Se Bible Etịn̄de Aban̄a Ndidian̄ade Ndọ ye Ndidian̄ade Ntie

Jehovah iyomke n̄wan ye ebe ẹbiat en̄wọn̄ọ ndọ mmọ. Ke ini Jehovah akadiande akpa eren ye n̄wan ndọ, enye ọkọdọhọ ete: ‘Erenowo ayaka akadiana ye n̄wan esie ndien mmọ ẹyekabade ẹdi obụk kiet.’ Ekem Jesus Christ ama afiak etịn̄ ikọ emi, onyụn̄ adian do ete: “Mmọdo, se Abasi ama akadian yak baba owo kiet okûdian̄ade.” (Genesis 2:24; Matthew 19:​3-6) Emi owụt ke Jehovah ye Jesus ẹda ndọ nte n̄kpọ emi n̄kpa n̄kpa ikpọn̄ akpadian̄arede. (1 Corinth 7:39) Usiondọ idịghe n̄kpọ mbubru sia Jehovah ọkọtọn̄ọ ndọ. Jehovah asasua owo ndidian̄ade ndọ ke ini n̄wan m̀mê ebe mînamke n̄kpọ emi Bible ọdọhọde ke ẹkeme ndida ndian̄ade ndọ.​—Malachi 2:​15, 16.

Bible ọdọhọ ke nso ke ẹkeme ndida ndian̄ade ndọ? Jehovah asua efịbe ye use. (Genesis 39:9; 2 Samuel 11:​26, 27; Psalm 51:4) Enye enen̄ede asua use tutu enyịme ẹdian̄ade ndọ ke ntak emi. (Ẹtịn̄ se use edide ke Ibuot 9, ikpehe 7.) Edieke owo esịnde efịbe, Jehovah enyịme n̄wan m̀mê ebe esie ebiere ndifen nnọ enye m̀mê ndidian̄ade ndọ. (Matthew 19:9) Edieke n̄wan m̀mê ebe esie ebierede ndidian̄ade ndọ, Jehovah isuaha utọ enye oro. Edi esop Abasi idọhọke owo ndomokiet adian̄ade ndọ. Enyene mme n̄kpọ emi ẹkemede ndinam owo emi n̄wan m̀mê ebe esie esịnde efịbe ebiere ke imọ ididian̄akede ndọ, akpan akpan edieke edide n̄wan m̀mê ebe esie oro enen̄ede akabade esịt. Ntre, enyene-idem edibiere m̀mê iyadian̄ade ndọ ke ntak emi n̄wan m̀mê ebe imọ esịnde efịbe, onyụn̄ eben̄e idem ndiyọ se ededi emi ubiere oro edidade idi.​—Galatia 6:5.

Ke ndusụk idaha oro enen̄erede ọdiọk, ndusụk Christian ẹsibiere ndidian̄ade ntie m̀mê ndidian̄a ndọ, kpa ye oro n̄wan m̀mê ebe mmọ mîsịnke efịbe. Edieke emi etịbede, N̄wed Abasi ọdọhọ yak owo emi adian̄arede do “okûdọ ndọ mîdịghe ntre yak enye anam emem” ye n̄wan m̀mê ebe esie. (1 Corinth 7:11) Enye inyeneke ifụre nditọn̄ọ ufan ye owo en̄wen, man akpafiak ọdọ ndọ. (Matthew 5:32) Ẹyak ineme ndusụk idaha oro enen̄erede ọdiọk, emi ndusụk owo ẹkerede ke ẹkeme ndida nte ntak ndidian̄ade ntie m̀mê ndidian̄ade ndọ (utọ udian̄ade ndọ enye emi itịn̄de ke akpa udịmikọ ke ikpehe emi).

