Ibuot 12
Biọn̄ọ Udịm Mme Idiọk Spirit
1. Didie ke Jesus akanam n̄kpọ ke ini enye okosobode ndiọi spirit?
KE NDONDO oro enye akanade baptism, Jesus Christ ama aka wilderness mbon Judea man ọkọbọn̄ akam onyụn̄ etie ekere n̄kpọ. Do Satan kpa Devil ama odomo ndinam enye abiat ibet Abasi. Nte ededi, Jesus ama esịn n̄kpọ etabi Devil ndien ikeyịreke ke afia esie. Jesus ama osobo mme idiọk spirit eken ke ini utom ukwọrọikọ esie ke isọn̄. Edi, enye ama esisua ọnọ onyụn̄ ọbiọn̄ọ mmọ ndien ndien.—Luke 4:1-13; 8:26-34; 9:37-43.
2. Mme mbụme ewe ke nnyịn idikere iban̄a?
2 Mbụk Bible ẹmi ẹtịn̄de n̄kpọ ẹban̄a mme edinam oro ẹkpenyene ndinam inịm ke akpanikọ nte ke udịm mme idiọk spirit ẹdu. Mmọ ẹsidomo nditụn mme owo usụn̄. Nte ededi, nnyịn imekeme ndibiọn̄ọ ndiọi spirit ẹmi. Edi ndiọi spirit ẹto m̀mọ̀n̄? Ntak emi mmọ ẹsidomode ndibian̄a mme owo? Ndien mme usụn̄ ewe ke mmọ ẹkama ẹyọhọ uduak mmọ? Ndinyene ibọrọ nnọ mme utọ mbụme nte mmọemi eyen̄wam fi ndibiọn̄ọ udịm mme idiọk spirit.
NDIỌI SPIRIT—NTỌN̄Ọ YE UDUAK MMỌ
3. Satan kpa Devil akasan̄a didie edidu?
3 Jehovah Abasi ama anam ata ediwak edibotn̄kpọ eke spirit anyanini mbemiso enye okobotde mme owo. (Job 38:4, 7) Nte ẹkenamde an̄wan̄a ke Ibuot 6, kiet ke otu mme angel ẹmi ama enyene udọn̄ ndinam mme owo ẹtuak ibuot ẹnọ imọ utu ke ndituak ibuot nnọ Jehovah. Ke anyanarede ebịne uduak oro, idiọk angel emi ama ọbiọn̄ọ onyụn̄ ọdọk Andibot edidọk, idem ọnọde akpa n̄wan oro ekikere ete ke Abasi ekedi osu nsu. Do, nte odotde, ọsọn̄ibuot edibotn̄kpọ eke spirit emi ama akabade edi se ẹdiọn̄ọde nte Satan (andibiọn̄ọ) kpa Devil (ọdọk-edidọk).—Genesis 3:1-5; Job 1:6.
4. Didie ke ndusụk angel ẹkenam idiọkn̄kpọ ke eyo Noah?
4 Ekem, mme angel eken ẹma ẹdiana ye Satan kpa Devil. Ke eyo edinen owo oro Noah, ndusụk ke otu mmọemi ẹma ẹkpọn̄ utom mmọ ke heaven ẹnyụn̄ ẹmen idem eke obụk ẹsịne man ẹyụhọ ọkpọsọn̄ udọn̄ idan̄ mmọ ye iban ke isọn̄. Nte eyịghe mîdụhe, Satan okonụk mme angel oro man ẹnam edinam nsọn̄ibuot oro. Enye ama ada okosụn̄ọ ke mmọ ndibon nditọ mbuaha uduot oro ẹkekotde Nephilim, ẹmi ẹkekabarede ẹdi afai afai mbon mfiomo. Ke ini Jehovah akanamde akwa Ukwọ oro otịbe, enye ama osobo mbiara ubonowo oro ye nditọ mme ọsọn̄ibuot angel oro mîkamanake nte obot edide. Mme ọsọn̄ibuot angel oro ẹma ẹbọhọ nsobo ebe ke ndifọrọde idem eke obụk mmọ nnịm nnyụn̄ mfiak nnyọn̄ ke obio mme spirit. Edi Abasi ama akpan mme demon ẹmi ebe ke ndinam n̄kpọ ye mmọ nte mbon oro ẹdụn̄ọde ke n̄kịm n̄kịm ebiet eke spirit. (Genesis 6:1-7, 17; Jude 6) Kpa ye oro, Satan, “ọbọn̄ mme demon,” ye ndiọi angel esie ke ẹkaiso ke nsọn̄ibuot mmọ. (Luke 11:15) Nso idi uduak mmọ?
