Mbono District “Mme Isụn̄utom Emem Abasi” eke 1996
1 Ndutịm mbono district isua emi ke akpanikọ eyen̄wam nnyịn ndimụm emem Abasi nnyịn n̄kama, enye eyenyụn̄ anam an̄wan̄a udeme oro nnyịn inyenede ndin̄wam mbon en̄wen ẹnyene utọ emem oro. Nte ẹketọtde ke Utom Obio Ubọn̄ Nnyịn eke May 1996, ibuotikọ edi “Mme Isụn̄utom Emem Abasi.” Nte afo amanam ndutịm fo mbak udutaba ndutịm emi ndomokiet?
2 Ndutịm Usen Ita: Nnyịn imọfiọk ke mbufo ẹyedara mbono isua emi ọyọhọ ọyọhọ ẹyenyụn̄ ẹnyọn̄ ufọk ye obufa odudu. (2 Chron. 7:10) Nnyịn iyefiak inyene ndutịm usen ita isua emi. Nte afo ama ananam ndutịm ndibọ nduọkodudu ke itie utom idịbi udia man ekeme ndidụk ofụri ini oro? Ndusụk mbono oro ẹdibemde iso ẹnịm ẹdida itie mbemiso ẹtrede n̄wed ẹka nduọkodudu. Edieke afo enyenede nditọ oro ẹdude ke isua ufọkn̄wed, nte afo amasian mme andikpep mmọ ke edu ukpono nte ke mmọ ididụhe ke Friday kaban̄a akpan ikpehe ubọ ukpep ido ukpono mmọ emi?
3 Utom Obio Ubọn̄ Nnyịn eke May 1996 asiak mme usenọfiọn̄ ye mme itie oro ẹdinịmde mbono 104 ke Nigeria. Etisịm emi ewetn̄wed esop mbufo ama asian mbufo aban̄a enyeemi ẹdemede mbufo ẹsịn. Ke mbono district eke Ota 7 ye Uli 7, ẹyekabade ndutịm ẹsịn ke Usem Idiọn̄ọ Mbon America.
4 Ndutịm editọn̄ọ ke Friday ke n̄kanika ebede 9 ke minit 20 onyụn̄ etre ke Sunday ke n̄kpọ nte n̄kanika ebede 3 ke minit 30 uwemeyo. Ke Saturday ye Sunday, ndutịm editọn̄ọ ke n̄kanika usụkkiet usenubọk. Nte nnyịn iyewụt nditọete nnyịn ẹdide mbonusọn̄ ye mbon n̄kpọnnam mfọnido ke nditre nditie ke mme n̄kpọitie ẹdude ke mme ebiet ẹmi ẹdotde ẹnyụn̄ ẹfọnde owo ke idem ẹkan? Ẹti ẹte ke “ima . . . iyomke ufọn esiemmọ.”—1 Cor. 13:4, 5; Phil. 2:4.
5 Nte Afo Eyedi Se Ẹbande? Ke ama okokot oto Mme N̄ke 27:17, “Ukwak aban ukwak ọsọp,” Enyọn̄-Ukpeme eke August 15, 1993, ọkọdọhọ ete: “Nnyịn itie nte n̄kpọutom oro oyomde ẹban enye ọsọp kpukpru ini. Sia ndima Jehovah nnyụn̄ nnam mme ubiere ẹmi ẹkọn̄ọde ke mbuọtidem nnyịn ọwọrọde ndidi isio ye ererimbot, nnyịn kpukpru ini inyene ndinam n̄kpọ ke isio isio usụn̄, yak idọhọ, ikpụhọde ikpọn̄ ata ediwak owo.” Didie ke nnyịn ikeme ndida item oro nsịn ke edinam?
6 Nnyịn idi onyụn̄ ana ika iso idi isio ye ererimbot. Inyene ndimụm n̄kaiso ukeme ndinam emi n̄kama edieke iyomde ndisịn esịt ke nti utom. (Titus 2:14) Ntak edi oro ibuotikọ Enyọn̄-Ukpeme oro ẹkekotde ke enyọn̄ emi akakade iso ọdọhọ ete: “Ke ini nnyịn idude ye mbon efen ẹmi ẹmade Jehovah, nnyịn iban kiet eken—nnyịn idemede kiet eken inọ ima ye nti utom.” Mbono district edi kiet ke otu ndutịm oro otode Jehovah ndin̄wam nnyịn isọp ke n̄kan̄ eke spirit. Nnyịn ikpamaha nditaba ikpehe ndutịm emi ekededi.
