“Etop Idatesịt” Ẹdude Ke Ediyarade

“N̄kụt angel en̄wen efefe ke ufọt enyọn̄, emi enyenede nsinsi gospel ete ikwọrọ [nte etop idatesịt, NW] inọ mmọ ẹmi ẹdụn̄de ke isọn̄.”—EDIYARADE 14:6.

1. Ke adan̄aemi Mme Ntiense Jehovah ẹnịmde ke akpanikọ nte ke ẹkeda odudu spirit ẹwet n̄wed Ediyarade, ntak emi mmọ mîdịghe “n̄ka nsobo”?

KE EDIDE isio ye mme edori ikọ oro ẹdoride mmọ, Mme Ntiense Jehovah idịghe “n̄ka nsobo” m̀mê “n̄ka usen ikpe.” Mmọ, nte ededi, ẹnyịme n̄wed Ediyarade nte ubak Ikọ Abasi eke odudu spirit. Edi akpanikọ, Ediyarade ọdọn̄ọ mme etop ikpe oro ẹbiomde mme anamidiọk. Edi ke an̄wan̄wa utom unọ ikọ ntiense mmọ, mme asan̄autom Abasi ẹwụk ntịn̄enyịn akpan akpan ke utịbe utịbe idotenyịn oro ẹnamde an̄wan̄a ke Bible, esịnede enye oro odude ke Ediyarade. Ntem, mmọ idianke n̄kpọ m̀mê ndisio n̄kpọ ekededi ke mme ntịn̄nnịm ikọ ẹmi ẹdude do.—Ediyarade 22:18, 19.

Mme Anditan̄a Etop Idatesịt

2. Nso idi ndusụk itien̄wed oro Mme Ntiense Jehovah ẹsiwakde ndida ke utom ukwọrọikọ mmọ?

² Itien̄wed Abasi oro ẹsiwakde ndisiak nda nsọn̄ọ an̄wan̄wa utom ukwọrọikọ Mme Ntiense Jehovah edi mme ikọ Jesus: “Ẹyenyụn̄ [ẹtan̄a, ikọ idakisọn̄ NW] gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Ndien nso idi “gospel Ubọn̄ Abasi emi”? Ediwak Mme Ntiense ẹdibọrọ ke ndikot nto mme ufan̄ikọ oro ẹdude ke Ediyarade ibuot 20 ye 21 oro ẹtịn̄de ẹban̄a Tọsịn Isua Ukara Christ ye ukara Obio Ubọn̄ esie ye n̄ka owo, emi n̄kpa, ntuan̄a, ye ubiak ‘mîdidụhe aba.’—Ediyarade 20:6; 21:1, 4.

3. An̄wan̄wa utom ukwọrọikọ Mme Ntiense Jehovah asan̄a ekekem ye nso utom?

³ Nte mme anditan̄a etop idatesịt ẹmi, Mme Ntiense Jehovah ke akpanikọ ẹdi mme etịn̄ikọ ke ibuot ndamban̄a isụn̄utom eke heaven emi ẹtịn̄de ẹban̄a utom esie n̄ko ke Ediyarade. “N̄kụt angel en̄wen efefe ke ufọt enyọn̄, emi enyenede nsinsi gospel ete ikwọrọ [nte etop idatesịt, NW] inọ mmọ ẹmi ẹdụn̄de ke isọn̄, ye kpukpru idụt ye esien ye usem ye obio.” (Ediyarade 14:6) “Nsinsi gospel” esịne ntọt oro nte ke “obio ubọn̄ [m̀mê, itie ukara] ererimbot emi amakabade edi Obio Ubọn̄ Ọbọn̄ nnyịn ye Christ Esie” ye nte ke “ekem ini” Jehovah ‘ndisobo mmọ ẹmi ẹsobode isọn̄.’ (Ediyarade 11:15, 17, 18) Ndi oro inen̄ekede idi eti mbụk?

