1. Nso idi uduak Abasi kaban̄a isọn̄?

UDUAK Abasi kaban̄a isọn̄ enen̄ede edi utịbe. Jehovah oyom mbon oro ẹkopde inemesịt ye nsọn̄idem ẹdụn̄ ke isọn̄. Bible ọdọhọ ke ‘Abasi ama ọtọ in̄wan̄ ke Eden onyụn̄ anam isọn̄ etịbe kpukpru eto eke ẹnemde ndise ẹnyụn̄ ẹfọnde ndidia.’ Ke Abasi ama okobot akpa eren ye n̄wan, Adam ye Eve, Enye ama esịn mmọ ke ediye ebietidụn̄ onyụn̄ ọdọhọ mmọ ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” (Genesis 1:28; 2:8, 9, 15) Ntre Abasi okoyom mme owo ẹnyene nditọ, ẹtat in̄wan̄ oro ẹsịm ofụri isọn̄, ẹnyụn̄ ẹkpeme mme unam.

2. (a) Nnyịn isan̄a didie ifiọk ke uduak Abasi kaban̄a isọn̄ oyosu? (b) Nso ke Bible etịn̄ aban̄a mme owo ndidu uwem ke nsinsi?

² Ndi afo emekere ke uduak Jehovah Abasi aban̄ade mme owo ndidụn̄ ke Paradise isọn̄ oyosu tutu amama? Abasi ọdọhọ ete: ‘N̄kọm mma ndọhọ, nyonyụn̄ nnam enye.’ (Isaiah 46:9-11; 55:11) Ih, Abasi ayanam se enye aduakde! Enye ọdọhọ ke imọ ‘ikobotke isọn̄ ke ikpîkpu edi ikobot man ẹdụn̄ ke esịt.’ (Isaiah 45:18) Nso orụk owo ke Abasi okoyom ẹdụn̄ ke isọn̄? Enye okonyụn̄ oyom mmọ ẹdụn̄ ke isọn̄ ẹbịghi adan̄a didie? Bible ọbọrọ ete: ‘Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.’—Psalm 37:29; Ediyarade 21:3, 4.

3. Mme idiọk idaha ewe ẹdu mfịn ke isọn̄, ndien mme mbụme ewe ke emi edemede?

³ Ana in̄wan̄-in̄wan̄ nte ke emi itịbeke kan̄a. Mme owo ke ẹdọn̄ọ ẹnyụn̄ ẹkpan̄a; mmọ ke ẹkam ẹn̄wana ẹnyụn̄ ẹwot kiet eken. Enyene se ikakwan̄ade. Ke akpanikọ, Abasi ikaduakke ite isọn̄ etie nte nnyịn ikụtde mfịn! Nso iketịbe? Ntak emi uduak Abasi mîsụhu-e? Idụhe n̄wed mbụkeset ndomokiet oro owo ewetde, emi ekemede ndinọ nnyịn mme ibọrọ mbụme emi, koro mfịna emi ọkọtọn̄ọ ke heaven.

NTỌN̄Ọ ASUA

4, 5. (a) Anie akada urụkikọt etịn̄ ikọ ọnọ Eve? (b) Didie ke owo emi ekenyenede eti ido uwem okonyụn̄ anamde akpanikọ ini kiet ko ekeme ndikabade ndi inọ?

⁴ Akpa n̄wed Bible etịn̄ aban̄a enye emi ọkọbiọn̄ọde Abasi ke In̄wan̄ Eden. Ẹkot enye “urụkikọt,” edi enye ikedịghe ikpîkpu urụkikọt. Akpatre n̄wed Bible ọdọhọ ke ẹkot enye “Devil ye Satan, emi adade ofụri isọn̄ otụn usụn̄.” Ẹkot enye n̄ko “akani urụkikọt.” (Genesis 3:1; Ediyarade 12:9) Okopodudu angel, m̀mê edibotn̄kpọ eke spirit emi, akada urụkikọt etịn̄ ikọ ọnọ Eve, kpa nte owo oro enyenede mbufiọk ekemede nditịn̄ ikọ, edi anam etie nte eyen ọkpọ oro odude ekpere etịn̄. Nte eyịghe mîdụhe, owo eke spirit oro ama odu ke ini Abasi eketịmde isọn̄ ọnọ mme owo ndidụn̄.—Job 38:4, 7.

⁵ Nte ededi, sia kpukpru edibotn̄kpọ Jehovah ẹfọnde ẹma, anie akanam “Satan” kpa “Devil”? Ke nditịn̄ ibio ibio, kiet ke otu okopodudu nditọ Abasi eke spirit akanam idemesie Devil. Didie ke oro ekekeme nditịbe? Ọfọn, mfịn owo oro ekenyenede eti ido uwem onyụn̄ anamde akpanikọ ini kiet ko ekeme ndikabade ndi inọ. Didie ke oro ekeme nditịbe? Owo oro ekeme ndiyak idiọk udọn̄ ọkọri enye ke esịt. Edieke enye akade iso ndikere mban̄a idiọk udọn̄ oro, idiọk udọn̄ oro ekeme nditetịm nsọn̄ ubọk. Ndien edieke ifet odude, enye ekeme ndinam idiọk udọn̄ oro okodude enye ke esịt.—James 1:13-15.

