Se N̄kpọ Be Mme N̄kpọ Oro Afo Okụtde!
ETI enyịn ikpọkidem edi edidiọn̄. Ke akpanikọ, ata ediwak owo ẹditịn̄ nte ke ibat ibat n̄kpọ oro mmimọ inyenede ẹnen̄ede ẹdi ọsọn̄urua n̄kpọ ẹkan enye. Nte ededi, ye mme Christian, odu enyịn oro apostle Paul eketịn̄de aban̄a oro ufọn esie akam okponde akan eti enyịn ikpọkidem. Paul ekewet ete: “Nnyịn [idọn̄ke] enyịn ke se owo okụtde ke enyịn, edi idọn̄ enyịn ke se owo mîkwe ke enyịn.” (2 Corinth 4:18) Ke akpanikọ, ana edi ata san̄asan̄a ukeme ukụt n̄kpọ edin̄wam owo ndikụt mme n̄kpọ oro enyịn mîkemeke ndikụt! Nnyịn imekeme ndikot enye ata eti orụk ukeme ukụt n̄kpọ ke n̄kan̄ eke spirit.
Ntak Ẹyomde Emi-e?
Ama enen̄ede oyom mme Christian eke akpa isua ikie ẹnyene utọ enyịn eke spirit emi. Mmọ ẹkenam utom ukwọrọikọ Christian mmọ ke idak ekese nsọn̄ọn̄kpọ. Paul eketịn̄ enye ke usụn̄ emi: “Nnyịn ikop mfịghe ke kpukpru edem, edi idụhe ke mbaba; ẹfịna nnyịn ekikere, edi itiehe ke n̄kịm enyịn; ẹsịn nnyịn enyịn, edi Abasi ikpọn̄ke nnyịn; ẹyịbi nnyịn ẹduọk ke isọn̄, edi ibiatke nnyịn uwem.”—2 Corinth 4:8, 9.
Kpa ye mme utọ idaha oro, mme anam-akpanikọ mbet ẹma ẹsọn̄ọ ẹda. Ye ọkpọsọn̄ mbuọtidem ke Abasi, mmọ ẹma ẹkeme ndidọhọ nte Paul eketịn̄de ete: “Esịt iduọhọ nnyịn; edi [okposụk] edi nte ikpọkidem nnyịn ataharede, idem nnyịn emi odude ke esịt-esịt ke akabade edi obufa ke usen ke usen.” Nte ededi, nso ikada edikabade ndi obufa emi ke usen ke usen idi? Paul akaiso etịn̄ ete: “Koro mfefere ukụt nnyịn, emi mîdibịghike bịghi, ọdọdiọn̄ anam nnyịn inyene nsinsi ubọn̄, eke okponde odobi; sia nnyịn mîdọn̄ke enyịn ke se owo okụtde ke enyịn, edi idọn̄ enyịn ke se owo mîkwe ke enyịn; koro se owo okụtde ke enyịn ẹdibede ẹfep, edi se owo mîkwe ke enyịn eyebịghi ke nsinsi-nsinsi.”—2 Corinth 4:16-18.
Paul ekesịn udọn̄ ọnọ nditọete esie eke spirit ete ẹkûyak mme mfịna, nsọn̄ọn̄kpọ, ukọbọ—orụk ukụt ekededi—ẹkwi mmọ enyịn abaha ubọn̄ ubọn̄ utịp oro ẹkenịmde mmọ ke iso. Mmọ ẹkpenyene ndise n̄kpọ mbe mme idaha oro mmọ ẹdude idahaemi, ẹwụkde enyịn mmọ ke idara idara utịp usụn̄uwem Christian mmọ. Oro ekedi se ikan̄wamde mmọ ndinam ubiere mmọ ndikaiso ke en̄wan emi edi obufa ke usen ke usen. Ukem oro ke oyom mme Christian mfịn ẹnyene utọ eti enyịn eke spirit oro.
Da Mme Ukụt Idahaemi nte N̄kpọ Ibio Ini!
Ye imade ye mîmaha, nnyịn imesikụt mme n̄kpọ oro nnyịn mîkpoyomke ndikụt ke usen ke usen. Ke isede ukụtiso nnyịn ikemeke nditre ndikụt mbọn ye mme ndo ikpọkidem oro owo mîyomke, ẹwụtde unana mfọnmma eke ikpọkidem. Ke ini nnyịn iwụkde enyịn ise ukụtiso eke Ikọ Abasi, nnyịn imesikụt mme mmeme ye ndo eke spirit, ke idem nnyịn ye eke mbon en̄wen. (James 1:22-25) Ndien ke ini nnyịn isede n̄wedmbụk n̄kpọntịbe eke usen ke usen m̀mê television, nnyịn imesisọsọp ikụt ukwan̄ikpe, ibak, ye n̄kpọ mfụhọ oro ẹnamde esịt nnyịn ofụhọ.
