Nte Ẹkpetịmde Itie Ubonn̄wed Ukara Abasi

SHEREZADE, ekpri eyenan̄wan Spain emi ọfiọkde n̄kpọ, ekedi isua inan̄ ke emana ke ini andikpep esie ọkọtọtde nditọ ubet ukpepn̄kpọ ete ke mmọ ẹmọn̄ ẹwet ndise “Ete Christmas.” Ke ndondo oro, Sherezade ama eben̄e ke imọ idibuanake. Enye ama anam an̄wan̄a ete ke ubieresịt imọ idiyakke imọ inam oro.

Ke okopde n̄kpaidem ke mfan̄a emi, andikpep oro ama ọdọhọ enye ete ke oro etie n̄kukụre nte owo ndiwet ndise eyenọkpọ ndien ke n̄kpọ ndomokiet ikwan̄ake ke oro. Sherezade ama ọbọrọ ete: “Edieke enye n̄kukụre edide eyenọkpọ, ami ke idemmi nyemek ndiwet ndise eyenọkpọ edieke afo mûfan̄ake.”

Ke idaha en̄wen ẹma ẹdọhọ nditọ ubet ukpepn̄kpọ ẹwet ọfọn̄ etakubom idụt. Inikiet en̄wen Sherezade ama eben̄e m̀mê imọ imekeme ndiwet n̄kpọ en̄wen. Ke ndinam an̄wan̄a, enye ama etịn̄ mbụk Shadrach, Meshach, ye Abednego ọnọ andikpep oro.​—⁠Daniel 3:​1-⁠28.

Ikebịghike ke oro ebede andikpep oro ama okot eka Sherezade ke urụk ukopikọ nditịn̄ n̄kpaidem esie. “Eyen fo an̄wan esitịn̄ ọnọ mi ediwak idaha aban̄a ubieresịt esie,” ntre ke enye ọkọdọhọ. “Nte afo emekeme ndikere mban̄a oro? Eyenan̄wan idaha isua emana esie anamde an̄wan̄a mi ntak emi ubieresịt afịnade imọ! Sese, ami nnyịmeke ye se afo ekpepde enye, edi nsọn̄ọ ntịn̄ nnọ fi nte ke afo ke okụt unen. Ndien nyom fi ọfiọk ete ke ami mmokpono eyen fo an̄wan.”

Didie ke eyenan̄wan isua inan̄ ekeme ndinyene ubieresịt oro Bible ọnọde ukpep? Marina, eka esie, anam an̄wan̄a ete ke Sherezade enyene itie ubonn̄wed ukara Abasi esiemmọ ke ubetnna esie. Itie ubonn̄wed oro esịne mme ọkpọkpọ Enyọn̄-Ukpeme esie, emi enye ama okodụri udịm, mme n̄wed uka ukwọrọikọ esie, ye kpukpru mme n̄wed Watchtower Society ẹmi ẹkesiode tọn̄ọ nte enye akamana. N̄kpọ oro enye amade akan ke itie ubonn̄wed esie edi ọkpọ umụmikọ N̄wed Mi eke Mme Mbụk Bible, emi enye esikpan̄de utọn̄ ọnọ kpukpru okoneyo ke adan̄aemi okotde etiene ke n̄wed esie. Mbụk Bible ẹmi ẹken̄wam enye ndinam mme ubiere oro ẹsiakde ke enyọn̄ emi.

Nte itie ubonn̄wed ukara Abasi oro ẹtịmde mfọn mfọn ekeme ndin̄wam fi ye nditọ fo? Ntak emi itie ubonn̄wed ufọk edide akpan n̄kpọ?

“Itie Ubonn̄wed Idịghe Ọkpọmiọk Uwem”

Henry Ward Beecher ọkọdọhọ ete, “Itie ubonn̄wed idịghe ọkpọmiọk uwem, edi kiet ke otu akpan n̄kpọ ke uwem.” Ke akpanikọ, ekpere ndidi kpukpru nnyịn imenyene kiet ke otu “akpan n̄kpọ [ẹmi] ke uwem,” okposụkedi owo mîfiọkke. Didie ke edi ntre? Koro idem edieke Bible edide n̄kukụre se nnyịn inyenede, nnyịn imenyene se ẹkemede ndikot itie ubonn̄wed.

