Udia Mbubịteyo Ọbọn̄—Edinam Oro Ọnọde Abasi Ukpono

ẸWỤK mme Christian ẹte ẹnịm Editi n̄kpa Christ. Ẹkot edinam emi n̄ko “udia mbubịteyo Ọbọn̄.” (1 Corinth 11:20) Nso inam enye edi ata akpan edinam? Ẹkpenịm edinam emi ini ewe, ẹkpenyụn̄ ẹnịm enye didie?

Jesus Christ ọkọtọn̄ọ edinam emi ke okoneyo emi ẹkediade Passover mme Jew ke isua 33 E.N. Passover ekedi usọrọ emi ẹkesinịmde sụk ini kiet ke isua, ke ọyọhọ usen 14 ke ọfiọn̄ Nisan mme Jew. Man ẹfiọk nnennen usenọfiọn̄, etie nte mme Jew ẹma ẹsitie ẹbet tutu esịm usen emi ẹkụtde obufa ọfiọn̄ ke ekperede utịt March m̀mê ntọn̄ọ April. Usen emi un̄wana usen esiyama ke n̄kpọ nte hour 12, ekịm esinyụn̄ odu ke n̄kpọ nte hour 12. Akpa ọfiọn̄enyọn̄ emi ọwọrọde ke ekperede utịt March m̀mê ntọn̄ọ April ekedi ntọn̄ọ ọfiọn̄ Nisan. Passover ekesidi ke ọyọhọ usen 14 ke oro ebede, ke utịn ama okosop.

Jesus ama enịm usọrọ Passover ye mme apostle esie, anam Judas Iscariot ọwọrọ, ndien ọtọn̄ọ Udia Mbubịteyo Ọbọn̄. Edinam emi akada itie Passover mme Jew ndien ke ntre ẹkpenyene ndinịm enye ini kiet kpọt ke isua.

Gospel Matthew obụk ete: “Jesus emen uyo ndien, ke ama ọkọdiọn̄, obụn̄, ọnọ mbet onyụn̄ ọdọhọ ete: ‘Ẹbọ, ẹta. Emi ada aban̄a ikpọkidem mi.’ N̄ko, enye emen cup, ndien ke ama ọkọnọ ekọm, ayak ọnọ mmọ onyụn̄ ọdọhọ ete: ‘Kpukpru mbufo ẹbọ ẹn̄wọn̄; koro emi ada aban̄a “iyịp ediomi” mi, emi ẹdiduọkde kaban̄a ediwak owo man ẹfen mme idiọkn̄kpọ.’”—Matthew 26:26-28.

Ndusụk owo ẹnịm ke akpanikọ ẹte ke Jesus ama anam uyo oro akabade edi ata ata ikpọkidem esie onyụn̄ anam wine akabade edi iyịp esie. Nte ededi, n̄kpọ ikanamke ikpọkidem Jesus ke ini enye ọkọnọde mmọ uyo emi. Nte mme apostle Jesus ẹma ẹnen̄ede ẹta ata ata ikpọkidem esie ẹnyụn̄ ẹn̄wọn̄ iyịp esie? Baba, sia oro ekpekedi ndita owo, okponyụn̄ abiat ibet Abasi. (Genesis 9:3, 4; Leviticus 17:10) Nte Luke 22:20 owụtde, Jesus ọkọdọhọ ete: “Cup emi ada aban̄a obufa ediomi eke ebede ke iyịp mi, emi ẹdiduọkde kaban̄a mbufo.” Nte cup oro ama akabade edi “obufa ediomi” ke ata ata usụn̄? Oro ikpekemeke nditịbe, sia ediomi edide edinyịme ndinam n̄kpọ, inyụn̄ idịghe n̄kpọ emi ẹkemede ndikụt nnyụn̄ ntụk.

Ntem, uyo ye wine ẹdi ndamban̄a n̄kpọ. Uyo ada aban̄a mfọnmma ikpọkidem Christ. Jesus akada uyo Passover emi okosụhọde ọtọn̄ọ edinam emi. Owo ikesịnke leaven, m̀mê yeast, ke uyo emi. (Exodus 12:8) Bible owụt ke leaven ada aban̄a idiọkn̄kpọ m̀mê mbiara n̄kpọ. Ke ntre, uyo ada aban̄a mfọnmma ikpọkidem oro Jesus akawade. Ikpọkidem emi ikenyeneke idiọkn̄kpọ.—Matthew 16:11, 12; 1 Corinth 5:6, 7; 1 Peter 2:22; 1 John 2:1, 2.

Ndatndat wine ada aban̄a iyịp Jesus. Iyịp oro ọsọn̄ọ obufa ediomi. Jesus ọkọdọhọ ete ke ẹken̄wan̄a iyịp imọ ẹduọk “man ẹfen mme idiọkn̄kpọ.” Ntem Abasi ekeme ndibat mme owo ke edisana, mme owo emi ẹnyụn̄ ẹkeme ndidụk ke obufa ediomi ye Jehovah. (Mme Hebrew 9:14; 10:16, 17) Ediomi emi anam owo 144,000 emi ẹdide mme Christian oro ẹnamde akpanikọ ẹkeme ndika heaven. Do mmọ ẹyenam utom nte ndidem ye mme oku ẹnyụn̄ ẹda edidiọn̄ ẹsọk ofụri ubonowo.—Genesis 22:18; Jeremiah 31:31-33; 1 Peter 2:9; Ediyarade 5:9, 10; 14:1-3.

Mmanie ẹkpeta ẹnyụn̄ ẹn̄wọn̄ mme n̄kpọ idiọn̄ọ Editi emi? Owụt ifiọk nte ke sụk mbon oro ẹdude ke obufa ediomi—oro edi, mbon oro ẹnyenede idotenyịn edika heaven—ẹkpeta uyo ẹnyụn̄ ẹn̄wọn̄ wine oro. Edisana spirit Abasi anam utọ mbon oro ẹnịm ẹte ke ẹmek mmimọ ndidi ndidem ke heaven. (Rome 8:16) Mmọ ẹdu n̄ko ke ediomi Obio Ubọn̄ ye Jesus.—Luke 22:29.

Nso kaban̄a mbon oro ẹnyenede idotenyịn edidu uwem ke nsinsi ke Paradise ke isọn̄? Mmọ ẹsinam ewụhọ Jesus ẹnyụn̄ ẹdụk Udia Mbubịteyo Ọbọn̄ emi ukpono ukpono, idịghe man ẹketa ẹnyụn̄ ẹn̄wọn̄. Mme Ntiense Jehovah ẹsinịm Udia Mbubịteyo Ọbọn̄ ini kiet ke isua ke utịn ama okosụhọde ke Nisan 14. Okposụkedi tọsịn owo ifan̄ kpọt ke ofụri ererimbot ẹsiwụtde ke imenyene idotenyịn uka heaven, edinam emi edi ọsọn̄urua n̄kpọ ke enyịn kpukpru mme Christian. Enye edi ini emi kpukpru owo ẹkemede nditie n̄kere mban̄a akakan ima emi Jehovah Abasi ye Jesus Christ ẹwụtde.—John 3:16.