ekeme ndinyene akwa utịp ke idem owo. Ntre ke ekedi ye Danuta, n̄wan kiet ke Poland. Enye ama esisobo ye Mme Ntiense Jehovah ke isua itiaita, okop inem ke se mmọ ẹkekpepde, edi ikanamke utuakibuot akpanikọ edi usụn̄uwem esie. Ekem enye ama ọbọ n̄wed Akakan Owo Oro Akanam Odude Uwem, emi etịn̄de aban̄a uwem Christ ke usụn̄ oro ememde ndifiọk.a Ke ata mbubịteyo, enye ama okụbọde n̄wed oro, aduakde ndikot ibuot kiet kpọt. Nte ededi, ekedi ke usiere ke enye ama okokụre ndikot ofụri n̄wed oro, ke enye akayak enye onịm. Enye ama ọtọn̄ọ eyet. Enye ama ekpe ubọk ete, “Jehovah, fen nọ mi.” Nte utịp se enye okokotde, enye ama okụt ima oro Jehovah ye Eyen esie ẹwụtde ata in̄wan̄în̄wan̄ akan nte akanam okụtde ke mbemiso. Enye ama edifiọk nte ke imọ ye unana ediwụt esịtekọm ke ofụri isua itiaita ima iwọn̄ọde ikpọn̄ un̄wam oro Abasi ke ime akanamde osịm imọ. Ke 1993 enye ama ana baptism nte idiọn̄ọ uyakidem esie nnọ Jehovah ọkọn̄ọde ke mbuọtidem esie ke Jesus Christ.
12. Didie ke nnennen ifiọk aban̄ade Jesus Christ otụk uwem nnyịn?
12 Ẹbuan “edifiọk Ọbọn̄ nnyịn Jesus Christ” ye edidi Christian emi enyenede ifịk onyụn̄ on̄wụmde mfri. (2 Peter 1:8) Ke nso udomo ke afo edinyene udeme ke utọ utom oro, abuanade etop Obio Ubọn̄ ye mmọ en̄wen? Udomo oro owo kiet kiet ekemede ndinam edi se ediwak idaha ẹbierede. (Matthew 13:18-23) Nnyịn ikemeke ndikpụhọde ndusụk idaha; edi imekeme ndikpụhọde ndusụk eken. Nso idinụk nnyịn ndidiọn̄ọ nnyụn̄ nnam mme ukpụhọde oro ẹkemede ndinam? Apostle Paul ekewet ete: “Ima Christ efefịk nnyịn”; ke nditịn̄ ke usụn̄ en̄wen, ima oro enye okowụtde ke ndiyak uwem esie nnọ ke ibuot nnyịn edi ata n̄wọrọnda tutu anam nte esịtekọm nnyịn kaban̄a oro ọkọride, emi eyetụk esịt nnyịn ntotụn̄ọ ntotụn̄ọ. Nte utịp, nnyịn iyefiọk nte ke ididotke ke baba usụn̄ kiet nnyịn ndikaiso mbịne mme ibụk ibụk utịtmbuba nnyụn̄ ndu uwem akpan akpan ndinem idem nnyịn esịt. Utu ke oro, nnyịn iyenam mme ukpụhọde ke mme mbubehe nnyịn man inịm utom oro Christ ekekpepde mme mbet esie ndinam ke akpa itie.—2 Corinth 5:14, 15.
Edida San̄asan̄a N̄kpọn̄ Ererimbot—Ke Nso Udomo?
13. Ntak emi nnyịn mîkpoyomke ndidi ubak ido ukpono oro anamde idemesie ubak ererimbot?
13 Idịghe ọkpọsọn̄ n̄kpọ ndikụt mbụk emi Christendom ye mme ido ukpono eken ẹnyenede koro mmọ ẹyomde ndidi ubak ererimbot. Ẹsida okụk ufọkabasi ẹse ẹban̄a edinam ukpụhọ ukara. Mme oku ẹmekabade ẹdi mme an̄wana en̄wan ukpụhọ ukara. Ke usen ke usen, mme n̄wedmbụk n̄kpọntịbe ẹsiwet mme ntọt ẹban̄ade mme n̄ka ido ukpono ke nsio nsio ikpehe isọn̄ oro ẹn̄wanade ye kiet eken. Iyịp ọmọyọhọ mmọ ke ubọk. (Isaiah 1:15) Ndien ke ofụri ererimbot mme ọkwọrọ ederi ẹkaiso ndidomo ndida n̄kari ndụk ukaraidem. Mme ata andituak ibuot inyeneke udeme ndomokiet ke emi.—James 4:1-4.
