Ẹma Ẹbiere Ndinam N̄kpọ Jehovah!

“AFO unyeneke ndika ukwọrọikọ!” “Kûyak ikọt mbufo ẹwaha mi!” Ediwak Christian iban ẹsikop mme ebe mmọ oro ẹbiọn̄ọde-biọn̄ọ ẹtịn̄de mme ikọ ẹmi ye mmọ eke ẹtiede ntem. Edi ke ini irenowo ẹmi ẹnamde utom ekọn̄, iban mmọ ẹsisobo san̄asan̄a n̄kpọ-ata ke mbuọtidem mmọ. (Isaiah 2:4; John 17:16) Didie, ndien, ke mme utọ Christian iban oro ẹkaiso ndikop nsọn̄idem ke n̄kan̄ eke spirit ẹnyụn̄ ẹsịn ifịk ke utom Obio Ubọn̄?

Edinam akpanikọ nnọ Jehovah Abasi adianade ye ọkpọkpọ ubiere esin̄wam mmọ ndisọn̄ọ nda. Yvonne, n̄wan owoekọn̄ kiet, anam an̄wan̄a ete, “N̄kere ke ekedi ọkpọsọn̄ ubiere mi. Mma mfiọk nte ke ana mme usụn̄ ẹdu ndikan ubiọn̄ọ ebe mi.” Ke akpanikọ, ẹma ẹdu.

Christian an̄wan efen, emi ọdọde akwa owoekọn̄, obụk nte nsọn̄ọnda esie akakam anamde uwem emem akan ọnọ ebe esie. Enye anam an̄wan̄a ete, “Enye ọmọfiọk ndutịm mi ọkọrọ ye eke esie, ndien mbonekọn̄ ẹsima oro.” Edi, n̄kaiso utom esie nnọ Jehovah idịghe mmemmem n̄kpọ.

Ndikan Ndobo

Iban mbonekọn̄ ẹsiwak ndisobo n̄kpọ-ata eke ediwọrọ idụn̄ ke ntọt usen ifan̄ kpọt edieke anade mmọ ẹsan̄a ye mme ebe mmọ ẹka itieutom oro oyomde usụn̄ ọkpọn̄ ufọk. Ekem, ndidụn̄ ke n̄kann̄kụk oro mmọ mîmeheke, edi mmemmem n̄kpọ ndikere ke idu ikpọn̄. Edi ikpenyeneke ndidi ntre. Mbon oro ẹnamde n̄kpọ Jehovah ẹnyene ufọn oro mmọ ẹbọde. Nso idi oro? Nte Christian apostle Peter etịn̄de, enye edi “ofụri ebuana nditọete.” Emi idahaemi osịmde ediwak miliọn ke ibat, Mme Ntiense Jehovah ke idụt 231 ẹnam n̄kpọ nte akwa ubon Christian, kpa “otu nditọete.” Afo eyekụt mmọ ke ekperede ndidi ke kpukpru ebiet.​—⁠1 Peter 2:17, NW, ikọ idakisọn̄.

Susan, inikiet inikiet ama ọwọrọ ọkpọn̄ ikpehe obio esie, ekebehe man okodụn̄ ke itieutom mme an̄wana ekọn̄ ofụm ẹmi ẹkenọde ebe esie akanam utom. Ke edide obufa owo ke mbuọtidem onyụn̄ odude ke idak mfịghe otode ebe oro mînịmke ke akpanikọ nditre ndibuana ke utom ukwọrọikọ Christian, enye obụk ete: “Mma n̄ka mme mbonoesop n̄kann̄kụk ye unana ubiatini, ndien do mma n̄keme nditie nnyụn̄ nnyene nneme ye nditọete iban eken. Mmekeme nditịn̄ ke esịt akpanikọ nte ke ekedi ebuana emi akanam mi n̄kop nsọn̄idem.”

