Ẹsọn̄ọ Ẹda ke Mbuọtidem!
Mme Akpan N̄kpọ Ẹtode Akpa N̄wed Peter
MME NTIENSE JEHOVAH ẹsobo nsio nsio afanikọn̄, m̀mê idomo ke mbuọtidem mmọ. Ke ndusụk idụt, mmọ ẹnam utom edikwọrọ Obio Ubọn̄ ke idak ọkpọsọn̄ ukọbọ. Andida ke edem mmọemi ye ukeme en̄wen ẹmi ẹsịnde ndibiat itie ebuana mmọ ye Abasi edi Satan kpa Devil. Edi enye idikwe unen, koro Jehovah anam mme asan̄autom esie ẹsọn̄ọ ẹda—ih, ẹsọn̄ọ ẹda ke mbuọtidem.
Apostle Peter ama enyene ifet ‘ndisọn̄ọ nditọete esie idem’ emi ‘nsio nsio idomo akanamde edu ke mfụhọ.’ (Luke 22:32; 1 Peter 1:6, 7) Enye ama anam oro ke akpa n̄wed esie, emi ekewetde ke n̄kpọ nte 62-64 C.E. ke Babylon. Ke enye, Peter ama ọnọ mme Christian ẹdide mme Jew ye Gentile item, ndọn̄esịt, ye nsịnudọn̄, an̄wamde mmọ ndisọn̄ọ nda ke en̄wan Satan ẹnyụn̄ “ẹsọn̄ọ ẹda ke mbuọtidem.” (1 Peter 1:1, 2; 5:8, 9) Idahaemi emi ini Devil edide ibio, en̄wan esie onyụn̄ edide ata ibak ibak, ke akpanikọ ikọt Jehovah ẹkeme ndidia ufọn nto ikọ Peter eke odudu spirit.
Edu Oro Ọkọn̄ọde ke Mme Edumbet Abasi
Edide idotenyịn nnyịn edi eke heaven m̀mê eke isọn̄, enye ekpenyene ndin̄wam nnyịn ndiyọ mme idomo nnyụn̄ nnam n̄kpọ ke usụn̄ Abasi. (1:1–2:12) Idotenyịn uda uwem eke heaven nnyene anam mbon oro ẹyetde aran ẹdara ke idak idomo, emi ke akpanikọ anamde mbuọtidem mmọ asana. Nte ufọk eke spirit oro ẹbọpde ke itiat idakisọn̄ edide Christ, mmọ ẹwa uwa eke spirit oro enemde Abasi esịt ẹnyụn̄ ẹkama idem mmọ ke eti usụn̄ oro adade ubọn̄ ọsọk Enye.
Mme edinam nnyịn ye ekemmọ owo ẹkpenyene ndidi se ẹdumbet Abasi akarade. (2:13–3:12) Peter ama owụt nte ke nnyịn ikpenyene ndisụk idem nnọ mme andikara ẹdide owo. Nditọufọk ẹkenyene ndisụk idem nnọ mme eteufọk mmọ, ibanndọ ẹnyụn̄ ẹsụk idem ẹnọ mme ebe mmọ. Edu Abasi eke n̄wanndọ Christian ẹkeme ndidụri ebe esie oro mînịmke ke akpanikọ nsịn ke ata mbuọtidem. Ndien ebe oro onịmde ke akpanikọ ekpenyene ‘ndinọ n̄wan esie ukpono, nte enyeemi ememde akan.’ Kpukpru Christian ẹkpenyene ndikop mbọm ye kiet eken, ẹnyene ima nditọete, ẹnam se idide eti, ẹnyụn̄ ẹbịne emem.
