N̄kpọ Editie Didie ye Afo ke Iso Itie Ikpe?

“Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie.”—MATTHEW 25:31.

1-3. Nso ntak ke nnyịn inyene ndidot enyịn kaban̄a unenikpe?

‘UBIOMIKPE M̀MÊ UTEBEIKPE?’ Idem esikpa ediwak owo nte mmọ ẹkopde mme etop ẹban̄ade ndusụk ikpe ke esopikpe. Mme ebiereikpe ye mbon ikpe ẹkeme ndidomo ndinam akpanikọ, edi nte unenikpe esidu kpukpru ini? Nte akanam ukopke uban̄a ukwan̄ikpe ye editụhọ ikpe ke edinam ukpeikpe? Nte nnyịn ikụtde ke n̄ke Jesus oro odude ke Luke 18:1-8, utọ ukwan̄ikpe oro idịghe obufa n̄kpọ.

² Se ededi ifiọk oro afo enyenede aban̄a ukwan̄ikpe eke owo, tịmfiọk akpatre ikọ Jesus emi: “Nte Abasi idinyụn̄ isioho usiene inọ ndimek ikọt Esie, ẹmi ẹsemede ẹnọ Enye uwemeyo ye okoneyo . . . ? Ndọhọ mbufo nte, Enye eyewara osio usiene ọnọ mmọ. Edi ke adan̄aemi Eyen Owo edidide, nte Enye eyekụt mbuọtidem ke isọn̄?”

³ Ih, Jehovah eyekụt ete ke mme asan̄autom esie ẹnyene unenikpe ke akpatre. N̄ko, Jesus etiene enyene ebuana akpan akpan idahaemi sia nnyịn idude uwem ke “ukperedem ini” eke idiọk editịm n̄kpọ emi odude kemi. Ibịghike Jehovah eyeda okopodudu Eyen esie ndisio idiọkido ke isọn̄ mfep. (2 Timothy 3:1; 2 Thessalonica 1:7, 8; Ediyarade 19:11-16) Nnyịn imekeme ndida n̄kụt udeme oro Jesus enyenede ito kiet ke otu mme akpatre n̄ke esie, emi ẹsiwakde ndikot n̄ke erọn̄ ye ebot.

4. Didie ke ini edisu eke n̄ke erọn̄ ye ebot akan̄wan̄a nnyịn, edi ntak emi idinọde n̄ke oro ntịn̄enyịn idahaemi? (Mme N̄ke 4:18)

⁴ Akan̄wan̄a nnyịn ke anyanini nte ke n̄ke oro etịn̄ aban̄a Jesus nditie nte Edidem ke 1914 nnyụn̄ n̄kpe ikpe toto ke ini oro—ọnọde mbon oro ẹbietde erọn̄ nsinsi uwem, ọnọde mme ebot nsinsi n̄kpa. Edi edifiak n̄kere mban̄a n̄ke oro anyan ubọk owụt ifiọk oro enen̄erede mi kaban̄a ini edisu esie ye se enye etịn̄de aban̄a. Edinen̄ede emi afiak ọsọn̄ọ nte utom ukwọrọikọ nnyịn edide akpan n̄kpọ ye ufọn emi odude ke mme owo ndinam n̄kpọ mban̄a. Man okụt isọn̄ odude kaban̄a ntotụn̄ọ ifiọk emi ẹnyenede ẹban̄a n̄ke emi, ẹyak nnyịn ikere iban̄a se Bible owụtde aban̄a Jehovah ye Jesus, nte Ndidem ye mme Ebiereikpe.

Jehovah nte Akakan Ebiereikpe

5, 6. Ntak emi odotde ndise Jehovah nte Edidem ye Ebiereikpe?

⁵ Jehovah akara ekondo onyụn̄ enyene odudu ke idem kpukpru edibotn̄kpọ. Ke mînyeneke ntọn̄ọ inyụn̄ inyeneke utịt, enye edi “Edidem emi akarade ke kpukpru eyo.” (1 Timothy 1:17; Psalm 90:2, 4; Ediyarade 15:3) Enye enyene odudu ndiwụk mme ewụhọ, m̀mê ibet, nnyụn̄ n̄kụt ete ke ẹnam mmọemi. Edi odudu esie esịne edidi Ebiereikpe. Isaiah 33:22 ọdọhọ ete: “Jehovah [edi] ebiereikpe nnyịn, Jehovah edi owụk-ewụhọ nnyịn, Jehovah edi edidem nnyịn, enye eyenyan̄a nnyịn.”

⁶ Mme asan̄autom Abasi ke anyanini ẹdiọn̄ọ Jehovah nte Ebiereikpe emi esibierede mme ikpe. Ke uwụtn̄kpọ, ke “Ebiereikpe ofụri ererimbot” ama okodụn̄ọde uyarade odude aban̄a idiọkido Sodom ye Gomorrah, enye ama ebiere ete ke mme andidụn̄ do ẹdot nsobo onyụn̄ okụt ete ke ẹnam edinen ubiereikpe oro. (Genesis 18:20-33; Job 34:10-12) Emi ekpedi n̄kpọ nsọn̄ọ didie ntem ọnọ nnyịn ndifiọk nte ke Jehovah edi edinen Ebiereikpe emi ekemede ndinam ubiereikpe esie kpukpru ini!

7. Didie ke Jehovah akanam n̄kpọ nte Ebiereikpe ke anamde n̄kpọ ye Israel?

⁷ Ke Israel eset, ndusụk ini Jehovah ama esinọ ubiereikpe nnennen nnennen. Nte afo ukpukopke ndọn̄esịt adan̄aoro ndifiọk nte ke mfọnmma Ebiereikpe ekebiere mme n̄kpọ? (Leviticus 24:10-16; Numbers 15:32-36; 27:1-11) Abasi n̄ko ama ọnọ “mbet” oro ẹkefọnde ke kpukpru usụn̄ nte mme idaha ndida mbiere ikpe. (Leviticus 25:18, 19; Nehemiah 9:13; Psalm 19:9, 10; 119:7, 75, 164; 147:19, 20) Enye edi “Ebiereikpe ofụri ekondo,” ntre otụk kpukpru nnyịn.—Mme Hebrew 12:23.

8. Nso n̄kukụt emi enyenede ebuana ke Daniel okokụt?

⁸ Nnyịn imenyene ikọ ntiense otode “andikokụt” n̄kpọ emi. Ẹma ẹwụt prọfet Daniel n̄kukụt aban̄ade ndiọi unam ẹmi ẹkedade ẹban̄a mme ukara ye mme obio ndidem. (Daniel 7:1-8, 17) Enye ama adian do ete: “Ebekpo ẹdiọhọ, Andisọn̄ọ usen onyụn̄ etie, edisịnen̄kpọ esie edi afia nte snow.” (Daniel 7:9) Tịmfiọk ete ke Daniel okokụt mme ebekpo “Andisọn̄ọ usen [Jehovah] onyụn̄ etie.” Bụp idemfo ete, ‘Nte Daniel mi okokụt Abasi nte akabade edi Edidem?’

9. ‘Editie ke ebekpo’ ọwọrọ nso ke usụn̄ kiet? Nọ mme uwụtn̄kpọ.