Se Ediyarade Akamade ọnọ Nnyịn

4. (a) Nso isọn̄ akpanikọ ke ẹsio ẹwụt ke Ediyarade ibuot 1? (b) Nso ke ẹyom ẹto mbon oro ẹyomde ndibọ ufọn nto etop idatesịt oro?

⁴ Akpa ibuot n̄wed Ediyarade owụt Jehovah nte “Alpha ye Omega; . . . emi odude-du, okonyụn̄ odude-du, edinyụn̄ edide, Andikara kpukpru n̄kpọ.” Ndien enye owụt Eyen esie, Jesus Christ, nte “ntiense emi anamde akpanikọ,” “andibem iso mmana ke otu mme akpa-n̄kpa,” ye “andikara ndidem isọn̄.” Enye n̄ko etịn̄ aban̄a Jesus nte “enye emi amade nnyịn, okonyụn̄ adade iyịp Esiemmọ atat nnyịn urụk mme idiọk-n̄kpọ nnyịn.” (Ediyarade 1:5, 8) Ntem, toto ke ntọn̄ọ ntọn̄ọ, Ediyarade anam isọn̄ akpanikọ emi anyan̄ade uwem an̄wan̄a. “Mmọ ẹmi ẹdụn̄de ke isọn̄” idibọhọ ufọn ito etop idatesịt emi ẹdade ẹsọk mmọ ibọhọke mmọ ẹnyịme itie edikara Jehovah, ẹkọn̄ mbuọtidem ke iyịp Jesus oro ẹkeduọkde, ẹnyụn̄ ẹnịm ẹte ke Jehovah akanam enye eset ke n̄kpa ye nte ke Christ idahaemi edi Andikara isọn̄ emi Abasi emekde.—Psalm 2:6-8.

5. Ẹwụt ke Christ anam nso ke Ediyarade ibuot 2 ye 3?

⁵ Ibuot iba oro ẹtienede ẹwụt Christ Jesus nte ima ima Esenyịn eke heaven emi esede mme esop mbet esie enyịn ke isọn̄. N̄wed emi ẹkenọde ẹsọk esop Christian itiaba ẹmi ẹkemekde oro ẹkedude ke Asia Minor ke akpa isua ikie E.N. ama ọdọn̄ọ nsịnudọn̄ ye enyene-iwụk item oro osụk enyenede n̄kpọ ndinam mfịn. Mme etop ẹmi ẹkenọde ẹsọk mme esop oro ẹsiwak nditọn̄ọ ye mme utọ ikọ nte “Mmọfiọk mme utom fo” m̀mê “Mmọfiọk ukụt” fo. (Ediyarade 2:2, 9) Ih, Christ ama ọfiọk nnennen se ikakade iso ke mme esop mbet esie. Enye ama otoro ndusụk kaban̄a ima mmọ, mbuọtidem, ukeme ẹsịnde ke utom ukwọrọikọ, ime, ye edinam akpanikọ mmọ nnọ enyịn̄ ye ikọ esie. Enye ama asua ọnọ mmọ eken koro mmọ ẹkeyakde ima oro mmọ ẹkenyenede ẹnọ Jehovah ye Eyen esie ebịt, mîdịghe mmọ ẹma ẹfiak ẹduọ ẹdụk oburobụt ido idan̄, ukpono ndem, m̀mê edisiak isio n̄ka eke mbon nsọn̄ibuot.

6. N̄kukụt oro ẹwetde ke Edi ibuot 4 an̄wam mme owo ndifiọk nso?

⁶ Edi Ibuot 4 ọnọ enyene-uten̄e n̄kukụt ebekpo Jehovah Abasi eke heaven. Enye anam ifiọk ubọn̄ ubọn̄ edidu Jehovah ye ndutịm ukara eke heaven emi enye edidade anam n̄kpọ. Mme andikara ẹmi ẹyarade anyanya, ẹmi ebekpo mmọ ẹdude ẹkanade ebekpo emi odude ke ufọt ufọt ekondo, ẹtuak ibuot ẹnọ Jehovah ẹnyụn̄ ẹtan̄a ẹte: “Ọbọn̄ ye Abasi nnyịn, Afo omodot ndibọ ubọn̄ ye ukpono ye odudu, koro Afo okobotde kpukpru n̄kpọ; ndien oto uduak Fo ke mmọ ẹdu, ẹkenyụn̄ ẹboro.”—Ediyarade 4:10b.