5. Nso uduak ke Satan ye mme demon esie ẹnyene, ndien nso ke mmọ ẹda ẹmụm mme owo?
5 Idiọk uduak Satan ye mme demon edi ndiwọn̄ọde mme owo n̄kpọn̄ Jehovah Abasi. Ntem, ndiọi owo ẹmi ke ẹbian̄a owo, ke ẹsịn owo ndịk ke idem, ẹnyụn̄ ẹn̄wana ye mme owo ke ofụri mbụk owo. (Ediyarade 12:9) Mme uwụtn̄kpọ eyomfịn ẹsọn̄ọ ẹte ke nyomikọ demon enen̄ede ọdiọk idahaemi akan nte akanam edide ke mbemiso. Man ẹmụm mme owo, mme demon ẹsiwak ndida kpukpru orụk ubụpekpo. Didie ke mme demon ẹsida ubụpekpo ẹmi ẹnam n̄kpọ, ndien didie ke afo ekeme ndinyan̄a idemfo?
NTE NDIỌI SPIRIT ẸDOMODE NDITỤN FI USỤN̄
6. Nso idi ubụpekpo, ndien nso idi ndusụk uduot esie?
6 Nso idi ubụpekpo? Enye edi edinyene ebuana ye mme demon, m̀mê ndiọi spirit, edide nnennen nnennen mîdịghe ebe ke obụpekpo emi edide owo. Ubụpekpo edi akpan n̄kpọ ọnọ mme demon ukem nte udia emi ẹsịnde ke afia edide ọnọ atautop: Enye esitatap n̄kpọ ada. Ndien kpa nte atautop esikamade nsio nsio udia man atap mme unam ọdọn̄ ke afia esie, kpa ntre ke ndiọi spirit ẹsisịn udọn̄ ẹnọ nsio nsio orụk ubụpekpo man ẹda mme owo ẹdisịn ke idak odudu mmọ. (Men Psalm 119:110 domo.) Ndusụk uduot ke otu ẹmi ẹdi ubreidiọn̄, mfọni, ndiyom ndomo, idiọn̄, editọ owo ibọk, edisobo ye mme enyene-nsan̄a ekpo, ye edinyene nneme ye mme akpan̄kpa.
7. Ubụpekpo atara asuana adan̄a didie, ndien ntak emi enye okụtde unen idem ke mme inua-okot idụt Christian?
7 N̄kpọ etabi oro omokụt unen, koro ubụpekpo atap mme owo ke ofụri ererimbot ada. Mbon oro ẹdụn̄de ke mme obio-in̄wan̄ ẹmi ẹtiede akai akai ẹsika ẹbịne mbiaibọk, ndien mbonutom mbakara ẹmi ẹdụn̄de ke ikpọ obio ẹsika ẹbịne mme asiak ntantaọfiọn̄. Ubụpekpo akam okụt unen ke mme inua-okot idụt Christian. Ndụn̄ọde owụt ete ke United States ikpọn̄, n̄kpọ nte magazine 30 ye ibat oro ẹsuande emi ebede 10,000,000 ke ẹtan̄de ẹdian ẹban̄a nsio nsio orụk ubụpekpo. Mbon Brazil ẹsibiat se ibede miliọn dollar 500 ke mme n̄kpọ ubụpekpo ke isua kiet kiet. Edi, mbahade 80 eke ikie ke otu mbon oro ẹsikade mme itie ubụpekpo ke idụt oro ẹdi mbon Catholic ẹmi ẹma ẹkena baptism ẹmi n̄ko ẹsidiade Udia Ọbọn̄. Sia ndusụk mme ọkwọrọ ederi ẹsinamde ubụpekpo, ediwak mbon ido ukpono ẹkere ke Abasi onyịme ubụpekpo. Edi nte onyịme?