7 Owo Eti Ibuot Eyekpan̄ Utọn̄: N̄kpan̄utọn̄ edi usọ oro anade ẹkọri. Ẹsidọhọ ẹte ke ukeuke owo esiti mbahade kiet kpọt ke se enye okopde—inamke n̄kpọ m̀mê enye ekere ke ikenen̄ede ikpan̄ utọn̄ adan̄a didie. Sia nnyịn idude uwem ke eyo emi mme n̄kpọ ẹsiwọn̄ọde owo ntịn̄enyịn, ndusụk ini nnyịn imekeme ndikụt nte ọsọn̄de ndiwụk ekikere ke anyanini. Nte nnyịn imekeme ndifori udomo oro inọde n̄kpan̄utọn̄, akpan akpan ke ini itiede ke otuowo oro ẹwakde ikpan̄ utọn̄ inọ owo emi etịn̄de ikọ? Edieke ẹkpedọhọde fi etịn̄ ndutịm usen kiet kiet ibio ibio ke ama ọkọnyọn̄ mbono edi, nte ekpekeme ndinam ntre? Didie ke kpukpru nnyịn ikeme ndifori ukeme nnyịn ndikop nnyụn̄ ntịm nnọ n̄kpan̄utọn̄ ke ikpehe kiet kiet oro ẹnemede ke ndutịm mbono?
8 Ntotụn̄ọ udọn̄ edi akpan n̄kpọ, koro ibuot uti n̄kpọ emi Abasi ọnọde ikemeke ndinam utom uforo uforo ke enye mîdụhe. Ke uwụtn̄kpọ, nte owo owụtde udọn̄ ke ibuot nneme akan, ntre ke edi mmemmem nditi mme akpan n̄kpọ utịn̄ikọ m̀mê ikpehe ndutịm oro. Edi, ekese ọkọn̄ọ ke nnyịn nditịm nnọ n̄kpan̄utọn̄ n̄kan ke mme n̄kpọ ẹmi inyenede ifet ndikop ke mme mbono district. Ntotụn̄ọ udọn̄ nnyịn ye n̄kpan̄utọn̄ oro inọde ke ikpehe kiet kiet ke ndutịm mbono enyene n̄kpọ ndinam ye idaha eke spirit nnyịn eke idahaemi ọkọrọ ye idotenyịn ini iso nnyịn. Idịghe ọkpọsọn̄ n̄kpọ ndidiọn̄ọ nte ke nnyịn idikemeke ndinọ ọyọhọ n̄kpan̄utọn̄ edieke idomode nditie ke mme itieidụn̄ ẹmi ẹdude ke Itie Mbono n̄kop ndutịm nte ndusụk ẹkenamde ke ini edem. Ntre, kpukpru owo ẹkpenyene ndisop idem ke efe mbono nnyụn̄ ntiene ndutịm oro ketket. Ẹsikpep nnyịn mme usụn̄ Jehovah ke mme mbono ẹnyụn̄ ẹnọ nnyịn item ndida nnam utom unyan̄a uwem. (1 Tim. 4:16) Da idemfo nte nsụn̄ikan̄ emi odude ke akpa emi oyobio anamde adaha. Mme un̄wọn̄ọ Jehovah ẹdi ọkpọsọn̄ an̄kọ idotenyịn. Edieke owo mînọhọ n̄kpan̄utọn̄ ke mme edinam Christian onyụn̄ ayakde ekikere esie oyo, enye ekeme nditaba mme akpan n̄kpọ item ye ukpep oro ẹkemede ndinam enye okûsịp ke n̄kan̄ eke spirit.—Heb. 2:1; 6:19.
9 Ke ediwak ikpehe ke ererimbot, nditọete nnyịn ẹsisịn akwa ukeme ndidụk mme mbonoesop. Esidi utịben̄kpọ ndikụt nte mmọ ẹnọde ọyọhọ n̄kpan̄utọn̄ ke mme mbono. Ke ndusụk itie, nte ededi, mme owo ẹsiwọn̄ọde ntịn̄enyịn mbon en̄wen ebe ke ndisan̄a ke udịm n̄kanade an̄wa mbono ke mme ini edinam. Mbon eken ẹsidi ke idiọk ini. Ke ndusụk mbono ẹmi ẹkebede, ekedi ọkpọsọn̄ n̄kpọ ndikop edinam ke mme akpa minit ifan̄ sia ediwak owo ẹkeyode ẹkanade an̄wa mbono ye edem ikpehe oro mme owo ẹtiede. Mmọemi isiwakke ndidi nditọete oro ẹdude ke utom m̀mê mme eka ẹmi ẹsede ẹban̄a mme udọn̄ n̄kpri nditọ mmọ. Ekese uyom emi esito mme owo ẹmi ẹkam ẹdide-di. Isua emi Itieutom Mme Adaidaha ke usọ eyetịm ọnọ ntịn̄enyịn ke mfịna emi, ndien nte idoride enyịn, kpukpru owo ẹyetetie ke ini etieibuot okpokoro ọdọhọde nnyịn inam ntre. Ẹyetịm ẹdara edidianakiet mbufo ke afan̄ emi.
