Mmanie Ẹdibọhọ ‘Usen Jehovah’?

“Nso orụk owo ke mbufo ẹkpedi ke edisana ido ye ke uten̄e Abasi? Mbufo ẹmi ẹtiede ẹbet ẹnyụn̄ ẹsọn̄ọde ẹyom edidi Usen Abasi.”—2 PETER 3:11, 12.

1. Anie akanam utom ye spirit ye odudu ebietde eke Elijah?

JEHOVAH ABASI emek mme owo oro ẹdikabarede ẹdi nsan̄a mme ada udeme ye Eyen esie, Jesus Christ, ke Obio Ubọn̄ heaven osio ke otu ubonowo. (Rome 8:16, 17) Ke adan̄aemi mmọ ẹsụk ẹdude ke isọn̄, mme Christian oro ẹyetde aran ẹnam utom ye spirit ye odudu Elijah. (Luke 1:17) Ke ibuotikọ oro ekebemde iso, nnyịn ima ikokụt ndusụk n̄kpọ ke utom mmọ oro ẹbietde eke prọfet Elijah. Edi nso kaban̄a utom andida itie Elijah, prọfet Elisha?—1 Ndidem 19:15, 16.

2. (a) Ewe ekedi akpatre utịben̄kpọ Elijah, ye akpa eke Elisha? (b) Nso uyarade odu nte ke Elijah ikakaha heaven?

² Akpatre utịben̄kpọ oro Elijah akanamde ekedi ndibahade mmọn̄ Akpa Jordan ebe ke ndida ọfọn̄idem esie nyịbi mmọn̄. Emi ama anam Elijah ye Elisha ẹsan̄a ke nsatisọn̄ ẹbe. Nte mmọ ẹkesan̄ade ke n̄kan̄ edem usiahautịn akpa oro, oyobio ama emen Elijah aka ikpehe efen ke isọn̄. (Se ekebe ke page 15 ibuotikọ edide “Ewe Heaven ke Elijah Ọkọdọk?”) Ẹma ẹkpọn̄ ọfọn̄idem Elijah. Ke ini Elisha akadade enye eyịbi Jordan, mmọn̄ esie ama afiak abahade, anamde enye ekeme ndisan̄a ke nsatisọn̄ mfiak nnyọn̄. Utịben̄kpọ emi ama anam an̄wan̄a nte ke Elisha ama akabade edi andida itie Elijah ke ndisịn udọn̄ nnọ utuakibuot akpanikọ ke Israel.—2 Ndidem 2:6-15.

Mme Edu Abasi Edi Akpan N̄kpọ

3. Nso ke Paul ye Peter ẹketịn̄ ẹban̄a edidu Jesus ye ‘usen Jehovah’?

³ Ediwak isua ikie ke eyo Elijah ye Elisha ẹma ẹkebe, apostle Paul ye Peter ẹma ẹmen edidi ‘usen Jehovah’ ye edidu Jesus Christ ẹkebuan ye “obufa enyọn̄ ye obufa isọn̄” oro okodude ke iso ini oro. (2 Thessalonica 2:1, 2; 2 Peter 3:10-13) Man ibọhọ akwa usen Jehovah—ke ini Abasi osobode mme asua esie onyụn̄ anyan̄ade ikọt esie—ana nnyịn iyom Jehovah inyụn̄ inyene sụn̄sụn̄ ido ye edinen ido. (Zephaniah 2:1-3) Edi mme edu efen efen ẹwọrọ ẹda nte nnyịn idụn̄ọrede mme n̄kpọntịbe ẹbuanade prọfet Elisha.