NTAK BIBLE OBIOMDE EDINAM UBỤPEKPO IKPE
8. Nso idi ekikere N̄wed Abasi kaban̄a ubụpekpo?
8 Edieke edide ẹkekpep fi ẹte ke ndusụk orụk ubụpekpo ẹdi usụn̄ ndisobo nti spirit, idem ekeme ndikpa fi ndifiọk se Bible etịn̄de aban̄a ubụpekpo. Ẹma ẹdụri ikọt Jehovah utọn̄ ẹte: “Mbufo ẹkûkabade ẹtiene ekpo, ẹkûnyụn̄ ẹbụp mbia idiọn̄, mbak mmọ ẹdisabade mbufo.” (Leviticus 19:31; 20:6, 27; sịghisịghi ubọkn̄wed edi eke nnyịn.) N̄wed Ediyarade eke Bible ọnọ ntọt ete ke utịt “mbia idiọn̄” edidi ke “akwa n̄kpọdiọhọ emi asakde ye ikan̄ ye brimstone, emi edide udiana [nsinsi] n̄kpa.” (Ediyarade 21:8; 22:15) Jehovah Abasi obiom kpukpru orụk ubụpekpo ikpe. (Deuteronomy 18:10-12) Ntak emi edide ntre-e?
9. Ntak emi nnyịn ikemede ndibiere nte ke mme etop eyomfịn ẹtode ererimbot spirit itoho Jehovah?
9 Jehovah ama ọdọn̄ nti spirit, m̀mê ndinen angel, man ẹkenyene nneme ye ndusụk owo mbemiso ẹkewetde Bible ẹma. Tọn̄ọ nte ẹkewet enye ẹkụre, Ikọ Abasi ọmọnọ ndausụn̄ oro mme owo ẹyomde man ẹnam n̄kpọ Jehovah nte enye onyịmede. (2 Timothy 3:16, 17; Mme Hebrew 1:1, 2) Enye ifụmike edisana Ikọ esie ebe ke ndinọ mme etop ẹsọk mme enyene-nsan̄a ekpo. Ofụri utọ etop eyomfịn oro ẹtode ererimbot mme spirit do ẹto ndiọi spirit. Edinam ubụpekpo ekeme ndida n̄kosụn̄ọ ke demon ndifịna owo m̀mê owo ndikam nnyene ndiọi spirit. Ke ntre, Abasi ke ima ima usụn̄ odụri nnyịn utọn̄ ete ikûsịn idem ke edinam ubụpekpo ekededi. (Deuteronomy 18:14; Galatia 5:19-21) Akan oro, edieke nnyịn ikade iso isịn idem ke edinam ubụpekpo ke ima ikọfiọk ekikere Jehovah kaban̄a enye, nnyịn ikpada ye ndiọi spirit ẹmi ẹkesọn̄de ibuot ikponyụn̄ idi mme asua Abasi.—1 Samuel 15:23; 1 Chronicles 10:13, 14; Psalm 5:4.
10. Nso idi ubreidiọn̄, ndien ntak nnyịn ikpefepde enye?
10 Orụk ubụpekpo kiet oro ọwọrọde etop edi ubreidiọn̄—edidomo ndidiọn̄ọ se iditịbede ke ini iso m̀mê ndidiọn̄ọ se owo mîdiọn̄ọke ye un̄wam mme spirit. Ndusụk orụk ubreidiọn̄ ẹdi edisiak ntantaọfiọn̄, edise ekara itiat ndụn̄ọde, edikabade ndap, edikot n̄wed ekaubọk, ye edikama kad tarot ntịn̄ ini iso. Ediwak owo ẹda ubreidiọn̄ nte n̄kpọ oro mîkemeke ndinọ unan, edi Bible owụt ke mme etịn̄ ini iso ye ndiọi spirit ẹsisan̄a kiet. Ke uwụtn̄kpọ, Utom Mme Apostle 16:16-19 etịn̄ aban̄a “spirit idiọn̄” emi akan̄wamde eyenan̄wan kiet ‘ndibre idiọn̄.’ Nte ededi, enye ikenyeneke aba ukeme nditịn̄ ini iso ke ini ẹkebịnde demon oro ẹsio enye ke idem. Nte an̄wan̄ade, ubreidiọn̄ edi n̄kpọ etabi oro mme demon ẹdade ẹtap mme owo ẹkedọn̄ ke afia mmọ.
