Nso ke Bible Etịn̄ Aban̄a Owo Ndidọn̄ N̄kpọ ke Iso ye Ndibana Idem?
Se Bible ọdọhọde
Kpa ye oro Bible mînen̄ekede itịn̄ iban̄a owo ndidọn̄ n̄kpọ ke iso m̀mê ndibana idem, Bible ikpanke owo ndinam ntre. Bible itịn̄ke se owo akpanamde man eye uyai, edi etịn̄ aban̄a “edisịnen̄kpọ eke mîkemeke ndibiara, kpa sụn̄sụn̄ ye ifụre ifụre edu.”—1 Peter 3:3, 4.
Bible ikpanke owo ndibana idem
Nti iban ke Bible ẹma ẹsibana idem.Rebekah emi ọkọdọde Isaac eyen Abraham ama esịne n̄kpanuen gold ke ibuo, esịne n̄kpọubọk gold ye mme ọsọn̄urua n̄kpọmbana eken emi Abraham ete ebe esie ọkọnọde ẹsọk enye. (Genesis 24:22, 30, 53) Esther ama enyịme ẹtiene “ẹnuak enye idem” man ẹse m̀mê enye oyodot ndidi ọbọn̄an̄wan Obio Ukara Persia. (Esther 2:7, 9, 12) Etie nte ẹma ẹsida “mme n̄kpọ mmaidem” m̀mê “nsio nsio n̄kpọ mbana idem” n̄ko ẹbana mme owo idem.—New International Version; Easy-to-Read Version.
Bible ada n̄kpọmbana ọnọ nti uwụtn̄kpọ. Ke uwụtn̄kpọ, Bible ọdọhọ ke owo oro ọnọde owo eti item etie “nte n̄kpanuen utọn̄ emi ẹnamde ke gold . . . ke utọn̄ andikop.” (Mme N̄ke 25:12) Jehovah akada nte enye akanamde n̄kpọ ye idụt Israel odomo ye nte ebe adade n̄kpọubọk, n̄kpọitọn̄, ye n̄kpanuen utọn̄ abana n̄wan esie idem. Emi ama anam idụt Israel ẹye “ata etieti.”—Ezekiel 16:11-13.
Se mme owo ẹtịn̄de ẹban̄a owo ndidọn̄ n̄kpọ ke iso ye ndibana idem
Nsu: Mme owo ẹdọhọ ke 1 Peter 3:3 akpan “edidọk idet ye edisịne n̄kpọmbana gold.”
Akpanikọ: Se idude ke 1 Peter 3: 3-6 owụt ke Bible etịn̄ aban̄a nte eti edu enen̄erede ọfọn akan uyai ye ndibana idem. Mme itie en̄wen ke Bible ẹtịn̄ n̄ko nte eti edu ọfọnde akan uyai ye ndibana idem.—1 Samuel 16:7; Mme N̄ke 11:22; 31:30; 1 Timothy 2:9, 10.
Nsu: Mme owo ẹdọhọ ke sia Jezebel, emi ekedide idiọk Ọbọn̄an̄wan, ọkọdọn̄de n̄kpọ ke iso, ke oro owụt ke ọdiọk owo ndidọn̄ n̄kpọ ke iso.—2 Ndidem 9:30.
Akpanikọ: Jezebel ekedi ebreidiọn̄ ye owotowo; Jehovah ekekpe ikpe ọnọ enye ke ntak idiọkn̄kpọ esie ikedịghe ke ntak emi enye ọkọdọn̄de n̄kpọ ke iso.—2 Ndidem 9:7, 22, 36, 37.