14. (a) Nso ke ana nnyịn ke idem nnyịn ifep edieke anade nnyịn ida san̄asan̄a ikpọn̄ ererimbot? (b) Nso ikeme ndin̄wam nnyịn ifep ndidi se afia eke mme edu ye edinam ererimbot omụmde?
14 Edi edida san̄asan̄a n̄kpọn̄ ererimbot abuana se ikande oro. Ima okụk ye se okụk ekemede ndidep, owo ndinyene udọn̄ ke uwọrọiso, ye ebeubọk edibịne inemesịt, adianade ye mme utọ n̄kpọ nte edinana ata udọn̄ ke idem mmọ en̄wen, usu nsu ye ikọ isụn̄i, edisọn̄ ibuot ye ukara, ye edikpu ndiwụt mfara ke idem, ẹdi edu ererimbot. (2 Timothy 3:2-5; 1 John 2:15, 16) Ke ntak unana mfọnmma nnyịn, ndusụk ini nnyịn ke ndusụk usụn̄ imekeme ndisiwụt ndusụk edu oro. Nso ikeme ndin̄wam nnyịn ke en̄wan emi in̄wanade ndifep mme utọ afia oro? Oyom nnyịn iti idem nnyịn iban̄a owo emi edide ntak edu ererimbot. “Ofụri ererimbot onyụn̄ esịne ke ubọk andidiọk.” (1 John 5:19) Inamke n̄kpọ m̀mê akpan usụn̄ edinam ekpetie etabi etabi adan̄a didie, inamke n̄kpọ m̀mê adan̄a ediwak owo didie ẹdu uwem ke usụn̄ oro, ke ini nnyịn ikụtde nte ke akwa asua Jehovah, Satan kpa Devil, ada ke edem, nnyịn iyefiọk nte ke enye enen̄ede ọdiọk.—Psalm 97:10.
Ima Fo Aka Anyan Adan̄a Didie?
15. Didie ke ima unana ibụk oro afo okokụtde akan̄wam fi ndidiọn̄ọ nnennen ido ukpono?
15 Ke ini afo ke akpa ọkọtọn̄ọde ndibuana ye Mme Ntiense Jehovah, nte eyịghe mîdụhe, ima oro owụtde idem ke otu mmọ ama otụk esịt fo ke ntak emi enye edide isio ye edu ererimbot. Nsọn̄uyo oro ẹdoride ke ima unana ibụk anam edisana utuakibuot Jehovah okpụhọde ọkpọn̄ kpukpru orụk utuakibuot eken. Ekeme ndidi emi akanam fi onịm nte ke Mme Ntiense Jehovah ke akpanikọ ẹnam nnennen ido ukpono. Jesus Christ ke idemesie ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”—John 13:35.
16. Mme ifet ewe ẹkeme ndidu nnọ nnyịn owo kiet kiet ndinam ima oro nnyịn inyenede atara?
16 Nte edu oro n̄ko anam ẹdiọn̄ọ fi nte kiet ke otu mbet Christ? Nte mme usụn̄ ẹdu emi afo ekemede ndinam ima emi afo owụtde atara? Eyịghe idụhe kpukpru nnyịn imekeme. Emi esịne se ikande editie ufan ufan ye mmọ en̄wen ke Ufọkmbono Obio Ubọn̄. Ndien edieke nnyịn ikpowụtde ima inọ sụk mbon oro ẹmade nnyịn, didie ke ikpokpụhọde ye ererimbot? Bible akpak ete, “Akan kpukpru n̄kpọ, ẹnyene ufiop ufiop ima ke otu idem mbufo.” (1 Peter 4:8) Anie ke nnyịn ikpowụt ima oro okponde akan inọ? Nte edi Christian eyenete eren m̀mê n̄wan emi idaha esie ke uwem okpụhọrede ye eke nnyịn, emi ndusụk usụn̄ unam n̄kpọ esie ẹsiyatde nnyịn esịt? Nte edi owo emi, ke ntak udọn̄ọ m̀mê usọn̄, mîkemeke ndisidụk mme mbonoesop kpukpru ini? Nte edi nsan̄andọ nnyịn? Mîdịghe nte edi, yak idọhọ, ete ye eka nnyịn oro ẹsọn̄de? Ndusụk mbon oro ẹkenamde ọfọn ke ndiwụt mbun̄wụm spirit, esịnede ima, ẹma ẹkụt etiede mmọ ke idem nte ẹtọn̄ọ ntak ẹkpep kpukpru ẹmi obufa ke ini mmọ ẹkesobode ata n̄kpọsọn̄ idaha oro ẹkemede ndidaha nda nyom ẹnọ owo ke ubon emi obiomode ndo idiọk idiọk se ikperede ndidi ọyọhọ ntịn̄enyịn. Idem ke ini isobode mme utọ idaha ẹmi, nte ededi, ima nnyịn ekpenyene ndika anyan n̄kan ye mbon ufọk nnyịn.