Bible enen̄ede edi mfọnn̄kan itie ubonn̄wed ukara Abasi. Ke ọyọhọ isua ikie inan̄, Jerome ama otịbi ubak udịmikọ Latin oro Bibliotheca Divina (Itie Ubonn̄wed Abasi) edi man anam ọyọhọ eboho n̄wed eke odudu spirit oro nnyịn ikotde Bible an̄wan̄a. Jehovah ọkọnọ nnyịn edisana itie ubonn̄wed emi man ọnọ nnyịn ataata un̄wam, item, ye ndausun̄. Enye edi n̄kpọ oro nnyịn mîkpadaha didie didie. Ikpîkpu edinyene ofụri Bible ọwọrọ ete ke nnyịn imenyene ata ntatara itie ubonn̄wed ikan ata ediwak mme asan̄autom Abasi ke mme ini edem.

Ke ini mme ọsọn̄urua uwetn̄kpọ oro ẹkedade ubọk ẹwet ẹkedide n̄kukụre se ikodude, ibat ibat ufọk, edieke edide ndomokiet ama ododu, ẹkekeme ndinyene ọyọhọ Bible. Ke ini Paul okoyomde ndikpep N̄wed Abasi ke ini akpatre n̄kpọkọbi esie ke Rome, enye ekenyene ndidọhọ Timothy ada ndusụk ikpan̄wed ke Asia Minor ọsọk imọ​—⁠iso-ọfọn mbai N̄wed Abasi Usem Hebrew. (2 Timothy 4:13) Nte ededi, mme eboho ikpan̄wed ẹma ẹsidu ke mme synagogue, ndien Jesus Christ ye apostle Paul ẹma ẹsida mme itie ubonn̄wed ẹmi ẹnam n̄kpọ nte ọfọnde ke utom ukwọrọikọ mmọ. (Luke 4:​15-⁠17; Utom 17:​1-⁠3) Nte enemde, N̄wed Abasi odu idahaemi awak ekem akan nte okodude ke akpa isua ikie.

Ke ntak edisio ukwak umịn̄n̄wed ndi, mfịn ke ekperede ndidi kpukpru mme asan̄autom Abasi​—⁠se ededi usem oro mmọ ẹsemde⁠—​ẹkeme ndinyene ofụri Bible ke ekọmurua oro ememde ekem. Nnyịn n̄ko imenyene n̄wọrọnda ifet ndidian mme n̄kpọ ke edisana “itie ubonn̄wed” emi. Ke se ibede isua ikie, “asan̄autom emi anamde akpanikọ, onyụn̄ enyenede ọniọn̄” amanam utom ọkpọsọn̄ ke ndinọ udia eke spirit ke edikem ini.​—⁠Matthew 24:​45-⁠47.

Edi nnyịn ikemeke ndibọ ọyọhọ ufọn nto eti ntọt emi edieke nnyịn mîtịmke ọkpọkpọ itie ubonn̄wed ukara Abasi. Didie ke ẹkeme ndinam oro? Nte ededi, akpa usio-ukot edi ndinyene mme n̄wed oro utọ itie ubonn̄wed oro oyomde. Enye otịm odot ye ukeme oro ẹsịnde, sia enye edin̄wamde nnyịn ndinyene nnennen ntọt oro iyomde ndise mban̄a mme mfịna ye mme ibọrọ mbụme Bible ye unana ubiatini.

Mme N̄wed Ewe ke Ami Nyom?

Nte akanam afo emekere nte afo ekemede ndibiere mfịna unyene nneme ke ndọ fo m̀mê nte afo ekemede ndin̄wam nditọ fo ndidọhọ baba ke n̄kpọsọn̄ ibọk? Didie ke afo akpan̄wam ufan oro okopde mfụhọ? Nte afo emekeme ndinen̄ede nnam an̄wan̄a uyarade oro inyenede nte ke Abasi odu ye ntak emi enye ayakde idiọkido odu? Nso ke ididuot unam oro ke Ediyarade ibuot 17 ada aban̄a?

