Edikan Oro Utuakibuot Akpanikọ Akande Emekpere

“Jehovah eyedi edidem ofụri isọn̄ emi.”—ZECHARIAH 14:9.

1. Nso ikedi ifiọk n̄kpọntịbe mme Christian oro ẹyetde aran ke ini Ekọn̄ Ererimbot I, ndien didie ke ẹkebem iso ẹtịn̄ ẹban̄a emi?

KE INI akpa ekọn̄ ererimbot, mme Christian oro ẹyetde aran ẹma ẹkụt ediwak ukụt ye n̄kpọkọbi ke ubọk idụt oro ẹken̄wanade ekọn̄. Ẹma ẹbiọn̄ọ uwa ekọm oro mmọ ẹkewade ẹnọ Jehovah idiọk idiọk, ndien mmọ ẹma ẹduọ ẹdụk idaha ntan̄mfep eke spirit. Ẹma ẹbem iso ẹtịn̄ ẹban̄a kpukpru emi ke Zechariah 14:2, emi etịn̄de aban̄a edida en̄wan ofụri ererimbot ndụk Jerusalem. Obio prọfesi emi edi “Jerusalem enyọn̄,” Obio Ubọn̄ Abasi eke heaven ye ebiet emi “ebekpo Abasi ye eke Eyen-erọn̄” ẹdude. (Mme Hebrew 12:22, 28; 13:14; Ediyarade 22:3) Mbon oro Abasi eyetde aran ke isọn̄ ẹkeda ẹban̄a obio oro. Mme anam-akpanikọ ke otu mmọ ẹma ẹbọhọ en̄wan oro, ẹsịnde ndiyak ẹtan̄ mmọ ẹfep “ke obio oro.”a

2, 3. (a) Didie ke utuakibuot akpanikọ Jehovah akakan ọtọn̄ọde ke 1919? (b) Ọtọn̄ọde ke 1935, nso n̄kpọntịbe ida itie?

² Ke 1919 ẹma ẹsio mme anam-akpanikọ nsụhọ ke idaha ntan̄mfep mmọ, ndien mmọ ye unana ubiatini ẹma ẹda ini emem oro ẹketienede ekọn̄ oro ẹnam n̄kpọ nte ọfọnde. Nte mme isụn̄utom Jerusalem eke heaven, mmọ ẹma ẹda akwa ifet oro ekebererede ndikwọrọ eti mbụk Obio Ubọn̄ Abasi nnyụn̄ n̄n̄wam ke nditan̄ akpatre ke otu mme andibuana ke otu owo 144,000 mbok. (Matthew 24:14; 2 Corinth 5:20) Ke 1931 mmọ ẹma ẹda enyịn̄ N̄wed Abasi oro odotde Mme Ntiense Jehovah ẹkere.—Isaiah 43:10, 12.

³ Ọtọn̄ọde ke ini oro, Mme Ntiense Abasi oro ẹyetde aran akananam isehe edem. Hitler ye ukara Nazi esie ikakam ikemeke ndikịbi mmọ inua. Kpa ye ukọbọ ofụri ererimbot, utom mmọ omon̄wụm mfri ke ofụri isọn̄. Akpan akpan ọtọn̄ọde ke isua 1935, “akwa otu owo” eke ofụri ererimbot, emi ẹkebemde iso ẹtịn̄ ẹban̄a ke n̄wed Ediyarade, ẹmediana ye mmọ. Mmọemi n̄ko ẹdi mme Christian ẹmi ẹma ẹkeyak idem ẹnọ, ẹna baptism ẹma ẹnyụn̄ “[ẹyet] ọfọn̄idem mmọ ẹnam afia ke iyịp Eyen-erọn̄,” Jesus Christ. (Ediyarade 7:9, 14) Nte ededi, mmọ idịghe mbon oro ẹyetde aran, ye idotenyịn uwem eke heaven. Idotenyịn mmọ edi ndinyene se Adam ye Eve ẹkeduọkde, oro edi, mfọnmma uwem eke owo ke paradise isọn̄. (Psalm 37:29; Matthew 25:34) Mfịn, akwa otuowo ẹwak ẹkan ukpọn̄ miliọn ition. Utuakibuot akpanikọ Jehovah ke akan, edi akpatre edikan esie idịghe kan̄a.