11. Didie ke edidomo ndinyene nneme ye mme akpan̄kpa ada owo ekesịn ke afia?
11 Edieke afo ofụhọde n̄kpa owo ubon fo oro ẹmade m̀mê n̄kpet n̄kpet ufan, n̄kpọ etabi efen ekeme nditap fi ata mmemmem mmemmem. Enyene-nsan̄a ekpo ekeme ndinọ fi akpan ntọt mîdịghe ekeme nditịn̄ ikọ ke uyo oro ebietde uyo owo oro akakpade. Kpeme idem! Ndidomo ndinyene nneme ye akpan̄kpa ada osịm afia. Ntak-a? Koro mme akpan̄kpa ikemeke nditịn̄ ikọ. Nte ekemede ndidi emeti, Ikọ Abasi etịn̄ in̄wan̄în̄wan̄ ete ke owo akpade enye “afiak ke ntan esie; ke kpasụk usen oro mme uduak esie ẹtak.” Mme akpan̄kpa “ifiọkke baba n̄kpọ kiet.” (Psalm 146:4; Ecclesiastes 9:5, 10) Akan oro, ẹdiọn̄ọ ẹte ke enen̄ede edi mme demon ẹsikpebe uyoikọ mbon oro ẹkekpan̄ade ẹnyụn̄ ẹnọ enyene-nsan̄a ekpo ntọt ẹban̄a owo emi akakpade. (1 Samuel 28:3-19) Ntre “owo emi enyenede nneme ye akpan̄kpa” eyịre ke afia ndiọi spirit onyụn̄ anam n̄kpọ atuaha ye uduak Jehovah Abasi.—Deuteronomy 18:11, 12, NW; Isaiah 8:19.
TO KE EDITAP SỊM EN̄WAN
12, 13. Nso uyarade idu nte ke mme demon ẹkọbọ ke ndidomo nnyụn̄ mfịna mme owo?
12 Ke ini afo adade item Ikọ Abasi oro aban̄ade ubụpekpo esịn ke edinam, afo eyesịn n̄kpọ etabi mme demon. (Men Psalm 141:9, 10; Rome 12:9 domo.) Ndi emi ọwọrọ ke ndiọi spirit ẹyetre ndidomo ndimụm fi? Ke akpanikọ iditreke! Ke ama okodomo Jesus utịm ikata, Satan “[ama] adaha ọkpọn̄ Enye ke ekpri ini.” (Luke 4:13) Ukem ntre, mme ọsọn̄ibuot spirit isitapke mme owo kpọt edi ẹsin̄wana ye mmọ n̄ko.
13 Ti nneme oro ikenyenede ke mbemiso iban̄a en̄wan oro Satan akadade etiene asan̄autom Abasi oro Job. Devil ama anam enye ataba ufene esie onyụn̄ owot ata ediwak nditọufọk esie. Satan ama akam owot nditọ Job. Ekem, enye ama ada ubiak ubiak udọn̄ọ ọtọ Job ke idemesie. Edi Job ama omụm nsọn̄ọnda esie ke Abasi akama ndien ẹma ẹdiọn̄ enye uwak uwak. (Job 1:7-19; 2:7, 8; 42:12) Toto ke ini oro, mme demon ẹmenam ndusụk owo ẹdi imụm m̀mê nnan ẹmenyụn̄ ẹkaiso ndikop uyụhọ ke ndutụhọ oro mme owo ẹbọde. (Matthew 9:32, 33; 12:22; Mark 5:2-5) Mfịn, mme ntọt ẹwụt ẹte ke mme demon ẹsifịna ndusụk owo ke n̄kan̄ idan̄ ẹnyụn̄ ẹnam mbon eken ẹdama idat. Mmọ n̄ko ẹsinam mbon en̄wen ẹwot owo ẹnyụn̄ ẹwot idem, kpa idiọkn̄kpọ ẹmi ẹnamde ẹdian Abasi. (Deuteronomy 5:17; 1 John 3:15) Edi, ediwak tọsịn mme owo oro ndiọi spirit ẹmi ẹkemụmde inikiet ko ẹma ẹkeme ndikịbe mbọhọ. Didie ke mmọ ẹkekeme ndinam emi? Mmọ ẹkenam ntre ebe ke ndinam akpan usio-ukot.
