Mbono District “Idara Idara Mme Anditoro” eke 1995
1 Ntak ifan̄ ke nnyịn inyene ndidat esịt? Ekeme ndidi ibat ibat ke otu nnyịn isidomo ndibat kpukpru mmọ. Kpa ye oro idude ke ererimbot ndutịme ye unana iwụk, nnyịn imenyene ata ediwak ntak ndidat esịt. Nte ẹketọtde ke Utom Obio Ubọn̄ Nnyịn eke May 1995, “Idara Idara Mme Anditoro” edi ọnọ-nsịnudọn̄ ibuotikọ mbono district eke 1995.
2 Nnyịn itoro Jehovah koro enye ekpep nnyịn akpanikọ. (Isa. 54:13; John 8:32) Ke n̄kan̄ eken, nnyịn imabuana akpanikọ emi idara idara ye kpukpru mbon oro ẹyomde ifụre ye inemesịt. (Ezek. 9:4; Utom 20:35) Otu nditọete Christian nnyịn n̄ko ada idatesịt ọsọk nnyịn. Ima ima ubon eke spirit esida uyụhọ ye inemesịt edi. Mmọemi ẹdi sụk ibat ibat ke otu mme ntak idatesịt nnyịn oro onụkde nnyịn nditoro Jehovah. Mme utịn̄ikọ ye mme nnamn̄wụt mbono emi ẹyedụri ntịn̄enyịn nnyịn ẹwụt mme ntak N̄wed Abasi efen efen ndidat esịt ke ntịme ntịme ukperedem ini emi.
3 Mbono Usen Ita: Nte amanam ndutịm ye eteutom fo ọnọ fi ini man otodo odu do ke ofụri usen ita eke mbono oro? Mme ete ye eka ẹmi nditọ mmọ ẹdude ke isua uka ufọkn̄wed ẹmi ẹdidụkde kiet ke otu mbono ẹmi ke adan̄aemi n̄wed mîtreke kan̄a ẹkpenyene nditọt mme andikpep ke edu ukpono nte ke nditọ mmimọ ididụkke n̄wed ke Friday ke ntak akpan ikpehe utuakibuot ido ukpono mmọ enyeemi. Ewe mbono ekpere fi akan? Etisịm idahaemi ewetn̄wed esop mbufo ama ọnọ mbufo ọyọhọ ntọt aban̄ade esop mbufo. Ke Mbono District eke Ota 6, ẹyekabade ndutịm emi ẹsịn ke Utịn̄ikọ Idiọn̄ọ eke Mbon America ẹnọ mbon oro ẹdide inan.
4 Ndutịm editọn̄ọ ke Friday ke n̄kanika ebede 9 ke minit 20 usenubọk onyụn̄ etre ke Sunday ke n̄kpọ nte n̄kanika ebede 3 ke minit 30 mbubịteyo. Ke Saturday ye Sunday, edinam editọn̄ọ ke n̄kanika usụkkiet usenubọk.
5 Nte Afo Eyedụk?: Ẹsịn udọn̄ ẹnọ nnyịn ete idụk ofụri usen ita eke mbono oro. Ntak-a? Jehovah oyom nnyịn idu do. Mfịn mbuọtidem ye nsọn̄idem eke spirit nnyịn ẹdu ke idak ọkpọsọn̄ en̄wan. Paul ọkọnọ item ete ‘ẹkûsịn ndisop idem ọtọkiet’ ke ini oro mme Christian ke Judea ẹkesobode ọkpọsọn̄ mfịghe. (Heb. 3:12, 13; 10:25) Mbon Philippi ẹkedụn̄ ke ufọt “n̄kwakwan̄a ye idiọk emana.” Kpa ye oro, mmọ ẹma ‘ẹyama nte ntantaọfiọn̄ ke ererimbot.’ (Phil. 2:15, 16) Ntak emi mme Christian eke akpa isua ikie ẹmi ẹkenyenede ukpụhọde? Koro mmọ ke nsụkibuot ẹma ẹtiene ndausụn̄ edisana spirit oro ọkọnọde mmọ item ete ẹsop idem ọtọkiet man ‘ẹdemede kiet eken ẹnọ ima ye nti utom.’—Heb. 10:24.