6. Didie ke okopodudu eyen Abasi eke spirit akakabade edi Satan kpa Devil?

⁶ Emi edi se iketịbede inọ Satan kpa Devil. Etie nte enye ama okop ini oro Abasi ọkọdọhọde Adam ye Eve ẹnyene nditọ ẹnyụn̄ ẹtọt ẹyọhọ isọn̄. (Genesis 1:27, 28) Eyedi Satan ama ekere ete: ‘Kamse, kpukpru owo emi ẹkeme ndituak ibuot nnọ mi utu ke ndituak nnọ Abasi!’ Ntre, idiọk udọn̄ ama ọtọn̄ọ ndikọri ke esịt esie. Ke akpatre, enye ama abian̄a Eve ke ndisian enye nte ke Abasi okosu nsu ọnọ enye. (Genesis 3:1-5) Ntem, enye ama akabade edi “Devil,” emi ọwọrọde “Ọdọk-Edidọk.” Ke ukem ini oro, enye ama akabade edi “Satan,” emi ọwọrọde “Andibiọn̄ọ.”

7. (a) Ntak emi Adam ye Eve ẹkekpade? (b) Ntak emi kpukpru nditọ Adam ẹkọride ẹsọn̄ ẹnyụn̄ ẹkpan̄ade?

⁷ Satan kpa Devil ama ada nsu ye n̄kari anam Adam ye Eve ẹsọn̄ ibuot ye Abasi. (Genesis 2:17; 3:6) Nte utịp, mmọ ẹma ẹkpan̄a ke akpatre, kpa nte Abasi ọkọdọhọde ke mmọ ẹyekpan̄a edieke mmọ ẹsọn̄de ibuot ye imọ. (Genesis 3:17-19) Sia Adam akakabarede edi anana-mfọnmma owo ke enye ama akanam idiọkn̄kpọ, kpukpru nditọ esie ẹma ẹda idiọkn̄kpọ ẹmana ẹto enye. (Rome 5:12) Ẹkeme ndida usan utem bred nnam emi an̄wan̄a. Edieke usan utem bred enyenede ndo, nso iditịbe inọ kpukpru bred oro ẹdade usan oro ẹtem? Kpukpru mmọ ẹyenyene ndo. Kpasụk ntre, kpukpru owo ẹda “ndo” unana mfọnmma ẹto Adam. Ntak edi oro kpukpru owo ẹkọride ẹsọn̄ ẹnyụn̄ ẹkpade.—Rome 3:23.

8, 9. (a) Nte an̄wan̄ade, nso edori ikọ ke Satan eketịn̄? (b) Ntak emi Abasi mîkosoboke mbon nsọn̄ibuot oro ke ndondo oro?

⁸ Ke ini Satan akanamde Adam ye Eve ẹdue Abasi, nsọn̄ibuot ke enye ekenen̄ede ọtọn̄ọ. Enye ekeneni aban̄a usụn̄ oro Jehovah akarade. Ke nditịm ntịn̄, Satan ọkọdọhọ ete: ‘Abasi edi idiọk andikara. Enye edi osu nsu inyụn̄ iyakke mme andituak ibuot nnọ enye ẹnyene nti n̄kpọ. Ufọn idụhe mme owo ndiyom Abasi akara mmimọ. Mmọ ẹkeme ndibiere ke idemmọ se idide eti ye idiọk. Ndien n̄kpọ eyenen̄ede ọfọn ye mmọ edieke ndide andikara mmọ.’ Didie ke Abasi akanam n̄kpọ aban̄a utọ emiom emiom edori ikọ oro? Ndusụk owo ẹkere ke akpakana Abasi owot mbon nsọn̄ibuot oro. Edi ndi oro ọkpọkọbọrọ edori ikọ Satan oro? Ndi oro okpokowụt ke usụn̄ oro Abasi akarade enen?

⁹ Mfọnmma unenikpe Jehovah ikayakke enye owot mbon nsọn̄ibuot oro ke ndondo oro. Enye ama ọfiọk ke oyom anyan ini ebe mbemiso ẹbọrọde edori ikọ Satan oro ke usụn̄ oro ọnọde uyụhọ onyụn̄ owụtde ke Devil edi osu nsu. Ntre Abasi ama ebiere ndiyak mme owo ẹkara idemmọ ke ndusụk ini ke idak ndausụn̄ Satan. Iyeneme ke Ibuot 11 ke n̄wed emi iban̄a ntak emi Jehovah akanamde n̄kpọ ntre ye ntak emi enye ayakde anyan ini ebe mbemiso enye ebierede eneni emi. Nte ededi, idahaemi, ọkpọfọn ikere iban̄a mme mbụme emi: Ndi Adam ye Eve ẹma ẹnen ndinịm Satan ke akpanikọ, emi akanam mînamke eti n̄kpọ ndomokiet inọ mmọ? Ndi ama enen mmọ ndinịm ke Jehovah, emi ọkọnọde mmọ kpukpru se mmọ ẹkenyenede, edi abak-ibak ye osu nsu? Nso ke afo akpakanam?

10. Didie ke afo ekeme ndinam Jehovah okụt se ọbọrọde edori ikọ Satan?

¹⁰ Ọfọn ndikere mban̄a mme mbụme emi koro nnyịn owo kiet kiet imesisobo ukem idaha emi mfịn. Ih, afo emenyene ifet ndinam Jehovah okụt se ọbọrọde edori ikọ Satan. Afo emekeme ndinyịme Jehovah nte Andikara onyụn̄ an̄wam ndiwụt ke Satan edi osu nsu. (Psalm 73:28; Mme N̄ke 27:11) Edi n̄kpọ mfụhọ nditịn̄ nte ke ibat ibat ke otu ediwak biliọn owo oro ẹdụn̄de ke ererimbot ẹnyịme Jehovah nte Andikara mmọ. Emi edemede akpan mbụme, Ndi Bible enen̄ede ekpep ke Satan akara ererimbot emi?

ANIE AKARA ERERIMBOT EMI?