⁹ Ọfọn, ke ini nnyịn ikotde ite ke owo “etie” ke ebekpo, nnyịn imekeme ndikere mban̄a enye ndikabade ndi edidem, koro Bible ndusụk ini esida mme utọ ikọ ntre. Ke uwụtn̄kpọ: “Adan̄aemi [Zimri] akadade ubọn̄, onyụn̄ etiede ke ebekpo esie, enye . . .” (1 Ndidem 16:11; 2 Ndidem 10:30; 15:12; Jeremiah 33:17) Prọfesi aban̄ade Messiah ọkọdọhọ ete: “Enye eyetie ke ebekpo esie, onyụn̄ akara.” Ntem, ‘nditie ke ebekpo’ ekeme ndiwọrọ ndikabade ndi Edidem. (Zechariah 6:12, 13) Ẹtịn̄ ẹban̄a Jehovah nte Edidem emi etiede ke ebekpo. (1 Ndidem 22:19; Isaiah 6:1; Ediyarade 4:1-3) Enye edi “Edidem emi akarade ke kpukpru eyo.” Edi, nte enye ọkọsọn̄ọde etịn̄ aban̄a obufa ikpehe itie edikara, ẹkeme ndidọhọ ke enye akabade edi Edidem, nte n̄kpọ eke enye etiede ke ebekpo obufa.—1 Chronicles 16:1, 31; Isaiah 52:7; Ediyarade 11:15-17; 15:3; 19:1, 2, 6.

10. Nso ikedi akpan utom ndidem Israel? Nam an̄wan̄a.

¹⁰ Edi akpan n̄kpọ edi emi: Akpan utom eke ndidem eset ekedi edikop mme ikpe nnyụn̄ nnọ mme ubiereikpe. (Mme N̄ke 20:8; 29:14) Ti ọniọn̄ ọniọn̄ ubiereikpe Solomon ke ini iban iba ẹkenyan̄ade eyen kiet. (1 Ndidem 3:16-28; 2 Chronicles 9:8) Kiet ke otu ufọk ukara esie ekedi “etehe ebekpo eke edikpede ikpe do,” emi n̄ko ẹkekotde “etehe ikpe.” (1 Ndidem 7:7) Ẹketịn̄ ẹban̄a Jerusalem nte ebiet emi “itie ikpe ẹdiọhọde.” (Psalm 122:5) Nte an̄wan̄ade, ‘nditie ke ebekpo’ ekeme n̄ko ndiwọrọ ndinyene odudu ubiereikpe.—Exodus 18:13; Mme N̄ke 20:8.

11, 12. (a) Nso ke ọwọrọ Jehovah nditie, emi ẹtịn̄de ẹban̄a ke Daniel ibuot 7? (b) Didie ke mme itien̄wed eken ẹsọn̄ọ nte Jehovah etiede ndikpe ikpe?

¹¹ Idahaemi ẹyak nnyịn ifiak ibịne n̄kpọntịbe emi Daniel okokụtde ‘Andisọn̄ọ usen etiede.’ Daniel 7:10 adian do ete: “Ẹnịm ikpe, ẹnyụn̄ ẹkụbọde n̄wed.” Ih, Andisọn̄ọ usen eketie ndibiere ikpe kaban̄a ukara ererimbot nnyụn̄ mbiere ikpe nte ke Eyen owo odot ndikara. (Daniel 7:13, 14) Ekem nnyịn ikot ite ke “Andisọn̄ọ usen edi, ndien ẹda ikpe ẹnọ edisana ikọt Ata Edikon̄,” kpa mbon ẹmi ẹbierede ikpe ke ẹdot ndikara ye Eyen owo. (Daniel 7:22) Ke akpatre “ẹyenịm ikpe” ẹnyụn̄ ẹbiom akpatre odudu ukara ererimbot ikpe.—Daniel 7:26.a

¹² Mmọdo, Daniel ndikụt Abasi ‘etiede ke ebekpo’ ọkọwọrọ Enye ndidi ndibiere ikpe. Ke mbemiso David ama ọkwọ ete: “Afo [Jehovah ama ekpe] ikpe mi ye ikọ mi; afo etie ke ebekpo ekpe nte enende.” (Psalm 9:4, 7) Ndien Joel ekewet ete: “Yak mme idụt ẹdemede ẹnyụn̄ ẹdọk ẹdi ke ebeden̄ Jehoshaphat: koro [ami Jehovah] nyetie do n̄kpe ikpe kpukpru mme idụt.” (Joel 3:12; men Isaiah 16:5 domo.) Jesus ye Paul ẹkedu ke mme itie ukpe ikpe emi owo eketiede okop ikpe onyụn̄ ọnọde ubiereikpe.b—John 19:12-16; Utom 23:3; 25:6.

Itie Jesus

13, 14. (a) Nso nsọn̄ọ ke ikọt Abasi ẹkenyene nte ke Jesus eyekabade edi Edidem? (b) Ini ewe ke Jesus eketie ke ebekpo esie, ndien ke nso usụn̄ifiọk ke enye akakara ọtọn̄ọde ke 33 E.N. akaiso?

¹³ Jehovah edi Edidem ye Ebiereikpe. Nso kaban̄a Jesus? Angel emi ọkọtọtde emana esie ọkọdọhọ ete: “Jehovah Abasi eyenyụn̄ ọnọ Enye ebekpo ete Esie David . . . Ubọn̄ Esie idinyụn̄ ikụreke.” (Luke 1:32, 33) Jesus eyedi nsinsi adiakpa itie edidem David. (2 Samuel 7:12-16) Enye eyetie ke heaven akara, koro David ọkọdọhọ ete: “Jehovah ọdọhọ ye Ọbọn̄ mi, ete, ‘Tie mi ke ubọk nnasia, tutu nda mme asua fo nnịm fi ke udorukot.’ Jehovah eyetie ke Zion ọnọ esan̄ odudu fo ẹsọk fi: da ubọn̄ ke otu mme asua fo.”—Psalm 110:1-4.

¹⁴ Emi ekpedi ini ewe? Jesus ikakarake nte Edidem ke ini ekedide owo. (John 18:33-37) Ke 33 E.N., enye ama akpa, eset ke n̄kpa, onyụn̄ ọdọk ke enyọn̄. Mme Hebrew 10:12 ọdọhọ ete: “Oku emi, ke ini Enye ama akawa uwa kiet aban̄a mme idiọkn̄kpọ, osụhọde etetie ke ubọk nnasia Abasi ke nsinsi.” Nso odudu ke Jesus ekenyene? “[Abasi akanam] Enye etie ke ubọk nnasia Esie ke mme itie heaven, okon̄ akan kpukpru mme andikara ye mme enyene-nsọn̄-uyo ye mme enyene-odudu ye mme enyene-ubọn̄, . . . onyụn̄ ọnọ Enye ete edi Ibuot kpukpru n̄kpọ, ọnọ ufọn ufọk Abasi.” (Ephesus 1:20-22) Sia Jesus ekenyenede odudu ubọn̄ ke idem mme Christian ini oro, Paul ama ekeme ndiwet nte ke Jehovah “[ama osio] nnyịn ke odudu ekịm, esịn ke Obio Ubọn̄ Eyen Ima Esie.”—Colossae 1:13; 3:1.

15, 16. (a) Ntak emi nnyịn idọhọde ite ke Jesus ikakabakede idi Edidem Obio Ubọn̄ Abasi ke 33 E.N.? (b) Ini ewe ke Jesus ọkọtọn̄ọ ndikara ke Obio Ubọn̄ Abasi?