Isenowo ke Temple Abasi eke Spirit

4, 5. (a) Ke m̀mọ̀n̄ ke akwa otuowo ẹtuak ibuot ẹnọ Jehovah? (b) Mme ifet ewe ke mmọ ẹnyene, ndien ke edisu ewe prọfesi?

⁴ Nte ẹkebemde iso ẹtịn̄, akwa otuowo “ke ẹtuak ibuot ẹnọ [Abasi] okoneyo ye uwemeyo ke temple esie.” (Ediyarade 7:15, ikọ idakisọn̄, NW) Sia mmọ mîdịghe mme oku, nditọ Israel eke spirit, eyedi John okokụt mmọ ẹdade ke temple ke an̄wa okụre mme Gentile. (1 Peter 2:5) Temple Jehovah eke spirit akabade edi ubọn̄ ubọn̄ didie ntem, n̄kann̄kụk esie ọyọhọde ye akwa otu emi, adianade ye nsụhọ Israel eke spirit, ẹtorode enye!

⁵ Akwa otuowo inamke n̄kpọ inọ Abasi ke idaha oro esịt esịt okụre mme oku akadade aban̄a. Owo ibatke mmọ ke edinen ye uduak edidi nditọ eke spirit emi Abasi obonde. (Rome 8:1, 15) Edi, ebede ke ndibuọt idem ke uwa Jesus, mmọ ẹnyene edisana idaha ke iso Jehovah. Ẹbat mmọ ke edinen ye uduak edidi mme ufan esie. (Men James 2:21, 23 domo.) Mmọ n̄ko ẹnyene ifet ndiwa mme uwa oro ẹnyịmede ke itieuwa eke spirit Abasi. Ntem, kaban̄a akwa otuowo emi, prọfesi Isaiah 56:6, 7 ke enyene ubọn̄ ubọn̄ edisu: “Isen owo n̄ko ẹmi ẹdiande idem ye Jehovah, ẹnyụn̄ ẹnamde n̄kpọ esie, ẹnyụn̄ ẹmade enyịn̄ Jehovah, . . . nyeda mmọ ndi ke edisana obot mi, nnyụn̄ nnam mmọ ẹdat esịt ke ufọk akam mi: ndifọp uwa mmọ ye mme uwa emem mmọ ẹyedi n̄kpọ inem ke itie-uwa mi; koro ufọk mi eyekere, ete, Ufọk akam kpukpru mme idụt.”

6. (a) Nso utọ uwa ke isenowo ẹwa? (b) N̄kpọ udọn̄ mmọn̄ ke okụre mme oku eti mmọ aban̄a nso?

⁶ Ke otu mme uwa emi isenowo ẹmi ẹkesiwade ẹdi “mfri n̄kpọkinua [nte uwa inuak udia oro ẹtịmde ọfọn] eke ẹkponode enyịn̄ [Abasi]” ye ‘edinam eti n̄kpọ nnyụn̄ mfọn ido ye owo.’ (Mme Hebrew 13:15, 16) Akamba n̄kpọ udọn̄ mmọn̄ oro mme oku ẹkesidade ẹyet idemmọ edi n̄ko akpan n̄kpọ editi ọnọ isenowo ẹmi. Ana mmọ n̄ko ẹsụk idem ẹnọ edinam asana eke spirit ye eke ido uwem nte ẹnamde Ikọ Abasi an̄wan̄a mmọ ke nde ke nde.

Edisana Ebiet ye Mme N̄kpoduoho Esie

7. (a) Didie ke akwa otuowo ẹse mme ifetutom edisana itie oku? (b) Ewe ifetutom efen efen ke ndusụk isenowo ẹnyene?