4. Nso udeme ke ifịk enyene ke utom Jehovah?

⁴ Ifịk kaban̄a utom Abasi edi akpan n̄kpọ edieke anade nnyịn ibọhọ ‘usen Jehovah.’ Elijah ye Elisha ẹma ẹnyene ifịk ke utom Jehovah. Ye ukem ifịk oro, nsụhọ mme Christian oro ẹyetde aran mfịn ẹnam edisana utom ẹnọ Jehovah ẹnyụn̄ ẹda iso ke edikwọrọ eti mbụk.a Ọtọn̄ọde ke ufọt ufọt iduọk isua 1930, mmọ ẹsịn udọn̄ ẹnọ kpukpru mbon oro ẹnyịmede etop Obio Ubọn̄ ẹnyụn̄ ẹdoride enyịn ndidu uwem ke nsinsi ke isọn̄ ndiyak idemmọ nnọ Jehovah nnyụn̄ nna baptism. (Mark 8:34; 1 Peter 3:21) Ediwak miliọn owo ẹnam n̄kpọ nte ọfọnde ẹban̄a nsịnudọn̄ emi. Inikiet ko mmọ ẹkedu ke ekịm eke spirit ẹnyụn̄ ẹkpan̄a ke idiọkn̄kpọ, edi idahaemi mmọ ẹkpep akpanikọ Abasi, ẹnyene idotenyịn nsinsi uwem ke paradise isọn̄, ẹnyụn̄ ẹnyene ifịk ke utom Jehovah. (Psalm 37:29; Ediyarade 21:3-5) Ebede ke ifịk, edidianakiet, ntatubọk, ye nti utom mmọ eken, mmọ ẹnọ nditọete Christ eke spirit ẹmi ẹsụk ẹdude ke isọn̄ akwa nduọkodudu.—Matthew 25:31-46.

5. Ntak edide akpan n̄kpọ ntre ndinam nti n̄kpọ nnọ “nditọete” Jesus, ndien nso uwụtn̄kpọ ke nnyịn inyene ito eyo Elisha?

⁵ Mbon oro ẹnamde nti n̄kpọ ẹnọ “nditọete” Jesus koro mbon ẹmi ẹyetde aran mi ẹdide mme anditiene enye ẹnyene idotenyịn ndibọhọ ‘usen Jehovah.’ Ebe ye n̄wan ke obio Shunem ẹma ẹbọ akamba edidiọn̄ ke ndikowụt Elisha ye eyenufọk esie mfọnido ye ntatubọk. Ebe ye n̄wan emi ikenyeneke eyen ndomokiet, ndien ebe ama ọsọn̄. Edi Elisha ama ọn̄wọn̄ọ ọnọ n̄wan Shunem oro ete ke enye ayaman eyeneren, ndien emi ama etịbe. Ke ini n̄kukụre eyeneren emi akakpade isua ifan̄ ke ukperedem, Elisha ama aka Shunem akanam enye eset. (2 Ndidem 4:8-17, 32-37) Nso nti utịp ke ndiwụt Elisha ntatubọk!

6, 7. Nso uwụtn̄kpọ ke Naaman ekenịm, ndien nso ebuana ke emi enyene ye edibọhọ ‘usen Jehovah’?

⁶ Oyom nsụhọdeidem man ẹnyịme ndausụn̄ ọkọn̄ọde ke Bible emi otode “nditọete” Christ ye idotenyịn edibọhọ usen Jehovah. Naaman etubom ekọn̄ Syria oro ọkọdọn̄ọde akpamfia ekenyene ndiwụt nsụhọdeidem ntiene ekikere oro ekpri eyenan̄wan Israel oro ẹkemụmde ke mbuotekọn̄ ọkọnọde nnyụn̄ nyom usọbọ ke ndika Israel n̄koyom Elisha. Utu ke ndiwọrọ ke ufọk esie n̄kosobo ye Naaman, Elisha ama ọnọ etop emi ẹsọk enye: “Keyere mmọn̄ ke Jordan utịm ikatiaba, ndien obụkidem fo ayafiak odụk fi ke idem, ndien afo ayasana.” (2 Ndidem 5:10) Ẹma ẹnọ ntan̄idem Naaman unan, ndien enye ama ayat esịt, edi ke enye ke nsụhọdeidem ama akaka okodụk ke Jordan utịm ikatiaba, “obụk esie akabade nte obụk ekpri eyenọwọn̄, enye onyụn̄ asana n̄ko.” (2 Ndidem 5:14) Mbemiso afiakde ọnyọn̄ ufọk, Naaman ama asan̄a anyan usụn̄ afiak aka Samaria man ọkọkọm prọfet Jehovah oro. Ke ebierede nditre ndida odudu emi Abasi ọnọde enye ndia udori ke n̄kan̄ eke obụk, Elisha ama ọwọrọ edisobo ye Naaman edi ikọbọhọ enye enọ ndomokiet. Naaman ke nsụhọdeidem ama asian Elisha ete: “Owo fo [idiwaha] aba edifọp uwa ye uwa ekọm inọ [mme abasi] efen ke mîbọhọke Jehovah.”—2 Ndidem 5:17.