6 Ererimbot eyekara nnyịn ke usụn̄ efen, anamde udọn̄ nnyịn ndisobo ye nditọete nnyịn nnyụn̄ ntoro Jehovah emem. Isua emi ẹsịn udọn̄ ẹnọ nnyịn ite isụk idem inọ spirit Jehovah inyụn̄ ibuana ke ofụri usen ita eke mbono oro. Nte nnyịn imebiere ndidụk ye ofụri ubon nnyịn? Oyom nnyịn inam ima ye mbuọtidem nnyịn ẹsọn̄ idem kpukpru ini. Jehovah anam mme mbono eke isua ke isua ẹdu man ẹn̄wam nnyịn ke afan̄ emi.
7 Da N̄kpọuto Nyọn̄ Ufọk: Didie ke afo ekeme ndibọ n̄kponn̄kan ufọn nto mbono emi? Ke ibio ibio ibọrọ edi “ndiwụk ekikere ebiet kiet.” Emi idịghe mmemmem n̄kpọ ke mfịna mfịna, usọp usọp n̄kaowo eke mfịn. Ekeme ndidi ọkpọsọn̄ n̄kpọ nnọ n̄kparawa owo ẹmi ẹkopde idem ndiwụk ekikere ebiet kiet, edi enye edi n̄kpọ-ata oro kpukpru nnyịn isakde iso ise ke ini idụkde mbono district. Nnyịn iyekụt nte ediwụk ekikere ebiet kiet edide mmemmem n̄kpọ edieke nnyịn ibemde iso inam ntịmidem. Bụp idemfo, ‘Nso idi ibuotikọ mbono emi?’ Tie kere ban̄a enye! ‘Ntak emi ami n̄kade, ndien nso ke ami ndinam ke usen ita oro? Nte mme mbubịteyo mi ẹdiyọhọ ye unọ idem inemesịt, mîdịghe nte ami mmodiomi ini oro ekemde nnọ nduọkodudu ye edifiak ndụn̄ọde mme akpan n̄kpọ mbono?’
8 Ibuotikọ Enyọn̄-Ukpeme eke August 1, 1984 oro “Nte Esinam Editie N̄kere m̀mê Ekikere Esiyo Fi?” ama ọnọ ediwak ekikere ke nte ẹkemede ndibọ ekese ufọn nto mbonoesop ndien ekem eberi ke ndidọhọ: “Edinọ ekikere ntụnọ etie nte se idide n̄kpon n̄kan akpan n̄kpọ.” Ke ini etịn̄ikọ ọtọn̄ọde, nnyịn imesiwak ndinọ n̄kpan̄utọn̄, edi ndusụk ke ufọt ufọt utịn̄ikọ oro, nnyịn imesiyak ekikere nnyịn “ọwọrọ oyo.” Didie ke nnyịn ikeme ndikpan emi nditịbe?
9 Odot ẹfiak ẹtịn̄ mme ekikere oro ẹkenọde ke ini edem koro mmọ ẹnyene ufọn. Edieke ekemede, domo ndinyene nduọkodudu oro ekemde kpukpru okoneyo. Emi isidịghe mmemmem n̄kpọ kpukpru ini koro ekeme ndiyom anam isan̄, ndien edieke afo odụn̄de ke ufọkidụn̄ odude ekpere itiembono, ekeme ndidi afo udubakke udụk idap m̀mê ndide ọfọn nte ekpedede ke ufọk. Eti ndutịm eyen̄wam fi enyene nduọkodudu oro oyomde.
10 Ediwet mme akpan n̄kpọ mbio mbio edi n̄kpọ oro an̄wamde ke ndiwụk ekikere ebiet kiet. Edieke afo odomode ndiwet n̄kpọ awak akaha, emekeme nditaba ndusụk akpan n̄kpọ ofụri ofụri. Nte ekikere ẹnọde, wet mme akpan n̄kpọ ye uduak editịn̄ ibio ibio n̄kpọ eke edinam oro nnọ eyen ukpepn̄kpọ Bible m̀mê owo udọn̄ọ emi anade ke ufọkibọk. Idem okposụkedi afo mûnyeneke akpan owo ke ekikere, afo eyenyene uduak ke ndiwet mme akpan n̄kpọ, ndien ke mbono oro asuanade afo emekeme ndinyene mme ifet nditịn̄ mme akpan n̄kpọ eke ndutịm oro ke adan̄aemi ọnọde andibuana ke ubon oro mînịmke ke akpanikọ ikọ ntiense ido nneme. Ebede ke ndiwet mme akpan n̄kpọ nnyụn̄ mbuana mme n̄kpọ oro afo okokopde, afo udusọpke ufre mme n̄kpọ oro. Editịn̄ ikọ esinam ẹkûsọp ẹfre n̄kpọ.
