Ndi Satan Edi Idiọkn̄kpọ Emi Esịnede Owo ke Esịt?

Emem utom ndidọhọ ke idiọkn̄kpọ emi esịnede owo ke esịt ke ẹkot Satan. Edi ndi se Bible ekpepde edi oro? Edieke edide ntre, ntak emi Bible ọdọhọde ke Satan ama eneme nneme ye Jesus Christ onyụn̄ eneme ye Ata Ọkpọsọn̄ Abasi? Ẹyak ise nneme mmọ ise.

NNEME SATAN YE JESUS

Ke ini Jesus ọkọtọn̄ọde utom ukwọrọikọ, Devil ama odomo enye idomo ikata. Akpa, Satan ọkọdọhọ Jesus ada odudu emi Abasi ọnọde enye anam itiat akabade uyo. Jesus ndikpanam emi okpowụt ke enye ekere aban̄a idemesie kpọt. Ekem Devil ama ọdọhọ Jesus osio idem ọduọk ke isọn̄. Jesus ndikpanam emi okpowụt ke enye ada uwem esie ebre mbre onyụn̄ owụt idem. Ke akpatre, Satan ama ọdọhọ ke iyọnọ Jesus kpukpru mme obio ubọn̄ ererimbot emi edieke enye atuakde ibuot ini kiet kpọt ọnọ imọ. Jesus ama ebe kpukpru idomo emi onyụn̄ okot Ikọ Abasi ọnọ Satan ikata.—Matthew 4:1-11; Luke 4:1-13.

Kere ise, Jesus eketịn̄ ikọ ye anie? Ndi enye eketịn̄ ye idiọkn̄kpọ emi esịnede enye ke esịt? Bible ọdọhọ ke ‘ẹma ẹdomo Jesus ẹse ke kpukpru usụn̄ kpa nte nnyịn, edi ke enye ikenyeneke idiọkn̄kpọ.’ (Mme Hebrew 4:15) Bible ọdọhọ n̄ko ete: “Enye ikanamke idiọkn̄kpọ, owo ikonyụn̄ ikwe enye abian̄a ke inua.” (1 Peter 2:22) Jesus ekedi mfọnmma owo; enye ikayakke idiọkn̄kpọ odụk enye esịt ikonyụn̄ inamke idiọk ndomokiet. Omokụt do ke Jesus iketịn̄ke ikọ ye idiọkn̄kpọ emi esịnede enye ke esịt; enye eketịn̄ ikọ ye ata owo.

Enyene mme n̄kpọ en̄wen ke nneme oro, emi ẹwụtde ke Satan edi ata owo.

• Ti ke Devil ọkọdọhọ ke iyọnọ Jesus kpukpru mme obio ubọn̄ ererimbot edieke enye atuakde ibuot ini kiet kpọt ọnọ imọ. (Matthew 4:8, 9; ikọ idakisọn̄) Idịghe idomo ekpedi oro nan̄a edieke Satan mîkpedịghe ata owo. Ti n̄ko ke Jesus ikọdọhọke ke Satan inyeneke utọ odudu oro.

• Ke Jesus ama ekebe idomo oro, Devil ama “adaha ọkpọn̄ enye tutu ifet afiak eberede.” (Luke 4:13) Omokụt do ke Satan idịghe idiọkn̄kpọ emi esịnede owo ke esịt; enye edi ata owo.

• N̄kọ emeti ke “mme angel [ẹma] ẹdi ẹdisan̄a utom ẹnọ” Jesus. (Matthew 4:11) Mme angel emi ẹkedide ẹdin̄wam Jesus ẹnyụn̄ ẹsọn̄ọ enye idem do ẹkedi ata owo kpa ye oro owo mîkekwe mmọ. Kpasụk ntre n̄ko, Satan emi okodomode Jesus ekedi ata owo, edi owo ikekemeke ndikụt enye.

NNEME SATAN YE ABASI

Nneme enye emi akaban̄a Job emi ekedide owo Abasi. N̄wed Job etịn̄ nte Devil enemede nneme ikaba ye Abasi. Ke nneme mbiba emi, Abasi ama ọdọhọ Satan ke Job ọsọn̄ọ ada anam n̄kpọ imọ. Satan ama ọdọhọ ke Job anam n̄kpọ Abasi ke ufọn idemesie. Satan akanam etie nte Abasi ọkọnọ Job ubọkedem man Job anam n̄kpọ esie. Se Devil akanamde emi eketie nte enye ndikpọdọhọ ke imọdiọn̄ọ Job ikan Abasi. Jehovah ama ayak Satan atahade Job, owot nditọ esie, onyụn̄ ọtọ enye ata idiọk udọn̄ọ.a Nte ini akakade, kpukpru owo ẹma ẹkụt ke se Jehovah eketịn̄de aban̄a Job ama enen, ke Satan ekedi osu nsu. Abasi ama ọdiọn̄ Job ke ntak emi enye ọkọsọn̄ọde ada anam n̄kpọ esie.—Job 1:6-12; 2:1-7.