10 Ewe nti ekikere ẹdin̄wam nnyịn itịm inọ n̄kpan̄utọn̄ ke ndutịm mbono inyụn̄ iti ekese n̄kpọ oro ẹnemede? Odot ẹfiak ẹtịn̄ se ẹketịn̄de ke mme isua ẹmi ẹkebede: (a) Wụk ntịn̄enyịn ke akpan ntak anamde aka obio mbono. Idịghe man abuana ke unọ idem nduọkodudu, edi ndinọ n̄kpan̄utọn̄ nnyụn̄ mbọ ukpep. (Deut. 31:12) Domo ndinyene nduọkodudu oro ekemde kpukpru okoneyo. Edieke idem enen̄erede emem fi ke ini edide mbono, ọyọsọn̄ ndiwụk ekikere. (b) Nọ idemfo ekese ini man onịm moto fo ke itie onyụn̄ etetie mbemiso edinam ọtọn̄ọde. Ndifefehe n̄ka itie ke akpatre minit edida ikosịm ke afo nditaba ndusụk ikpehe ntọn̄ọ. (c) Wet mbio mbio akpan n̄kpọ nịm. Ndiwet n̄kpọ n̄kaha ekeme ndidi n̄kpọ ubiọn̄ọ ọnọ eti n̄kpan̄utọn̄. Ke ini ewetde n̄kpọ, kụt ete ke imọ itabake mme n̄kpọ eken ke ntak owụkde ntịn̄enyịn ke n̄wetnnịm n̄kpọ fo. (d) Ke ini ẹbede ẹdụk ikpehe edinam efen ke mbono, kere ban̄a enye ye ọkpọsọn̄ udọn̄. Bụp idemfo ete, ‘Nso ke n̄keme ndikpep nto ikpehe edinam emi oro ediforide esịtekọm ye ima oro nnyenede nnọ Jehovah? Didie ke ntọt emi ekeme ndin̄wam mi nnyene obufa edu ata ọyọhọ ọyọhọ? Didie ke emi edin̄wam mi nnam n̄kọri ke utom ukwọrọikọ mi?’
11 Ido Oro Ọnọde Utom Ukwọrọikọ Nnyịn Uku: Paul ama esịn udọn̄ ọnọ Titus ete edi “uwụt n̄kpọ eti utom.” Ebede ke ndikpep n̄kpọ oro mînyeneke mbiara, Titus ama an̄wam mbon en̄wen “ẹnam ukpep-n̄kpọ Abasi Andinyan̄a nnyịn enyene uku ke kpukpru usụn̄.” (Titus 2:7, 10) Kpukpru isua, nnyịn imesibọ mme n̄kpọ editi eke edu mfọnido iban̄a ntak emi eduuwem uten̄e Abasi edide ata akpan n̄kpọ ke ini inamde isan̄ ika inyụn̄ inyọn̄de mbono, ọkọrọ ye ke ini emi idude ke mme itieidụn̄ nnyịn ye ke mbono. Isua oko nnyịn ima ifiak ikop mme ikọ idatesịt oro idimade ndibuana ye mbufo.
12 Ete enyene-ebiet kiet ọkọdọhọ ete: “Esidi n̄kpọ inemesịt kpukpru ini ndinọ Mme Ntiense ufọk koro mmọ ẹnyene ime, ẹdiana kiet, ẹnyụn̄ ẹsitịn̄ enyịn ẹse nditọ mmọ.” Ewetn̄wed ufọkisen kiet ọkọdọhọ ke utom imọ “esinen̄ede efere ke ini Mme Ntiense ẹdụkde ẹnyụn̄ ẹwọrọde ke ufọkisen oro koro, kpa ye oro ẹkenyenede ndibet ke udịm, mmọ kpukpru ini ẹnyene ido, ime, ye edikere mban̄a.” Ido mme uyen Ntiense ẹmi ẹkedude ke ukem ufọkisen ye enye ama otịm otụk n̄wan kiet tutu enye ọdọhọ ẹnọ imọ ndusụk n̄wed ẹban̄ade esop nnyịn.