11 Idara Idara Mme Anditoro Ẹkpono Jehovah Ebe ke Edu Uten̄e Abasi: Isua oko ẹma ẹbọ nti ikọ nsịnudọn̄ ẹban̄ade eduuwem nnyịn ẹto mme enyeneufọk ye mbon eken. Enyeneufọk kiet ama etịn̄ ete: “Esidi n̄kpọ inemesịt kpukpru ini ndinọ Mme Ntiense ufọkidụn̄ koro mmọ ẹsinyene ime ẹnyụn̄ ẹdiana kiet ẹnyụn̄ ẹtịn̄ enyịn ẹkpeme nditọ mmọ.” Enyeneufọk efen ọkọdọhọ ete ke etie nte Mme Ntiense ẹnen̄ede ẹkop inemesịt ẹnyụn̄ ẹtịm ẹnam n̄kpọ ke ndutịm ẹkan mme otu eken.
12 Ntọt efen ọdọhọ ete ke mbono oro ẹkenyenede ke ndondo emi mbemiso eke nnyịn ama ada okosịm edibiat ediwak n̄kpọ, ọkọrọ ye ediyịp mme n̄kpọ. Edi kaban̄a mbono nnyịn, ntọt oro akaiso ete: “Nnyịn inyeneke ndifịna idem mban̄a oro ye Mme Ntiense.”
13 Ubaha nte ekpedide kpukpru ntọt oro nnyịn ikọbọde ẹkedi ukem emi, edi ke mfụhọ, ikedịghe ntre. Etieibuot okpokoro mbono kiet ọkọdọhọ ete: “Ke mme ikpehe edinam ẹma ẹkesuana, ediwak uyen ẹma ẹsop idem ke akamba otu ke barakọn̄ [ufọkisen] ke eyo ama ọkọsọn̄, ẹsakde imam ọkpọsọn̄ ẹnyụn̄ ẹfioride n̄kpo. Emi ama otịmede isenowo eken . . . , ẹmi ẹketiede nte ẹma ẹyat esịt. Ndusụk nditọwọn̄ ẹma ẹfehe itọk ke mme kọridọ, ẹtọde mme usụn̄ nte mmọ ẹkade ẹkese kiet eken ke ubet ẹnyụn̄ ẹnemede nneme ke ata ọkpọsọn̄ uyo ke ubet.”
14 Mfịna efen oro osụk akade iso odu ke mme isua ẹmi edi ediwak nditọete ndika n̄kese kiet eken ke an̄wa itie emi ẹtiede ẹkop ikọ ke ini mme ikpehe edinam ẹsụk ẹkade iso. Ke mbono kiet isua oko, ẹma ẹkụt n̄wed emi eyen ukpepn̄kpọ Bible ekewetde esịn ke ekebe etịbe. Enye okokot ete: “Akananam n̄kpọ ikpaha mi idem inyụn̄ ituakke mi mbọribọ nte akanamde mi aban̄a uyom, editịm, ye nneme . . . ke ini ẹnọde mme utịn̄ikọ . . . Ami ndịghe kan̄a Ntiense, ndi owo emi ekpepde n̄kpọ onyụn̄ ọkọde ifiọk aban̄a mbak ye edikpono Abasi.” Ke akpanikọ, owo nnyịn ndomokiet ikpamaha ndinam ẹkere ke nnyịn iwụtke esịtekọm iban̄a ndutịm Jehovah.
