Ibuot 15
Nso ke N̄kpanam ke Ini Mme Uke Mi Ẹyomde Ntiene Nnam Se Mîfọnke?
“Afo emesisobo ediwak idomo ke ufọkn̄wed, utọ nte edin̄wọn̄ sika, edida n̄kpọsọn̄ ibọk, ye edinam idan̄. Ọmọfiọk ke se mme uke fo ẹdọhọde anam ifọnke. Edi enyene ini emi esitiede nte ukemeke ndifehe mbọhọ.”—Eve.
IDỤHE owo oro mîyomke mbon en̄wen ẹma imọ. Oro esinam ọsọn̄ ke ini mme uke ẹdọhọde itiene mmimọ inam se mîfọnke. Ke uwụtn̄kpọ, edieke ẹkebọkde fi nte Christian, ọmọfiọk ke ifọnke ndinam idan̄ ke ini mûdọhọ ndọ m̀mê ndida ọkpọsọn̄ mmịn ke idiọk usụn̄. (Galatia 5:19-21) Edi ediwak mme uke fo ẹkeme ndidọhọ etiene mmimọ anam mme n̄kpọ emi. Ndi mmọ ẹsitie ẹkere mme n̄kpọ emi ẹnyụn̄ ẹbiere m̀mê ọfọn inam? Itiehe ntre. Akam etie nte mmọ ẹsinyụn̄ ẹtiene mbon en̄wen ẹnam se mmọ ẹnamde. Mmọ ẹyom mbon en̄wen ẹma mmimọ, ntre mmọ ẹsiyak mbon en̄wen ẹbiere nte mmọ ẹdude uwem. Ndi se afo esinamde edi oro? Mîdịghe, ndi emesinyene uko ndinam se ọdiọn̄ọde ke enen?
Enyene ini kiet emi Aaron eyeneka Moses akanamde se mme uke esie ẹkedọhọde enye anam. Ke ini nditọ Israel ẹkekade ẹkekpak enye ete anam abasi ọnọ mmimọ, enye ama anam kpa nte mmọ ẹkedọhọde! (Exodus 32:1-4) Kamse—Aaron emi akaka iso Pharaoh akatan̄a etop Abasi uko uko. (Exodus 7:1, 2, 16) Edi ke ini ekemmọ nditọ Israel ẹkekpakde enye ẹte anam se mmimọ idọhọde, enye ama anam. Etie nte ama emem enye utom nditan̄a etop Abasi nnọ edidem Egypt akan nditre ndinam se mme uke esie ẹkedọhọde enye anam!
Nso kaban̄a fi? Ndi esisọn̄ fi ndinam se afo ọfiọkde ke enen? Ndi akpama ndifiọk nte ekemede ndinyene uko man etre ndinam se mme uke fo ẹdọhọde anam? Ke akpanikọ, emekeme ndinyene utọ uko oro! Akpan n̄kpọ akam edi ndibem iso mfiọk ke mme uke fo ẹkeme ndidọhọ ẹtiene mmimọ anam se mîfọnke, nnyụn̄ mbiere se edinamde. N̄kpọ inan̄ oro iyomde ndineme mi ẹyen̄wam fi anam emi.
1. Bem iso fiọk. (Mme N̄ke 22:3) Ke ediwak idaha, emekeme ndida n̄kụt afanikọn̄. Ke uwụtn̄kpọ, yak idọhọ ke amada okụt nditọ ufọkn̄wed mbufo ẹdade ẹn̄wọn̄ sika. Ndi emekere ke mmọ ẹkeme ndinọ fi sika oro? Edieke ebemde iso ọfiọk mfịna oro ekemede ndisobo, eyeben̄e idem ndifep m̀mê ndikan enye.
2. Kere. (Mme Hebrew 5:14) Emekeme ndibụp idemfo, ‘Edieke ntienede nnam se kpukpru owo ẹnamde, didie ke editie mi ke idem nte ini akade?’ Edi akpanikọ ke mme uke fo ẹkeme ndima fi ke nsonso oro. Edi editie fi didie ke idem nte ini akade, ke ini odude ye ete ye eka fo m̀mê ye ekemmọ mme Christian? Ndi emeben̄e idem ndibiat edisana idaha fo ke iso Abasi man enem nditọ ufọkn̄wed mbufo esịt?
3. Biere. (Deuteronomy 30:19) Ebebịghi awawara, kpukpru mme asan̄autom Abasi ẹnyene ndibiere m̀mê iyanam akpanikọ inyụn̄ ibọ edidiọn̄ mîdịghe itre ndinam akpanikọ inyụn̄ ibọ ndiọi utịp. Owo nte Joseph, Job, ye Jesus ẹma ẹnam eti ubiere, edi Cain, Esau, ye Judas ikanamke. Ini fo edi emi ndinam ubiere. Nso ke afo edibiere?