7. (a) Nso ke angel owụk mme andidụn̄ isọn̄ ete ẹnam? (b) Nso idi akpan ubak utom unọ ukpep nnyịn?

⁷ Ndi emi enyene se ọwọrọde ọnọ mme owo mfịn? Enen̄ede enyene. Edieke mmọ ẹyomde uwem ke idak Obio Ubọn̄ ọ-Tọsịn Isua, ana mmọ ẹnam se ‘angel emi efede ke ufọt enyọn̄’ atan̄ade: “Ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie.” (Ediyarade 14:6, 7) Kiet ke otu mme akpan uduak utom unọ ukpep Bible emi Mme Ntiense Jehovah ẹnamde edi ndin̄wam “mmọ ẹmi ẹdụn̄de ke isọn̄” ẹfiọk ẹnyụn̄ ẹtuak ibuot ẹnọ Jehovah, ẹnyịme itie esie nte Andibot, ẹnyụn̄ ẹsụk ibuot unyịme unyịme ẹnọ edinen itie edikara esie.

Eyenerọn̄ Odot Ukpono

8. (a) Ẹwụt ke Christ anam nso ke Edi ibuot 5 ye 6? (b) Nso ke kpukpru mmọ ẹmi ẹkpan̄de utọn̄ ẹnọ etop idatesịt ẹkeme ndikpep nto n̄kukụt emi?

⁸ Ibuot iba oro ẹtienede, Ediyarade ibuot 5 ye 6, ẹwụt Jesus Christ nte Eyenerọn̄ emi ẹkụtde nte odotde ndikụbọde n̄wed emi enyenede ufịkn̄kpọ itiaba, ntem ẹdade ndamban̄a usem ẹyarade mme n̄kpọntịbe ẹmi ẹdade itie ke eyo nnyịn. (Men John 1:29 domo.) Mme uyo ẹtode heaven ẹdọhọ ndamban̄a Eyenerọn̄ emi ẹte: “Afo omodot ndida n̄wed, ndinyụn̄ ndianade mme ufịkn̄kpọ esie; koro ẹkewotde Fi, Afo ama onyụn̄ ada iyịp Fo osio owo ke kpukpru esien, ye usem, ye obio, ye idụt, afak mmọ ọnọ Abasi; omonyụn̄ anam mmọ ẹdi Obio Ubọn̄ ye mme oku ẹnọ Abasi: mmọ ẹyenyụn̄ ẹda ubọn̄ ke isọn̄.” (Ediyarade 5:9, 10) N̄kukụt emi ekpep nte ke ọkọn̄ọde ke iyịp Christ emi ẹkeduọkde, ẹkot ndusụk owo ke kpukpru idụt ẹte ẹdidu ye enye ke heaven ẹnyụn̄ “ẹda ubọn̄ ke isọn̄.” (Men Ediyarade 1:5, 6 domo.) Ke ukperedem, ẹwụt ukeuke ibat mmọ ke Ediyarade.

9. Ẹwụt ke Christ anam nso ke Edi ibuot 6?

⁹ Kpa ke n̄kukụt emi, ẹwụt Christ n̄ko nte ayara-anyanya emi awatde afia enan̄-mbakara, emi ọwọrọde aka ‘ndikan, nnyụn̄ ndọdiọn̄ n̄kan.’ Nte enemde, enye ayakan ndiọi utịp ẹmi mme awat enan̄-mbakara ita eken eke Ediyarade ẹdade ẹban̄a, emi idat idat uwat mmọ adade ekọn̄, akan̄, ye n̄kpa ọsọk ubonowo toto ke n̄wọrọnda isua 1914. (Ediyarade 6:1-8) N̄wọrọnda udeme Christ, Eyenerọn̄ Abasi, ke edinyan̄a ubonowo ye ke edisu mme utịbe utịbe uduak Jehovah edi akpan ibuotikọ utom ukpep Bible eke Mme Ntiense Jehovah.