15 Kpukpru ini nnyịn ikpenyene ndisibụp idem nnyịn: ‘Ami mbiet anie, ndien ntak emi ami ndụkde mbono emi-e?’ Idaha eke spirit ye edu uten̄e Abasi nnyịn ẹsiwụt idem ke ikọ, eduuwem, ye esịtekọm oro nnyịn inyenede inọ mme n̄kpọ eke spirit. (Jas. 3:13; 1 Pet. 2:2, 3, 12) Ẹsiwak ndikụt nditọete oro ẹkeyọde ubiọn̄ọ ye ukpan ke ediwak isua ẹnen̄erede ẹnọ n̄kpan̄utọn̄ ẹnyụn̄ ẹwụtde ukpono ke mme itiembono, ẹsọn̄ọde ẹtie ke itie mmọ, ẹnọ ọyọhọ n̄kpan̄utọn̄ ke mme utịn̄ikọ ye mme nnamn̄wụt.
16 Ọfọn̄ ye Ukamaidem Fo Ẹtịn̄ N̄kpọ Ẹban̄a Fi: Ke 1 Samuel 16:7, ẹti nnyịn ẹte ke ‘owo ese enyịn, edi Jehovah ese esịt.’ Ntre, mme owo ẹsiwak ndida nnyịn nte nnyịn itiede ke enyọn̄ idem. Mme owo ẹsinen̄ede ẹse usịnen̄kpọ ye ukamaidem nnyịn, akpan akpan ke ini nnyịn idụkde mbono kaban̄a utuakibuot ye edibọ item ke usụn̄uwem Christian. Edieke afo edide uyen emi esikade n̄wed mîdịghe edieke utom idịbi udia fo anamde fi odu ke n̄kpet n̄kpet ebuana ye mme owo oro ẹtienede n̄kon̄ine ererimbot, ekeme ndidi n̄kpọ-ata nditiene idaha Christian kaban̄a edisịne n̄kpọ oro owụtde iso o-bụt.
17 Mme idaha usịnen̄kpọ ye ukamaidem ẹdi nsio nsio ke ofụri ererimbot. Ẹdori enyịn mme Christian ndisịne n̄kpọ oro owụtde iso o-bụt, oro odotde. Anie ekpebiere emi? Mme ete ye eka ẹkpenyene ndikụt nte ke nditọ mmimọ isịneke n̄kpọ nte mme uyen ererimbot. Ẹnọ nnyịn ndausụn̄ oro ẹbọpde-bọp man ẹn̄wam nnyịn inam nti ubiere ke n̄kpọ emi oyomde ntịn̄enyịn mi. Nnyịn imesịn udọn̄ inọ ẹfiak ẹdụn̄ọde ibuotikọ oro ke Awake! eke February 8, 1987, ọdọhọde “What Do Clothes Mean to You?” (Nso ke Mme Ọfọn̄ Ẹwọrọ Ẹnọ Fi?) Nso ke ẹkekụt ke mme mbono nnyịn isua oko?
18 Ke kiet ke otu Mme Mbono District “Mbak Abasi” ama okokụre, nnyịn ima ibọ ntọt emi: “Nditọete iren ye iban ẹnam n̄kọri akamba akamba ke usịnen̄kpọ, ukamaidem, ye eduuwem mmọ ke itiembono isua emi. . . . Nte ededi, mme idaha ye mme ido edinam ẹsụk ẹdodu oro ẹyomde ẹnam n̄kọri.” Ke mbono efen ama akasuana ẹtọt ẹte ke ẹkesụk ẹkokụt usịnen̄kpọ oro mîwụtke iso o-bụt. Ntọt oro etịn̄ ete ke usịnen̄kpọ ndusụk owo ekedi n̄kpọ itekesịt ọnọ mbon efen. Ndusụk mbon an̄wa oro ẹkedude n̄ko ẹma ẹkụt usịnen̄kpọ oro mîkowụtke iso o-bụt. Ọfọn̄ ndusụk owo ama owụt ndido idem akaha onyụn̄ adiana owo ke idem akaha.
19 Ata ediwak nditọete iren ye iban ẹsisịne mme ọfọn̄ oro ẹwụtde iso o-bụt ẹnyụn̄ ẹnyenede ukpono ke adan̄aemi ẹdude ke itiembono. Edieke mbiowo ẹkụtde ndusụk owo oro ẹnyenede edu edisịne ọfọn̄ oro mîwụtke iso o-bụt ke ini nduọkodudu, ọyọfọn ẹnọ ima ima item oro enyenede iwụk mbemiso mbono nte ke utọ usịnen̄kpọ oro idotke, akpan akpan nte owo emi odụkde mbono Christian. Mbọk dụn̄ọde mme edumbet ẹnọde ke enyọn̄ emi kaban̄a eduuwem ye usịnen̄kpọ ye eyen ukpepn̄kpọ Bible fo oro edidụkde mbono.
