Edinen Ererimbot Idịghe Ndap!
“UNENIKPE edi akwa n̄kpọ udọn̄ ọnọ owo ke isọn̄,” ntre ke owo ukara America oro Daniel Webster ọkọdọhọ. Ndien Bible ọdọhọ ete: “Jehovah [amama] edinen ikpe.” (Psalm 37:28) Sia ẹkebotde ke mbiet Abasi, akpa owo iba oro ẹma ẹnyene mme edu Abasi, esịnede ekikere unenikpe.—Genesis 1:26, 27.
N̄wed Abasi etịn̄ n̄ko aban̄a ‘mme Gentile ẹmi mînyeneke ibet ẹnamde ke edimehe se ibet etemede.’ Ntem mmọ “ẹyarade edinịm ibet eke item oro ẹwetde ke esịt mmọ etemede, esịt mmọ ẹnyụn̄ ẹtiene edinịm ibet oro ẹdi ntiense mmọ, ekikere mmọ ẹnyụn̄ ẹneni ye kiet eken, ẹdori mmọ ikọ, mîdịghe, ẹtebe mmọ ikpe.” (Rome 2:14, 15) Ih, ẹnọ mme owo ukeme ubieresịt—kpa ifiọk esịtidem ndidiọn̄ọ se inende ye se ikwan̄ade. Nte an̄wan̄ade, udọn̄ kaban̄a unenikpe edi ndammana ke idem owo.
Se inyenede n̄kpet n̄kpet ebuana ye udọn̄ kaban̄a unenikpe edi ediyom oro owo oyomde inemesịt, koro Psalm 106:3 ọdọhọ ete: “[Inemesịt odu, NW] ọnọ mmọ eke ẹkpemede se inende . . . eke ẹnamde eti ido kpukpru ini.” Ntak, ndien, owo mîkemeke ndida edinen ererimbot ndi?
Ntak Emi Owo Okpude?
Akpan ntak kaban̄a edikpu ndinyene edinen ererimbot edi ndo oro nnyịn ikadade imana ito akpa ete ye eka nnyịn, Adam ye Eve. Bible anam an̄wan̄a ete: “Idiọkn̄kpọ [okoto] owo kiet odụk ke ererimbot, n̄kpa onyụn̄ [oto] ke idiọkn̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọkn̄kpọ.” (Rome 5:12) Ndo oro edi idiọkn̄kpọ. Okposụkedi ẹkebotde ẹnana ndudue, Adam ye Eve ẹma ẹbiere ndisọn̄ ibuot ye Abasi ndien ke ntem ẹnam idemmọ ẹdi mme anamidiọk. (Genesis 2:16, 17; 3:1-6) Ke ntak emi, mmọ ẹma ẹkpọn̄ n̄kpọ akpa edide idiọk, ukwan̄ udọn̄ ẹnọ nditọ mmọ.
Nte mme utọ edu nte idiọkitọn̄ ye usua idịghe utịp ndiọi udọn̄? Ndien nte mme edu ẹmi itịpke isịn ke mme ukwan̄ikpe oro ẹdude ke ererimbot? Kamse, idiọkitọn̄ edi ntak edikokoi nnam n̄kpọ ye n̄kann̄kụk ke idiọk usụn̄ ye ufịk ndutịm uforo! Usua ke akpanikọ edi ntak en̄wan eke ekpụk ye ukwan̄ikpe eke orụk. Mme utọ edu oro n̄ko ẹsinụk mme owo ndiyịp inọ, ntụk utụk, nnyụn̄ nnam n̄kpọ ke usụn̄ oro ọnọde mbon efen unan.
Idem mme mfọnn̄kan ukeme oro ẹsịnde ndinam unenikpe ndinyụn̄ nnam eti n̄kpọ ẹsiwak ndikpu ke ntak mme ntụhọ idiọkn̄kpọ nnyịn. Apostle Paul ke idemesie ama etịn̄ ete: “Nnamke eti n̄kpọ eke ọdọn̄de mi ndinam, edi idiọkn̄kpọ eke mîdọn̄ke mi ndinam, oro ke nnanam.” Enye aka iso ndinam en̄wan emi an̄wan̄a, ọdọhọde ete: “Koro ndara ibet Abasi ke ọwọn̄esịt mi: edi n̄kụt ibet efen ke mbak idem mi, nte an̄wanade ye ibet eke esịt mi amade, onyụn̄ adade mi nte ibuotekọn̄ esịn ke idak ibet idiọkn̄kpọ emi odude ke mbak idem mi.” (Rome 7:19-23) Eyedi nnyịn mfịn imenyene ukem en̄wan oro. Ntak edi oro ukwan̄ikpe etịbede ke ubọk ke ubọk.