NTE ẸKPEBIỌN̄ỌDE NDIỌI SPIRIT
14. Nte ekemde ye uwụtn̄kpọ mme Christian mbon Ephesus eke akpa isua ikie, didie ke afo ekeme ndibiọn̄ọ ndiọi spirit?
14 Nso idi usụn̄ kiet emi afo ekemede ndibiọn̄ọ ndiọi spirit nnyụn̄ n̄kpeme idemfo ye ubon fo nsio ke mme afia mmọ? Mme Christian akpa isua ikie ke Ephesus ẹmi ẹkesinamde ubụpekpo mbemiso ẹkekabarede ẹdi mme andinịm ke akpanikọ ẹma ẹnam mme akpan usio-ukot. Nnyịn ikot ite ke “ediwak mmọemi ẹkam ẹbrede idiọn̄ ẹtan̄ n̄wed mmọ ẹdi ẹdifọp ke iso kpukpru owo.” (Utom 19:19) Idem ọkpọkọm afo ukobụpke ekpo, top n̄kpọ ekededi oro enyenede n̄kpọ ndinam ye ubụpekpo duọk. Emi esịne mme n̄wed, magazine, vidio, ndise, ikwọ ẹmi ẹmụmde-mụm ẹnịm, ye mme n̄kpọ ẹdade ẹbụp ekpo. Mmọ n̄ko ẹsịne mme mbiet, n̄kpọ n̄kpemeidem ye mme n̄kpọ eken oro ẹkọn̄ọde kaban̄a ukpeme, ye mme enọ ẹbọde ẹto mme obụpekpo. (Deuteronomy 7:25, 26; 1 Corinth 10:21) Ke ndinam an̄wan̄a: Ke anyanini mme demon ẹma ẹsin̄wana ye ebe ye n̄wan ke Thailand. Ekem mmọ ẹma ẹtop mme n̄kpọ oro ẹnyenede ebuana ye ubụpekpo ẹduọn̄ọ. Nso ikedi utịp? Mmọ ẹma ẹbọhọ en̄wan otode mme demon ndien ke oro ebede ẹma ẹnam ata n̄kọri eke spirit.
15. Ke ndibiọn̄ọ udịm mme idiọk spirit, nso idi usio-ukot efen oro ẹyomde?
15 Man ẹbiọn̄ọ ndiọi spirit, akpan usio-ukot efen edi ndinam item apostle Paul ndimen ofụri n̄kpọekọn̄ eke spirit oro Abasi ọnọde nsịne. (Ephesus 6:11-17) Ana mme Christian ẹsịn odudu ke ukpeme oro mmọ ẹkpemede ẹbiọn̄ọ ndiọi spirit. Nso ke usio-ukot emi esịne? Paul ọkọdọhọ ete: “Ẹnyụn̄ ẹda mbuọtidem nte otuekọn̄, emi ẹdidade ẹkeme ndinịme kpukpru enyịmikan̄ andidiọk.” Ke akpanikọ, nte mbuọtidem fo okopde odudu akan, ntre ke ukeme fo ndibiọn̄ọ udịm mme idiọk spirit edikpon.—Matthew 17:14-20.
16. Didie ke afo ekeme ndisọn̄ọ mbuọtidem fo?
16 Didie ke afo ekeme ndisọn̄ọ mbuọtidem fo? Ebe ke ndikaiso n̄kpep Bible nnyụn̄ nda item esie nsịn ke edinam ke uwem fo. Mbuọtidem owo ndikop odudu ọkọn̄ọ ofụri ofụri ke isọn̄ esie—kpa ifiọk Abasi. Nte afo unyịmeke ute ke nnennen ifiọk oro afo ọkọbọde onyụn̄ ekerede akpan akpan aban̄a nte afo ekekpepde Bible ọmọsọn̄ọ mbuọtidem fo? (Rome 10:10, 17) Eyịghe idụhe, ke ntre, nte afo akade iso ke ukpepn̄kpọ emi onyụn̄ anamde enye edi ido fo ndidụk mbonoesop eke Mme Ntiense Jehovah, mbuọtidem fo eyekam okop idem akan oro. (Rome 1:11, 12; Colossae 2:6, 7) Enye edidi akwa n̄kpọ ukpeme ke ndibiọn̄ọ en̄wan mme demon.—1 John 5:5.
17. Nso usio-ukot efen ẹkeme ndidi se ẹyomde ke ndibiọn̄ọ udịm mme idiọk spirit?
17 Nso usio-ukot efen ke owo emi ebierede ndibiọn̄ọ udịm mme idiọk spirit ekeme nditiene? Mbon Ephesus ẹkedide Christian ẹma ẹyom ukpeme koro mmọ ẹkedụn̄de ke obio oro ọkọyọhọde ye utuakibuot nnọ mme demon. Ntem, Paul ọkọdọhọ mmọ ete: “Ẹbọn̄ akam ke Spirit kpukpru ini.” (Ephesus 6:18) Sia nnyịn idụn̄de ke ererimbot oro ọyọhọde ye mme demon, ndibọn̄ akam ọkpọsọn̄ ọkpọsọn̄ mben̄e ukpeme Abasi edi akpan n̄kpọ ke ndibiọn̄ọ ndiọi spirit. (Matthew 6:13) N̄kpọ un̄wam ke afan̄ emi edi un̄wam eke spirit ye akam ẹmi mbiowo oro ẹmekde ke esop Christian ẹbọn̄de.—James 5:13-15.