13 Ke n̄kan̄ eken, oyom inam ukpụhọde ke ndusụk ikpehe. Nnyịn ikpama ndibuana ndusụk n̄kpọ oro ẹkụtde ẹmi ẹkenọde ẹsọk N̄ka. Esenyịn oro asan̄ade-san̄a ama ọtọt ke oyom ẹtịm ẹse nditọ Mme Ntiense Jehovah enyịn. Ndusụk owo ẹsifehe ẹkanarede ẹnyụn̄ ẹnam ekese uyom ke mme itieidụn̄ mmọ, ntem ẹtịmerede isenowo eken. Oyom inọ nditọ nnyịn ukpep man ẹdiọn̄ọ ke ido Christian inyeneke-nyene adan̄a ini. Enye itreke ke ini nnyịn iwọrọde ikpọn̄ an̄wa mbono. Enye enyene ndibịghi ke hour 24 ke usen. Ido nnyịn ke mme itieidụn̄ ye mme efak ekpenyene ndiwụt ukpono ukem nte ke ini nnyịn itiede ye nditọete nnyịn ke mme ikpehe edinam, ibọde ukpep ito Jehovah.—Isa. 54:13; 1 Pet. 2:12.
14 Ndusụk udomo ubiatokụk abuana ke edibọp ye edinịm okụre Itie Mbono ke eti idaha ye edise mban̄a nsio nsio n̄kpọ. Mme etịbe unyịmesịt nnyịn ẹsise ẹban̄a mme ubiatokụk ẹmi. Eyenete an̄wan kiet ye nditọ ẹdide uyen ẹkedi mbono ye esisịt okụk. Nte ededi, enye ye nditọ ẹma ẹsụk ẹnọ un̄wam ke ndinọ esisịt etịbe. Se owo kiet kiet ebierede ndinam ke afan̄ emi edi mbubehe idemowo, edi nnyịn imọdiọn̄ọ ke mbufo ẹmedara mme utọ n̄kpọ editi oro.—Utom 20:35; 2 Cor. 9:7.
15 Ẹdiọn̄ọ Nnyịn ke Usụn̄ Oro Isịnede N̄kpọ: Usụn̄ oro isịnede n̄kpọ ayarade ekese aban̄a nnyịn ye nte nnyịn ikerede iban̄a mbon en̄wen. N̄kon̄ine, nsuahade nsuahade ido usịnen̄kpọ ẹkanarede ekese uyen ye ediwak ikpọ owo ẹkụk ke ufọkn̄wed m̀mê ke itieutom mmọ. Ke isua kiet kiet usịnen̄kpọ ẹkabade ẹbe ubọk ẹkan, idem ẹnyenede ndịk. Edieke nnyịn mîkpemeke idem, mme ubọkn̄ka ererimbot ẹkeme ndinam nnyịn isịne n̄kpọ nte mmọ ẹsịnede. Ediwak n̄kon̄ine usịnen̄kpọ idotke ndisịne ke mme mboho oro ẹnịmde kaban̄a utuakibuot. N̄wed oro ẹkebọde ke ẹma ẹkenịm kiet ke otu mme akpatre mbono isua oko ama etịn̄ aban̄a esịtekọm oro ẹnyenede ẹnọ ndutịm oro edi ama adian ete: “Mma n̄kop n̄kpaidem mban̄a ntak emi ata ediwak n̄kaiferi ẹkesịnede utọ mbio mbio ọfọn̄ oro, itọn̄ọfọn̄ oro etrede ke ekop, isọn̄ọfọn̄ oro ẹsiakde ọniọn̄.” Ke akpanikọ kpukpru nnyịn iyom ndisịne n̄kpọ ke usụn̄ oro odotde ye mme asan̄autom Christian ke mbono ye ke adan̄aemi idude ke ebuana n̄kaowo ke ndutịm ama okokụre. Ọfọn nnyịn ikere kpukpru ini iban̄a item oro apostle Paul ọkọnọde mme Christian ete ẹsan̄a “ke sụn̄-sụn̄ ido, ẹsịne n̄kpọ eke owụtde bụt ye eti ibuot.”—1 Tim. 2:9.
