Obufa Ndutịm Usen Akpan Mbono
1 Ntak emi nnyịn ikpatan̄ade eti mbụk ye unana editek ke ifịk? Nso ẹdi se ẹyomde ke owo ndidi ọkwọrọ eti mbụk? Didie ke idem mbon o-bụt ẹkeme ndinam usio-ukot ndibuana eti mbụk ye mbon en̄wen? Ẹyebọrọ mmọemi ye mme mbụme eken ẹnamde owo ekere n̄kpọ ke ndutịm usen akpan mbono emi editọn̄ọde ke March, ye ibuotikọ oro “Ndidot nte Mme Asan̄autom Eti Mbụk.”—Men 2 Corinth 3:5, NW domo.
2 Nte ikọt Jehovah, ana nnyịn ikpeme eduuwem nnyịn. N̄kparawa owo ẹmi ẹditịn̄de nte mmọ ẹkebiọn̄ọde mfịghe ubọkn̄ka ẹyenọ mme ifiọkutom ẹmi ẹkamade nsịnudọn̄. Ẹyenọ mme ete ye eka ima ima nsịnudọn̄ kaban̄a udọn̄ oro odude ndinọ nditọ mmọ ukpep nte mme asan̄autom Abasi. Ẹyen̄wam kpukpru nnyịn ndikụt udọn̄ oro odude ndikwọrọ ikọ ye mme edidiọn̄ oro ẹnade ẹbet nnyịn ye mbon oro ẹkopde uyo nnyịn.—1 Tim. 4:16.
3 Ke akpanikọ baptism edidi akpan n̄kpọ eke usen oro. Mbemiso edinam emi, ẹyenọ utịn̄ikọ emi ọkọn̄ọde ke Bible emi akpan akpan edinyenede mbufa owo ẹmi ẹyakde idem ẹnọ. Nte ededi, kpukpru owo ẹmi ẹdude ẹyeyom nditịm nnọ n̄kpan̄utọn̄ nte ẹtịn̄de ikọ ke ibuotikọ baptism ẹnyụn̄ ẹnamde se enye ọwọrọde an̄wan̄a. Owo ekededi emi oyomde ndina baptism ke usen akpan mbono ekpenyene ndinam esenyịn oro etiede ibuot ọfiọk emi anyanini mbemiso man otodo enye enyene ini oro ekemde ndinam ndutịm kaban̄a mbiowo ndidụn̄ọde mme mbụme oro ẹnịmde ye mbon baptism.
4 Akpan n̄kpọ en̄wen edidi akpan utịn̄ikọ emi etịn̄ikọ edide esenowo edinọde. Ẹkot enye “Ẹdot Ẹnyụn̄ Ẹtịm Idem nte Mme Asan̄autom Abasi.” Ẹyeneme ẹban̄a ndutịm inan̄ ẹmi ẹtịmde nnyịn idem nte mme asan̄autom, ndien utịn̄ikọ oro eyesịne mme ifiọkutom ẹmi ẹbọpde mbuọtidem.
5 Nam ntịmidem idahaemi ndidu ke ofụri ndutịm. Kụt ete imọnọ mbon oro ẹnyenede udọn̄ ye nditọ ukpepn̄kpọ Bible ikot man otodo mmọ n̄ko ẹkeme ndibọ ufọn nto usen unọ ukpep eke ukara Abasi emi. Ntem ke ikeme ndikụt ke nnyịn “imotịm idot” nte mme asan̄autom eti mbụk.