Unọ Ikọ Ntiense Obio Ubọn̄—Edi Akpan N̄kpọ Adan̄a Didie Ọnọ Fi?
17. Edieke edide nnyịn ke idem nnyịn ima ibọ ufọn ito ediwaha emi Mme Ntiense Jehovah ẹkesiwahade, nso ke emi okponụk nnyịn ndinam idahaemi?
17 Akpan usụn̄ kiet emi iwụtde ima emi imade ekemmọ owo edi ndinọ mmọ ikọ ntiense aban̄ade Obio Ubọn̄ Abasi. Otu kiet kpọt anam utom emi Jesus ekebemde iso etịn̄ mi. (Mark 13:10) Mmọemi ẹdi Mme Ntiense Jehovah. Nnyịn ke idem nnyịn imọbọ ufọn ito emi. Idahaemi edi ifet nnyịn ndin̄wam mmọ en̄wen. Edieke nnyịn inyenede ukem ekikere Abasi ke n̄kpọ emi, utom emi eyenyene akamba itie ke uwem nnyịn.
18. Didie ke nnyịn ndikot n̄wed Jehovah’s Witnesses—Proclaimers of God’s Kingdom okpotụk ebuana nnyịn ke unọ ikọ ntiense Obio Ubọn̄?
18 Ẹnọ aduai-owo idem mbụk aban̄ade nte ẹmende etop Obio Ubọn̄ emi ẹkesịm ata nsannsan itie ke isọn̄ ke ukperedem ini emi ke n̄wed Jehovah’s Witnesses—Proclaimers of God’s Kingdom. Edieke afo ọdiọn̄ọde Ikọmbakara, kûtre ndikot enye. Ndien nte afo okotde, wụk akpan ntịn̄enyịn ke kpukpru usụn̄ oro mme owo ẹkebuanade ke ndinọ ikọ ntiense. Nte odu ndusụk owo ẹmi afo ekemede ndikpebe uwụtn̄kpọ mmọ? Ediwak ifet ẹberede ẹnọ kpukpru nnyịn. Ima oro imade Jehovah akpakam onụk nnyịn ndida mmọ nnam n̄kpọ ke eti usụn̄.
19. Didie ke nnyịn ibọ ufọn ke ini nnyịn inyịmede mbiomo oro asan̄ade ye edidiọn̄ọ nnennen ido ukpono?
19 Ke ini nnyịn ke ntem isịnde idem ke ndinam uduak Jehovah, nnyịn iyekụt ibọrọ inọ mbụme oro, Nso ke uwem ọwọrọ? (Ediyarade 4:11) Nnyịn idifiọn̄ọke ubọk aba isan̄a ke ekịm, ye unana uduak. Idụhe ubọkọkọ ndomokiet emi afo ekemede ndisịn idem oro edidade n̄kponn̄kan uyụhọ edi nte ediyak ofụri esịt nsịn ke utom Jehovah Abasi. Ndien nso ubọn̄ ubọn̄ ini iso ke emi akama ntem! Nsinsi uwem oro enyenede uyụhọ ke obufa ererimbot esie, emi nnyịn idikemede ndida ikike nnyịn nnam n̄kpọ ọyọhọ ọyọhọ ke n̄kemuyo ye ima ima uduak emi Abasi okobotde ubonowo.
[Mme Ikọ idakisọn̄]
a Oro Watchtower Bible and Tract Society of New York, Inc., emịn̄de.
Didie ke Afo Ọkpọbọrọ?
◻ Ntak emi edide akpan n̄kpọ ido ukpono ndinyịme Bible nte Ikọ Abasi nnyụn̄ n̄kpono Jehovah nte ata Abasi?
◻ Nso ke ido ukpono akpanikọ ekpep aban̄a udeme Jesus nte Andifak?
◻ Ntak emi mme Christian ẹkpedade san̄asan̄a ẹkpọn̄ ererimbot ẹnyụn̄ ẹwụt ima unana ibụk?
◻ Nso udeme ke unọ ikọ ntiense Obio Ubọn̄ enyene ke nnennen ido ukpono?
[Mme ndise ke page 16]
Baptism edi akpan usio-ukot ke ndinyịme mme mbiomo utuakibuot akpanikọ. Ke ọfiọn̄ kiet kiet, n̄kpọ nte owo 25,000 ke ofụri ererimbot ẹsinam usio-ukot oro
Russia
Senegal
Papua New Guinea
U.S.A.
[Mme ndise ke page 17]
Ndibuana akpanikọ Bible ye mmọ en̄wen edi ubak utuakibuot akpanikọ
U.S.A.
Brazil
U.S.A.
Hong Kong