Usụn̄ oro owo akarade etịp n̄ko esịn ke ukwan̄ikpe ndidu ke ererimbot. Ke kpukpru idụt, ibet ẹdu ọkọrọ ye mbon oro ẹkụtde ẹte ke ẹnịm mmọ. Ndien, nte ededi, mme ebiereikpe ye mme esopikpe ẹdu. Ke akpanikọ, ndusụk irenowo ẹmi ẹnyenede edumbet ẹmedomo ndimụm unen mme owo n̄kama nnyụn̄ n̄kụt ete ke n̄kem n̄kem unenikpe odu ọnọ kpukpru owo. Kpa ye oro, ekese ukeme mmọ ẹkpu. Ntak-a? Ke nditịn̄ ibio ibio mban̄a nsio nsio ntak oro ẹbuanade ke edikpu oro mmọ ẹkpude, Jeremiah 10:23 owụt ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” Ke adianarede ọkpọn̄ Abasi, owo ikam ikemeke ndiwụk edinen ye eti ererimbot.—Mme N̄ke 14:12; Ecclesiastes 8:9.
Akwa n̄kpọ ubiọn̄ọ oro ọbiọn̄ọde ukeme owo ndibọp edinen ererimbot edi Satan kpa Devil. Bible etịn̄ in̄wan̄în̄wan̄ ete ke ọsọn̄ibuot angel oro Satan edi akpa “owotowo” ye “osu nsu” ye nte ke “ofụri ererimbot onyụn̄ esịne ke ubọk andidiọk.” (John 8:44; 1 John 5:19) Apostle Paul anam ẹdiọn̄ọ enye nte “abasi eyo emi.” (2 Corinth 4:3, 4) Sia edide asua edinen ido, Satan anam ofụri se ekekeme ndisịn udọn̄ nnọ idiọkido. Adan̄a nte enye akarade ofụri ererimbot, kpukpru orụk ukwan̄ido ye nnama oro ẹsụn̄ọde ẹto mmọ ẹyesịn ubonowo ke ufụn.
Nte kpukpru emi ọwọrọ ete ke ukwan̄ikpe edi n̄kpọ oro owo mîkemeke ndisio mfep ke n̄kaowo? Nte edinen ererimbot edi ndap oro mîkemeke nditịbe?
Edinen Ererimbot Oyodu—Didie?
Man idotenyịn kaban̄a edinen ererimbot osu, ubonowo enyene ndiwọn̄ọde mbịne ebiet oro ekemede ndisio mme ntak ukwan̄ikpe mfep. Edi anie ekeme ndisio idiọkn̄kpọ mfep nnyụn̄ nsobo Satan ye ukara esie mfep? Nte an̄wan̄ade, idụhe owo ndomokiet m̀mê n̄kpọutom ubọk owo ekededi oro ekemede ndinam utọ enyene-ndịk utom oro. Jehovah Abasi ikpọn̄ ekeme! Kaban̄a enye, Bible etịn̄ ete: “Akwa itiat, utom esie ọfọn ama: koro kpukpru usụn̄ esie enende: Abasi akpanikọ emi mînamke ukwan̄n̄kpọ, enye edi eti ye edinen.” (Deuteronomy 32:4) Ndien sia edide ‘andima edinen ikpe,’ Jehovah oyom ubonowo ẹdara uwem ke edinen ererimbot.—Psalm 37:28.
Ke etịn̄de aban̄a ndutịm Abasi ndida edinen ererimbot ndi, apostle Peter ama ewet ete: “Nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.” (2 Peter 3:13) “Obufa enyọn̄” ẹmi idịghe ata obufa enyọn̄. Abasi okobot ata enyọn̄ nnyịn ke mfọnmma usụn̄, ndien mmọ ẹda itoro ẹsọk enye. (Psalm 8:3; 19:1, 2) “Obufa enyọn̄” edi obufa ukara oro edikarade isọn̄. “Enyọn̄” oro odude ke emi esịne mme ukara ubọk owo. Ibịghike, ke ekọn̄ Armageddon Abasi, mmọ ẹmi ẹyeyak ufan̄ ẹnọ “obufa enyọn̄”—Obio Ubọn̄, m̀mê ukara, esie eke heaven. (Ediyarade 16:14-16) Edidem Obio Ubọn̄ oro edi Jesus Christ. Ke adade utịt oro ebịghide ọsọk ukara owo, ukara emi ayakara ke nsinsi.—Daniel 2:44.
Nso, ndien, idi “obufa isọn̄”? Enye idịghe obufa ekondo, koro Abasi okobot isọn̄ ke mfọnmma usụn̄ ọnọ owo ndidụn̄, ndien edi uduak esie nte enye odu ke nsinsi. (Psalm 104:5) “Obufa isọn̄” ada aban̄a obufa n̄ka eke owo. (Genesis 11:1; Psalm 96:1) “Isọn̄” oro ẹdisobode esịne mme owo oro ẹnamde idemmọ ubak idiọk editịm n̄kpọ emi. (2 Peter 3:7) Mme ata asan̄autom Abasi, ẹmi ẹsuade idiọkido ẹnyụn̄ ẹmade edinen ido ye unenikpe, ẹdinam “obufa isọn̄” oro adade itie mmọ. (Psalm 37:10, 11) Ntem, ererimbot Satan eyebe efep.
