Ndi Abasi Ama Ọfiọk ke Adam ye Eve Ẹyenam Idiọkn̄kpọ?

EDIWAK owo ẹsinen̄ede ẹyom ndifiọk ibọrọ mbụme emi. Idiọkn̄kpọ Adam ye Eve edi akpa n̄kpọ emi ẹsisọpde odụk owo esịt ke ini ẹtịn̄de ẹban̄a ntak emi Abasi ayakde idiọkido odu. Sia Abasi ọdiọn̄ọde kpukpru n̄kpọ, emi esinam ndusụk owo ẹkere ke Abasi ama ọdiọn̄ọ ke Adam ye Eve ẹyesọn̄ ibuot ye imọ.

Edieke edide akpanikọ nte ke Abasi ama ọdọdiọn̄ọ ke mmọ ẹyenam idiọkn̄kpọ, oro okpowụt ke Enye idịghe eti owo, inyeneke ima, inamke se inenke, onyụn̄ edi mbubịk. Ndusụk owo ẹkeme ndidọhọ ke enye edi ibak ke ndikobot owo nsịn ke ererimbot emi enye ama ọkọdọdiọn̄ọ ke idifọnke. Oro ọkpọwọrọ ke enye edi ntak—mîdịghe ke enye enyene ubọk—ke kpukpru idiọkn̄kpọ ye ndutụhọ ererimbot emi. Ndusụk owo ẹkpeda Andibot nte ndisịme.

Ndi N̄wed Abasi owụt ke Jehovah Abasi etie ntre? Man ibọrọ mbụme emi, ẹyak idụn̄ọde se Bible etịn̄de aban̄a ubọkutom Abasi ye orụk owo emi Jehovah edide.

“Ẹfọn Etieti”

Ke Abasi ama okobot kpukpru n̄kpọ ye Adam ye Eve ama, Genesis ọdọhọ ke “Abasi [ama] okụt kpukpru se enye akanamde, ndien sese! ẹfọn etieti.” (Genesis 1:31) Adam ye Eve ẹkedi mfọnmma, ndien isọn̄ emi ama enen̄ede ọfọn ye mmọ. Mmọ ikenyeneke ndo ndomokiet. Mmọ ẹkpekekeme ndidu eti uwem emi ẹkeyomde mmọ ẹdu sia Andibot ama enen̄ede ada ini obot mmọ ọfọn. Ẹkebot mmọ “ke mbiet Abasi.” (Genesis 1:27) Ntre, mmọ ẹkpekekeme ndinyene ọniọn̄ ye ima-nsọn̄ọnda, ndinam se inende, nnyụn̄ mfọn ido nte Abasi, kpa ye emi mmọ mîkpekemeke nditie nte enye. Mme edu ntem ẹkpeken̄wam mmọ ẹnam nti ubiere emi ọfọnde ye mmọ, emi onyụn̄ enemde Ete mmọ eke heaven.

Jehovah ama ọnọ mme mfọnmma owo emi ifụre ndimek se mmọ ẹyomde ndinam. Ntre, Abasi ikobotke mmọ ndinam se ededi emi Enye amade nte n̄kpọ eke ẹdọhọde ke mmọ ẹdi ukwakutom emi anamde sụk se ẹkebotde enye ẹnọ. Afo nyụn̄ kere ise. Ewe ke otu emi ke akpama akan—owo ndinọ fi n̄kpọ ke ntak emi ẹdọhọde enye ọnọ fi m̀mê owo ndidiọn̄ọ ke idemesie ikpọn̄ nnọ fi n̄kpọ? Imọdiọn̄ọ enye emi akpamade. Ntre n̄ko ke esịt ekpekenem Abasi ekpedi Adam ye Eve ẹma ẹbiere ke idemmọ ndikop uyo esie. Mmọdo, akpakana mmọ ẹbiere ke idemmọ ndikop uyo Jehovah ndiwụt ke imama enye.—Deuteronomy 30:19, 20.

Enen Onyụn̄ Ọfọn

Bible anam idiọn̄ọ mme edu Jehovah. Mme edu esie iyakke enye enyene ubọk ke idiọkn̄kpọ ndomokiet. Psalm 33:5 ọdọhọ ke Jehovah “amama edinen ido ye unenikpe.” Ntem James 1:13 ọdọhọ ete: “Owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” Sia Abasi mîsinamke idiọk, mîkonyụn̄ iyomke n̄kpọ anam Adam, enye ama owụk Adam ete: “Dia kpukpru mfri eto in̄wan̄ yụhọ. Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.” (Genesis 2:16, 17) Abasi ama ọnọ Adam ye Eve ifet ndimek nsinsi uwem m̀mê n̄kpa. Ndi ikpedịghe mbubịk ndidọhọ mmọ ẹkûnam n̄kpọ emi enye ama ọkọdọdiọn̄ọ ke mmọ ẹyenam? Sia Jehovah edide Abasi emi “[amade] edinen ido ye unenikpe,” enye ikpọkọdọhọke ke iyọnọ owo n̄kpọ emi enye ọdiọn̄ọde ke idụhe.

