Da Ubọhọ-Ufụn Christian Fo Nam N̄kpọ Ọniọn̄ Ọniọn̄

“Ẹdu uwem nte mmọemi ẹnyenede unen ke idemmọ, . . . ẹsan̄a nte ifụn Abasi.”—1 PETER 2:16.

1. Nso ubọhọ-ufụn ke Adam ọkọduọk, ndien nso ubọhọ-ufụn ke Jehovah edifiak ọnọ ubonowo?

KE INI akpa ete ye eka nnyịn ẹkenamde idiọkn̄kpọ ke in̄wan̄ Eden, mmọ ẹma ẹduọk ubọn̄ ubọn̄ n̄kpọ akpa nditọ mmọ—ubọhọ-ufụn idiọkn̄kpọ ye mbiara. Nte utịp, kpukpru nnyịn ikamana nte ifụn mbiara ye n̄kpa. Ke inemesịt, nte ededi, Jehovah aduak ndifiak nnọ mme owo oro ẹnamde akpanikọ utịbe utịbe ubọhọ-ufụn. Mfịn, mbon nti esịt ke ẹtie ye ọkpọsọn̄ udọn̄ ẹbet ‘ediyarade nditọ Abasi,’ nte utịp mmọ ẹyedi se ‘ẹnyan̄ade ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.’—Rome 8:19-21.

‘Ẹyet Aran Ndikwọrọ Ikọ’

2, 3. (a) Mmanie ẹdi “nditọ Abasi”? (b) Nso utịbe utịbe idaha ke mmọ ẹnyene, adade nso mbiomo edi?

² Mmanie ẹdi “nditọ Abasi” ẹmi? Mmọ ẹdi nditọete Jesus ẹmi ẹyetde aran ke spirit oro ẹdidide mme andikara ye enye ke Obio Ubọn̄ heaven. Akpa ke otu mbon ẹmi ẹma ẹwụt idem ke akpa isua ikie E.N. Mmọ ẹma ẹnyịme akpanikọ ubọhọ-ufụn oro Jesus ekekpepde, ndien ọtọn̄ọde ke Pentecost 33 E.N., mmọ ẹma ẹbuana ke ubọn̄ ubọn̄ ifetutom oro Peter eketịn̄de aban̄a ke ini enye ekewetde ọnọ mmọ ete: “Mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi onịmde ọnọ Idemesie.”—1 Peter 2:9a; John 8:32.

³ Ndidi ikọt eke Abasi onịmde ọnọ idemesie—nso utịbe utịbe edidiọn̄! Nsụhọ nditọ Abasi oro ẹyetde aran ke eyomfịn ẹnyụn̄ ẹnyene ukem eti idaha oro ye Abasi. Edi utọ akwa ifetutom oro asan̄a ye mbiomo. Peter ama odụri ntịn̄enyịn owụt kiet ke otu ẹmi ke ini enye akakade iso ndidọhọ ete: “Mbufo ẹka ẹketan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.”—1 Peter 2:9b.

4. Didie ke mme Christian oro ẹyetde aran ẹyọhọ mbiomo oro asan̄ade ye ifụre Christian mmọ?

⁴ Nte mme Christian oro ẹyetde aran ẹyọhọ mbiomo eke editan̄a mme utịbe edinam Abasi emi? Ih. Ke etịn̄de ke ntịn̄nnịm ikọ aban̄a mbon oro ẹyetde aran ọtọn̄ọde ke 1919, Isaiah ama ọdọhọ ete: “Spirit Ọbọn̄ Jehovah odoro mi: koro, Jehovah emeyet mi aran onịm, man mbụk eti mbụk nnọ mbon nsụkesịt; ọmọdọn̄ mi, ete mbọp mmọ eke esịt mmọ obụn̄ọde, n̄kwọrọ uwọrọ-ufụn nnọ mbuotekọn̄, n̄kwọrọ nsana nyak nnọ mmọ eke ẹkọbide; n̄kwọrọ isua mfọnido Jehovah, ye usen usiene Abasi nnyịn.” (Isaiah 61:1, 2) Mfịn, nsụhọ oro ẹyetde aran, ke etienede uwụtn̄kpọ Jesus, emi itien̄wed emi etịn̄de aban̄a akpan akpan, ke ẹkwọrọ eti mbụk ubọhọ-ufụn ifịk ifịk ẹnọ mbon en̄wen.—Matthew 4:23-25; Luke 4:14-21.