¹⁵ Nte ededi, ke ini oro, Jesus ikanamke n̄kpọ nte Edidem ye Ebiereikpe inọ mme idụt. Enye eketie adiana Abasi, ebetde ini ndinam n̄kpọ nte Edidem Obio Ubọn̄ Abasi. Paul ama ewet aban̄a enye ete: “Akananam Enye ọdọhọ angel ewe ete, Tie ke ubọk nnasia Mi, tutu nnam mme asua Fo ẹkabade ẹdi udorukot Fo?”—Mme Hebrew 1:13.

¹⁶ Mme Ntiense Jehovah ẹmịn̄ ekese uyarade nte ke ikpehe ini oro Jesus ekebetde okokụre ke 1914, ke ini enye akakabarede edi andikara Obio Ubọn̄ Abasi ke mme heaven oro enyịn mîkwe. Ediyarade 11:15, 18 ọdọhọ ete: “Obio Ubọn̄ ererimbot emi amakabade edi Obio Ubọn̄ Ọbọn̄ nnyịn ye Christ Esie. Enye eyenyụn̄ ada ubọn̄ ke nsinsi nsinsi.” “Mme idụt ẹkeyat esịt ndien iyatesịt Fo ama edi.” Ih, mme idụt ẹma ẹyat esịt ye kiet eken ke ini Ekọn̄ Ererimbot I. (Luke 21:24) Mme ekọn̄, unyekisọn̄, udọn̄ọ, unana udia, ye mme mbiet n̄kpọ ntre, ẹmi nnyịn ikụtde toto ke 1914 ẹsọn̄ọ nte ke Jesus ke akara idahaemi ke Obio Ubọn̄ Abasi, ndien nte ke ata utịt ererimbot emekpere.—Matthew 24:3-14.

17. Mme ewe akpan n̄kpọ ke nnyịn inam an̄wan̄a kan̄a?

¹⁷ Ke ndifiak ndụn̄ọde ibio ibio: Ẹkeme ndidọhọ ke Abasi etie ke ebekpo nte Edidem, edi ke usụn̄ifiọk en̄wen enye ekeme nditie ke ebekpo esie ndikpe ikpe. Ke 33 E.N., Jesus ama etie ke ubọk nnasia Abasi, ndien enye edi Edidem Obio Ubọn̄ idahaemi. Edi nte Jesus, emi akarade idahaemi nte Edidem, anam n̄kpọ n̄ko nte Ebiereikpe? Ndien ntak emi ekpebehede nnyịn, akpan akpan ke ini emi?

18. Nso uyarade odu nte ke Jesus eyedi Ebiereikpe n̄ko?

¹⁸ Jehovah, emi enyenede unen ndimek mme ebiereikpe, ekemek Jesus nte Ebiereikpe oro osịmde mme n̄kpọ oro Enye oyomde. Jesus ama owụt emi ke ini eketịn̄de aban̄a mme owo ndikabade ndu uwem ke n̄kan̄ eke spirit: “Ete inyụn̄ ikpehe ikpe baba owo kiet, edi akayak kpukpru edibiere ikpe esịn Eyen ke ubọk.” (John 5:22) Edi, utom ubiereikpe Jesus aka anyan akan utọ edibiere ikpe oro, koro enye edi ebiereikpe ọnọ mme oduuwem ye mme akpan̄kpa. (Utom 10:42; 2 Timothy 4:1) Paul ama ọdọhọ ini kiet ete: “[Abasi] omonịm usen eke Enye edikpede ikpe ọnọ ererimbot ke edinen ido, ke ubọk Owo [Jesus] emi Enye ekemekde; Enye onyụn̄ ada edinam emi Enye anamde Owo oro eset ke n̄kpa ayarade owụt kpukpru owo ete edidi ntem.”—Utom 17:31; Psalm 72:2-7.

19. Ntak enende nditịn̄ mban̄a Jesus nte etiede nte Ebiereikpe?

¹⁹ Ntem nte enen nnyịn ndibiere nte ke Jesus etie ke ebekpo ubọn̄ ndinam utom san̄asan̄a nte Ebiereikpe? Ih. Jesus ama asian mme apostle ẹte: “Ke ini ẹdinamde n̄kpọ ẹkabade ẹdi mbufa, ke adan̄aemi Eyen Owo editiede ke ebekpo ubọn̄ Esie, mbufo, ẹmi ẹketienede Mi, ẹyenyụn̄ ẹtie ke ebekpo duopeba, ẹkpe ikpe ẹnọ esien Israel duopeba.” (Matthew 19:28, sịghisịghi ubọkn̄wed edi eke nnyịn.) Okposụkedi Jesus edide Edidem Obio Ubọn̄ idahaemi, n̄kaiso edinam esie oro ẹsiakde ke Matthew 19:28 eyesịne editie ke ebekpo mbiere ikpe ke Tọsịn Isua. Ke ini oro enye eyekpe ikpe ọnọ ofụri ubonowo, nti owo ye mme idiọkowo. (Utom 24:15) Ọfọn ndinyene emi ke ekikere nte nnyịn iwọn̄ọrede ntịn̄enyịn nnyịn ika kiet ke otu n̄ke Jesus oro enyenede ebuana ke ini nnyịn ye ke uwem nnyịn.

Nso ke N̄ke Oro Ọdọhọ?

20, 21. Nso ke mme apostle Jesus ẹkebụp oro enyenede ebuana ye eyo nnyịn, adade okosụn̄ọ ke ewe mbụme?

²⁰ Esisịt ini mbemiso Jesus akpade, mme apostle esie ẹma ẹbụp enye ete: “Ini [ewe ke] mme n̄kpọ ẹmi [ẹdidi]; nso idinyụn̄ idi idiọn̄ọ edidi Fo, ye eke akpatre ini eyo emi?” (Matthew 24:3) Jesus ama ebemiso etịn̄ aban̄a mme akpan n̄kpọntịbe ke isọn̄ mbemiso ‘utịt edide.’ Esisịt ini mbemiso utịt oro, mme idụt “[ẹyekụt] Eyen Owo odorode ke obubịt enyọn̄ edi ye odudu ye akwa ubọn̄.”—Matthew 24:14, 29, 30.

²¹ Didie, ndien, ke n̄kpọ editie ye mme owo ke mme idụt oro ke ini Eyen Owo edide ke ubọn̄ esie? Ẹyak nnyịn idụn̄ọde emi ke n̄ke erọn̄ ye ebot, emi ọtọn̄ọde ye mme ikọ ẹmi: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie.”—Matthew 25:31, 32.

22, 23. Ewe akpan n̄kpọ ẹwụt nte ke n̄ke erọn̄ ye ebot ikọtọn̄ọke edisu esie ke 1914?