16 Anie enyene ndibiere n̄kpọ eke owụtde bụt, ‘eke edide sụn̄sụn̄’? Ndiwụt bụt ọwọrọ “nditre ndinam usanya m̀mê ndida ke ekikere idemowo.” N̄wed ukabadeikọ n̄ko akabade ediwụt bụt nte “editre ndinam n̄kpọ mbe ubọk.” N̄ka m̀mê mbiowo inyeneke ndinịm ibet kaban̄a usịnen̄kpọ ye ukamaidem. Kpa ye oro, nte mme n̄kon̄ine usịnen̄kpọ oro ẹwụtde bụt m̀mê odotde ikpanaha in̄wan̄în̄wan̄ inọ Christian? (Men Philippi 1:10 domo.) Ukamaidem ye usịnen̄kpọ nnyịn ikpenyeneke ndimụm ntịn̄enyịn oro mîdotke. Ana nnyịn ikama idem nte eyede ndikụt, idịghe ke ido ererimbot m̀mê se itekde owo esịt. Nte mme asan̄autom eti mbụk, nnyịn ndisịne n̄kpọ nnyụn̄ n̄kama idem nte odotde ke ini oro idude ke obio mbono district ada ukpono ọsọk Jehovah onyụn̄ etịn̄ n̄kpọ nte eyede aban̄a esop. Ntem, mme ete ye eka ẹyenịm uwụtn̄kpọ ndien ekem ẹkụt ẹte ke nditọ mmọ ẹsịne ọfọn̄ nte odotde kaban̄a edinam oro. Mbiowo ẹyeyom ndinịm eti uwụtn̄kpọ ẹnyụn̄ ẹben̄e idem ndinọ item ke edu mfọnido ke oyomde.
17 Mme Ukwak Usio Ndise ye Mme N̄kpọ Umụmikọ: Ẹnyịme ẹkama mme ukwak usio ndise ye mme n̄kpọ umụmikọ eken, ama akam edi imekere iban̄a mbon eken ke otu. Edieke isan̄ade ikanade isio ndise ke mme ini edinam, nnyịn iditịmekede mbon en̄wen ẹmi ẹdomode ndinọ n̄kpan̄utọn̄ kpọt edi nnyịn iyetaba ndusụk ndutịm oro ke idem nnyịn. Nnyịn imesiwak ndibọ ufọn n̄kan ke mbono ke itịmde ikpan̄ utọn̄ inọ mme etịn̄ikọ inyụn̄ iwetde mbio mbio n̄kpọ inịm. Nnyịn imekeme ndimụm n̄kpọ inọ eyenete eren m̀mê an̄wan emi edide owo n̄kpọnnam; nte ededi, kaban̄a eke idem nnyịn, nnyịn imekeme ndikụt nte ke inyọn̄de ufọk ke ima ikomụm edinam ebịghide ke ediwak hour, ini ididụhe ndidụn̄ọde ekese se ikomụmde. Owo inyeneke ndifak n̄kpọ umụmikọ ndomokiet ke ikan̄ ilektrik m̀mê ke ndutịm ukwak utịn̄ikọ, m̀mê ndiyak n̄kpọutom esịri usụn̄ emi ẹsan̄ade m̀mê ndibiọn̄ọ mbon en̄wen.
18 N̄kpọitie: Nnyịn imaka iso ndikụt ukpụhọde ke n̄kpọ aban̄ade edimụm n̄kpọitie nnịm. Isua oko, ekese mbufo ẹma ẹtiene ndausụn̄ emi: ẸMEKEME NDIMỤM N̄KPỌITIE NNỊM NNỌ MBONUFỌK MBUFO IKPỌN̄ÎKPỌN̄ YE OWO EKEDEDI ORO EKEMEDE NDIDI ASAN̄A YE MBUFO KE MOTO MBUFO. Ekeme ndidi afo ama okụt ke ọkpọsọn̄ mfịna ikodụhe koro ediwak owo ẹma ẹtiene in̄wan̄în̄wan̄ ndausụn̄ ẹmi. Ke akam edide akpan n̄kpọ akan, afo ndidiana kiet ama enem Jehovah esịt ye ‘ofụn anam-akpanikọ,’ emi ọnọde udia eke spirit emi.—Matt. 24:45.