Satan akpama ndinam nnyịn iduọk idotenyịn ke ntak mme n̄kpọ oro nnyịn ikụtde mîdịghe iwọn̄ọde ntịn̄enyịn nnyịn inyụn̄ itọn̄ọ ndiyok ke mbuọtidem. Didie ke nnyịn ikeme ndibiọn̄ọ emi nditịbe? Ana nnyịn itiene uwụtn̄kpọ oro Jesus Christ okonịmde, nte apostle Peter otorode ke ini enye ọkọdọhọde ete: “Ẹkekot mbufo ẹte ẹdinam oro; koro Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.” (1 Peter 2:21) Ke kpukpru ikpehe uwem Christian, Jesus ekedi mfọnmma uwụtn̄kpọ.
Ke ndinyan ubọk n̄wụt Jesus nte uwụtn̄kpọ nnyịn, Peter ama enen̄ede etịn̄ ete ke Jesus ama okụt ndutụhọ. Ke akpanikọ, Jesus ama okụt ndutụhọ akamba akamba ke ini okodude ke isọn̄. Nte “etubom anamutom” Jehovah emi okodude ke ini ẹkebotde ubonowo, enye ama ọfiọk nnennen se Abasi okoyomde mme owo ẹdi. (Mme N̄ke 8:30, 31, NW) Edi idahaemi enye ama okụt nnennen se idiọkn̄kpọ ye unana mfọnmma akanamde mmọ ẹkabade ẹdi. Ke usen ke usen enye ama esikụt onyụn̄ anam n̄kpọ ye unana mfọnmma ye mmeme mme owo. Anaedi oro ama esisịn enye ke idomo.—Matthew 9:36; Mark 6:34.
Ke ẹsiode ukụt mbon en̄wen efep, Jesus n̄ko ama okụt eke esie. (Mme Hebrew 5:7, 8) Edi ye mfọnmma enyịn eke spirit, enye ama ese n̄kpọ ebe mmọ man okụt utịp edidi se ẹmenerede ẹsịm uwem unana n̄kpa ke ntak usụn̄uwem nsọn̄ọnda esie. Ekem nte Edidem Messiah, enye eyenyene ifet ndimenede ubonowo emi odude ke ndutụhọ nsio ke usụhọde itie esie mfiak n̄kosịm mfọnmma idaha oro Jehovah ke akpa akaduakde. Ndiwụk enyịn esie ke idotenyịn ẹmi enyịn mîkwe mi ama an̄wam enye ndimụm idatesịt esie n̄kama ke utom Abasi kpa ye ukụt oro enye okokụtde ke usen ke usen. Paul ekewet ke ukperedem ete: “Ke ntak idatesịt oro ẹkenịmde enye ke iso enye ama ọyọ eto ndutụhọ, abatde bụt ke usụhọde n̄kpọ, ama onyụn̄ osụhọde etetie ke ubọk nnasia ebekpo Abasi.”—Mme Hebrew 12:2, NW.
Jesus akananam ikayakke nsọn̄ọn̄kpọ ye mme idaha oro ẹketiede idomo idomo ẹnam enye ọduọk idotenyịn, ọwọn̄ọde ntịn̄enyịn esie, m̀mê oyok ke mbuọtidem. Nte mme mbet esie, ana nnyịn itiene n̄wọrọnda uwụtn̄kpọ esie ketket.—Matthew 16:24.
Wụk Enyịn ke Nsinsi N̄kpọ Oro Enyịn Mîkwe!
Ke etịn̄de aban̄a se ikan̄wamde Jesus ndiyọ, Paul n̄ko ama owụt usụn̄ oro nnyịn ikpetienede ke ini enye ekewetde ete: “Ẹyak ifehe mbuba eke anade nnyịn ke iso ye ime, iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama.” (Mme Hebrew 12:1, 2) Ih, man ifehe mbuba Christian uforo uforo ye ke idatesịt, ana nnyịn ikụt n̄kpọ ibe mme n̄kpọ oro ẹdude nnyịn ke iso idahaemi. Edi didie ke nnyịn “iwụk enyịn ise” Jesus, ndien nso ke emi edinam ọnọ nnyịn?
Nte uwụtn̄kpọ kiet, ke 1914, ẹma ẹdori Jesus ke ebekpo nte Edidem Obio Ubọn̄ Abasi, ndien enye etie ke heaven akara. Nte ededi, kpukpru emi edi se enyịn ikpọkidem nnyịn mîkwe. Edi, edieke nnyịn ‘iwụkde enyịn ise’ Jesus, enyịn eke spirit nnyịn eyen̄wam nnyịn ndikụt nte ke enye idahaemi eben̄e idem ndinam n̄kpọ man ada idiọk editịm n̄kpọ emi okosịm utịt onyụn̄ ọkọbi Satan ye udịm mme demon esie esịn ke itie unana edinam. Ke isụk isede ikaiso, ukeme ukụt n̄kpọ nnyịn ke n̄kan̄ eke spirit eyenam ikụt utịbe utịbe obufa ererimbot emi “n̄kpa [mîdinyụn̄] idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 19:11-16; 20:1-3; 21:4.