Ndusụk ini ndobo esida mfụhọ edi. Idem adan̄aoro, eti mbụk esinọ inem etop oro anamde owo okop idatesịt. Glenys, eyenete an̄wan otode England emi akasan̄ade ye ebe esie ke ini ẹkenọde enye aka esenidụt, obụk ete: “Ke ini n̄kenen̄erede n̄kop mfụhọ, ye unana edikodori enyịn mban̄a, owo n̄kọdiọn̄ọde ediwak isua ẹmi ẹkebede ke ini ami ke idemmi n̄kodude ke ekọn̄ ama ewet mi onyụn̄ ọdọhọ ete ke imọ ikana baptism ndondo emi nte kiet ke otu Mme Ntiense Jehovah. Oro ama ọnọ mi nsịnudọn̄ ke ata nnennen ini.”

Jane, emi akanamde isan̄ ye ebe esie aka Kenya, ama okụt ete ke mme mbonoesop Christian ẹdi n̄kpọ oro uwem esie ọkọn̄ọde, idem okposụkedi ẹkenịmde ke usem oro enye mîkokopke. Enye anam an̄wan̄a ete, “Mma mfiọk nte ke emi edi ebiet emi Jehovah okoyomde mi ndu. Ami n̄kodu ye nditọete mi, ndien mmọ ẹketie nte ibọkiyịp. Mmọ ẹma ẹdara mi, ndien eketie mi ke idem nte nnyịn ikedi ubon kiet.”

Jane akam edi kiet ke otu ediwak owo ẹmi ẹdude ke mme utọ idaha oro ẹmi ẹkekụtde iman eke spirit oro enye mîkakam ifiọkke ke imenyene!​—⁠Mark 10:​29, 30.

Nsọn̄ọnda ke Ini Ẹsobode Ubiọn̄ọ

Jesus ama odụri owo utọn̄ ete, “Ẹkûse ẹte n̄kedi ndisịn emem ke isọn̄: n̄kedịghe ndisịn emem, edi ofụt.” (Matthew 10:34) Nso ke ikọ esie ọkọwọrọ? Idem ke esịt ubon, emi ẹkpedoride enyịn ndinyene emem, A. T. Robertson etịn̄ ke Word Pictures in the New Testament ete ke ẹkeme “nditop ofụt nsịn ke mbuari.” Jesus ama ọdọhọ ete, “Ndien mme asua owo eyedi mbonufọk esie.” (Matthew 10:36) Mme ikọ ẹmi ẹdi akpanikọ didie ntem ke ini nsan̄andọ asuade akpanikọ!

Ke ini Diane ọkọtọn̄ọde ndikpep Bible ye Mme Ntiense Jehovah, ebe esie, akwa owo udịmekọn̄ ofụm, ama enen̄ede okop idiọkesịt. Nso odudu ke emi ekenyene ke ndọ mmọ? Diane anam an̄wan̄a ete, “Eketie nte eboho ice ke ufọt nnyịn. Nnyịn ima idọ ndọ ye inemesịt. Ke mbuari nnyịn n̄kukụre ikodụn̄ ke ukem ufọk.” Didie, ndien, ke enye ọkọyọ? “Mbuọtidem ye ubiere ẹkedi ata akpan n̄kpọ, ọkọrọ ye un̄wam otode Jehovah ye spirit esie.” Diane ama eti uwụtn̄kpọ Bible aban̄ade prọfet Daniel.

Ke ini ẹkemende ke ntan̄mfep ẹfep ẹka Babylon ẹnyụn̄ ẹnọde udia oro mîdotke ye asan̄autom Abasi, Daniel “aduak ke esịt esie, ete ke imọ idisabakede idem imọ ke udia edidem.” Ih, Daniel ama anam ubiere ofụri esịt. Enye ama ebiere ke esịt esie ete ke imọ ididehede isabade idem imọ ke ndidia udia oro. Nso uko ke enye okowụt ntem nte ‘enye ekeben̄ede etubom mme eunuch, ete ikûsabade idem imọ’! Nso ikedi utịp? Jehovah ama ọdiọn̄ nsọn̄ọnda esie.​—⁠Daniel 1:​8, 9, 17.