19 Mme Tiket Udia: Nnyịn imesịn udọn̄ inọ edibabak ndep mme tiket udia mbemiso mbono. Nso idi uduak kaban̄a emi? Edibabak nnyam tiket udia esinam okụk odu ndibabak ndep mme akpan n̄kpọ udia nnọ mbono. Oyom ẹbabak ẹdep edesi, bia, gari, enan̄, unen, ọkọti, ikọn̄, ye mme n̄kpọ udia eken man mmọ ẹdu ẹnọ udịm udịm mbono district. Nte ido edide, ekọmurua udia esidọk akamba akamba nte ini nduọkodudu esisan̄ade ekpere ke December. Oyom esenyịn ndutịm udia mbono edep ediwak n̄kpọ udia ke mbemiso, ndien enye oyom okụk man anam emi. Ọsọsọn̄ N̄ka ndinyene okụk oro ekemde ndise mban̄a emi ye ediwak mbono oro ẹnịmde idahaemi ke idụt emi. Ntak edi oro nnyịn isịnde udọn̄ inọ mbufo ndibabak ndep tiket udia nto Kọmiti Mbono. Ẹyeda okụk emi ndien ẹbak ẹdep udia. Mbufo ẹyenen̄ede ẹbọ ufọn ẹto usụhọde ekọmurua udia ke itie unyamudia ye itie ubịtitọn̄ ke mme mbono ẹmi, sia ẹkemede ndidep mme n̄kpọ udia ke ini mmọ mînen̄ekede isọn̄ urua.
20 Ke ntre, nnyịn imesịn udọn̄ inọ mme esenyịn oro ẹtiede ibuot ye mme ewetn̄wed ke esop kiet kiet ndinam ndutịm man ẹbabak ẹdep tiket. Ẹkeme ndinam emi ebe ke anam ndutịm mbono ke esop kiet kiet. Mme asuanetop ẹkeme ndikpe okụk tiket mmọ ndondo oro ẹnemede ibuotikọ emi ke September. Ẹkpenyene ndiwet enyịn̄ nnịm. Ke ẹma ẹkedep tiket ẹto Kọmiti Mbono, ẹyekpọn̄ mmọ ẹnọ mme asuanetop oro ẹkekpede okụk. Mme asuanetop ẹkpenyene ndikama mmọ nte okụk ẹnyụn̄ ẹkama mmọ ye ntịn̄enyịn. Ẹkeme ndida tiket udia ẹmi ndep n̄kpọ ke itie unyamudia ye itie ubịtitọn̄ ke ndondo oro mme asuanetop ẹsịmde an̄wa mbono. Ẹsịn udọn̄ ẹnọ kpukpru mme asuanetop ndibabak ndep tiket udia ke nsụhọde n̄kaha se ẹdikamade ke akpa usen iba ke mbono oro. Ndinam ntre eyen̄wam ẹdep ediwak udia mbemiso mbono ọtọn̄ọde.
21 Ndinọ Mme N̄kpọ Udia: Nnyịn imesịn udọn̄ inọ editịp mme n̄kpọ udia nnọ mme mbono district. Emi ekeme ndisịne kpukpru orụk udia oro ẹdidiade, utọ nte bia, edesi, gari, ukọm, ọkọti, ntokon, tomato, mfri, ikọn̄, enan̄, unen, ye mme n̄kpọ udia en̄wen ekededi oro mbufo ẹkpemade nditịp. Emi edi eti usụn̄ ndinọ utom Obio Ubọn̄ ibetedem. Itieutom Ndutịm Udia ada kpukpru n̄kpọ udia ẹmi anam n̄kpọ. Mbufo nditịp mme utọ n̄kpọ udia oro eyen̄wam mbono ndinyene okụk ẹdibiatde onyụn̄ anam udia odu ke mfọn ọnọ mbon oro ẹdude ke utom usiakusụn̄.
22 Ẹkpenyene ndinam ndutịm ke esop nnọ editịp mme n̄kpọ udia ye edimen mmọ n̄ka An̄wa Mbono ke ndondo oro ẹnemede ibuotikọ emi. Nte ededi, ẹkpenyene ndida mme n̄kpọ udia oro ẹkemede ndibiara n̄ka ke nnennen ini mbak mmọ ẹdibiara mbemiso akpa mbono. Edieke Kọmiti Mbono mînọhọ mbufo nnennen ntọt kaban̄a ini emi ẹkpedade n̄kpọ udia ẹka, mbufo ẹmekeme ndinyene nneme ye mmọ. Ẹkeme ndimen n̄kpọ udia ekededi ẹmi mme asuanetop ẹdade ẹdi ke ini mmọ ẹnamde isan̄ ẹka mbono n̄ka itie ubon udia nnennen.