20 Ukwak Usio Ndise ye Mme N̄kpọ Umụmikọ: Odot ẹnọ ima ima editi mi ẹban̄a mme ukwak usio ndise ye n̄kpọ umụmikọ. Mbọk ti, edieke afo aduakde ndikama ukwak usio ndise, ukwak umụm ndise video, m̀mê n̄kpọ umụmikọ ekededi, wụt edikere mban̄a nọ mbon oro ẹdude ẹkpere fi. Ndisan̄a n̄kanade ke ini edinam m̀mê idem editie ke itie fo mmụm se ẹnamde ekeme nditịmede mbon efen. Owo inyeneke ndifak n̄kpọ umụmikọ ndomokiet ke ikan̄ ilektrik m̀mê ke ndutịm ukwak utịn̄ikọ, m̀mê ndisịri usụn̄ ẹmi ẹsan̄ade. Edide afo emek ndisio ndise m̀mê ndimụm ndusụk ikpehe ke ndutịm nsịn ke ọkpọ umụm ndise video m̀mê ke kaset umụmikọ, emi edi mbubehe idemowo. Mme ndise ye mme n̄kpọ oro ẹkemụmde ke n̄kpọ umụmn̄kpọ ẹkeme ndinam ẹfiak ẹti inem inem n̄kpọ ke ini ẹsede ke ini iso. Ẹkpenyene ndikama kpukpru utọ n̄kpọ umụmn̄kpọ ẹmi ke ufat, ke usụn̄ oro mîtịmekede mbon efen m̀mê ndibiọn̄ọ fi ndibọ ọyọhọ ufọn nto ndutịm. Ke ama akafiak ọnyọn̄ ufọk, nte ini eyedu ndikop se okomụmde? Afo emekeme ndikụt ete ke ediwet mme akpan n̄kpọ eyekem.
21 N̄kpọitie: Ke Mbono District “Mbak Abasi” eke 1994, nte afo ama okụt ukpụhọde ẹkenamde ke n̄kpọ aban̄ade edimụm n̄kpọitie nnịm? Ẹma ẹnam ndusụk n̄kọri, edi osụk oyoyom nnyịn inyene n̄kpọ editi emi ke ekikere: ẸMEKEME NDIMỤM ITIE NNỊM NNỌ MBONUFỌK MBUFO IKPỌN̄ÎKPỌN̄ YE OWO EKEDEDI ORO EKEMEDE NDIDI ASAN̄A YE MBUFO KE MOTO MBUFO.
22 Mme Ekebe Etịbe: Ekeme ndidi mbufo ẹma ẹkụt mbufa ekebe etịbe ẹmi N̄ka ọkọnọde ke An̄wa Mbono kiet kiet ke mme mbono district isua oko. Nte ẹkenamde n̄kpọ ẹban̄a mme ntọt oro ẹkesịnde udọn̄ ẹnọ nnyịn ndinọ N̄ka ibetedem ebe ke ndinọ etịbe ke mme mbono ama ọfọn etieti, ndien nnyịn imọkọm kpukpru mbufo ke un̄wam okụk emi mbufo ẹkenọde esop Jehovah.
23 Mme Tiket Udia: Nnyịn imesịn udọn̄ inọ edibabak ndep mme tiket udia mbemiso mbono. Nso idi uduak kaban̄a emi? Edibabak nnyam tiket udia esinam okụk odu ndibabak ndep mme akpan n̄kpọ udia nnọ mbono. Oyom ẹbabak ẹdep edesi, bia, gari, enan̄, unen, ọkọti, ikọn̄, ye mme n̄kpọ udia eken man mmọ ẹdu ẹnọ udịm udịm mbono district. Nte ido edide, ekọmurua udia esidọk akamba akamba nte ini nduọkodudu esisan̄ade ekpere ke December. Oyom esenyịn Ndutịm Udia mbono edep ediwak n̄kpọ udia ke October ye November. Enye oyom okụk man anam emi. Ọsọsọn̄ N̄ka ndinyene okụk oro ekemde ndise mban̄a emi ye ediwak mbono oro ẹnịmde idahaemi ke idụt emi. Ntak edi oro nnyịn isịnde udọn̄ inọ mbufo ndibabak ndep tiket udia nto Kọmiti Mbono. Ẹyeda okụk emi ndien ẹbak ẹdep udia. Mbufo ẹyenen̄ede ẹbọ ufọn ẹto usụhọde ekọmurua udia ke itie unyamudia ye itie ubịtitọn̄ ke mme mbono ẹmi, sia ẹkemede ndidep mme n̄kpọ udia ke ini mmọ mînen̄ekede isọn̄ urua.