⁷ Ebede ke ndisụhọde idem ntiene item N̄wed Abasi otode mbon oro ẹyetde aran, ediwak miliọn owo ẹbọ ekese edidiọn̄ mfịn. Akan oro, ebede ke ndinyene mbuọtidem ke uwa ufak Jesus, ẹnam mbon esịt akpanikọ ẹmi ẹsana ke n̄kan̄ eke spirit. Mmọ idahaemi ẹnyene ifet ndidi mme ufan Jehovah Abasi ye Jesus Christ. (Psalm 15:1, 2; Luke 16:9) Ndien ẹyenọ mmọ utịp ke ndituak ibuot nnọ Abasi nnyụn̄ nnam utom esie ebe ke ndinyan̄a nsio ke nsinsi nsobo oro edisịmde mme okohodeidem, anamidiọk oro mîkabakede esịt ke ‘usen Jehovah’ emi asan̄ade usọp usọp ekpere.—Luke 13:24; 1 John 1:7.

“Anie Ada ye Ami, Anie?”

8. (a) Mbon oro ẹdibọhọde ‘usen Jehovah’ ẹnyene nso edu ẹban̄a edinam uduak Abasi? (b) Nso utom ke ẹkenọ Jehu? (c) Nso ikenyene nditịbe nnọ Jezebel?

⁸ Ana mbon oro ẹdoride enyịn ndibọhọ ‘usen Jehovah’ ẹnyene iwụk n̄ko ke ndinam uduak Abasi. Elijah ama ebem iso etịn̄ uko uko aban̄a nsobo oro edisịmde ubon Edidem Ahab ẹmi ẹkedide mme owotowo ẹnyụn̄ ẹtuakde ibuot ẹnọ Baal. (1 Ndidem 21:17-26) Nte ededi, mbemiso nsobo emi, Elisha adaitie Elijah ekenyene ndikụre ndusụk utom oro owo mîkanamke ima. (1 Ndidem 19:15-17) Ke edikem ini Jehovah ekedide edisịm, Elisha ama eteme akparawa kiet ete aka ekeyet Jehu etubom ekọn̄ aran nte obufa edidem Israel. Ke ama ọkọtọhọ Jehu aran ke ibuot, isụn̄utom oro ama asian enye ete: “Ntem ke Jehovah Abasi Israel ọdọhọ, ete, Mmeyet fi aran nnịm ke edidem Israel, ikọt Jehovah. Wot ndien ufọk Ahab usọ, man nsio usiene iyịp ikọt mi mme prọfet, ye iyịp kpukpru ikọt Jehovah, ke ubọk Jezebel. Ndien ofụri ufọk Ahab ayatak.” Ẹkenyene nditop idiọk Jezebel Ọbọn̄ An̄wan nnọ mme ebua ẹnyụn̄ ẹtre ndibụk enye ke eti usụn̄.—2 Ndidem 9:1-10.

9, 10. Didie ke ikọ Elijah okosu aban̄a Jezebel?

