Edisana Ndịben̄kpọ Amayarade
“Owo ikemeke ndineni ete ido [uten̄e] Abasi edi akwa ndịben̄kpọ.”—1 TIMOTHY 3:16.
1. Ewe ndịben̄kpọ ke ẹtịn̄ ẹban̄a ke 1 Timothy 3:16?
NTE ndịben̄kpọ ẹsidemerede fi ọkpọsọn̄ udọn̄? Ndi afo emesikop inem ndidụn̄ọde ndịben̄kpọ? Ata ediwak nnyịn imesikop! Buana ye nnyịn, ndien, nte nnyịn ididụn̄ọrede kiet ke otu akakan ndịben̄kpọ—kpa ndịben̄kpọ oro ẹkedịpde ke Ikọ Abasi ke ediwak tọsịn isua. Edisana ndịben̄kpọ emi enen̄ede otụk uwem nnyịn—eke idahaemi ye eke ini iso. Enye edi ‘edisana ndịben̄kpọ eke uten̄e Abasi,’ oro ẹtịn̄de ẹnọ nnyịn ke 1 Timothy 3:16. Nnyịn ikpowụt esịtekọm didie ntem inọ Jehovah, kpa “Abasi emi ayararede ndịben̄kpọ,” emi ke mfọnido, anamde nnyịn idiọn̄ọ akwa ndịben̄kpọ emi ye se enye ọwọrọde!—Daniel 2:28, 29.
2. (a) Ini ewe ke Jehovah ekebemiso etịn̄ aban̄a edisana ndịben̄kpọ, ndien nso ke enye ọkọn̄wọn̄ọ adan̄aoro? (b) Mme mbụme ewe ẹyom ibọrọ?
2 Jehovah ekebemiso etịn̄ aban̄a edisana ndịben̄kpọ ke Urụkikọt ama akabian̄a Eve, n̄ko ke Adam ama eketiene enye odụk nsọn̄ibuot. Do Abasi ama ọn̄wọn̄ọ ete ke ‘mfri’ m̀mê eyen, eyenuak Urụkikọt oro ibuot. (Genesis 3:15) Anie edi Mfri emi? Didie ke enye edikan Urụkikọt oro? Nte enye eyenọ edinam akpanikọ Abasi ubọn̄ ye uduak Esie kaban̄a isọn̄?
3. Mme prọfesi Abasi ẹkenọ nso n̄kpọ ndida ndiọn̄ọ Mfri oro ye utom esie?
3 Nte ini akade, mme prọfesi Abasi ẹma ẹyarade mme n̄kpọ oro ẹdidade ẹdiọn̄ọ Mfri emi ye utom ini iso esie. Enye edidi owo oro otode ubon Abraham, eyeda obio ubọn̄ David enyene, ẹyenyụn̄ ẹkot enye ọbọn̄ Emem. “Ubọn̄ ye emem [esie] ididopke ndikọri.” (Isaiah 9:6, 7; Genesis 22:15-18; Psalm 89:35-37) Edi nte N̄wed Mbon Rome 16:25 etịn̄de, ‘ẹkededịp edisana ndịben̄kpọ emi ke nsinsi eyo.’
Ndikụt Ndịben̄kpọ Oro
4. Didie ke edisana ndịben̄kpọ ọkọtọn̄ọ ndiyarade ke 29 C.E.?
4 Ke akpatre, ke tọsịn isua inan̄ ẹma ẹkebe, un̄wana ama ọbiọn̄ọde! Ke nso usụn̄? Ke 29 C.E., John ama onịm Jesus eyen Nazareth baptism ke Akpa Jordan, ndien uyo Abasi otode enyọn̄ ama ọdọhọ ete: “Emi edi edima Eyen Mi, emi esịt enemde Mi etieti ye Enye.” (Matthew 3:17) Ah, Mfri oro ẹken̄wọn̄ọde ama edisịm ndien ke akpatre! Edisana ndịben̄kpọ ama ọtọn̄ọ ndiyarade ke ofụri ubọn̄ ubọn̄ ikpehe esie, esịnede n̄kpọ aban̄ade uten̄e Abasi.