24 Ke ntre, nnyịn imesịn udọn̄ inọ mme esenyịn oro ẹtiede ibuot ye mme ewetn̄wed ke esop kiet kiet ndinam ndutịm man ẹbabak ẹdep tiket. Ẹkeme ndinam emi ye anam ndutịm mbono ke esop kiet kiet. Mme asuanetop ẹkeme ndikpe okụk tiket mmọ ndondo oro ẹnemede ibuotikọ emi ke October. Ẹkpenyene ndiwet enyịn̄ nnịm. Ke ẹma ẹkedep tiket ẹto Kọmiti Mbono, ẹyekpọn̄ mmọ ẹnọ mme asuanetop oro ẹkekpede okụk. Mme asuanetop ẹkpenyene ndikama mmọ nte okụk ẹnyụn̄ ẹkama mmọ ye ntịn̄enyịn. Ẹkeme ndida tiket udia ẹmi ndep n̄kpọ ke itie unyamudia ye itie ubịtitọn̄ ke ndondo oro mme asuanetop ẹsịmde an̄wa mbono. Ẹsịn udọn̄ ẹnọ kpukpru mme asuanetop ndibabak ndep tiket udia ke nsụhọde n̄kaha se ẹdikamade ke akpa usen iba ke mbono oro. Ndinam ntre eyen̄wam ẹdep ediwak udia mbemiso mbono ọtọn̄ọde.
25 Ndinọ Mme N̄kpọ Udia: Nnyịn imesịn udọn̄ inọ editịp mme n̄kpọ udia nnọ mme mbono district. Emi ekeme ndisịne kpukpru orụk udia oro ẹdidiade, utọ nte bia, edesi, gari, ukọm, ọkọti, ntokon, tomato, mfri, ikọn̄, enan̄, unen, ye mme n̄kpọ udia en̄wen ekededi oro mbufo ẹkpemade nditịp. Emi edi eti usụn̄ ndinọ utom Obio Ubọn̄ ibetedem. Itieutom Ndutịm Udia edida kpukpru n̄kpọ udia ẹmi inam n̄kpọ. Mbufo nditịp mme utọ n̄kpọ udia oro eyen̄wam mbono ndinyene okụk ẹdibiatde onyụn̄ anam udia odu ke mfọn ọnọ mbon oro ẹdude ke utom usiakusụn̄.
26 Ẹkpenyene ndinam ndutịm ke esop nnọ editịp mme n̄kpọ udia ye edimen mmọ n̄ka An̄wa Mbono ke ndondo oro ẹnemede ibuotikọ emi. Nte ededi, ẹkpenyene ndida mme n̄kpọ udia oro ẹkemede ndibiara n̄ka ke nnennen ini mbak mmọ idibiara mbemiso akpa mbono. Edieke Kọmiti Mbono mînọhọ mbufo nnennen ntọt kaban̄a ini emi ẹkpedade n̄kpọ udia ẹka, mbufo ẹmekeme ndikosobo ye mmọ. Ẹkeme ndimen n̄kpọ udia ekededi ẹmi mme asuanetop ẹdade ẹdi ke ini mmọ ẹnamde isan̄ ẹka mbono n̄ka itie unịm udia nnennen. Ke ini nditọ Israel eset ẹkesikade usọrọ utịm ikata ke isua ke ataya m̀mê ke temple, Deuteronomy 16:16 ọdọhọ ke ẹma ẹwụk mmọ ẹte: “Yak owo okûdi ke iso Jehovah ubọk ubọk.” Mmọ ikenyeneke ndikere mban̄a idemmọ ye ubon mmọ kpọt, edi etịbe oro mmọ ẹdinọde esop Jehovah. Kpasụk ntre mfịn, nnyịn n̄ko ikpenyene ndidiomi un̄wam n̄kpọ obụkidem oro nnyịn idinọde esop Jehovah.
