Ikanam Nnennen Ubiere

Nnyịn mbiba imosobo ekese ke uwem emi, imesidọn̄ọ, ufọk esinyụn̄ ọdọn̄ nnyịn ndusụk ini. Esidi n̄wan mi ama okokụt inyan̄, ufọk ọdọn̄ enye. Ẹsiak enye idem ediwak ini. Ini kiet, owo kiet ama emen ufatikan̄ ebịne n̄wan mi ke ini enye akakade ndikenịm ukpepn̄kpọ Bible. N̄kpọ emi ama afịna enye tutu edi se ẹdade enye ẹka ufọkibọk.

Ndusụk ini, idem ama esimem nnyịn, edi ‘ima isibet Jehovah’ nte n̄wed Eseme 3:24 ọdọhọde. Enye edi Abasi ndọn̄esịt. Ini kiet, ke ini ikokopde mmemidem, Brọda Nathan Knorr ama ọnọ n̄wan mi ata edinem leta. Sia Brọda Knorr akamanade ke Bethlehem ke Pennsylvania, kpa ebiet emi n̄wan mi ọkọtọn̄ọde usiakusụn̄, enye ọkọdọhọ ke imọfiọk ke iban Dutch ke Pennsylvania ẹsisọn̄ idem etieti. Enye ama enen. Ediwak owo ẹsịn udọn̄ ẹnọ nnyịn ke nsio nsio usụn̄ ke ediwak isua idahaemi.

Imodomo ofụri ukeme nnyịn ndisịn ifịk nnam utom nnyịn, kpa ye mme mfịna oro isobode. Ke ima ikanam utom circuit ye eke district ke isua 40, ẹma ẹnọ nnyịn akwa ifetutom en̄wen ndisan̄a nse mme otu ye mme esop emi ẹsemde usem en̄wen ke Italy. Mme otu emi ẹsikwọrọ ikọ ẹnọ mbon Bangladesh, China, Eritrea, Ethiopia, Ghana, India, Nigeria, Philippines, Sri Lanka, ye mme idụt en̄wen. Edieke ikpoyomde ndibụk mme utịbe utịbe usụn̄ oro ikụtde nte Ikọ Abasi okpụhọrede uwem mbon emi Jehovah atuade mbọm, n̄wed kiet ikpekemke.—Mic. 7:18, 19.

Imesiben̄e Jehovah kpukpru usen ite ọnọ nnyịn odudu ndika iso nnam utom esie. Idatesịt Ọbọn̄ edi odudu nnyịn. Enye anam enyịn an̄wan̄a nnyịn onyụn̄ anam ikụt ke ndikpep mme owo akpanikọ edi mfọnn̄kan n̄kpọ oro idade uwem nnyịn inam.—Eph. 3:7; Col. 1:29.

Mme Mbụme Oro Mme Andikot Ẹbụpde

Genesis 6:3 ọdọhọ ete: “Spirit mi idiyọhọ owo ke nsinsi koro enye edide obụk. Edi isua uwem esie edidi isua ikie ye edịp.” Ndi itien̄wed emi owụt ke Abasi ama osụhọde isua uwem owo ekenịm ke isua 120, ndien ke Noah akada isua 120 ọkwọrọ aban̄a Ukwọ?

Ibọrọ mbụme mbiba emi edi baba.

Mbemiso Ukwọ ekedide, ediwak owo ẹma ẹsidu uwem ke ata ediwak isua. Noah ekedi isua 600 ke ini Ukwọ, ndien enye akakpa ke isua 950. (Gen. 7:6; 9:29) Ediwak mbon oro ẹkemanade ke Ukwọ ama ekebe ẹma ẹdu uwem ẹbe isua 120. Arpachshad okodu uwem isua 438, ndien Shelah odu isua 433. (Gen. 11:10-15) Edi etisịm ini mme Moses, isua uwem owo ama osụhọde edisịm 80 ye 70. (Ps. 90:10) Ntre, Genesis 6:3 iban̄ake isua uwem owo.

Ke edide ntre, ndi Abasi eketịn̄ ikọ emi ọnọ Noah ete ọkọtọt ererimbot ke imọn̄ isobo mmọ ke isua 120 ke iso? Baba. Imọfiọk ke Abasi ama esineme nneme ediwak ini ye Noah. Genesis 6:13 ọdọhọ ete: “Ekem Abasi ọdọhọ Noah ete: ‘Utịt kpukpru obụkidem emedi ke iso mi, koro oto mmọ afai ọyọhọ isọn̄.’” Noah ama ọkọn̄ akaka ubom ama ke mme isua oro ẹketienede, ndien “Jehovah ọdọhọ Noah ete: ‘Afo ye ofụri ufọk fo, ẹka ẹkedụk ubom.’” (Gen. 6:13; 7:1) Enyene mme ebiet en̄wen ke Bible emi Jehovah etịn̄de ikọ ọnọ Noah.—Gen. 8:15; 9:1, 8, 17.