11, 12. (a) Didie ke idomo oro Satan okodomode Jesus owụt ke Satan edi andikara ererimbot emi? (b) Nso n̄kpọ efen owụt ke Satan edi andikara ererimbot emi?

¹¹ Jesus ama enen̄ede ọfiọk ke Satan edi andikara ererimbot emi. Ini kiet, Satan ama ada utịbe utịbe usụn̄ owụt Jesus ‘kpukpru mme obio ererimbot ye ubọn̄ mmọ.’ Ekem Satan ama ọn̄wọn̄ọ ọnọ Jesus ete: “Nyọnọ fi kpukpru mme n̄kpọ emi edieke afo ọduọde ke isọn̄ atuak ibuot ọnọ mi.” (Matthew 4:8, 9; Luke 4:5, 6) Kam kere ban̄a emi. Ndi Jesus akpakada enọ emi nte idomo edieke Satan mîkpedịghe andikara mme obio emi? Jesus ama ọfiọk ke Satan enyene kpukpru mme ukara ererimbot emi. Ke akpanikọ, Jesus akpakafan̄a edieke mme ukara ererimbot emi mîkpekedịghe eke Satan.

¹² Edi akpanikọ, Jehovah edi Ata Ọkpọsọn̄ Abasi, kpa Andibot utịbe utịbe ekondo nnyịn. (Ediyarade 4:11) Kpa ye oro, idụhe ebiet ndomokiet emi Bible ọdọhọde ke Jehovah Abasi m̀mê Jesus Christ edi andikara ererimbot emi. Ke nditịm ntịn̄, Jesus okokot Satan “andikara ererimbot emi.” (John 12:31; 14:30; 16:11) Bible akam okot Satan kpa Devil “abasi editịm n̄kpọ emi.” (2 Corinth 4:3, 4) Apostle John ekewet ntem aban̄a andibiọn̄ọ emi, m̀mê Satan, ete: “Ofụri ererimbot esịne ke idak odudu andidiọk.”—1 John 5:19.

NTE ẸDISOBODE ERERIMBOT SATAN

13. Ntak emi ẹyomde obufa ererimbot?

¹³ Ererimbot etetịm enyene ndịk nte mme isua ẹbede. Mme an̄wanaekọn̄, mbon ukara oro mînamke akpanikọ, mme adaiso ido ukpono oro ẹdide mbubịk, ye mme abiatibet oro esịt ama okodoro ufiọn, ẹyeyọhọ ererimbot. Owo ikemeke ndinam ererimbot ọtọn̄ọ ntak ọfọn. Bible owụt ke ini oro Abasi edidade ekọn̄ Armageddon osobo idiọk ererimbot emi emekpere. Ndien edinen obufa ererimbot ayada itie idiọk ererimbot emi.—Ediyarade 16:14-16.

14. Anie ke Abasi emek ndidi Andikara ke Obio Ubọn̄ Esie, ndien didie ke ẹkebem iso ẹtịn̄ ẹban̄a emi?

¹⁴ Jehovah Abasi ama emek Jesus Christ ndidi Andikara ke Obio Ubọn̄, m̀mê ukara Esie eke heaven. Bible ama ebem iso etịn̄ anyan ini ko ete: “Koro eyen amanade ọnọ nnyịn, ẹnọ nnyịn eyen-eren: ubọn̄ onyụn̄ odoro enye ke afara; ẹnyụn̄ ẹsio enye enyịn̄ . . . Ọbọn̄ Emem. Ubọn̄ ye emem ididopke ndikọri . . . ke itie ubọn̄ esie.” (Isaiah 9:6, 7) Jesus ama ekpep mme anditiene enye ndibọn̄ akam mban̄a ukara emi, ete: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:10) Nte nnyịn idikụtde ke n̄wed emi, ibịghike Obio Ubọn̄ Abasi oyosobo kpukpru ukara ererimbot emi, ndien enye ayada itie kpukpru mmọ. (Daniel 2:44) Ke oro ebede, Obio Ubọn̄ Abasi ayanam isọn̄ akabade edi Paradise.

OBUFA ERERIMBOT EMEKPERE!

15. Nso idi “obufa isọn̄”?

¹⁵ Bible ọn̄wọn̄ọ ọnọ nnyịn ete: “Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ [Abasi], ndien edi mi ke edinen ido edidụn̄.” (2 Peter 3:13; Isaiah 65:17) Ndusụk ini oro Bible esitịn̄de aban̄a isọn̄ m̀mê “ererimbot,” enye esiwọrọ mme owo oro ẹdụn̄de ke isọn̄. (Genesis 11:1) Ntre edinen “obufa isọn̄” edi n̄kaowo oro ẹnyenede unyịme Abasi.

16. Ewe ọsọn̄urua enọ ke Abasi ọnọ mbon oro enye enyịmede, ndien nso ke ana nnyịn inam man ibọ enọ emi?

¹⁶ Jesus ama ọn̄wọn̄ọ ete ke mbon oro Abasi enyịmede ẹyebọ enọ “nsinsi uwem” ke obufa ererimbot oro edide. (Mark 10:30) Mbọk kụbọde Bible fo ka John 3:16 ye 17:3, kokot se Jesus ọkọdọhọde ke ana nnyịn inam man inyene nsinsi uwem. Idahaemi kere ban̄a mme edidiọn̄ oro Bible ọdọhọde nte mbon oro ẹdotde ndibọ utịbe utịbe enọ Abasi oro ẹdinyenede ke Paradise isọn̄ oro edide.

17, 18. Ntak emi nnyịn ikemede ndinịm ke emem ye ifụre ẹyedu ke ofụri isọn̄?