⁹ Ikọt Jehu ẹma ẹdiọn̄ọ nte ediyet oro ẹkeyetde enye aran ekenyenede nsọn̄ọ ẹnyụn̄ ẹtan̄a enye nte obufa edidem ke Israel. Ke anamde n̄kpọ ye iwụk, Jehu ama awat aka Jezreel man ọkọtọn̄ọ utom esie eke edisobo mme ọsọn̄ibuot adausụn̄ ke utuakibuot Baal. Akpa owo oro idan̄ nsobo Jehu okotụkde ekedi eyen Ahab, Edidem Jehoram. Enye ama awat ọwọrọ ke obio ndikobụp m̀mê Jehu ekedi kaban̄a emem. Jehu ama ọbọrọ ete: “Nso emem, adan̄a ini nte use Jezebel uka, ye ediwak idiọn̄ esie ebịghide?” Ye oro, idan̄ Jehu ama ekịm Jehoram ke esịt.—2 Ndidem 9:22-24.

¹⁰ Iban ẹmi ẹten̄ede Abasi ẹfep nditie nte Jezebel m̀mê n̄wan ekededi oro ebietde enye. (Ediyarade 2:18-23) Etisịm ini oro Jehu esịmde Jezreel, n̄wan oro ama ọtọn̄ọ ndibana idemesie man eye. Ke otopde iso ke window, n̄wan oro ama ọkọm enye ye ekọm emiom. Enye ama obụp n̄kparawa Jezebel ete: “Anie ada ye ami, anie?” Inikiet inikiet, isụn̄utom iba m̀mê ita ẹtop iso ke isọn̄. Nte mmọ ẹkeda ke n̄kan̄ Jehu? Enye ama owụk ete: “Ẹmen enye ẹduọk ke isọn̄”! Ke oro, mmọ ẹma ẹnam n̄kpọ ye iwụk, ẹtopde Jezebel ẹsio ke window. Eyedi ikpat enan̄-mbakara ẹma ẹdịghe enye. Ke ini mme owo ẹkedide ndibụk enye, ‘mmọ ikekwe enye, ke mîbọhọke n̄kpọkpọrọ, ye ikpat ukot, ye ekaubọk.’ Nso ndyọ ndyọ edisu ke ikọ Elijah ekenyene ntem: “Mme ebua ẹyeta obụk Jezebel”!—2 Ndidem 9:30-37.

Ibetedem Esịt Akpanikọ Ẹnọde Utuakibuot Akpanikọ

11. Anie ekedi Jehonadab, ndien didie ke enye okowụt nte enye ọnọde utuakibuot akpanikọ ibetedem?

¹¹ Ana mbon oro ẹdoride enyịn ndibọhọ ‘usen Jehovah’ nnyụn̄ ndu uwem ke nsinsi ke isọn̄ ẹnọ utuakibuot akpanikọ ibetedem ke ofụri esịt. Ana mmọ ẹtie nte Jehonadab, m̀mê Jonadab, andituak ibuot nnọ Jehovah oro mîkedịghe eyen Israel. Nte Jehu akakade iso ndinam utom esie ye ifịk, Jehonadab ama oyom ndiwụt unyịme ye ibetedem esie. Ntre enye ama ọwọrọ aka ndisobo ye obufa edidem Israel, emi akanamde isan̄ aka Samaria ndikosobo mbonufọk Ahab oro ẹkesụhọde. Ke okụtde Jehonadab, Jehu ama obụp ete: “Nte esịt fo enen, nte esịt mi ye esịt fo?” In̄wan̄în̄wan̄ ibọrọ Jehonadab ama onụk Jehu ndinyan ubọk esie mmụm Jehonadab nsịn ke chariot ekọn̄ esie, ọdọhọde ete: “San̄a ye ami, nyụn̄ se ufụp mi emi mfịbede nnọ Jehovah.” Ye unana ubiat ini, Jehonadab ama enyịme ifet ediwụt ibetedem esie nnọ andisobo oro Jehovah ekeyetde aran.—2 Ndidem 10:15-17.