5, 6. (a) Nso ikosụn̄ọ ito aduai-owo-idem ukwọrọikọ eke mme Christian oro ẹyetde aran? (b) Mme ifetutom ye mme mbiomo ewe ke mbon eke akwa otuowo ẹnyene?

⁵ Nte utịp aduai-owo-idem ukwọrọikọ mmọ, akwa otuowo eke mme erọn̄ en̄wen ẹwọrọ ẹwụt idem ke ererimbot ke ukperedem ini ẹmi. Mmọ ẹwọrọ ẹto kpukpru idụt ndidiana ye mbon oro ẹyetde aran nnam n̄kpọ Jehovah, ndien akpanikọ amanam mmọemi ẹwọrọ ufụn n̄ko. (Zechariah 8:23; John 10:16) Ukem nte Abraham ẹbat mmọ ke edinen ke ntak mbuọtidem ẹnyụn̄ ẹdụk ke n̄kpet n̄kpet itie ebuana ye Jehovah Abasi. Ndien ukem nte Rahab ndibat mmọ ke edinen anam mmọ ẹdu ke idaha ndibọ ubọhọ—ke ekemmọ, ndibọhọ Armageddon. (James 2:23-25; Ediyarade 16:14, 16) Edi utọ ikpọ ifetutom oro ẹsịne n̄ko mbiomo editịn̄ nnọ mbon efen mban̄a ubọn̄ Abasi. Oro edi ntak John okokụtde mmọ ẹtorode Jehovah an̄wan̄wa, “ẹfiori ke ọkpọsọn̄ uyo, ẹte, Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.”—Ediyarade 7:9, 10, 14.

⁶ Isua oko akwa otuowo, emi ẹwakde ẹkan miliọn inan̄ idahaemi, ọkọrọ ye ekpri nsụhọ mme Christian oro ẹyetde aran, ẹma ẹbiat se ikperede ndisịm biliọn hour kiet ke nditan̄a mme utịbe edinam Jehovah. Emi ekedi mfọnn̄kan usụn̄ emi mmọ ẹkedade ubọhọ-ufụn eke spirit mmọ ẹnam n̄kpọ.

“Ẹkpono Edidem”

7, 8. Nso mbiomo ke ubọhọ-ufụn Christian esịne kaban̄a mme enyene-odudu ẹmi ẹkarade, ndien kaban̄a emi, nso ukwan̄ edu ke ana nnyịn ifep?

⁷ Ubọhọ-ufụn Christian nnyịn esịne mme mbiomo en̄wen. Peter ama osio ndusụk mmọ owụt ke ini enye ekewetde ete: “Ẹkpono kpukpru owo. Ẹma nditọete. Ẹten̄e Abasi. Ẹkpono edidem.” (1 Peter 2:17) Nso ke ikọ oro “ẹkpono edidem” ọwọrọ?

⁸ “Edidem” ada aban̄a mme andikara ererimbot. Mfịn, edu unana edikpono odudu emi akarade ọmọkọri ke ererimbot, ndien emi ekeme nditụk mme Christian mmemmem mmemmem. Christian ekeme ndikam nyịk ntak emi akpanade enye okpono “edidem,” sia “ofụri ererimbot onyụn̄ esịne[de] ke ubọk andidiọk.” (1 John 5:19) Ye ikọ ẹmi ke ekikere, enye ekeme ndikere ke imenyene ifụre ndifụmi mme ibet oro imọ mîmaha inyụn̄ itre ndikpe tax edieke owo mîmụmke imọ. Edi emi akpatuaha ye in̄wan̄în̄wan̄ ewụhọ Jesus oro nte “ẹnọ Caesar . . . n̄kpọ eke enyenede Caesar.” Oro ekpedi, yak idọhọ, ‘edisan̄a ke unen mfụk udu.’—Matthew 22:21; 1 Peter 2:16.