10. (a) Nso akpan ntọt ke ẹnọ ke Edi ibuot 7? (b) Didie ke Christ eketịn̄ aban̄a mbon oro ẹbọde Obio Ubọn̄?

¹⁰ Edi Ibuot 7 ke akpanikọ esịne etop idatesịt. Edi ke n̄wed Ediyarade kpọt ke nnyịn ikụt ibat mbon oro Jesus okokotde “ekpri otu erọn̄” emi Ete Eyenerọn̄ ọnọde Obio Ubọn̄. (Luke 12:32; 22:28-30) Jehovah Abasi ada spirit esie efịk mmọ ẹmi idiọn̄ọ. (2 Corinth 1:21, 22) Apostle John, emi ọkọbọde Ediyarade emi, ọsọn̄ọ ete: “N̄kop ibat mmọ ẹmi ẹfịkde mmọ idiọn̄ọ; thousand owo ikie ye aba ye inan̄.” (Ediyarade 7:4) Ẹsọn̄ọ n̄kemn̄kem ibat emi ke ukperedem ibuot kiet nte edide ofụri ibat mbon oro ‘ẹkefakde ẹsio ke otu owo’ man ẹkara ye Eyenerọn̄ ke Obot Zion eke heaven. (Ediyarade 14:1-4) Ke adan̄aemi mme ufọkabasi Christendom ẹnamde ibat emi an̄wan̄a ke usụn̄ oro mîn̄wan̄ake owo onyụn̄ ọsọn̄de ndinịm, nte enemde, eyen ukpepn̄kpọ Bible oro E. W. Bullinger etịn̄ aban̄a ibat emi ete: “Emi edi mmemmem ikọ akpanikọ: akpan ibat emi edide isio ye anana-ibat owo oro ẹtịn̄de ẹban̄a kpa ke ibuot emi.”

11. (a) Nso etop idatesịt ke ẹkụt ke Edi ibuot 7? (b) Nso idotenyịn ina ke iso ibet mbon “akwa otu owo”?

¹¹ Ewe anana-ibat owo ke Bullinger eketịn̄ aban̄a? Ke Edi 7 ufan̄ikọ 9, apostle John ekewet ete: “Ke n̄kpọ ẹmi ẹma ẹkebe, n̄kụt, ndien sese, akwa otu owo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem.” (Ediyarade 7:9) Mmanie ẹnam akwa otuowo emi, nso idi idaha mmọ ke emi ke iso Abasi, ndien nso ke ini iso akama ọnọ mmọ? Ibọrọ oro odude ke Ediyarade edi eti mbụk ọnọ mme andidụn̄ isọn̄. Nnyịn ikot ite: “Mmọ oro ẹdi mmọ ẹmi ẹketode ke akwa ukụt ẹwọn̄ọ, ẹkenyụn̄ ẹyetde ọfọn̄idem mmọ ẹnam afia ke iyịp Eyen-erọn̄.” Ebede ke mbuọtidem oro ẹnyenede ke iyịp Christ oro ẹkeduọkde, ẹyekpeme mmọ ke ini “akwa ukụt.” Christ ayada “mmọ aka ke idịm mmọn̄ uwem: ndien Abasi ọyọkwọhọde kpukpru mmọn̄eyet ke enyịn mmọ efep.” (Ediyarade 7:14-17) Ih, ediwak miliọn owo ẹmi ẹdude uwem mfịn ẹkeme ndikabade ndi ubak anana-ibat otuowo oro ẹdibọhọde utịt idiọk editịm n̄kpọ oro odude ke emi. Nte mme andidu ke idak Edidem Jesus Christ ke ini Ukara Tọsịn Isua esie, enye ayada mmọ usụn̄ esịm nsinsi uwem ke isọn̄. Nte oro idịghe eti mbụk?