12. Ntak emi Jehovah nte odotde oyomde san̄asan̄a utuakibuot?

¹² Ke akpanikọ odot ndinọ utuakibuot akpanikọ ibetedem esịt akpanikọ, koro Jehovah edide Andibot ye Andikara Ekondo, emi nte odotde oyomde onyụn̄ odotde san̄asan̄a utuakibuot nnyịn. Enye ama owụk nditọ Israel ete: “Kûnam edisọi n̄kpọ unọ idem fo, kûnyụn̄ unam mbiet baba n̄kpọ kiet eke odude ke heaven ke enyọn̄, ye eke odude ke isọn̄ ke idak, ye eke odude ke mmọn̄ ke idak isọn̄; kûnụhọ unọ mmọ, kûnyụn̄ unam n̄kpọ mmọ: koro ami Jehovah Abasi fo ndi Abasi [emi oyomde san̄asan̄a utuakibuot, NW].” (Exodus 20:4, 5) Ana mbon oro ẹdoride enyịn ndibọhọ ‘usen Jehovah’ ẹnọ enye san̄asan̄a utuakibuot, ẹnamde ntre “ke spirit ye ke akpanikọ.” (John 4:23, 24) Ana mmọ ẹsọn̄ọ ẹda ẹnọ utuakibuot akpanikọ, nte Elijah, Elisha, ye Jehonadab.

13. Ukem nte esịt Jehonadab ekekemde ye eke Jehu, mmanie ẹnyịme Edidem Messiah, ndien didie ke mmọ ẹwụt emi?

¹³ Ke ama okosobo ufọk Ahab ama, Edidem Jehu ama anam mme usio-ukot efen efen ndiyarade mme andituak ibuot nnọ Baal nnyụn̄ nsọhi nsunsu ido ukpono emi mfep ke Israel. (2 Ndidem 10:18-28) Mfịn, ẹmek Edidem Jesus Christ eke heaven ndisobo mme asua Jehovah nnyụn̄ n̄wụt unen itie edikara Esie. Ukem nte esịt Jehonadab okodude ye Jehu, “akwa otuowo” eke “mme erọn̄ en̄wen” Jesus ẹnyịme Christ mfịn ke ofụri esịt nte Edidem Messiah ẹnyụn̄ ẹdiana kiet ye nditọete esie eke spirit ke isọn̄. (Ediyarade 7:9, 10; John 10:16) Mmọ ẹnọ uyarade kaban̄a emi ebe ke ndinam ido ukpono akpanikọ nnyụn̄ mbuana ifịk ifịk ke utom ukwọrọikọ Christian, ẹtọtde mme asua Abasi ẹban̄a ‘usen Jehovah’ emi asan̄ade usọp usọp ekpere.—Matthew 10:32, 33; Rome 10:9, 10.

Ndyọ Ndyọ N̄kpọntịbe Ẹdu ke N̄kpet N̄kpet Ini Iso!

14. Nso idu ke iso ibet nsunsu ido ukpono?

¹⁴ Jehu ama anam n̄kpọ man ẹtre utuakibuot nnọ Baal ke Israel. Ke eyo nnyịn, ebede ke Akamba Jehu, Jesus Christ, Abasi oyosobo Akwa Babylon, kpa ukara ererimbot eke nsunsu ido ukpono. Idibịghike nnyịn iyokụt nte ikọ oro angel eketịn̄de ọnọ John osude: “Nnụk duop oro okokụtde ye unam ẹyesua akpara oro [Akwa Babylon], ẹnyụn̄ ẹbiat enye, ẹnyụn̄ ẹnịm enye iferi, ẹnyụn̄ ẹta enye ikpọkidem, ẹnyụn̄ ẹfọp enye ke ikan̄ ẹwot. Koro Abasi ekesịn mmọ ke esịt, ete ẹnam uduak Imọ, ẹnyụn̄ ẹnyene ekikere kiet, ẹnyụn̄ ẹda obio emi mmọ ẹkarade ẹnọ unam oro, tutu se Abasi eketịn̄de osu.” (Ediyarade 17:16, 17; 18:2-5) “Nnụk duop oro” ẹda ẹban̄a odudu ukaraidem eke ekọn̄ ẹmi ẹkarade isọn̄. Okposụkedi mmọ ẹsịnde efịbe eke spirit idahaemi ye Akwa Babylon, ini esie osụhọ ibio. Mbon ukara ererimbot emi ẹyesobo nsunsu ido ukpono, ndien “idiọk unam oro”—kpa Edidiana Mme Idụt—eyenyene akpan udeme ye “nnụk duop oro” ke ndisobo enye.b Nso ifet nditoro Jehovah ke oro edidi ntem!—Ediyarade 19:1-6.