²² Nte n̄ke emi enyene n̄kpọ ndinam ke ini Jesus eketiede ke odudu ubọn̄ ke 1914, nte akan̄wan̄ade nnyịn ke anyanini? Ọfọn, Matthew 25:34 etịn̄ aban̄a enye nte Edidem, ntre n̄ke oro nte owụtde ifiọk enyene n̄kpọ ndinam toto Jesus akakabade edi Edidem ke 1914. Edi nso ikpe ke enye ekekpe esisịt ini ke oro ebede? Ikedịghe edikpe ikpe nnọ “kpukpru mme idụt.” Utu ke oro, enye ọkọwọn̄ọde ntịn̄enyịn ọnọ mbon ẹmi ẹdọhọde ke idi “ufọk Abasi.” (1 Peter 4:17) Nte ekemde ye Malachi 3:1-3, Jesus, nte angel ediomi Jehovah, ama asan̄a ye ubiereikpe ese mme Christian oro ẹyetde aran ẹmi ẹsụhọde ke isọn̄. Ekedi ini n̄ko ndibiere ikpe nnọ Christendom, emi ke abian̄a ọkọdọhọde ke idi “ufọk Abasi.”c (Ediyarade 17:1, 2; 18:4-8) Edi n̄kpọ ndomokiet idụhe ndiwụt nte ke ini oro, m̀mê toto ke ini oro, Jesus ama etie ndinọ mme owo eke kpukpru mme idụt akpatre ubiereikpe nte ẹdide erọn̄ m̀mê ebot.

²³ Edieke nnyịn idụn̄ọrede edinam Jesus ke n̄ke oro, nnyịn ikụt enye ke akpatre ekpede ikpe ọnọ kpukpru mme idụt. N̄ke oro iwụtke ite ke ikpe oro eyekaiso ke ufan̄ ini emi esịnede ediwak isua, nte n̄kpọ eke ẹdọhọde ke ẹbiere ikpe kpukpru owo ẹmi ẹkpan̄ade ke ufan̄ ediwak isua ẹmi ẹbede nte ẹdotde nsinsi n̄kpa m̀mê nsinsi uwem. Etie nte n̄wakn̄kan mbon ẹmi ẹkpan̄ade ke mme iduọk isua eke ndondo ẹmi ẹka ikpîkpu udi ubonowo. (Ediyarade 6:8; 20:13) N̄ke oro, nte ededi, owụt ini oro Jesus ekpede ikpe ọnọ mme owo eke “kpukpru mme idụt” ẹmi ẹdude uwem ini oro ẹnyụn̄ ẹsakde iso ẹse ubiereikpe esie.

24. Ini ewe ke n̄ke erọn̄ ye ebot edisu?

²⁴ Ke nditịn̄ ke usụn̄ en̄wen, n̄ke oro anyan ubọk owụt ini iso emi Eyen owo edidide ke ubọn̄ esie. Enye eyetie ndikpe ikpe nnọ mme owo ẹdude uwem ini oro. Ubiereikpe esie edikọn̄ọ ke se mmọ ke idemmọ ẹwụtde nte idide. Ke ini oro ‘ukpụhọde oro odude ke ufọt eti owo ye idiọk owo’ eyena in̄wan̄în̄wan̄. (Malachi 3:18) Ataata edinọ ubiereikpe ye edikụt nte ẹnamde ubiereikpe edida itie ke esisịt ini. Jesus eyenọ ndinen ubiere ọkọn̄ọde ke se ẹkụtde ẹban̄a owo kiet kiet.—Se n̄ko 2 Corinth 5:10.

25. Nso ke Matthew 25:31 owụt ke nditịn̄ mban̄a Eyen owo nte etiede ke ebekpo ubọn̄?

²⁵ Emi, ndien, ọwọrọ nte ke Jesus ‘nditie ke ebekpo ubọn̄’ ndibiere ikpe, emi ẹtịn̄de ke Matthew 25:31, enyene n̄kpọ ndinam ye ini iso ke ini okopodudu Edidem emi edisụhọrede etie ndinọ mme idụt ubiereikpe nnyụn̄ n̄kụt nte ke ẹnam ubiereikpe oro. Ih, n̄kpọntịbe ubiereikpe oro abuanade Jesus ke Matthew 25:31-33, 46 edi ukem ye n̄kpọntịbe oro ke Daniel ibuot 7, emi Edidem oro akarade, kpa Andisọn̄ọ Usen, eketiede ndinam utom esie nte Ebiereikpe.

26. Nso obufa edinam an̄wan̄a kaban̄a n̄ke oro ana in̄wan̄în̄wan̄?

²⁶ Ndifiọk n̄ke erọn̄ ye ebot ke usụn̄ emi owụt nte ke edibiere ikpe nnọ erọn̄ ye ebot edi ke ini iso. Enye edida itie ke “ukụt” oro ẹsiakde ke Matthew 24:29, 30 ama akada itie ndien Eyen owo ‘edi ke ubọn̄ esie.’ (Men Mark 13:24-26 domo.) Ekem, ye ofụri idiọk editịm n̄kpọ emi osịmde utịt esie, Jesus eyenịm ikpe onyụn̄ ebiere ikpe onyụn̄ okụt ete ẹnam ubiereikpe.—John 5:30; 2 Thessalonica 1:7-10.

27. Nnyịn ikpenyene udọn̄ ndifiọk nso kaban̄a akpatre n̄ke Jesus?

²⁷ Emi anam ifiọk oro nnyịn inyenede iban̄a ini edisu eke n̄ke Jesus emi an̄wan̄a, emi owụtde ini emi ẹdibierede ikpe ẹnọ erọn̄ ye ebot. Edi didie ke emi otụk nnyịn ẹmi ikwọrọde eti mbụk Obio Ubọn̄ ifịk ifịk? (Matthew 24:14) Ndi enye anam utom nnyịn edi se mîtịmke idi akpan n̄kpọ, mîdịghe ndi enye anam mbiomo nnyịn odobi akan? Ẹyak nnyịn ise nte emi otụkde nnyịn ke ibuotikọ oro etienede.

Nso Ini Iso Idu Inọ Erọn̄ ye Ebot?

“Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot.”—MATTHEW 25:32.

1, 2. Ntak emi nnyịn ikpenyenede udọn̄ ke n̄ke erọn̄ ye ebot?

JESUS CHRIST ke akpanikọ ekedi akakan Andikpep ke isọn̄. (John 7:46) Kiet ke otu usụn̄ unọ ukpep esie ekedi edida mme n̄ke, m̀mê mme uwụtn̄kpọ. (Matthew 13:34, 35) Mmọemi ẹkedi mmemmem edi kpa ye oro ẹkop odudu ke ndinam ẹdiọn̄ọ mme ntotụn̄ọ akpanikọ eke spirit ye eke prọfesi.

² Ke n̄ke erọn̄ ye ebot, Jesus ama anyan ubọk owụt ini oro enye edinamde n̄kpọ ke san̄asan̄a itieutom: “Ke ini Eyen Owo edidide ke ubọn̄ Esie, asan̄a ye . . .” (Matthew 25:31) Nnyịn ikpenyene ndinyene udọn̄ ke emi koro enye edide uwụtn̄kpọ emi Jesus adade eberi ibọrọ mbụme oro: “Nso idinyụn̄ idi idiọn̄ọ edidi Fo, ye eke akpatre ini eyo emi?” (Matthew 24:3) Edi nso ke emi ọwọrọ ọnọ nnyịn?