Edi nso ina ibet Satan? Apostle John ama ebemiso etịn̄ ete: “Enye [Christ Jesus] onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke tọsịn isua, onyụn̄ otop enye esịn ke editụn̄ọ ukpe, onyụn̄ ọkọbi ukpe, onyụn̄ esịri abaha enye, enịm ufịkn̄kpọ ke esịt, man okûbian̄a aba mme idụt.” (Ediyarade 20:1-3) Odudu oro Satan emi ẹmụmde ẹkọbi edinyenede ke idem ubonowo editie ukem ukem nte eke owo n̄kpọkọbi emi odude ke ata n̄kịmn̄kịm ufọk-n̄kpọkọbi idakisọn̄. Nso ubọhọ ke oro edidi ntem ọnọ ubonowo, ọdiọn̄de usụn̄ ọnọ edinen ererimbot! Ndien ke utịt tọsịn isua, ẹyesobo Satan ẹfep.—Ediyarade 20:7-10.
Nso, ndien, kaban̄a ndammana idiọkn̄kpọ? Jehovah ama ọnọnọ isọn̄ ndisio idiọkn̄kpọ mfep. “Eyen Owo [Jesus Christ ekedi] . . . man . . . ọnọ uwem Esie ndifak ediwak owo.” (Matthew 20:28) Ikọ oro ‘ufak’ owụt ekọmurua oro ẹyomde man ẹfak mbon oro ẹmụmde ke ukat. Jesus ama ada mfọnmma uwem esie eke owo ekpe ekọmurua oro nte ufak ndinyan̄a ubonowo.—2 Corinth 5:14; 1 Peter 1:18, 19.
Uwa ufak Jesus Christ ekeme ndida ufọn nsọk nnyịn idem idahaemi. Ebede ke ndibuọt idem ke enye, nnyịn imekeme ndinyene edisana idaha ke iso Abasi. (Utom 10:43; 1 Corinth 6:11) Ke idak ukara Obio Ubọn̄ Abasi, ufak oro ayanam ubonowo ekeme ndibọhọ idiọkn̄kpọ ofụri ofụri. Akpatre n̄wed eke Bible etịn̄ aban̄a ndamban̄a “akpa mmọn̄ uwem” emi otode ke ebekpo Abasi ewet ọwọrọ, ndien ndamban̄a eto mfri ẹmi ẹnyenede ikọn̄ ‘ndida n̄kọk mme idụt udọn̄ọ’ ẹdu ke mben esie. (Ediyarade 22:1, 2) Se Bible owụtde mi ada aban̄a utịbe utịbe ndutịm oro Andibot anamde ndinyan̄a ubonowo nsio ke idiọkn̄kpọ ke isọn̄ uwa ufak Jesus. Edida ndutịm emi nnam n̄kpọ ọyọhọ ọyọhọ ayanyan̄a mme okopitem owo osio ke idiọkn̄kpọ ye n̄kpa.
Uwem ke Edinen Ererimbot
Kere nte uwem editiede ke idak ukara Obio Ubọn̄. Ubiatibet ye afai ẹdidi n̄kpọ eset. (Mme N̄ke 2:21, 22) Utụk ke ndutịm uforo ididụhe aba. (Psalm 37:6; 72:12, 13; Isaiah 65:21-23) Ẹyesọhi kpukpru idiọn̄ọ asari eke n̄kaowo, orụk, ye ekpụk ẹfep. (Utom 10:34, 35) Ekọn̄ ye mme n̄kpọ un̄wana ekọn̄ ididụhe aba. (Psalm 46:9) Ẹyenam ediwak miliọn mme akpan̄kpa ẹfiak ẹdidu uwem ke ererimbot oro ukwan̄ikpe mîdidụhe. (Utom 24:15) Kpukpru owo ẹyedara mfọnmma ye eti nsọn̄idem. (Job 33:25; Ediyarade 21:3, 4) Bible ọsọn̄ọ ọnọ nnyịn ete: “[Jesus Christ] ayada [unenikpe] ọwọrọ ọnọ akpanikọ.”—Isaiah 42:3.
Kan̄a ke emi, ukwan̄ikpe ekeme ndisịm nnyịn, edi ẹyak nnyịn ikûdede inam n̄kpọ ukwan̄ ukwan̄ ke usiene. (Micah 6:8) Idem ke ini anade iyọ ukwan̄ikpe, nnyịn ikpakam ika iso ndinyene idotenyịn. Ke mîbịghike edinen ererimbot oro ẹken̄wọn̄ọde eyedi. (2 Timothy 3:1-5; 2 Peter 3:11-13) Ata Ọkpọsọn̄ Abasi ama etịn̄ ikọ esie, ndien enye ‘oyosu.’ (Isaiah 55:10, 11) Ini edi emi nditịm idem nnọ uwem ke edinen ererimbot oro ebe ke ndikpep se Abasi oyomde oto nnyịn.—John 17:3; 2 Timothy 3:16, 17.
[Ndise ke page 7]
Ẹyesọhi kpukpru idiọn̄ọ ukwan̄ikpe ẹfep ke obufa ererimbot oro Abasi ọn̄wọn̄ọde