⁷ Ndi Edisana ye mme n̄kpoduoho esie ẹnyene n̄kpọ ekededi oro ẹwọrọde ọnọ akwa otu isenowo emi? Ọfọn, tutu amama mmọ ididụhe ke idaha oro Edisana akadade aban̄a. Mmọ ifiakke imana obufa nte nditọ Abasi eke spirit ye itie eyenisọn̄ eke heaven. Nte emi anam mmọ ẹfụbe ufụp m̀mê ẹsịn enyịn? Baba. Utu ke oro, mmọ ẹkop idatesịt ke ifet oro mmọ ẹnyenede ndinọ nsụhọ ke otu owo 144,000 ibetedem, ndien mmọ ẹwụt ntotụn̄ọ esịtekọm ẹban̄a uduak Abasi ke ndida nditọ eke spirit ẹmi nnyene, ẹmi ẹdibuanade ye Christ ke ndimenede ubonowo nsịm mfọnmma. N̄ko, akwa otu isenowo emi ẹtịm ẹma akwa mfọnido Abasi oro owo mîdotke ke ndinọ mmọ idotenyịn nsinsi uwem ke isọn̄ ke Paradise. Ndusụk isenowo ẹmi, ukem nte mme Nethinim eset, ẹmenyene mme ifet edise enyịn ke ndin̄wam edisana itie oku.b (Isaiah 61:5) Ke otu mmọemi ke Jesus emek “mbọn̄ ke ofụri ererimbot.”—Psalm 45:16.

8, 9. Nso ufọn ke akwa otuowo ẹbọ ẹto edidụn̄ọde mme n̄kpoduoho Edisana?

⁸ Okposụkedi mmọ mîdidụkke ndamban̄a Edisana tutu amama, akwa otu isenowo ẹmi ẹkpep nti ukpepn̄kpọ ẹto mme n̄kpoduoho esie. Kpa nte okoyomde ẹsịn aran ke uwụk utuenikan̄ kpukpru ini, ntre isenowo ẹyom edisana spirit man an̄wam mmọ ndifiọk mme akpanikọ eke Ikọ Abasi oro ẹkade-ka iso ndikọri, emi ẹnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) N̄ko-n̄ko, spirit Abasi an̄wam mmọ ndiyere ikot emi: “Spirit ye n̄wan-ndọ [nsụhọ oro ẹyetde aran] ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Ntem, uwụk utuenikan̄ edi n̄kpọ editi ọnọ akwa otuowo kaban̄a mbiomo mmọ ndiyama nte mme Christian nnyụn̄ mfep n̄kpọ ekededi ke edu, ekikere, ikọ, m̀mê edinam oro ediyatde edisana spirit Abasi esịt.—Ephesus 4:30.

⁹ Edisana okpokoro eti akwa otuowo ete ke man ẹkaiso ẹnyene nsọn̄idem eke spirit, ana mmọ ẹdia udia eke spirit kpukpru ini ẹto Bible ye mme n̄wed “asan̄autom emi anamde akpanikọ, onyụn̄ enyenede ọniọn̄.” (Matthew 4:4) Itie ufọp incense eti mmọ aban̄a nte edide akpan n̄kpọ ndibọn̄ akam ifịk ifịk nnọ Jehovah nyom un̄wam man ẹmụm nsọn̄ọnda mmọ ẹkama. (Luke 21:36) Akam mmọ ẹkpenyene ndisịne mme ikọ itoro ye ekọm ẹtode esịt. (Psalm 106:1) Itie ufọp incense n̄ko eti mmọ aban̄a ufọn editoro Abasi ke mme usụn̄ efen, utọ nte ke mmọ ndikwọ ikwọ Obio Ubọn̄ ke ofụri esịt ke mme mbonoesop Christian ye ke mmọ nditịm idem mfọn mfọn ndinam eti ‘an̄wan̄wa uyarade man ẹnyene edinyan̄a.’—Rome 10:10.

Ọyọhọ Edikan Oro Utuakibuot Akpanikọ Akande

10. (a) Nso akwa idotenyịn ke nnyịn ikeme ndisak iso nse? (b) Nso n̄kpọ inyene ndibem iso nda itie?

¹⁰ Mfịn ‘ediwak owo’ ẹtode kpukpru idụt ke ẹbụn̄ọ ẹka ufọk utuakibuot Jehovah. (Isaiah 2:2, 3) Ke ọsọn̄ọde emi, Ediyarade 15:4 ọdọhọ ete: “Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄? Koro Afo ikpọn̄ edi edisana; kpukpru mme idụt ẹyenyụn̄ ẹdi ẹdituak ibuot ke iso Fo; koro edinen ikpe Fo ẹma ẹyarade ẹwụt idem.” Zechariah ibuot 14 etịn̄ se itienede. Ke n̄kpet n̄kpet ini iso, idiọk edu ata ediwak ndiọi owo ke isọn̄ eyesịm utịt nte mmọ ẹsopde idem ke akpatre ini ndin̄wana ekọn̄ ye Jerusalem—kpa mme andida ke ibuot Jerusalem eke heaven ke isọn̄. Adan̄aoro Jehovah eyenam n̄kpọ. Nte An̄wanaekọn̄-Abasi, enye “eyewọrọ aka eken̄wana ekọn̄ ye mme idụt oro” ẹsọn̄de esịt ẹn̄wana ekọn̄ emi.—Zechariah 14:2, 3.