Kpasụk ntre mfịn ebe oro ọbiọn̄ọde ekeme ndiyom ete n̄wan esie etre ndidụk mme mbonoesop. Didie ke enye akpanam n̄kpọ? Jane ama okụt idemesie ke utọ idaha emi. Enye anam an̄wan̄a ete: “Akananam ami n̄kememke idem ke idak mfịghe. Mma mfiọk nte ke ikpanaha n̄kan̄ mbuọtidem. N̄kenyene ndiwụt adan̄a nte mme mbonoesop ẹnyenede se ọwọrọde ọnọ mi.” Jehovah ama ọdiọn̄ ubiere esie nte enye akakade iso ndidụk.

Glenys obụk ete, “Ebe mi ama esidomo ndikpan mi ndika mme mbonoesop, edi oro ikebịghike ikaha. Ami n̄kosụk n̄kaka. Ke nnyọn̄de ndi ufọk, enye ama esimia mi ndusụk ini, ndien ndusụk enye ama esidop mi uyo.” Edi, enye ama ọyọ, ọbọn̄de akam ndien ndien. N̄ko, iba ke otu mbiowo esop ẹma ẹsibọn̄ akam ye enye kpukpru ini, emi ekesịnde udọn̄ ọnọ enye akamba akamba ndikaiso ndụk.​—⁠James 5:13-⁠15; 1 Peter 2:23.

Ndusụk ini mbon oro ẹdide ikpọ owo ẹnọ ebe ẹkeme ndinyịk enye ndikpan n̄wan esie ndikwọrọ eti mbụk. Diane ama okụt ete ke imọ inyene ndinam an̄wan̄a ebe imọ se idide akpan n̄kpọ inọ imọ. Enye ọkọdọhọ ete, “Mma mben̄e idem ndiyọ mme utịp oro ẹtode ami ndikaiso n̄kwọrọ ikọ.” Emi ekebiet idaha oro mme apostle ẹkedade didie ntem! (Utom 4:​29, 31) Edi, enye ama owụt mbufiọk ke ukwọrọikọ esie. Enye obụk ete: “Mma nsinọ mme owo ikot ndin̄wọn̄ kọfi nnyụn̄ nnọ kpukpru owo oro ẹdide n̄wed Akpanikọ.”​—⁠Matthew 10:16; 24:14.

Nsụkibuot ye Unana Edikan̄ Mbuọtidem

Okposụkedi ẹkopde mfụhọ oto mfịghe ndọ, Christian iban ẹsak iso ẹse ini iso ẹnyụn̄ ẹberi edem ke Jehovah. Emi esin̄wam mmọ ndinyene ekikere oro adade ukem ukem. Mmọ ẹsinọ mme ebe mmọ se ededi un̄wam oro mmọ ẹkemede ye unana edikan̄ mbuọtidem mmọ. Ke ndinam ntre, mmọ ẹtiene item eke odudu spirit emi Peter ọkọnọde ete: “Mbufo iban, ẹsụk idem ẹnọ ebe eke mbufo.” (1 Peter 3:1) Ke The Amplified New Testament, item apostle emi okot ntem: “Ẹsụhọde idem mbufo nte edi udiana ẹnọ ẹnyụn̄ ẹdude ke idak mmọ, ẹnyụn̄ ẹkpụhọde ẹda ekekem ye idaha mmọ.” Tịmfiọk nte Jane eketienede item emi. Enye anam an̄wan̄a ete, “Ebe mi ama asian mi ete ke se nyomde ndinam inaha atuaha ye utom esie. Ntre mma ndomo ndiyom mme usụn̄ oro n̄kemede ndin̄wam enye.”

