Akwa Otuowo Ẹmi Ẹnamde Edisana Utom
“Mmọ . . . ẹnam [edisana utom, NW] ẹnọ Enye uwemeyo ye okoneyo ke temple Esie.”—EDIYARADE 7:15.
1. Nso n̄kọri ke ifiọk eke spirit ke ẹkesịm ke 1935?
KE May 31, 1935, akwa idatesịt ama odu ke otu mme andidụk mbono Mme Ntiense Jehovah ke Washington, D.C. Do, ke akpa ini, ẹma ẹdiọn̄ọ akwa udịmowo (m̀mê, akwa otuowo) eke Ediyarade 7:9 in̄wan̄în̄wan̄ ke n̄kemuyo ye ikpehe Bible eken ye nte ekemde ye mme n̄kpọntịbe oro ẹma ẹketọtọn̄ọ ndiyarade.
2. Nso ikowụt nte ke ibat oro ọkọride-kọri ẹma ẹfiọk ẹte ke Abasi ikokotke mmimọ inọ uwem eke heaven?
2 Ke n̄kpọ nte urua itiokiet mbemiso, ke usọrọ Udia Mbubịteyo Ọbọn̄ ke mme esop Mme Ntiense Jehovah, owo 10,681 ke otu mbon oro ẹkedụkde (n̄kpọ nte owo 1 ke otu owo 6) ikataha bred inyụn̄ in̄wọn̄ wine idiọn̄ọ, ndien owo 3,688 ke otu ẹmi ẹkedi ifịk ifịk mme anditan̄a Obio Ubọn̄ Abasi. Ntak emi mmọ ẹketrede ndidia mme n̄kpọ idiọn̄ọ oro? Koro ọkọn̄ọde ke se mmọ ẹkekpepde ẹto Bible, mmọ ẹma ẹdiọn̄ọ ẹte ke Abasi ikokotke mmimọ inọ uwem eke heaven edi nte ke mmimọ imekeme ndibuana ke ima ima ndutịm Jehovah ke usụn̄ efen. Ntre ke mbono oro, ke ini etịn̄ikọ okobụpde ete: “Nte kpukpru mbon oro ẹnyenede idotenyịn ndidu uwem ke nsinsi ke isọn̄ ẹkeme ndidaha ndada,” nso ikotịbe? Ediwak tọsịn owo ẹma ẹdaha ẹda, ekem otuowo ẹma ẹfiori n̄kpo idara ke anyanini.
3. Ntak emi edidiọn̄ọ oro ẹkediọn̄ọde akwa udịmowo ọkọnọde obufa odudu kaban̄a utom ukwọrọikọ, ndien emi eketie Mme Ntiense didie ke idem?
3 Se mme andidụk mbono oro ẹkekpepde ke mbono oro ama ọnọ obufa odudu ke utom ukwọrọikọ mmọ. Mmọ ẹma ẹdifiọk ẹte idahaemi, mbemiso utịt akani editịm n̄kpọ emi, ke idịghe sụk ibat ibat tọsịn owo edi ke akwa udịm mme owo ke ẹdinọ ifet ndidụk ndi ke ndutịm Jehovah kaban̄a edinyan̄a uwem, ye idotenyịn edidu uwem ke nsinsi ke paradise isọn̄. Nso etop idatesịt ke ẹkenọ mme ama akpanikọ ntem! Mme Ntiense Jehovah ẹma ẹfiọk ẹte ke akwa utom ama odu ndinam—kpa utom idatesịt. Ediwak isua ke ukperedem, John Booth, emi akakabarede edi owo Otu Ukara, ama eti ete: “Mbono oro ama ọnọ nnyịn ekese n̄kpọ ndidat esịt mban̄a.”
4. (a) Ke nso udomo ke ẹnen̄ede ẹtan̄ akwa otuowo ẹbok ọtọn̄ọde ke 1935? (b) Ke nso usụn̄ ke mbon akwa otuowo ẹnọ uyarade ẹte ke mmimọ inyene oduuwem mbuọtidem?