¹⁷ Idiọkido, ekọn̄, ubiatibet, ye afai ididụhe aba. “Idiọk owo ididụhe: . . . Edi mbon nsụkidem ẹyeda isọn̄ ẹnyene.” (Psalm 37:10, 11) Emem oyodu koro ‘Abasi ayanam ekọn̄ etre tutu esịm ke utịt ekondo.’ (Psalm 46:9; Isaiah 2:4) Ndien “edinen owo ayafiari ke eyo esie; ye ediwak emem n̄ko tutu ọfiọn̄ okụre”—oro edi ke nsinsi!—Psalm 72:7.

¹⁸ Mme andituak ibuot nnọ Jehovah ẹdidụn̄ ke ifụre. Adan̄a nte nditọ Israel ke eyo Bible ẹkekopde item Abasi, mmọ ẹma ẹdụn̄ ke ifụre. (Leviticus 25:18, 19) Edinem didie ntem ndidụn̄ ke ifụre ke Paradise!—Isaiah 32:18; Micah 4:4.

19. Nnyịn isan̄a didie ifiọk ke udia oyodu barasuene ke obufa ererimbot Abasi?

¹⁹ Udia idinanake aba. Andiwet psalm ọkọkwọ ete: “Uwak ibokpot ẹyedu ke isọn̄ ke nsom ikpọ obot.” (Psalm 72:16) Jehovah Abasi ọyọdiọn̄ ndinen ikọt esie, ndien ‘isọn̄ oyon̄wụm mbun̄wụm esie.’—Psalm 67:6.

20. Ntak emi nnyịn ikemede ndinịm ke ofụri isọn̄ ayakabade edi Paradise?

²⁰ Ofụri isọn̄ ayakabade edi Paradise. Ẹyebọp ndiye ufọk ẹnyụn̄ ẹtọ ndiye in̄wan̄ ke isọn̄ emi ndiọi owo ẹkebiatde ini kiet ko. (Isaiah 65:21-24; Ediyarade 11:18) Nte ini akade, mme ikpehe isọn̄ oro ẹma ẹkedọdiọn̄ ẹyetara tutu ofụri ekondo akabade eye onyụn̄ osion̄o mbun̄wụm nte In̄wan̄ Eden. Ndien Abasi iditreke ‘nditat ubọk esie, nnyụn̄ nnọ kpukpru mme andidu uwem se mmọ ẹmade, ẹyụhọ.’—Psalm 145:16.

21. Nso iwụt ke emem oyodu ke ufọt mme owo ye mme unam?

²¹ Emem oyodu ke ufọt mme owo ye mme unam. Mme unamikọt ye mme ufene ẹyedia n̄kpọ ọtọkiet. Mme unam oro ẹdide n̄kpọndịk mfịn idikam inamke eyen nsek ndịk.—Isaiah 11:6-9; 65:25.

22. Nso iditịbe inọ udọn̄ọ?

²² Udọn̄ọ ididụhe aba. Nte Andikara ke Obio Ubọn̄ Abasi eke heaven, Jesus ọyọkọk udọn̄ọ ke udomo oro okponde akan se enye ọkọkọkde ke ini enye okodude ke isọn̄. (Matthew 9:35; Mark 1:40-42; John 5:5-9) Ndien “andidụn̄ ididọhọke ite, Ndọdọn̄ọ.”—Isaiah 33:24; 35:5, 6.

23. Ntak emi ediset ke n̄kpa edidatde nnyịn esịt-e?

²³ Ẹyenam mbonima nnyịn oro ẹkekpan̄ade ẹset ye idotenyịn edidu uwem ke nsinsi. Kpukpru mbon oro ẹdede ke n̄kpa emi ẹdude ke ibuot uti n̄kpọ Abasi ẹyeset. Ke akpanikọ, “ndinen owo ye mme anam ukwan̄n̄kpọ ẹyeset ke n̄kpa.”—Utom 24:15; John 5:28, 29.

24. Afo ekere didie aban̄a edidụn̄ ke Paradise isọn̄?

²⁴ Nso utịbe utịbe ini iso ke mbon oro ẹmade ndikpep n̄kpọ mban̄a Akwa Andibot nnyịn, Jehovah Abasi, nnyụn̄ nnam n̄kpọ esie ẹdinyene ntem! Paradise isọn̄ oro edide ke iso ke Jesus eketịn̄ aban̄a, ke ini enye ọkọn̄wọn̄ọde ọnọ anamidiọk oro ẹkekọn̄de ẹkpere enye ete: “Afo oyodu ye ami ke Paradise.” (Luke 23:43) Enen̄ede oyom nnyịn ikpep ekese iban̄a Jesus Christ, koro nnyịn idikeme ndibọ kpukpru edidiọn̄ emi ebe ke enye.

1. Ọwọrọetop akam ewe ke nnyịn idineme idahaemi?

ATA ediwak miliọn owo ke ererimbot ẹmehe ye akam oro ẹsiwakde ndikot Ete Nnyịn, m̀mê Akam Ọbọn̄. Ete Nnyịn m̀mê Akam Ọbọn̄ edi ọwọrọetop akam oro Jesus Christ ke idemesie akadade ọnọ uwụtn̄kpọ ke nte ẹkpebọn̄de akam. Enye edi akam oro enen̄erede enyene se ọwọrọde, ntre ndineme akpa eben̄e ita ke akam oro ayan̄wam fi ọfiọk n̄kpọ efen efen oro Bible enen̄erede ekpep.