Ndusụk Christian iban ẹma ẹnyịme ke ntre ndidụk mme edinam ebuana otuowo oro ẹkenọde mme ebe mmọ ikot ndidụk. Edi mmọ ẹsụk ebebiere ẹte ke mmimọ ididehede ikan̄ mbuọtidem. Jane ama ada ini ndineme n̄kpọ ye ebe esie mban̄a emi. Enye ke mfọnido ama anam an̄wan̄a ete ke imọ imonyịme ndidụk edi ke iyomke edidu imọ do anam enye adia bụt. “Mma mfiọk nte ke ini ke ini ẹyedori enyịn kpukpru owo oro ẹdude do ndidaha nda nnyụn̄ ntiene mbuana ke edimenede akrasi mmịn ke enyọn̄. Ami mma mfiọk nte ke utuakibuot enyene Jehovah ikpọn̄, ndien edimenede akrasi mmịn ke enyọn̄ aka anyan akan ikpîkpu ediwụt ukpono. Ebe mi ama ọfiọk nte utọ idaha oro ọkpọdiọkde, ntre enye ama akam ọdọhọ mi: ‘Kûdi!’ Ami mma nnam oro.”

Glenys, ke n̄kan eken, ama asan̄a ye ebe esie aka utọ edinam oro, edi enye ama ese mme ikpọ owoekọn̄ ke ibuot okpokoro. Ke ini enye okokụtde nte mmọ ẹben̄ede idem ndimenede mme akrasi mmịn ke enyọn̄, enye ke mbufiọk ama ọwọrọ aka itie uken̄idem! Ih, iban ẹmi ẹma ẹkpụhọde ẹda ekekem ye mme idaha edi ikedehede ikan̄ mbuọtidem.

‘Ẹdụdi Ẹda Itoho ke Ukwọrọikọ’

Yvonne ama ọkọk ibuot ete, “Edieke nnamde ukeme mi nte n̄wanndọ, ebe mi eyekụt ke akpanikọ ke okpụhọde mi.” Ntre enye ama okot onyụn̄ afiak okot ibuot n̄wed Uwem Ufọk oro ọdọhọde, “N̄wan Ndọ Oro Ẹnen̄erede Ẹma.”a “Ami mma n̄wụk akpan ntịn̄enyịn ke mme n̄kpọ ẹdude ke idak ekpri ibuotikọ oro, ‘Mme Atuaeyet, Mme Ọtọhọ Utọk’! Edi mma n̄kụt nte ke adan̄a nte n̄kodomode ndinyene nneme ye ebe mi, ntre ke mme n̄kpọ ẹkedọdiọk ẹkan.” Nte ededi, ke akpatre, enye ama okụt unen ke ndin̄wam ebe esie anam n̄kpọ Jehovah. Didie? Ebe ke ndida edumbet oro ẹwetde ke 1 Peter 3:1, nte ke ekeme ‘ndidụdi mme ebe nda itoho ke ukwọrọikọ,’ nsịn ke edinam.

Usụn̄ oro Christian iban ẹsede enyịn ke mme ubon mmọ enyene ekese ndinam ke nditoro Ido Ukpono Christ nnọ mbon en̄wen. Diane obụk ete, “Mma ndomo ndinam akpanikọ edi n̄kpọ oro enemde nte n̄kekeme. Ke ini n̄kesikade mme mbonoesop, ebe mi eyenen̄ede okop ndobo, ntre mma nnam edi ido nditeme nditọwọn̄ ndinen̄ede ndu eti uwem ke ini nnyịn isịmde ufọk. Ami n̄ko mma nsidomo ndinọ enye san̄asan̄a ntịn̄enyịn ke ini nnyịn isịmde ufọk.” Sụn̄sụn̄ edu ebe esie ama okpụhọde nte enye akanamde n̄kpọ aban̄a eti ntịn̄enyịn ubon esie.