3. Ntọn̄ọ ntọn̄ọ ke nneme esie, nso ke Jesus ọkọdọhọ nte edidade itie ke ndondo oro akwa ukụt ọtọn̄ọde?

³ Jesus ama ebemiso etịn̄ mme n̄wọrọnda n̄kpọntịbe ndidi ke akwa ukụt “ama ekebe,” kpa mme n̄kpọntịbe emi nnyịn ibetde. Enye ọkọdọhọ ete ke adan̄aoro “idiọn̄ọ Eyen Owo” eyewụt idem. Emi eyetịm otụk “kpukpru mme idụt isọn̄” ẹmi “[ẹdikụtde] Eyen Owo odorode ke obubịt enyọn̄ edi ye odudu ye akwa ubọn̄.” Eyen owo edisan̄a ye “mme angel Esie.” (Matthew 24:21, 29-31)a Nso kaban̄a n̄ke erọn̄ ye ebot? Mme Bible eke eyomfịn ẹsịn enye ke Mt ibuot 25, edi enye edi ubak ibọrọ Jesus, ọnọde n̄kaiso ọyọhọ ntọt kaban̄a edidi esie ke ubọn̄ onyụn̄ owụkde ntịn̄enyịn ke enye ndibiere ikpe nnọ “kpukpru mme idụt.”—Matthew 25:32.

Mme Owo Ẹdude ke N̄ke Oro

4. Nso ke ẹtịn̄ ẹban̄a Jesus ke ntọn̄ọ n̄ke erọn̄ ye ebot, ndien anie owo en̄wen ke ẹsiak ẹsịn?

⁴ Jesus ọtọn̄ọ n̄ke oro ke ndidọhọ ete: “Ke ini Eyen Owo edidide.” Eyedi afo ọmọdiọn̄ọ owo emi “Eyen Owo” edide. Mme andiwet Gospel ẹsiwak ndibuan ikọ oro ye Jesus. Idem Jesus ke idemesie ama anam ntre, eyịghe idụhe etide n̄kukụt Daniel aban̄ade nte “owo emi ebietde eyen owo” asan̄ade edisịm Andisọn̄ọ Usen ndibọ “ubọn̄, ye ukpono, ye itie edidem.” (Daniel 7:13, 14; Matthew 26:63, 64; Mark 14:61, 62) Ke adan̄aemi Jesus edide akpan owo ke n̄ke emi, enye idụhe ikpọn̄. Ntọn̄ọ ntọn̄ọ ke nneme emi, nte ẹkotde ẹto Matthew 24:30, 31, enye ọkọdọhọ ete ke ini Eyen owo ‘edidide ye odudu ye akwa ubọn̄,’ mme angel esie ẹyenyene akpan utom ndinam. Ukem ntre, n̄ke erọn̄ ye ebot owụt mme angel ẹdude ye Jesus ke ini enye ‘etiede ke ebekpo ubọn̄ esie’ ndikpe ikpe. (Men Matthew 16:27 domo.) Edi Ebiereikpe ye mme angel esie ẹdu ke heaven, ntre nte ẹneme ẹban̄a mme owo ke n̄ke oro?

5. Didie ke nnyịn ikeme ndidiọn̄ọ “nditọete” Jesus?

⁵ Editop enyịn nse n̄ke oro owụt otu ita ẹmi oyomde nnyịn idiọn̄ọ. Ke adianade ye erọn̄ ye ebot, Eyen owo adian ọyọhọ otu ita emi edidiọn̄ọ mmọ edide akpan n̄kpọ ke ndidiọn̄ọ erọn̄ ye ebot. Jesus okot ọyọhọ otu ita ẹmi nditọete esie eke spirit. (Matthew 25:40, 45) Mmọ ẹnyene ndidi mme ata andituak ibuot, koro Jesus ọkọdọhọde ete: “Owo ekededi eke anamde se Ete Mi . . . amade, enye edi eyeneka Mi eren ye eyeneka Mi an̄wan, ye eka Mi.” (Matthew 12:50; John 20:17) Nte otịmde odot, Paul ama ewet aban̄a mme Christian ẹmi ẹdide ubak “nditọ Abraham” ẹmi ẹnyụn̄ ẹdide nditọ Abasi. Enye okokot mmọemi “nditọete” Jesus ye ‘mme andinyene udeme ke ikot eke otode ke heaven.’—Mme Hebrew 2:9–3:1; Galatia 3:26, 29.

6. Mmanie ẹdi “ata n̄kpri” ke otu nditọete Jesus?

⁶ Ntak emi Jesus akasiakde “ata n̄kpri” ke otu nditọete esie? Mme ikọ oro ẹsọn̄ọ se mme apostle ẹkekopde nte enye etịn̄de ke mbemiso. Ke ini owụtde ukpụhọde oro odude ke ufọt John Baptist, emi akakpade mbemiso Jesus ndien ke ntre enyenede idotenyịn eke isọn̄, ye mbon oro ẹnyenede uwem eke heaven, Jesus ọkọdọhọ ete: “Akananam owo idahake ida emi okponde akan John Baptist: edi owo emi ekpride akan ke Obio Ubọn̄ Heaven okpon akan enye.” (Matthew 11:11) Ekeme ndidi ndusụk mbon oro ẹkade heaven ẹma ẹwọrọ iso ke esop, nte mme apostle, ndien mbon eken ikọwọrọke iso ntre, edi kpukpru mmọ ẹdi nditọete Jesus eke spirit. (Luke 16:10; 1 Corinth 15:9; Ephesus 3:8; Mme Hebrew 8:11) Ntem, idem ọkpọkọm ndusụk ẹketie nte mme usụhọde owo ke isọn̄, mmọ ẹkedi nditọete esie ndien ẹkpekenyene ndinam n̄kpọ ye mmọ nte odotde.

Mmanie Ẹdi Erọn̄ ye Ebot?

7, 8. Nso ke Jesus eketịn̄ aban̄a erọn̄, ntre nso ke nnyịn ikeme ndibiere mban̄a mmọ?

⁷ Nnyịn ikot iban̄a edibiere ikpe nnọ erọn̄ ite: “[Jesus] eyedọhọ mmọ ẹmi ẹdude ke ubọk nnasia, ete, Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot. Koro Ami n̄kokopde biọn̄, ndien mbufo ẹnọ Mi udia; itọn̄ akasat Mi, ndien mbufo ẹnọ Mi mmọn̄; n̄kedi esen, ndien mbufo ẹda Mi ẹka ufọk; n̄kedi iferi, ndien mbufo ẹsịne Mi ọfọn̄; n̄kọdọdọn̄ọ, ndien mbufo ẹdi ẹdise Mi; n̄kodu ke ufọk-n̄kpọkọbi, ndien mbufo ẹdi ke ọtọ Mi. Ekem ndinen owo ẹyebụp Enye ẹte, Ọbọn̄, ini ewe ke ikokụt Fi etiede biọn̄, ndien inọ Fi udia; m̀mê nte itọn̄ asatde Fi, ndien inọ Fi mmọn̄? Ini ewe ke ikonyụn̄ ikụt Fi edide esen, ndien ida Fi ika ufọk? m̀mê iferi, ndien isịne Fi ọfọn̄? Ini ewe ke ikonyụn̄ ikụt Fi ọdọn̄ọde, m̀mê ke ufọk-n̄kpọkọbi, ndien idi idise Fi? Ndien Edidem eyebọrọ mmọ ete, Ke akpanikọ ke ndọhọ mbufo, Adan̄a nte mbufo ẹkenamde n̄kpọ ẹmi ẹnọ kiet ke otu nditọ-ete Mi, kpa ata n̄kpri ẹmi, mbufo ẹkanam ẹnọ Mi.” (Sịghisịghi ubọkn̄wed edi eke nnyịn.)—Matthew 25:34-40.