KAISO KE EN̄WAN ORO AFO AN̄WANADE YE NDIỌI SPIRIT
18, 19. Nso ke ẹkeme ndinam edieke mme demon ẹfiakde ẹnọ owo mfịna?
18 Idem ke ẹma ẹkenam mme akpan usio-ukot ẹmi, nte ededi, ndiọi spirit ke ẹfefịna ndusụk owo. Ke uwụtn̄kpọ, eren kiet ke Côte d’Ivoire ama ekpep Bible ye Mme Ntiense Jehovah onyụn̄ abiat kpukpru n̄kpọ n̄kpemeidem esie efep. Ke oro ebede, enye ama anam eti n̄kọri, ayak uwem esie ọnọ Jehovah, onyụn̄ ana baptism. Edi urua kiet ke enye ama akana baptism, mme demon ẹma ẹtọn̄ọ ndifiak nnọ enye mfịna, ndien uyo ẹma ẹdọhọ yak enye esịn obufa ido ukpono esie. Edieke emi okpotịbede ọnọ fi, ndi ọkpọwọrọ ke unyeneke aba ukpeme Jehovah? Inen̄ekede idi ntre.
19 Okposụkedi mfọnmma owo oro Jesus Christ ekenyenede ukpeme Abasi, enye ama okop uyoikọ idiọk edibotn̄kpọ eke spirit oro, Satan kpa Devil. Jesus ama owụt se ẹkpenamde ke utọ idaha oro. Enye ọkọdọhọ Devil ete: “Daha Mi ke usụn̄, Satan.” (Matthew 4:3-10) Ukem ntre, afo ekpenyene ndisịn ndikpan̄ utọn̄ nnọ uyo ẹmi ẹtode ererimbot mme spirit. Biọn̄ọ ndiọi spirit ebe ke ndikot Jehovah nyom un̄wam. Ih, bọn̄ akam uyo ọwọrọ kot enyịn̄ Abasi. Mme N̄ke 18:10 ọdọhọ ete: “Enyịn̄ Jehovah edi ọkpọsọn̄ tọwa: eti owo efehe odụk ke esịt, ndien odu ke ifụre.” Eren Christian oro ke Côte d’Ivoire ama anam emi, ndien ndiọi spirit oro ẹma ẹtre ndifịna enye.—Psalm 124:8; 145:18.
20. Ke ibio ibio, nso ke afo ekeme ndinam man ọbiọn̄ọ ndiọi spirit?
20 Jehovah amayak ndiọi spirit ẹkaiso ẹdu uwem, edi enye esiwụt odudu esie, akpan akpan ke ibuot ikọt esie, ndien ke ẹtan̄a enyịn̄ esie ke ofụri isọn̄. (Exodus 9:16) Edieke afo asan̄ade ekpere Abasi, inaha afo efehe ndiọi spirit. (Numbers 23:21, 23; James 4:7, 8; 2 Peter 2:9) Odudu mmọ enyene adan̄a. Ẹma ẹnọ mmọ ufen ke eyo Noah, ẹsion̄o mmọ ke heaven ke ndondo emi ẹduọn̄ọ, ndien idahaemi ẹtie ẹbet akpatre ubiereikpe. (Jude 6; Ediyarade 12:9; 20:1-3, 7-10, 14) Ke akpanikọ, mmọ ẹkop ndịk ẹban̄a nsobo mmọ oro edide. (James 2:19) Ntre edide ndiọi spirit ẹdomo ndida ndusụk orụk n̄kpọ etabi ntap fi m̀mê ndin̄wana ye afo ke usụn̄ ekededi, afo emekeme ndibiọn̄ọ mmọ. (2 Corinth 2:11) Sọn kpukpru orụk ubụpekpo, da item Ikọ Abasi sịn ke edinam, nyụn̄ yom unyịme Jehovah. Nam emi ye unana ubiatini, koro uwem fo ọkọn̄ọ ke afo ndibiọn̄ọ udịm mme idiọk spirit!
DOMO IFIỌK FO SE
Didie ke ndiọi spirit ẹdomo nditụn mme owo usụn̄?
Ntak emi Bible obiomde ubụpekpo ikpe?
Didie ke owo ekeme ndikịbe mbọhọ udịm mme idiọk spirit?
Ntak emi afo akpakade iso ndibiọn̄ọ ndiọi spirit?
[Ndise ke page 110]
Didie ke afo ese ubụpekpo ke ediwak uduot esie?