2. Ewe n̄kpọ ita ẹsịne ke otu n̄kpọ oro Jesus ekekpepde mme mbet esie ndibọn̄ akam mben̄e?

² Ke ntọn̄ọ akam uwụtn̄kpọ emi, Jesus eketeme mbon oro ẹkekpan̄de utọn̄ ẹnọ enye ete: “Mbufo ẹnyene ndibọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’” (Matthew 6:9-13) Nso ke eben̄e ita emi ọwọrọ?

3. Nso ke oyom nnyịn ifiọk iban̄a Obio Ubọn̄ Abasi?

³ Nnyịn imekpekpep ekese iban̄a enyịn̄ Abasi, Jehovah. Imonyụn̄ ikpep ekese n̄ko iban̄a uduak Esie—se enye anamde ye se enye edinamde ọnọ ubonowo. Nte ededi, nso ke Jesus eketịn̄ aban̄a ke ini enye ọkọdọhọde nnyịn ibọn̄ akam ntem ite: “Yak obio ubọn̄ fo edi”? Nso idi Obio Ubọn̄ Abasi? Didie ke Obio Ubọn̄ Abasi ndidi edinam enyịn̄ Abasi asana? Nso ebuana ke Obio Ubọn̄ oro ndidi enyene ye edinam uduak Abasi?

SE OBIO UBỌN̄ ABASI EDIDE

4. Nso idi Obio Ubọn̄ Abasi, ndien anie edi Edidem esie?

⁴ Obio Ubọn̄ Abasi edi ukara oro Jehovah Abasi owụkde, enye onyụn̄ emek Edidem oro akarade. Anie edi Edidem Obio Ubọn̄ Abasi? Edi Jesus Christ. Jesus nte Edidem okpon akan kpukpru mme andikara emi ẹdide owo, ẹnyụn̄ ẹkot enye “Edidem mbon oro ẹkarade nte ndidem ye Ọbọn̄ mbon oro ẹkarade nte mbọn̄.” (1 Timothy 6:15) Enye enyene ukeme ndinam n̄kpọ enen̄ede ọfọn akan se andikara ekededi akpanamde, idem ọkpọkọm andikara oro ọfọn adan̄a didie.

5. Obio Ubọn̄ Abasi odu ke m̀mọ̀n̄ akara, ndien nso ke enye edikara?

⁵ Obio Ubọn̄ Abasi edidu ke m̀mọ̀n̄ akara? Ọfọn, Jesus odu ke m̀mọ̀n̄? Emeti ke ama ekpep nte ke ẹma ẹwot enye ke eto ndutụhọ, ndien ekem ẹnam enye eset. Esisịt ini ke oro ebede, enye ama ọnyọn̄ heaven. (Utom 2:33) Ntem, Obio Ubọn̄ Abasi odu ke heaven. Ntak edi oro Bible okotde enye “obio ubọn̄ heaven.” (2 Timothy 4:18) Okposụkedi Obio Ubọn̄ Abasi odude ke heaven, enye ayakara isọn̄.—Ediyarade 11:15.

6, 7. Nso inam Jesus edi n̄wọrọnda Edidem?

⁶ Nso inam Jesus edi n̄wọrọnda Edidem? N̄kpọ kiet edi nte ke enye idikpaha tutu amama. Ke emende Jesus odomo ye ndidem ẹdide owo, Bible okot enye, enye emi “ikpọn̄ . . . mîkemeke ndikpa, emi odụn̄de ke un̄wana eke owo mîkemeke ndisan̄a n̄kpere.” (1 Timothy 6:16) Emi ọwọrọ ke kpukpru nti n̄kpọ oro Jesus anamde ẹdidu ke nsinsi. Ke akpanikọ, enye ayanam ekese nti n̄kpọ ọnọ mme owo.

⁷ Kere ban̄a ntịn̄nnịm ikọ Bible emi aban̄ade Jesus: “Spirit Jehovah oyodoro enye ke idem, spirit eti ibuot ye asian, spirit item ye odudu, spirit ifiọk ye uten̄e Jehovah: ndien uten̄e Jehovah eyenem enye esịt: ndien enye idikpehe ikpe nte esede ke enyịn, idinyụn̄ ibiereke ikọ nte okopde ke utọn̄: edi eyekpe ikpe mme ubuene esịn ke edinen, onyụn̄ ebiere ikọ nte enende ọnọ sụn̄-sụn̄ mbio isọn̄.” (Isaiah 11:2-4) Mme ikọ oro ẹwụt ke Jesus edidi edinen Edidem oro atuade mme owo oro enye edikarade ke isọn̄, mbọm. Nte afo akpama ndinyene utọ andikara oro?

8. Mmanie ẹdikara ye Jesus?

⁸ Akpan n̄kpọ en̄wen oro aban̄ade Obio Ubọn̄ Abasi edi nte ke Jesus idikarake ikpọn̄. Enye eyenyene mbon oro ẹditienede enye ikara. Ke uwụtn̄kpọ, apostle Paul ọkọdọhọ Timothy ete: “Edieke nnyịn ikade iso iyọ, nnyịn iyakara n̄ko ye enye nte ndidem.” (2 Timothy 2:12) Ih, Paul, Timothy, ye mbon en̄wen oro ẹnamde akpanikọ, emi Abasi emekde ẹyekara ye Jesus ke Obio Ubọn̄ eke heaven. Owo ifan̄ ẹdikara ye Jesus?