9. Nso idi nti ntak iba oro inyenede ndisụk ibuot nnọ mme enyene-odudu emi ẹkarade?

⁹ Mme Christian ẹnyene mbiomo ndikpono odudu emi akarade ndinyụn̄ nsụk ibuot nnọ enye—idem ọkpọkọm emi edi ke udomo oro enyenede-nyene adan̄a. (Utom 5:29) Ntak-a? Ke 1 Peter 2:14, 15, Peter owụt ntak ita ke ini enye ọdọhọde ete ke mme andikara ẹdi “mmọemi [Abasi] osiode ọdọn̄, ete ẹnọ mme anamidiọk usiene, ẹnyụn̄ ẹnọ mme anam nti n̄kpọ itoro.” Ndịk edidi se ẹnọde ufen edi ntak emi ekemde ndisụk ibuot nnọ odudu emi akarade. Nso n̄kpọ esuene ke ekpedi ntem ọnọ kiet ke otu Mme Ntiense Jehovah ndidi se ẹbọde isop m̀mê ẹsịnde ke ufọk-n̄kpọkọbi ke ntak en̄wan, uyịp inọ, m̀mê orụk ubiatibet en̄wen! Kere nte akpadatde ndusụk owo esịt ndisuan utọ etop oro! Ke n̄kan̄ eken, nte nnyịn ikọride eti enyịn̄ kaban̄a edisụk ibuot nnọ ukara, nnyịn iyebọ itoro ke ubọk mme akama ukara oro ẹfọnde ido. Ẹkeme ndinọ nnyịn ifụre oro okponde akan ndikaiso ke utom edikwọrọ eti mbụk nnyịn. N̄ko-n̄ko ‘ke ndinam eti ido nnyịn iyekịbi inua mbon ndisịme, eke mîfiọkke se mmọ ẹtịn̄de.’ (1 Peter 2:15b) Emi edi udiana ntak ndisụk ibuot nnọ odudu emi akarade.—Rome 13:3.

10. Nso idi ntak oro ọsọn̄de odudu akan oro inyenede ndikop uyo nnọ mme enyene-odudu ẹmi ẹkarade?

¹⁰ Edi ntak oro ọsọn̄de odudu akan odu. Mme odudu emi ẹkarade ẹdu ke unyịme Jehovah. Nte Peter ọdọhọde, mme andikara ukaraidem ẹdi se Jehovah “osiode ọdọn̄,” ndien edi ‘uduak Abasi’ nte mme Christian ẹdu ke nsụkibuot ẹnọ mmọ. (1 Peter 2:15a) Ukem ntre, apostle Paul ọdọhọ ete: “Mme enyene-odudu ẹmi ẹdude kemi, edi Abasi okonịm mmọ.” Ntem, ubieresịt nnyịn oro Bible ọnọde ukpep onụk nnyịn ndisụk ibuot nnọ mme odudu ẹmi ẹkarade. Edieke nnyịn isịnde ndisụk idem nnyịn nnọ mmọ, nnyịn ‘iman̄wana ye se Abasi okonịmde.’ (Rome 13:1, 2, 5) Anie ke otu nnyịn okpoyom ndikokoi n̄n̄wana ye se Abasi okonịmde? Nso edida ubọhọ-ufụn Christian nnam n̄kpọ ke ukwan̄ usụn̄ ke oro ekpedi ntem!

“Ẹma Nditọete”

11, 12. (a) Nso mbiomo kaban̄a ekemmọ mme andinịm ke akpanikọ asan̄a ye ubọhọ-ufụn Christian nnyịn? (b) Mmanie akpan akpan ẹdot ima ima edikere mban̄a nnyịn, ndien ntak-a?

¹¹ Peter ama etịn̄ n̄ko ete ke akpana mme Christian “ẹma nditọete.” (1 Peter 2:17) Emi edi mbiomo efen oro asan̄ade ye ubọhọ-ufụn Christian. N̄wakn̄kan ibat ke otu nnyịn idi mme andibuana ke esop. Ke akpanikọ, kpukpru nnyịn idi mme andibuana ke otu, m̀mê ke esop nditọete eke ofụri ererimbot. Ndiwụt ima nnọ mmoemi edi edida ubọhọ-ufụn nnyịn nnam n̄kpọ ọniọn̄ ọniọn̄.—John 15:12, 13.