15. Nso iditịbe ke ini ẹdidomode ndisobo esop Abasi eke isọn̄?

¹⁵ Ke Edidem Jehu ama okokụre ekọn̄ esie ye utuakibuot Baal, ufọk ubọn̄ esie ama ọwọn̄ọde ntịn̄enyịn ese ukara oro ẹkedide mme asua Israel. Edidem Jesus Christ ayanam n̄kpọ ke ukem usụn̄ oro. Ukara ukaraidem oyodu ke ẹma ẹkesobo nsunsu ido ukpono emi ebietde Baal ẹfep. Ke idak odudu Satan kpa Devil, mme asua itie edikara Jehovah ẹmi ẹyesiak en̄wan ofụri ukeme ke edidomo oro ẹdomode ndisobo esop Abasi eke isọn̄. (Ezekiel 38:14-16) Edi Jehovah ayanam Edidem Jesus Christ ọbiọn̄ọ mmọ ebe ke ndisobo mmọ mfep ke Har–Magedon, “ekọn̄ akwa usen Abasi, Andikara kpukpru n̄kpọ,” ọyọhọde unen itie edikara Jehovah.—Ediyarade 16:14, 16; 19:11-21; Ezekiel 38:18-23.

Ndinam Utom ye Ifịk Ebietde eke Elisha

16, 17. (a) Nnyịn isan̄a didie ifiọk ke Elisha ama enyene ifịk tutu esịm utịt uwem esie? (b) Nso ke nnyịn ikpanam ye mme idan̄ akpanikọ?

¹⁶ Tutu ‘usen Jehovah’ ada utịt ọsọk ofụri idiọk editịm n̄kpọ Satan, mme asan̄autom Abasi ẹnyene ndinyene uko nnyụn̄ nsịn ifịk nte Elisha. Ke ẹsiode utom esie nte asan̄autom Elijah ẹfep, Elisha ama anam utom ikpọn̄ nte prọfet Jehovah ke se ibede isua 50! Ndien Elisha ama esịn ifịk tutu esịm ata utịt anyanini uwem esie. Esisịt ini mbemiso n̄kpa esie, eyeyen Jehu, Edidem Jehoash ama aka ekese enye. Elisha ama ọdọhọ enye otop idan̄ ke window. Idan̄ oro ama ọsọp ekesịm ebiet ẹkeyomde, ndien Elisha ofiori ete: “Idan̄ edinyan̄a Jehovah, ye idan̄ emi edinyan̄ade osio ke ubọk Syria: koro afo ayasuan mme Syrian ke Aphek, tutu ama mmọ.” Ke uyo Elisha, ekem Jehoash ada mme idan̄ esie atịgha isọn̄. Edi enye akanam emi ye unana ifịk, atịghade utịm ikata kpọt. Ekem Elisha ama ọdọhọ ete ke, nte utịp, ẹdinọ Jehoash edikan ndikan Syria utịm ikata kpọt, ndien oro edi se iketịbede. (2 Ndidem 13:14-19, 25) Edidem Jehoash ikosoboke mbon Syria ofụri ofụri, “tutu ama mmọ.”