4 Ke mme isua oro ẹketienede, ibat Mme Ntiense Jehovah ama ọkọri akamba akamba. Kpa ye ediwak afai afai ukọbọ oro ẹkedade ẹtiene mmọ ke ini Ekọn̄ Ererimbot II, ibat mmọ ama ekpere ndidọk utịm ikata ke ufan̄ isua duop. Ndien mme asuanetop 56,153 oro ẹkenọde an̄wan̄wa ikọ ntiense ke 1935 ẹma ẹkọri, ke 1994, ẹwak ẹkan mme anditan̄a Obio Ubọn̄ 4,900,000 oro ẹdude ke se iwakde ibe idụt 230. Ata ediwak ke otu mmọemi ẹnyene ọkpọsọn̄ idotenyịn ndidu ke otu mbon oro Jehovah edidade mfọnmma uwem ke paradise isọn̄ ọfọn mmọ mfọn. Ke ẹmende ẹdomo ye ekpri otuerọn̄, mmọ ke akpanikọ ẹmekabade akwa otuowo. Mmọ idịghe mme owo oro ẹdọhọde ke mmimọ imenyene mbuọtidem ndien edi iwụtke emi. (James 1:22; 2:14-17) Kpukpru mmọ ẹbuana eti mbụk aban̄ade Obio Ubọn̄ Abasi ye mbon efen. Nte afo edi kiet ke otu mbon inemesịt oro? Ndidi Ntiense oro enyenede ifịk edi akpan n̄kpọ idiọn̄ọ, edi ekese abuana.
“Ẹda ke Iso Ebekpo”
5. Nso ke akpanikọ oro nte ke akwa otuowo ẹda “ke iso ebekpo” owụt?
5 Ke n̄kukụt oro ẹkenọde apostle John, enye ama okụt mmọ ‘ẹdade ke iso ebekpo ye ke iso Eyenerọn̄.’ (Ediyarade 7:9) Mmọ ndida ke iso ebekpo Abasi, nte ẹtịn̄de ẹban̄a ke udọn̄ikọ emi, owụt ete ke mmọ ẹdiọn̄ọ itie edikara Jehovah ọyọhọ ọyọhọ. Emi esịne ekese. Ke uwụtn̄kpọ: (1) Mmọ ẹnyịme unen oro Jehovah enyenede ndibiere se idide eti ye se idide idiọk nnọ mme asan̄autom esie. (Genesis 2:16, 17; Isaiah 5:20, 21) (2) Mmọ ẹkpan̄ utọn̄ ẹnọ Jehovah nte enye etịn̄de ikọ ọnọ mmọ ebe ke Ikọ esie. (Deuteronomy 6:1-3; 2 Peter 1:19-21) (3) Mmọ ẹdiọn̄ọ nte edisụk ibuot nnọ mbon oro Jehovah ọnọde ndise enyịn edide akpan n̄kpọ. (1 Corinth 11:3; Ephesus 5:22, 23; 6:1-3; Mme Hebrew 13:17) (4) Okposụkedi ẹdide mme anana mfọnmma, mmọ ke esịt akpanikọ ẹdomo nditiene ndausụn̄ ukara Abasi, idịghe mmen̄e mmen̄e, edi inikiet inikiet, otode esịt. (Mme N̄ke 3:1; James 3:17, 18) Mmọ ẹdu ke iso ebekpo ndinam edisana utom nnọ Jehovah, emi mmọ ẹtịmde ẹkpono ẹnyụn̄ ẹnen̄erede ẹma. Kaban̄a akwa otuowo emi, mmọ ‘ndida’ ke iso ebekpo owụt ke Enyeemi etiede ke ebekpo onyịme mmọ. (Men Ediyarade 6:16, 17 domo.) Unyịme ọkọn̄ọde ke nso?