27 Ke adianade ye ndutịm ofụri ini oro ẹnamde ẹnọ edidia udia ke itie unyamudia ye itie ubịtitọn̄, edieke mme asuanetop ẹyomde ndidia udia oro mmọ ẹkekamade ẹto ufọk ẹdi ke itie ẹtiede ẹkop ikọ ke ini nduọkodudu, ẹnyịme mmọ ẹnam ntre. N̄ko, edieke ndusụk owo ẹyomde ndidep udia ke itie unyamudia m̀mê itie ubịtitọn̄ nsịn ke ọkpọkpọ usan mmọ nnyụn̄ ndia ke itie ẹtiede ẹkop ikọ, ẹkeme ndiyak ẹnam oro. Akpan n̄kpọ edi nte ke owo kiet kiet ekpenyene ndinam ebiet oro asana ke ama akadia udia okụre. Ndutịm mbono eyenam akpasa udọn̄ mbio oro ẹkemde ẹdu ẹnọ mme asuanetop ndidọn̄ nyọhọ-nsụhọ udia mmọ, ye mme n̄kpọ eken, ndien ẹkpenyene ndinam mme n̄kpọ unam ebiet asana ẹdu ẹkem. Edieke oyomde ẹkama n̄kpri ekebe udọn̄ udia, ẹnyịme ẹkama mmọ edieke mmọ ẹdidụkde idak n̄kpọitie fo. Nte ededi, owo ikpenyeneke ndikama ikpọ n̄kpọ udọn̄ udia ẹmi ẹsikamade ẹwọrọ an̄wa m̀mê n̄kpọsọn̄ mmịn ndụk itie emi ẹtiede ẹkop ikọ. Ẹkpenyene ndifep ndidia udia m̀mê ndita n̄kpọ ke ini edinam akade iso. Emi okpowụt unana ukpono ọnọ udia eke spirit oro ẹnọde.
28 Ke November 3, 1995, akpa Mbono District “Idara Idara Mme Anditoro” eyetọn̄ọ. Nte mbufo ẹmekụre ntịmidem mbufo, ndien nte mbufo ẹmeben̄e idem idahaemi ndidara inem inem ebuana ọtọkiet ye nti n̄kpọ eke spirit eke usen ita ẹmi? Akam ofụri esịt nnyịn edi yak Jehovah ọdiọn̄ ukeme mbufo ndidụk mbono emi edide ye nditọete mbufo iren ye iban nte nnyịn ikerede iban̄a nte ikpedide idara idara mme anditoro Jehovah.
[Ekebe ke page 6]
Mme N̄kpọ Editi Mbono District
Baptism: Mbon baptism ẹkpenyene ndidu ke itie mmọ ke ikpehe oro ẹmekde ẹnịm ẹnọ mmọ mbemiso ndutịm ọtọn̄ọde ke usenubọk Saturday. Ẹma ẹkụt nte ndusụk owo ẹsịnede orụk ọfọn̄ oro mînyeneke uku onyụn̄ odụride ntịn̄enyịn ọkpọn̄ edinam oro. Owo kiet kiet oro aduakde ndina baptism ekpenyene ndisan̄a ye ọfọn̄ uyeremmọn̄ eke owụtde iso o-bụt ye ọfọn̄ ukwọhọdeidem. Ke etịn̄ikọ ama okokụre utịn̄ikọ baptism ye akam, etieibuot okpokoro edinam eyenọ mbon baptism mbio mbio ntọt onyụn̄ asiak ikwọ ẹdikwọde. Ke ẹma ẹkekwọ akpatre udịm ikwọ ẹkụre, mme adaidaha ẹyeda mbon baptism usụn̄ ẹka itie emi ẹdibụhọde ke mmọn̄. Sia baptism ke idiọn̄ọ uyakidem owo nnọ edide ata eti ye ọkpọkpọ mbubehe ke ufọt owo oro ye Jehovah, ndutịm idụhe inọ se ẹkotde nsan̄a baptism emi mbon baptism iba m̀mê akande oro ẹfatde m̀mê ẹkọpde ubọk ke adan̄aemi ẹnịmde mmọ baptism.
