Nte Nnyịn Imoyom Bible?

OXANA, n̄kaiferi otode Russia, ama okop idatesịt ke ini enye okokụtde Bible emi anyam-n̄wed ke efak ke Moscow ọkọnọde. Ọkpọsọn̄ udọn̄ Oxana ama otụk John, ufan esie, emi okotode idụt emi ẹkamade Bible ifụre ifụre. Enye ama onyịme ete, “Ami—emi mmenịmke edidu Abasi ke akpanikọ—mma nyom ndidep enye nnọ n̄wan oro.” Okposụkedi Oxana akafan̄ade ke akpa, enye ke akpatre ama ọbọ enọ John.

Ediwak owo, ukem nte Oxana, ẹnyene ọkpọsọn̄ udọn̄ ndinyene Bible. Emi edi akpanikọ akpan akpan ke mme idụt oro owo mîkayakke ẹkama enye ke ediwak isua. Mme andimịn̄ magazine emi, ke uwụtn̄kpọ, ke ẹnam utom ọkpọsọn̄ ndisan̄a ikpat kiet ye udọn̄ oro ẹnyenede ẹban̄a Bible ke n̄kani obio ukara Soviet, ye ke mme ikpehe ererimbot eken. Ke akpa ini, ediwak owo ke mme ikpehe ẹmi ẹnyene ifet ndinam nnennen ndụn̄ọde Bible—ndien okopodudu etop esie esidụri ediwak owo ada.

Mbon Nsụkuyo ye Mbon Eyịghe

Ke edide isio ye oro, nte ẹtịmde ẹfiọk ke n̄kan̄ edem edere Europe, ẹma ẹsụhọde Bible itie ẹyak ẹsịn ke itie ubonn̄wed ye unana edikot tutu ntọn̄ ofụk enye. Ndusụk owo ẹdọhọ ke enye edi “Mbụk eke mînyeneke uwem!” ẹdiande do ẹte, “Ẹkewet enye ẹnọ emana en̄wen. Enye inyeneke baba n̄kpọ kiet ndinam ye owo eyomfịn.” Idem mme ọwọrọetop ọkwọrọ ederi ẹnam an̄wan̄wa utịn̄ikọ oro osụhọrede Bible itie. Ẹtọt ke The Star, kpa n̄wedmbụk n̄kpọntịbe South Africa, ẹban̄a Desmond Tutu akwa bishop Anglican, nte ọkọdọhọde ete: “Odu mme ikpehe Bible oro mînyeneke nsinsi ufọn.” Mme utọ utịn̄ikọ ntem ẹnam ediwak owo ẹyịk adan̄a nte mmọ ẹkpenyenede ndida Bible ke akpan n̄kpọ.

Ufọn Ndinyene Ndausụn̄

Mbon nsụkuyo ye mme andinịm ke akpanikọ ukem ukem ana ẹnyịme nte ke ererimbot oyom usọbọ ẹnyenede ufọn akan nte akanam oyomde. Alvin Toffler ekewet ke n̄wed esie oro, Future Shock ete, “Ibọhọke owo ọsọsọp ekpep ndikara udomo oro mme ukpụhọde ẹdade itie ke mbubehe idemesie ye eke n̄kaowo ke ofụri ofụri, nnyịn isak iso ise akwa . . . n̄wụre.” Ẹkenọ ntọt oro ke se iwakde ikan isua 20 ẹmi ẹkebede. Etie nte n̄wụre oro Toffler eketịn̄de aban̄a ke ada itie idahaemi.

Nte isua ikie emi asan̄ade ekpere utịt esie, mme n̄kọri ke ifiọk usion̄o mbufa n̄kpọ ndi ye ikpọ ifiọk owo ẹmekpu ndida ererimbot oro enyenede iwụk ndi. Edikpu amada itie idotenyịn oro ẹkenyenede ke ndondo emi ẹban̄a ndutịm obufa ererimbot, ndien uwem ediwak owo omosụhọde okosịm edin̄wana ke usen ke usen ndidu uwem.

Ndụn̄ọde owụt nte ke ubahade ndutịm uforo oro odude ke ufọt mbon inyene ye mme ubuene amakabade edi akwa ukpe. Ndụn̄ọde oro ẹkenamde ndondo emi omowụt nte ke mbahade 20 eke ikie kpọt ke otu ibat mme andidụn̄ isọn̄ ẹnyene mbahade 82.7 eke ikie ke otu inyene ererimbot. Nte eyịghe ndomokiet odu kemi ekọn̄, akan̄, udọn̄ọ, ntịme, ye ubiatibet ẹdide ọsọ n̄kpọ ke ediwak idụt? Mfịghe ediyọ idaha eke uwem oro ataharede ke ada akwa mfịna ọsọk mme ntụk owo. Nte utịp, idem ata akpan ikpehe eke n̄kaowo, kpa ubon, ke okụt mbiara.

Okposụkedi ediwak owo, ukem nte Toffler, ẹnọde ekikere nte ke edi mbiomo owo “ndidụn̄ọde ofụri ofụri mbufa usụn̄ edinyene iwụk ye ifụre,” uyarade owụt nte ke ubonowo inyeneke ukeme ndinọ idemmọ usọbọ.

N̄kukụre Usụn̄ Efen

Edisana Bible, kpa uwetn̄kpọ emi ẹketọn̄ọde ndiwet ke n̄kpọ nte isua 3,500 ẹmi ẹkebede, ikpụhọkede ke ediwak isua ikie ẹmi ẹkebede. Mme edumbet esie ikpụhọkede. Ke uwụtn̄kpọ, ẹwụt nte mme ikọ Jeremiah 10:23 ẹdide akpanikọ mfịn akan nte akanam edide: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” Edieke mme owo mîkemeke ndinen̄ede ikpat mmọ, anie ekeme? Bible anyan ubọk owụt n̄kukụre akpan Ebiet ndausụn̄: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.”—Isaiah 48:17.

Ebede ke mme page Bible, Jehovah Abasi emekpep nnyịn ndin̄wam idem nnyịn. Mmọ ẹyọhọ ye item oro owụtde nnyịn usụn̄ oro akpanade nnyịn isan̄a. Item esie enyene ufọn mfịn ukem nte ekenyenede ke usen oro ẹkewetde enye. Ibuotikọ oro etienede eyedụn̄ọde nte Bible enyenede ufọn ọnọ emana nnyịn mfịn. Ke mme nsio nsio n̄kpọ, ọtọn̄ọde ke nsọn̄idem osịm inyene, uwem ufọk, ye ọkpọkpọ edu owo, afo eyekeme ndikụt nte ke Bible ke akpanikọ edi itiat oro enyenede nsọn̄ọnda ke ererimbot mfịn oro mînyeneke iwụk.

[Ndise ke page 4]

Bible edi ukwak nsọn̄ọnda ke ntịme ntịme ererimbot mfịn