Emekeme ndibọrọ mmọemi ye mme anana-ibat mbụme eken edieke afo enyenede itie ubonn̄wed ukara Abasi oro ekemde. Watchtower Society ẹmemịn̄ mme n̄wed, n̄kpri n̄wed, ye mme ibuotikọ magazine oro ẹnemede mme udịm udịm ibuotikọ N̄wed Abasi ọyọhọ ọyọhọ. N̄ko-n̄ko, mme n̄wed ẹmi ẹneme ẹban̄a mme n̄kpọ ẹban̄ade ubon, ẹbọp mbuọtidem nnyịn ke Abasi ye Bible, ẹn̄wam nnyịn ndifori mme ukeme ukwọrọikọ nnyịn, ẹnyụn̄ ẹn̄wam ndinam mme prọfesi Bible ẹn̄wan̄a nnyịn.

Ata ediwak n̄wed oro N̄ka emịn̄de ke isua 20 ẹmi ẹkebede ke ẹsụk ẹdodu. Edieke afo odụkde akpanikọ ke ndondo emi, eyefọn afo ndinyene kpukpru orụk n̄wed oro ẹdude ke usem mbufo. Ekeme ndidi nte ke mme eboho Enyọn̄-Ukpeme eke mme isua edem ẹdu ke usem mbufo. Ẹmịn̄ mme n̄wọrọnda n̄wed ndụn̄ọde, utọ nte Insight on the Scriptures ye Comprehensive Concordance, n̄ko ke nsio nsio usem. Nte ededi, ndinyene mme n̄wed ẹmi edi sụk akpa usio-ukot.

Tịm Itie Ubonn̄wed Fo!

Ndifiọk nte ke odu ebiet emi afo enyenede n̄wed edi n̄kpọ kiet, edi ndikụt enyeemi afo oyomde edi n̄kpọ efen. Edieke nnyịn inyenede ndibiat ekese ini ndiyom n̄wed ndụn̄ọde oro nnyịn iyomde, ekeme ndidi nnyịn iyeduọk udọn̄ ke n̄kpọ emi. Ke n̄kan̄ eken, edieke itịmde mme n̄wed nnyịn ibon, ke itie oro ọfọnde, nnyịn iyenen̄ede inyene udọn̄ ndinam ndụn̄ọde idemowo.

Edieke ekemede, edi se ifọnde ndinyene ediwak n̄wed ukara Abasi ke ebiet kiet. Ẹkeme ndinam n̄kpọ udọn̄ n̄wed, ndien mmọ ẹsiwak ndimem urua n̄kan, edieke nnyịn mîkemeke ndidep mbon oro ẹma ẹkenanam ẹma, ndien inaha mmọ ẹda ekese ufan̄. Ndisịm itie ubonn̄wed mmemmem mmemmem edi akpan n̄kpọ n̄ko. Mme n̄wed ẹbonde ẹkpere ntọn̄ufọk isiwakke ndinyene ufọn ikan ndidoro ntọn̄.

Usio-ukot efen edi nditịm mme n̄wed oro mbon. Ata ekpri ini oro ẹbiatde ke ndinen̄ede n̄wed oro mbon ke nde ke nde ẹsida mme utịp ẹdi.

Nso edieke ekese owo ke ubon fo mîdịghe Mme Ntiense Jehovah? Okposụk afo mûdukemeke nditịm itie ubonn̄wed nte afo akpamade nditịm, afo emekeme ndinyene n̄kpọ udọn̄ n̄wed ke ubet fo emi ke nsụhọde n̄kaha ẹsịnede mme n̄wed ẹmi ẹkọn̄ọde ke N̄wed Abasi.

Itie Ubonn̄wed Ukara Abasi Ekeme Ndin̄wam Ndibọp Idaha eke Spirit

Ndondo oro ima ikotịm mme n̄wed nnyịn ibon, oyom nnyịn inyene ndutịm oro edin̄wamde nnyịn ndinyene ntọt. Ukeme uti n̄kpọ nnyịn ekeme ndikpu, ndien ekeme ndidi nnyịn ke idem nnyịn itịmke imehe ye se isịnede ke kpukpru n̄wed ke itie ubonn̄wed ukara Abasi nnyịn. Edi, ẹkeme ndinyene kpukpru ntọt ẹdude ke itie ubonn̄wed mmemmem mmemmem. Edieke odude ke usem nnyịn, Watch Tower Publications Index ekeme ndin̄wam nnyịn ndikụt akpan ntọt ke ekperede ndidi ibuotikọ ekededi ke esisịt ini.