5. Nso idi “uten̄e Abasi,” ndien didie ke enye otụk mbon oro ẹten̄ede Abasi?
5 “Uten̄e Abasi” an̄wan̄a nnyịn didie? Ke N̄wed Abasi Christian usem Greek (New World Translation), ikọ oro odu utịm ike-20 kpọt, se iwakde ikan mbahade kiet odu ke n̄wed oro Paul ekewetde ọnọ ẹsọk Timothy. N̄wed oro, Insight on the Scriptures akabade “uten̄e Abasi” nte “ukpono, utuakibuot, ye utom ẹnamde ẹnọ Abasi, ye edinam akpanikọ nnọ ukara ofụri ekondo esie.” Ukpono oto esịt oro asan̄ade ekpere Abasi, ke nditen̄e ubọn̄ esie, nsinsi idaha esie, ye uwak nsio nsio ndiye edibotn̄kpọ esie, ye ediwụt esịtekọm ke mme enọ n̄kpọ spirit ye eke obụk, oro enye ọnọde mbon oro ẹnyenede esịtekọm. Ke akpanikọ, nnyịn owo kiet kiet oro iten̄ede Abasi imekeme ndidọhọ, nte andiwet Psalm ọkọdọhọde ke Psalm 104:1 ete: “Ukpọn̄ mi, kọm Jehovah. O Jehovah Abasi mi, afo omokpon etieti; afo emesịne ubom ye ubọn̄ ke idem.”
6. (a) Didie ke mme andituak ibuot nnọ Jehovah ẹkpụhọde ye mbon Christendom oro ẹkpade mmọn̄? (b) Nso ke Paul eketịn̄ ke Rome 11:33, 34, ndien mme ewe mbụme ke ẹdemede?
6 Ana uten̄e oro iten̄ede Abasi ọnọ uyarade, ndien enye anam emi oto edinam. Ke nde emi, mme andituak ibuot nnọ Abasi akpanikọ, Jehovah, ẹkpụhọde akamba akamba ye mbon ufọkederi Christendom oro ẹkpade mmọn̄. Ye ediwak owo ke isọn̄, ido ukpono—edieke edide mmọ ẹsụk ẹnyenyene ido ukpono—edi ndutịm ederi, edi ewụra oro ẹmende ẹsịne man anam mmọ ẹtie edisana edisana ke adan̄aemi mmọ ẹdude uwem oro ekemde ye mbiara ererimbot oro akanarede mmọ okụk. Mmọ ikam idiọn̄ọke enyeemi Abasi edide. Ke akpanikọ, ana utọ mbon oro ẹkere ẹban̄a ikọ Paul ke Utom Mme Apostle 17:23, ke ini enye ọkọdọhọde mbon Athens ẹmi ẹkekponode “Abasi Emi Owo Mîfiọkke” ete: “Se mbufo ẹtuakde ibuot ẹnọ ke unana ifiọk, kpa oro ke ami n̄kwọrọ nnọ mbufo.” Kaban̄a uku uku Abasi oro, Paul ofiori ke N̄wed Mbon Rome 11:33, 34 ete: “Uwak ọniọn̄ ye ifiọk Abasi editụn̄ọ adan̄a didie! Mme ikpe Esie ẹkak owo ndidụn̄ọde adan̄a didie, onyụn̄ ayan̄a owo nditiene nde usụn̄ Esie. Koro anie ọfiọk ekikere Ọbọn̄ [Jehovah]? Anie okonyụn̄ ọnọ Enye item?” Nnyịn isan̄a didie, ndien idi ididiọn̄ọ mme usụn̄ Abasi? Emi ebe ke ndikpep ‘edisana ndịben̄kpọ eke uten̄e Abasi.’ Edi didie ke nnyịn inam oro?