¹² Apostle Paul ama osio san̄asan̄a otu mme Christian oro ẹdotde ima nnyịn akpan akpan owụt. Enye ọkọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọemi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” (Mme Hebrew 13:17) Mmọ oro ẹdade usụn̄ ke esop ẹdi mbiowo. Edi akpanikọ, irenowo ẹmi idịghe mfọnmma. Edi, ẹmek mmọ ke idak edise enyịn eke Otu Ukara. Mmọ ẹnọ ndausụn̄ ebe ke uwụtn̄kpọ ye edikere mban̄a, ndien ẹnịm mmọ nte mme andikpeme ukpọn̄ nnyịn. Nso ndodobi utom! (Mme Hebrew 13:7) Ke inemesịt, ekese esop ẹnyene eti, edu edidianakiet, ndien edi n̄kpọ idatesịt ọnọ mbiowo ndinam utom ye mmọ. Edi ata ọkpọsọn̄ n̄kpọ ke ini mme owo mînyịmeke ndidiana kiet. Ebiowo osụk ananam utom esie, edi nte Paul etịn̄de, enye anam utom oro ke “mfụhọ.” Ke akpanikọ, nnyịn iyomke ndinam mbiowo ẹfụhọ! Nnyịn iyom mmọ ẹkụt idatesịt ke utom mmọ man mmọ ẹkeme ndinam nnyịn ikọri.

13. Nso idi ndusụk usụn̄ oro ikemede ndidiana kiet ye mbiowo?

¹³ Nso idi ndusụk usụn̄ oro nnyịn ikemede ndidiana kiet ye mbiowo? Usụn̄ kiet edi ke ndin̄wam ndinịm nnyụn̄ nnam Ufọkmbono Obio Ubọn̄ asana. Efen edi ndidiana kiet ke utom edika n̄kese mbon udọn̄ọ nnyụn̄ n̄n̄wam mbon n̄kpọnnam. N̄ko, nnyịn imekeme ndidomo ndisọn̄ idem ke n̄kan̄ eke spirit, man ikûkabade idi mbiomo. Akpan ikpehe oro ẹyomde edidianakiet edi ke ndisọn̄ọ mmụm edisana idaha eke ido uwem ye eke spirit n̄kama ke esop, ebe ke eduuwem nnyịn ye ke ndinam ẹfiọk idaha akwa idiọkn̄kpọ oro nnyịn ifiọkde iban̄a.

14. Didie ke nnyịn ikpediana kiet ye ntụnọ oro mbiowo ẹnọde?

¹⁴ Ndusụk ini, man ẹnịm esop asana, mbiowo ẹsinyene ndisio anamidiọk oro mîkabakede esịt mfep. (1 Corinth 5:1-5) Emi esikpeme esop. Enye ekeme n̄ko ndin̄wam anamidiọk oro. Ediwak ini, utọ ntụnọ oro esin̄wam ndinam anamidiọk odu ke edidemede. Nso, nan̄a, edieke owo oro ẹkesiode ẹfep edide n̄kpet n̄kpet ufan m̀mê iman? Yak idọhọ ke owo oro ekedi ete m̀mê eka nnyịn mîdighe eyeneren m̀mê eyenan̄wan nnyịn. Nte nnyịn nte ededi imesikpono edinam mbiowo? Edi akpanikọ, emi ekeme ndidi ọkpọsọn̄ n̄kpọ. Edi nso edida ubọhọ-ufụn nnyịn nnam n̄kpọ ke ukwan̄ usụn̄ ke oro ekpedi ntem ndinyene eyịghe mban̄a ubiere oro mbiowo ẹnọde nnyụn̄ n̄kaiso nnyene ebuana eke spirit ye owo oro owụtde idem nte idide idiọk odudu ke esop! (2 John 10, 11) Odot ẹtoro ikọt Jehovah ke ofụri ofụri ke usụn̄ nte mmọ ẹsidianade kiet ke mme utọ n̄kpọ ntre. Nte utịp, esop Jehovah akaiso ndidu ke edisana idaha ke ndedehe ererimbot emi.—James 1:27.