N̄ko-n̄ko, Jehovah ọfọn ido etieti. (Psalm 31:19) Jesus ama etịn̄ nte Abasi ọfọnde ido ete: “Anie ke otu mbufo ọkpọnọ eyen esie itiat ke ini eben̄ede enye uyo? Mîdịghe, ọkpọnọ enye urụkikọt ke ini eben̄ede enye iyak? Ke ntre, edieke mbufo, okposụkedi emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo emi odude ke heaven edinọ mbon oro ẹben̄ede enye nti n̄kpọ!” (Matthew 7:9-11) Abasi ọnọ mme edibotn̄kpọ esie “nti n̄kpọ.” Nte ẹkebotde owo ye Paradise emi ẹkenọde mmọ owụt adan̄a nte Abasi ọfọnde. Ndi utọ eti Andikara emi akpabak ibak anam ediye ebiet emi enye ọfiọkde ke owo ididụn̄ke ibịghi? Nsa Abasi nnyịn-o! Idịghe enye akanam owo ọsọn̄ ibuot.

‘Enye Ikpọn̄-Ikpọn̄ Enyene Ọniọn̄’

N̄wed Abasi owụt n̄ko ke Jehovah ‘ikpọn̄-ikpọn̄ enyene ọniọn̄.’ (Rome 16:27) Mme angel Abasi ke heaven ẹma ẹkụt ekese n̄kpọ emi Abasi akanamde, emi ẹwụtde akaka ọniọn̄ esie. Mmọ ẹma ‘ẹsio n̄kpo’ idara ke ini Jehovah okobotde mme n̄kpọ ke isọn̄. (Job 38:4-7) Anaedi mme angel emi ẹma ẹnen̄ede ẹnyene udọn̄ ke se ikakade iso ke In̄wan̄ Eden. Ndi okpowụt ifiọk enyene-ọniọn̄ Abasi ndibot enyene-uten̄e ekondo ye mme n̄kpọ emi ẹnyenede ndyọ ke isọn̄, ekem ke iso mme angel emi, enye obot owo iba emi enye ọdiọn̄ọde ke ididụhe uwem ibịghi? Ke akpanikọ, ikpowụtke ifiọk ndibak utọ ibak oro.

Edi owo ekeme ndisụk mfan̄a nte, ‘Didie ke Abasi emi ọdiọn̄ọde kpukpru n̄kpọ mîkpọdiọn̄ọke n̄kpọ enye emi ikpọn̄?’ Imọfiọk ke Jehovah enen̄ede enyene ọniọn̄, ntre ke enye ekeme ndifiọk “akpatre ke ntọn̄ọ.” (Isaiah 46:9, 10) Edi enye isidaha ifiọk emi idụn̄ọde nte owo edidude uwem kpa nte enye mîsidaha akwa odudu esie inam se ededi oro enye okụtde. Enye esisasat se enye oyomde ndifiọk. Edi enye esimek ndifiọk se ededi oro enye oyomde ndifiọk edieke enye okụtde ke owụt ifiọk onyụn̄ odot ndinam oro.

Ẹkeme ndimen emi ndomo ye nte ẹnamde DVD. Edieke ẹsịnde mbre ikpa ke DVD, ndien afo oyom ndise mbre emi, enyene se ekemede ndifịk, ndien enye emen fi aka iso iso, anam okokụt akpatre ikpehe mbre emi. Edi ediwak owo ikpamaha ndikọtọn̄ọ ke akpatre nse, edi ẹkpekam ẹma nditọn̄ọ ke ntọn̄ọ nse. Inyụn̄ idụhe eke akpayatde esịt ye owo ke nditọn̄ọ ke ntọn̄ọ nse mbre emi. Ntre n̄ko, Enye emi okobotde nnyịn ke mbiet esiemmọ ikamaha ndikọtọn̄ọ ke akpatre nse se Adam ye Eve ẹdinamde. Edi ekebiere nditọn̄ọ ke ntọn̄ọ nse.

Nte ima iketetịn̄, Jehovah ikobotke Adam ye Eve nte ukwakutom emi anamde sụk se ẹkebotde enye ẹnọ. Edi ke ntak ima, enye ama ọnọ mmọ ifụre ndimek se mmọ ẹkpemade ndinam. Edieke mmọ ẹkpekemekde ndinam se inende ke idemmọ, oro okpokowụt adan̄a nte mmọ ẹmade Abasi, ẹwụtde esịtekọm ke se enye anamde, ẹnyụn̄ ẹkopde uyo esie, ndien emi ekpekenen̄ede enem Jehovah Ete mmọ eke heaven.—Mme N̄ke 27:11; Isaiah 48:18.