4. Nam se ebierede. Emekeme ndikere ke enye emi ọsọn̄ akan. Edi idịghe ntre! Edieke edide ama ekere utịp oro ubiere fo edidade edi onyụn̄ ebiere se edinamde, nditịn̄ se ekebierede idisọn̄ke nte afo ekerede—oyonyụn̄ okop inemesịt. (Mme N̄ke 15:23) Kûyak idem enyek fi—iyomke okot ofụri Bible ọnọ mme uke fo. Ekeme ndidi ndisọn̄ọ ndọhọ mmọ ke imọ idinamke eyekem. Mîdịghe, man owụt ke udunamke tutu amama, emekeme ndidọhọ:
“Kûsiak mi enyịn̄ ke utọ n̄kpọ oro!”
“Nsinamke utọ n̄kpọ oro!”
“Da, akpana ọfiọk ke ndinamke utọ n̄kpọ oro!”
Akpan n̄kpọ edi ndinọ ibọrọ ke ebe oro nnyụn̄ n̄wụt ke unamke mbubru. Edieke anamde ntre, oyokụt ke mme uke fo ẹyesọsọp ẹsion̄o idem ẹkpọn̄ fi! Edi nso ke akpanam edieke mmọ ẹsakde fi? Nso ke akpanam edieke mmọ ẹdọhọde, “Semi, nso ifịna fi—edi mbe?” Fiọk ete ke mmọ ẹsak fi man ẹtiene anam se mmọ ẹnamde. Ntre, nso ke edinam? Ke nsụhọde n̄kaha, enyene n̄kpọ ita emi akpanamde.
● Emekeme ndinam nte emenyịme. (“Ke nditịn̄ akpanikọ, idem enyek mi!” Ekem tịn̄ ibio ibio se inamde okûnam se mmọ ẹdọhọde anam.)
● Emekeme ndisịn, onyụn̄ etịn̄ ntak emi afo mûnamke se mmọ ẹdọhọde anam, edi kûnam etie nte ẹtọtọhọ.
● Emekeme ndinam mme uke fo ẹkere n̄kpọ. Tịn̄ ntak emi mûnyịmeke nyụn̄ tịn̄ n̄kpọ emi edinamde mmọ ẹkere n̄kpọ. (“N̄kakam n̄kere ke ọmọdiọn̄ọ idem ekem ndifiọk ke sika ifọnke!”)
Edieke mme uke fo ẹkade iso ndisak fi, kpọn̄ ebiet oro! Adan̄a nte abiatde ini do, ntre ke mmọ ẹditetịm ẹsịn ikpafak. Idem edieke ọkpọn̄de ebiet oro, fiọk ete ke ama akan idomo oro—ukûyakke mme uke fo ẹbiere nte okpodude uwem!
Ndusụk mme uke fo ẹkeme ndisak fi ẹnyụn̄ ẹdọhọ ke ukemeke ndibiere n̄kpọ ke idemfo. Edi emekeme ndibiere! Jehovah oyom fi owụt ke ọmọfiọk ke ndinam uduak imọ edi mfọnn̄kan n̄kpọ. (Rome 12:2) Ntre kûyak mme uke fo ẹnam fi etie nte n̄kpọmbre mmọ. (Rome 6:16) Nam se afo ọfiọkde ke edi nnennen n̄kpọ!
Ke nditịm ntịn̄, idụhe nte ekemede ndibọhọ mme uke fo ofụri ofụri. Edi afo ọmọfiọk se anade anam, tịn̄ se ekerede, kûyak mme uke fo ẹbiere nte okpodude uwem fo. Ke akpatre, afo edinam ubiere idemfo!—Joshua 24:15.
KOT N̄KPỌ EFEN EFEN BAN̄A IBUOTIKỌ EMI KE IBUOT 9 KE EBOHO 1
Ndi odu uwem esịt iba? Ekere ke nso iditịbe edieke ete ye eka fo ẹyararede ẹfiọk?
AKPAN ITIE N̄WED ABASI
“Owo eke asan̄ade ye mbon ọniọn̄ eyenyene ọniọn̄, edi ọyọdiọk ye owo eke odụkde nsan̄a ye mme ndisịme.”—Mme N̄ke 13:20.
ITEM
Man enen̄ede enyene uko, kot ifiọkutom mme asan̄autom Jehovah eyomfịn emi ẹsọn̄ọde ẹda ẹnam se inende.
NDI AMA ỌFIỌK . . . ?
Isua kiet ke ama ọkọkpọn̄ ufọkn̄wed, ediwak nditọ ufọkn̄wed mbufo idikwe fi aba. Ekeme ndidi ediwak mmọ idikam itịghi enyịn̄ fo aba. Edi mbonubon mbufo—ndien akpan akpan Jehovah Abasi—ẹyeka iso ẹnyene udọn̄ ke idemfo.—Psalm 37:23-25.