¹⁷ Nte ededi, ye ifịk oro ebietde eke Elisha, nsụhọ oro ẹyetde aran ẹka iso ke en̄wan ye nsunsu utuakibuot. Mme nsan̄a mmọ ẹmi ẹnyenede idotenyịn eke isọn̄ ke ẹnam ukem oro. Akan oro, odot kpukpru mbon oro ẹdoride enyịn ndibọhọ ‘usen Jehovah’ ẹnyene ke ekikere mme ikọ enyene-ifịk Elisha ẹmi ẹban̄ade edisobo isọn̄. Ẹyak nnyịn ida mme idan̄ akpanikọ inyụn̄ itop mmọ ifịk ifịk—ndien ndien—ih, tutu Jehovah ọdọhọ ke utom emi nnyịn idade mmọ inam ekem.

18. Didie ke nnyịn ikpanam n̄kpọ iban̄a mme ikọ eke 2 Peter 3:11, 12?

¹⁸ ‘Usen Jehovah’ ọyọsọp ada utịt ọsọk idiọk editịm n̄kpọ emi. Ẹyak nnyịn ke ntre inam mme ọnọ-nsịnudọn̄ ikọ apostle Peter ẹnụk nnyịn ndinam n̄kpọ. Peter ọkọdọhọ ete: “Sia kpukpru n̄kpọ ẹmi ẹdibiarade ntem, nso orụk owo ke mbufo ẹkpedi ke edisana ido ye ke uten̄e Abasi? Mbufo ẹmi ẹtiede ẹbet ẹnyụn̄ ẹsọn̄ọde ẹyom edidi Usen Abasi.” (2 Peter 3:11, 12) Ke ini kpukpru ikpehe editịm n̄kpọ emi atarade ke ikan̄ iyatesịt Abasi oro ẹdiwụtde ebe ke Jesus Christ, sụk mbon oro ẹnyenede mbụk eti uwem ye edu uten̄e Abasi ẹdibọhọ. Ndisana ke n̄kan̄ ido uwem ye eke spirit edi akpan n̄kpọ. Ntre ke edi ye ima ẹwụtde mme ekemmọ owo, ke ndinam n̄kpọ mban̄a mme udọn̄ mmọ, akpan akpan ke usụn̄ eke spirit ebe ke utom ukwọrọikọ Christian nnyịn.

19. Nso ke nnyịn ikpanam man ibọhọ ‘usen Jehovah’?

¹⁹ Nte mme ikọ ye edinam fo ẹwụt fi nte anam-akpanikọ ye enyene-ifịk asan̄autom Abasi? Edieke edide ntre, afo emekeme ndinyene idotenyịn ndibọhọ ‘usen Jehovah’ ndụk obufa ererimbot emi Abasi ọn̄wọn̄ọde. Ih, afo emekeme ndinyene edinyan̄a edieke afo anamde eti n̄kpọ ọnọ nditọete Christ eke spirit ke ntak mmọ ẹdide mme anditiene enye, nte ebe ye n̄wan Shunem oro ẹkewụtde Elisha mfọnido. Man enyene edinyan̄a ana afo n̄ko etie nte Naaman, emi ke nsụhọdeidem akanamde item Abasi onyụn̄ akabarede edi andituak ibuot nnọ Jehovah. Edieke ọdọn̄de fi ndidụn̄ ke nsinsi ke paradise isọn̄, ana afo ọnọ utuakibuot akpanikọ ibetedem ofụri esịt, nte Jehonadab akanamde. Do afo emekeme ndidu ke otu mme anam-akpanikọ asan̄autom Jehovah, ẹmi ke mîbịghike ẹdikụtde mme ikọ Jesus ẹmi ẹsude: “Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.”—Matthew 25:34.

[Mme Ikọ idakisọn̄]

Didie ke Afo Ọkpọbọrọ?

◻ Nso idi ndusụk edu oro ẹyomde man ẹbọhọ ‘usen Jehovah’?

◻ Nso uwụtn̄kpọ ke ebe ye n̄wan Shunem ẹkenịm ke eyo Elisha?

◻ Nso ukpepn̄kpọ ke nnyịn ikeme ndikpep nto Naaman?

◻ Didie ke nnyịn ikeme ndikpebe uwụtn̄kpọ Jehonadab?

◻ Didie ke 2 Peter 3:11, 12 okpotụk nnyịn?