⁸ Nte an̄wan̄ade, erọn̄ ẹmi ẹbierede ikpe ẹnọ nte ẹdotde ndidu ke ubọk nnasia Jesus emi edide itie ukpono ye mfọn ẹda ẹban̄a otu mme owo. (Ephesus 1:20; Mme Hebrew 1:3) Nso ke mmọ ẹkenam ndien ini ewe? Jesus ọdọhọ ete ke mmọ ke mfọnido, ke ukpono, ye ke ntatubọk ẹma ẹnọ imọ udia, mmọn̄, ye edisịnen̄kpọ, ẹn̄wamde imọ ke ini ikọdọn̄ọde m̀mê idude ke ufọk-n̄kpọkọbi. Ke ini erọn̄ ẹdọhọde ke mmimọ ikanamke emi inọ Jesus ke idemesie, enye osio owụt nte ke mmọ ẹma ẹn̄wam nditọete imọ eke spirit, kpa nsụhọ mme Christian oro ẹyetde aran, ntre ke usụn̄ oro mmọ ẹkenam ẹnọ imọ.

9. Ntak emi n̄ke oro mînyeneke n̄kpọ ndinam ke ini Tọsịn Isua?

⁹ N̄ke oro inyeneke n̄kpọ ndinam ke ini Tọsịn Isua, koro adan̄aoro mbon oro ẹyetde aran ididịghe mme owo ẹkopde biọn̄, nsatitọn̄, ẹdọn̄ọde, m̀mê ẹdude ke ufọk-n̄kpọkọbi. Nte ededi, ediwak mmọ ẹmesobo utọ n̄kpọ ẹmi ke utịt editịm n̄kpọ emi. Toto nte ẹkesio Satan ẹduọk ke isọn̄, enye amanam nsụhọ emi edi akpan ebiet ifụtesịt esie, adade nsahi, ndutụhọ, ye n̄kpa ọsọk mmọ.—Ediyarade 12:17.

10, 11. (a) Ntak emi mîwụtke ifiọk ndikere ke erọn̄ oro ẹsịne kpukpru owo ẹmi ẹnamde edinam mfọnido ẹnọ nditọete Jesus? (b) Mmanie ke erọn̄ oro nte odotde ẹda ẹban̄a?

¹⁰ Ndi Jesus ọdọhọ ke owo kiet kiet emi anamde ekpri mfọnido ọnọ kiet ke otu nditọete esie, utọ nte edinọ ibio bred m̀mê akrasi mmọn̄, odot nte kiet ke otu erọn̄ ẹmi? Edi akpanikọ, ndinam mme utọ mfọnido ẹmi ẹkeme ndiwụt mfọnido eke owo, edi ke akpanikọ, otịm etie nte oyom se ikande oro oto mme erọn̄ eke n̄ke emi. Ke uwụtn̄kpọ, Jesus iketịn̄ke iban̄a mbon oro mînịmke edidu Abasi ke akpanikọ m̀mê mme ọkwọrọ ederi ẹmi ẹkenamde edinam mfọnido ẹnọ kiet ke otu nditọete esie. Ke edide isio ye oro, Jesus ama okot erọn̄ oro “ndinen owo” utịm ikaba. (Matthew 25:37, 46) Ntre erọn̄ ẹnyene ndidi mme owo ẹmi ẹnọde nditọete Christ un̄wam ke ndusụk ikpehe ini—ẹnọde ibetedem ifịk ifịk—ẹnyụn̄ ẹnyenede mbuọtidem ẹsịm udomo edinyene edinen idaha ke iso Abasi.

¹¹ Ke ediwak isua ikie ẹmi ẹkebede, ekese owo utọ nte Abraham ẹma ẹnyene edinen idaha. (James 2:21-23) Ẹbat Noah, Abraham, ye mme anam-akpanikọ eken ẹsịn ke otu “mme erọn̄ en̄wen” ẹmi ẹdidude uwem ke Paradise ke idak Obio Ubọn̄ Abasi. Ke mme ini ndondo ẹmi ediwak miliọn efen efen, ẹmenyịme utuakibuot akpanikọ nte mme erọn̄ en̄wen ndien ẹmekabade ẹdi “otu erọn̄ kiet” ye mbon oro ẹyetde aran. (John 10:16; Ediyarade 7:9) Mmọemi ẹnyenede idotenyịn eke isọn̄ mi ẹdiọn̄ọ nditọete Jesus nte mme isụn̄utom Obio Ubọn̄ ẹnyụn̄ ẹn̄wam mmọ ke ntre—ke ataata usụn̄ ye ke n̄kan̄ eke spirit. Jesus ada n̄kpọ emi mme erọn̄ en̄wen ẹnamde ẹnọ nditọete esie ke isọn̄ nte ẹnam ẹnọ imọ. Ẹdibiere ikpe ẹnọ mbon ẹmi ẹdude uwem ke ini enye edide ndibiere ikpe nnọ mme idụt nte erọn̄.

12. Ntak emi erọn̄ ẹkpebụpde nte mmọ ẹkenamde mfọnido ẹnọ Jesus?

¹² Edieke edide mme erọn̄ en̄wen ke ẹkwọrọ eti mbụk idahaemi ye mbon ẹmi ẹyetde aran ẹnyụn̄ ẹn̄wamde mmọ, ntak emi mmọ ẹdibụpde ẹte: “Ọbọn̄, ini ewe ke ikokụt Fi etiede biọn̄, ndien inọ Fi udia; m̀mê nte itọn̄ asatde Fi, ndien inọ Fi mmọn̄?” (Matthew 25:37) Nsio nsio ntak ẹkeme ndidu. Emi edi n̄ke. Ebede ke enye, Jesus owụt ntotụn̄ọ udọn̄ emi enye enyenede ọnọ nditọete esie eke spirit; enye esikop ubiak ye mmọ, ọbọ ndutụhọ ye mmọ. Jesus ama ebemiso ọdọhọ ete: “Owo eke onyịmede mbufo onyịme Mi, ndien owo eke onyịmede Mi onyịme Andidọn̄ Mi.” (Matthew 10:40) Ke uwụtn̄kpọ emi, Jesus atat edumbet emi, owụtde nte ke (eti m̀mê idiọk) oro ẹnamde nditọete esie akam esisịm heaven; esitie nte n̄kpọ eke ẹnamde ye imọ ke heaven. N̄ko, Jesus mi ọsọn̄ọ owụt idaha ubiereikpe Jehovah, anamde an̄wan̄a nte ke ubiereikpe Abasi, edide utebeikpe m̀mê ubiomikpe, edi akpanikọ onyụn̄ enen. Ebot ikemeke nditịn̄ n̄kpọ nnyan̄a idem, ‘Ọfọn, ke ekpedide nnyịn ima ikụt fi iso ye iso.’

13. Ekeme ndidi ke nso ntak ke mbon mbiet ebot ẹkot Jesus “Ọbọn̄”?

¹³ Ke ima ikọfiọk ini emi ẹnọde ubiereikpe oro ẹwụtde ke n̄ke emi, mbon ẹmi ẹdide ebot ẹtịm ẹn̄wan̄a nnyịn. Edisu edi ke ini “idiọn̄ọ Eyen Owo [ediwụtde] idem ke enyọn̄: adan̄aoro ke kpukpru mme idụt isọn̄ ẹyenyụn̄ ẹfụhọ, mmọ ẹyenyụn̄ ẹkụt Eyen Owo . . . [edide] ye odudu ye akwa ubọn̄.” (Matthew 24:29, 30, sịghisịghi ubọkn̄wed edi eke nnyịn.) Mme andibọhọ ukụt oro ediwọrọde ọnọ Akwa Babylon ẹmi ẹkenamde n̄kpọ emiom emiom ye nditọete Edidem ẹkeme kemi ndikot Ebiereikpe oro “Ọbọn̄” ke mbrenyịn, ẹdoride enyịn ke eyenyan̄a uwem mmọ.—Matthew 7:22, 23; men Ediyarade 6:15-17 domo.