Edime Ime Ada Mme Edidiọn̄ Edi
Ime mbuọtidem eke mme ata Christian ke ndutụhọ eyesụn̄ọ ke mme edidiọn̄. (3:13–4:19) Edieke nnyịn ikụtde ndutụhọ ke ntak edinen ido, akpana nnyịn ikop inemesịt. Akande oro, sia Christ okokụtde ukụt ke obụkidem man ada nnyịn ọsọk Abasi, nnyịn ikpenyeneke ndidu uwem aba nte ekemde ye mme udọn̄ obụkidem. Edieke nnyịn iyọde idomo ye mbuọtidem, iyebuana ke akwa idara ke ediyarade Jesus. Ndibiom esuene kaban̄a enyịn̄ Christ, m̀mê nte mbet esie, akpanam nnyịn inyene inemesịt koro enye ayarade nte ke nnyịn imenyene spirit Jehovah. Ntre, nte nnyịn ikụtde ndutụhọ nte ekemde ye uduak Abasi, ẹyak nnyịn iyak idem nnyịn inọ enye inyụn̄ ikaiso ndinam eti.
Nte mme Christian, nnyịn inyene ndinam utom nnyịn ke edinam akpanikọ inyụn̄ isụhọde idem nnyịn ke idak ọkpọsọn̄ ubọk Abasi. (5:1-14) Ana mbiowo ẹkpeme udịmerọn̄ Abasi ke unyịmesịt, ndien kpukpru nnyịn ikpotop ọkpọsọn̄ ekikere nnyịn idori Jehovah, ifiọkde ite ke enye enen̄ede ekere aban̄a nnyịn. Nnyịn n̄ko inyene ndisọn̄ọ nda n̄n̄wana ye Devil inyụn̄ inaha itịmede esịt, koro nditọete nnyịn ke ẹbọ ukem ndutụhọ emi nnyịn isobode. Ti kpukpru ini nte ke Jehovah Abasi eyenam nnyịn isọn̄ọ ida onyụn̄ anam nnyịn ikeme ndisọn̄ọ nda ke mbuọtidem.
[Ekebe/Ndise ke page 30]
Mbanaidem Iban: Ke item ọnọde mme Christian iban, Peter ọkọdọhọ ete: “Ẹkûbana idem enyọn̄ enyọn̄ ke edidọk idet, ye edikọn̄ọ n̄kpọ mbana gold, ye edisịne ediye ọfọn̄idem; edi ẹda edisịnen̄kpọ eke mîdibiarake, kpa sụn̄sụn̄ spirit eke enyenede iso bụt, ẹbana idem ke esịt esịt uwem mbufo; koro oro edi se isọn̄de urua ke enyịn Abasi.” (1 Peter 3:3, 4) Ke akpa isua ikie C.E., iban mme okpono ndem ediwak ini ẹma ẹsinyene owowo ido utan̄idet, ẹtan̄de nnyan idet mmọ ke usụn̄ n̄wụtidem ẹnyụn̄ ẹda n̄kpọ mbana gold ẹdọn̄ ke mme ukot idet oro. Anaedi, ediwak ẹkenam ntre ke n̄wụtidem—kpa n̄kpọ oro mîdotke mme Christian. (1 Timothy 2:9, 10) Edi, idịghe kpukpru n̄kpọ mbana ẹdiọk, koro Peter ama esịn “edisịne ediye ọfọn̄idem”—nte an̄wan̄ade se ẹyomde. Mme asan̄autom Abasi ẹma ẹsida n̄kpọuto ẹnam n̄kpọ ke mme ini eset. (Genesis 24:53; Exodus 3:22; 2 Samuel 1:24; Jeremiah 2:32; Luke 15:22) Nte ededi, Christian an̄wan ye eti ibuot esịn mme n̄kpọ mbana n̄kohodeidem ye ọfọn̄ oro edemerede owo udọn̄ okponyụn̄ odu ke ukpeme nte ke n̄kpọ mmaidem ekededi otịm odot. Akpan n̄kpọ ke item apostle emi edi nte ke enye ekpenyene ndiwụk ntịn̄enyịn, idịghe ke enyọn̄ enyọn̄ n̄kpọ mbana, edi ke eke esịt esịt idem. Man odụri owo udọn̄ ke akpanikọ, enye enyene ndisịne n̄kpọ nte odotde onyụn̄ enyene edu owo emi abakde Abasi.—Mme N̄ke 31:30; Micah 6:8.
[Ebiet Ẹdade Ndise Ẹto ke page 30]
Israel Department of Antiquities and Museums; Israel Museum/David Harris