Ekemmọ mme asan̄autom Jehovah ẹkeme ndin̄wam n̄ko. Jane obụk ete ke ebe esie ama esidara ndidu ye mme isụn̄utom ẹkedide Mme Ntiense oro enye okosobode ke Kenya. “Mmọ ẹma ẹnam ufan ye enye ẹnyụn̄ ẹneme ẹban̄a mbre bọl, ndien mmọ ẹma ẹfọn ido etieti. Ke ediwak ini, ẹma ẹsinọ nnyịn ikot ndidi udia ke nsio nsio ufọkidụn̄ isụn̄utom.” Ebe esie ke ukperedem ama anam an̄wan̄a ete: “Mma ntọn̄ọ ndikụt ido ukpono Jane ke ata isio isio idaha. Mme ufan esie ẹkedi mbon oro ẹnyenede ifiọk etieti ẹmi ẹkemede ndineme nsio nsio ibuot nneme.” Kpasụk ntre, ebe Diane ama okpụhọde ekikere oro enye ekenyenede aban̄a akpanikọ. Ke ini moto oro enye ekesiwatde akabiarade, akparawa Ntiense kiet ama edinọ enye un̄wam. Enye ọdọhọ ete, “Oro ama enen̄ede otụk mi.”

Edi akpanikọ, idịghe kpukpru nsan̄andọ ke ẹdụdi ẹsịn ke akpanikọ. Nso ndien? Jehovah ọnọ un̄wam man an̄wam mme anam-akpanikọ ndiyọ. (1 Corinth 10:13) Kere ban̄a nsịnudọn̄ oro Glenys ọnọde mbon oro ẹdude ke idaha ebietde eke esie: “Kûdede uyịk m̀mê Jehovah edi Enyeemi ọkọtọn̄ọde ndọ ye nte m̀mê enye oyom mme ọdọ ndọ ẹdu ọtọkiet. Ntre inamke n̄kpọ m̀mê nso ke ebe ekeme ndinam mîdịghe m̀mê nso ubiọn̄ọ ke afo ekeme ndinyene nto mbon oro ẹdude ye afo, Jehovah idikpọn̄ke fi tutu amama.” Okposụkedi ebe esie mîdịghe andituak ibuot nnọ Jehovah kan̄a, edu esie kaban̄a enye ye akpanikọ omosụhọde ubọk.

‘Tọ ye Mmọn̄eyet; Dọk ke Idara’

Ke akpanikọ, mme Christian iban ẹmi ẹmebiere ndinam n̄kpọ Jehovah. Edieke afo odude ke mme utọ idaha oro, nam emi edi ubiere fo n̄ko. Ti item emi: “Bak Jehovah Abasi fo; nam n̄kpọ esie, nyụn̄ yịre ye enye.”​—⁠Deuteronomy 10:20.

Andiwet psalm ọdọhọ ete, “Owo eke obiomde akpan n̄kpasịp, aka atua eyet, aka atua eyet, iditreke ndibiom mme ebek esie nnyọn̄ ke idara.” (Psalm 126:6) Ntiense kiet ọdọhọ ete, “Afo eyenen̄ede atua eyet nte afo odomode ndiwụt nsan̄andọ fo akpanikọ, edide ke ndopuyo m̀mê ke ikọ inua. Edi ke akpatre afo eyefiori ke idara koro idem edieke enye mîbọhọ akpanikọ, Jehovah eyediọn̄ fi ke ukeme oro afo esịnde.”

Kpukpru mbon oro ẹnamde n̄kpọ Jehovah ke edinam akpanikọ kpa ye ubiọn̄ọ ke ufọk ẹbọ ata itoro. Mmọ ẹdot ibetedem ye ima. Mmọ ẹkpekam ẹsọn̄ọ ẹda ye idaha unana edikan̄ mbuọtidem mmọ, ẹbierede ndinam n̄kpọ Jehovah!

[Mme Ikọ idakisọn̄]

[Ndise ke page 28]

Ndikpep n̄kpọ ke akam ọsọn̄ọ ubiere Christian