7. Ntak ẹkemede ndidọhọ ke “owo ikemeke ndineni ete ke ido Abasi edi akwa ndịben̄kpọ”?
7 Ke 1 Timothy ibuot 3, apostle Paul ebemiso owụt se ẹyomde ẹto mme asan̄autom oro ẹdotde ke ufọk Abasi, ẹmi ẹtịn̄de ẹban̄a ke ufan̄ikọ 15 nte “ufọk odu-uwem Abasi, adaha ye isọn̄ eke akpanikọ Abasi odorode ke esịt.” Ekem Paul adian do, ke ufan̄ikọ 16 ete: “Owo ikemeke ndineni ete ido Abasi edi akwa ndịben̄kpọ.” Ke akpanikọ, akwa ndịben̄kpọ ke enye edi koro Jehovah ama ọdọn̄ ikpọn̄îkpọn̄ edibon Eyen esie edi isọn̄ ediyarade ndịben̄kpọ emi, man okpowụt se uten̄e Abasi enen̄erede edi ye nte enye edide akpan n̄kpọ, ata akamba n̄kpọ ke utuakibuot akpanikọ. Ẹnam se edisana ndịben̄kpọ eke uten̄e Abasi emi edide an̄wan̄a ke usụn̄uwem Jesus mi ke isọn̄. Ana kpukpru mbon oro ẹmade Jehovah ẹbọp mbuọtidem ye uwem mmọ ẹdori ke Christ, emi edide uwụtn̄kpọ uten̄e Abasi. Didie, ndien, ke Jesus akanam ‘edisana ndịben̄kpọ eke uten̄e Abasi’ an̄wan̄a?
Ikpehe Itiokiet
8. (a) Nso idi ikpehe itiokiet eke edisana ndịben̄kpọ oro Paul etịn̄de aban̄a ke 1 Timothy 3:16? (b) Anie edi “Enyeemi” ẹyararede mi?
8 Otode ndausụn̄ odudu spirit Abasi, Paul ọbọrọ mbụme oro. Mi ke 1 Timothy 3:16, enye asiak ikpehe itiokiet ke edisana ndịben̄kpọ emi, ọdọhọde ete: “Enyeemi [1] akayararede Idemesie ke obụkidem, [2] ẹwụt Enye nte edinen ke spirit, [3] Enye owụt idem ọnọ mme angel, [4] ẹkwọrọ Enye ke otu mme idụt, [5] ẹbuọt idem ye Enye ke ererimbot, [6] ẹmen Enye ẹdọk ke ubọn̄.” “Enyeemi” ẹyararede mi edi anie? Nte an̄wan̄ade, “Enyeemi” edi Mfri oro ẹken̄wọn̄ọde, kpa Jesus, emi ekedide ndinam uduak Abasi. Enye edi isịn ke edisana ndịben̄kpọ emi, anamde oro edi akwa ke akpanikọ.
9. Nso uyarade idu nte ke 1 Timothy 3:16 ikpenyeneke ndikot: “Abasi ama ayarade idemesie ke obụkidem”?
9 Mbon ukpepn̄kpọ Abasi-Ita-ke-Kiet ẹdomo nditịmede ifiọk ẹnyenede ẹban̄a edisana ndịben̄kpọ emi ke ndidọhọ nte ke “Enyeemi,” ke 1 Timothy 3:16 edi Abasi ke idemesie. Emi edi koro Bible King James ye ndusụk n̄kani Bible eken ẹkotde ẹte: “Abasi ama ayarade idemesie ke obụkidem.” Nte ededi, nso ke mme uwetn̄kpọ Greek oro ẹtịmde ẹberi edem ẹdọhọ? Ke usụn̄ odude ke n̄kemuyo, mmọ ẹda ikọ oro “Enyeemi” utu ke “Abasi.” Mme odụn̄ọde ikpan̄wed nyom ndudue ẹnyịme idahaemi ẹte ke ediwet oro ẹwetde “Abasi” ke itien̄wed emi edi ndudue otode mme osion̄o-n̄wed. Ntre, mme Bible eke ata ndondo emi, utọ nte American Standard Version, ye The New English Bible, ye The New World Translation, ẹkot nte enende ẹte: “Ẹma ẹyarade enye ke obụkidem.” Baba, idịghe Abasi ke idemesie okowụt idem “ke obụkidem.” Utu ke oro, ekedi edima Eyen esie, kpa akpa edibotn̄kpọ, emi apostle John ekewetde aban̄a enye ete: “Ndien Ikọ akabade edi obụkidem onyụn̄ odụn̄ ye nnyịn, nnyịn inyụn̄ ikụt ubọn̄ Esie, utọ ubọn̄ emi ikpọn̄ eyen ọbọde ke ubọk Ete ọyọhọ ye mfọn ye akpanikọ.”—John 1:14.