9. Owo ifan̄ ẹdikara ye Jesus, ndien ini ewe ke Abasi ọkọtọn̄ọ ndimek mmọ?

⁹ Nte ẹkewụtde ke Ibuot 7 ke n̄wed emi, apostle John ama okụt ke n̄kukụt oro ẹkewụtde enye, ‘Eyenerọn̄ [Jesus Christ] nte adade ke Obot Zion [itie ubọn̄ esie ke heaven], owo tọsịn ikie ye aba-ye-inan̄ ẹnyụn̄ ẹda ye enye, emi ẹwetde enyịn̄ esie ye enyịn̄ Ete esie ke ọkpọiso mmọ.’ Mmanie ẹdi owo 144,000 emi? John ke idemesie asian nnyịn ete: “Mmọ emi ẹdi mbon emi ẹkade iso ẹtiene Eyenerọn̄ ẹka ke ọtọ eke enye akaka. Ẹkedep mmọ emi ẹsio ke otu ubonowo nte akpa mbun̄wụm ẹnọ Abasi ye Eyenerọn̄.” (Ediyarade 14:1, 4) Ih, mmọ ẹdi mme anam-akpanikọ mme anditiene Jesus Christ emi ẹmekde san̄asan̄a ndikara ye enye ke heaven. Ke ẹma ẹkenam mmọ ẹset ẹkedu uwem ke heaven, mmọ ẹyetiene Jesus ẹkara “isọn̄ nte ndidem.” (Ediyarade 5:10) Toto ke eyo mme apostle, Abasi ama emek mme anam-akpanikọ Christian man owo 144,000 ẹkpekem ibat.

10. Ntak emi Abasi ndinam ndutịm man Jesus ye owo 144,000 ẹkara ubonowo owụtde ima?

¹⁰ Ima anam Abasi anam ndutịm man Jesus ye owo 144,000 ẹkara ubonowo. Ke akpa itie, Jesus ọfiọk se ndidi owo nnyụn̄ n̄kụt ndutụhọ ọwọrọde. Paul ọkọdọhọ ke Jesus idịghe owo emi “mîkemeke nditiene nnyịn n̄kop mmemidem, edi edi owo emi ẹma ẹkedomo ẹse ke kpukpru usụn̄ nte nnyịn, edi emi mînyeneke idiọkn̄kpọ.” (Mme Hebrew 4:15; 5:8) Mbon oro ẹditienede enye ikara n̄ko ẹdi mme owo oro ẹkekụtde ndutụhọ ẹkenyụn̄ ẹsọn̄ọde ẹda ẹyọ. Ke adianade do, mmọ ẹma ẹn̄wana ye unana mfọnmma ẹnyụn̄ ẹyọ kpukpru orụk udọn̄ọ. Ke akpanikọ, mmọ ẹyefiọk mme mfịna oro mme owo ẹnyenede!

NSO KE OBIO UBỌN̄ ABASI EDINAM?

11. Ntak emi Jesus ọkọdọhọde ke mme mbet imọ ẹkpenyene ndibọn̄ akam nte ẹnam uduak Abasi ke heaven-e?

¹¹ Ke ini Jesus ọkọdọhọde ke mme mbet imọ ẹkpenyene ndibọn̄ akam mben̄e Obio Ubọn̄ Abasi, enye ama ọdọhọ n̄ko ke mmọ ẹkpenyene ndibọn̄ akam nte ẹnam uduak Abasi, “nte edide ke heaven, yak edi ke isọn̄ kpasụk ntre.” Abasi odu ke heaven, ndien mme anam-akpanikọ angel ẹnam uduak Abasi kpukpru ini ke heaven. Nte ededi, ke Ibuot 3 ke n̄wed emi, nnyịn ima ikpep ke idiọk angel kiet ama etre ndinam uduak Abasi onyụn̄ anam Adam ye Eve ẹnam idiọkn̄kpọ. Ke Ibuot 10, nnyịn iyokụt n̄kpọ efen efen oro Bible ekpepde aban̄a idiọk angel oro, emi nnyịn idiọn̄ọde nte Satan kpa Devil. Ẹma ẹyak Satan ye mme angel oro ẹketienede enye—emi ẹkotde mme demon—ẹdu ke heaven ke esisịt ini. Ntem, idịghe kpukpru mme angel ke heaven ẹkenam uduak Abasi ini oro. Edi oro ekenyene ndikpụhọde ke ini ukara Obio Ubọn̄ Abasi ọkọtọn̄ọde. Obufa Edidem oro ẹkedoride ke ebekpo, kpa Jesus Christ, ekenyene ndin̄wana ekọn̄ ye Satan.—Ediyarade 12:7-9.

12. Akpan n̄kpọntịbe iba ewe ke ẹtịn̄ ẹban̄a ke Ediyarade 12:10?

¹² Ntịn̄nnịm ikọ emi ama etịn̄ se ikenyenede nditịbe, ete: “N̄kop ọkpọsọn̄ uyo ke heaven ọdọhọde ete: ‘Ke emi edinyan̄a ye odudu ye obio ubọn̄ Abasi nnyịn ye odudu Christ esie ẹmedi, koro ẹsio [Satan] andidori nditọete nnyịn ikọ ẹduọk ke isọn̄, emi odoride mmọ ikọ uwemeyo ye okoneyo ke iso Abasi nnyịn!’” (Ediyarade 12:10) Ndi ama okụt ata akpan n̄kpọntịbe iba oro ẹtịn̄de ẹban̄a ke ufan̄ikọ Bible oro? Akpa, Jesus Christ ọtọn̄ọ ndikara ke Obio Ubọn̄ Abasi. Ọyọhọ iba, ẹsio Satan ke heaven ẹduọk ke isọn̄.

