Edikpọn̄ Utom—Usụn̄ Ebererede Ọnọ Utom Ukara Abasi?
EDIKPỌN̄ utom—ye ediwak owo enye esidi utịt ọnọ anyanini mfịghe ye iyatesịt. Ke ẹma ẹkekụk ẹsịn ke idaha edinam utom oro etiede mba mba m̀mê oro etiede uyat uyat, oro ẹnamde ofụri ini, ediwak owo ẹsidori enyịn ke edikpọn̄ utom ndiberede usụn̄ nnọ mme isua nduọkodudu ye ọkpọkpọ ifụre. Ata ediwak ini, nte ededi, usụn̄ oro esida okosịm edikop mfek uwem ye mmemidem. Unọ idem nduọkodudu ye mme edinam ini nduọkodudu isikam inamke owo ekere ke imenyene ufọn nte utom anamde.
Ye Mme Ntiense Jehovah, edikpọn̄ utom ekeme ndiberede ‘akamba usụn̄ ndinam akwa utom.’ (1 Corinth 16:9) Okposụkedi usọn̄ akamade mme mfịna ye mme mmeme esie, ndusụk mbonusọn̄ ẹkụt ẹte ke ye un̄wam Jehovah mmimọ imekeme ndifori utom oro inamde inọ enye. Kere ban̄a mme ifiọkutom ndusụk Christian ẹdide mbonusọn̄ ke Netherlands. Ke isua utom 1995, owo 269 ke otu se ikawakde ikan mme asiakusụn̄ (mme anditan̄a Obio Ubọn̄ uyọhọ ini) 1,223 ẹkedi isua 50 ke emana m̀mê ẹsọn̄de ẹkan oro. Ke otu emi, 81 ẹkedi isua 65 ke emana m̀mê ẹsọn̄de ẹkan oro.
Ndusụk owo ẹkeme ndinam usiakusụn̄ n̄kukụre ke ndika iso ye ndutịm ofụri ini oro mmọ ẹketọn̄ọde ke adan̄aemi ẹnamde utom. (Men Philippi 3:16 domo.) Christian kiet oro ama ọkọkpọn̄ utom emi ekerede Karel eti ete: “Ke ini n̄kanamde utom idịbi udia mi, n̄kesitọn̄ọ utom ke n̄kanika ebe itiaba usenubọk. Ke ini n̄kọtọn̄ọde ndibọ okụk ukpọn̄ utom mi, mma mbiere ndika iso ke ukem edinam ofụri ini oro. Nyetọn̄ọ edinam usen ke ndinam unọ ikọ ntiense ye magazine ke efak ke itie mbehe tren kpukpru usenubọk ke n̄kanika itiaba.”
Ndutịm ẹnamde ye ntịn̄enyịn edi n̄ko ukpọhọde edikụt unen. (Mme N̄ke 21:5) Ke uwụtn̄kpọ, ndusụk owo ẹma ẹkeme ndinịm okụk oro ekemde ndida n̄n̄wam idemmọ ke utom ukwọrọikọ mmọ. Mbon eken ẹma ẹbiere ndisụhọde ọkpọkpọ ibatokụk oro ẹbiatde ẹnyụn̄ ẹnam utom ibio ini. Kere ban̄a Theodore ye Ann. Mmọ ẹketọn̄ọ uwem ndọ nte mme asiakusụn̄ tutu mme mbiomo ubon oyom mmọ ẹtre usiakusụn̄. Edi mmọ ẹkesụk ẹnyenyene edu usiakusụn̄! Nte nditọiban mmọ ẹkekọride ẹkponi, mmọ ẹma ẹsisịn udọn̄ ẹnọ mmọ kpukpru ini ndisiak usụn̄. Ke edide akpan n̄kpọ akan, Theodore ye Ann ẹma ẹnịm eti uwụtn̄kpọ, ẹnamde utom ediwak ini nte mme asiakusụn̄ unọ un̄wam. Nte nditọiban oro ẹkekọride ẹkponi, Theodore ye Ann ẹma ẹtọn̄ọ ndisụhọde utom idịbi udia man mmọ ẹnyene ini oro awakde ẹnọ utom an̄wautom.
Ke nditọiban mmọ ẹma ẹkedụk utom uyọhọ ini ẹnyụn̄ ẹkpọn̄ ufọk, Ann ama ọtọn̄ọ usiakusụn̄. Usen kiet enye ama esịn udọn̄ ọnọ Theodore ndikpọn̄ utom esie. Enye ama ọnọ ekikere ete: “Nnyịn mbiba imekeme ndisiak usụn̄.” Theodore ama etịn̄ uduak esie ọnọ eteutom esie. Ke n̄kpaidem esie eteutom esie ama onyịme ndin̄wam ebe ke ndinọ enye utom ibio ini, ọdọhọde ete: “N̄kere ke oyom ndinam utom uyọhọ ini nnọ eteutom fo ko ke enyọn̄ [ke heaven].” Theodore ye Ann ke ẹkop inem idahaemi ndisiak usụn̄ ọtọkiet.
Ndusụk owo ẹketọn̄ọ ndisiak usụn̄ etiene mme idaha oro ẹkedemerede ke uwem mmọ. Akama n̄kpọ mmọn̄eyet n̄kpa eyenan̄wan ye eyeyen mmọ ama anam ebe ye n̄wan oro ẹma ẹkesọn̄ ẹnen̄ede ẹkere ẹban̄a usụn̄ oro mmọ ẹkedade nsụhọ isua uwem mmọ ẹnam n̄kpọ. (Ecclesiastes 7:2) Utu ke ndiyak mfụhọ akan mmọ ubọk, mmọ ẹma ẹdụk utom uyọhọ ini, emi mmọ ẹma ẹkenam idahaemi ke se ibede isua itiaita!