“[Ayarade] Idemesie ke Obụkidem”
10. (a) Didie ke akpa ikpehe edisana ndịben̄kpọ emi akakabade ana in̄wan̄în̄wan̄ ke baptism Jesus? (b) Ntak emi Jesus akakabarede edi “akpatre Adam”?
10 Ke baptism Jesus, akpa ikpehe edisana ndịben̄kpọ emi ama akabade ana in̄wan̄în̄wan̄: Jesus ama ‘ayarade idemesie ke obụkidem’ nte Eyen Abasi oro ẹyetde aran. Jehovah Abasi ama okpụhọde uwem Eyen esie ke heaven edisịn ke idịbi Mary man Jesus ekpekeme ndimana ke obụkidem nte mfọnmma owo. Ntem, nte 1 Corinth 15:45-47 owụtde, Jesus ama akabade edi Adam ọyọhọ iba, m̀mê “akpatre” Adam, kpa mfọnmma uwem owo oro edide ata ukem ukem ye akpa Adam. Kaban̄a nso uduak? Akpa N̄wed Timothy 2:5, 6 etịn̄ otụk “akpatre Adam” nte owo, kpa “Christ Jesus, emi ọkọnọde Idemesie, ete idi ufak kpukpru owo.” Ke isọn̄ mfọnmma uwa oro ekemde ye ibet mi, Jesus edi esịne-ufọt obufa ediomi oro ẹnamde ye owo 144,000 ẹmi ẹkabarede ẹdi mme ada-udeme nnyene ye enye ke Obio Ubọn̄ esie.—Ediyarade 14:1-3.
11. Mmanie ke mme ufọn uwa ufak Jesus ẹnyanarede ẹkesịm?
11 Ndi mmọ en̄wen ẹyebọ ufọn ẹto n̄kpa uwa Jesus? Ih! Akpa N̄wed John 2:2 ọdọhọ ke Jesus Christ “edi usio-isop mme idiọkn̄kpọ nnyịn, [oro edi, idiọkn̄kpọ mme Christian oro ẹyetde aran nte John], inyụn̄ idịghe eke nnyịn ikpọn̄, edi eke ofụri ererimbot nde.” Ufọn uwa ufak Jesus ke ntre anyanade ọkpọn̄ mme Christian 144,000 oro ẹyetde aran, okosịm ofụri ererimbot ubonowo. “Akwa otuowo” oro ẹdude uwem idahaemi ye ediwak billion owo ẹdinamde ẹset ke Paradise isọn̄ ẹnyene ndibọ nsinsi uwem ke ntak mbuọtidem oro mmọ ẹnyenede ke uwa ufak Jesus. Mi kan̄a, nte ẹkebemde iso ẹtịn̄ ke Ediyarade 7:9, 10, akwa otuowo ẹmi ẹma ẹyet ọfọn̄idem mmọ ẹnyụn̄ ẹnam mmọ ẹfia ke ndikọn̄ mbuọtidem ke iyịp Eyenerọn̄ oro ẹkeduọkde, kpa Jesus Christ. Ẹbat mmọ ke edinen ndinyene itie ufan ye Abasi. Ke idara, mmọ ẹmekpep nsio nsio ikpehe edisana ndịben̄kpọ emi ẹnyụn̄ ẹwụt edu uten̄e Abasi ke n̄kemuyo ye uwụtn̄kpọ Jesus!