15. Edieke owo anamde akwa idiọkn̄kpọ, nso ke enye akpanam usọp usọp?

¹⁵ Nso edieke nnyịn inamde akwa idiọkn̄kpọ? Edidem David ama etịn̄ aban̄a mbon oro Jehovah owụtde mfọn ke ini enye ọkọdọhọde ete: “Anie edidọk obot Jehovah? Anie edinyụn̄ ada ke edisana ebiet esie? Enyeemi ubọk asanade, esịt mînyụn̄ ideheke; emi mîmenekede ukpọn̄ esie inọ nsu, mînyụn̄ in̄wọn̄ọke inọ abian̄a.” (Psalm 24:3, 4) Edieke ke ndusụk ntak nnyịn ikaha iso aba idi mbon oro ‘ubọk asanade, esịt mînyụn̄ ideheke,’ ana nnyịn inam n̄kpọ iwiwa. Nsinsi uwem nnyịn odu ke itiendịk.

16, 17. Ntak emi owo oro enyenede ubiomikpe akwa idiọkn̄kpọ mîkpodomoke ndikọk mfịna oro ke idemesie?

¹⁶ Ndusụk owo ẹsobo idomo edidịp akwa idiọkn̄kpọ, ndusụk ẹkerede ẹte: ‘Ami mma nyarade nnọ Jehovah nnyụn̄ n̄kabade esịt. Ntre ntak ndibuan mbiowo?’ Anamidiọk oro ekeme ndikop bụt mîdịghe okop ndịk aban̄a se mbiowo ẹkemede ndinam. Enye ekpenyene, nte ededi, nditi nte ke okposụkedi edide Jehovah ikpọn̄ ekeme ndinam nnyịn isana ibọhọ idiọkn̄kpọ, Enye ama ọnọ mbiowo akpan mbiomo edinam esop asana. (Psalm 51:2) Mmọ ẹdu do ndikọk udọn̄ọ, ‘ndinam ikọt Abasi ẹfọn ẹma.’ (Ephesus 4:12) Nditre ndika mbịne mmọ ke ini nnyịn iyomde un̄wam eke spirit etie nte nditre ndika mbịne dọkta ke ini nnyịn idọn̄ọde.

¹⁷ Ndusụk owo oro ẹsidomode ndise mban̄a mme n̄kpọ ke idemmọ ikpọn̄ ẹsikụt nte ke ediwak ọfiọn̄ mîdịghe isua ke ukperedem, ubieresịt mmimọ esikaiso ndifịna mmimọ ọkpọsọn̄ ọkpọsọn̄. Idem ke ọdiọkde akan, mbon eken oro ẹkedịpde akwa idiọkn̄kpọ ẹsiduọ ẹdụk idiọkn̄kpọ ọyọhọ ikaba m̀mê idem ọyọhọ ikata. Ke ini n̄kpọ emi ọwọrọde iso mbiowo ke akpatre, enye edidi idiọkn̄kpọ emi ẹkenamde ẹfiak ẹnam. Ọfọn adan̄a didie ntem akan nditiene item James! Enye ekewet ete: “Nte owo ọdọn̄ọ ke otu mbufo? yak enye okot mbiowo ufọk Abasi; mmọ ẹnyụn̄ ẹnụhọ ẹfụk enye ẹbọn̄ akam, ẹda aran ẹyet enye ke enyịn̄ Ọbọn̄ [“Jehovah,” NW].” (James 5:14) Ka bịne mbiowo ke ini osụk edide kan̄a ini ndikọkọk. Edieke nnyịn ibetde ebịghi akaha, nnyịn imekeme ndikabade nsọn̄ esịt ke ndinam idiọkn̄kpọ.—Ecclesiastes 3:3; Isaiah 32:1, 2.

Ukamaidem ye Unọ Idem Inemesịt

18, 19. Ntak emi oku kiet eketịn̄de eti ikọ aban̄a Mme Ntiense Jehovah?

