Nte Nnyịn ke Idu ke Edidemede—Ifepde Mme N̄kpọ Oro Ẹwọn̄ọrede Owo Ntịn̄enyịn?
1 Jesus ama ọnọ item ete: “Mbufo ẹtaba idap . . . man mbufo ẹkpekeme ndibọhọ” mme afanikọn̄ oro ẹkenade ẹtịbe. (Luke 21:36) Nnyịn idu uwem ke ata idiọk ini ke mbụk owo. Afanikọn̄ ke ana ebet mbon oro ẹyetde idap ke n̄kan̄ eke spirit. Emi onịm n̄kpọndịk ọnọ nnyịn owo kiet kiet. Jesus ama etịn̄ aban̄a edidia udia, edin̄wọn̄ n̄kpọ, ye editịmede esịt uwem ofụri usen. Ntak-a? Koro idem mme n̄kpọ ẹmi ẹkeme ndikara ekikere nnyịn, ẹkabade ẹdi mme n̄kpọ oro ẹwọn̄ọrede owo ntịn̄enyịn, ẹnyụn̄ ẹda ẹkesịm ediyet idap ke n̄kan̄ eke spirit.
2 Mme Ọsọ N̄kpọ Oro Ẹwọn̄ọrede Owo Ntịn̄enyịn: Ndusụk owo ẹsịn idem ke ebeubọk m̀mê unọ idem inemesịt oro ẹnyenede eyịghe ẹban̄a, idem ẹkabarede ẹdi mme enyene-mbumehe use TV. Nte ededi, edibem iso nyom Obio Ubọn̄ iwọrọke ite ke ana nnyịn ifep kpukpru orụk unọ idem inemesịt. Ke ini nnyịn idade eti ibuot ye mfara ke idem inam n̄kpọ, unọ idem inemesịt ekeme ndinọ ufọn. (Men 1 Timothy 4:8 domo.) Edi enye edi n̄kpọ oro ọwọn̄ọrede owo ntịn̄enyịn ke ini enye akabarede edi akpan n̄kpọ ke uwem nnyịn, adade n̄kponn̄kan ini nnyịn, inyene nnyịn, m̀mê udeme oro nnyịn ikpenyenede ke utom edikwọrọ Obio Ubọn̄.
3 Ọsọ n̄kpọ efen oro ọwọn̄ọrede owo ntịn̄enyịn oro ekemede ndinam owo eyet idap ke n̄kan̄ eke spirit edi edinyene udọn̄ ke mme n̄kpọ obụkidem oro mîdịghe akpan n̄kpọ. Emi esiyom owo abiat ekese ini ke utom idịbi udia onyụn̄ ababa n̄kpọ eke spirit owot. Ndusụk owo ẹma ẹfre enyịn ẹban̄a mme utịtmbuba eke spirit ebe ke ndisịn idem ke ndikọ inyene obụkidem man otodo ẹdu ata inem inem uwem. Ke adan̄aemi nnyịn iyomde “se idiade ye se idade ifụk iferi,” ana nnyịn ikpeme ibiọn̄ọ edikọri ima okụk, emi ekemede ndinam nnyịn iyo ikpọn̄ mbuọtidem. (1 Tim. 6:8-10) Ke ikpude ndiwụk enyịn ke mme udọn̄ n̄kpọ Obio Ubọn̄, nnyịn imekeme nditek ke ifịk ndise mban̄a mme udọn̄ n̄kpọ eke spirit ubon nnyịn inyụn̄ ikpu ndinam utom nnyịn mma.—1 Tim. 5:8; 2 Tim. 4:5.
4 Ndien mbon efen ẹyak ‘ekikere uwem emi anam esịt mmọ odobi’ tutu osịm udomo oro mmọ ẹyetde idap ke n̄kan̄ eke spirit. (Luke 21:34) Ndusụk ini, ẹsikop editịmede esịt ke ntak udọn̄ọ m̀mê mme idaha ubon oro ẹkamade mfịghe. Edi inaha ẹyak mme utọ ọkpọkpọ mbubehe oro ẹsụhọde edifiọk oro nnyịn ifiọkde ke utịt editịm n̄kpọ emi ke asan̄a ekpere usọp usọp.—Mark 13:33.
5 Idụhe n̄kpọ edinemde Devil esịt nte enye ndikụt unen ke ndinam nnyịn idu ke idaha oro etiede ndap ndap, ibịnede ndusụk mme mfụmmfụm ekikere ererimbot. Nnyịn inyene ndin̄wana man idu ke edidemede ke n̄kan̄ eke spirit. Nnyịn imọfiọk ite ke ‘usen Jehovah ọmọn̄ edi nte inọ,’ ndien edi akpan n̄kpọ nte nnyịn “itaba idap ikpeme inyụn̄ imụm idem ikama.” (1 Thess. 5:2, 6) Edieke nnyịn ikụtde idiọn̄ọ ediyet idap ke idem nnyịn, edi usọp usọp n̄kpọ nte nnyịn “ifọrọde ndien utom ekịm” inịm.—Rome 13:11-13.
6 Mme N̄kpọ Ndin̄wam Nnyịn Idu ke Edidemede: Nso idi mme utọ n̄kpọ un̄wam oro? Akam edi akpan n̄kpọ. Nnyịn ikpenyeneke ndidop akam. (1 Thess. 5:17) Ndidiana ye esop Christian ‘eyedemede nnyịn ọnọ ima ye nti utom.’ (Heb. 10:24) Edidụn̄ọde idem nnyịn ke esịt akpanikọ kpukpru ini ekeme ndin̄wam ndinam nnyịn idu ke edidemede kaban̄a ediyom oro oyomde ikan mmemidem. (2 Cor. 13:5) Eti edu ukpepn̄kpọ idemowo eyekaiso ‘ọbọk nnyịn ke ikọ mbuọtidem.’ (1 Tim. 4:6) Edieke nnyịn itịn̄de enyịn, nnyịn imekeme ndinyene mbuọtidem nte ke nnyịn iyekeme ndifep mme n̄kpọ oro ẹwọn̄ọrede owo ntịn̄enyịn, ‘idu ke ukpeme; isọn̄ọ ida ke mbuọtidem.’—1 Cor. 16:13.