11, 12. (a) Didie ke Jehovah edinam n̄kpọ aban̄a en̄wan ofụri ererimbot oro ẹdidade ẹtiene mme andituak ibuot ke temple esie? (b) Nso ididi utịp ekọn̄ Abasi oro?

¹¹ “Emi edidi ufen emi Jehovah edimiade kpukpru obio emi ẹken̄wanade ekọn̄ ye Jerusalem; obụkidem mmọ eyeyemede ke mmọ ẹsụk [ẹdade] ke ukot mmọ, enyịn mmọ ẹyenyụn̄ ẹyemede ke ndudu mmọ: edeme mmọ ẹyenyụn̄ ẹyemede ke inua mmọ. Ndien ama ekem ke usen oro, akwa ndutịme eyeto Jehovah osịm mmọ; ndien kpukpru mmọ kiet kiet ẹyemụm mbọhọidụn̄ mmọ ubọk, ẹnyụn̄ ẹmenede ubọk mmọ ẹn̄wana ye ubọk mbọhọidụn̄ mmọ.”—Zechariah 14:12, 13.

¹² Edide ufen emi edi ataata ufen m̀mê edi ke ndamban̄a usụn̄, nnyịn inyene ndibet nnyụn̄ nse. Nte ededi, n̄kpọ kiet edi akpanikọ. Ke adan̄aemi mme asua Abasi ẹsan̄ade ẹka ndin̄wana ekọn̄ ofụri ererimbot mmọ ye mme asan̄autom Jehovah, Abasi ndiwụt akwa odudu esie ke usụn̄ oro akpade owo idem eyetre mmọ. Inua eyekụbọ mmọ. Editie nte n̄kpọ eke edeme nsọn̄ibuot mmọ eyemerede. Uduak oro mmọ ẹdianade kiet ẹnam eyekabade okịm ke enyịn mmọ, nte n̄kpọ eke enyịn eyemerede mmọ. Ukeme ikpọkidem mmọ, emi ọkọnọde mmọ odudu ndin̄wana ekọn̄ emi, eyetahade. Ke ndutịme, mmọ ẹyewọn̄ọde ẹbịne kiet eken ye akwa nsobo. Ntem ẹyesọhi kpukpru mme asua utuakibuot Abasi ke isọn̄ ẹfep. Ke akpatre, ẹyenyịk kpukpru mme idụt ndinyịme itie edikara ofụri ekondo Jehovah. Prọfesi emi eyesu: “Jehovah eyedi edidem ofụri isọn̄ emi.” (Zechariah 14:9) Ke oro ebede, ẹyekọbi Satan ye mme demon esie nte Tọsịn Isua Ukara Christ ọtọn̄ọde ye mme akwa edidiọn̄ ẹnade ẹbet ubonowo.—Ediyarade 20:1, 2; 21:3, 4.

Ediset ke N̄kpa eke Isọn̄

13. Mmanie ẹdi mbon oro “ẹsụhọde ke kpukpru mme idụt”?

¹³ Prọfesi Zechariah akaiso ke Zec ibuot 14, ufan̄ikọ 16 ete: “Ama ekem kpukpru mbio kpukpru mme idụt eke ẹsụhọde eke ẹkedide ekọn̄ ye Jerusalem, ẹyedọk kpukpru isua ndituak ibuot nnọ edidem, kpa Jehovah mme udịm, nnyụn̄ nnịm usọrọ mme ataya.” Nte ekemde ye Bible, kpukpru owo oro ẹdude uwem mfịn ẹmi ẹkade iso ndidu uwem nsịm utịt idiọk editịm n̄kpọ emi, ẹmi ẹnyụn̄ ẹbierede ikpe ẹnọ nte ẹdide mme asua utuakibuot akpanikọ, ẹyebọ “ufen nsinsi nsobo.” (2 Thessalonica 1:7-9; se n̄ko Matthew 25:31-33, 46.) Mmọ idisetke. Adan̄aoro, eyedi mmọ “eke ẹsụhọde” ẹyesịne mme owo eke mme idụt ẹmi ẹkekpan̄ade mbemiso akpatre ekọn̄ Abasi emi idotenyịn ediset ke n̄kpa eke Bible onyụn̄ odude ọnọ. Jesus ama ọn̄wọn̄ọ ete: “Ini ke edi eke kpukpru mme andidu ke udi ẹdikopde Enye uyo ẹwọn̄ọ ẹdi; mmọ ẹmi ẹkanamde se ifọnde ẹyewọn̄ọ ẹdụk ke ediset uwem, mmọ ẹmi ẹkanamde se idiọkde ẹyenyụn̄ ẹwọn̄ọ ẹdụk ke ediset ikpe.”—John 5:28, 29.

