Mme Mbụme Ẹtode Mme Andikot

Ke nditịn̄ ke ata ọkpọkpọ usụn̄, nte ukpụhọde odu ke ufọt ikọ Bible ẹmi “mme erọn̄ en̄wen” ye “akwa otuowo”?

Ih, okposụkedi iyomke nnyịn itie uyịre uyịre ikaha ke nte ẹdade ikọ m̀mê ndikop iyatesịt edieke owo adade ikọ ẹmi okpụhọ ye kiet eken.

Ata ediwak Christian ẹmehe ye mme udọn̄ikọ ẹmi nnyịn ikụtde mme ikọ ẹmi. Kiet edi John 10:16. Do Jesus ọkọdọhọ ete: “Mmonyụn̄ nnyene mme erọn̄ en̄wen, ẹmi mîtoho ke ufọkerọn̄ emi; nnyene ndida mmọ n̄ko ndi, ndien mmọ ẹyekop uyo Mi; ndien mmọ ẹyekabade ẹdi otuerọn̄ kiet, Ekpemerọn̄ kiet eyenyụn̄ odu.” Ikọ enye eken, “akwa otuowo,” odu ke Ediyarade 7:9. Nnyịn ikot ite: “Ke n̄kpọ ẹmi ẹma ẹkebe, n̄kụt, ndien sese, akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem ẹda ke iso ebekpo ye ke iso Eyenerọn̄, ẹsịne mfia ọfọn̄idem, ẹnyụn̄ ẹkama ndakeyop ke ubọk.”

Ẹyak nnyịn ibemiso ineme John 10:16. Mmanie ẹdi erọn̄ ẹmi? Ọfọn, ọkpọfọn nditi nte ke ẹkot kpukpru mme anam-akpanikọ anditiene Jesus erọn̄. Ke Luke 12:32, enye okokot mme mbet esie oro ẹdikade heaven “ekpri otuerọn̄.” Otu nso? Otu erọn̄. “Erọn̄” eke “ekpri otuerọn̄” emi ẹdidi ubak Obio Ubọn̄ ke heaven. Nte ededi, mmọ en̄wen ẹdu, mmọ oro ẹnyenede isio isio idotenyịn, ẹmi Jesus adade n̄ko nte erọn̄.

Nnyịn ikeme ndikụt emi ke John ibuot 10. Ke ama eketịn̄ aban̄a erọn̄ utọ nte mme apostle esie oro enye edikotde ọnọ uwem eke heaven, Jesus ama adian ke Joh 10 ufan̄ikọ 16 ete: “Mmonyụn̄ nnyene mme erọn̄ en̄wen, ẹmi mîtoho ke ufọkerọn̄ emi; nnyene ndida mmọ n̄ko ndi.” Mme Ntiense Jehovah ẹma ẹfiọk ke anyanini ẹte ke Jesus ke ufan̄ikọ emi eketịn̄ aban̄a mme owo ẹmi ẹnyenede idotenyịn uwem ke isọn̄. Ediwak mme anam-akpanikọ ẹmi ẹkedude mbemiso eyo mme Christian, utọ nte Abraham, Sarah, Noah, ye Malachi, ẹma ẹnyene utọ idotenyịn oro. Ntre nnyịn nte enende imekeme ndibat mmọ nsịn nte ubak “mme erọn̄ en̄wen” eke John 10:16. Ke ini Tọsịn Isua Ukara, ẹyenam utọ mme anam-akpanikọ ntiense oro ẹkedude mbemiso eyo mme Christian mi ẹset ẹyenyụn̄ ẹkpep adan̄aoro ẹban̄a ẹnyụn̄ ẹnyịme Christ Jesus, ẹkabade ẹdi “mme erọn̄ en̄wen” eke Eti Ekpemerọn̄.