Nte ẹnyịmede, oyom ata ubiere man ẹsọn̄ọ ẹdu ke utom ukwọrọikọ uyọhọ ini. Ke uwụtn̄kpọ, Ernst ye n̄wan esie, Riek, ẹma ẹtọn̄ọ usiakusụn̄ ke ndondo oro nditọ mmọ ẹkekpọn̄de ufọk. Esisịt ini ke oro ebede akani nsan̄a mbubehe ama ọnọ Ernst ata eti utom. Ernst ama ọbọrọ ete: “Nnyịn imenyene mfọnn̄kan eteutom oro akanam odude, ndien nnyịn iben̄eke idem ndikpọn̄ enye!” Ke ntak Ernst ye n̄wan esie ẹkesọn̄ọde ẹdu ke “utom” Jehovah, mme ifetutom efen ẹma ẹberede ẹnọ mmọ. Mmọ ẹma ẹnam utom circuit ke se ibede isua 20 ẹnyụn̄ ẹka iso nte mme asiakusụn̄ tutu osịm mfịn emi. Nte mmọ ẹtua n̄kpọfiọk ẹban̄a usụn̄uwem n̄waidem mmọ? Inikiet ko ke edem ebe ye n̄wan oro ẹkewet ẹte: “Edieke edide uduak Jehovah, ke ọfiọn̄ ita ẹdide nnyịn iyenam usọrọ ọyọhọ isua 50 ke ndọ nnyịn, emi ẹsiwakde ndikot usọrọ inemesịt. Edi nnyịn itịn̄ ye ọyọhọ nsọn̄ọ ite ke mme ata isua inemesịt nnyịn ẹketọn̄ọ ke ini nnyịn ikọtọn̄ọde utom usiakusụn̄.”
Ediwak owo ẹkụt ẹte ke usụn̄ oro adade osịm ntatara utom ada n̄ko osịm akwa idatesịt! Eyenete eren kiet oro ọkọtọn̄ọde utom usiakusụn̄ urua iba ke ama okosịm isua 65 ọdọhọ ete: “Ana ntịn̄ nte ke akananam n̄kwe ini oro ọyọhọde ye ikpọ edidiọn̄ ntem ke uwem mi nte mme isua usiakusụn̄ duop ẹmi ẹbede.” Ebe ye n̄wan oro ẹma ẹkesiak usụn̄ ke se iwakde ikan isua itiaba ẹdọhọ ẹte: “Nso efen ke ebe ye n̄wan ke isua emana nnyịn ye mme idaha nnyịn ẹkpenam? Nnyịn imesiwak ndikụt mbon oro ẹbietde nnyịn ke efakutom—ẹtiede ke ufọk ẹkop inem, ẹkpon ubom, ẹsọn̄, ẹnyụn̄ ẹkwaha. Utom ukwọrọikọ ọnọ nnyịn nsọn̄idem ke ekikere ye ke ikpọkidem. Nnyịn isidu ọtọkiet kpukpru ini. Nnyịn imesiwak ndisak imam ediwak ini inyụn̄ idara uwem.”
Nte ededi, idịghe kpukpru mbonusọn̄ ẹnyene mme idaha oro ẹyakde mmọ ẹsiak usụn̄. Ẹkeme ndinọ mme Christian ẹmi nsọn̄ọ nte ke Jehovah adara sededi oro mmọ ẹkemede ndinam ke utom esie. (Men Mark 12:41-44 domo.) Ke uwụtn̄kpọ, ẹnịm eyenete an̄wan kiet oro obiomode ndo ke ufọk ukpeme. Nte ededi, usụn̄ utom osụk ebeberede ọnọ enye! Dọkta ama obụp enye se enye esidade ediwak ini oro enye enyenede anam. Enye obụk ete: “Mma nsian enye nte ke nsiwakke ndinyene ini oro ekemde. Emi ikan̄wan̄ake enye. Mma ntịn̄ nnọ enye nte ke emi edi sia mme usen mi ẹsiyọhọde ye mme edinam oro ẹnọde uyụhọ. Ami n̄kopke ndobo, edi mmesiyom mbon oro ẹkopde ndobo nnyụn̄ ndomo nditịn̄ nnọ mmọ se Abasi onịmde ọnọ ubonowo.” Enye eberi ke ndidọhọ: “Owo ikemeke ndiyom ekese nto owo emi ekperede ndisịm isua 80. Ẹbọn̄ akam ẹsịn mi man otodo nsụk n̄keme ndinam ediwak owo ẹtiene Jehovah.”
Nte afo omosịm isua edikpọn̄ utom? Emekeme ndisobo idomo edidụk usụn̄ edinam esisịt utom, edi enye idịghe usụn̄ adade osịm edidiọn̄ eke spirit. Kere ban̄a mme idaha fo ye akam. Ekeme ndidi afo eyekeme ndidụk usụn̄ oro adade osịm edinam oro okponde akan ke utom Jehovah.
[Mme ndise ke page 25]
Edikpọn̄ utom ekeme ndida nsịm ntatara edinam ke utom ukwọrọikọ