¹⁸ Isua ition ẹmi ẹkebede, ke magazine ido ukpono n̄kann̄kụk kiet, oku Catholic kiet ke Italy ama etịn̄ ikọ inem inem aban̄a Mme Ntiense Jehovah.a Enye ọkọdọhọ ete: “Ami ke idemmi mmama Mme Ntiense Jehovah; ami ntịn̄ emi ye in̄wan̄în̄wan̄ esịt. . . . Mbon oro ami mfiọkde ẹnyene nti ido, sụn̄sụn̄ uyoikọ . . . [ye] usọ utịn̄ikọ. Ini ewe ke nnyịn idifiọk nte ke akpanikọ oyom ẹnọ enye ke usụn̄ oro ẹdimade ndibọ? Nte ke inaha mbon oro ẹtọtde akpanikọ ẹnyene ubak esịt, ẹtịn̄ ndek ndek ikọ, ẹkama idem mbubịn mbubịn, ẹnam n̄kpọ nte mîdotke?”

¹⁹ Nte ekemde ye mme ikọ ẹmi, se ikotụkde oku emi ke idem, adianade ye mme n̄kpọ eken, ekedi usụn̄ nte Mme Ntiense ẹsịnede n̄kpọ ẹnyụn̄ ẹkamade idemmọ. Nte an̄wan̄ade, mbon oro enye okosobode ẹma ẹkpan̄ utọn̄ ẹnọ item emi “asan̄autom emi anamde akpanikọ, onyụn̄ enyenede ọniọn̄” ọkọnọde ke mme isua ẹmi ẹkebede. (Matthew 24:45) Bible etịn̄ nte ke usịnen̄kpọ iban ekpenyene ‘ndiwụt iso o-bụt ye eti ibuot.’ (1 Timothy 2:9) Ke eyo mbiara ido uwem emi, item oro odot ọnọ irenowo n̄ko. Nte iwụtke ifiọk nte ke mme andida ke ibuot Obio Ubọn̄ Abasi ẹkpenyene ndikama idemmọ ke usụn̄ eyede ke iso mbon ẹmi ẹdude ke esien?

20. Ntak emi Christian ọkpọnọde edisịnen̄kpọ esie ntịn̄enyịn kpukpru ini?

²⁰ Ndusụk owo ẹkeme ndinyịme nte ke mmimọ ikpenyene ndiwụt ukpeme ke nte mmimọ isịnede n̄kpọ, ke mme mbonoesop ye ke an̄wautom, edi mmọ ẹkeme ndikere nte ke edumbet Bible ibuanake ke mme ini eken. Nte nnyịn, nte ededi, akanam imetre ndidi mme andida ke ibuot Obio Ubọn̄ Abasi? Edi akpanikọ, mme idaha ẹdi nsio nsio. Edieke nnyịn in̄wamde ke ndibọp Ufọkmbono Obio Ubọn̄, nnyịn iyesịne n̄kpọ ke usụn̄ oro okpụhọrede ọkpọn̄ nte isisịnede ke ini idụkde mbonoesop ke ukem Ufọkmbono Obio Ubọn̄ oro. Ke ini nnyịn iduọkde odudu, nnyịn idisịne n̄kpọ oro ayakde ofụm otụk nnyịn. Edi ini ekededi oro mbon en̄wen ẹkụtde nnyịn, ọfọn̄ nnyịn kpukpru ini ekpenyene ndiwụt iso o-bụt ye eti ibuot.

21, 22. Didie ke ẹkpeme nnyịn ẹbiọn̄ọ unọ idem inemesịt oro ekemede ndinọ unan, ndien nnyịn ikpese didie item oro aban̄ade mme utọ n̄kpọ ntre?

²¹ Ikpehe efen oro oyomde ntịn̄enyịn edi unọ idem inemesịt. Mme owo—akpan akpan n̄kparawa owo—ẹyom unọ idem inemesịt. Enye idịghe idiọkn̄kpọ m̀mê ubiatini ndisịn ini nduọkodudu ke ndutịm ubon. Idem Jesus ama ọnọ mme mbet esie ikot “ẹdiduọk odudu esisịt.” (Mark 6:31) Edi wụt ukpeme mbak unọ idem inemesịt ediberede usụn̄ ọnọ edisabade ke n̄kan̄ eke spirit. Nnyịn idu uwem ke ererimbot oro unọ idem inemesịt owụtde oburobụt ido idan̄, afai, ndịk, ye ubụpekpo. (2 Timothy 3:3; Ediyarade 22:15) Asan̄autom emi anamde akpanikọ, onyụn̄ enyenede ọniọn̄ odu ke edidemede aban̄a mme utọ n̄kpọndịk oro onyụn̄ ọnọ nnyịn ntọt kpukpru ini aban̄a mmọ. Nte etie fi ke idem nte ke mme ntọt ẹmi ẹdi edibiọn̄ọ ifụre fo? Mîdịghe nte afo omowụt esịtekọm nte ke esop Jehovah enen̄ede ekere aban̄a fi ke ndidụri ntịn̄enyịn fo kpukpru ini n̄wụt mme utọ n̄kpọndịk oro?—Psalm 19:7; 119:95.