“Mme Ikpe Esie Ẹdi Ata Akpanikọ Ẹnyụn̄ Ẹnen”

12, 13. (a) Nso idọn̄ọ ke Edi ibuot 8 esịm 19? (b) Ntak emi mme utọ ntịn̄nnịm ikọ oro mîkpetịmekede mbon esịt akpanikọ?

¹² Edi Ibuot 8 esịm 19 ẹnen̄ede ẹdi ntak etop oro n̄wed Ediyarade ọwọrọde nte n̄wed emi ebemde iso etịn̄ aban̄a mme enyene-ndịk nsobo. Mmọ ẹdọn̄ọ n̄kpọsọn̄ etop ubiomikpe (emi mme uyo ukotowo, mme ufen, ye mme eso iyatesịt Abasi ẹdade ẹban̄a) oro ẹdade ẹtiene nsio nsio ikpehe editịm n̄kpọ Satan. Ẹdibem iso ẹda mme ubiomikpe ẹmi ẹtiene nsunsu ido ukpono (“Akwa Babylon”), ekem ẹda ẹtiene mme ndutịm ukaraidem ẹmi mîbakke Abasi, oro idiọk unam adade aban̄a.—Ediyarade 13:1, 2; 17:5-7, 15, 16.a

¹³ Mme ibuot ẹmi ẹwụt nte ẹnamde heaven asana, ye nte ẹsiode Satan ye mme demon esie ẹduọk ke ikpehe isọn̄. Emi edi n̄kukụre edinam an̄wan̄a oro owụtde ifiọk kaban̄a anana-mbiet itie nnanenyịn emi ererimbot odude toto ke 1914. (Ediyarade 12:7-12) Ke ndamban̄a usem, mmọ n̄ko ẹtịn̄ ẹban̄a nsobo idiọk editịm n̄kpọ Satan ke isọn̄. (Ediyarade 19:19-21) Nte mme utọ ndyọ ndyọ n̄kpọntịbe oro ẹkpenyene ndikpa mbon esịt akpanikọ idem? Baba, koro ke ini ubiereikpe Abasi, udịm mme angel ke heaven ẹfiori ẹte: “Hallelujah; Edinyan̄a, ye ubọn̄, ye ukeme ẹnyene Abasi nnyịn: koro mme ikpe Esie ẹdi ata akpanikọ ẹnyụn̄ ẹnen.”—Ediyarade 19:1, 2.

14, 15. (a) Ẹdisan̄a didie ẹda utịt isọk idiọk editịm n̄kpọ oro odude ke emi ke edinen ido? (b) Ntak emi ikpehe Ediyarade enye emi ekpedide ntak idatesịt ọnọ mbon esịt akpanikọ?

¹⁴ Jehovah ididaha edinen editịm n̄kpọ idi ye unana edision̄o mbon oro ẹbiatde isọn̄ mfep ke enye. (Ediyarade 11:17, 18; 19:11-16; 20:1, 2) Nte ededi, idụhe owo m̀mê idụt ukaraidem emi enyenede odudu m̀mê ukeme ndinam emi. Edi sụk Jehovah ye Edidem edide Ebiereikpe, Christ Jesus, emi enye emekde ẹkeme ndinam emi ke edinen ido.—2 Thessalonica 1:6-9.