“Ẹsịne Mfia Ọfọn̄idem”
6. (a) Nso ke akwa otuowo ‘ndisịne mfia ọfọn̄idem’ ọwọrọ? (b) Didie ke akwa otuowo ẹnyene edinen idaha ke iso Jehovah? (c) Ke nso udomo ke mbuọtidem ke iyịp oro Jesus ọkọduọkde otụk uwem akwa otuowo?
6 Ikọ apostle John kaban̄a se enye okokụtde ọdọhọ ke mme andibuana ke akwa otuowo emi “ẹsịne mfia ọfọn̄idem.” Mfia ọfọn̄idem oro ẹda ẹban̄a edisana, edinen idaha mmọ ke iso Jehovah. Mmọ ẹkesan̄a didie ẹdinyene utọ idaha oro? Nnyịn ima ikokụt ite ke n̄kukụt John mmọ ẹkeda “ke iso Eyenerọn̄.” Mmọ ẹdiọn̄ọ Jesus Christ nte “Eyenerọn̄ Abasi emi emende mme idiọkn̄kpọ ererimbot efep.” (John 1:29) Ke n̄kukụt oro, John ama okop nte kiet ke otu mbiowo emi okodude ke ebekpo Abasi anamde an̄wan̄a ete: ‘Mmọ ẹma ẹyet ọfọn̄idem mmọ ẹnam afia ke iyịp Eyenerọn̄. Mmọdo mmọ ẹdude ke iso ebekpo Abasi.’ (Ediyarade 7:14, 15) Ke ndamban̄a usụn̄, mmọ ẹmeyet ọfọn̄idem mmọ ebe ke ndiwụt mbuọtidem ke iyịp ufak Christ. Mmọ inyeneke ifiọk ibuot kpọt iban̄a ukpepn̄kpọ Bible aban̄ade ufak. Esịtekọm oro ẹnyenede ẹban̄a enye otụk orụk owo oro mmọ ẹdide ke esịtidem; ntem, mmọ ‘ẹda esịt’ ẹwụt mbuọtidem. (Rome 10:9, 10) Emi enyene akwa odudu ke se mmọ ẹdade uwem mmọ ẹnam. Ke mbuọtidem, mmọ ẹyak idemmọ ẹnọ Jehovah ọkọn̄ọde ke uwa Christ, ẹyarade uyakidem oro ke ndibụhọ ke mmọn̄, ẹnen̄ede ẹdu uwem ke n̄kemuyo ye uyakidem mmọ nnọ, ndien ke ntem ẹdi ẹdinyene eti itie ebuana ye Abasi. Nso eti ifet ke edi ntem—kpa kiet oro anade ẹnen̄ede ẹkpeme!—2 Corinth 5:14, 15.
7, 8. Didie ke esop Jehovah an̄wam akwa otuowo nditre ndidehe ọfọn̄idem mmọ?
7 Ye ima ima edikere mban̄a oro ekerede aban̄a nsinsi mfọnọn̄kpọ mmọ, esop Jehovah ndien ndien omowụt ido ye edu oro ẹkemede ndidehe, m̀mê ndisabade, ọfọn̄idem oro ẹdade ẹdiọn̄ọ owo tutu eyedi, kpa ye enyọn̄ enyọn̄ edinam, owo oro inen̄ekede idot ye ntịn̄nnịm edinam an̄wan̄a oro ke Ediyarade 7:9, 10. (1 Peter 1:15, 16) Ke ndifiak nsịn odudu ke se ẹkemịn̄de ke mbemiso, Enyọn̄-Ukpeme (Ikọmbakara), ke 1941 ye ke oro ebede, ndien ndien ama owụt ete ke ekpenen̄ede akwan̄a ndikwọrọ ikọ nnọ mbon efen ndien ekem, ke mme ini efen, isịn idem ke utọ edu nte use m̀mê efịbe. (1 Thessalonica 4:3; Mme Hebrew 13:4) Ke 1947 ẹma ẹsọn̄ọ ẹtịn̄ ẹte ke mme idaha Jehovah kaban̄a ndọ Christian ẹbuana kpukpru idụt; inamke n̄kpọ se ido n̄kann̄kụk onyịmede, mbon oro ẹkade iso ndinyene uwak iban ikekemeke ndidi Mme Ntiense Jehovah.—Matthew 19:4-6; Titus 1:5, 6.