N̄wed Abasi owụt ke enyene mme ini emi Abasi mîkoyomke ndifiọk se iditịbede ke ini iso. Ke uwụtn̄kpọ, ke ini Abraham emi ekedide anam-akpanikọ asan̄autom Jehovah ekekperede ndiwa eyen esie nnọ Jehovah, Jehovah ama ọdọhọ enye ete: “Ke emi mmọfiọk nte ke afo amabak Abasi sia mûsịnke ndinọ mi ikpọn̄-ikpọn̄ eyen fo.” (Genesis 22:12) Onyụn̄ enyene mme ini en̄wen emi idiọkido ndusụk owo ekesinamde Abasi “ayat esịt.” Ndi esịt akpakayat enye ekpedi enye ama ọfọfiọk ke se mmọ ẹdinamde edi oro?—Psalm 78:40, 41; 1 Ndidem 11:9, 10.

Ntem, enen̄ede odot ndibiere ke kpa ye emi Abasi ekemede ndifiọk kpukpru n̄kpọ, ke enye ama ebiere nditre ndifiọk m̀mê Adam ye Eve ẹyenam idiọkn̄kpọ m̀mê idinamke. Ndi etie fi nte ke Abasi edi ndisịme emi akpabiatde ini anam n̄kpọ emi enye ọdiọn̄ọde ke ayabiara?

“Abasi Edi Ima”

Satan emi edide asua Abasi ọkọtọn̄ọ nsọn̄ibuot ke Eden onyụn̄ ada kpukpru afanikọn̄ emi isobode mfịn ẹdi, ndien emi esịne idiọkn̄kpọ ye n̄kpa. Ntem, Satan edi owotowo. Se enye anamde owụt ke enye edi “osu nsu ye ete nsu.” (John 8:44) Sia enye akaduakde idiọk, Satan odomo ndinam etie nte edima Andibot nnyịn akakam aduak idiọk aban̄a nnyịn. Enye oyom mme owo ẹkere ke Jehovah anam mme owo ẹnam idiọkn̄kpọ.

Ima edi ata akpan ntak emi akanamde Jehovah okûyom ndifiọk m̀mê Adam ye Eve ẹyenam idiọkn̄kpọ. Ima edi akpan edu Abasi. Akpa John 4:8 ọdọhọ ke “Abasi edi ima.” Ima esinam eti, inamke idiọk. Enye oyoyom ufọn mbon en̄wen. Ima akanam Jehovah Abasi anam n̄kpọ emi edinen̄erede inyene ufọn inọ Adam ye Eve.

Okposụkedi emi Abasi ọkọnọde Adam ye Eve ifụre ndimek eti m̀mê idiọk, edima Abasi nnyịn ikekereke ke mme mfọnmma owo emi imọ ikobotde mi ẹyemek idiọk, ikonyụn̄ ikereke idiọk iban̄a mmọ. Enye ama ọnọ mmọ kpukpru se mmọ ẹkeyomde onyụn̄ anam mmọ ẹfiọk ofụri se akanade mmọ ẹfiọk. Abasi ikekereke-kere ke mmọ ẹkpesọn̄ ibuot ye imọ, edi akakam ekere ke mmọ ẹyekop uyo imọ ke ntak ima emi imọ imade mmọ. Enye ama ọfiọk ke Adam ye Eve ẹkeme ndisọn̄ọ nda nnam akpanikọ nnọ imọ kpa nte Abraham, Job, Daniel, ye ediwak mmọ eken emi ẹkekam ẹdide mme anana-mfọnmma ẹkenamde nte ini akakade.

Jesus ọkọdọhọ ke “Abasi ekeme ndinam kpukpru n̄kpọ.” (Matthew 19:26) Ikọ emi ọdọn̄ nnyịn esịt. Ndifiọk ke Jehovah edi Abasi ima ye ọniọn̄, Abasi unenikpe, ye nte ke enye enen̄ede enyene odudu, anam inen̄ede inịm ke edikem ini, ke enye oyosio kpukpru afanikọn̄ emi idiọkn̄kpọ ye n̄kpa ẹdade ẹdi.—Ediyarade 21:3-5.

Imenen̄ede ikụt ke Jehovah ikọfiọkke ke Adam ye Eve ẹyenam idiọkn̄kpọ. Okposụkedi emi akabiakde Abasi ndikụt owo ọsọn̄de ibuot onyụn̄ ọbọde ufen, Enye ọfiọk ke kpukpru emi ẹdi n̄kpọ ibio ini, ndien nte ke emi idibiatke nsinsi uduak imọ kaban̄a isọn̄ ye mbon emi ẹdụn̄ọde ke esịt. Mbọk yom usụn̄ kpep ekese ban̄a uduak emi ye se akpanamde man etiene odu ke ini enye edisude?a

[Ikọ Idakisọn̄]

[Se ẹwetde ke ikpọ abisi ke page 14]

Jehovah ikobotke Adam ye Eve nte ukwakutom emi anamde sụk se ẹkebotde enye ẹnọ

[Se ẹwetde ke ikpọ abisi ke page 15]

Abasi ama ọfiọk ke Adam ye Eve ẹkeme ndisọn̄ọ nda nnam akpanikọ nnọ imọ