23 Nnyịn n̄ko iyom ndisịn udọn̄ nnọ mbufo ndika iso ke ndinọ un̄wam ke ndutịm utemudia ke mme mbono. Ido esidi ndikot mme esop oro mîdụkke mbono enyeoro ẹditem udia. Ke ini ẹkotde esop mbufo edinam utom emi, kpukpru mme asuanetop ke esop ẹkpenyene ndidomo ndinọ ọyọhọ ibetedem.
24 Ke adianade ye ndutịm ofụri ini oro ẹnamde ẹnọ edidia udia ke itie unyamudia ye itie ubịtitọn̄, edieke mme asuanetop ẹyomde ndidia udia oro mmọ ẹkekamade ẹto ufọk ẹdi ke efe mbono ke ini nduọkodudu, ẹnyịme mmọ ẹnam ntre. N̄ko, edieke ndusụk owo ẹyomde ndidep udia ke itie unyamudia m̀mê itie ubịtitọn̄ nsịn ke ọkpọkpọ usan mmọ nnyụn̄ ndia ke efe mbono, ẹkeme ndiyak ẹnam oro. Akpan n̄kpọ edi nte ke owo kiet kiet ekpenyene ndinam ebiet oro asana ke ama akadia udia okụre. Ndutịm mbono eyenam akpasa udọn̄ mbio oro ẹkemde ẹdu ẹnọ mme asuanetop ndidọn̄ nyọhọ-nsụhọ udia mmọ, ndien ẹkpenyene ndinam mme n̄kpọ unam ebiet asana ẹdu ẹkem. Edieke oyomde ẹkama n̄kpri ekebe udọn̄ udia, ẹnyịme ẹkama mmọ edieke mmọ ẹdidụkde idak n̄kpọitie fo. Nte ededi, owo ikpenyeneke ndikama ikpọ n̄kpọ udọn̄ udia ẹmi ẹsikamade ẹwọrọ an̄wa m̀mê n̄kpọsọn̄ mmịn ndụk efe mbono. Ẹkpenyene ndifep ndidia udia m̀mê ndita n̄kpọ ke ini edinam akade iso. Emi okpowụt unana ukpono ọnọ udia eke spirit oro ẹnọde.
25 Ke mîbịghike akpa Mbono District “Mme Isụn̄utom Emem Abasi” ọmọn̄ ọtọn̄ọ. Nte afo omokụre ntịmidem fo ndidụk, ndien nte afo idahaemi emeben̄e idem ndidara inem inem ebuana ye nti n̄kpọ eke spirit usen ita? Edi akam ofụri esịt nnyịn nte ke Jehovah eyediọn̄ mme ukeme fo ndidụk mbono isua emi.
[Ekebe ke page 6]
Mme N̄kpọ Editi Mbono District
Baptism: Mbon baptism ẹkpenyene nditie ke ikpehe oro ẹmekde ẹnịm ẹnọ mmọ mbemiso ndutịm ọtọn̄ọde ke usenubọk Saturday. Ẹma ẹkụt ke ndusụk owo ẹma ẹsịne orụk ọfọn̄ oro mînyeneke uku onyụn̄ odụride ntịn̄enyịn ọkpọn̄ edinam oro. Owo kiet kiet oro aduakde ndina baptism ekpenyene ndisan̄a ye ọfọn̄ uyeremmọn̄ eke owụtde iso o-bụt ye ọfọn̄ ukwọhọdeidem. Mbiowo esop ẹmi ẹdụn̄ọrede mme mbụme ke n̄wed Utom Nnyịn ye mbon baptism ẹyekụt ẹte ke mme akpan n̄kpọ ẹmi ẹn̄wan̄a owo kiet kiet. Ke etịn̄ikọ ama okokụre utịn̄ikọ baptism ye akam, etieibuot okpokoro edinam eyenọ mbon baptism mbio mbio ntọt onyụn̄ asiak ikwọ. Ke ẹma ẹkekwọ akpatre udịm ikwọ, mme adaidaha ẹyeda mbon baptism usụn̄ ẹka itie emi ẹdibụhọde ke mmọn̄. Sia baptism ke idiọn̄ọ uyakidem owo nnọ edide ata n̄kpetn̄kpet ye ọkpọkpọ mbubehe ke ufọt owo oro ye Jehovah, ndutịm idụhe inọ se ẹkotde nsan̄a baptism emi mbon baptism iba m̀mê akande oro ẹfatde m̀mê ẹkọpde ubọk ke adan̄aemi ẹnịmde mmọ baptism. Mbọk tịm fiọk ete ke idụhe n̄kpọ ke N̄wed Abasi oro oyomde nditọete iban ẹbọp m̀mê ẹnịm ibuot in̄wan̄ ke ini ẹnade baptism. Ẹnyịme ekededi ke otu mbiba.