8 Ke 1973, ẹma ẹwụt Mme Ntiense Jehovah ke ofụri ererimbot nte ke ana kpukpru mmọ ẹtre ndinyene n̄kpọ ndomokiet ndinam ye mme edinam emi nte eyịghe mîdụhe ẹsabarede owo, utọ nte edida un̄wọn̄ ke idiọk usụn̄, inamke n̄kpọ m̀mê mmọ ẹdu ke m̀mọ̀n̄—idịghe ke Ufọkmbono Obio Ubọn̄ m̀mê ke an̄wautom kpọt edi n̄ko ke itieutom idịbi udia m̀mê ke ndusụk ndedịbe ebiet oro owo mîkwe. (2 Corinth 7:1) Ke 1987 ke mme mbono district eke Mme Ntiense Jehovah, ẹma ẹsọn̄ọ ẹnọ mme uyen Christian item ẹte man ẹnyene edisana idaha ke iso Abasi, ana mmọ ẹkpeme ẹbiọn̄ọ edidu uwem esịt iba. (Psalm 26:1, 4) Ndien ndien, Enyọn̄-Ukpeme omodụri owo utọn̄ ọbiọn̄ọ nsio nsio ikpehe edu ererimbot koro “ido Abasi eke asanade, mînyụn̄ ideheke ke iso Abasi Ete nnyịn” esịne ndikpeme idem “ke idiọkn̄kpọ emi odude ke ererimbot.”—James 1:27.
9. Mmanie ẹdinen̄ede ẹnyene unyịme ke iso ebekpo Abasi ke akwa ukụt ebede?
9 Edi mbon oro mbuọtidem onụkde mmọ ndidu uwem ke utọ usụn̄ oro asanade ke n̄kan̄ eke spirit ye ke ido uwem ẹdika iso ‘ndida ke iso ebekpo’ nte mme asan̄autom Abasi oro ẹnyịmede ke akwa ukụt emi edide ebede. Mmọemi idịghe mme owo ẹmi ẹtọn̄ọde ndidu uwem Christian kpọt edi ẹsọn̄ọ ẹda ẹnam akpanikọ ke enye.—Ephesus 4:24.
“Ẹkama Ndakeyop ke Ubọk”
10. Nso ke ndakeyop oro John okokụtde ke ubọk akwa otuowo ada aban̄a?
10 Ke otu n̄wọrọnda n̄kpọ ẹban̄ade akwa otuowo, nte apostle John okokụtde, edi nte ke mmọ ẹma “ẹkama ndakeyop ke ubọk.” Nso ke oro ada aban̄a? Eyịghe idụhe nte ke ndakeyop oro ẹma ẹti John aban̄a usọrọ mme ataya mme Jew, kpa usọrọ mme Hebrew oro akakamade idatesịt akan ke isua, oro ẹkesidiade ke ẹma ẹkekụre idọk ke ndaeyo. Ke n̄kemuyo ye Ibet, ẹkesida ndakeyop, adianade ye mme n̄kọk eto efen, ndinam mme efe ẹmi ẹkesidụn̄de ke ini usọrọ oro. (Leviticus 23:39, 40; Nehemiah 8:14-18) Mme andituak ibuot ke temple ẹma ẹsifụn̄ mmọ n̄ko ke ini ẹkwọde Itoro (Psalm 113-118). Akwa otuowo ndifụn̄ ndakeyop nte eyịghe mîdụhe ama eti John n̄ko aban̄a ini emi Jesus akawatde odụk Jerusalem ke adan̄aemi akwa otu mme andituak ibuot ke idara ẹkefụn̄de ndakeyop ẹnyụn̄ ẹfioride ẹte: “Itoro enyene Enyeemi edide ke enyịn̄ Jehovah, kpa Edidem Israel.” (John 12:12, 13) Ntre edifụn̄ ndakeyop owụt ete ke akwa otuowo ke idara ẹnyịme Obio Ubọn̄ Jehovah ye Edidem esie oro ẹyetde aran.