SE NDINAMDE
Man n̄kûtiene mme uke mi nnam se mîfọnke, se ndinamde edi ․․․․․
Edieke mme uke mi ẹdomode ndinam ntiene mmọ nnam idiọkn̄kpọ, se ndinamde edi ․․․․․
Se ndibụpde ete ye eka mi mban̄a n̄kpọ emi edi ․․․․․
AFO EKERE DIDIE?
● Ke mme idaha ewe ke n̄kpọ inan̄ oro ẹnemede ke ibuotikọ emi ẹkeme ndin̄wam fi?
● Nso ikeme nditịbe edieke etienede mme uke fo anam se mîfọnke?
● Nso idi ndusụk usụn̄ emi afo ekemede ndisịn nditiene mme uke fo nnam se mîfọnke?
[Se ẹwetde ke ikpọ abisi ke page 131]
“Ediwak n̄kparawa ẹfiọk ke ndi Ntiense, ndien mmọ ẹsikpono mi. Edieke mmọ ẹyomde ndineme idiọk nneme, mmọ ẹyedọhọ mi, ‘Mike, imọn̄ itọn̄ọ ata nneme, edieke amade, emekeme ndidaha.’”—Mike
[Se ẹwetde ẹban̄a ndise ke page 132, 133]
Utomufọk
Se Ndinamde ke Ini Mme Uke Mi Uwụtn̄kpọ
Ẹyomde Ntiene Nnam Se Mîfọnke
1 Bem Iso Fiọk
Ewe idomo? Ndin̄wọn̄ sika.
M̀mọ̀n̄ ke n̄keme ndisobo idomo emi? Ke edem esa ufọkn̄wed.
↓ ↓
Nso iditịbe edieke ← 2 Kere → Nso iditịbe edieke
ntienede n̄n̄wọn̄? mmentieneke n̄n̄wọn̄?
Esịt idinemke Ẹkeme ndisak m̀mê ndikot
Jehovah ye ete mi nsio nsio enyịn̄.
ye eka mi. Esịt Ndusụk nditọ ufọkn̄wed
oyobiom mi. nnyịn ẹkeme ndisọn mi.
Ọyọsọn̄ mi isan̄ Edi nyanam esịt enem
en̄wen ndidọhọ Jehovah, nyonyụn̄ n̄keme
ke nyomke. ndisọn̄ọ nda ini en̄wen.
↓ ↓
Edieke ntienede ← 3 Biere → Ndin̄wọn̄ke sika sia
n̄n̄wọn̄, ntak edi ke
Mben̄eke idem nditre Mmọfiọk ke esịt
nditiene mme uke mi idinemke Jehovah,
nnam se mîfọnke. n̄ko ke sika
Mmama ndinem mme ekeme ndinam
uke mi esịt n̄kan ndọn̄ọ.
ndinem Jehovah esịt.
↓ ↓
← 4 Nam → Nyọdọhọ
ke nyomke nnyụn̄ nsan̄a mbe.
Nsahi Mme Uke
Edieke uke mi ọdọhọde: “Da, bọ sika n̄wọn̄.
Ndi ndịk anam fi?”
Se n̄kemede ndinam edi
ndinyịme ndisịn ndinam ekere n̄kpọ
“Etịn̄ akpanikọ. “Kûbaha sika fo.” “Nyomke. N̄kekere
Ndịk anam mi. ke ọmọdiọn̄ọ idem
Nyomke ndinyene ekem ndifiọk ke
kansa.” sika ifọnke!”
Sọsọp kpọn̄ ebiet oro edieke mme uke fo mîsion̄oke idem ikpọn̄ fi. Adan̄a nte abiatde ini do, ntre ke edimem utom nditiene nnam se mmọ ẹnamde. Idahaemi, wet n̄kpọ yọhọ page oro etienede.
Se Ndinamde ke Ini Mme Uke Mi Sion̄o page emi wet!
Ẹyomde Ntiene Nnam Se Mîfọnke
1 Bem Iso Fiọk
Ewe idomo? ․․․․․
M̀mọ̀n̄ ke n̄keme ndisobo idomo emi? ․․․․․
↓ ↓
Nso iditịbe edieke ← 2 Kere → Nso iditịbe edieke
nduọde ke idomo oro? mbede idomo oro?
․․․․․ ․․․․․
↓ ↓
Edieke nduọde ke idomo ← 3 Biere → Nyebe idomo
oro, ntak edi ke . . . oro sia . . .
↓ ↓
← 4 Nam → Se ndinamde edi . . .
Nsahi Mme Uke
Edieke uke mi ọdọhọde: ․․․․․
Se n̄kemede ndinam edi
ndinyịme ndisịn ndinam ekere n̄kpọ
․․․․․ ․․․․․ ․․․․․
Nam ndomonse ye ete m̀mê eka fo m̀mê ye akwa owo oro afo amade.
[Ndise ke page 135]
Edieke anamde se mme uke fo ẹdọhọde anam, ọwọrọ ke amakabade etie nte n̄kpọmbre mmọ