Ntre, ndien, utu ke ndiyak ukụt ibio ini oro nnyịn ikemede ndisobo ke usen ke usen efịk nnyịn onịm, ntak emi nnyịn mîwụkke ntịn̄enyịn nnyịn ke mme n̄kpọ oro ẹdibịghide ke nsinsi? Ye enyịn mbuọtidem, ntak mûsehe n̄kpọ ube udọn̄ọ ye idiọkitọn̄ eke mbiara ererimbot emi man okụt paradise oro ọyọhọde ye mme owo oro ẹkopde nsọn̄idem, inemesịt, ẹnyụn̄ ẹwụtde edikere mban̄a? Ntak mûsehe n̄kpọ ube mme ndo nnyịn, eke ikpọkidem ye eke spirit, unyụn̄ ukụt nte ibọhọde mmọ ebe ke ufọn uwa ufak Christ? Ntak mûsehe ube okpo mme owo oro ẹwotde ke ekọn̄, ubiatibet, ye afai unyụn̄ ukụt nte ẹnọde mbufa mbon oro ẹnamde ẹset item ke emem ye edinen ido Jehovah?
Ke adianade do, ‘ndiwụk enyịn nse’ Jesus eyesịne n̄ko ndiwụk enyịn eke spirit nnyịn ke se Obio Ubọn̄, okposụkedi enyịn mîkwe, ama akananam ke otu ikọt Abasi ke isọn̄: edidianakiet, emem, ima, ima nditọete, ye uforo eke spirit. Christian an̄wan kiet ke Germany, ke ama ekese video oro United by Divine Teaching, ama ewet ete: “Video emi eyen̄wam mi n̄kaiso nnyene ke ekikere nte ke ata ediwak nditọete Christian iren ye iban ke ofụri ererimbot ke ẹnam n̄kpọ Jehovah ke edinam akpanikọ idahaemi—ndien ẹnam emi kpa ye ubiọn̄ọ otode mbio obio. Edidianakiet eke nditọete nnyịn edi ọsọn̄urua n̄kpọ adan̄a didie ntem ke ererimbot afai ye usua emi!”
Nte afo n̄ko “omokụt” Jehovah, Jesus, mme anam-akpanikọ angel, ye ediwak miliọn ekemmọ mme Christian ẹdade ke n̄kan̄ fo? Ke edide ntre, afo udutịmekede esịt ukaha uban̄a “ekikere n̄kpọ eyo emi” oro ekemede ndibaba fi nnam okop mmemidem ndien anam fi “anana mfri” ke utom Christian. (Matthew 13:22) Ntre, ‘wụk enyịn se’ Jesus ebe ke ndiwụk enyịn eke spirit fo ke Obio Ubọn̄ Abasi oro ẹma ẹkewụk ye mme edidiọn̄ esie, eke idahaemi ye eke ini iso.
Du Uwem Man Okụt Se Enyịn Mîkwe!
Ke ikụtde akamba ukpụhọde oro odude ke ufọt nsinsi obufa ererimbot Abasi ye ntịme ntịme akani ererimbot eke mfịn, emi ekpenyene ndinụk nnyịn ndikama idem nnyịn ke utọ usụn̄ oro edinamde ẹbat nnyịn nte ke imodot ndidu uwem n̄kụt mme ataata idem n̄kpọ oro nnyịn ikemede ndikụt ke enyịn ikike kpọt mfịn. Edidi ọkpọsọn̄ n̄kpọ akwa udịm mbon oro ẹdinamde ẹset ndinịm se enyịn mmọ ẹdikụtde ke ini ẹdemerede ẹdikụt edinen paradise isọn̄ oro okpụhọrede ye ererimbot oro mmọ ẹkekụtde mbemiso mmọ ẹkpan̄ade. Kere ban̄a idatesịt oro nnyịn idinyenede ke ndidu uwem man idara mmọ inyụn̄ inam an̄wan̄a mmọ se Abasi anamde!—Men Joel 2:21-27 domo.
Ih, eti enyịn eke spirit edi ọsọn̄urua n̄kpọ adan̄a didie ntem, ndien edi akpan n̄kpọ didie ntem ndinam enye akaiso ọsọp! Nnyịn ikeme ndinam emi ebe ke ndisịn idem ke ukpepn̄kpọ Bible idemowo kpukpru ini, ndidụk mme mbonoesop Christian, nditịn̄ nnọ mbon efen mban̄a idotenyịn nnyịn oro ọkọn̄ọde ke Bible, ndien ke akande kpukpru, ibọn̄ akam iyom ndausụn̄ Abasi. Emi eyenam ukeme ukụt n̄kpọ eke spirit nnyịn ọsọp onyụn̄ an̄wan̄a, an̄wamde nnyịn ndise n̄kpọ mbe mme n̄kpọ oro nnyịn ikụtde!