14. Ọkọn̄ọde ke nso ke Jesus edikpe ikpe ọnọ erọn̄ ye ebot?

¹⁴ Ubiereikpe Jesus idikọn̄ọke ke se n̄kani mme aka ufọkabasi, mbon ẹmi mînịmke edidu Abasi ke akpanikọ, m̀mê mmọ eken ẹdọhọde ke mbrenyịn nte idide. (2 Thessalonica 1:8) Utu ke oro, ebiereikpe oro eyedụn̄ọde idaha esịt ye edinam ini edem emi mme owo ẹkenamde ye “kiet ke otu [nditọete esie], kpa ata n̄kpri ẹmi.” Nte ẹnyịmede, ibat mme Christian oro ẹyetde aran ẹmi ẹdude ke isọn̄ ke osụhọde. Nte ededi, adan̄a nte mbon oro ẹyetde aran, ẹmi ẹnamde “asan̄autom emi anamde akpanikọ, onyụn̄ enyenede ọniọn̄,” ẹkade iso ndinọ udia eke spirit ye ndausụn̄, mbon ẹmi ẹdidide erọn̄ ẹnyene ifet ndinam eti n̄kpọ nnọ otu asan̄autom emi, kpa nte ‘akwa otuowo ẹmi ẹtode kpukpru obio ye esien ye idụt’ ẹnamde.—Ediyarade 7:9, 14.

15. (a) Didie ke ediwak owo ẹwụt idemmọ nte idide ebot? (b) Ntak emi nnyịn ikpefepde ndidọhọ ke owo edi erọn̄ m̀mê ebot?

¹⁵ Didie ke ẹnam n̄kpọ ye nditọete Christ ye ediwak miliọn mme erọn̄ en̄wen ẹmi ẹdianade kiet ye mmọ nte otuerọn̄ kiet? Eyedi ediwak owo ke idemmọ inamke ọdiọk ye mme andida ke ibuot Christ, edi mmọ inyụn̄ inamke n̄kpọ ima ima ye ikọt esie. Ke ẹmekde idiọk ererimbot, mbon mbiet ebot ẹsịn etop Obio Ubọn̄, edide ẹkop enye ke nnennen usụn̄ m̀mê ke usụn̄ en̄wen. (1 John 2:15-17) Nte ededi, ke akpatre, Jesus edi enyeemi ẹmekde ndibiere ikpe. Inaha inọ nnyịn ndibiere enyeemi edide erọn̄ ye enyeemi edide ebot.—Mark 2:8; Luke 5:22; John 2:24, 25; Rome 14:10-12; 1 Corinth 4:5.

Nso Ini Iso Idu Inọ Otu Kiet Kiet?

16, 17. Nso ini iso ke erọn̄ ẹdinyene?

¹⁶ Jesus ama ọnọ mme erọn̄ ubiereikpe esie ete: “Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkonịmde ẹnọ mbufo toto ke editọn̄ọ ererimbot.” Nso ufiop ufiop ikot ke emi edi ntem—“Ẹdi”! Ẹdinyene nso? Ẹdinyene nsinsi uwem, nte enye eketịn̄de ibio ibio ete: “Ndinen owo ẹyedụk ke nsinsi uwem.”—Matthew 25:34, 46.

¹⁷ Ke n̄ke talent, Jesus ama owụt se ẹyomde ẹto mbon ẹmi ẹdikarade ye enye ke heaven, edi ke n̄ke emi enye owụt se ẹyomde ẹto mme andidu ke idak Obio Ubọn̄ oro. (Matthew 25:14-23) Ke ibio ibio, ke ntak ibetedem ofụri esịt oro ẹnọde nditọete Jesus, erọn̄ ẹda itie ẹnyene ke ikpehe eke isọn̄ ke Obio Ubọn̄ esie. Mmọ ẹyedara uwem ke paradise isọn̄—idotenyịn emi Abasi okonịmde ọnọ mmọ “toto ke editọn̄ọ ererimbot” eke mme owo ẹmi ẹfakde.—Luke 11:50, 51.

18, 19. (a) Nso ubiereikpe ke Jesus edibiere ọnọ ebot? (b) Didie ke nnyịn ikeme nditịm mfiọk nte ke ebot idibọhọ nsinsi ndutụhọ?

¹⁸ Nso ukpụhọde ke ubiereikpe oro ẹnọde mme ebot edi ntem! “Ekem Enye eyedọhọ mmọemi ẹdude ke ubọk ufien, ete, Ẹdianade Mi, mbufo ẹmi ẹdide mbon nsobo, ẹkedụk ke nsinsi ikan̄, emi ẹkenịmde ẹnọ Satan ye mme angel esie. Koro Ami n̄kokopde biọn̄, ndien mbufo inọhọ Mi udia; itọn̄ akasat Mi, ndien mbufo inọhọ Mi mmọn̄: n̄kedi esen, ndien mbufo idaha Mi ika ufọk; n̄kedi iferi, ndien mbufo isịneke Mi ọfọn̄; n̄kọdọdọn̄ọ, nnyụn̄ ntie ke ufọk-n̄kpọkọbi, ndien mbufo idịghe idise Mi. Ekem mmọ n̄ko ẹyebụp Enye ete, Ọbọn̄, ini ewe ke nnyịn ikokụt Fi etiede biọn̄, m̀mê nte itọn̄ asatde Fi, m̀mê nte edide esen, m̀mê iferi, m̀mê nte ọdọn̄ọde, m̀mê nte etiede ke ufọk-n̄kpọkọbi, ndien nnyịn itre ndinam n̄kpọ nnọ Fi? Edi Enye eyebọrọ mmọ ete, Ke akpanikọ ke ndọhọ mbufo, Adan̄a nte mbufo mîkanamke n̄kpọ emi inọ kiet ke otu ata n̄kpri ẹmi, mbufo inamke inọ Mi.”—Matthew 25:41-45.

¹⁹ Nditọ Ukpepn̄kpọ Bible ẹdiọn̄ọ ẹte ke emi ikemeke ndiwọrọ nte ke ukpọn̄ mbon mbiet ebot oro mîkemeke ndikpa ẹyebọ ndutụhọ ke nsinsi ikan̄. Baba, koro mme owo ẹdide ukpọn̄; mmọ inyeneke-nyene ukpọn̄ eke mîkemeke ndikpa. (Genesis 2:7; Ecclesiastes 9:5, 10; Ezekiel 18:4) Ke ndibiere ikpe “nsinsi ikan̄” nnọ mme ebot, Ebiereikpe etịn̄ aban̄a nsobo emi idotenyịn ini iso mîdụhe, emi n̄ko edide nsinsi utịt ọnọ Devil ye mme demon esie. (Ediyarade 20:10, 14) Ntem, Ebiereikpe Jehovah ọnọ nsio nsio ubiereikpe. Enye ọdọhọ mme erọn̄ ẹte, “Ẹdi”; ọdọhọ ebot ẹte, “Ẹdianade Mi.” Erọn̄ ẹyenyene “nsinsi uwem.” Ebot ẹyebọ “nsinsi ufen.”—Matthew 25:46.b

Nso ke Emi Ọwọrọ Ọnọ Nnyịn?