¹⁵ Nte Ediyarade owụtde ata in̄wan̄în̄wan̄, Jehovah aduak ndida utịt nsọk idiọk editịm n̄kpọ oro odude ke emi. Akpanikọ emi ekpenyene ndidi ntak idatesịt nnọ iren ye iban ẹmi “ẹsemede ẹnyụn̄ ẹtuade ẹban̄a kpukpru mbubiam ido ẹmi . . . ẹnamde.” (Ezekiel 9:4) Emi ekpenyene ndinam mmọ ẹkụt nte oyomde ẹsọsọp ẹnam ntọt oro angel emi enyenede etop idatesịt ọnọde, emi ọkọdọhọde ete: “Mbufo ẹten̄e Abasi . . . koro ekem ini ikpe Esie; ẹnyụn̄ ẹtuak ibuot ẹnọ Enye emi okobotde enyọn̄ ye isọn̄.” (Ediyarade 14:7) Mme utọ owo oro ẹkpekam ẹtuak ibuot ẹnyụn̄ ẹnam n̄kpọ ẹnọ Jehovah ẹbuanade ye Mme Ntiense esie, “ẹmi ẹnịmde mme item Abasi, ẹnyụn̄ ẹyịrede ẹmụm ikọ-ntiense Jesus ẹkama.”—Ediyarade 12:17.

Ubọn̄ Ubọn̄ Ukara Tọsịn Isua

16. (a) Ntak emi mme ufọkabasi Christendom ẹsịnde idotenyịn Tọsịn Isua? (b) Ntak emi Mme Ntiense Jehovah ẹnịmde ke akpanikọ ẹte ke ẹyebọrọ akam uwụtn̄kpọ?

¹⁶ Edi Ibuot 20 esịm 22 ke n̄wed Ediyarade esịne isọn̄ N̄wed Abasi ndinyene idotenyịn ke Tọsịn Isua. Emi edi n̄kukụre ikpehe Bible emi enen̄erede etịn̄ aban̄a ikpehe ini tọsịn isua oro edidude mbemiso nsinsi ini inemesịt ke heaven ye ke isọn̄. Mme ufọkabasi Christendom ẹsịn idotenyịn Tọsịn Isua. Sia ukpepn̄kpọ ufọkabasi ọdọhọde ke ndinen owo ẹka heaven ndien ndiọi owo ẹka hell, enye inamke ufan̄ inọ paradise isọn̄. Akam uwụtn̄kpọ, emi eben̄ede ete “ẹnam uduak [Abasi] ke isọn̄ nte ẹnamde ke heaven,” iwọrọke n̄kpọ ndomokiet inọ ata ediwak mme andibuana ke mme ufọkabasi Christendom. (Matthew 6:10, New International Version) Edi oro idịghe ntre ye Mme Ntiense Jehovah. Mmọ ẹsọn̄ọ ẹnịm ke akpanikọ ẹte ke Jehovah Abasi ikanamke isọn̄ “ke ikpîkpu,” edi akanam “man ẹdụn̄ ke esịt.” (Isaiah 45:12, 18) Ntem, ntịn̄nnịm ikọ eke eset, akam uwụtn̄kpọ, ye idotenyịn Ediyarade emi aban̄ade Tọsịn Isua ẹdu ke n̄kemuyo. Ke Tọsịn Isua Ukara esie, Christ oyokụt ete ke ẹnam uduak Jehovah ke isọn̄, kpa nte ẹnamde ke heaven.

17. Nso iwụt ke ẹnyene ndida “thousand isua” oro ke ata ata usụn̄?

¹⁷ Ikọ oro “thousand isua” odu utịm ikotiokiet ke akpa ufan̄ikọ itiaba oro ẹdude ke Ediyarade ibuot 20 ufan̄ikọ 1-7. Odot ẹtịm ẹfiọk nte ke ẹda enye utịm ikanan̄ ke New World Translation ye ikọ oro asiakde ata ata n̄kpọ, “oro,” owụtde nte ke enye etịn̄ aban̄a ata ata tọsịn isua, idịghe sụk anyan ikpehe ini emi owo mîsiakke, nte ediwak mme etịn̄ikọ mban̄a n̄kpọ ke Christendom ẹkpemade nnyịn inịm. Nso idida itie ke Tọsịn Isua oro? Akpa, ẹyebọ Satan odudu ke ofụri ikpehe ini oro. (Ediyarade 20:1-3; men Mme Hebrew 2:14 domo.) Nso eti mbụk ke oro edi ntem!