11. Ntak emi mme asan̄autom Abasi ẹnen̄erede ẹkop idatesịt ke ndinam n̄kpọ Jehovah?
11 Akwa otuowo ẹwụt utọ edu idatesịt oro idem idahaemi nte mmọ ẹnamde n̄kpọ Jehovah. Emi iwọrọke ite ke mmọ isoboke nsọn̄ọn̄kpọ m̀mê nte ke mmọ isoboke mfụhọ m̀mê ubiak. Edi uyụhọ oro otode edinam n̄kpọ Jehovah nnyụn̄ ndat enye esịt an̄wam ndikpe utịp mme utọ n̄kpọ oro. Ntem, isụn̄utom oro akanamde utom ye ebe esie ke isua 45 ke Guatemala ama etịn̄ aban̄a mme idaha eset oro ẹkekande mmọ ẹkụk, ọkpọsọn̄ utom ye isan̄ oro ẹkedide n̄kpọndịk oro ekedide ubak uwem nte mmọ ẹkesịnde ukeme ndida etop Obio Ubọn̄ n̄ka mme obio-in̄wan̄ India. Enye ama eberi ete: “Emi ekedi ini uwem nnyịn emi nnyịn ikenen̄erede ikop inemesịt.” Okposụkedi enye ekenyenede mme mfịna ẹtode usọn̄ ye udọn̄ọ, ke otu mme akpatre n̄kpọ oro enye ekewetde esịn ke n̄wed editi esie ẹkedi mme ikọ ẹmi: “Enye ekedi eti uwem, enen̄erede akama utịp.” Ke ofụri isọn̄, Mme Ntiense Jehovah ẹkere ukem oro ẹban̄a utom ukwọrọikọ mmọ.
‘Edisana Utom Uwemeyo ye Okoneyo’
12. Edide ke uwemeyo m̀mê ke okoneyo, nso ke Jehovah okụt mi ke isọn̄?
12 Idara idara mme andituak ibuot ẹmi ẹnam “edisana utom [Jehovah] uwemeyo ye okoneyo ke temple esie.” (Ediyarade 7:15, NW) Ke ofụri ererimbot, ediwak miliọn owo ke ẹbuana ke edisana utom emi. Ke edide okoneyo ke ndusụk idụt mme owo ẹnyụn̄ ẹdede idap do, ke mme idụt efen utịn ke ada ndien Mme Ntiense Jehovah ke ẹnọ ikọ ntiense. Nte ererimbot ọwọn̄ọrede, kpukpru ini, uwemeyo ye okoneyo, mmọ ke ẹkwọ itoro Jehovah. (Psalm 86:9) Edi utom uwemeyo ye okoneyo oro ẹtịn̄de ẹban̄a ke Ediyarade 7:15 akam otịm edi ọkpọkpọ.
13. Didie ke N̄wed Abasi owụt se edinam utom “uwemeyo ye okoneyo” ọwọrọde?
13 Mme owo oro ẹnamde akwa otuowo ẹsinam edisana utom uwemeyo ye okoneyo. Nte emi ọwọrọ ete ke ẹse kpukpru n̄kpọ oro mmọ ẹnamde nte edisana utom? Edi akpanikọ nte ke inamke n̄kpọ m̀mê nso ke mmọ ẹnam, mmọ ẹkpep ndinam enye ke usụn̄ oro adade ukpono ọsọk Jehovah. (1 Corinth 10:31; Colossae 3:23) Nte ededi, “edisana utom” aban̄a se ibuanade utuakibuot oro owo atuakde ọnọ Abasi kpọt. Ndinam utom “uwemeyo ye okoneyo” ọnọ ekikere n̄kpọ ofụri ini m̀mê edinyene iwụk ọkọrọ ye edisịn ofụri ukeme.—Men Joshua 1:8; Luke 2:37; Utom 20:31; 2 Thessalonica 3:8 domo.