20, 21. (a) Nso akpan utom ke mme Christian ẹnyene ndinam? (b) Nso edibahade akaiso idahaemi? (c) Nso ididi idaha mme owo ke ini n̄ke erọn̄ ye ebot editọn̄ọde ndisu?

²⁰ Mme apostle inan̄ ẹmi ẹkekopde ibọrọ Jesus kaban̄a idiọn̄ọ edidu esie ye eke utịt editịm n̄kpọ emi ẹma ẹnyene ekese ndikere mban̄a. Ama oyom mmọ ẹdu ke edidemede ẹnyụn̄ ẹdu ke ukpeme. (Matthew 24:42) Ama oyom mmọ n̄ko ẹnam utom edinọ ikọ ntiense oro ẹsiakde ke Mark 13:10. Mme Ntiense Jehovah ke ẹbuana ifịk ifịk ke utom oro mfịn.

²¹ Nte ededi, nso ke obufa ifiọk aban̄ade n̄ke erọn̄ ye ebot emi ọwọrọ ọnọ nnyịn? Ọfọn, mme owo ẹyenyene ebiet emi ẹdade. Ndusụk owo ẹdu ke ‘ntatara ọkpọsọn̄ adade osịm nsobo,’ ke adan̄aemi mmọ eken ẹdomode ndidu ke ‘mfafaha inua-otop adade aka uwem.’ (Matthew 7:13, 14) Edi ini emi Jesus edinọde erọn̄ ye ebot akpatre ubiereikpe oro ẹwụtde ke n̄ke oro osụk odu ke iso. Ke ini Eyen owo edide ndinam utom Ebiereikpe, enye eyebiere ete ke ediwak mme ata Christian—emi ke akpanikọ ẹdide “akwa otuowo” eke mme erọn̄ oro ẹma ẹkeyak idem ẹnọ—ẹyedot ndibe ke akpatre ikpehe eke “akwa ukụt” oro ndụk obufa ererimbot. Idotenyịn oro ekpenyene ndidi n̄kpọ idatesịt idahaemi. (Ediyarade 7:9, 14) Ke n̄kan̄ eken, akpakịp ibat ẹmi ẹtode “kpukpru mme idụt” ẹyewụt idemmọ nte idide mme otụtutọn̄ ebot. Mmọ “ẹyedaha ẹkedụk ke nsinsi ufen.” Nso ubọhọ ke emi edidi ntem ọnọ isọn̄!

22, 23. Sia edisu eke n̄ke emi edide kan̄a ke ini iso, ntak emi utom ukwọrọikọ nnyịn edide akpan n̄kpọ?

²² Ke adan̄aemi ubiereikpe nte ẹnamde an̄wan̄a ke n̄ke oro edide ke n̄kpet n̄kpet ini iso, idem idahaemi akpan n̄kpọ ke ada itie. Nnyịn mme Christian ke ibuana ke utom unyan̄a uwem editan̄a etop oro ọtọde ubahade ke otu mme owo. (Matthew 10:32-39) Paul ekewet ete: “Koro, owo ekededi eke edisemede okot enyịn̄ Jehovah eyebọhọ. Edi mmọ ẹdinam didie ẹseme ẹkot Enye emi mmọ mîkọbuọtke idem ye Enye? Mmọ ẹdinyụn̄ ẹnam didie ẹbuọt idem ye Enye emi mmọ mîkokopke iban̄a? Mmọ ẹdinyụn̄ ẹnam didie ẹkop, ke ọkwọrọ ikọ mîdụhe?” (Rome 10:13, 14) An̄wan̄wa utom ukwọrọikọ nnyịn ye enyịn̄ Abasi ye etop edinyan̄a esie ke ẹsịm mme owo ke se ibede idụt 230. Nditọete Christ ẹmi ẹyetde aran ke ẹkaiso ndinọ ndausụn̄ ke utom emi. N̄kpọ nte owo miliọn 5 eke mme erọn̄ en̄wen ẹmediana ye mmọ idahaemi. Ndien mme owo ke ofụri ekondo ke ẹnam n̄kpọ ẹban̄a etop emi nditọete Jesus ẹtan̄ade.

²³ Ediwak owo ẹsikop etop nnyịn nte nnyịn ikwọrọde ikọ ke ufọk ke ufọk m̀mê ke ido nneme. Mmọ eken ẹkeme ndifiọk mban̄a Mme Ntiense Jehovah ye se nnyịn ikwọrọde ke mme usụn̄ oro nnyịn mîfiọkke. Ini ubiereikpe ama edisịm, didie ke Jesus edise utom obio ye ufọn ubon? Nnyịn ikemeke nditịn̄, ufọn inyụn̄ idụhe ndikekere. (Men 1 Corinth 7:14 domo.) Ediwak owo idahaemi ẹkokoi ẹfụmi, ẹsak nsahi, m̀mê ẹbuana ke in̄wan̄în̄wan̄ edikọbọ ikọt Abasi. Ntem, emi edi akpan ini; mme utọ owo oro ẹkeme ndikabade ndi mbon ẹmi Jesus edibierede ikpe ọnọ nte ebot.—Matthew 10:22; John 15:20; 16:2, 3; Rome 2:5, 6.

24. (a) Ntak edide akpan n̄kpọ mme owo kiet kiet ndinam n̄kpọ ke eti usụn̄ mban̄a ukwọrọikọ nnyịn? (b) Ukpepn̄kpọ emi an̄wam fi ọkpọkpọ ndinyene nso edu kaban̄a utom ukwọrọikọ fo?

²⁴ Nte ededi, ke edide n̄kpọ inemesịt, ediwak owo ẹnam n̄kpọ ke eti usụn̄, ẹkpep Ikọ Abasi, ẹnyụn̄ ẹkabade ẹdi Mme Ntiense Jehovah. Ndusụk owo oro ẹtiede nte ebot idahemi ẹkeme ndikpụhọde nnyụn̄ n̄kabade ntie nte erọn̄. Akpan n̄kpọ edi nte ke mbon ẹmi ẹnamde n̄kpọ ẹban̄a ẹnyụn̄ ẹnọde nditọete Christ ibetedem ifịk ifịk ke ntem ẹmenọ uyarade emi edidide isọn̄ kaban̄a mmọ ndidi se ẹnịmde ke ubọk nnasia Jesus ke ini, ke n̄kpet n̄kpet ini iso, enye editiede ke ebekpo esie ndibiere ikpe. Ẹmediọn̄ mmọemi ndien ẹyesụk ẹkaiso ẹdiọn̄ mmọ. Ntem, n̄ke emi ekpenyene ndisịn udọn̄ nnọ nnyịn ndinam utom ifịk ifịk n̄kan ke utom ukwọrọikọ Christian. Mbemiso ini ebede akaha, oyom nnyịn inam kpukpru se ikekeme nditan̄a eti mbụk Obio Ubọn̄ ndien ke usụn̄ oro inọde mbon en̄wen ifet ndinam n̄kpọ mban̄a. Ndien ana ọnọ Jesus ndinọ ubiereikpe, edide ubiomikpe m̀mê utebeikpe.—Matthew 25:46.