Mme Ikpehe Eken
12. Didie ke ‘ẹkewụt Jesus nte edinen ke spirit’?
12 Idahaemi, nso kaban̄a ọyọhọ ikpehe iba ke 1 Timothy 3:16? “Ẹwụt Enye [Jesus] nte edinen ke spirit.” Edi didie? Ke Jehovah ndinam Eyen esie emi okomụmde nsọn̄ọnda akama eset ke n̄kpa enyene uwem eke spirit. Emi ama ada osịm Abasi ndisọn̄ọ nte ke Jesus ke ofụri ofụri edi edinen onyụn̄ odot ndikama mme n̄kokon̄ ifetutom efen. Nte N̄wed Mbon Rome 1:4 esịnde enye, “Edi ke spirit Esie emi edide ata edisana, ediset emi Enye esetde ke n̄kpa ama owụt ke odudu ete Enye [Jesus] edi Eyen Abasi.” Ke ọsọn̄ọde emi, Peter asian nnyịn ke akpa n̄wed esie, ibuot 3, ufan̄ikọ 18 ete: “Christ n̄ko-n̄ko ama akpa kaban̄a mme idiọkn̄kpọ inikiet, edinen owo ke ibuot mmọemi mînenke, man Enye ada nnyịn ọsọk Abasi: ẹwot Enye ke obụkidem, edi ẹnam Enye edidu uwem ke spirit.” Ndi uwụtn̄kpọ Jesus eke uten̄e Abasi ke ada fi ọsọk Abasi?
13. Jesus oro ẹkenamde eset okowụt mme angel ewe idem, ndien nso orụk etop ke enye ọkọkwọrọ ọnọ mmọ?
13 Ke akade iso ke 1 Timothy 3:16, Paul afiak etịn̄ aban̄a ọyọhọ ikpehe ita ke edisana ndịben̄kpọ, ọdọhọde ete ke Jesus ama “owụt idem ọnọ mme angel.” Mme angel ẹmi ẹkedi mmanie? Kaban̄a Jesus, emi ẹnamde “edidu uwem ke spirit” idahaemi, Peter ewet ke 1 Peter 3:19, 20 ete: “Ke spirit ke Enye okonyụn̄ aka ọkọkwọrọ ikọ ọnọ mme spirit ke itie-n̄kpọkọbi, kpa mmọemi ẹketụtde utọn̄ ke eyo oko, ke adan̄aemi anyanime Abasi etiede ebet ke eyo Noah.” Nte Jude ufan̄ikọ 6 ọdọhọde, mme spirit oro ẹkedi “mme angel . . . ẹmi mîkomụmke itie-odudu eke mmọ ikama, edi ẹkpọn̄de ebietidụn̄ idemmọ” ke heaven. Mmọ ẹma ẹmen obụkidem ẹsịne man ẹkpenyene obukpo ebuana idan̄ ye iban. Ke ini Ukwọ ekenyịkde mme angel oro ẹfiak ẹnyọn̄ọ obio mbon spirit, ẹma ẹtop mmọ ẹdọn̄ ke Tartarus, kpa akpatre usụhọde itie. (2 Peter 2:4) Jesus oro ẹkenamde eset ama ọkwọrọ ikọ ọnọ mmọ. Edi nte oro ekedi etop edinyan̄a? Baba! Utu ke oro, Jesus ama obiom idiọk edinam mmọ ikpe nte edide ata n̄kpọ oro ọbiọn̄ọde-biọn̄ọ uten̄e Abasi. Owo ekededi ke otu ikọt Abasi oro adade oburobụt ido idan̄ anam efen mfịn ekpenyene ndikpep n̄kpọ ke ubiereikpe oro ẹkebierede ẹnọ mme angel oro!