14. (a) Nso ke ana mbon oro ẹnamde ẹset ẹnam man ẹnyene nsinsi uwem? (b) Nso iditịbe inọ owo ekededi ẹmi ẹdisịnde ndiyak idemmọ nnọ Jehovah nnyụn̄ nnam utuakibuot akpanikọ?

¹⁴ Ana kpukpru mbon oro ẹdisetde mi ẹnam n̄kpọ man ediset ke n̄kpa mmọ akabade edi eke uwem okûnyụn̄ edi eke ubiomikpe. Ana mmọ ẹdi ke okụre temple Jehovah eke isọn̄ ẹnyụn̄ ẹdituak ibuot ke ndiyak idem nnọ Abasi ebe ke Jesus Christ. Owo ekededi oro esetde emi edisịnde ndinam emi eyebọ ukem ufen oro osịmde mme idụt eyomfịn. (Zechariah 14:18) Anie ọfiọk m̀mê owo ifan̄ oro ẹdinamde ẹset ẹdidiana ye akwa otuowo ye idatesịt ke ndinịm ndamban̄a Usọrọ Mme Ataya? Nte eyịghe mîdụhe, ẹyewak, ndien nte utịp akwa temple Jehovah eke spirit eyekam akabade edi ubọn̄ ubọn̄ akan!

Ndamban̄a Usọrọ Mme Ataya

15. (a) Nso ikedi ndusụk n̄wọrọnda ikpehe Usọrọ Mme Ataya eke Israel eset? (b) Ntak emi ẹkesiwade enan̄ 70 ke ini usọrọ oro?

¹⁵ Kpukpru isua, ẹma ẹdọhọ Israel eset esinịm Usọrọ Mme Ataya. Emi ekesibịghi ke urua kiet ndien ekesidi ke utịt ini ukpen̄e mmọ. Enye ekedi idara idara ini ekọm. Ke ufan̄ urua oro, mmọ ẹkesinyene ndidụn̄ ke mme ataya oro ẹbọpde ke ibio ini ẹmi ẹdade ikọn̄ eto ẹfụk, akpan akpan ndak eyop. Usọrọ emi ama esiti Israel aban̄a nte Abasi akanyan̄ade mme eteete mmọ osio ke Egypt ye nte enye ekesede aban̄a mmọ nte mmọ ẹkedụn̄de ke mme ataya ke adan̄aemi ẹyode ke isua 40 ke wilderness tutu mmọ ẹsịm Isọn̄ Un̄wọn̄ọ. (Leviticus 23:39-43) Ke ini usọrọ oro, ẹma ẹsiwa enan̄ 70 ke itieuwa ke temple. Nte an̄wan̄ade, ikpehe usọrọ enyeemi akada aban̄a mfọnmma ye ọyọhọ ọyọhọ utom unyan̄a uwem oro ẹnamde ebe ke Jesus Christ. Ufọn uwa ufak esie eyetara ke akpatre osịm anana-ibat mme andito ekpụk 70 eke ubonowo oro ẹkewọrọde ẹto Noah.—Genesis 10:1-29; Numbers 29:12-34; Matthew 20:28.

16, 17. (a) Ini ewe ke se Usọrọ Mme Ataya akadade aban̄a ọkọtọn̄ọ, ndien didie ke ẹkenam enye? (b) Didie ke akwa otuowo ẹtiene ẹbuana ke usọrọ oro?