Julián, emi anamde utom ke ediwak isua nte akpan asiakusụn̄ ye nte ebiowo, anam an̄wan̄a nte ke Index edi ata ọsọn̄urua n̄kpọ ke ndida nnọ akpatre eyeneren esie ukpep man enyene ukpepn̄kpọ idemowo. “Jairo, emi edide isua itiaba, ọkọnyọn̄ ufọkn̄wed edi usen oko onyụn̄ obụp mi ete, ‘Papa, nso ke N̄ka etịn̄ aban̄a dinosaur?’ Nnyịn ima ika nnennen ibịne Index inyụn̄ ikese ikọ oro ‘dinosaur.’ Ke ndondo oro nnyịn ima ikụt udịm udịm ibuotikọ ikpaedem Awake! ke ibuot nneme emi. [February 8, 1990] Kpa ke usen oro, Jairo ama ọtọn̄ọ ndikot enye. Enye ama ọfọfiọk ete ke itie ubonn̄wed ukara Abasi nnyịn ọdọn̄ọ nti ntọt ke ekperede ndidi ke kpukpru ibuotikọ. Ami ke idemmi mmonịm nte ke ini nditọwọn̄ ẹfiọkde ndida itie ubonn̄wed ukara Abasi nnam n̄kpọ nte ọfọnde, enye an̄wam mmọ ẹkọri ke n̄kan̄ eke spirit. Mmọ ẹkpep nte ẹbuende ikọ, ndien nso en̄wen, mmọ ẹkụt ẹte ke ukpepn̄kpọ idemowo ekeme ndikama inem.”

Fausto, ete Sherezade emi ẹkesiakde ke ntọn̄ọ ntọn̄ọ, onịm ke akpanikọ ete ke idụhe ini ẹdọhọde ke amabak akaha ke ndinọ nditọ ukpep ndida itie ubonn̄wed ukara Abasi nnam n̄kpọ. “Nnyịn ima iwowụt Sherezade, emi idahaemi edide isua itiokiet, nte ẹkamade Index,” ntre ke enye anam an̄wan̄a. “Sia idotenyịn Paradise isọn̄ ẹsinemde enye, nnyịn ima itọn̄ọ ke ndiwụt enye ikọ oro ‘paradise’ ke Index inyụn̄ ise mme ibuotikọ Enyọn̄-Ukpeme oro ẹsiakde. Nte esiwakde ndidi nnyịn iyewụt enye sụk mme ndise. Edi, ebede ke usụn̄ emi enye eyefiọk ete ke Index edi ukpọhọde ẹdade ẹkụt ntọt ke itie ubonn̄wed ufọk nnyịn. Nnyịn ima ifiọk ite ke akpan n̄kpọ oro ama an̄wan̄a enye ke ini enye ọkọnyọn̄de ufọkn̄wed edi usen kiet ye mbụme aban̄ade mme usọrọ Easter. ‘Ntak emi nnyịn mîsehe n̄kpọ ke Index?’ ntre ke enye okobụp eka esie.

Se ededi oro isua emana nnyịn edide, Bible esịn udọn̄ ọnọ nnyịn ete ‘idomo kpukpru n̄kpọ ise; imụm se ifọnde ikama.’ (1 Thessalonica 5:21) Emi oyom ete nnyịn idụn̄ọde se N̄wed Abasi ọdọhọde. (Utom 17:11) Edieke nnyịn inyenede itie ubonn̄wed ukara Abasi oro ẹtịmde mfọn mfọn, utọ ndụn̄ọde oro ekeme ndidi inem inem n̄kpọ. Ini kiet kiet oro nnyịn idade itie ubonn̄wed nnyịn itịm utịn̄ikọ uforo uforo, ndiyom nti item ke ndise mban̄a mme mfịna, m̀mê ndise ntọt oro edide n̄kpọ udọn̄, enye eyenam nnyịn ifiọk ata ufọn oro itie ubonn̄wed nnyịn enyenede.