14. Nso inam ọkpọkpọ an̄wautom nnyịn odot ye editịn̄ oro ẹtịn̄de ẹban̄a utom “uwemeyo ye okoneyo”?
14 Nte mmọ ẹnamde utom ke okụre eke isọn̄ ke akwa temple Jehovah eke spirit, mbon oro ẹnamde akwa otuowo ẹdomo ndibuana kpukpru ini ye ke usụn̄ oro enyenede iwụk ke utom ukwọrọikọ. Ediwak owo ẹmenam edi utịtmbuba mmọ ndinyene ndusụk udeme ke utom ukwọrọikọ kpukpru urua. Mbon eken ẹsịn̄ede idemmọ nte mme asiakusụn̄ ofụri ini m̀mê mme asiakusụn̄ unọ un̄wam. Ediwak ini mmọemi ẹsisịn idem ke ndinọ ikọ ntiense ke mme efak ye ke mme ufọkurua ke tụhitụhi usenubọk. Man ẹnam ufan̄ odu ọnọ mbon oro ẹnyenede udọn̄, ndusụk Ntiense ẹsinịm mme ukpepn̄kpọ Bible ke okoneyo. Mmọ ẹsinọ ikọ ntiense ke ini ẹdepde n̄kpọ, ke ini ẹkade isan̄, ke ini udia uwemeyo, ye ke urụk ukopikọ.
15. Ke ẹsiode an̄wautom ẹfep, nso isịne ke edisana utom nnyịn?
15 Ndibuana ke mme mbonoesop edi ubak edisana utom nnyịn n̄ko; ntre ke edi ye utom oro abuanade edibọp ye edikama mme ebiet usopidem Christian. Emi esịne ukeme oro owo esịnde ndisịn udọn̄ nnọ nnyụn̄ n̄n̄wam nditọete Christian iren ye iban esie, ke n̄kan̄ eke spirit ye eke obụk, ndisọn̄ọ ndu ke utom Jehovah. Emi esịne utom Kọmiti Unyene Nneme ye Mbon Ufọkibọk nnyịn. Utom Bethel ke ofụri nsio nsio uduot esie, ọkọrọ ye utom unyịmesịt ke mme mbono nnyịn, kpukpru ẹdi edisana utom. Ke akpanikọ, ke ini uwem nnyịn owụhọde ke itie ebuana nnyịn ye Jehovah, mmọ ẹyọhọ ye edisana utom. Nte itien̄wed oro ọdọhọde, ikọt Jehovah ẹnam ‘edisana utom uwemeyo ye okoneyo,’ ndien mmọ ẹsinen̄ede ẹkop idatesịt ke ndinam ntre.—Utom 20:35; 1 Timothy 1:11.
‘Ẹto Kpukpru Obio, Esien, Idụt, ye Usem’
16. Didie ke edi akpanikọ nte ke akwa otuowo ‘ẹto ke kpukpru idụt’?
16 Mbon akwa otuowo ẹwọrọ ẹto kpukpru idụt. Abasi inamke asari, ndien enọ ufak oro ẹnọde ebe ke Jesus Christ ekem ndinọ kpukpru mmọ ufọn. Ke ini ẹkediọn̄ọde akwa otuowo ke akpa ini nte ekemde ye N̄wed Abasi ke 1935, Mme Ntiense Jehovah ẹkenam utom ke idụt 115. Etisịm mme iduọk isua 1990, ediyom oro ẹyomde mbon mbieterọn̄ ama atara osịm se iwakde ikan ukem idụt oro utịm ikaba.—Mark 13:10.