Mme Kad Idiọn̄ọ: Mbọk dian kad idiọn̄ọ 1996 ke itiembono ye ke adan̄aemi akade-ka onyụn̄ ọnyọn̄de-nyọn̄ itiembono. Emi esiwak ndinam nnyịn ikeme ndinọ eti ikọ ntiense ke adan̄aemi ikade isan̄. Ẹkpenyene ndibọ kad idiọn̄ọ ye efọk ebe ke esop mbufo, sia mmọ mîdidụhe ke itiembono. Kûbet tutu osụhọ usen ifan̄ ndisịm mbono mbemiso oyomde kad fo ye eke ubon fo. Ti ndikama kad Medical Directive/Release fo eke ndondo emi.
Itieidụn̄: Nnyịn imafiak iben̄e edidianakiet kpukpru owo kaban̄a ufọkidụn̄ oro itiembono ọnọde. Edieke nnyịn ifụmide ndutịm N̄ka inyụn̄ ikọbọ ufọkidụn̄ oro itiembono ama ọkọbọbọ, nnyịn ibiat ọkpọsọn̄ utom oro nditọete nnyịn ẹmi ẹkediomide se imemde urua ikan ẹkenamde. EDIEKE AFO ENYENEDE MFỊNA KE UFỌKIDỤN̄, mbọk kûmen̄e ndidụri ntịn̄enyịn esenyịn Itieutom Unọ Ufọkidụn̄ ke itiembono oro n̄wụt man enye ekeme ndin̄wam fi ndikọk mfịna oro inikiet inikiet. Mme ewetn̄wed esop ẹkpenyene ndikụt nte ke ẹnọ mme babru Special Needs Room Request ke eti ini ẹka itiembono oro ẹdotde. Edieke anade afo abiat ndutịm ufọkidụn̄ oro ẹkenamde ẹbe ke ndutịm san̄asan̄a udọn̄, afo ekpenyene nditọt enyeneufọk ye Itieutom Unọ Ufọkidụn̄ usọp usọp man ẹkeme ndifiak mmen ubet oro nnọ owo efen.
Utom Unyịmesịt: Nte afo emekeme ndisio ini nnịm ke mbono emi man an̄wam ke kiet ke otu itieutom? Ndinam n̄kpọ nnọ nditọete nnyịn, ekpededi ke ibat ibat hour, ekeme ndinen̄ede nnọ un̄wam onyụn̄ ada ndusụk udomo uyụhọ edi. Edieke afo ekemede ndin̄wam, mbọk ka kowụt idemfo ke Itieutom Utom Unyịmesịt ke itiembono. Nditọwọn̄ oro mîsịmke isua 16 ke emana ẹkeme n̄ko nditịp n̄kpọ nsịn ediye ediye ebe ke ndinam utom ke idak ndausụn̄ ete m̀mê eka m̀mê akamba owo efen oro odotde.
Ikọ Ntọt: Du ke edidemede ban̄a mme mfịna oro ẹkemede ndidemede, man ekpefep mme mfịna oro mîdotke. Ediwak ini mme inọ ye mme idiọkowo eken ẹsiyịp n̄kpọ mbon oro ẹwọrọde ẹkpọn̄ n̄kann̄kụk ufọk mmọ. Kụt ete ke ọmọkọbi moto fo kpukpru ini, ndien kûdede ukpọn̄ n̄kpọ ndomokiet oro ẹkemede ndida n̄kụt man odomo owo ndibom ndụk. Mbon n̄wo ye mme inọ ekpatọfọn̄ ẹsiwụk ntịn̄enyịn mmọ ke ikpọ otu. Ikpowụtke eti ibuot ndikpọn̄ ọsọn̄urua n̄kpọ ekededi ke n̄kpọitie fo. Afo ukemeke ndifiọk m̀mê kpukpru owo ẹmi ẹdude ẹkpere fi ẹdi Christian. Ntak emi onịmde n̄kpọ idomo ekededi? Ẹma ẹbọ mme ntọt ẹban̄a nte ndusụk mbonan̄wa ẹkedomode nditap nditọwọn̄ nda ndaha. NAM NDITỌ FO ẸDU KE EBIET EMI EKEMEDE NDIKỤT KPUKPRU INI.