¹⁶ Ntem usọrọ Mme Ataya eke eset oro akanyan ubọk owụt idara idara editan̄ mme anamidiọk oro ẹnyan̄ade mbok ke akwa temple Jehovah eke spirit. Se usọrọ emi akadade aban̄a ọkọtọn̄ọ ke Pentecost ke 33 E.N. ye ntọn̄ọ idara idara editan̄ nditọ Israel eke spirit mbok ke esop Christian. (Utom 2:41, 46, 47) Mbon oro ẹyetde aran mi ẹma ẹfiọk ẹte ke mmimọ ikedi “mbon isan̄” ke ererimbot Satan koro ata ‘obio mmọ odu ke heaven.’ (1 Peter 2:11; Philippi 3:20) Nsọn̄ibuot oro okosụn̄ọde ke Christendom ndiwọrọ ndi ama ofụk idara idara usọrọ oro ke ibio ini. (2 Thessalonica 2:1-3) Nte ededi, ẹma ẹfiak ẹtọn̄ọ usọrọ oro ke 1919 ye idara idara editan̄ akpatre mme andibuana ke otu nditọ Israel eke spirit 144,000 mbok, ekem editan̄ akwa otuowo ofụri ererimbot eke Ediyarade 7:9 mbok ama etiene.

¹⁷ Ẹwụt akwa otuowo nte ẹkamade ndak eyop ke ubọk mmọ, emi owụtde nte ke mmọ n̄ko ẹdi mme idara idara andinịm ndamban̄a Usọrọ Mme Ataya emi. Nte mme Christian oro ẹma ẹkeyak idem ẹnọ, mmọ ẹmebuana idara idara ke utom editan̄ mme andituak ibuot efen efen mbok ke temple Jehovah. N̄ko-n̄ko, nte mme anamidiọk, mmọ ẹfiọk ẹte ke mmimọ inyeneke unen ndidụn̄ ke isọn̄ ke nsinsi. Ana mmọ, ọkọrọ ye mbon oro ẹdinamde ẹset ke ini iso, ẹka iso ẹbuọt idem ke uwa ufak Christ tutu mmọ ẹsịm mfọnmma eke owo ke utịt Tọsịn Isua Ukara Christ.—Ediyarade 20:5.

18. (a) Nso iditịbe ke utịt Tọsịn Isua Ukara Jesus Christ? (b) Didie ke utuakibuot akpanikọ Jehovah edikan ke akpatre?

¹⁸ Ekem, mme andituak ibuot nnọ Abasi ke isọn̄ ẹyeda ke iso esie ke mfọnmma idaha eke owo ye unana ediyom itie oku eke heaven. Ini eyedikem emi Jesus Christ “ediyakde itie-ubọn̄ Esie ọnọ Abasi, kpa Ete Esie.” (1 Corinth 15:24) Ẹyekpọhọde Satan ẹyak “ke ekpri ibio ini” ndidomo ubonowo oro ẹnamde edi mfọnmma. Ẹyesobo owo ekededi oro mînamke akpanikọ ẹfep ke nsinsi, ọkọrọ ye Satan ye mme demon esie. Ẹyenọ mbon oro ẹsọn̄ọde ẹda ẹnam akpanikọ nsinsi uwem. Mmọ ẹyekabade ẹdi mme andidụn̄ ke nsinsi ke Paradise isọn̄. Ntem ndamban̄a Usọrọ Mme Ataya eyedisịm ubọn̄ ubọn̄ utịt oro okụtde unen. Utuakibuot akpanikọ eyekan kaban̄a nsinsi ubọn̄ Jehovah ye nsinsi inemesịt ubonowo.—Ediyarade 20:3, 7-10, 14, 15.

[Mme Ikọ idakisọn̄]

Mme Mbụme Ndụn̄ọde

◻ Didie ke “Jerusalem” okodu ke en̄wan ke ini akpa ekọn̄ ererimbot?—Zechariah 14:2.

◻ Nso ikotịbe inọ ikọt Abasi ọtọn̄ọde ke 1919?

◻ Mmanie mfịn ẹtiene ẹbuana ke ndinịm ndamban̄a Usọrọ Mme Ataya?

◻ Didie ke utuakibuot akpanikọ edikan ofụri ofụri?

[[Ndise ke page 23]

Ẹkesikama ndakeyop ke ndinịm Usọrọ Mme Ataya