17. Nso ke ẹnam ndin̄wam mme owo ẹtode kpukpru ‘obio, esien, ye usem’ ndisịne ke akwa otuowo?
17 Ke ediyom oro ẹyomde mbon oro ẹdinamde akwa otuowo, Mme Ntiense Jehovah inọhọ mbon oro ẹtode mme idụt ntịn̄enyịn kpọt edi n̄ko mme obio ye esien ye mme otu usem oro ẹdude ke esịt mme idụt oro. Man ẹsịm mme owo ẹmi, Mme Ntiense ẹmịn̄ n̄wed ukpep Bible ke se ikande usem 300. Emi abuana edinọ otu mme akabade n̄wed oro ẹdotde ukpep nnyụn̄ n̄kama mmọ, edinọ n̄kpọutom kọmputa oro ẹkemede ndiwet kpukpru usem ẹmi, ọkọrọ ye edimịn̄ mmọ. Ke isua ition kpọt ẹmi ẹbede, ẹma ẹdian mme usem 36, ẹmi n̄kpọ nte owo 98,000,000 ẹsemde, ke ibat emi. Adianade do, Mme Ntiense ẹsidomo ndiwaha mbịne mme owo ẹmi ọkpọkpọ man ẹn̄wam mmọ ẹfiọk Ikọ Abasi.—Matthew 28:19, 20.
‘Ẹto ke Akwa Ukụt Ẹwọn̄ọ’
18. (a) Ke ini akwa ukụt ọtọn̄ọde, mmanie ke ẹdikpeme? (b) Nso idara idara editan̄a ke ẹditan̄a adan̄aoro?
18 Ke ini mme angel ẹdisanade ofụm nsobo ẹtịn̄de ẹban̄a ke Ediyarade 7:1 ẹyak, idịghe “ikọt Abasi nnyịn” oro ẹyetde aran kpọt ẹdibọ ima ima ukpeme otode Jehovah edi ntre ke edidi n̄ko ye akwa otuowo oro ẹkedianade ye mmọ ke utuakibuot akpanikọ. Nte ẹkesiande apostle John, mbon akwa otuowo ‘ẹyeto akwa ukụt ẹwọn̄ọ’ nte mme andibọhọ. Nso mfiori idatesịt ye itoro ke mmọ ẹdisio ntem adan̄aoro nte mmọ ẹtan̄ade ẹte: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄”! Ndien kpukpru mme anam-akpanikọ asan̄autom Abasi ke heaven ẹyedian uyo mmọ ke nditan̄a: “Amen; yak edidiọn̄, ye ubọn̄, ye ifiọk, ye ekọm, ye ukpono ye odudu, ye ukeme, ẹnyene Abasi nnyịn ke nsinsi nsinsi. Amen.”—Ediyarade 7:10-14.
19. Ke ewe idara idara utom ke mme andibọhọ ẹdibuana ye ọkpọsọn̄ udọn̄?
19 Nso inem inem ini ke oro edidi ntem! Kpukpru owo ẹmi ẹdude uwem ẹdidi mme asan̄autom ata Abasi kierakiet! Akakan idatesịt ke otu kpukpru ẹmi edidi ndinam n̄kpọ Jehovah. Ekese utom eyedu ndinam—utom idatesịt! Ẹyewọn̄ọde isọn̄ ẹsịn ke Paradise. Ẹyenam ediwak miliọn owo ke mme itie tọsịn ẹset ke n̄kpa ndien ekem ẹnọ ukpep ke mme usụn̄ Jehovah. Nso idara idara ifet ke edidi ntem ndibuana ke enye!
Nso Idi Ibọrọ Fo?
◻ Nso utịp ke mme n̄kpọntịbe ke 1935 ẹkenyene ke utom ukwọrọikọ Mme Ntiense Jehovah?
◻ Nso ke akpanikọ oro nte ke ẹwụt akwa otuowo nte ẹdade “ke iso ebekpo” owụt?
◻ Didie ke esịtekọm oro ẹnyenede ẹnọ iyịp Eyenerọn̄ okpotụk uwem?
◻ Nso ke mmọ ndifụn̄ ndakeyop ada aban̄a?
◻ Didie ke akwa otuowo ẹnam edisana utom uwemeyo ye okoneyo?
[Mme ndise ke page 17]
Edisana utom mmọ owụt edinam ofụri ini, nsịnifịk, ye edisịn ofụri ukeme