14. Didie ke ẹketọn̄ọ ‘ndikwọrọ Jesus ke otu mme idụt’?
14 Ọyọhọ ikpehe inan̄ ke 1 Timothy 3:16 edi nte ke ẹma “ẹkwọrọ [Jesus] ke otu mme idụt.” Didie ke emi okosu? Esisịt ini mbemiso ẹmụmde enye, Jesus ama asian mme apostle ete: “Ke akpanikọ ke ndọhọ mbufo, owo eke ọbuọtde idem ye Ami eyenyụn̄ anam utom eke Ami nnamde; enye eyenyụn̄ anam utom eke okponde akan oro: sia Ami nnyọn̄de ntiene Ete.” (John 14:12) Ibịghike ke oro ebede, ke Pentecost eke 33 C.E., Jesus ama an̄wan̄a edisana spirit ọduọk mme mbet esie ke idem, ndien etop n̄kpaidem oro nte ke “Abasi akanam Jesus emi eset ke n̄kpa” edi se ẹketọn̄ọde ndikwọrọ nnọ mme Jew. Ke ukperedem, mbon Samaria ẹma ẹnyịme ikọ Abasi ẹnyụn̄ ẹtọn̄ọ ndibọ edisana spirit. (Utom 2:32; 8:14-17) Ekem, ke 36 C.E., Peter ama ọkwọrọ ikọ ọnọ Cornelius ye mbon Gentile eken oro ẹkesopde idem ke ufọk esie. Ntem, ẹma ẹtọn̄ọ ‘ndikwọrọ eti mbụk aban̄ade Jesus ke otu mme idụt,’ oro edi, ke otu mbon oro mîkedịgbe mme Jew, ẹmi ẹkenyụn̄ ẹyetde mmọ aran n̄ko ke edisana spirit.
15. Nso iwụt nte ke mme Christian akpa isua ikie ẹma ẹtịm ẹkpep edisana ndịben̄kpọ eke uten̄e Abasi?
15 Nte ẹtọtde ke Utom Mme Apostle 12:24, “ikọ Abasi [ama] ọkọri, onyụn̄ ọdọdiọn̄ asuana.” Utom Mme Apostle 17:6 obụk ete ke n̄kan̄ edem edere Greece mme andibiọn̄ọ ẹma ẹfiori, nte emi mmọ ẹsụk ẹfioride do tutu osịm mfịn emi ẹte: “Mme anditịmede ererimbot emi ẹdi mi n̄ko-o.” Ke ufan̄ isua 30, Paul ama etie ke Rome ewet ete ke ẹma ‘ẹkwọrọ eti mbụk emi ẹnọ kpukpru owo ke idak ikpaenyọn̄.’ (Colossae 1:23) Mme Christian eke ini oro ẹma ẹtịm ẹkpep edisana ndịben̄kpọ eke uten̄e Abasi. Didie ke mmọ ẹkeda enye ifịk ifịk ẹsịn ke edinam ntem! Ndien nnyịn kpasụk ntre ikpakam ikpep inyụn̄ ida enye isịn ke edinam ke akpatre usen ukwọrọ Obio Ubọn̄ emi!
16. Nso ikedi ọyọhọ ikpehe ition eke edisana ndịben̄kpọ, ndien nso utom ikanam enye ana in̄wan̄în̄wan̄?
16 Ke ndinam n̄kpọ mban̄a ukwọrọikọ eke akpa isua ikie oro, ọyọhọ ikpehe ition eke edisana ndịben̄kpọ emi ke 1 Timothy 3:16 ama akabade ana in̄wan̄în̄wan̄ nte ẹkụtde. Idahaemi ẹma “ẹbuọt idem ye [Jesus] ke ererimbot.” Emi okoto ntak edu uten̄e Abasi oro ebietde eke Christ oro mme enyene-ifịk isụn̄utom, ẹsịnede Paul ye Timothy, ẹkenyenede. Mmọ ẹma ẹda eti mbụk ẹka Asia Minor ye Europe, iso-ọfọn ẹsịmde anyan ebiet nte Spain, onyụn̄ asuanade okosịm East Africa ebe ke inua owo Ethiopia oro akanade baptism, ke adan̄aemi Peter akanamde utom ke Babylon.
17. Ntak emi ẹbuọtde idem ye Jesus ke ofụri ererimbot eyomfịn-e?
17 Nso kaban̄a eyo nnyịn? Ọtọn̄ọde ke 1919, nsụhọ oro ẹyetde aran ẹmenyene uten̄e Abasi oro odotde se ẹkpebede. Mbon ẹmi ẹyetde aran mi ẹmebọp se isọn̄de idem ẹdori ke itiat idakisọn̄ mbuọtidem oro Jesus ekesịnde. Akpan akpan ọtọn̄ọde ke 1935, mmọ ẹma ẹtọn̄ọ nditan̄ akwa otuowo mbok, ẹmi ẹkopde idatesịt ke idotenyịn edịbe “akwa ukụt” nnyụn̄ n̄kop inem uwem ke paradise isọn̄. (Ediyarade 7:9, 14) Ntem, eti mbụk oro aban̄ade Jesus edi se ẹnịmde ke akpanikọ ke ofụri ererimbot eyomfịn. Ke uten̄e Abasi, Mme Ntiense Jehovah ẹwakde ẹbe 3,700,000 ke ẹkwọrọ ikọ idahaemi ke ẹnyụn̄ ẹkọri ke ofụri ekondo!