Nnyịn imọfiọk n̄ko ite ke tọn̄ọ nte ikot oro ẹkenọde ofụri mme andibuana ke otu eke heaven eketre, ediwak miliọn owo ẹmekabade ẹdi mme ata Christian. Ẹkot mmọemi nte enende n̄ko “mme erọn̄ en̄wen,” sia mmọ mîdịghe ubak “ekpri otuerọn̄.” Utu ke oro, mme erọn̄ en̄wen mfịn ẹdori enyịn ndidu uwem mbe ndụk paradise isọn̄.

Idahaemi, nso ke ẹkeme nditịn̄ mban̄a se ẹdade ẹdiọn̄ọ “akwa otuowo” oro ẹtịn̄de ẹban̄a ke Ediyarade 7:9? Ọfọn, se Edi 7 ufan̄ikọ 13 ye mbụme oro, “Mmọ . . . ẹdi mmanie, mmọ ẹnyụn̄ ẹto m̀mọ̀n̄?” Nnyịn ikụt ibọrọ ke Ediyarade 7:14: “Mmọ oro ẹdi mmọemi ẹketode ke akwa ukụt ẹwọn̄ọ.” Ntre “akwa otuowo” esịne mbon oro ẹtode ẹwọn̄ọ ke, m̀mê ẹbọhọde, akwa ukụt. Nte Edi 7 ufan̄ikọ 17 ọdọhọde, ẹyenyụn̄ ‘ẹda mmọ ẹka ke idịm mmọn̄ uwem’ ke isọn̄.

Nte an̄wan̄ade, nte ededi, man mmọemi ẹbọhọ akwa ukụt oro asan̄ade ekpere, anaedi mmọ ẹma ẹyeyet ọfọn̄idem mmọ ke iyịp Eyenerọn̄, ẹkabade ẹdi mme ata andituak ibuot. Ke ntre, okposụkedi Ediyarade 7:9 etịn̄de aban̄a otuowo emi ke ukụt oro ama ekebe, nnyịn imekeme ndida ikọ emi “akwa otuowo” ntịn̄ mban̄a kpukpru mbon oro ẹnyenede idotenyịn eke isọn̄ ẹmi ẹnamde edisana utom ẹnọ Jehovah idahaemi, mbemiso akwa ukụt ọtọn̄ọde ye mme idụt ndin̄wan̄a ye nsunsu ido ukpono.

Ke nditịn̄ ibio ibio, nnyịn imekeme nditi “mme erọn̄ en̄wen” nte ikọ oro otịmde atara, esịnede kpukpru mme asan̄autom Abasi ẹmi ẹnyenede idotenyịn edidu uwem ke nsinsi ke isọn̄. Enye esịne otu mbon mbieterọn̄ oro enyenede-nyene adan̄a mfịn ẹmi ẹtan̄de ẹbok nte “akwa otuowo” oro ẹnyenede idotenyịn edidu uwem mbe akwa ukụt oro asan̄ade ekpere. Ata ediwak ke otu mme anam-akpanikọ Christian oro ẹdude uwem mfịn ẹsịne ke “mme erọn̄ en̄wen,” ndien mmọ ẹdi ubak “akwa otuowo” n̄ko.

Odot ndifiak ntịn̄ nte, okposụkedi ọfọnde ndifiọk nte mmọ ẹdide san̄asan̄a mi, ufọn idụhe Christian ekededi ndisasat ikọ n̄kaha—se ẹkpekotde edikụt ndudue nnọ ikọ. Paul ama odụri owo utọn̄ aban̄a ndusụk owo oro ‘ẹkekohorede idem’ ẹkenyụn̄ ẹsịnde idem ke “eneni ye en̄wan ikọ.” (1 Timothy 6:4) Edieke nnyịn ke idem nnyịn ifiọkde ndusụk ukpụhọde oro ẹdude ke ufọt mme ikọ, oro ọfọn. Edi, iyomke nnyịn, edide ke enyọn̄ enyọn̄ m̀mê ke esịtidem, ikụt ndudue inọ owo en̄wen emi mîdaha mme ikọ Bible nnennen nnennen ntre.