18. (a) Ntak emi ẹkemede ndikot Tọsịn Isua “usen” ikpe? (b) Nso iditịbe ke utịt tọsịn isua oro?

¹⁸ Sia ẹyakde “ubiereikpe” ẹnọ mbon oro ‘ẹdidade ubọn̄ ye Enye [Christ] ke thousand isua,’ ikpehe ini emi, ke akpanikọ, edi “usen” ikpe eke tọsịn isua kiet. (Ediyarade 20:4, 6; men Utom 17:31; 2 Peter 3:8 domo.) Ẹyenam mme akpan̄kpa ẹset ndien, ke adianade ye mme andibọhọ “akwa ukụt,” ẹyebiere ikpe ẹnọ mmọ ukem ukem nte ekemde ye se mmọ ẹnamde ke ini oro. (Ediyarade 20:12, 13) Ke utịt tọsịn isua oro, ẹyekpọhọde Satan ẹyak ke ibio ini man ada akpatre udomo etiene ubonowo ndien ke oro ebede ẹyesobo enye, mme demon esie, ye mbon nsọn̄ibuot ekededi ke isọn̄ ẹmi ẹtienede enye, ẹfep ke nsinsi. (Ediyarade 20:7-10) Ẹyewet enyịn̄ mme owo oro ẹbede udomo oro ẹsịn ke “n̄wed uwem” ke usụn̄ oro owo mîkemeke ndisọhi mfep ẹyenyụn̄ ẹda mmọ ẹsịm nsinsi uwem inemesịt, ẹnamde n̄kpọ ẹnyụn̄ ẹtuakde ibuot ẹnọ Jehovah ke paradise isọn̄.—Ediyarade 20:14, 15; Psalm 37:9, 29; Isaiah 66:22, 23.

19. (a) Ntak emi nnyịn ikemede nditịm nnịm nte ke mme utịbe utịbe un̄wọn̄ọ oro ẹnọde ke n̄wed Ediyarade iditreke-tre ndisu? (b) Nso ke ẹdineme ke ibuotikọ oro etienede?

¹⁹ Mme etop idatesịt oro ẹnọde ke Ediyarade ẹdi oro. Mmọ idịghe ikpîkpu un̄wọn̄ọ oro owo ọn̄wọn̄ọde. Apostle John ekewet ete: “Anditie ke ebekpo onyụn̄ ọdọhọ ete, Sese, mmanam kpukpru n̄kpọ ẹdi mbufa. Enye onyụn̄ ọdọhọ ete, Wet: koro mme ikọ ẹmi ẹdi akpanikọ ye se owo ekpenịmde.” (Ediyarade 21:5) Nso ke ana nnyịn inam man ibuana ke edisu oro mme etop idatesịt ẹmi ẹsude? N̄wed Ediyarade ọdọn̄ọ ekese item ọnọ mbon oro ẹyomde ndinem Abasi esịt. Nditiene utọ item oro ọyọnọ nnyịn akwa inemesịt, idahaemi ye ke nsinsi, nte ibuotikọ oro etienede ediwụtde.

[Ikọ idakisọn̄]

Mme Akpan N̄kpọ Ndidụn̄ọde

◻ Ewe isọn̄ akpanikọ oro ẹkụtde ke Ediyarade ibuot 4 esịm 6 ẹdi akpan ubak etop idatesịt?

◻ Ewe etop idatesịt ke ẹkụt ke Ediyarade ibuot 7?

◻ Ntak emi mme etop ubiereikpe oro ẹkụtde ke Ediyarade mîkpetịmekede mbon esịt akpanikọ?

◻ Ke mme usụn̄ ewe ke Tọsịn Isua edidi “usen” ikpe?

[Ndise ke page 10]

Edidem Jesus Christ oyosio ekọn̄, akan̄, ye n̄kpa efep ke isọn̄ ofụri ofụri