²² Kûdede ufre ete ke okposụkedi oro ubọhọ-ufụn nnyịn otode Jehovah, ke nnyịn inyene ndinam ibat mban̄a nte idade enye inam n̄kpọ. Edieke nnyịn ifụmide nti item inyụn̄ inam ukwan̄ ubiere, nnyịn ikemeke ndiduọhọ owo efen. Apostle Paul ọdọhọ ete: “Kpukpru nnyịn kiet kiet iyebụk mbụk iban̄a idemesie inọ Abasi.”—Rome 14:12; Mme Hebrew 4:13.

Bet Ubọhọ-Ufụn Nditọ Abasi ye Idotenyịn

23. (a) Mme edidiọn̄ ewe ke nnyịn inyene idahaemi ito ubọhọ-ufụn? (b) Mme edidiọn̄ ewe ke nnyịn ibet ye ọkpọsọn̄ udọn̄?

²³ Nnyịn ke akpanikọ idi mme owo oro ẹdiọn̄de. Nnyịn imọbọhọ ufụn nsunsu ido ukpono ye nsunsu ekikere. Ke ntak uwa ufak, nnyịn imekeme ndisan̄a n̄kpere Jehovah ye edisana esịt, ibọhọ ufụn idiọkn̄kpọ ye n̄kpa ke usụn̄ eke spirit. Ndien ibịghike ‘ediyarade nditọ Abasi’ eyedi. Ke Armageddon, ẹyeyarade nditọete Jesus ke ubọn̄ mmọ ke heaven ẹwụt mme owo nte mme andisobo mme asua Jehovah. (Rome 8:19; 2 Thessalonica 1:6-8; Ediyarade 2:26, 27) Ke oro ebede, ẹyeyarade nditọ Abasi ẹmi ẹwụt nte ẹdide mbon oro edidiọn̄ otode ebekpo Abasi ebe osịm ubonowo. (Ediyarade 22:1-5) Ke akpatre, ediyarade nditọ Abasi emi eyesụn̄ọ ke edidiọn̄ mme anam-akpanikọ ubonowo ye ubọn̄ ubọn̄ ubọhọ-ufụn eke nditọ Abasi. Nte ọdọn̄ fi ndikụt ini oro? Do da ubọhọ-ufụn Christian fo nam n̄kpọ ọniọn̄ ọniọn̄. Nam n̄kpọ nọ Abasi idahaemi, ndien afo eyedara utịbe utịbe ubọhọ-ufụn oro ke nsinsi nsinsi!

[Mme Ikọ idakisọn̄]

Ekebe Ndụn̄ọde

◻ Didie ke mbon oro ẹyetde aran ye mme erọn̄ en̄wen ẹnọ Jehovah ubọn̄?

◻ Ntak emi mme Christian ẹkpewụtde ukpono ẹnọ mme enyene-odudu ẹmi ẹkarade?

◻ Ke mme usụn̄ ewe ke Christian ekeme ndidiana kiet ye mbiowo?

◻ Ke se iban̄ade edisịnen̄kpọ, ntak emi Mme Ntiense Jehovah ẹwọrọde ẹda isio ye ediwak owo ke ererimbot?

◻ Nso ke nnyịn ikpefep ke ini edide edisịm edinọ idem inemesịt?

[Ndise ke page 17]

Mbiowo akpan akpan ẹdot ima ye edidianakiet nnyịn

[Mme Ndise ke page 18]

Usịnen̄kpọ Christian ekpenyene ndiwụt iso o-bụt, owụt eti ibuot onyụn̄ odot ye idaha