Ke nneme oro Jehovah Abasi ekenemede ye Satan, ndi ekere ke Abasi eketịn̄ ikọ ye idiọkn̄kpọ emi esịnede enye ke esịt? Bible ọdọhọ ke ‘usụn̄ Ata Abasi ọfọn ama.’ (2 Samuel 22:31) N̄wed Abasi ọdọhọ n̄ko ete: “Edisana, edisana, edisana Jehovah Abasi, kpa Ata Ọkpọsọn̄.” (Ediyarade 4:8) Edisana ọwọrọ n̄kpọ emi ananade ndo, asanade, idiọkn̄kpọ mînyụn̄ isịneke. Jehovah ọfọn ama onyụn̄ anana ndo. Idiọkn̄kpọ ndomokiet ikemeke ndisịne enye ke esịt.

Edi ndusụk owo ẹsụk ẹkeme ndidọhọ ke Job ke idemesie ikedịghe ata owo, ke ofụri se ẹtịn̄de ke n̄wed Job edi n̄ke. Ndi emekere ke se mmọ ẹtịn̄de emi edi akpanikọ? Mme itien̄wed en̄wen ke Bible ẹwụt ke Job ekedi ata owo. Ke uwụtn̄kpọ, James 5:7-11 ọdọhọ mme Christian ẹkpebe Job emi ọkọyọde ukụt, ke Jehovah ọyọdiọn̄ nnyịn edieke inamde oro. Edieke Job mîkpekedịghe ata owo, edieke ofụri se ẹdọhọde nte Satan okonyụn̄ anamde enye ekpedide ikọ n̄ke, ndi emekere ke item emi ekpenyene ufọn? N̄ko, Ezekiel 14:14, 20 asiak Job, Noah, ye Daniel esịn ke otu nti owo. Sia Noah ye Daniel ẹkedide ata owo, ọwọrọ Job n̄ko ekedi ata owo, kpa owo emi enen̄erede enyene mbuọtidem. Ndien sia Job ekedide ata owo, ndi ukereke ke owo emi ọkọnọde enye ofụri ufen oro ekedi ata owo n̄ko?

Kpukpru se inemede emi owụt ke Satan edi ata owo, edi nnyịn ikemeke ndikụt enye. Edi emekeme ndikere m̀mê Satan ekeme ndinam fi ye ubon fo n̄kpọ mfịn.

NSO KABAN̄A INI NNYỊN?

Yak idọhọ ke mme idiọkowo ẹbụn̄ọ ẹdụk obio mbufo. Mme owo ẹdikama nsia ke ubọk sia mme idiọkowo emi ẹkeme ndinam mmọ n̄kpọ ini ekededi. Mmọ ẹkeme ndibiat mbon en̄wen ke obio. Se iwọrọde ubonowo edi oro. Ẹma ẹsio Satan ye mme demon esie—oro edi, mme idiọk angel oro ẹketienede enye ẹsọn̄ ibuot ye Abasi—ẹduọk mi ke isọn̄. Nso ke emi ada edi? Ọfọn, kere ban̄a se afo esikụtde ke mbụk n̄kpọntịbe edem mbufo ye eke nsio nsio itie ke ererimbot.

• Ndi omokụt nte ibak ye afai ẹwakde, kpa ye ofụri se ẹnamde ke ofụri ererimbot man ẹtre mme n̄kpọ emi?

• Ndi omokụt nte ẹwakde ndibre ibọk ke TV, fim, ye mme n̄kpọ ntre, kpa ye emi mme ete ye eka ẹdọhọde ke emi ifọnke?

• Ndi omokụt nte ẹkade iso ndibiat isọn̄, kpa ye ofụri se mme owo ẹnamde man isọn̄ aka iso ọfọn?

• Ndi itiehe fi nte ke enyene se ifịnade ubonowo—ke enyene owo emi anamde mmọ ẹnam n̄kpọ ntem?

Mbọk kop owo emi Bible ọdọhọde nte edide ntak mfịna ererimbot emi: “Ẹsio akwa dragon oro ẹduọk, kpa akani urụkikọt, enye emi ẹkotde Devil ye Satan, emi adade kpukpru mme andidụn̄ isọn̄ otụn usụn̄; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye. . . . Mbọm isọn̄ ye inyan̄, koro Devil omosụhọde etiene mbufo, enye asan̄a ye akwa iyatesịt, sia enye ọfiọkde ete ini imọ edi ibio.” (Ediyarade 12:9, 12) Ke ediwak owo ẹma ẹkekot se Bible etịn̄de aban̄a Satan, mmọ ẹnyịme ke Satan edi ata idiọkowo emi nnyịn mîkemeke ndikụt; ke enye anam ererimbot etie ntem.

Afo emekeme ndikere m̀mê nso ke ikpanam mbak Satan edinam fi n̄kpọ. Ata akpan n̄kpọ edi emi. Ibuotikọ oro etienede eyetịn̄ se akpanamde.