13. N̄kpọ etie didie ke heaven ke ẹma ẹkesio Satan ẹduọk?

¹³ Nso utịp ke n̄kpọntịbe iba oro ẹkama? Nnyịn ikot iban̄a se iketịbede ke heaven ite: “Ke ntak emi ẹdara, mbufo mme heaven ye mbufo emi ẹdụn̄de ke esịt!” (Ediyarade 12:12) Ih, mme anam-akpanikọ angel ke heaven ẹdara koro, ke emi ẹma ẹkesion̄o Satan ye mme demon esie ke heaven ẹduọn̄ọ ke isọn̄, kpukpru mme angel emi ẹdude ke heaven ẹnam akpanikọ ẹnọ Jehovah Abasi. Ata emem ye ifụre odu ke heaven. Ẹnam uduak Abasi idahaemi ke heaven.

14. Nso itịbe ke ntak oro ẹsiode Satan ẹduọk ke isọn̄?

¹⁴ Nte ededi, nso kaban̄a isọn̄? Bible ọdọhọ ete: “Mbọm isọn̄ ye inyan̄, koro Devil omosụhọde etiene mbufo, asan̄ade ye akwa iyatesịt, sia ọfiọkde ete ini imọ edi ibio.” (Ediyarade 12:12) Satan ayat esịt ke ntak oro ẹsiode enye ke heaven ẹduọk ke isọn̄ ye koro ini esie edide ibio. Isọn̄ odu ke nnanenyịn, m̀mê enyene “mbọm” ke ntak iyatesịt esie. Nnyịn iyekpep n̄kpọ efen efen iban̄a “mbọm” emi ke ibuot oro etienede. Ke emi ẹma ẹkesio Satan ẹduọk ke isọn̄, nnyịn imekeme ndibụp ite, Didie ke Obio Ubọn̄ oro ekeme ndinam ẹnam uduak Abasi mi ke isọn̄?

15. Nso idi uduak Abasi kaban̄a isọn̄?

¹⁵ Ọfọn, ti se idide uduak Abasi kaban̄a isọn̄. Afo ama ekpep aban̄a oro ke Ibuot 3. Abasi ama owụt ke Eden ke uduak imọ edi ndinam isọn̄ akabade edi Paradise oro ndinen ubonowo ẹdụn̄de ke nsinsi. Satan ama anam Adam ye Eve ẹnam idiọkn̄kpọ, ntre oro ama anam uduak Abasi kaban̄a isọn̄ ebịghi ndisu, edi emi ikokpụhọkede uduak oro. Jehovah osụk adaduak ke “nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ndien kpa se Obio Ubọn̄ Abasi edinamde edi oro. Ke nso usụn̄?

16, 17. Nso ke Daniel 2:44 anam nnyịn ifiọk iban̄a Obio Ubọn̄ Abasi?

¹⁶ Kere ban̄a ntịn̄nnịm ikọ oro ẹkụtde ke Daniel 2:44. Nnyịn ikot ite: “Ke eyo ndidem oro, Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.” Nso ke emi anam nnyịn ifiọk iban̄a Obio Ubọn̄ Abasi?

¹⁷ Akpa, enye anam nnyịn ifiọk ke ẹkenyene ndiwụk Obio Ubọn̄ Abasi “ke eyo ndidem oro,” m̀mê ke adan̄aemi mme obio ubọn̄ en̄wen ẹsụk ẹdude. Ọyọhọ iba, enye anam nnyịn ifiọk ke Obio Ubọn̄ oro edida ke nsinsi. Ukara efen idikanke enye m̀mê ndida itie esie. Ọyọhọ ita, nnyịn imedi idifiọk ke Obio Ubọn̄ Abasi ayan̄wana ekọn̄ ye mme obio ubọn̄ ererimbot emi. Obio Ubọn̄ Abasi ayakan. Ke akpatre, enye edidi n̄kukụre ukara oro edikarade ubonowo. Adan̄aoro ke mme owo ẹdinyene mfọnn̄kan ukara.

18. Ẹkot didie akpatre ekọn̄ oro Obio Ubọn̄ Abasi edin̄wanade ye mme ukara ererimbot?

¹⁸ Bible enyene ekese nditịn̄ mban̄a akpatre ekọn̄ oro Obio Ubọn̄ Abasi edin̄wanade ye mme ukara ererimbot emi. Ke uwụtn̄kpọ, enye ekpep ke nte utịt asan̄ade ekpere, ndiọi spirit ẹyesu nsu man ẹbian̄a “ndidem ofụri isọn̄.” Kaban̄a nso uduak? Man ‘ẹtan̄ mmọ [ndidem emi] ẹbok ọtọkiet ẹnọ ekọn̄ akwa usen Abasi Ata Ọkpọsọn̄.’ Ẹditan̄ ndidem isọn̄ ẹbọk ọtọkiet “ke ebiet emi ẹkotde ke usem Hebrew, Har–Magedon.” (Ediyarade 16:14, 16) Ke ntak se ẹtịn̄de ke ufan̄ikọ iba oro, ẹkot akpatre ekọn̄ oro Obio Ubọn̄ Abasi edin̄wanade ye mme ukara owo ekọn̄ Har–Magedon, m̀mê Armageddon.

19, 20. Nso inam owo mînamke uduak Abasi ke isọn̄ idahaemi?

¹⁹ Nso ke Obio Ubọn̄ Abasi edida Armageddon anam? Fiak kere se idide uduak Abasi kaban̄a isọn̄. Jehovah Abasi akaduak ete ndinen mfọnmma ubonowo ẹdụn̄ ẹyọhọ isọn̄, ẹnyụn̄ ẹnam n̄kpọ ẹnọ imọ ke Paradise. Nso inam oro okûtịbe idahaemi? Akpa, nnyịn idi mme anamidiọk, imesidọn̄ọ inyụn̄ ikpa. Nte ededi, nnyịn ima ikpep ke Ibuot 5 nte ke Jesus akakpa ọnọ nnyịn man ikeme ndidu uwem ke nsinsi. Eyedi emeti ikọ oro ẹwetde ke Gospel John mi: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:16.