18. Didie ke ‘ẹkemen Jesus ẹdọk ke ubọn̄’?
18 Ikpehe edisana ndịben̄kpọ oro kiet osụhọ, kpa ọyọhọ itiokiet: “Ẹmen [Jesus] ẹdọk ke ubọn̄.” Ke usen 40 ke ẹma ẹkenam enye edidu uwem ke spirit, Jesus ama emen idem eke obụk ọfọrọ, owụtde mme mbet esie idem onyụn̄ etịn̄de mme “n̄kpọ [ẹban̄ade] Obio Ubọn̄ Abasi” ọnọ mmọ. Ekem enye ama ọdọk ke heaven. (Utom 1:3, 6-9) Ke ntre ẹma ẹbọrọ akam esie oro ẹwetde ke John 17:1-5: “Ete, . . . nọ Eyen Fo ubọn̄, man Eyen Fo ọnọ Fi ubọn̄ . . . Ami mma nnọ Fi ubọn̄ ke isọn̄ . . . ndien ke emi, Ete, da ubọn̄, eke n̄kenyenede ye Afo ndien ererimbot edidu, no Mi.”
19. Nso idara ke ẹkedia ke unyọn̄ oro Jesus ọkọnyọn̄de aka heaven?
19 Nso akwa idara ke anaedi ẹma ẹdia ntem ke unyọn̄ Jesus ke heaven! Ke ata edem edem ko, ke ini Jehovah okobotde isọn̄, ‘kpukpru nditọ Abasi ẹma ẹsio n̄kpo.’ (Job 38:7) Idem akande oro, anaedi udịm mme angel ẹma ẹyọhọ ye idatesịt ndifiak nnyene anam-akpanikọ An̄wana-en̄wan nnọ ukara Jehovah!
20. Ntak emi Jesus ọkọbọde utọ mfọn n̄kan enyịn̄ oro enyene-e, ndien nso ke enye akanam ke adan̄aemi okodude ke isọn̄?
20 Ke Mme Hebrew 1:3, 4, Paul etịn̄ aban̄a Jesus oro akande ete: “Ke Enye ama akama utom edinam owo ẹsana ke mme idiọkn̄kpọ, Enye osụhọde etetie ke ubọk nnasia Andinyene ubọn̄ ke enyọn̄; Enye ama onyụn̄ akabade okpon akan mme angel, adan̄a nte Enye akadade enyịn̄ emi ọfọnde akan eke mmọ enyene.” Christ ọkọbọ enyịn̄ oro ke ntak edikan oro enye akakande idiọkido. Eyen Abasi emi ke akpanikọ ama akan idomo uten̄e Abasi mi ke isọn̄. Enye n̄ko ama onịm, uwụtn̄kpọ ọnọ kpukpru mbon en̄wen ẹmi ẹdinyenede nsinsi uwem. Ye edimenede Jesus nnịm ke ubọk nnasia Abasi ke heaven, ẹma ẹyarade kpukpru ikpehe edisana ndịben̄kpọ eke uten̄e Abasi.
Didie ke Afo Ọkpọbọrọ?
◻ “Uten̄e Abasi’edi nso?
◻ Didie ke Jesus “akayarade Idemesie ke obụkidem” ndien ke oro ebede “ẹwụt Enye nte edinen ke spirit”?
◻ Mme angel ewe ke Jesus okowụt idem, ndien ye nso etop?
◻ Didie ke ẹkwọrọ Christ “ke otu mme idụt” ẹnyụn̄ “ẹbuọt idem ye Enye ke ererimbot”?
◻ Ini ewe, ndien n̄ko ke ama akanam nso kaban̄a uten̄e Abasi ke ‘ẹkemen Jesus ẹdọk ke ubọn̄’?