Itieidụn̄: Nnyịn imafiak iben̄e edidianakiet kpukpru owo kaban̄a ufọkidụn̄ oro itiembono ọnọde. Edieke nnyịn ifụmide ndutịm oro N̄ka anamde inyụn̄ ikọbọ ufọkidụn̄ oro itiembono ama ọkọbọbọ, nnyịn ibiat ọkpọsọn̄ utom oro nditọete nnyịn ẹmi ẹkediomide se imemde urua ikan ẹkenamde. EDIEKE AFO ENYENEDE MFỊNA KE UFỌKIDỤN̄, mbọk kûmen̄e ndidụri ntịn̄enyịn esenyịn Itieutom Unọ Ufọkidụn̄ ke itiembono oro n̄wụt man enye akpan̄wam fi ndikọk mfịna oro inikiet inikiet. Mme ewetn̄wed esop ẹkpenyene ndikụt nte ke ẹnọ mme babru Special Needs Room Request ke eti ini ẹka itiembono oro ẹdotde. Edieke anade afo abiat ndutịm ufọkidụn̄ oro ẹkenamde ẹbe ke san̄asan̄a ndutịm, afo ekpenyene nditọt enyeneufọk ye Itieutom Unọ Ufọkidụn̄ usọp usọp man ẹkeme ndifiak mmen ubet oro nnọ owo efen.
Mme Kad Idiọn̄ọ: Mbọk dian kad idiọn̄ọ 1995 ke itiembono ye ke adan̄aemi akade-ka onyụn̄ ọnyọn̄de-nyọn̄ itiembono. Emi esiwak ndinam nnyịn ikeme ndinọ eti ikọ ntiense ke adan̄aemi ikade isan̄. Ẹkpenyene ndibọ kad idiọn̄ọ ye efọk ebe ke esop mbufo, sia mmọ mîdidụhe ke itiembono. Ti ndikama kad Medical Directive/Release fo eke idahaemi. Mbonufọk Bethel ye mme asiakusụn̄ ẹkpenyene n̄ko ndikama kad idiọn̄ọ mmọ.
Utom Unyịmesịt: Nte afo emekeme ndisio ini nnịm ke mbono emi man an̄wam ke kiet ke otu mme itieutom? Ndinam n̄kpọ nnọ nditọete nnyịn, ekpededi ke ibat ibat hour, ekeme ndinen̄ede nnọ un̄wam onyụn̄ ada ndusụk uyụhọ edi. Edieke afo ekemede ndin̄wam, mbọk ka kowụt idemfo ke Itieutom Utom Unyịmesịt ke itiembono emi. Nditọwọn̄ oro mîsịmke isua 16 ke emana ẹkeme n̄ko nditịp n̄kpọ nsịn ediye ediye ke ndinam utom ke idak ndausụn̄ ete m̀mê eka m̀mê akamba owo efen oro odotde.
Ikọ Ntọt: Ebede ke ndidu ke edidemede mban̄a mme mfịna oro ẹkemede ndidemede, nnyịn imekeme ndisio idem nnyịn ke ndusụk mfịna. Ediwak ini mme inọ ye mme idiọkowo eken ẹsiyịp n̄kpọ mbon oro ẹwọrọde ẹkpọn̄ n̄kann̄kụk ufọk mmọ. Kụt ete ke ọmọkọbi moto fo kpukpru ini, ndien kûdede ukpọn̄ n̄kpọ ndomokiet oro ẹkemede ndida n̄kụt man odomo owo ndibom ndụk. Mbon n̄wo ye mme inọ ekpatọfọn̄ ẹsiwụk ntịn̄enyịn mmọ ke ikpọ otu. Idiwụtke eti ibuot ndikpọn̄ ọsọn̄urua n̄kpọ ekededi ke n̄kpọitie fo. Afo ukemeke ndifiọk m̀mê kpukpru owo ẹmi ẹdude ẹkpere fi ẹdi Christian. Ntak emi onịmde n̄kpọ idomo ekededi? Ẹma ẹbọ mme ntọt ẹban̄a nte ndusụk mbonan̄wa ẹkedomode nditap nditọwọn̄ nda ndaha. NAM NDITỌ FO ẸDU KE EBIET EMI EKEMEDE NDIKỤT KPUKPRU INI.