²⁰ Mfịna en̄wen edi ke ediwak owo ẹnam ndiọi n̄kpọ. Mmọ ẹsu nsu, ẹyịp inọ, ẹnyụn̄ ẹnam oburobụt ido. Mmọ iyomke ndinam uduak Abasi. Ẹyeda ekọn̄ Abasi oro ẹkotde Armageddon ẹsobo mbon oro ẹnamde ndiọi n̄kpọ. (Psalm 37:10) Ntak en̄wen oro owo mînamke uduak Abasi edi koro mme ukara isịnke udọn̄ inọ mme owo ndinam oro. Ediwak ukara inyeneke ukeme, ẹtie ibak ibak, ẹnyụn̄ ẹbiara. Bible etịn̄ in̄wan̄-in̄wan̄ ete: “Owo [akara] owo tutu ọnọ enye unan.”—Ecclesiastes 8:9, NW.

21. Didie ke Obio Ubọn̄ edinam ẹnam uduak Abasi ke isọn̄?

²¹ Ke Armageddon ama akan̄wana, ukara kiet kpọt edikara ubonowo, oro edi, Obio Ubọn̄ Abasi. Obio Ubọn̄ oro ayanam uduak Abasi onyụn̄ ada utịbe utịbe edidiọn̄ ọsọk ubonowo. Ke uwụtn̄kpọ, enye oyosio Satan ye mme demon esie efep. (Ediyarade 20:1-3) Ẹyeda odudu uwa Jesus ẹnam n̄kpọ mbak mbon oro ẹnamde akpanikọ ẹdidọn̄ọ ẹnyụn̄ ẹkpan̄a. Utu ke oro, mmọ ẹyedu uwem ke nsinsi ke ini ukara Obio Ubọn̄. (Ediyarade 22:1-3) Ẹyenam isọn̄ akabade edi Paradise. Ntem, Obio Ubọn̄ oro ayanam ẹnam uduak Abasi ke isọn̄ oyonyụn̄ anam enyịn̄ Abasi asana. Nso ke emi ọwọrọ? Emi ọwọrọ ke kpukpru mme owo oro ẹdidude uwem ke ini ukara Obio Ubọn̄ Abasi ẹyekpono enyịn̄ Jehovah.

INI EWE KE OBIO UBỌN̄ ABASI EDINAM ẸNAM UDUAK ABASI KE ISỌN̄?

22. Nnyịn isan̄a didie ifiọk ke Obio Ubọn̄ Abasi ikedịghe ke ini Jesus okodude ke isọn̄ m̀mê ke ndondo oro enye ekesetde ke n̄kpa?

²² Ke ini Jesus ọkọdọhọde mme anditiene enye ẹbọn̄ akam ntem ẹte, “Yak obio ubọn̄ fo edi,” ama ana in̄wan̄-in̄wan̄ nte ke Obio Ubọn̄ oro ikedịghe ini oro. Ndi Obio Ubọn̄ oro ama edi ke ini Jesus ọkọdọkde ke heaven? Baba-o, koro Peter ye Paul ẹkedọhọ ke ntịn̄nnịm ikọ Psalm 110:1 oro etienede mi ama osu Jesus ke idem ke ini enye ekesetde ke n̄kpa: “Jehovah ọdọhọ ye Ọbọn̄ mi, ete, ‘Tie mi ke ubọk nnasia, tutu nda mme asua fo nnịm fi ke udoriukot.’” (Utom 2:32-34; Mme Hebrew 10:12, 13) Akana ẹtetie ẹbet Obio Ubọn̄ Abasi.

23. (a) Ini ewe ke Obio Ubọn̄ Abasi ọkọtọn̄ọ ndikara? (b) Nso ke idineme ke ibuot oro etienede?

²³ Ẹkenyene nditie mbet Obio Ubọn̄ Abasi ebịghi adan̄a didie? Ke ọyọhọ isua ikie 19, nditọ ukpepn̄kpọ Bible oro ẹkenyenede esịt akpanikọ ẹma ẹbat ini ẹnyụn̄ ẹdikụt ke ini oro ẹtiede ẹbet Obio Ubọn̄ editre ke 1914. (Ke oyomde ntọt aban̄ade usenọfiọn̄ emi, se Se Ẹwetde Ẹdian, page 215-218.) Mme n̄kpọ oro ẹketịbede ke ererimbot ọtọn̄ọde ke 1914 ẹwụt ke nditọ ukpepn̄kpọ Bible oro ẹkenyenede esịt akpanikọ do ẹma ẹnen ke ubatini mmọ. Mme ntịn̄nnịm ikọ Bible emi ẹsude ẹwụt ke Christ akakabade edi Edidem ke 1914, ye nte ke isua oro ke Obio Ubọn̄ Abasi eke heaven ọkọtọn̄ọ ndikara. Ntem, nnyịn idu uwem ke ‘ibio ini’ oro osụhọde ọnọ Satan. (Ediyarade 12:12; Psalm 110:2) Nnyịn imekeme n̄ko ndisọn̄ọ ntịn̄ nte ke ibịghike Obio Ubọn̄ Abasi ayanam ẹnam uduak Abasi ke isọn̄. Nte emi edi utịbe mbụk ọnọ fi? Nte afo emenịm emi ke akpanikọ? Ibuot oro etienede ayan̄wam fi okụt ke se Bible enen̄erede ekpep edi emi.