Edieke ebe okoide-koi esịn ndise mban̄a ubon esie. N̄kpọ ekeme ndinen̄ede nsọn̄ ke ubon ke ntak emi ebe mîmaha ndise mban̄a mmọ okposụkedi emi enye ekemede ndinam ntre. Bible ọdọhọ ete: “Edieke owo ekededi mîtịmke n̄kpọ inọ . . . mbonufọk esie, enye akan̄ mbuọtidem onyụn̄ ọdiọk akan owo eke mînịmke ke akpanikọ.” (1 Timothy 5:8) Edieke utọ owo emi mînyịmeke ndikpụhọde, n̄wan esie ekeme ndibiere ndika esopikpe n̄kọdọhọ ẹnyịme imọ idian̄ade itie ke ufọn imọ ye nditọ imọ. Ke ini ẹdọhọde mbiowo ke Christian imaha ndise mban̄a ufọk esie, ana mmọ ẹtịm ẹdụn̄ọde n̄kpọ oro ẹse. Ẹkeme ndisio owo mfep ke esop edieke enye mîmaha ndise mban̄a ubon esie.

Ọkpọsọn̄ mfiomo ye umia. Owo ekeme ndisinam n̄kpọ afai afai tutu n̄wan m̀mê ebe esie edikama nsia ke ubọk sia enye ekeme ndiwot mîdịghe obiomo enye nsinsi ndo. Edieke ẹdọhọde ke eyenete nnyịn esinam utọ n̄kpọ emi, akpana mbiowo ẹdụn̄ọde ẹse m̀mê se ẹtịn̄de emi edi akpanikọ. Ẹkeme ndisio owo mfep ke esop ke ntak obom obom iyatesịt ye afai.​—Galatia 5:​19-21.

Iyakke n̄wan m̀mê ebe esie anam n̄kpọ Abasi. Owo ekeme ndisinam n̄kpọ man etre n̄wan m̀mê ebe esie ndinam n̄kpọ Abasi ofụri ofụri, mîdịghe odomo ndinyịk enye abiat ibet Abasi. Edieke emi etịbede, owo oro ebe m̀mê n̄wan esie mîyakke enye anam n̄kpọ Abasi do ekeme ndibiere m̀mê n̄kukụre usụn̄ emi imọ ikemede “ndikop uyo Abasi nte andikara utu ke uyo owo” edi ndika esopikpe n̄kọdọhọ ẹnyịme imọ idian̄ade itie.​—Utom 5:29.

Edieke ekededi ke otu se isụk inemede emi etịbede, ikpanaha owo ndomokiet enyịk owo emi ọdọde utọ owo oro adian̄ade etie m̀mê osụk odụn̄ ye enye. Kpa ye oro nditọete oro ẹnen̄erede ẹnyene ifiọk Ikọ Abasi ye mbiowo ẹkemede ndida Bible nnọ eyenete emi enyenede mfịna emi item, mmọ ikemeke ndifiọk ofụri se ikade iso ke ufọt ebe ye n̄wan. Jehovah ikpọn̄ ọfiọk. Eyenete an̄wan emi enen̄erede okpono Abasi ye ndọ idinamke mfịna ubon esie etie nte enen̄ede ọdiọk man adian̄ade ọkpọn̄ ebe esie, ebe idinyụn̄ inamke ntre. Jehovah ọdiọn̄ọ n̄kari ekededi emi owo oyomde ndida ndian̄ade ntie, ekpededi owo edịp se ededịp. Bible ọdọhọ ke “kpukpru n̄kpọ ẹna iferi ẹnyụn̄ ẹna in̄wan̄-in̄wan̄ ke enyịn enye emi nnyịn inyenede ndinam ibat nnọ.” (Mme Hebrew 4:13) Edi edieke eyenete ọyọde mme n̄kpọ oro itịn̄de iban̄a mi ke anyan ini, ikpanaha owo asua ọnọ enye edieke enye ebierede ndidian̄ade ntie ke akpatre. M̀mê nso ke owo ebiere ndinam, ọfọn iti ke “owo nnyịn kiet kiet ayanam ibat aban̄a idemesie ọnọ Abasi.”​—Rome 14:​10-12.