Ete ye eka Sherezade ẹsio ẹwụt ẹte: “Ke ubon Christian, itie ubonn̄wed ukara Abasi ke akpanikọ idịghe ọkpọmiọk uwem!”

[Ekebe ke page 30]

DIDIE KE AFO EKEME NDITỊM N̄WED FO MBON?

N̄kpọsọn̄ ibet idụhe kaban̄a nte okpotịmde n̄wed fo. Edi, mme mbahade ẹtienede mi ẹmi ẹdude ke nde ke nde ẹwụt usụn̄ kiet emi afo ekemede nditịm mme n̄wed fo mbon nte ekemde ye se isịnede.

1. N̄wed ẹsịnede ndụn̄ọde ufan̄ikọ ke adiana ke adiana ke ndusụk ikpehe Bible

(Mme uwụtn̄kpọ: Akakan Owo Oro Akanam Odude Uwem, Ediyarade​—⁠Ubọn̄ Ubọn̄ Ata-Utịt Esie Emekpere!, “The Nations Shall Know That I Am Jehovah”​—⁠How?, “Your Will Be Done on Earth”)

2. N̄wed ẹnyenede ebuana ye uwem ufọk

(Mme uwụtn̄kpọ: Ndinam Uwem Ufọk Fo Enem, Questions Young People Ask​—⁠Answers That Work, N̄wed Mi eke Mme Mbụk Bible)

3. Mme Bible ye mme n̄wed ndụn̄ọde

(Mme uwụtn̄kpọ: New World Translation of the Holy Scriptures​—⁠With References, mme Bible eken, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, eti n̄wed ukabadeikọ)

4. N̄wed ẹsụk ẹkamade ke Ukpepn̄kpọ N̄wedesop ye Ufọkn̄wed Utom Ukara Abasi

5. Kaset radio ye eke video

6. Mme eboho Enyọn̄-Ukpeme ye Awake!

7. Mbụk Mme Ntiense Jehovah

(Mme uwụtn̄kpọ: Yearbooks of Jehovah’s Witnesses, Jehovah’s Witnesses​—⁠Proclaimers of God’s Kingdom)

8. Mme n̄wed ye n̄kpri n̄wed oro nnyịn isiwakde ndikama ke utom ukwọrọikọ nnyịn

(Mme uwụtn̄kpọ: Afo Emekeme Ndidu Uwem ke Nsinsi ke Paradise ke Isọn̄, Reasoning From the Scriptures, Life​—⁠How Did It Get Here? By Evolution or by Creation?, Mankind’s Search for God, United in Worship of the Only True God)

[Ndise ke page 31]

Sherezade ama akakabade edi eti eyen ukpepn̄kpọ Bible

[Ndise ke page 31]

Okposụkedi ekpride, eyeneren emi ke ada itie ubonn̄wed ukara Abasi anam n̄kpọ

Ẹdian Owo En̄wen ke Otu Ukara

YE EKIKERE edinam ibat mme akamautom Otu Ukara Mme Ntiense Jehovah ẹwak, ọtọn̄ọde ke July 1,1994, ẹmedian owo kiet en̄wen ke mbiowo 11 oro ẹnamde utom idahaemi. Obufa owo emi edi Gerrit Lösch.

Brọda Lösch okodụk utom uyọhọ ini ke November 1,1961, okonyụn̄ okụre ukpep ke ọyọhọ otu 41 eke Watchtower Bible School of Gilead. Enye ama anam utom circuit ye eke district ke Austria ọtọn̄ọde ke 1963 osịm 1976. Enye ọkọdọ ndọ ke 1967, ndien enye ye n̄wan esie, Merete, ke ukperedem ẹma ẹnam utom ke isua 14 nte mbonufọk Bethel Austria ke Vienna. Ke isua inan̄ ẹmi ẹkebede ẹma ẹnọ mmọ ẹka ibuot itieutom N̄ka ke Brooklyn, New York, ke ebiet emi Brọda Lösch akanamde utom ke Ọfịs Utịm Utom ye nte andin̄wam ke Kọmiti Utom. Ye nsio nsio ifiọkutom esie ke an̄wautom n̄kan̄ Europe ye ifiọk esie ke usem German, Ikọmbakara, Romanian, ye Italian, enye eyetịp n̄kpọ akamba akamba esịn ke utom Otu Ukara.